Maria

Kuvumbuka kwa Yesu kopetigwa

26 Elizabeti viyakalile na inda ya miyezi sita, Imulungu kamtuma msenga wa kuulanga, twaga jake Gabilieli, yachole kudibuga da Nazaleti, mwiisi ya Galilaya. 27 Kakala na usenga wa mhambe imoja yafungiligwe zengele na mbigalo imoja twaga jake Yusufu, yalawile mulukolo lwa Mndewa Daudi. Mhambe ayo twaga jake Malia. 28 Msenga ija kamcholela Malia, kamulongela, "Zihoze! Mndewa kahamoja na gweye. Nayo kakunogela ng’hani!"

30 Msenga ija kamulongela, "Malia, sikuudumbe, gweye kupata ng’hekewa ya Imulungu. 31 Kogoga inda na kolela mwana wa kimbigalo, nayo komkema Yesu. 32 Kokuwa munhu mkulu, kokemigwa Mwana wa Imulungu yeli Uchanha Ng’hani. Mndewa Imulungu komgwaa kigoda cha undewa, kamba viyakalile Daudi muhenga wake. 33 Kokuwa mtawala wa lukolo lwa Yakobo milele, na undewa wake hawisha bule!"

Kuvumbuka kwa Yesu Kilisito

18 Kuvumbuka kwa Yesu Kilisito kukala vino, Malia yafungiligwe zengele na Yusufu, lakini wang’hali hawanakala hamoja kamba mbigalo na mtwanzi, Malia koneka kana inda kwa udahi wa Loho Yang’alile.

Lwila lwa Malia

46 Malia kalonga,

"Moyo wangu omgwaa nhogolwa Mndewa,

47 Loho yangu yomdeng’helela kwavija Imulungu Mkombola wangu,

48 kang’humbuka, niye msang’hanaji wake muhole!

Kulawa sambi wanhu wose ong’hema munhu yamwedile,

49 kwavija Imulungu Mkulu kanhendela vinhu vikulu.

Twaga jake ding’ala.

50 Kulawa lukolo na lukolo,

kowonela bazi wanhu wose omtegeleza.

51 Katenda mbuli ng’hulu kwa mkono wake.

Kawapwililisa wanhu weli na magoda mmizoyo yao.

52 Kawahumulusa wandewa mna ivigoda vao va undewa,

na kawenula wahole.

53 Weli na nzala kawatenda wegute kwa vinhu vinogile na

kawawinga matajili makono gaiyeka.

54 Kasang’hana kija kiyalongile kwa wahenga zetu,

keza kumtaza msang’hanaji wake Izilaeli.

55 Kakumbuka kumonela bazi Abulahamu,

na lukolo lwake lose siku zose!"

4 Yusufu kasegela kudibuga da Nazaleti mwiisi ya Galilaya, kachola kudibuga da Beselehemu mwiisi ya Yudea, hanhu hayavumbuke mndewa Daudi. Yusufu kachola kuko kwavija kolawa mulukolo lwa Daudi. 5 Kachola na Malia kupetigwa, yakalile yamfungile zengele. Nayo Malia kakala na inda. 6 Viwakalile kudibuga da Beselehemu, kipindi cha Malia kuifungula kivika. 7 Kaifungula mwanage wa chaudele wa kimbigalo, kamvaza vikumbi. Abaho kamtambaliza hanhu hoodimiligwa ng’ombe, kwavija hawapatile gati mzing’anda za wageni.

19 Lakini Malia kazika mbuli izo muumoyo na kazigelegeza ng’hani.

34 Simeoni kawatambikila, kamulongela Malia, "Mwana ino kasaguligwa na Imulungu mbuli ya kupotela na kukomboligwa wanhu wengi wa Izilaeli. Nayo kokuwa kilaguso kulawa kwa Imulungu, na wanhu wengi omulema. 35 Abaho magesa ga wanhu wengi gogubuligwa. Na gweye mwenyego, usungu uli kamba panga dikutwa dousoma moyo wako."

48 Tatake na mamake viwamone wasinhuka ng’hani. Mamake kamuuza, "Mwanangu, habali ututendile vino? Niye na tatako tukala moyo nyunguwaa tokuzahila gweye!"

49 Yesu kawedika, "Habali munizahila? Vino hamujuwile bule niye nilondigwa ng’hale mng’anda ya Tatangu?" 50 Lakini wao hawajuwile fambulo da ulonzi awo.

51 Abaho Yesu kachola nao Nazaleti, ako kakala kowategeleza. Mamake kazika muumoyo mbuli zino zose.

3 Divai viimalile, mamake kamulongela Yesu, "Divai imala."

4 Yesu kamwidika, "Mama, habali unongela vivo. Saa yangu hainavika."

5 Abaho mamake Yesu kawalongela waja wasang’hanaji, "Chochose chonda yawalongele sang’haneni."

25 Wemile behi na msalaba wa Yesu wakala mamake na mamake mkulu na Malia mtwanzi wa Kilopasi na Malia Magidalena. 26 Yesu viyamone mamake na mwanahina wake yamnogele ng’hani wema aho, kamulongela mamake, "Mama, sambi ino ayo mwanago."

27 Abaho kamulongela mwanahina ayo, "Sambi ino ayo mamako." Kulawa siku dijo mwanahina ayo kamsola na kukala nayo ukae kumwake.

Mamake na ndugu zake Yesu

31 Abaho mamake na ndugu zake Yesu weza, wema kunze wamtuma munhu yamkeme Yesu. 32 Lunhu lwa wanhu lukala lumzunguluke Yesu. Nao wamulongela, "Go mkulu, mamako na ndugu zako wa kunze, okulonda gweye."

33 Yesu kawedika, "Mamangu ayo nani? Na ndugu zangu wao nani?" 34 Baho kawalola wanhu awo wamzunguluke, kawalongela, "Loleni! Wano awo mamangu na ndugu zangu! 35 Munhu yoyose yotenda gaja golondigwa na Imulungu, ayo ndugu yangu na lumbu jangu na mamangu."

55 Vino ino siyo mwanage fundi selemala? Vino ino siyo mwanage Malia? Vino ndugu zake siyo Yakobo na Yusufu na Simoni na Yuda? 56 Vino lumbu zake hawakala bahano bule? Gano gose kagapata kwahi?"

14 Wagendelela kuiting’hana hamoja kumpula Imulungu, hamoja na watwanzi wayagwe, na Malia mamake Yesu na wadodo zake Yesu.