Juízo

21 Jisas yegl didre, ama yegl dugwa, Na Nina ye yoba geglkwa i, ere i kor edumere yegl, na ye Wam moglka i, nana primere yoba kor moraiglkwa i, teiga. 22 Te, Na Nina moglkwa i, ye yoba kotno prisre, pre yubu si, yegl ta erekrukwa. I siragl pre na ye Wam moglka i, kogon yegl mere nare kodugwa pre nana yoba mudu kotno prisre, pre yubu sinaglka. 23 Na Nina kogon yegl mere narukwa i, yoba ye kagie kade teimere yegl, na ama kagna kade naraiglmedi pre kogon yegl narukwa. Yoba ta na kagna kade narekran, ye God na dedugwa i ama kagie kade tekrumiwe di, Jisas yegl dugwa.

24 Jisas ka yegl didre, ama yegl dugwa, Na ene ka kaima di teiga, Yoba ta na kana prisre, God na dedugwa i kaima dumedi pre meduglkwa i, ye aimadi kamin kor morabuka i, i kodugwa. Ye geglkwa yugobunomo kide kodidre, ede pi kor meglkwa yugobunomo i mina pi kodugwa. Te, God ye okuo yoba ka tage tenabuka i, ye yoba i ta ka tage tekrabiwe dugwa.

25 Ana Jisas ka yegl di kodidre, ama yegl dugwa, Na ene ka kaima di teiga, Ege okuo ta unan, Na God Wam moglka i, ka ta dibo, yoba geglkwa i prisre, adigl u kor enaiglkwa. Te, erme pra, yoba geglkwa tau ama na kana prisre, adigl u kor pi kodigwa. 26 I siragl pre Na Nina ye kor meglkwa mabuno moglmere yegl, ye na kor meglkwa mabuno nare kodugwa pre yoba kor aimadi moraiglkwa mabuno i, na moglka.

27 Jisas yegl didre, ama yegl dugwa, Na Yoba Wam moglka i pre God na yoba mudu kotno pratnedi kagna kade nare kodugwa. 28,29 Na erme ka diga i, ene prisre, nagino koglkrio! I siragl pre ege okuo ta unan, na Yoba Wam moglka i ka ta dibo, yoba geglkwa i mudu prisre, adigl u kor enaiglkwa. Ye adigl u kor enaiglkwa i, yoba wakai ta erikwa i, aimadi kamin kor meglbi, kide ta erikwa i ka tage inaiglmiwe di, Jisas yegl dugwa.

Jisas ira moglkwa i, nogugl paugwa

30 Ana Jisas ka yegl di kodidre, ka ta ama yegl dugwa, Na nana primere kogon ta eraglka i, kuno ta erekrukwa. God prumere i keme erika. Te, na taragl kane kane pre yubu siga i, God na di narumere keme pre yubu siga. Na nana primere kogon ta erekrika ba God na dedugwa i keme prumere erika pre na taragl kane kane kuno keme pre yubu siwe dugwa.

31 Ana na ira moglka i, nana swara keme ene di pogl tebo, ene na kibi dumedi praiglkwa.

7 Yubun di prikwa ba na ene ka kaima di teiga, na enaglmara i pre ene mina wakai panabuka. Na ta pikribo, Ake Ple Yoba ene meglmara ta ukrabuka ba na ede ebo, ene meglmara unabedi dedenaluwe di, yegl dugwa.

8 Ana God Murubuglomo unabe diga i, unabuka igne, yoba mabuno suota pre pogl sinaiglmedi i nogugl ede tenabuka. Ye tadaglme mabuno ya te, yoba du moraiglkwa i ya te, God kotmo unabere i, i nogugl ede tenabuka. 9 Tadaglme mabuno i, yoba na we di pre mediglkrikwa pre tadaglme erikwa.

30 Ana yoba ka yegl digo, Jisas di ikne ede, yegl dugwa, Ka ta ugwa i, na pre ta ukrukwa ba ene pre medraiglkwa pre umiwe dugwa. 31 God makandigle yoba ka tage tenabuka i, kwande ede magigl u kodugwa. U kodugo, te yagl kide bitno moglsre, dumo makan sugl moglkwa i, God ama ka tage tedre, si meda edenabuka i, ama magigl erumiwe dugwa. 32 Yegl didre, ama yegl dugwa, Na makadigle egre dinatnedi na ake i mitna edibi, paibo, yoba mudu ede u na moglmara unaiglmiwe dugwa.

38 Dugo, yagl i yegl dugwa, Yagl Kade yo, na pre mediluwe dugwa. Didre, Jisas goglko bodugl tedre, ye kagie kade togwa.

39 Yagl i yegl eruko, Jisas ere mogl, ka ta yegl dugwa, Na ede makandigle wiga i, na yoba kan yubu sinagledi wiga. Yoba gumuglno kin yogwa i, kanibi, yoba ta kan pogl sumnedi prikwa i, gumuglno kin yenabedi wiwe di, Jisas yegl dugwa.

Taragl kebra pre kigl nonga dikramga

1 Ana yoba ta Jisas pre medrabuka ba ye ere mogl, Na siragl mere mogl pai eribo wakai panabumada di, kina suo yenabuka i ta moran, ene no agro ta moglmedi kan, ye di i suna edio. Ye di i suna edidre, kina suo yenabara i pre kigl nonga dikrio. 2 Yoba ta nomane swara keme yenabuka i, ye mie nenamga i, aglau ta paikrumiwe di, pre pogl sinabuka ba yoba ta kina suo yenabuka i, ye pre pogl sikre, mie nenamga i, aglau pamiwedi prabuka. 3 Yoba ta mie nogwa i, ye ere mogl, yoba ta nekrukwa i du erumiwe di, yegl ta prikrabuka. Te, kaya mokna keme nogwa yoba i ere mogl, mie nogwa yoba i God gumuglo mina aglau erumiwedi prikrabuka. God yoba i wakai kan kodugwa. 4 Yoba ta ere mogl, yoba pere ta niglmo kogonmo yoba Kide etniwe dinabuka i, ye kogonmo ta paikrukwa. Yoba ta ye niglmo kogonmo ere togwa yoba i, yene Wakai etniwe dinabuka mo Kide etniwe dinabuka i, kuno erukwa. Kuno yegl mere, ene meglmara suna i, taragl tau yoba kinano suo yenabara i mina ene ikne ikne Kide etniwe dinaiglkwa i ta kuno erekrukwa. Yagl Kade swara ene mudu bitno moglkwa pre yene ene mogl pai eraiglmara ake kun ere tedre, Wakai erimiwe dinabuka keme paugwa.

12 Yegl pre nono pre pogl sinamga. Nono swara swarade siragl mere mogl pai eunere i, God gumuglo mina adigl mogl, di poramga.

13 Ana nono swara swarade mogl pai eunere i, God moglmara di poramga pre ene ogono buglo si iro edidre, agroma abaroma ta yoba kide meglme digwa i, kide kodio. Mabuno i kide kodidre, enene mabunono siragl mere beglkwa i kan kun ersre, wan moraiglkwa. I siragl pre ene mabuno ta beglbi, agroma abaroma kandre, kide praiglkwa i mo ene eraiglmere yegl ta sika sidre, mabuno kide ta eribi, kuno ta erekrukwa.

14 Na ka swara ta yegl dinaglka, na pre kan erika i, mie kane kane mo kaya mokna kane kane ta i nenamga i, aglau ta paikrukwa. Ka i, na drana mina dikrika ba nono Yaglno Kade Jisas i, yene dugwa pre na ka yegl diga. Yegl paugwa ba yoba ta ere mogl, taragl swara ta i nenabuka i aglau pamedi prisre, i nenan, ye pre ka kaima aglau paugwa.

17 Nono yubun yegl mere imga i, God yobama munara okna kana plau di kodugwa mere yegl paugwa. Nono okna kana ka tage imga pre yoba God kamo wakai sedigwa meglkwa i, siragl mere ka tage inaiglme? Ye yubun podo kide inaiglkwa.

5 Yegl pre ene ere mogl, Yaglno Kade Jisas niglmo kogonmo yoba kan yubu sidre, Yoba ta i kogon wakai eruko, tau i kogon wakai ta erekrimiwe digwa i, kide kodio! Yagl Kade yene udre, ye yoba nomano kide wakai siragl mere atne paugwa ya te, kogon siragl mere erikwa i, yene yubu sinabuka. Yubu sinan, yoba kogon wakai ta eraiglkwa i, God yene di wakai yei tenabuka.

2 I siragl pre ene siragl mere yoba ta kan yubu sinaiglkwa i, God ene ama kan yubu sinabuka. Te, ene siragl mere yoba wakai ere tenaiglmere mere yegl God kuno ere, ere ikne edenabuka.

3 Ana siragl eruko, ene agitn gumuglo mina ede dekne kebra ta paugwa ibo kandre, ede mudu ta enene gumugln mina paugwa i kankre, dine? 4 Ede podo ta ene gumugln mina pai moglko, ene kanige ere, agitn moglmara pi di te, Agra, na ede dekne kebra ta gumugln mina paugwa i, i meda edinaluwe dinga i, kuno ta erekrume dugwa.

6 Yegl pre na ka ta erme dinarika i, ene i pi, Israel yoba di to dugwa. Na Yawe moglka. Na ene ere ibo, Isip yoba ene yubun teigwa i ene ye meglmara kide kodidre, ene kane paigwa ama kide kodidre, ede enaiglkwa. Na yobuglo podo ersre, Isip yoba yubun podo tedre, ene ikne edenaglka.

12 Na eduer i, ede dumo Isip suna u, u ikne ikne pi, Isip yoba wano komono ya ye aglno buglano gagro komono kiglkwa i mudu si goraglka. Na yegl ere, Isip yoba godno mudu ere sinaglka. Na Yawe moglka.

Dumo Babilon u kide ogwa i pre yoba gun yeigwa

1 Ana okuo na prika i, yoba mere kide heven ibo mogl, ka ta digwa mere yegl prika. Ye digwa i, yegl digwa, Nono Godno kagie kade tenamga paugwa. Ye kagie podo kaima paugo, yobuglomo podo paugo, ye swara nono ere yumiwe digwa. 2 Te, God mabuno du ya mabuno kaima keme ersre, yoba ka tage togwa pre kagie kade tenamga pamiwa. Konbauna abu ta mabuno kide mina ede okna pidre, yoba uglo koglo koglo meglkwa i, mabuno kide ersre, u kide enaiglmedi erukwa abu ikra we, ye ka tage tomiwa. Te, abu i, ye okna God niglmo kogonmo yoba si goglkwa i pre erme God ere ikne ede tomiwe digwa.

3 Ye ka yegl didre, aglke kor God kagie kade tenamniwe digwa. I siragl pre God dumo Babilon ere kide ere tedre, si gaglkwa, ede inge ede egli ugwa i, aimadi kamin u pai morabiwe digwa.