Maria

Etib bi enjel Gebriel tiingi Meri

26 Eji ma kang nnyahng erakera mi Elisabet sa ela, owo Esowo kehm tumu enjel Gebriel tv go ejahbe ajehng ji jolo go Galili, ji bo kpo lung re Nasaret. 27 Á ko etib ba a bi re á ba tiingi ngbahme anyehng nyi bo jo lung-e re Meri ji bo kala nꞌnoongo a ne. Nne awohng no bo jo lung-e re Josef ji lohng go etꞌtohngo ji ntul a Devid wo lame elbal a ne.*

28 Enjel nyio kehm ba kpiri Meri, kehm-e tongo re, "M ma-a kak nnyo, wo ji Esowo ma-a fuulu. Jehova li a na."

30 Enjel nyio kehm-e tongo re, "Meri, ka kpe fahl! Esowo ma-a fuulu. 31 A bahke sake ela, jel nnenlum no a bahk-e gungu mbing re Jisos.* 32 Á bahke jolo njꞌjoka nne. Bo bahke jo lung-e re Mmon no Esowo bi gbale sehng. Jehova bahk-e jehke go eti etul ji nde Devid. 33 Á bahke fili abon Jekob go njinanjini. Etul ebe, esꞌkohlo nehm bel."

Ana bo jele Jisos

18 Ana wo bo jele Jisos Kraist. Nnyehn Jisos, bo jo lung-e re Meri. Ngare nyi bo ma lam elbal abola Josef, Josef tikem noongo a Meri, Meri sa ela go nsahm Etingi Etohko.*

Ana Meri jo tehk Esowo

46 Owo Meri kehm bungu re,

"Eltim ename kpꞌtehke Jehova.

47 Etohko ejame kpꞌgeere kak Esowo, ntꞌtahre ewame,

48 eji á ma-m buumu, me ji li nlokeltum ewe no li reed.

Bomo anv asongo ane kpee bahk-m jo lung re,

nne no Esowo m-e fuulu.*

49 Tibre Esowo bi gbale sehng ma-m rod,

kpꞌlimi agburu nsol.

Mbing enye li saang.

50 Ndon enye li ka ane ba kp-e fahle,

jol afi bo jini ngare anyi.*

51 Á tanne ebo ebe, fere tib nsahm enye, kam aneb elgeere raade,

a ntir a ntir ebo.

52 Á kpo radde ajꞌjok atul go bo a nti etul,

fere mehl ane ba li rede rede wahre.

53 Ane ba njal ma yam bo,

á kpo ka bo anoobo nsol,

bo li wohngo,

fere yake afang ane, bo song abo abo.

54 Esowo ebkak Israel, nlokeltum ewe, ebo,

eji á ma buumu ndon enye,

55 nyi li go njinanjini

ana á bungu tong babnso ejahre,

fere tong Ebraham,

a abon ebe."

4 Josef ji lene go Nasaret nyi Galili kehm tob tahm, song rehng go Betlehem ji Judea, ejahbe jio ji bo jele ntul a Devid. Tibre Josef lohng go etꞌtohngo ji Devid. 5 Á je ona re bo kak mbing enye go nwer, a Meri ji á tongo re á bahk-e koko, ye ji jolo ela.*

6 Eji bo jolo o Betlehem, ngare kehm biingi nyi Meri yahke ba eljele. 7 Owo á kehm jele ngbokambang a mmon ewe no nlum, kpenng-e abomo, fere rod-e, bum go ejum ji bo jo kak efong nsol alehke. Tibre eyake jolem go ekpꞌkpa elkang ka bo.

19 Meri kehm kuuru nsol nyio kpee go ege eltim, fere jo tir bade.

34 Simeon kehm biri elfuulu ni Esowo tv bo, kehm tongo Meri nnyehn re, "Mmon noa, Esowo bi m-e yehke. Ye wo bahke limi ane gbalee go Israel gbo, fere lim ane gbalee mehl yiimi.* Ye wo li elliingi ni Esowo ma tib, ni ane bahke jo bung ebi bade,* 35 eji ntir atahng nyi ane gbalee lꞌjol gbuul.* Wofono antahng eltim ena bahke jolo, are bo jahm-a ekahngkahng."

48 Nde, a nnyehn, kpo bo esi sehng, eji bo nyehn-e no. Owo nnyehn kehm-e tongo re, "Mmon ewame, jen ji wahnge a kehm limi ejum ana jia? Nso, a me, e ma-a seb na seb seb seb."

49 Owo á kehm faange bo re, "Jen ji wahnge ń jo seb-m? Ń nehme kahn re, m bahke tiki lim eltum ni Nsooa?"*

50 Bo kahnem esꞌsi ejum ji á jo bꞌbung tong bo.

51 Owo Jisos kehm tahme toono bo, bo feere kehnge go Nasaret, á song woomo bo go elwo. Nnyehn kuuru nsol nyio kpee go ege eltim.

3 Eji amahm male no, owo nnyehn Jisos kehm bake ba tong-e re, "Amahm ebmal."

4 Jisos kehm-e faange re, "Nnenkal, nꞌnan a kp-m tohngo anv kak go ntong nyia?* Ngare nyꞌnyame ka rehng."

5 Owo nnyehn Jisos kehm tongo alokeltum ba jolo o re, "Limen ajehng ajehng ji á bahk-n tongo!"

25 Owo nsoja nyio kehm limi ano.

Nnyehn Jisos yiimi ona kohlo go ekros, a mmonannyehn, a Meri nkal a Klopas, go Meri ji lohng go Magdala.

26 Eji Jisos nyehne nnyehn, a ntꞌtoono ewe no jo sahb kor-e kor yim kohlo o, á kehm tongo nnyehn re, "Nnenkal, nyehn mmon ewa o!"*

27 Á kehm tongo ntꞌtoono ewe noo re, "Nne no wa wo a."

Bomo ngare nyio asongo ntꞌtoono noo kehm-e koko tahm a ne go ege etahk, á song lene tob-e.

Nnyehn Jisos, a abonanyehn Jisos

31 Nnyehn Jisos, a abonanyehn Jisos kehm bake. Bo yiimi go elatahk, tum re bo lung-e. 32 Ellong ane tvv ji sennge Jisos kak. Bo kehm-e tongo re, "Nyehnee, nne, a abonane ebba yiimi go elatahk kp-a sebe."

33 Jisos kehm faange re, "Nne awo li li nnee? Ane aba li li abonanee?" 34 Á kehm tabe esamahr wahre, jang ane kpee ba ji senng-e kak, kehm bungu re, "Nyehnen, a wo li babnnee, a abonanee. 35 Nne awohng awohng no lꞌlim ji Esowo kpꞌsebe re á lim, ye wo li mmonannee, a nnee."

55 Ye sang li mmon a kapentaa? Nnyehn sang bo kpo lung-e re Meria? Abonanyehn sang bo kpo lung bo re Jems, Joses, Saimon a Judasa? 56 Abonanyehn ba nkal sang li a nahre a kpeea? Anv, gan wo á bele bel nsol nyio kpee?"

14 Bo kpee jolo nnyo nnyo amehng, jo kak ero bi ekakesehk, go anebkal fvfo, a Meri nnyehn Jisos, go abonanyehn Jisos.