Maria

Malahika abala omwazi g’okuburhwa kwa Yeesu

26 Obukule bwa Luzabeeti bwabeere buli bwa myeezi ndarhu, malahika Gabriyeeri arhumwa na Nnamahanga omu gishagala ch’eGalilaaya chiyirikwa Nazareeti. 27 Amurhuma oku munyere orhazimenya abalume. Oyo munyere ali ashambaazizwe n’omurhabana oyirikwa Yozefu w’omu mulala gwa mwami Daawudi. Eziino ly’oyo munyere lyaliiri Mariya. 28 Malahika abeere aja omu mwabo oyo munyere, amubwira ntya: «Nkulamwise, obe n’omwishingo, w’eyunjwire n’omugisho, bulaala Nnaweerhu ali haguma naawe.»

30 Malahika amubwira ntya:

«Mariya, orhayuubahaga kwenge wabwene omugisho embere za Nnamahanga.

31 Tala, waaba bukule.

Waburha omuzaana

n’eziino lyaage wamuyirika Yeesu.

32 Nj’aba mukulu na nj’ahamagalwa Mugala wa Nnamahanga w’Elugulu Bweneene.

Nnaweerhu Nnamahanga nj’amuha entebe y’obwami bw’eshekuliza Daawudi.

33 Nj’arhegeka enju ya Yakobo esiku n’amango

n’obwime bwage burhagahwa.»

Okuburhwa kwa Yeesu

18 Okuburhwa kwa Yeesu kw’aliiri ntya: Mariya, nyina wa Yeesu, alishambaazizwe na Yozefu. Aliko embere z’obuhya, abonekana okw’ali bukule. Obo bukule abuheekaga kugerera obuhashe bwa Muuka-Mutagatiifu.

Olwimpo lwa Mariya

46 Mariya ava aderha ntya:

«Omurhima gwani gukuuze Nnaweerhu.

47 Na kandi gwayunjwire n’omwishingo elugulu wa Nnamahanga, Muchunguzi waani.

48 Kwenge alolere n’olukogo obwirhondesi b’omuja waage.

Gurhengera buno abantu ba ngasi gihe bagenda bampamagala mugishwa.

49 Kwenge Nnamahanga Ogala Byooshi anjiriire ebintu binja binene.

Eziino lyaage liri litagatiifu.

50 Ngasi mango ajira obubabale

oku bamuyuubaha.

51 Kugerera emisi y’okuboko kwage,

ashandeeze abantu b’omurhima gw’erumerume.

52 Akuulire abantu b’emisi oku ntebe zaabo z’obwami,

n’okuzamuula abirhondesi.

53 Abaliiri nzara abayunjwize n’ebikulo

n’abachire abagalwire maboko moomu.

54 Agwasize omukozi waage Israheeli:

arhayibiriraga kuyeerekana obubabale bwage

55 nk’oku alaganyaga bashookuluza beerhu, Abrahaamu n’omulala gwage esiku n’amango.»

4 Yozefu naye arhenga omu gishagala ch’eNazareeti ch’omu Galilaaya. Achiyeerekeza omu gihugo ch'eYudeeya omu gishagala omwami Daawudi aburhwaga mo chiyirikwa Beteleheemu. Kwenge aliiri w’omu mulala gwa Daawudi. 5 Aja yo guchiyandikiisa haguma na Mariya mushambaaza waage. Na Mariya ey’ali bukule.

6 Oku bali eBeteleheemu, olusiku lwage l’okuburha lwagera ho. 7 Aburha omugala w’efula. Amuyambisa engobi, amulyaamiza omu hikenzi hy’okuliisiza mo ebirhungano, kwenge nta hantu haalichiri ho omu nju y’okuyankirira abahiisi.

19 Mariya yeewe aliiri kubiika ebyo byooshi oku murhima gwage n’ogukengeera bichi biderhere.

34 Simeooni abagisha n’okubwira Mariya nyina wa Yeesu ntya: «Oyu mwana ali ho yi bantu banene barhoge n’abandi bayinamuke omu Israheeli. Nj’aba chimenyeeso charhenga emwa Nnamahanga, banene nji bachilahira. 35 Na ntyo, nj’abishuula enkengeero zibishirwe omu mirhima ya banene. Naawe Mariya, nji wababala bweneene omu murhima gwawe nk’ogwachumirhirwe n’akeere.»

48 Ababusi baage babeere bamubona, baashalama. Nyina amubwira ntya: «Mwana waani, charhumire warhujira ntya? Yisho haguma naani rhwaliiri kugushonda n’obuuba.» 49 Yeesu abashubiza ntya: «Gichi charhumaga mwanshonda? Ka murhamenyere oku nkwaneene kuba omu Nju ya Daarha?» 50 Aliko barhayunvaga ech’aliiri kubabwira. 51 Yeesu achima nabo eNazareeti. Aliiri kubakenga. Nyina aliiri kubiika ebyo binwa byooshi omu murhima gwage.

55 Oyu k’arhali mugala w’ola mubeeji w’empaho? Nyina k’arhali ye Mariya? Na beene baabo ka barhali Yakobo, Yozefu, Simooni na Yuuda? 56 Na baali baabo booshi ka rhurhalamire haguma nabo hano? Leero ngahe amakuula ebi byooshi?»

14 Abaala booshi bagendaga basaliira n’omurhima muguma, haguma na Mariya nyina wa Yeesu, n’abandi bakazi, na beene baabo Yeesu.