Maria

Kangeru kaa tongora yo kwerekiwa kwa Yesu

26 Elizaveta ou a mu pitire maonda o mutanu na thzofoci, Nyambi wa tumine kangeru Gaburiele mu diumbo dyo mu Galilea edi di nethsiwa Nazareta, 27 kwa diungu oyu a ungekerire mukwerume o dithzina dyo Josefa, o mu mukuta wa Fumu Davida. Dithzina dyoyo diungu po Madiya. 28 Kangeru ka keyire ku kwenthzi no ku amba ci: "Shangwe owe o na herepiwa! Fumu noe a di."

30 Unone kangeru ka mu amberire ci: "Wa yapa Madiya, inene o na tambura thsihemo kwa Nyambi. 31 Kenge wa ku thza poremu no kwereka mwana o mukwerumeana, wa ku mu te dithzina dyo Yesu. 32 Kenge a kwikara o mukuru, karo kenge a kwithsiwa Mwana Nyambi, aye o Kuthzinama Nene. Fumu Nyambi kenge a ku mu pa ofumu o kuninga eci wa mukwathsañuru wenthzi Davida. 33 Kenge mba a tumina mukuta wa Jakovo* myaka thzothzihe, karo kutumina kwenthzi kenge mba kwikara ko diyere."

Kwerekiwa kwa Yesu Krisitu

18 Kwerekiwa kwa Yesu Krisitu kwekarire kenge: Mama wenthzi Madiya shime a ungekeriwire kwa mukwerume o dithzina dyo Josefa. Uno honi o kwa shime ku ciyeka, kwa wanaharire ci Madiya wekarire poremu kokoro o Mupepo Oukenu.

Dimbo dya Madiya

46 Madiya wa ambire ci:

"Mucima wange wa shangara Fumu,

47 Mwoyo wange wa nyanyukera Nyambi Muyoyithsi wange.

48 Inene na a ni vuruka,

ame no mupikenthzi o kushi.

Ku tunda pano mikuta thzothzihe

kenge mba thzi nithsa ci no mukwa thsiyauthzi.

49 Pa ku ni kwamena enu yoshokuru aye Shokoro,

dithzina dyenthzi dikenu.

50 Aa monithsa ñeke thzenthzi kwanu awa a na mu yapa,

mu mikuta thzothzihe.

51 Na a kwama enu yoikuru kokoro wenthzi,

na a shandura akwamununa mwianekera yo micima thzo.

52 Na a turura mafumu o shokoro pa mangunja o

no ku tungithsa apika.

53 Akwa kufa nthzara na a wekutithsa keyi yoiwa.

Unone afumanyi naa wa huthsa mokomoko.

54 Naa kwathsa mupikenthzi Isiraele

pa ku vuruka ku mu yuvera ñeke,

55 eci dyodi a kumbwethzire akwathsañuruetu kwa Aburahama,

noku kwa mwanahoka wenthzi diyere."

4 Mweyo, Josefa naye wa tundire ku Galilea mu diumbo edi di nethsiwa Nazareta, ku thza ku Judea mu diumbo dya Davida edi di nethsiwa Betelehema, inene naye wa mu mukuta no dihumo dya Davida. 5 Wa ka ciñorithsire na Madiya oyu a ungekerire. Madiya wekarire poremu. 6 O kwa di mu Betelehema thsikati thsenthzi thso ku shamuruka thsa kumine. 7 Wa shamurukire mwedi wenthzi o mukwerumeana. Wa mu vungerire peto yombu no ku mu rangeka mu thsikungu, mukaci ko kuninga ci ka wanine maturero mu nthzio thzenda.

19 Madiya aye wa pakire yoihe eyi enu mu mucima no ku i cikupaura.

34 Ngou Simioni a wa fiyawerire, wa amberire Madiya mama wa Yesu ci: "O mone, Nyambi na a hangura oyu mwanuke ci a retere Maisiraele owangi kunongithsiwa no kuyoyithsiwa, ethsi po thsimonithso thsa Nyambi ethsi mba hamura. 35 Mweyo, eanekera yo micima thzothzingi kenge mba i hokoriwa. Owe o mbuyama, mathsiwa oakuru kenge a ku ku kiña ku mucima eci mwere."

48 Ashemienthzi a ka komokire ou a mu monine, mama wenthzi ayepo ninga ci: "Mwanange, ine o na i tu tendera kenge? O na mono tata woe name tu na shupeka nene ku ku fota."

49 Wa wa tawire ci: "Ine eyi mu na ni fotera? Ka mu dimukire ci naa roera kwikara mu nthzio thza tata nji?". 50 Unone awo ka yuvithsithsire eyi a wa amberire.

51 Yesu wa hukireno ku Nazareta, wa cihuthsire kushi thzo, mama wenthzi aye wa i pakire yoihe eyo enu mu mucima wenthzi.

3 Waine ou a pwire, Yesu wa mu amberire mama wenthzi ci: "O na wa pwera waine."

4 Yesu wa tawire ci: "Mama, ine yo ku ni pakera mwinu yo kengeyo? Thsikati thsange thsi shime ku kuma."

5 Mama wenthzi wa amberire angamba ci: "Mu kwame yoihe eyi a mi ambera."

25 Awa emanine po pepi no mbinda nedi mama wa Yesu no mina mama wa Yesu o mbuyama no Madiya munu wa Kolopasi no Madiya Magadalena. 26 Yesu ou a monine mama wenthzi noya thsirongwa a shimine nene o kwa nemana po pepi, wa amberire mama wenthzi ci: "Mama, mwanoe oyo." 27 Karo wa amberire oya thsirongwa ci: "Njinoe oyo." Ku tunda edyo diyuwa oya thsirongwa wa shimbire Madiya ku kekaranga nenthzi mu mwanda wenthzi.

Amina Yesu na mama wo

31 Amina Yesu na mama wo a na kumine ci na mu mone. Emanine pora no ku tuma munu ku ka mwithsa. 32 Mbunga thzekarire ku thzingwera Yesu, munu yumweya wa mu amberire ci: "Mama woe naminoe aa ku fota pora."

33 Yesu wa tawire ci: "Mama naminange ne adye?" 34 Ngou a tanekerire anu wahe awa a mu thzingwerire no ku amba ci: "Mu na mono, awa wodiyo amama naminange. 35 Inene yomuhe o ku kwama eshima ya Nyambi, yodiyo minange no ndumbuthzange no mama."

55 "Ene kadi yodiyo oyu mwana muyuwi? Mama wenthzi po kadi yodiyo Madiya? Karo aminenthzi po kadi wodiyo awa a Jakovo, Josefa, Simoni na Juda? 56 Andumbuthzenthzi wahe po kadi wodiyo awa tu na tunguno? Kupi oku na a i wana yoihe eyi?"

14 Awa wahe a cikwatire pofoci no ku tanarithsa erombero, mofoci kengeyo no waya ambuyama na Madiya mama wa Yesu namina Yesu.