Juízo

21 Malinga Atati shibhakwayuyanga bhawilenje nikwapanganga gumi, nneyo peyo na Nne Mwana gwabho ngunakwapanganga gumi bhungupinga kwaapanganga. 22 Atati bhakakunng’ukumula mundu jojowe, liengo lyowe lya ukumula bhambele Nne namwanagwabho, 23 nkupinga bhandu bhowe bhang’isimiyanje malinga shibhakwaisimiyanga Atati. Bhakang’ishimyanga Nne bhakakwaishimiyanga Atati bhandumile.

24 "Kweli ngunakummalanjilanga, apilikana lilobhe lyangu na kwakulupalila bhandumile bhala, akwete gumi gwa pitipiti. Ngu akaukumulwa, ikabhe atapwilwe kushiwo na apegwilwe gumi. 25 Kweli ngunakunnugulilanga, mobha ganakwiya, numbe gaishe, bhawilenje shibhapilikananje lilobhe lyangu, na shibhapilikananjebho, shibhalamanje. 26 Malinga Atati shibhali shiumilo sha gumi, nneyo peyo bhandendile nne Namwana gwabho kubha shiumilo sha gumi. 27 Kabhili bhashimba mashili ga ukumula pabha nne Mwana juka Mundu. 28 Nnakanganigwanje kwa lyeneli, pabha mobha ganakwiya bhowe bhalinginji mmakabhuli shibhapilikananje lilobhe lyangu. 29 Na bhalabhonji shibhayukanje, bhatendilenje ya uguja shibhayukanje na lama na bhatendilenje yangali ya mmbone shibhayukanje na ukumulwa."

Bhaakong’ondela bha a Yeshu

30 "Nne ngaatenda shindu kwa mashili gangu namwene. Nne ngunaukumula malinga shingupilikana kopoka kwa Atati, nne ukumu jangu ja aki. Nne ngaapinga tenda shingupinga namwene, ikabhe shibhaapinga bhandumile bhala.

31 "Niikong’ondelaga namwene, ukong’ondelogo jwakwa shakunde kuti gwa kweli.

7 Ikabheje, kweli ngunakummalanjilanga, mbaya nne nyabhule, pabha ngajabhule Nkujanguta jula, akanjiilanga. Ikabheje, nyendaga, bhai shinintume kungwenunji. 8 Jwenejo aikaga, shabhakong’ondelanje bhandu pa shilambolyo, ga yambi na aki na ukumu ja a Nnungu. 9 Kwa ngani ja yambi yenunji shabhakong’ondelanje, pabha bhangangulupalilanga nne,

30 Ikabheje a Yeshu gubhaalugulilenje, "Lyene lilobhelyo lyangakoposhela kwa ligongo lyangu nne, ikabhe kwa ligongo lyenu mmanganyanji. 31 Nnaino gaishe malanga ga ukumulwa shilambolyo, na nkulungwa jwa pashilambolyo pano apinga nokolelwa palanga. 32 Na nne pushinyinulwe kunani shilambo shinautilanje bhandu bhowe kwangu nne."

38 Bhai, jwene mundujo gwashite, "Mmakulungwa ngulikulupalila!" Gwabhatindibhalile.

39 A Yeshu gubhashite, "Nne njiika kushilambolyo kuukumula, nkupinga bhakaalolanga bhalolanje, na bhaalolanga bhabhanganje ashinangalole."

Nnaukumulananje

1 Mumposhelanje Nkilishitu akaakulupalila ukoto, nnaiibhukanje nkutaukangana ga ng’aniyo yakwe. 2 Mundu juna kwa ngulupai jakwe, analya indu yowe, na juna kwa ngulupai jakwe jikanabhe komala, analya lipondape. 3 Mundu alya indu yowe anannyegaye mundu akalya indu yowe, wala jwene akaapinga kulya shindu shina, ananng’ukumule alya indu yowe, pabha a Nnungu bhannjitishiye. 4 Ugwe gani ukunng’ukumula ntumishi juka mundu juna? Ajimaga eu agwaga, genego ga Bhakulungwa bhakwe. Numbe shajime, pabha Bhakulungwa shibhannjimishe.

12 Kwa nneyo, kila mundu munkumbi gwetu, shailugule nnyene kwa a Nnungu.

Nnannebhye Mmpwenu

13 Bhai tunaukumulane, ikabhe tutumbilile kuleka indu ya kunnebhya mmpwetu. 14 Kwa lundana kwangu na Bhakulungwa a Yeshu, kunandenda nimumanye kuti, shakwa shalya shili sha nyata tandubhilepe, ikabheje mundu ashibhonaga shalya shina kuti sha nyata, bhai, kuka jwenejo shene shalyasho sha nyata.

17 Pabha mobha ga ukumu gaishe na ukumu kujitandubhila nnyumba ja a Nnungu. Na ibhaga ukumu jitandubhila kwetu uwe, bhai, mpelo gwa bhandunji bhakaakulupalilanga Ngani ja Mmbone ja a Nnungu shiubhe bhuli?

5 Bhai, nnamaliyanje malobhe malanga gakwe gakanabhe ika, nnekanje mpaka pushibhaishe Bhakulungwa. Bhenebho bhapinga unukula indu yowe itendwa kwa shinjubhi, na languya ili mmitima ja bhandunji. Penepo kila mundu shalumbililwe na a Nnungu.

2 Pabha shinkwaukumulanga bhananji, nneyo peyo na mmanganyanji pushinng’ukumulwanje, shipimilo shinkwapimilanga bhananji na a Nnungu shibhampimilanje shosho. 3 Bhai, pakuti nnakushibhona shipande shili nniyo lika mpwenu, na lipoto lili nniyo lyenu nnalibhone? 4 Nkukombola bhuli kunnugulila mpwenu, ‘Leka nikushoye shipande nniyo lyako,’ akuno nninkwete lipande nniyo lyenu?

1 Gakapiteje genega, gumbilikene lilobhe lya mbuti lilobhe likulungwa lya lugwinjili lwa bhandu kunnungu lilinkuti,

"Aleluya!

Ntapulo na ukonjelo, na mashili ni ya a Nnungu bhetu!

2 Pabha ukumu yabho,

ni ya kweli, na ya aki.

Bhashikunng’ukumula lijajana nkulu,

apuganyaga shilambolyo kwa labhalabha kwakwe.

A Nnungu bhampanyangwile

kwa ligongo lya kwaabhulaganga bhatumishi bhabho!"

3 Kabhili nigubhashitenje,

"Bhainiywe a Nnungu!

Lyoi lya moto utiniya shene shilambosho, lilitutuma kwenda kunani piti piti!"