Maria

Kwelekigwa kwa Yesu kwolagusigwa

26 Muna umwezi wa sita wa wimo wa Elizabeti, Mulungu kamtuma msenga wa kuulanga yoyatangigwe Gabuliyeli yahite kudibululu doditangigwa Nazaleti muna iisi ya Galilaya. 27 Keza na usenga kwa mwali imwe mhambe yoyatangigwe Maliya. Imwali iyo kalondeka kufudikiligwa na mbwanga imwe yoyatangigwe Yosefu wa lukolo lwa Mfalume Daudi. 28 Msenga wa kuulanga kamuhitila na kumulongela, "Nokulamsa! Mndewa kahamwe na weye, nayo kakutemela mate g’hani!"

30 Mbali msenga wa kuulanga ija kamulongela, "Maliya, sekeudumbe! Mana Mulungu kakulagusa unovu wake. 31 Kwizapata wimo, na kwizakweleka mwana wa chilume, nayo kwizamtanga Yesu. 32 Nayo kezakuwa mkulu, kezatangigwa Mwana wa yeli Uchanyha Ng’hani. Na Mndewa Mulungu kezamtenda yawe Mfalume, fana Daudi wasaho yake viyakalile. 33 Kezakuwa Mfalume wa lukolo lwa Yakobo siku zose, ufalume wake hawizakuwa na uhelelo bule!"

Kwelekigwa kwa Yesu Chilisito

18 Kwelekigwa kwake Yesu Chilisito Mulopozi kukala vino, Maliya mami yake viyakalile yafudikiligwe na Yosefu, wang’hali hawanaibandama, Maliya kawonigwa kana wimo kwa udahi wa Muhe Yelile.

Wila wa nhogolwa wa Maliya

46 Maliya kalonga,

"Moyo wangu womtunhiza Mndewa,

47 na muhe wangu wodeng’helela

kwaichimu cha Mulungu Mulopozi wangu,

48 kwaviya kanikumbuka, msang’hani wake mnyendanyenda!

Kusongela sambi na kugendelela

wanhu wose wezanitanga nili na heli

49 kwa vinhu vikulu Mulungu yeli na Ludabwa voyanhendele.

Zina da Mulungu jela.

50 Kusongela ulelwa uno na kugendelela

kowalagusa ubazi waja wowondumba.

51 Katenda vinhu vikulu kwa mkono wake.

Kawapwililisa weli na magoda munaimizoyo yawo.

52 Kawahulumusa wafalume weli na ludabwa kulawa kuna ivigoda va chifalume vawo,

na kawenula wanyendanyenda.

53 Weli na nzala kawegutiza yanogile,

na kawasegeza matajili makono muhala.

54 Kamtaza Isilaeli msang’hani wake,

kakumbuka kulagusa ubazi wake

55 kwa Bulahimu na lukolo lwake

siku zose!"

4 Yosefu kalawa bululu da Nazaleti muna iisi ya Galilaya, kahita bululu da Betelehemu muna iisi ya Yudeya, hanhu hoyelekigwe Mfalume Daudi. Yosefu kahita haja kwaviya kalawa muna ulukolo lwa Daudi. 5 Kahita kupetigwa hamwe na mhambe wake Maliya, yoyakalile na wimo. 6 Viwakalile Betelehemu, siku ya Maliya kuibasula difika. 7 Nayo kaibasula mwanage chaudele, mwana wa chilume, kamuyawaza vibwende. Maabaho kamtambalisa hanhu ha kudila ng’ombe muna dizizi da ng’ombe, kwaviya hawapatile bule hanhu ha kukala muna ikaye ya wageni.

19 Mbali Maliya kazika mbuli izo zose muna umoyo wake na kuzigesa ng’hani.

34 Saimoni kawatemela mate, kamulongela Maliya, mami yake Yesu, "Imwana ino kasaguligwa na Mulungu kwa kusegeza uhasanyi na kuwazilibula wanhu wengi muna Isilaeli. Maabaho kezakuwa chilaguso kwa Mulungu, na wanhu wengi wezamulema. 35 Maabaho magesa muna imizoyo ya wanhu wengi yezagubuligwa wazi. Na weye mwenyewo, usungu fana viya mwele ukanha wizauhoma moyo wako."

48 Mami yake na tati yake viwamuwonile wazanywa ng’hani. Mami yake kamuuza, "Mwana weye! Habali kuchitendela vino? Niye na tati yako chikala chokuzahila kwa kugaya."

49 Yesu kawedika, "Habali munizahila? Hamuvimanyile kuwa niye nilondeka nikale muna ikaye ya Tati yangu?" 50 Mbali wawo hawavimanyile fambulo da mbuli yoyawalongele.

51 Maabaho, kabwela nawo mbaka Nazaleti, nayo kakala kowategeleza. Mami yake kagendelela kukumbuka vinhu vose muna umoyo wake.

3 Divai viimalile, mami yake Yesu kamulongela, "Wabule divai."

4 Yesu kamwidika, "Mama, sekeunilongele cha kutenda. Lusita lwangu lung’hali halunafika bule."

5 Mami yake Yesu kawalongela wasang’hani, "Tendeni chochose chondayamulongeleni."

25 Mami yake Yesu na mami yake mkulu hamwe na Maliya, muke wa Chiliyopa, na Maliya Magidalena wakala wemile habehi na msalaba wa Yesu. 26 Yesu viyamuwonile mami yake, na habehi yake kema ija mwanahina iyamulondile, kamulongela mami yake, "Mama, lola, iyo niiyo mwanago."

27 Maabaho Yesu kamulongela ija imwanahina, "Lola, iyo niiyo mami yako." Kusongela lusita ulo mwanahina ija kamsola Maliya, kakala nayo ukaye yake.

Mami yake Yesu na iwandugu zake

31 Maabaho mami yake Yesu na wandugu zake weza Wema hanze, wamtuma munhu yakamtange Yesu. 32 Wanhu wengi wakala wamzunguluka. Nawo wamulongela, "Mami yake yako na wandugu zako wakunze wokuzahila."

33 Yesu kawedika, "Mami yangu yalihi? Na wandugu zangu walihi?" 34 Maabaho kawalola wanhu wamzunguluke na kulonga, "Mami yangu na wandugu zangu iwano wabahano! 35 Munhu yoyose yotenda yaja yomnogeza Mulungu, iyo ndugu yangu na lumbu jangu na mami yangu."

55 Vino iyo siiyo mwanage ija imsongola vinhu na iviya mami yake niiyo yotangigwa Maliya na ndugu zake niwawo wotangigwa Yakobo na Yosefu na wamwenga wotangigwa Saimoni na Yuda? 56 Walumbu zake hawakala hano bule? Lelo kayapata kulihi yano yose?

14 Wawo wose wagendelela kuiting’hana hamwe kutosa hamwe na wanaake waja na Maliya, mami yake Yesu, na wadodo zake Yesu wa chilume.