Maria

Kwelekwa kwa Yesu kwalotelwa

26 Mwo mwezi wa mtandatu wo ubovu wa Elizabeti, Mnungu amtumaga mtumigwa ywa kwe Mbingu etangwe Gabilieli kwe isi ye Galilaya, mwo mzi ukwitangwa Nazaleti. 27 Nakanda na ulosi kwa mwali na mazanga akwitangwa Maliamu. Mndele uyu andaga katumizwa ni mgosi yumwenga etangagwa Yusufu, andaga ywo lukolo lwa zumbe Daudi. 28 Mtumigwa ywa kwe mbingu niyo amwizila mwali uyo niyo amgamba, "Ndamsa! Zumbe e hamwenga na weye, naho kakuvikila vitendese."

30 Mna mtumigwa ywa kwe mbingu niyo amgamba, "Maliamu, usekogoha! Mnungu kakulagisa uwedi wakwe. 31 Kaula, nowinule nda, naho noweleke mwana kilume, zina dyakwe noumwitange Yesu. 32 Naande mkulu naho neetangwe Mwana ywa Mnungu e Kulanga. Zumbe Mnungu naamwink’he difumbi dyo useuta enga viya andaga mkale ywakwe Daudi. 33 Naande Seuta we cheleko cha Yakobo mazuwa yose, naho uzumbe wakwe wa ulo na ulo!"

Kwelekwa kwa Yesu Kilisito

18 Kwelekwa kwa Zumbe Yesu kwandaga ivi. Maliamu uyo nine dya Yesu Kilisito, atumizagwa ni Yusufu. Umwo wandaga akei kulozigwa, Maliamu aonekaga kunda mbovu kwa udahi wa Muye ywa Mnungu.

Wila wa uwedi utendese wa Maliamu

46 Maliamu niyo agamba,

"Moyo wangu wamtogola Zumbe,

47 no muye wangu welelwa

kwa mbuli ya Mnungu, Mlokozi ywangu,

48 kwaviya anikumbukile, mndima ywakwe mkiwa!

Kukongela dielo na kugendeela, want’hu wose nawanitange mvikilwa,

49 kwe zimbuli zakwe zink’hulu Mnungu wo Udahi anidamanyile.

Zina dya Mnungu dikuka.

50 Kukongela cheleko iki na kugendeela

kalagisa mbazi kwa wadya wakumhuwila.

51 Kadamanya vint’hu vikulu kwa mkono wakwe.

Kawatenda wasambale wadya wakukefenya mwe mioyo yawe.

52 Kawakinya maseuta kulawa mwe difumbi dyo useuta,

na kuwenula want’hu waoneke kunda wasokezi.

53 Kawegusa wata sala kwa vint’hu vedi,

naho kawagulusa wagoli heweena kint’hu.

54 Kamwambiza mtumwa ywakwe Izilaeli,

naho hajaile kulagisa zimbazi zakwe

55 kwa tati yetu Ibulahimu,

hamwenga na cheleko chakwe ulo na ulo!"

4 Yusufu naye ahalawaga kwo mzi wa Nazaleti mwo mkowa wa Galilaya, niyo akwela kuita Uyahudi mwo mzi wa Betelehemu, hant’hu elekagwa zumbe Daudi. Nakaita ukwo kwaviya yehe andaga mwo lukolo lwa Daudi 5 vileke awandikwe hamwenga na Maliamu, uyo amposaga, mna andaga mbovu. 6 Umwo wandaga uukwo, mazuwa ya Maliamu yo kwingila nyumba yabulaga. 7 Niyo amweleka mwana kilume wa nk’hongo, no kumvika suke za kititi, niyo amtambalika mwo luhondo lwo kudiila ng’ombe kwaviya hahandaga na hant’hu mwe nyumba ya wageni.

19 Mna Maliamu niyo awiika ulosi uwo wose akaufanyanya mwo moyo wakwe.

34 Simioni niyo awavikila, akamgamba Maliamu nine dya Yesu, "Kaula, mwana uyu kasagulwa ni Mnungu kwa kugwa na kwinuka kwa want’hu wengi mwe Izilaeli. Naande kilagiso kulawa kwa Mnungu, na want’hu wengi nawamnemele. 35 We mwenye nawe dibamba nadikwingile mo umoyo wako vileke zigubulwe fanyanyi za mioyo mingi."

48 Welesi wakwe weze wamuwone, niyo weheleswa. Nine niyo amgamba, "Mwanangu, ni mbwai ukakitenda ivi? Kaula, miye na tati yako nekinda kikakuzungula kwa kwangadika."

49 Yesu niyo awahitula, "Kwa mbwai kunizungula? Hammanyize kugamba hiungigwa ninde mwe nyumba ya Tate?" 50 Mna woho hawakombaganye ulosi uwo awagambile. 51 Niyo auya nawo Nazaleti, naye andaga akawategeleza. Nine niyo ayaika ayo yose mo umoyo wakwe.

3 Divai ize isile nine dya Yesu niyo amgamba, "Divai yawe isila." 4 Yesu niyo amgamba nine, "Mnala, kina mbwai miye na weye? Isa yangu ikei kubula." 5 Nine niyo awagamba wandima, "Dyodyose akuunga awagambileni, damanyeni."

25 Wandaga hagihi no msalaba hadya awambilwe Yesu wandaga, ni nine dya Yesu, lumbudye dya nine dya Yesu, Maliamu mkaziwe dya Kiliopa, hamwenga na Malia Magedalena. 26 Yesu niyo amuwona nine hamwenga na yudya mwanamp’hina amuungisaga wakimala, niyo amgamba nine, "Uyo nuyo umwanao."

27 Naho niyo amgamba yudya mwanamp’hina ywakwe, "Uyo nuyo nyokwe." Kukongela aho yudya mwanamp’hina niyo amgumha yudya nine no kugenda kwikala nae kwe nyumba yakwe.

Nine na wanduguze Yesu

31 Nine na wanduguze Yesu wezaga niyo wakimala kuse, niyo wamtuma mnt’hu vileke akamwitange Yesu. 32 Na fyo dya want’hu nedikala kumzunguluka. Niyo dyamgamba, "Kaula, nyokwe hamwenga na wanduguzo wekuse wakuzungula."

33 Yesu niyo awahitula, "Mnala na wandugu zangu ni wahi?"

34 Niyo ahituka akawakaula wadya wekale wamzunguluke niyo agamba "Kauleni! Awa nawo mnala na ndugu zangu! 35 Mnt’hu yeyose akudamanya yadya akuunga Mnungu niye lumbu dyangu na ndugu yangu naho niye mnala."

55 Uyu hiye mwana ywa selemala? Nine hi Maliamu, naho wanduguze hi awa wakina Yakobo, na Yusufu, na Simoni, na Yuda? 56 Walumbuze wose hawa kwikala aaha? Yano yose kayapata hi?"

14 Awa wose wandaga wakavika Mnungu hamwenga na wavele wamwenga, wakina Maliamu nine dya Yesu na wanduguze.