Maria

O aňjelos pes sikavel la Mariake

26 Andre šovto čhon o Del bičhaďa le aňjelos Gabriel andro galilejsko foros Nazaret 27 ke pačivaľi džuvľi Maria, savi sas mangaďi le Jozefoha. O Jozef sas potomkos le Davidoskro. 28 Oda aňjelos avľa ke late a phenďa lake: „Smirom tuke! Chudňal e bari milosť a o Raj hino tuha." [„Bachtaľi sal maškar o džuvľa!"]

30 Ale o aňjelos lake phenďa: „Ma dara tut Mario, bo chudňal e milosť le Devlestar. 31 A dikh, ačheha khabňi, uľola tuke čhavoro a deha leske nav Ježiš. 32 Ov ela baro a vičinela pes Čhavo le Nekbaredereskro. A o Raj, o Del, leske dela o tronos le Davidoskro, leskre dadeskro 33 a ov kraľinela upral o kher le Jakoboskro pro furt a leskre kraľišagoske na ela šoha koňec."

Sar uľiľa o Ježiš Kristus

18 O Ježiš Kristus uľiľa kavke: Akor, sar sas leskri daj e Maria mangaďi le Jozefoha, sar mek leha na sas veraduňi, sikaďa pes, hoj hiňi khabňi le Svete Duchostar.

E giľi la Mariakri

46 E Maria phenďa:

„Miri duša bararel le Rajes

47 a miro duchos radisaľol andro Del, miro Spasiťeľis,

48 bo dikhľa pre peskri pokorno služobňička.

Akanastar man savore pokoleňja vičinena bachtaľi,

49 bo bare veci prekal ma kerďa o zoralo Del,

saveskro nav hin sveto.

50 Le Devleskri milosť džal andral jekh pokoleňje pre aver;

pre ola, ko pes lestar daran.

51 Ov sikaďa o zorale skutki peskre vasteha

a roztradňa olen, ko pes ľidžanas upre andro jile,

52 le zoralen čhiďa tele pal o tronos

a hazdňa upre olen, ko sas teledikhle;

53 le bokhalen pherdžarďa le lačhe vecenca

a le barvalen bičhaďa het a na diňa len ňič.

54 Pomožinďa le Izraeloske, peskre služobňikoske,

bo na bisterel pre peskri milosť,

55 avke sar diňa lav amare daden,

le Abraham the leskre čhaven pro furt."

4 Avke geľa the o Jozef andral o galilejsko foros Nazaret andre Judsko, andro Betlehem, andro foros le Davidoskro, bo ov sas potomkos le Davidoskro, 5 hoj pes te pisinel andre la Mariaha, savi sas leha mangaďi a sas khabňi. 6 A sar ode sas, avľa lakro časos te ločhol. 7 Avke lake uľiľa lakro ešebno čhavoro a pačarďa les andro pherne. Thoďa les te pašľol andre maštalňa andro jasle, bo andro sovibnaskro kher na sas prekal lende than.

19 Ale e Maria peske garuvelas savore kala lava andro jilo a gondoľinelas upral lende.

34 O Simeon len požehňinďa a phenďa la Mariake, leskra dake: „Kada čhavoro hino dino pre oda, hoj but džene andral o Izrael te peren abo te ušťen, the pro znameňje, pre savo o manuša džana, 35 hoj pes te sikavel oda, so peske gondoľinen but džene andro jile. A prekal tiri duša predžala e šabľa."

48 Sar les e daj the o dad dikhle, čudaľinenas pes a e daj leske phenďa: „Čhavo miro, soske amenge kada kerďal? Dikh, tiro dad the me tut rodahas a darahas pal tu."

49 O Ježiš lenge phenďa: „Sar oda hoj man rodenas? So na džanenas, hoj mušinav te avel andre mire Dadeskro kher?" 50 Ale on na achaľile ole laveske, so lenge phenďa.

51 Geľa lenca pale, avľa andro Nazaret a šunelas len. Leskri daj peske garuvelas savore ola lava andro jilo.

3 Sar imar lenge dodžalas e mol, phenďa e daj le Ježišoske: „Nane len mol."

4 O Ježiš lake phenďa: „So amen hin andre oda, džuvľije? Mek na avľa miri ora."

5 Paloda leskri daj phenďa le sluhenge: „Keren savoro, so tumenge phenela!"

25 Paš o kerestos le Ježišoskro ačhelas leskri daj, leskra dakri pheň, e Maria, so sas romňi le Kleofašiskri, the e Maria Magdalena. 26 Sar o Ježiš ode dikhľa peskra da a the le učeňikos, saves kamelas, hoj ačhel paš late, phenďa peskra dake: „Džuvľije, dikh, tiro čhavo!" 27 Paľis phenďa le učeňikoske: „Dikh, tiri daj!" Akorestar la iľa oda učeňikos ke peste.

E daj the o phrala le Ježišoskre

31 Paľis avľa leskri daj the leskre phrala, ačhenas avri a dine les te vičinel. 32 Bešenas pašal leste but manuša a phende leske: „Tiri daj the tire phrala hine avri a vičinen tut."

33 Ov lendar phučľa: „Ko hin miri daj a ko hin mire phrala?"

34 A dikhľa pašal peste pre ola, ko leha bešenas, a phenďa: „Dikhen, miri daj the mire phrala. 35 Bo sako, ko kerel e voľa le Devleskri, hino miro phral, miri pheň the miri daj."

55 Či nane ov le ťesariskro čhavo? Či pes na vičinel leskri daj Maria a leskre phrala Jakob, Jozef, Šimon the Juda? 56 Či nane savore leskre pheňa ke amende? Khatar les hin kada savoro?"

14 Kala savore ačhenas jekhetane andro modľitbi, jekhetane le džuvľenca the la Mariaha, le Ježišoskra daha, the leskre phralenca.