Maria

Kubhelakeka kwaka Yesu kulotakeka

26 Pamwehi wa sita Chapanga akantumiki mtumika waki Gabilieli kujenda mbaka ku muchi wa Nazaleti, ku inchi ja Galilaya. 27 Akuntumiki kwaka mwali jumu bikila joalowakika Malia, joakabhowakiki hweku na nkambaku joalowakika Yusufu, joakahumi mu lukolu lwaka Nkolongwa Daude. 28 Mtumika wa kunani kwaka Chapanga akunhiki mwali jola na kumpwaghila, "Monile! Bambo abhi papamu na wehapa, najombi atehi kukupengalela!"

30 Mtumika wa kunani kwaka Chapanga jola akumpwaghile, "Malia, ngawijoghopa! Maghambu upatiki chihomu palongi jaka Chapanga. 31 Lingalyaje, anaupata chitumbu na anaumbelaka mwana nkambaku, na wandoha lihina laki Yesu. 32 Jombi anaabya nkolongwa analowakika Mwana waka Chapanga Nkolongwa joabhi Kunani Nakanopi. Na Bambo Chapanga anaampekya chiteu cha ukolongwa chaka hokolu waki Daude. 33 Jombi anaabya nkolongwa wa lubheleku lwaka Yakobo mileli, na ukolongwa waki ngawijomoke!"

Kubhelakeka kwaka Yesu Kristo

18 Bhenibhela nde Yesu Kristo moakabhelakike. Malia mabhu waki, akabhi abhowakiki hweku na Yusufu. Nambu mangani ja kutama papamu ngati ndomi na nhwanu waki, Malia akabhonakini kubha abhi na chitumbu kwa uwezu waka Roho Mhuhu.

Nyembu jaka Malia

46 Malia akapwaghike,

"Mtima wangu undumbali Bambo,

47 roho jangu junhekalela Chapanga Mkengalela wangu,

48 maghambu angombwiki nepani nuntumika waki nenilihelea!

Kutumbu sajenu na kujendalela ibheleku yokapi anabhanoa mpengaleka.

49 Maghambu Chapanga Mweni Makili andendi mambu makolongwa.

Na lihina laki nde lihuhu.

50 Chiha chaki chabhajendela bhandu bhabhunjojabhela,

kutumbu chibheleku mbaka chibheleku chenge.

51 Atendiki mambu makolongu kwa chiwoku chaki.

Abhalekanishi bhandu bhabhabhi na ing’omu, mu maholalelu gha mintima jabhu.

52 Abhaheli bhakolongwa kuhuma pa hiteu yabhu ya ukolongwa,

abhakwehiki akakahochu.

53 Abhatupalishi bhabhabhi na injala kwa hindu yambone,

na bhanamali abhatopwi mabhoku matopu.

54 Anjangati mtumika waki Izilaeli,

na ngacheajewiki kundangi chiha chaki.

55 Ngati mobhalaghali akatati bhitu,

Ibulahimu na lubheleku lwaki, mbaka mileli!"

4 Yusufu akabhokiki kuhuma ku muchi wa Nazaleti ghoubhi ku inchi ja ku Galilaya, akapiti ku Beselehemu ghoukabhi ku muchi wa Yudea, pandu paakabhelakiki Nkolongwa Daude. Yusufu akapiti konihoku ndandi akahumi mu lubheleku lwaka Daude. 5 Akapiti kulembakeka konihoku papamu na Malia, joakumboki hweku na akabhi na chitumbu. 6 Bhakabya ku Beselehemu, lichobha laki Malia la kulibhopola lakahikike. 7 Akalibhopwi mwana waki wa kutumbula wa chikambaku, akamuwatiki indenga. Na kungoneka mu libheghi la kulekeha hinyama, maghambu ngachebhapatiki mbekenyu ja kutama mu nyumba ja kuhiki bhaghene.

19 Nambu Malia akaghabhehi malobhi ghokapi hagha muntima jaki na kughaholalela nakanopi.

34 Panihapa Simeoni akabhapengalili, na kumpwaghi Malia, mabhu waka Yesu, "Mwana jonjoni ahaghuliki na Chapanga kwa ndandi ja kuhabhuka na kujema kwa bhandu bhamaheli bha ku inchi ja ku Izilaeli. Kabheti anaabya nginyulila kuhuma kwaka Chapanga, jejikanakika na bhandu bhamahele, 35 nahuli maholalelu gha bhandu bhamaheli ghiyekulikaje palanga. Na kwaku wamweti, lipanga analijingala muntima waku, nahuli ghayekuliwa maholalelu gha mtima waku."

48 Malia mabhu waki na Yusufu pabhumbweni bhakakangichi nakanopi, na mabhu waki akundalukili, "Mwanango, bho, maghambu ki utuhengi bhenibhela? Lingalya, nepani na atati waku tukabhi tukulonda kwa kubhina mtima."

49 Yesu akabhayangiki, "Bho, mnonde kyane? Ngachemmanyi kubha imbalika kubha mu Nyumba ja Atati wangu?" 50 Nambu bhombi ngachebhamanyi ndandi ja lilobhi leakapwaghile.

51 Henu Yesu akakelawiki ku Nazaleti papamu nabhu, akajendalya kubhatii. Amabhu waki akabhekiki mambu ghanihagha ghokapi muntima.

3 Chikahi divai pajajomwiki, mabhu waka Yesu akumpwaghile, "Ngachebhabhi na divai."

4 Yesu akumpwaghile, "Mbomba, bho, maghambu kiki umbwaghi malobhi aghagha nepane? Chenjenu nga chikahi chechipalika kwangu nepani kuhenga leniheli."

5 Amabhu waka Yesu akabhapwaghi bhatumika, "Lokapi lenaampwaghilaje, mulihengaje."

25 Na pambipi na msalaba waka Yesu akabhi ajemiki mabhu waka Yesu, na ndombu wa mabhu waki, na Malia nhwanu waka Kileopa, na Malia Magidalena. 26 Bhela Yesu paakumbweni mabhu waki, na mbulwa joakumpaliki jola ajemiki pambipi, akumpwaghi mabhu waki, "Amabhu, hajoju nde mwana waku."

27 Kebhete akumpwaghi mbulwa jola, "Lingalyaje, hajoju nde mabhu waku." Na kutumbu chikahi chela mbulwa jola akuntoliki mabhu waka Yesu kunyumba jaki.

Amabhu na bhalongu bhaka Yesu

31 Amabhu waka Yesu na bhalongu bhaki bhakahikiki panipala, na kujema kunja, bhakumpelaki ubholu wa kundoha. 32 Lipogha la bhandu lakatami panipala kumuyongolota Yesu. Bhela mundu jumu wabhu akumpwaghi Yesu, "Amabhu waku na bhalongu bhaku na bhalombu bhaku bhabhi kunja, bhukulonda."

33 Yesu akabhapwaghile, "Bho, mabhu wangu nepani na bhalongu bhangu nde akanane?" 34 Panihapa akabhalingali bhandu bhabhatami kumuyongolota na kupwagha, "Ndingalya! Bhanganya abhabha nde akamabhu bhangu na bhalongu bhangu. 35 Mundu jokapi joatenda mapalu ghaka Chapanga, jonihoju nde mbeli wangu, ndombu wangu na mabhu wangu."

55 Bho, jonihoju le nga mwana waka Selemala jola? Bho, mabhu waki nga joalowakeka Malia, na bhalongu bhaki nde Yakobo na Yusufu na Simoni na Yuda? 56 Bho, bhalombu bhaki ngachebhatama pitu pane? Bho, apatiki kwaku henu malobhi ghanihagha ghokapi?"

14 Bhanganya habha bhokapi bhakalibhongini papamu bhakundobha Chapanga, papamu na akamabhu bhamahele, na Malia mabhu waka Yesu, na bhalongu bhaki.