Graça

8 किजोकि विश्वासेरे ज़िरिये परमेशरेरे अनुग्रहे सेइं तुसन मुक्ति मैल्होरीए, ते तुसेईं अपनो आप एप्पू नईं बच़ावरो बल्के परमेशरेरे दाने सेइं तुस बच़ोरेथ। 9 ते भले कम्मन सेइं नईं, एरू न भोए कि कोई घमण्ड केरे।

4 पन परमेशर ज़ै बड़ो दया केरनेबालोए; अपने तैस बड़े प्यारे सेइं, ज़ैस सेइं तैने असन सेइं प्यार कियो। 5 ज़ैखन अस पापां केरे वजाई सेइं मर्रे लोकां केरे ज़ेरे थिये, तैनी असन ज़िन्दगी दित्ती ज़ैखन तैनी मसीह मुड़दन मरां ज़ींतो कियो, परमेशरेरे अनुग्रहे सेइं तुसन मुक्ति मैल्होरीए।

23 एल्हेरेलेइ कि सेब्भेईं पाप कियो, ते तैस महिमा करां दूर आन ज़ै परमेशर देते। 24 पन परमेशरे अपने अनुग्रहे सेइं अस पापां केरि सज़ाही करां यीशु मसीहेरे ज़िरिये छुटाए ते मुफ्ते मां धर्मी ठहराए।

15 पन परमेशरेरू वरदान आदमेरे पापेरू ज़ेरू नईं, इन सच़्च़े कि एक्‍की मैन्हु यानी आदमेरे पापेरे वजाई सेइं बड़े लोक मरे। पन परमेशरेरे अनुग्रह त कने तैसेरू वरदान बड़े लोकां केरे लेई महाने ज़ैन एक्‍की मैन्हु यानी यीशु मसीहेरे अनुग्रहे सेइं एइते।

21 कि ज़ेन्च़रे सेब्भी लोकेईं पाप किये ते मरे, तेन्च़रे परमेशरेरो अनुग्रह राज़ केरते ते परमेशरे अस इश्शे प्रभु यीशु मसीहेरे वजाई सेइं धर्मी ठहरावरेम। मतलब असन हमेशारी ज़िन्दगी मैल्हेली।

14 ते तुसन पुड़ पापेरू राज़ न भोल्हु, किजोकि तुस मूसेरे कानूनेरे अधीन नईं बल्के अनुग्रहेरे अधीन आथ।

धार्मिकता ते दास

15 त कुन भोव कि अस एल्हेरेलेइ पाप केरम, कि असां मूसेरे कानूनेरे अधीन नईं बल्के अनुग्रहेरे? नईं, कधे नईं।

9 परमेशरे असन मुक्ति दित्ती, ते अस पवित्र ज़िन्दगी ज़ींनेरे लेई कुजाए, तैने अस एल्हेरेलेइ नईं कुजेवरे कि असेईं रोड़ां कम्मां कियां, किजोकि दुनिया बनाने करां पेइलो परमेशरेरो ई मकसद थियो कि तै यीशु मसीह इश्शे लेई इस दुनिया मां भेज़तां असन पुड़ अनुग्रह हिराए।

11 किजोकि परमेशरे सेब्भी लोकन मुक्ति देनेरे लेई अक बत देइतां अपनो अनुग्रह हिराव। 12 परमेशर अपने अनुग्रहेरे ज़िरिये असन शिखालते, परमेशर असन शिखालते कि अस तेरहो बर्ताव न केरम ज़ैस सेइं तै खुश न भोए। ज़ेन्च़रे गैर विश्वासी चीज़ां केरू लालच़ केरतन तुस एरू न केरा, तुस ज़ांतगर इस दुनियाई मां आथ, अक्लमन्द ते धर्मी लोकां केरो ज़ेरो ते एरो ज़ेरो बर्ताव केरा ज़ैस सेइं परमेशर खुश भोते।

पवित्र ज़िन्दगी ज़ींनेरी बुलाहट

13 एल्हेरेलेइ अपने मने तियार केरा ते अपने आपे कैबू मां रखा। तैस मुक्तरी उमीद रखा ज़ै तुसन अनुग्रहे सेइं तेइस मैल्हनी ज़ेइस यीशु मसीह दुबारां इस दुनियाई मां एजनोए।

10 हुनी परमेशर ज़ै सारे अनुग्रहे सेइं भेरतांए, तैने अस हमेशारी महिमाई मां शामल भोनेरे लेई च़ुनोरेम किजोकि इश्शो रिश्तो यीशु मसीह सेइं आहे। थोड़े वक्तेरे दुख झ़ैल्‍लनेरे बाद परमेशर तुसन सही बनालो ताके तुसन मां कोई गलती न राए, तै तुश्शे दिलन मज़बूत केरेलो ताके तुस मज़बूती सेइं तैस पुड़ विश्वास केरथ।

8 यहोवा दया केरनेबालो, अनुग्रह केरनेबालो, क्रोधे केरने मां च़िर लानेबालो ते बड़ो प्यार केरनेबालोए।

6 पक्‍की भलियाई ते करुणा सैरी उमरी

मीं सेइं साथी-साथी राहेली;

ते अवं हमेशा यहोवारे घरे मां रेइलो।

17 इश्शे परमेशर यहोवारी कृपा असन पुड़ भोए,

तू इश्शे हथ्थां केरू कम इश्शे लेई मज़बूत केर,

इश्शे हथ्थां केरां कम्मां मज़बूत केर।

प्यार केरनेबालो परमेशर

1 हे यहोवा, मीं तू मुसीबतरे डुग्घे समुन्दरे मरां याद कियो!

2 हे प्रभु, मेरी शुन!

तेरे कन्न मेरे बिनतरे पासे ध्याने सेइं लगोरे रान!

24 यहोवा तीं आशिर्वाद दे, ते तेरी हिफाज़त केरे;

25 यहोवा तीं पुड़ अपने तुत्तरेरी लौ चमकाए*,

ते तीं पुड़ अनुग्रह केरे।

26 यहोवा अपनु तुत्तर तेरे पासे फिराए, ते तीं शान्ति दे।

परमेशरेरो अपने लोकन पुड़ अनुग्रह

18 फिर भी यहोवा एल्हेरेलेइ च़िर लाते, कि तै तुसन पुड़ अनुग्रह केरे, ते एल्हेरेलेइ उच्‍चे केरेलो कि तुसन पुड़ दया केरे। किजोकि यहोवा न्याय केरनेबालो परमेशरे; धन आन तैना ज़ैना तैसेरे इंतज़ारे मां रहतन।

21 प्रभु यीशुएरो अनुग्रह परमेशरेरे लोकन सेइं साथी राए। आमीन।

25 इश्शे प्रभु यीशु मसीहेरो अनुग्रह तुसन पुड़ भोतो राए। आमीन।

16 एल्हेरेलेइ एज्जा असां दिलेरी सेइं, अनुग्रह देनेबाले परमेशरेरे तखतेरे सामने च़लम, ताके तै असन पुड़ अनुग्रह ते दया केरे ते ज़रूरतरे मौके तै इश्शे मद्दत केरे।

24 पन मेरी जान, मेरे लेई कोई कदर कीमत न रख्खे, त बस्सा अवं एन चाताईं कि मेरी दौड़ पूरी भोए ते तैस सेवाई पूरी केरि, ज़ै मीं परमेशरेरे अनुग्रहेरे खुशखबरी पुड़ गवाही देनेरे लेई प्रभु यीशु करां मैल्ही।

16 "किजोकि परमेशरे दुनियारे लोकन सेइं एत्रो प्यार कियो कि तैनी अपनु एकलौतू मट्ठू दित्तू, ताके ज़ै कोई तैस पुड़ विश्वास केरे, तै नाश न भोए, बल्के हमेशारी ज़िन्दगी हासिल केरे।

14 "एल्हेरेलेइ अगर तुस लोकां केरे पाप माफ़ केरेले, त तुश्शो सुर्गेरो बाजी भी तुश्शे पाप माफ़ केरेलो।

13 ज़ै अपने पाप छ़ुपेइतां रखते, तैसेरू कम कामयाब न भोए,

पन ज़ै तैन्न मन्ते ते शारते भी,

तैस पुड़ महरबानी की गाली।

हिजकिय्याह राज़ेरे ज़िरिये फ़सह तिहारेरी तियारी

1 फिरी हिजकिय्याह राज़े सारे इस्राएले मां ते यहूदा मां ई समाद भेज़ो, ते एप्रैमे ते मनश्शे कां इस इरादे सेइं चिट्ठी लिखतां भेज़ी, कि तुस यरूशलेम नगरे मां यहोवारे भवने मां इस्राएलेरे परमेशर यहोवारे लेई तिहार मनानेरे लेई एज्जा। 2 राज़े ते तैसेरे हाकिमेईं ते यरूशलेमेरे लोकेईं सलाह कियोरी तिहार दूइयोवं महीने मां मनाम। 3 तैना तैस मौके एस वजाई सेइं न मनेई सखते थिये, किजोकि थोड़े ज़ेरे याजकेईं अपनो आप पवित्र कियोरो थियो, ते लोक यरूशलेम नगरे मां अकोट्ठे न थिये भोवरे। 4 ऐह गल राज़े ते तैसेरे लोकन रोड़ी लगी। 5 तैखन तैनेईं ऐह गल कानूनेरे किताबरे मुताबिक ठहराई, कि बेर्शेबा नगरे करां लेइतां दान नगरेरे सारे इस्राएली लोकन मां ई प्रचार कियो गाए, कि यरूशलेमे मां इस्राएलेरे परमेशर यहोवारे लेई फ़सह तिहार मनाने एज्जा। किजोकि तैनेईं एत्री तैधादी मां पेइलू एन्च़रे न थियूं मनवरू ज़ेन्च़रे कि लिखेरूए। 6 एल्हेरेलेइ राज़ेरे दूत तैसेरे हाकिमन करां चिट्ठी नेइतां राज़ेरे हुक्मेरे मुताबिक सारे इस्राएले ते यहूदा मां हंठते फिरे, ते इन ज़ोते जे, "हे इस्राएली लोकव! अब्राहम, इसहाक, ते इस्राएलेरे परमेशर यहोवारे पासे फिरा, कि तै अश्शूरेरे राज़ेरे हथ्थे करां बच़ोरे तुश्शे लोकां केरे पासे फिरे। 7 ते अपने दादे-पड़दादां ते अपने इस्राएली भियालां केरे ज़ेरे न बना, ज़ैनेईं अपने दादे-पड़दादां केरे परमेशर यहोवा सेइं धोखो कियोरो थियो, ते तैनी तैना हैरान भोनेरी वजा बनाए, ज़ेन्च़रे कि तुस एप्पु हेरने लगोरेथ। 8 हुनी तुस अपने दादे-पड़दादां केरि ज़ेरि ज़िद न केरा, बल्के यहोवारे अधीन भोइतां तैसेरी तैस पवित्र ठारी मां एज्जा ज़ै तैनी हमेशारे लेई पवित्र कियोरीए, ते अपने परमेशर यहोवारी आराधना केरा, कि तैसेरो भड़कोरो क्रोध तुसन पुड़ेरां दूर भोइ गाए। 9 अगर तुस यहोवारे पासे फिरेले त ज़ैनेईं तुश्शे भियाल ते बाल-बच्‍चे गुलाम बनेइतां नेवरेन, तैना तैन पुड़ दया केरेले, ते तैना इस मुल्खे मां वापस एज्जेले किजोकि तुश्शो परमेशर यहोवा अनुग्रह ते दया केरनेबालोए, ते अगर तुस तैसेरे पासे फिरेले त तै तुसन कबूल केरेलो।"

10 एन्च़रां सेइं राज़ेरे दूत एप्रैम ते मनश्शेरे प्रादेशन मां नगरे-नगरे हंठते च़लते जबूलून प्रदेशे तगर जे। पन तैनेईं तैन केरो मज़ाक बनाव, ते तैन पुड़ हसने लग्गे। 11 फिर भी आशेर, मनश्शे ते जबूलून गोट्लन मरां किछ लोक दीन भोइतां यरूशलेम नगरे जो आए। 12 यहूदा मां भी परमेशरेरी एत्री शक्ति भोइ, कि तैना अक मन भोइतां, ज़ै हुक्म हिजकिय्याह राज़े ते हाकिमेईं यहोवारे वचनेरे मुताबिक दित्तोरो थियो, तैस मन्नेरे लेई तियार भोए।

फ़सह तिहार मनानू

13 एन्च़रां सेइं बड़े लोक यरूशलेम नगरे मां एल्हेरेलेइ अकोट्ठे भोए, कि दूइयोवं महीने मां अखमीरी रोट्टरू तिहार मनाम।✝ 14 तैन सारे लोकेईं उठतां, यरूशलेमेरी देबतां केरि वेदी ते गुग्गल बालनेरी सैरी ठारां छ़ुइतां किद्रोनेरे नाले मां शैरी। 15 तैखन दूइयोवं महीनेरे च़ेवधोवं दिहाड़े तैनेईं फ़सह तिहारेरे लेई जानबर बलि किये, तैखन याजक ते लेवी शरमिन्दे भोए ते तैनेईं अपनो आप शुद्ध केरतां होमबलि केरनेरे लेई जानबर यहोवारे भवने मां आने। 16 तैना अपने नियमेरे मुताबिक, मतलब परमेशरेरे दास मूसेरे कानूनेरे मुताबिक, अपने-अपने जगाई पुड़ खड़े भोए, ते याजकेईं बलिदानां केरो खून लेवी केरे हथ्थे मरां नेइतां छ़िड़को।✝ 17 किजोकि सभाई मां किछ एरे लोक थिये ज़ैनेईं अपनो-आप शुद्ध न थियो कियोरो। एल्हेरेलेइ सारे अशुद्ध लोकां केरे फ़सह तिहारेरे जानबर बलि केरनेरो अधिकार लेवी लोकन दित्तो जेव, कि तैन यहोवारे लेई शुद्ध केरन। 18 एप्रैम, मनश्शे, इस्साकार ते जबूलून गोट्लन मरां बड़े लोकेईं अपनो आप शुद्ध न थियो कियोरो। फिर भी तैना फ़सह तिहारेरे जानबरेरू मास लिखोरी विधरे खलाफ खाते थिये। किजोकि हिजकिय्याहे तैन केरे लेई ई प्राथना कियोरी थी, "यहोवा ज़ै भलोए, तै तैन सेभी केरे पाप ढेक्‍की दे। 19 ज़ैनेईं अपने पूर्वजां केरे परमेशर यहोवारी तलाशी मां अपनो मन लेवरोए, चाहे तैना पवित्र ठारारी विधरे मुताबिक शुद्ध न भी भोन।" 20 ते यहोवा हिजकिय्याहेरी ई प्राथना शुन्तां लोक बझ़ाए। 21 ज़ैना इस्राएली यरूशलेम नगरे मां हाज़र थिये, तैना सत दिहाड़न तगर अखमीरी रोट्टरू तिहार बड़े आनन्दे सेइं मनाते राए। ते रोज़ लेवी ते याजक बड़े ज़ोरे सेइं बाज़े बज़ेइतां यहोवारी आराधना केरते राए। 22 ज़ेत्रे लेवी यहोवारी सेवा समझ़दैरी सेइं केरते थिये, तैन केरि हिजकिय्याह राज़े हिम्मत बधाई। एन्च़रां सेइं तैना मेलबलि च़ैढ़तां अपने पूर्वजां केरे परमेशर यहोवारे सामने इकरार केरते राए, ते तैना पेइले दिहाड़े करां लेइतां तिहारेरे सत दिहाड़न तगर खाते राए।

फ़सह तिहार दूइयोवं फेरे मनावं गानू

23 तैखन सैरी सभारे लोकेईं सलाह की, कि अस होरे सत दिहाड़े फ़सह तिहार मनाम। ते तैनेईं होरे सत दिहाड़े फ़सह तिहार मनाव। 24 किजोकि यहूदारे राज़े हिजकिय्याह, लोकन 1000 बछ़ड़ां ते 7000 गब्बां दित्तोरां थियां, ते हाकिमेईं लोकन 1000 बछ़ड़ां ते 10000 गब्बां दित्तोरां थियां, ते बड़े याजकेईं अपनो आप शुद्ध कियोरो थियो। 25 तैखन याजक ते लेवी लोकन समेत यहूदारी सारी सभा, ते इस्राएले मरां एवरे लोकां केरि सभा, ते इस्राएलेरे मुल्खे मरां एवरे लोक, ते यहूदा प्रदेशे मां रानेबाले परदेशी, एन सेभेइं खुशी मनाई। 26 एन्च़रां सेइं यरूशलेम नगरे मां बड़ी खुशी मनाई जेई, किजोकि दाऊदेरे मट्ठे इस्राएलेरे राज़े सुलैमानेरे राज़ केरनेरे दिहाड़न करां एरी गल यरूशलेम नगरे मां न थी भोवरी। 27 आखरी मां लेवी याजकेईं खड़े भोइतां लोकन आशिर्वाद दित्तो, ते तैन केरि तै प्राथना सुर्गे तगर पुज़्ज़ी जेई, ते परमेशरे तैन केरि शुनी।