Maria

Bə núhə məbí-Jiso

26 Ndʉʉghɔfii, mu bəchi ntʉʼʉ ndə Elisabi bɛ gʉʼnə, Nyii tə́ŋ wontəŋ-ɛŋ Gableya mu lɔʼɔ kətə̂ŋbɛʼ yie-e kə́ bɛ Nasalɛ ndə i bɛ mu Galili, 27 tʉ vaabəke təmə ɔ nɔʼ nə kínə woləŋ fɛ, ndə bə nɔʼ bíʼtə ɔŋ ndə məkɔ́ tʉ Jɔsɛ ndə ɔ lɔ̀ hə kəlɔŋ Dɛbi. Yie-vaabəke-ghɔ̄ kə́ bɛ Mɛli. 28 Mbʉ wontəŋNyii gwè tʉ ɔŋ, ghɔ̀ŋ mbɔ, "Mɔ chàʼtə a, woke-mbʉʉ tʉ. Bii Tiekətʉ nɔ bɛ mɔʼɔ."

30 Mbʉ wontəŋNyii ghɔ̀ŋ tʉ ɔŋ mbɔ, "Kə a mə fàa fɛ, Mɛli, Nyii nɔʼ dʉ̀ʼ buuŋjyu-i tʉ a. 31 Nyíɛ! A bu gʉ̀ʼ bí vaabələŋ. A bu yaʼ tyú yie-e nə Jiso. 32 Ɔ bu bɛ wokwɛʼtəŋ, bə kə́ tíi ɔ nə Vaa-Chaabəfɔŋ, Nyii Tiekətʉ bu kɔ́ yetə-tie-e-kə, Dɛbi, tʉ ɔŋ. 33 Ɔ bu sɔ́ʼ fu-Jakɔ gɛ̀gɛ̀ təmə sɔ́ʼ-ɛ nə lìʼ fɛ."

Məbí-Jiso Klai

18 Nɔ bɛ mənɔ nduɔ ndə bə kə bí Jiso Klai. Ndʉʉ ndə bə kə bíʼtə ŋkwê-i, Mɛli, kɔ́ tʉ Jɔsɛ, bɔ̂ŋ kʉ̂ʉ kə̂ gwè ndə məchìi lɔŋ, bə nyíɛ Mɛli, ɔ kə́ bɛ gʉʼnə, chìi LyʉʉhəNyiikə.

Lyuu-Mɛli

46 Mɛli bɔŋleʼ ghɔ̀ŋ mbɔ,

"Vaafyii-ɔ tʉʼ kɔ́ məŋwɔʼ tʉ Tiekətʉ.

47 Vaafyii-ɔ tʉʼ sʉ́ʼnə tə chàa yʉʉhə, tʉ Nyii ndə ɔ bɛ Ŋkwaa-ɔ,

48 bʉʼka ɔ kwɛ́nə mɔ fʉə-e, təmə fɛ̀ʼ yʉ́ mɔ bɛ wo njʉnjʉ fɛ,

lʉ̀ hə nduɔ gɛ̀ nə shʉbə kwinə-bʉə-bə bənchəŋ bu kə́ tíi mɔ nə wo kətʉjyu.

49 Bə bu gìe yɔ̄ŋ-yə bʉʼka Fɔŋ Wo Shʉəshʉə nɔʼ chìi nukwɛʼtəŋbə tʉ mɔ.

Ɔ nɔ bɛ ŋkʉʉ.

50 Ɔ nɔ tʉʼ dʉ̀ʼ tʉvyiikə tʉ bʉə ndə bɔ̂ŋ tʉʼ fàa ɔ, ndə kwinə-bʉə-bə təmiyɔŋ.

51 Ɔ nɔ tʉʼ chìi nu-bələŋ-bə nə ghɔkə-i, wɔ̀ʼhə bʉə ndə bɔ̂ŋ kie tʉʉ gʉənə mu ŋkwɔʼtə-yʉə,

52 shúʼhə bəfɔŋ sê, chɔ̀ʼhə bʉə ndə bɔ̂ŋ lʉ̀ hə ŋwɔŋtə-ʉə sê kɔ́ ghɔʼ,

53 yúʼ bʉə-jyʉʉ nə yʉʼ bəfɔ tʉ bɔŋ yuo, bɔŋ-nɔʼ-leʼ jə̀ŋ bʉə ndə bɔ̂ŋ kwɔ̀ʼtə mbɔ bɔ̂ŋ kie inchəŋ, bɔ̂ŋ gɛ̀ ghɔghɔ.

54 Ɔ nɔʼ kwáa vaafɔ̀ʼ-ɛ Isilɛ, ghʉʉntoʼ búɔnə, bɔŋleʼ kwɛ́nə ndə mədʉ̀ʼ tʉvyiikə-i tʉ bɔŋ.

55 Haʼ ndə ɔ nɔʼ kə gìe tʉ bətietie-bʉʼʉ, te ŋkɔʼnə-i, tʉ tie-yʉʼʉ Ablahaŋ ghɔŋbə ŋgwie-wo-e, təmə liʼ-i ghɔ fɛ."

4 Jɔsɛ ghɔ nɔ nə bɛ vaa-fu-Dɛbi. Bʉʼka yɔ̄ŋ-yə, ɔ lɔ̀ hə Nasalɛ mu Galili gɛ̀ Bɛtələhɛŋ mu Judia, bʉʼka mbɔ nɔ nə bɛ lɔʼɔ-bətietie-e ndəŋ yuhəbə buŋmbi. 5 Ɔ kə́ gɛ̀ ndə mənyɔ̀ʼ yie-e mu ŋwɔʼnə-gɔməna ghɔŋ Mɛli ndə bə nɔʼ bíʼtə ɔŋ ndə vi-i. Ɔ kə́ bɛ gʉʼnə.

6 Vɛʼ ndə bɔ̂ŋ kə bɛ Bɛtələhɛŋ, mbʉ ndʉʉ kʉ̀ʼnə ndə yɔʼ-Nyii-kə byùu ɔ. 7 Ɔ bí fəŋ vaa-ɛ, kə́ bɛ vaabələŋ, bɔ́nə ɔŋ mu ndyihə, mɔ̀ʼ ɔ mu ŋkyʉʉ-bihə-kə bʉʼka mbɔ yəŋkə kə bɛ ghɔ tʉ bɔŋ mu njəŋ-njaa-bʉə-mətòʼ fɛ.

19 Bɔŋ Mɛli mɔ̀ʼ nubə-ɔ̄ŋ inchəŋ mu fyii-ɔ kə́ tíetə.

34 Simiɔŋ gháaNyii mbɔ ɔ̈ bìʼ bɔŋ, leʼ ghɔ̀ŋ tʉ Mɛli ŋkwê-i mbɔ, "Vaa-ɔ̄ŋ, Nyii nɔʼ séʼ ɔ, bʉʼka ɔ, bʉə-Isilɛ buŋmbi bu gwù fɛʼɛ, bəbɛʼbə yú. Ɔ bɔŋ bu bɛ cheʼkə ndə bə bu kə́ dʉ̀ʉhə. 35 Nyii bu chìi yɔ̄ŋ-yə mbɔ i kɛ̀ʼ nubə ndə i bɛ mu fyii-bʉə-hə, bɔŋ ndə məbìʼ chɔ bə bu chʉ̀ə fyii-a mɔ̀ʼ muŋgɔ."

48 Bətie-bi kʉ̂ʉ nyíɛ ɔŋ, i chàa bɔŋ. Ŋkwê-i ghɔ̀ŋ tʉ ɔŋ mbɔ, "Ŋaʼ, a yì ka nə baʼa nɔ? Baʼa tie-a nɔʼ kʉ́ʉ a ŋgwɔŋgwɔhə kəŋkaa."

49 Ɔ bíʼtə tʉ bɔŋ mbɔ, "Bii kə́ kʉ́ʉ mɔ mbuka? Bii kínə mbɔ mɔ kie ndə məfɔ̀ʼ fɔʼɔ-Tie-ɔ fe?" 50 Bɔŋ təmə bɔ̂ŋ kínə nukə ndə ɔ tʉʼ gìe tʉ bɔŋ fɛ.

51 Ndʉʉmɛ, ɔ shíʼ gɛ̀ ghɔŋ bɔŋ Nasalɛ, gɛ̀ kə́ yʉ́ chu-yʉə. Mbʉ ŋkwê-i mɔ̀ʼ nubə-ɔ̄ŋ mu fyii-ɔ kə́ bíehə tíetə.

3 Kʉ̂ʉ bɛ ndʉʉ ndə ndʉʼmə kə mì, ŋkwê-Jiso ghɔ̀ŋ tʉ ɔŋ mbɔ, "Bɔ̂ŋ leʼ kie ndʉʼmə fɛ." 4 Bɔŋ Jiso bíʼtə tʉ ɔŋ mbɔ, "Naa, maa-yɔ̄ŋ kie ka ndə məchìi nə mɔ? Ndʉʉ-ɔ chʉʼ kʉ̀ʼnə fɛ." 5 Ŋkwê-i gìe tʉ bʉə ndə bɔ̂ŋ kə́ gyʉ̀ə ndʉʼmə mbɔ, "B̈ii fɔ̀ʼ nukə təmiyɔŋ ndə ɔ bu gìe tʉ bii."

25 Bəkebɛʼbə nɔ nə tə́nə mbʉə tyʉntɔɔnə-Jiso-kə, ŋkwê-i leʼnə liŋ ŋkwê-i woke, Mɛli vi-Koloba ghɔŋbə Mɛli Matalina. 26 Ndʉʉ ndə Jiso kə nyíɛ ŋkwê-i leʼnə vaafɔ̀ʼ-ɛ ndə ɔ kə kʉ̀ʉ kə tə́nə mbʉə ɔ, ɔ gìe tʉ ŋkwê-i mbɔ, "Naa, nyíɛ, nɔ bɛ vaa-a nɔ!" 27 Ɔ ghɔ̀ŋ tʉ mbʉ vaafɔ̀ʼ-ɛ mbɔ, "Nyíɛ! Nɔ bɛ naa-aŋ nɔ!" Lʉ̀ hə ndə ŋgwɔʼmbi-ghɔ̄ mbʉ vaafɔ̀ʼ lʉ̀ ɔ gɛ̀ nə nɔŋ chunjaa-ɔ.

Ŋkwê-Jiso ghɔŋbə bəliŋ-bi

31 Ŋkwê-Jiso ghɔŋbə bəliŋ-bi bələŋ gwè tə́nə mbi tə́ŋ tíi ɔ. 32 Bɔŋ nuɔ-bʉə kə́ dùʼtə mbʉə ɔ yə̀ŋhə ɔŋ, kə́ ghɔ̀ŋ tʉ ɔŋ mbɔ, "Nyíɛ! Naa-aŋ ghɔŋbə bəliŋ-ba bələŋ nɔ bɛ mbi kə́ lɛ́nə aŋ." 33 Ɔ bə̀ŋhə tʉ bɔŋ mbɔ, "Naa-ɔŋ bɛ nda ghɔŋ bəliŋ-bɔŋ bələŋ bɛ bənda?" 34 Ɔ kʉ̂ʉ lɛ́nə bʉə ndə bɔ̂ŋ dùʼtə mbʉə ɔ ghɔ̀ŋ mbɔ, "Nɔ bɛ naa-ɔŋ nɔ ghɔŋbə bəliŋ-bɔŋ bələŋ! 35 Bʉʼka mbɔ wo ndə ɔ tʉʼ fɔ̀ʼ nukə ndə Nyii kʉ̀ʉ, ɔ nɔ bɛ liŋ-ɔŋ woləŋ ghɔŋbə liŋ-ɔŋ woke leʼnə naa-ɔŋ."

55 Kaa vaa-kabənda nɔ fe? Yie ŋkwê-i kaa Mɛli fe? Bəliŋ-bi bələŋ bɔŋ-kə́-leʼ bɛ Jɛŋ, Jɔsɛ, Samu leʼnə Juda fe? 56 Bəliŋ-bi bəke kaa bʉʼʉ bɔŋ fɛ̄ŋ mɔʼɔ fe? Wo-ɔ̄ lʉ̀ nubə-ɔ̄ŋ inchəŋ fa ndʉʉmɛ?"

14 Bʉə-bɔ̄ŋ bənchəŋ nə gyʉʉ imɔʼ kɔ́ fyiihə-ʉə ndə məgháaNyii, ghɔŋbə bəke leʼnə Mɛli ŋkwê-Jiso leʼnə bəliŋ-Jiso bi-bələŋ-bə.