Maria

येसु उजर्मीने भबिस्यबानी

26 एलीसिबा ज़ाडैने ओटाव छ महिनाका गब्रिएल वार्ने स्वर्गटा कटंवाललाई परमेस्वरये गालीलला नासरत याडोज़्याव नाङखारलं उपरिःङो। 27 नो स्वर्गटा कटंवाल टोबो कन्या लुज़ा लेवकं सोर लाङडे ओनाव होलो उमिन मरियम लेव, होलाई डाउडलो ओसन्तानलं योसेफ वार्ने टोबो मीये वाःङडे ओनैज़्याव। 28 स्वर्गटा कटंवालये मरियम लेवकं नाडे हैओडोव, "ए परमेस्वरलो ओडया डोयो लुज़ा, नङलाई ढो ङाडानज़्या! स्यान्टैराई भन्डा घ्योव परमेस्वर नङसं लिज़्या।"

30 स्वर्गटा कटंवालये होलाई हैओडोव, मरियम, "टाछेङंन, कडालेकं नङ परमेस्वरङाम डया डैडेननै। 31 रःङ, आबो नङ मुऱ्या टानेनंले, होकाम टोबो खेपा ज़ा डैने नले, नङ होलो उमिन येसु नैड्याने नले। 32 नो स्यान्टैराई भन्डा घ्योव टानेले, होकाम स्यान्टैराई भन्डा घ्योव परमेस्वरलो ओज़ा डोसिनेले, होकाम स्यान्टैराई भन्डा घ्योव परमेस्वरये होलाई उपुर्खा डाउडलो उसिहासन यानेले। 33 येसुये याकुबलो ओसन्तानलं एकसप्ड्या राज्य डोनेले, होकाम होलो ओराज्य खर्कज़ खेम्ने माले।"

मरियमये प्रसन्सा ओगयो

46 होकाम मरियमये हैओवारो,

"ङापोहोनये स्यान्टैराई भन्डा घ्योव प्रभुलो ओप्रसन्सा डोवये,

47 होकाम ङाआत्मा, ङालाई छुट्कारा याने ङापरमेस्वरटं रेङये।

48 कडालेकं परमेस्वरये ओकमार्नीलो उडुखं रःङडे नोयो,

रःङ, आबोकाम ङालाई स्यान्टै पुस्ताये बनै आसिक डोयो ची डानेलेरं।

49 कडालेकं जो परमेस्वर, बनै ओसक्ति लेव ले, हो परमेस्वरये ङालागिटं घ्योव येःन डाडेनोयो।

होलो उमिन चोखो ले।

50 परमेस्वरलो ओछ्या डोनेरंलाई होलो ओडया आर्काम पुस्ता-पुस्ता समं रहिने ले।

51 परमेस्वरये ओपाखुराटा ओसक्ति सटन्डेनोयो।

होये यायुङलं सुन्चिडे घ्योव झैसिनेरंलाई याबिचारसंज़ तत्तर बित्तर झैडेनोयोरं।

52 परमेस्वरये यासक्ति लेवरंलाई सिहासनटाम हाइडे नोयोरं,

होकाम न्यामलं रहिनेरंलाई घ्योव झैडेनोयोरं।

53 करेसं लेवरंलाई परमेस्वरये चाव बस्तये सवाङडे नोयोरं,

होकाम ढनीरंलाई परमेस्वरये रितो याकुइ परिःङडेनोयोरं।

54 परमेस्वरये इस्राएललाई डया डाडे ओयोव पाङ अनंसार

ओसेवा डोने नो इस्राएललाई सायटा योडेनोयो,

55 होकाम गेपुर्खारंलाई हैओडोवरं मान्टि, अब्राहाम सोनो राने ओसन्तानरंलाई

एकसप्ड्या डया डोडेनोयोरं।"

4 योसेफ पनि गालीलला नासरतलाम यहुडियाला बेठलेहेम वार्ने डाउडलो ओसहरलं ओनाव, कडालेकं नो डाउडलो ओकुटुम्ब सोनो ओसन्तानला लेव। 5 मिन सर्ने ओनाकं उकुइटं वाःङसिव मरियमलाई ओल्स लाङडे ओनाव। मरियम मुऱ्या लेव। 6 होनि नलं निलिज़्याकंज़ मरियमलो सुर्क्याल्नि टाने ओबेला ओटाव। 7 मरियमये जेठा ओज़ालाई ओजर्मोयो होकाम क्वाटं लुम्बैडे डोन्ठोलं ओनोयो, कडालेकं नोराई यालागिटं ढर्मसालालं बासिने पो मालेव।

19 हैनि पनि मरियमये आव स्यान्टै रोः बुझिडे उयुङलंज़ ओनोयो।

34 सिमियोनये नोरंलाई आसिक ओयोवरं, होकाम येसुलो वामा मरियमलाई हैओडोव, "रःङ, आव बाल्ख इस्राएललं भ्या मीराई यालागिटं नास टाने सोनो फरि ज्युङडा टाने कारन टानेले, होकाम स्यान्टै मीरं उबिरोडलं पाङने टोबो चिन्न टानेलो लागिटं रुजिसिव ची, 35 होकाम नोलो उबिरोड डाडे बनै भ्या मीराई यायुङला बिचार रःन्नेले। होकाम नङ नयुङटं पनि तरवाल रुपिसिनेले।"

48 येसुलाई रःङडे वामानि ओबाबुनि अचम्ब नेटाव, होकाम वामाये येसुलाई हैओडोव, "ङाज़ा, नङ गिनसं कडाने ऐ नलिज़्याव? रःङखेने नबाबुसं गिन नङलाई खिम्डे हैरान गेटाडुखे।"

49 येसुये होनिलाई हैओडोवनि, "जिन ङालाई कडाने जिखिम्सङज़्याव? ङा ङाबाबुलो उज़ीःमलंज़ लेने ची वार्ने रोः जिनलाई ठा माले?" 50 होकाम येसुये होनिलाई हैओडोवनि रोः नोनि माबुझिडुनिये।

51 होकाम येसु होनिसं नासरतलं ओनाव, होकाम होनिसं आग्याकारी टाडे ओलेव। येसुलो वामाये आव स्यान्टै रोः उयुङलं ओनोयो

3 अङ्गुरलो उरीः ओखेमो पाना येसुलो वामाये येसुलाई हैओडोव, "नोरासंके अङ्गुरलो उरीः माले।"

4 येसुये वामालाई हैओडोव, "ए आमा*, ङा कडि डाने ङालाई हैटाडाङ। ङाबेला अजं माराटा।"

5 येसुलो वामाये नौकररंलाई हैओडोवरं, "जे येसुये हैओवारो स्यानाव झैच्यो।"

25 हैजैडे सिफाइँराई आव येःन याडोव।

येसुलो उक्रुसलो ओछ्योकं येसुलो वामा, सोनो वामालो ओबैनी, क्लोपासलो ओज्या मरियम सोनो मरियम मग्डलिनीरं च्याङसिडे यालिज़्याव। 26 येसुये वामालाई सोनो ओल मया ओडोज़्याव उसिसलाई ओछ्योकं च्याङसिडे निलिज़्याव ओरोःङोनि, होकाम येसुये वामालाई हैओडोव, "आमा, गरःङके नज़ालाई!"

27 होकाम नो उसिसलाई पनि येसुये हैओडोव, "रःङ, नामा!" नो बेलाकामज़ येसुलो नो उसिसये होलाई उज़ीःमकं ओलाङो।

येसुलो वामा सोनो ओभाइरं

31 होकाम येसुलो वामा सोनो ओभाइरं राडे, पाखाङज़ च्याङसिडे येसुलाई खुल्ने वार्डे मी यापरिःङो। 32 येसुलो ओछ्योयालं माहुले मीरं चुङडे यालिज़्याकं हो मीराई येसुलाई हैयाडोव, "रःङखेने नामा, नभाइरं सोनो नबैनीरं नङलाई पाखाङ खिम्सनज़्यारं।"

33 येसुये नोरंलाई हैओडोवरं, "ङामा सोनो ङाभाइरं काङ्कारं?" 34 होकाम होकाला मीरं लेवडे रःङडे येसुये हैओवारो, "गरःङच्योरंके, आवरंज़ ङामा सोनो ङाभाइरं। 35 कडालेकं जोरं परमेस्वरलो उइछ्या अनंसार बारं होरंज़ ङामा, ङाभाइरं सोनो ङाबैनीरं।"