Maria

Ukwelekighwa kwa Yesu kwolangusighwa

26 Mna ghumwetsi ghwa sita ghwe inda ya Elizabeti Imulungu kamtuma malaika yokemighwa Gaburieli aghende mne ghumji ghwa Natsareti mne isi ya Galilaya, 27 kwe imwali iyalapfighwe tsengele ne immale yakemighwe Yosefu, yalawile mne lukolo lwa Mndewa Daudi. Imwaliyo tsakakemighwa Mariya. 28 Malaika tsakamtsila imwaliyo kamlongela, "Haulamke! IMNDEWA kahamwe naghwe, naye kakubaliki!"

30 Malaika kamlongela, "Mariya, uleke kupfuka! Imulungu kakutendela uluso. 31 Kutsokinda inda na kutsakweleka imwana immale, kutsomwing’a taghwa Yesu. 32 Katsakuwa mkulu na katsokemighwa Imwana we Imulungu yali Kuchanya Ng’ani. IMNDEWA Imulungu katsomwing’a chighoda cha undewa che imbala wake Daudi. 33 Katsokuwa imndewa we iwana wa Yakobu ghamatsuwa ghose, ne undewa wake ng’autsomala bae!"

Ukwelekighwa kwa Yesu Kiristu

18 Ukwelekighwa kwa Yesu Kiristu tsakukala apfino, Maria mai wake Yesu tsakalapfighwa tsengele na Yosefu; lekeni tsang’ana wawase hamwe baye, Mariya koneka kana inda kwa uwetso wa Loho Yelile.

Wila wa Mariya

46 Mariya kalonga,

"Ghumoyo ghwangu ghomtoghola IMNDEWA;

47 ghumoyo ghwangu ghwomdeng’elela Imulungu

iyali Mkombotsi wangu,

48 kwaapfila kaukumbuka udodo we imtumwa wake!

Kulawa sambi na kughendelela

iwanu wose watsong’ema na imunu iyebwedile

49 kwaapfila Imulungu yane Ngupfu kanendela makulu.

Taghwa lye Imulungu lyenzeluka.

50 Kowonela libatsi iwanu wala iwompfuka.

libatsi lyake lyokala lweleko mbaka lweleko lungi 51 Tsakatenda ipfinu pfikulu kwa ghumoko ghwake.

Kawapwililisa iwanu iweghodile mne imimoyo yawo.

52 Kawahulumsa iwandewa kulawa kune ipfighoda pfawo pfa undewa,

na kawenula iwali mbughilambughila.

53 Kawaghutisa wane inzala kwa pfinu pfinoghile,

na kawawinga matajiri ghamoko ghaliyeka.

54 Kamwapfila imtumwa wake Isiraeli,

na ng’esemwile bae kumlangusa libatsi lyake.

55 Kakumbuka kumwonela libatsi Abrahamu

na lukolo lwake ghamatsuwa ghose!"

4 Yosefu kalawa ghumji ghwa Natsareti ighuli mna isi ya Galilaya, kaghenda ghumji ghwa Betilehemu ighuli mna isi ya Yudeya, hanu helekighwe mndewa Daudi. Yosefu kaghenda ako kwaapfila kalawila mne lukolo lwa Daudi. 5 Kaghenda na Mariya kupetighwa, ipinga yamlapfile tsengele, yakalile ne inda. 6 Hawang’ali wa Betilehemu, litsuwa lyake lya ukweleka lipfika, 7 keleka imwanaghe chaudele, kampfatsa pfibwende. Kuya kamuwasitsa mne ichibumbulika hanu hawajilagha iwanyama, kwaapfila ng’awapatile bae hanu ho kukala mne ing’anda ya iwahenza.

19 Lekeni Mariya kagheka agha ghose mna ghumoyo ghwake na kaghatonga ng’ani.

34 Simoni kawabaliki, kamlongela Mariya, mai wake Yesu, "Imwana yuno kasaghulighwa ne Imulungu kwa ukwagha na ukukombolighwa kwe iwanu wengi mne isi ya Isiraeli. Kuya katsakuwa chitango kulawa kwe Imulungu, ichitsolemighwa ne iwanu wengi. 35 Kuya ukwalangula mne imimoyo ye iwanu wengi kutsoghubulighwa mwatsi. Naghwe imwenyegho, usungu ka lipanga ilitema utsouhoma ghumoyo ghwako."

48 Weletsi wake hawamwonile wakangawala ng’ani. Mai wake kamghutsa, "Mwanangu, ebali ututenda apfi? Nene na aba wako tung’ali tukubama kwa usungu." 49 Yesu kawedika, "Angu mnibamila choni? Ng’ammanyile bae nene nibamighwa nikale mne ing’anda ya Aba wangu?" 50 Lekeni wao ng’awamanyile bae imbuli yawalongele ina mana yachi.

51 Kuya, koya nawo mbaka Natsareti ako ang’ali yowahulikitsa. Mai wake keka ipfinu pfose mne ghumoyo ghwake.

3 Idipfai haimalile, mamo wake kamlongela Yesu, "Wahela idipfai."

4 Yesu kamwidika, "Mamo, tuna choni cha ukutenda nene na ghweghwe? Isaa yangu ng’ana ipfike baye!"

5 Kuya mamo wake kawalongela iwatumighwa, "Chochose chiyowalongelani tendeni."

25 Hana ghumsalaba ghwa Yesu tsawema mamo wake, lumbu wa mamo wake, Mariya mwehe wa Kileopa, na Mariya Magdalena. 26 Yesu hayamwonile mai wake na imwanafunzi ayula iyamkundile kema habehi naye, kamlongela mai wake, "Mamo, ayo aho yuyo imwanagho."

27 Kuya kamlongela imwanafunzi ayula, "Lola, ayo mai wako." Kulawa isaa yiyo, imwanafunzi ayula kamsola Mariya, koka naye ukaye yake.

Mai wake Yesu ne iwandughu tsake

31 Kuya mai wake Yesu ne iwandughu tsake wapfika. Wema kunze, wamtuma imunu mng’anda amkeme. 32 Iwanu tsawamtsunguluka Yesu. Nawo wamlongela, "Mai wako na ndughu tsako wakunze, wokubama ghweghwe."

33 Yesu kawedika, "Apfi mai wangu nani na ndughu tsangu tsina nani?"

34 Kuya kawalola iwanu iwamtsunguluke, kalonga "Awano hano iwo mai wangu na ndughu tsangu! 35 Imunu wowose iyotenda aghala ghobama Imulungu, ayo iyo ndughu yangu na lumbu wangu na mai wangu."

55 Ayuno si imwana wa iselemala baye? Mamo wake si Mariya baye? Na ndughu tsake si tsina Jakobu, Yosefu, Simoni na Yuda baye? 56 Na lumbu tsake wose ng’awalibaha na twetwe baye? Lelo yaghapatile kwani aghano ghose?"

14 Awo wose tsawaghendelela kwitingana hamwe ukulomba, hamwe ne iwapinga wangi, na Mariya mai wake Yesu, na ndughu tsake Yesu.