Maria

Yesuusa yelinttodanna tiinidhii ohinttida

26 Elssabeexa wodaxidannippa izippuntsa agintte, Xoozii Kiitanchcho Gabre7ele Galila gade yeze Naazirete katama kiittida. 27 Ezin Yoosefa gaaze kaat Dawute kochchappa maaqqide atstses oocinttide wudurttigo kiitinttida. Yinna wudurtta Mayramo ga7inttane.✝ 28 Kiitanchcho iigo hyanggi, «Gaama kadhinttidanne, saro nees maaqqe, Xoozii neera yene» yagayda.

30 Kiitanchchize mahi, «Mayrame, zhashtippe; ne Xoozze tiintte nashsho denggida. 31 Yikke ne wodaxoda dhiiratsi na7a yeloda, E suntsiton Yesuusa ga7i suntsoda.✝ 32 E damma maaqqada, Ubbappa kattara Xoozze na7a ga7intti xeeginttoda. Laatstse Xoozze E aday Dawute araata ees inggoda.✝ 33 E Yayqooba kochchalla afa medhina ka7itoda; E ka7itumttis hyal7e baaya» yagayda.

Yesuus Kiristtoosa yelintto

18 Yesuus Kiristtoosa yelintta taarike hyannippa kaallizanno. E intta Mayrama Yoosefas oocintti yezite Yoosefa ekkikaayzin Geeshi Ayyaanappa wodaxida.

Mayrami mazmure

46 Mayrama hyannii gaara yagayda:

«Ta shemppita Laatstsa bonchchane,✝

47 ta Ayyaanze gaalla Xoozzella ufayttane.

48 E fa arttii toochito bi7ida.

Hyaynoppa aykkii yeletitsi ubba tana anjjinttidanno ga7oda.✝

49 Wolqqaama maaqqide E, taas damma baz oochchida.

E suntsita Geeshi.

50 Eza bonchchizuntsalla afa,

E maarotitsita medhinappa medhina yellodes.

51 Fa qesite mintsi baz oochchida,

fa wozintte uturtizuntsanna lalida.

52 Damma kaatuntsana araatizeppa wodhizida;

Fa ommito toochizuntsana bonchchida.✝

53 Naydhdhiduntsana lo77o bazara mishshida,

yezin duruntsana kallo kushe dakkida.

54 Fa maarotitsito qoppii,

Fa ariza Isra7eele maaddida.

55 Yinnan nu aduntsis ohide qaala,

Abrahamasin E zarttis ga7idanno medhinas folodes»✝✝

yagayda.

4 Yoosefan Dawute keetstsappan kochchappa maaqqide gisho Galila Naazirete katamappa denddii Dawute katama maaqqide Yihuda Beeteleme qitida. 5 Hyanggodera, yelodes wode hyal7ide E oocii gaddide, Mayramira wolla xaafinttodes hyanggida. 6 Un ize yezin iis yelo wode yellida. 7 Fa anggis na7aya yelida. Curqqara xaaxii zaqqo aqize keetsi bessi dhabide gisho gongga gidda woytstsida.

19 Mayrama hyanide baz ubba fa wozintte qoppittera yene yeshsha.

34 Simoona unttana anjjida. Intta Mayramigo, «Yikke hyay na7ay Xoozappa doorinttide gaama Isra7eeluntsis un gol7itisin un dendditis malla maaqqada. Yinnon gaamuntsi ixxane. 35 Ne shemppitan mahi mashshara cadinttoda» yagayda.

48 Kara asuntsi eza denggide wode gaama qoppida. E inttan, «Ta na7ayo, akkosi nuna hyannigaara oochchido? Ne aderan taaran nena koyitera waayida» yagayda.

49 Yesuusa unttago, «Tana akkos koye? Taanii, ta aday keetstsa yessades beezanno eroso?» yagayda. 50 Yezin E unttago gaydanno un tiirikaaya.

51 Yinnippa suuba, unttara wolla Naazirete katama yi7ida. Unttis kiitinttii yezida. E intta yinna ubbabazito wozintte gaddii naagane.

3 Woyne ushita hyal7in, Yesuusa intta Yesuusago, «Unttis woyne ushita hyal7ida» yagayda.

4 Yesuusa mahi, «Immo, ne hyanne gelippe? Ta wodita hyaga yelikaaya» yagayda.

5 Yesuusa intta oochchizuntsago, «E yinttis ohizanno ubba oochchote» yagayda.

25 Yezin Yesuusa masqala kale E inttan, E inttii mishta, Qeliyoopha machchita Mayramiran Magdela Mayrama eqqida. 26 Yesuusa fa intton E kadhize tamaarize ize eqqiduntsana bi7i, fa inttigo, «Ta intte, ne na7aya hyaya bo7o» yagayda.

27 Yinnippa suuba, ye tamaarizego, «Ne intto hyanno bo7o» yagayda. Ye tamaarize izo yinna woditippa aykkii faara yessade gaar kara kanggida.

Yesuusa intton E ishuntsanan

31 E inttan E ishuntsin yi7i bale eqqii, eego asi kiittii eza xeegida. 32 E kale bettide gaama asuntsi, «Yikke, ne inttan ne ishuntsin bale eqqii nena koyane» yagayda.

33 Yesuusa mahi, «ta intta oode? Mahi ta ishuntsin aanuntsana?» yagayda. 34 Fa kantte bettide asuntsana wututsii dakkii bi7i, «Yikke, ta inttan ta ishuntsin hyantsesana. 35 Xoozze qofa oochchize ubbuntsi taas ishen, taas mishon taas inddo» yagayda.

55 Hyay anaaxize na7a baane? E inttii suntsita Mayramo baane? E ishuntsi Yayqooba, Yoosefa, Simoonan Yihuda baane? 56 E mishuntsi nuura yezuntsana baane? Yeezin, hyay atstse hyanno ubbanno anappa ekkido?» yagayda.

14 Hyantses ubbuntsi maachuntsara, Yesuusa intta Mayramiran Yesuusa ishuntsaran ubba fettii wozina maaqqii mintsii woossane.