Maria

Jisu Jonom Laga Kotha Age Te Kowa

26 Aru Elizabeth peth te bacha bukha choi mohina huwa homoi te, Isor pora sorgodoth Gabriel ke Galilee, juntu ke Nazareth mate, etu jagate pathaise, 27 ekjon kumari mahila logote, jun Joseph koi kene ekjon manu logot shadi kori bole laga kotha milikena asele, aru jun David ghor manu asele; aru etu kumari laga naam Mary asele. 28 Aru tai logote ahikena, sorgodoth koise, "Salam tumike, jun uporte Isor laga morom ahise! Probhu tumi logote ase."

30 Aru sorgodoth taike koise, "Bhoi na koribi, Mary, tumi to Isor usorte morom paise. 31 Aru tumi ekjon chokra bukhi bo, aru Tai laga naam ‘Jisu’ rakhibo*. 32 Tai bisi mohan hobo aru Taike Sobse Mohan laga Putro eneka matibo. Aru Probhu Isor taike, tai laga purbo David laga singhason dibo*. 33 Aru Tai hodai nimite Jacob laga ghor cholai thakibo, aru Tai laga rajyo kitia bhi khotom nahobo."

Jisu Khrista Jonom Huwa

18 Jisu Khrista laga jonom eneka pora hoise. Tai laga ama, Mary Joseph ke shadi kori bole kotha milai loise, kintu tai duijon shadi nohua age te, Pobitro Atma dwara bacha pet te bukhi ja jani jaise.

Stuti Laga Gana Kora

46 Titia Mary koise,

"Moi laga jibon Probhu ke mohima kore,

47 Aru moi laga Atma khushi kori ase jun Isor he moi laga Tran-korta ase*.

48 Aru Tai upor pora, sobse mamuli maiki ekjon, tai laga noukar ke saise.

Aru sabi, etiya pora sob manu khan moike asirbad ase kobo*.

49 Kelemane Mohan Isor pora moi nimite dangor kaam kori dise aru tai laga naam to pobitro ase.

50 Aru tai laga morom to etiya pora loi kene aha din tak jun manu taike bhoi kore tai logote ase*.

51 Tai laga hath pora bisi dangor kaam korise*.

Aru jun manu tai laga monte phutani bhabona kore taikhan ke alag kori diye.

52 Aru taikhan bohi kene raj kora jaga pora nichete girai dise*.

Aru jun chutu hoise eitu khan ke uthaise.

53 Aru bhuka thaka khan ke bhal saman pora bhorta kori dise*,

Aru dhun manu khan ke khali kori dise.

54 Aru tai laga noukar, Israel ke modot korise, tai laga morom to yaad korise*,

55 Aru tai kotha korise moi khan baba laga baba khan ke- Abraham aru tai laga bacha khan logote hodai nimite*."

4 Aru Joseph bhi Galilee pora jaise, Nazareth aru Judea laga sheher pora, David laga sheher pora juntu ke Bethlehem mate, kelemane tai bhi David laga ghor manu ase aru tai laga khandan pora ahise.

5 Tai Mary ke loi kene naam likhi bole jaise, jun tai logote shadi kori bole laga kotha milai kene thakise, aru tai bacha bukhi thakise.

6 Aru jitia taikhan Bethlehem te thakise, bacha ke jonom hobole homoi ahi jaise.

7 Aru tai chokra ke jonom dise, tai laga poila bacha, aru kapra tukra khan pora bandi kene, taike khair te ghumai dise, kelemane aram kora ghor te taikhan thaki bole jaga thaka nai.

19 Hoilebi Mary to etu kotha sob tai laga monte he rakhise.

34 Aru Simeon taikhan ke asirbad dise, aru bacha laga ama Mary ke koise, "Sabi, etu bacha ke Israel laga manu khan ke uthai dibo nimite rakhise; aru ek din asurit kaam to kotha namana khan ke dikhai dibo.

35 Aru ekta talwar apuni laga atma te maribo- kelemane bisi manu laga monte bhabona kosi thaka to ulai ahibo."

48 Aru jitia Taike dikhise, taikhan sob asurit hoi jaise, Tai laga ama pora koise, "Putro, amikhan ke kele eneka korise? Sabi, Apuni laga baba aru moi bisi chinta pora Apnike bisari thakise."

49 Hoilebi Tai pora koise, "Kile Moike bisari ase? Apnikhan najane naki Moi laga Baba ghor te Moi thaki bole lage koi kene?"

50 Hoilebi Tai ki koise etu kotha taikhan bujhi bole para nai.

51 Etu pichete taikhan logote Nazareth te ahi jaise, aru taikhan laga kotha mani kene thakise. Tai laga ama to sob kotha tai laga mon bhitor te he rakhise.

3 Jitia draikha ros khotom hoise, Tai ama pora Taike koise, "Taikhan logote draikha ros aru nathaka hoise*." 4 Kintu Jisu taike koise, "Mahila, Moi nimite aru tumi nimite etu ki ase? Ami laga somoi puncha nai." 5 Tai ama pora nokorkhan ke koise "Ki hoile bhi Tai tumikhan ke koribi kobo, etu he koribi."

25 Ta te Jisu Cross usorte Tai laga ama aru ama laga bhoini, Clopas laga maiki Mary, aru Mary Magdalene khara asele. 26 Jitia Jisu Tai laga ama aru Tai morom kori thaka chela khara thaka dikhi kene Tai laga ama ke koise, "Mahila, sabi, apuni laga chokra!" 27 Titia Tai chela ke bhi koise, "Sabi, apuni laga ama!" Aru etu somoi pora chela pora taike nijor ghor te loi jaise.

Jisu Laga Ama Aru Bhai Khan

31 Titia Jisu laga ama aru bhai khan ahi kene bahar te rukhise, aru Taike mati bole manu pathaise. 32 Dangor bhir tai logote thakise, hoilebi taikhan koise, "Sabi! Apuni laga ama aru bhai khan bahar te ahi kene Apuni ke bisari ase." 33 Kintu Tai jowab di koise, "Kun Ami laga ama aru bhai ase?" 34 Titia Tai ghuri kene bohi thaka khan ke saikene koise, "Sabi, eitu khan he Ami laga bhai aru ama khan ase. 35 Kelemane jun Isor itcha koribo, eitu khan he Ami laga bhai, bhoini aru ama ase."

55 Etu manu to ekjon barhoi laga chokra nohoi? Tai laga ama to Mary nohoi? Tai laga bhai khan James, Joseph, Simon aru Judas khan nohoi? 56 Tai laga bhoini khan to amikhan logote ase nohoi? To kineka kori kene Tai eitu khan jani paise?"

14 Taikhan sob eke mon hoi kene prathana korise, ta te mahila khan bhi thakise, aru Jisu laga ama Mary aru Tai bhai khan bhi thakise.