Maria

O angeli vakerela bašo bijanibe e Isuseskoro

26 Koga i Elisaveta sine šofto masek khamni, o Devel bičhalgja e angele e Gabrijele ko Galilejsko gradi, Nazaret, 27 ki Marija so sine čhaj hem sine manglardi e Josifeske, so sine taro seme e caroskoro e Davideskoro.

28 Koga alo o angeli, phengja e Marijake: "Radujn tut! O Gospodari tano tuja! Ov tano but milostlivo prema tute!"

30 A o angeli phengja lake: "Ma dara, Marije! Adaleske so arakhlan milost anglo Devel. 31 Tu ka ačhove khamni hem ka bijane čhavo, i ka de le o anav Isus. 32 Ov ka ovel baro hem ka vikinel pe Čhavo e Najbare Devleskoro. O Devel o Gospodari ka del le o troni leskere parapaposkoro e Davideskoro. 33 Hem ov ka carujnel upro pleme e Jakoveskoro zasekogaš hem leskoro carstvo nane te ovel le kraj."

O bijanibe e Isuseskoro

18 A o bijanibe e Isuse Hristoskoro sine agjar: Leskiri daj i Marija sine manglardi e Josifeske, ama pred te len pe, oj ačhili khamni taro Sveti Duh.

I Marija slavinela e Devle

46 Togaš i Marija phengja:

"Mi duša slavinela e Gospodare,

47 hem mo duho radujnela pe ko Devel, mo Spasiteli,

48 so ulo milostlivo upri pi ponizno sluginka.

I taro akava dive sa o generacije ka phenen deka sijum blagoslovimi džuvli,

49 adaleske so baro šukaripe kergja mange o Zoralo Devel.

Sveto tano leskoro anav.

50 Ov tano milostlivo e manušenge tari generacija ki generacija

so darana lestar.

51 Pe silno vasteja kergja bare bukja;

rasturingja okolen so kerena pe bare ko pumare srcija.

52 Peravgja e vladitelen taro lengoro tronija,

a vazdingja e poniznon.

53 Čajlargja e bokhalen šukar bukjencar,

a e barvalen mukhla len čuče vastencar.

54 Pomožingja e Izraelconge, pe slugenge.

Na bistergja te ovel milostlivo,

55 e Avraameske hem leskere semeske zasekogaš,

sar so vetingja amare parapaponge."

4 Agjar o Josif gelo taro gradi Nazaret ki Galileja, ki Judeja, ko Vitleem, ko gradi e Davideskoro, adaleske so sine tari familija hem taro seme e Davideskoro. 5 O Josif gelo adathe te potpišinel pe, ple verenicaja e Marijaja, so sine khamni. 6 Dži kote sine adathe ko Vitleem, alo o vreme e Marijake te bijanel e čhave. 7 Koga bijangja pe prvo čhave, pakjargja le ko pherne hem čhigja le ko pus, soske na sine gostinsko soba baši lenge.

19 Ama i Marija garavela sine sa akala bukja ko po srce hem razmislinela sine.

34 Togaš o Simeon blagoslovingja len hem phengja e Marijake e Isuseskere dajake: "Akava čhavo i birimo buten te peravel hem te vazdel ko Izrael. Ov tano birimo te ovel e Devleskoro znako, ama but džene ka otfrlinen le. 35 Ka sikaven pe butengere garavde misle, ama i čhurik ka posavel ti duša."

48 Koga dikhle le leskoro dad hem i daj but čudisalile. Leskiri daj phengja leske: "Mo čhavo, soske kergjan amenge akava? To dad hem me but darandilem hem rodingjem tut!"

49 A o Isus pučlja len: "Soske rodena man? Na džanena li deka mora te ovav me Dadeske ko kher?"

50 Ama i Marija hem o Josif na svatinge so o Isus mangla te phenel lenge adaleja.

51 Palo adava, o Isus gelo lencar ko Nazaret hem sine lenge poslušno. A i daj leskiri sa akala bukja garavela len sine ko po srce.

Koj e Isuseskiri familija

31 Togaš e Isuseskiri daj hem o phrajla leskere ale adathe. Dži kote adžikerena sine avrijal bičhalge nekas te vikinen le.

32 A uza leste bešena sine but manuša hem vakerge leske: "Avrik ti daj hem te phrajla adžikerena te dikhen tut."

33 A o Isus pučlja len: "Koj tani mi daj hem me phrajla?"

34 Koga dikhla e manušen, so bešena sine uza leste, vakergja: "Akje, akala tane mi daj hem me phrajla. 35 Soske, sekoj so kerela i vojla e Devleskiri, ov tano mo phral, mi phen hem mi daj."

55 Nane li akava o čhavo e stolareskoro? Nane li leskiri daj i Marija, hem leskere phrajla o Jakov, o Josif, o Simon hem o Juda? 56 Hem nane li sa akate leskere phenja amencar? Kotar leske sa akala bukja?"