Maria

यीशुएरे ज़र्मेरू एलान

26 एलीशिबारे दोज़ींती भोनेरे शेइयोवं महीने जिब्राईल स्वर्गदूत परमेशरेरी तरफां गलील इलाकेरे नासरत नगरे मां, 27 एक्‍की अड्लैई कुइये कां भेज़ो। तैसारी कुड़माइ दाऊदेरे खानदाने मरां एक्‍की मड़दे सेइं भोवरी थी ज़ेसेरू नवं यूसुफ थियूं, ते तैस कुइयरू नवं मरियम थियूं। 28 स्वर्गदूते तैस कां एइतां ज़ोवं, "आनन्द ते ज़ींत तेरी भोए, तीं पुड़ परमेशरेरी बड़ी दया भोवरीए, प्रभु तीं सेइं साथिये!"

30 स्वर्गदूते तैस सेइं ज़ोवं "हे मरियम, डर न, किजोकि परमेशरेरो तीं पुड़ बड़ो अनुग्रह भोवरोए। 31 तू दोज़ींती भोल्ही तीं अक मट्ठू भोल्हु, ते तू तैसेरू नवं यीशु रेखां। 32 तैन महान भोल्हु ते तैस जो परमप्रधान परमेशरेरू मट्ठू ज़ोले, ते परमेशर तैस तैसेरे पूर्वज दाऊद राज़ेरू ज़ेरो राज़ो बनालो। 33 ते तै याकूबेरे खानदाने पुड़ हमेशा राज़ केरेलो, ते तैसेरू राज़ कधे खतम न भोल्हु।"

यीशुएरू ज़र्म

18 यीशु मसीहेरू ज़र्म एन्च़रे सेइं भोवं, कि ज़ैखन तैसेरी अम्मा मरियमरी कुड़माइ यूसुफ नंव्वे एक्‍की मैन्हु सेइं भोवरी थी, त तैन केरे ड्लाह भोने करां पेइले मरियम पवित्र आत्मारे शेक्ति सेइं दोज़ींती भोइ।

मरियमरू स्तुति-गीत

46 ते मरियमा ज़ोवं,

"अवं प्रभुएरी तारीफ़ केरती।

47 ते मेरी आत्मा मेरे मुक्ति देनेबाले

परमेशरे सेइं खुशी भोइ।

48 किजोकि तैनी अपनि सेवा केरने बैलरी गिरोरी हालती पुड़ नज़र की,

अज़्ज़ेरां देइतां हर ज़मानेरे लोक

मींजो धन ज़ोले।

49 किजोकि परमेशरे मेरे लेई बड़ां-बड़ां

कम्मां कियोरन ते तैसेरू नवं पवित्र भोए।

50 तैसेरी दया तैस करां डरने बालन

पुड़ पीढ़ी-पीढ़ी तगर राचे।

51 तैनी अपने शेक्ति सेइं बड्डां-बड्डां कम्मां कियोरन

तैनी घमण्डी तितर-बितर किये।

52 तैनी राज़े राज़ केरने करां रोके,

ते तैनी नम्र लोकन आदर दित्ती।

53 तैनी नियन्ने रोड़ी-रोड़ी चीज़ेइं सेइं रज़ांने

ते धन दौलती बाले खाली हथेइं भेज़े।

54 तैनी अपने वाधे ज़ैना तैनी इश्शे दादन-पड़दादन सेइं कियोरे थिये याद किये, तैनी अपनि सेवा केरनेबाले इस्राएली लोकां केरि मद्दत की,

55 तैनी हमेशारे लेई अब्राहमे पुड़ ते तैसेरी

औलादी पुड़ दया केरनि याद रख्खी।"

4 यूसुफ भी गलील इलाकेरे नगर नासरते मरां यहूदिया इलाके मां दाऊदेरे नगर बैतलहम मांजो च़लो, किजोकि तै दाऊद राज़ेरे खानदाने मरां थियो। 5 ताके तैड़ी मरियमी सेइं साथी ज़ैस सेइं तैसेरी कुड़माइ भोवरी थी ते तै दोज़ींती थी नवं लिखाए। 6 तैन केरे तैड़ी रेइतां तैसारे गल्हे बिशनेरो वक्त अव। 7 ते तैस पेइलू मट्ठू भोवं ते तैसां तैन फैल्हड़ी मां पलेटतां खुरली मां रख्खू किजोकि तैन धर्मशाली मां कोन्च ठार न थी मैल्होरी।

19 पन मरियम सैरी गल्‍लां अपने दिले मां रेखतां सोचने लगी।

34 तैखन शमौने तैन बरकत दित्ती, ते तैसेरी अम्मा मरियमी सेइं ज़ोवं, "हेरा, इन मट्ठू एल्हेरेलेइ ठहरावरू, कि इस्राएले मां बड़े लोकां केरे लेई नाश भोनेरी ते मुक्ति मैल्हनेरी वजा भोए, तै परमेशरेरी तरफां अक निशान आहे पन बड़े लोक तैसेरे खलाफ भोल्हे। 35 ताके बड़े दिलां केरे खियाल खुल्‍ली गान ते तीं बड़ो दुख भोनोए ज़ेन्च़रे तलवार कटतीए।"

48 ज़ैखन तैसेरे हाज बव्वेईं यीशु लाव त तैना हैरान रेइजे ते ज़ोने लगे, "मट्ठां तीं असन सेइं एन कुन कमाव? तेरे हाज बव तीं तोपते-तोपते परेशान भोइ जे।" 49 यीशु तैन सेइं ज़ोवं तुस मीं किजो तोपने लग्गोरो थिये? "तुसन पतो नईं कि मीं अपने बाजेरे घरे मां रानू ज़रूरी थियूं?" 50 पन तैन तैना गल्‍लां केरि समझ़ न आई कि, एन केरो कुन मतलब आहे। 51 तैखन तै अपने अम्मा बाजी सेइं साथी नासरत नगरे मां अव ते अपने अम्मा बाजी कां राव ते मरियमा एना सैरी गल्‍लां अपने दिले मां रेखी।

3 ज़ैखन दाछ़रो रस मुक्‍को, त यीशुएरी अम्मा तैस सेइं लगी ज़ोने, "एन कां दाछ़रो रस मुक्‍कोरोए।" 4 यीशु लगो ज़ोने, "अम्मा, मीं तीं सेइं कुन कम? हेजू मेरो वक्त नईं एवरो।"

5 तैसेरे अम्मा नौकरन सेइं ज़ोवं, "ज़ैन किछ यीशु तुसन सेइं ज़ोए, तैन्ने केरथ।"

25 यीशुएरे क्रूसे कां तैसेरी अम्मा ते तैसेरी अम्मरी बेइन मरियम ज़ै क्लोपासेरी कुआन्श थी, मरियम मगदलीनी खड़खड़ी थी। 26 यीशुए अपनि अम्मा ते अक अपनो चेलो ज़ैस सेइं तै प्यार केरतो थियो, तैस कां नेड़े खड़खड़ो लाव त तैनी अपने अम्मा सेइं ज़ोवं, "हे कुआन्श, हेर, तेरू मट्ठूए।" 27 ते चेले जो ज़ोवं, "अज़्ज़ेरां बाद, ई तेरी अम्मा आहे, तैनी चेले तैखने तै अपने घरे नेइ।"

यीशुएरी अम्मा ते ढ्ला

31 तैखन यीशुएरी अम्मा त कने तैसेरे ढ्ला तैड़ी आए। तैना घरेरे बेइर खड़े भोइतां तैस जो बिस्तार भेज़ो। 32 तैना घरेरे अन्तर न गेइ सके किजोकि मैन्हु केरि भीड़ यीशुएरे च़ेवरे पासन बिशोरी थी। एल्हेरेलेइ तैन लोकेईं यीशु सेइं ज़ोवं, "तक, तेरी अम्मा त तेरे ढ्ला बेइर खड़ेन। तैना तीं सेइं मिलनू चातन।" 33 पन यीशुए तैन्न जुवाब दित्तो, "अवं तुसन ज़ोताईं मेरी अम्मा त कने मेरे ढ्ला कौन आन!" 34 तैखन यीशुए तैन लोकां केरे पासे तेकतां ज़ोवं, ज़ैना तैसेरे च़ेवरे पासन बिश्शोरे थिये, "तक्‍का, मेरी अम्मा त कने मेरे ढ्ला इना आन। 35 किजोकि ज़ै कोई परमेशरेरी मेर्ज़ी पुड़ च़लते, तैए मेरो ढ्ला, मेरी बेइन ते मेरी अम्मा आहे।"

55 एन त तैस ट्लखानेरू मट्ठू आए ते एसेरे अम्मरू नवं मरियम ते एसेरे ढ्लां केरू नवं याकूब, यूसुफ, शमौन ते कने यहूदा आन, 56 ते एसेरी सब बेइनां इश्शे इड़ी रेइचन, फिरी एसमां ई काबलीत कोट्ठां आई?"

14 एना सब मड़द ते किछ होरि कुआन्शां ज़ैनेईं यीशुएरी मद्दत कियोरी थी, ते यीशुएरी अम्मा मरियम ते यीशुएरे ढ्लान सेइं साथी अक मन भोइतां लगातार प्राथनाई मां लग्गोरे थिये।