Maria

परभु यीसु के पइदा कर संदेस

26 छठमा महिना स्वरगदूत जिब्राईल भगवान के पल्ला लग, गलील परदेस नासरत नामक सहर हे अक्ठी कुमारी के लिघ्घो पठोय गइस। 27 अक्ठी कुमारी के लिघ्घो पठोइस, जेखर ओली राजा दाऊद के घराना यूसुफ नाम के डउका लग होथै, ऊ कुमारी के नाम मरियम रथै। 28 जिब्राईल स्वरगदूत ओखर लिघ्घो आइस अउ बोलिस, "तोर हे किरपा होय हबै, तोर जय होय परभु तोर संग हबै।"

30 स्वरगदूत ओखर लग कथै, मरियम झइ डर, भगवान के अनुगरह किरपा तोर हे होय हबै। 31 सुन तै लादा हे होबे अउ अक्ठी टोरवा के पइदा करिहे, अउ तै ओखर नाम यीसु रखबे✝। 32 ऊ बडा होही अउ परम परधान भगवान कर टोरवा कहाही, अउ परभु ओखर बाफ दाऊद के राजगद्दी उके दइ✝। 33 ऊ सबरोज तक याकूब के घराना हे राज करी, अउ ओखर राज के अंत कबहुन खतम नेहको होही।

यीसु कर पइदा

18 यीसु मसीह कर पइदा हइ मेर होथै, जब ओखर दाय मरियम कर ओली फलदान यूसुफ कर संग होथै, पय असना होथै कि काज होय लग पहिलेन, मरियम पवितर आतमा कर दवारा देह हे हुइ जथै।

मरियम दवारा भगवान कर भजन

46 मरियम कथै,

मोर परान परभु के भजन करथै।

47 मोर आतमा परभु के महिमा करथै, मोर आतमा मोर मुकति करै बाले भगवान हे मगन हबै✝।

48 ऊ अपन दीन हरवाहिन के सुधि लइस,

अब लग पुरखा दर पुरखा मोके धन्य कइहीं✝।

49 काखे सक्तिसाली भगवान मोर निता बडा-बडा काम करै हबै,

पवितर हबै ओखर नाम✝

50 जउन मनसे भगवान लग डरथै,

ता उनखर हे अक्ठी पीढी लग दूसर पीढी तक दया करथै।

51 भगवान अपन हाथ के सक्ति दिखाइस,

ऊ घमंडिन मनसेन के छिदिर-बिदिर कर दइस✝।

52 भगवान राजन के उनखर राजगद्दी लग तरी उतार दइस,

अउ बिनम्र मनसेन के उप्पर उठाइस✝।

53 ऊ भुखहन के बढिहा चीजन लग टुल्ल करिस,

अउ धनिन के छूछे हाथ लउटा दइस✝।

54 ऊ अपन दया के सुरता करके,

अपन सेबक इस्राएल के संभालिस✝।

55 जसना टीमा भगवान हमर सियानन लग करे रथै, कि अब्राहम,

अउ उनखर लरका के परति ओखर दया सबरोज बने रही।

4 यूसुफ दाऊद के घराना अउ बिरादरी के रथै, इहैनिता गलील परदेस के नासरत सहर लग, यहूदिया परदेस हे दाऊद के सहर बैतलहम छो गइस। 5 कि यूसुफ अपन मंगेतर मरियम के संग जउन लादा हे रथै, नाम लिखवामै जथै। 6 जब ऊ उहां रथै, तब मरियम के लरका पइदा होय के टेम आय गइस। 7 अउ मरियम अपन पहिले टोरवा के पइदा करिस, अउ ओही फरिया हे लपेट के सार हे सोबाय देथै, काखे रुकै के निता कउनो जिघा नेहको मिलथै।

19 पय मरियम ई सगलू बात के अपन मन हे सम्हार के रखिस, अउ सोच बिचार करत रथै।

34 समोन उके आसीस दइस, अउ लरका के दाय मरियम लग हइ कथै, देखबे हइ लरका अक्ठी असना चिन्हा हबै जेखर बिरोध करहिन, एखरै कारन इस्राएल हे बोहत झन के पतन अउ उत्थान हुइ✝। 35 अउ हइ तलबार तोर परान के आर पार छेद दइ, हइमेर बोहत झन के बिचार परगट हुइ जही।

48 ओखर दाय बाफ उके देखके अचम्भा हे पड गइन, ओखर दाय यीसु लग पूछथै, "बेटवा तै हमर संग असना काखे करे? मै अउ तोर बाफ केतका चिन्तित हुइके तोके खोजत रहन।"

49 यीसु अपन दाय बाफ लग कथै, "तुम मोके काखे खोजत रहा? का तुम नेहको जानथा, कि मोके अपन बाफ के घर हे होयका जरूरी हबै।" 50 पय यीसु के हइ बात उनके समझ हे नेहको आइस।

51 यीसु उनखर संग नासरत सहर छो लउट गइस, अउ उनखर कबजा हे रथै, ओखर दाय सगलू बात के अपन मन हे सम्हार के रखथै।

3 उहां जब अंगूर कर रस बढाय जथै, तब यीसु के दाय कथै, "उनखर लिघ्घो अंगूर कर रस नेहको हबै।"

4 यीसु ओखर लग कथै, "हे डउकी मोर लग काखे कथस, मोके तोर लग काहिन काम? अबे मोर टेम नेहको आय हबै।"

5 फेर ओखर दाय ओखर सेबकन लग कथै, जउन कुछु ऊ तुम्हर लग कहि उहै करिहा।

25 यीसु के दाय अउ ओखर दाय के बेहन, क्लोपास के डउकी मरियम अउ मरियम मगदलीनी यीसु के क्रूस के लिघ्घो ठाढ रथै। 26 जब यीसु अपन दाय अउ चेला के जेखर लग ऊ माया करथै, अपन लिघ्घो ठाढ देखथै, ता अपन दाय लग कथै, "हे डउकी, देख हइ तोर लरका हबै।"

27 तब यीसु चेला लग कथै, हइ तोर दाय हबै अउ उहै टेम लग ऊ चेला उके घर लइ गइस।

यीसु कर दाय अउ भाई

31 ता यीसु के दाय अउ भाई आथै, अउ बाहिर लग उके बुलाथै। 32 यीसु के अगल-बगल बइठे मनसे ओखर लग कथै, "देख तोर दाय भाई अउ बेहन बाहिर ठाड हमै अउ तोके खोजथै।"

33 यीसु पूछथै, "मोर दाय अउ मोर भाई कउन हबै?" 34 अउ जउन ओखर अगल-बगल बइठे रथै, उनखर लग कथै, "देखा मोर दाय अउ मोर भाई हइ हबै। 35 काखे जउन मनसे भगवान के बातन के जसना चलथै देखो, उहै मोर दाय बेहन, अउ भाई हबै।"

55 का हइ कारीगर कर टोरवा नेहको हबै? का मरियम एखर दाय नेहको? का याकूब, यूसुफ, समोन अउ यहूदा एखर भाई नेहको? 56 का एखर सगलू बेहन हमर बीच नेहको रथै? ता हइ सगलू इके कछो लग मिलिस?"

14 उनखर संग कुछ डउकी अउ यीसु कर दाय मरियम अउ ओखर भाई रथै, हइ सगलू खुदय के अक संग हुइके बिनती हे लगे रथै।