Maria

Tsamununu yi mbutukulu yi Yesu

26 Mu ngondi yi nsambanu, Nzambi wufidisa mbasi Ngabi ku divula dimosi didi mu Ngalili. Dizina di divula beni Nazaleti, 27 kuidi muana ndumba wumosi wuwizana makuela ayi bakala dimosi, diba mu nkuna Davidi. Dizina di bakala beni Zefu ayi dizina di muana ndumba Maliya.

28 —Mboti aku e ! Ngeyo wumonokono nlemvo kuidi Nzambi ! Pfumu widi yaku !

30 Buna mbasi yinkamba :

—Bika mona tsisi Maliya bila Nzambi wumueni kiadi. 31 Tala : wela ba mu buemba ayi wela buta muana wu bakala ; wela kuntedilanga Yesu. 32 Wela ba wunneni. Wela tedudulungu "Nzambi yizangama" ayi Pfumu Nzambi wela kumvana kundu ki kipfumu ki nkulu andi Davidi. 33 Wela biadilanga, mu zithangu zioso, batu batotukila mu Yakobi ayilubialu luandi lulendi suka ko.

Mbasi yisamuna mbutukulu yi Yesu

18 Tala phila yibutukila Yesu Klisto : Maliya ngudi andi ; niandi wuba nketo wuzolo kuelo kuidi Zozefi. Buna katudidi ko va nzo dikuela Maliya wubaka buemba vayi mu Pheve Yinlongo kabakila buemba beni.

46 Buna Maliya wukamba :

Muelꞌama wunkembisanga nzitusu wu Pfumu

47 ayi mpeve yama yilembo mona khini mu diambu di Nzambi,

Mvulusi ama.

48 Bila wubengudi thaluꞌandi va kisadi kiandi

kikambulu mfunu,

diawu zitsungi zioso ziela kuthedilanga

nketo wu zikhini.

49 Bila Nzambi yi zingolo zioso wuphangidi mambu manneni

Dizina diandi didi dinlongo.

50 Ayi mamboti mandi mela zingilanga

mu tsungi ka tsungi,

kuidi bobo ba kunkizikanga.

51 Wumonikisidi zingolo ziandi mu koko kuandi,

wusasikisidi batu badi luniemo mu mintima miawu

52 Wukuludi batu ba lulendo

mu bikundu biawu bi kipfumu

ayi wunangikidi batu bobo badi balembama

53 Wuyukutisidi batu bobo baba nzala mu bima bimbote.

Wusindika bamvuama mioko yi mioko

54 Wusadisidi kisadi kiandi Iseli

mu thebukulu yi moyo mu mambote mandi.

55 Banga buididi tsila yi kavana bakulu beto

kuidi Abalahami ayi kuidi nkunꞌandi

mu zithangu zioso.

4 Sumbu Zefu kaba mu nkuna wu Davidi, diawu kabotukila ku divula di Nazaleti, mu tsi yi Ngalili mu kuenda mu tsi yi Yuda ku divula di Betelemi, divula di Davidi. 5 Wuyenda va kimosi ayi Maliya, nketo wukazola kuela, wuba mu buemba.

6 Buna badi ku Betelemi, Maliya wutula mu thanguꞌandi yibutila. 7 Buna wubuta muana wubakala : muanꞌandi wuthete. Wunzinga mu minledi ayi wuntula mu dikulu ki bibulu bila bibuangu bisia bakana ko mu diambu diawu mu zinzo zinlekanga banzenza.

19 Vayi Maliya wulunda mambu moso ayi wuba ku mayindulanga mu ntimꞌandi.

34 Simewoni wuba sakumuna ayi wukamba Maliya, nguandi Yesu ti :

—Tala muana wawu wu kubukulu mu diambu di buisa ayi mu telimisa batu bawombo mu Iseli. Wela ba dimbu kiela bangusanga bawombo ; 35 muingi mayindu ma mintima mi batu bawombo matotuka. Vayi kuidi ngeyo veka, wela ba banga mbedi yela tobul mpeve aku.

48 Zimbuta bandi zisimina buwombo bu zimmona vana. Buna nguandi wunkamba :

—Muanꞌama, bila mbi wutuvangidi bobo e ? Zebi kuaku ti siaku ayiminu tsisi yiwombo tumueni ayi tutombidi ngolo.

49 Buna Yesu wuba vutudila :

—Bila mbi lufueti kuthombila e ? Lusi zaba ko ti mfueti ba mu nzo yi dise diama ?

50 Vayi basia sudika ko mambu momo ka bakamba.

51 Buna wuyenda yawu ayi wuvutuka ku Nazaleti. Wuba tumukina. Vayi nguandi wulunda bumboti mambu moso momo mavioka.

3 Vayi zimbukila vinu kimeni. Buna ngudi Yesu yiyiza kunkamba :

—Basiedi diaka ayi vinu ko.

4 Yesu wumvutudila :

—A nketo, mambu mbi tuidi beto yaku e ? Thanguꞌama yifueni ko.

5 Buna ngudi andi wukamba bisadi ti :

—Luvanga mambu moso ka kuiza lukambi.

25 Ngudi yi Yesu, nkomba ngudi yi Yesu, Maliya : nketo wu Klopasi ayi Maliya muisi Mangadala batelama va ndambu vaba dikulusi di Yesu. 26 Yesu bu kamona ngudi andi ayi nlonguki wowo kaluta zola wutelama vana ; buna wukamba ngudi andi :

—Nketo, tala muanꞌaku !

27 Bosi wukamba nlonguki :

—Tala ngudi aku !

Tona mu ntangu beni nlonguki wowo wulunda ngudi yi Yesu ku nzoꞌandi.

Dikanda dikiedika di Yesu

31 Ngudi yi Yesu ayi bakhomba bandi bayiza. Batelama ku nganda ayi batuma mutu mu kuntela.

32 Batu bawombo bavuanda ayi banzungidila Yesu. Buna bayiza ku nkamba :

—Tala ngudi aku ayi bakhomba ziaku badi ku nganda ayi ngeyo bantomba.

33 Yesu wuba vutudila :

—A nani ngudi ama ayi banani bakhomba ziama e ?

34 Bu tala batu bobo bantula va lukongolo, buna wuba kamba :

—Tala ngudi ama ayi bakhomba ziama bawu baba. 35 Woso mutu wumvanga luzolo lu Nzambi, niandi khombꞌama yi bakala ayi khombꞌama yi nketo ayi ngudi ama.

55 Keti niandi muana salaphati ? Maliya diawu ko dizina di ngudi andi ? Bosi Zaki, Zozefi, Simoni ayi Yuda basi ko bakhomba bandi zi babakala ? 56 Bosi bakhomba bandi zi baketo, keti zinkalanga yeto vava ? Vayi niandi kuevi kabakidi mambu moso momo ?

14 Babo mu kithuadi kimosi baba nkutakananga bilumbu bioso mu diambu di sambila va kimosi ayi baketo ayi Maliya ngudi yi Yesu, ayi bakhomba zi Yesu.