Maria

Гавриил Христос сэма питты вер аԉәԓ

26,27 Хун Елизавета xутмет тыԓәщ ўшән уԓмаԓән, Турәм Гавриил нэмпи ангел Галилея мўвән уԓты Назарет воша эви xŏща китсәԓы. Щи эви Иосиф xŏща уртыса, Иосиф Давид рут эԓты уԓ. Эви нэмәԓ: Мария.

28 Ангел ԓўв хŏщайәԓ ԓŏӈмаԓән, йастәс: "Амтәтԓыйа, йӑм мŏщатәм нэ! Турәм Куща Нӑӈ пиԓэнән уԓ; имет кўтән йӑмән мийәм нэ!"

30 Ангел пӑ ԓўвеԓа йастәс: "Аԓ пӑԓа, Мария! Турәм нӑӈ пеԓайэн йӑм щирән ӑӈкәрмәс;

31 ԓавәрта йиԓән пӑ Пŏх сэма пайәтԓән, Иисус нэмән Ԓўвеԓ пŏнԓэн.

32 Ԓўв ԓӑтәӈ питәԓ, пӑ Нўм Турәм Пŏха айәԓты питԓа; Турәм Куща Ԓўвеԓа Давид ащеԓ хон омәсты тӑха мӑԓ.

33 Щӑԓта Ԓўв Иаков хот тэԓ хŏща веккеша хона уԓты питәԓ, пӑ Хон Уԓәпсайәԓ нэмәԓты пŏрайән ӑт йэтшәԓ".

46 Щӑԓта Мария йастәс: "Ма сӑмем Турәм Куща ԓӑтәӈа айәԓԓәԓы,

47 Ма сӑмемән шек амтәтԓыԓәм Турмем урәӈән, ма ԓыԓэм Этәԓтәты Ŏтэм урәӈән,

48 Ԓўв митнэ лэӈкеԓ пеԓа сэмәԓ пайәтсәԓы, тӑԓта йэԓԓы ин омәсты мир, йӑԓпа йиты мŏхет мӑнэм щўԋән мийәм нэӈа айәԓты питԓэԓ;

49 Йурәӈ Ŏт мӑнэм вŏԓаӈ верәт вермаԓ урәӈән, пӑ Ԓўв Нэмәԓ йэмәӈ,

50 Турәм сӑмәӈ верәԓ кашәӈ Ԓўв эԓтайәԓ пӑԓты хŏйата, ин уԓты пӑ йӑԓпа йиты мŏхета, уԓты питәԓ;

51 Ԓўв йурәӈ йошәԓ этәԓтәсԓы; сӑмԓаԓән йŏрәӈ нŏмәс тӑйты хŏйатәт лакки йовәԓсәԓы;

52 ун кущайәт кущайа омәсты тӑхайԓаԓ эԓты иԓ пайәтсәԓы, лэӈкийа уԓты хŏйатәт нŏх эԓәтсәԓы;

53 ԓэԓԓы уԓты хŏйатәт йӑм эԓты ԓапәтсәԓы, тащәӈа уԓты хŏйатәт таԓты китсәԓы.

54 Ԓўв Израиль митхуйәԓа ԋотыԓыйәс, аԉәм сӑмәӈ щирәԓ нумман,

55 хŏты мўӈ опращԓува йастыԓыйәс, Авраама пӑ йиты ԋаврэмԓаԓа веккеша".

4 Щи урәӈән Иосиф па Галилея мўвән омәсты Назарет вош эԓты, Иудея мўва Давид ики воша, Вифлеема, мӑнәс. Ԓўв Давид хот пӑ рут эԓты ус,

5 ԓўв, нэпека питты урәӈән, Мария пиԓән мӑнәс. Мария ԓўвеԓа уртыса пӑ щи пŏрайән ԓавәртан ус.

6 Щита уԓман сыс, ԋаврэмәԓ сэма питты пŏра йŏхтәс.

7 Пŏхән, оԓәӈ Ԋаврэмәԓән, йŏхәтса, сŏха Ԓўвеԓ йŏвәртсәԓы пӑ вой ԓапәтты хŏшапа пŏтсәԓы, хŏйат хоԓты хотән ŏԓты тӑха ӑт мŏщатсәӈән.

19 Мария щи йасӈәт хŏԓыйэ сӑмәԓән шависԓы пӑ нумәссәԓы.

34 Симеон ԓыв урәӈԓаԓа йӑм воxәс, щӑԓта Мария, Иисус аԋԏи пеԓа, йастәс: "Тӑм ŏԓәԓ, Щит, Хŏй тӑxрэпа китса: Израильән хŏйтат иԓ питԓәт, хŏйтат пӑ нŏх ԓойԓәт, Турәм эԓты китәм поса уԓ, йасәӈԓаԓ урәӈән хŏйатәтән нўрыԓа, –

35 Нӑӈ па щитән, аԓтты кеши иты, сӑмен мŏхты мӑнԓайән, – ар хŏйат сӑм хŏща уԓты хӑԋа нŏмәсԓаԓ эԓпа ат этәԓтәԓайәт".

48 Аԋԏеԓ-ащеԓ Ԓўвеԓ шийаԓәман кемән, йасәӈ йастәты ӑт верәтсәӈән, туп аԋԏеԓ Ԓўвеԓа йастәс: "Пŏхийэ, минэмән хŏты Нӑӈ версэн? Тӑм мўй, ащен пӑ ма, сӑм мӑнман, Нӑӈен кӑшԓэмән."

49 Иисус йастәс: "Мўйа нын Мӑнэм кӑшԓәԓән? Нын мўй ӑт уйәтсәԓән, Мӑнэм щита уԓты мосәԓ, хŏта Ма Ащэм Xот уԓ?"

50 Туп Ԓўв йастәм йасәӈԓаԓ ԓын ӑт мŏштәсԓән.

Иисус энәмты пŏра

51 Щиты Ԓўв аԋԏеԓ-ащеԓ пиԓән Назарет воша йŏхԓы йŏхтәс; пӑ ԓынана хуԓәтман ус. Щи йастәм йасәӈԓаԓ xŏԓыйэ аԋтеԓән сӑмән шависайәт.

14 Хŏԓыйэ ԓыв и йӑха пойәкщәман усәт нэӈәт пӑ Мария, Иисус аԋԏи пиԓән, пӑ Ԓўв ху апщиԓаԓ пиԓән.