Maria

Isa Mosi zormo oibar agam hóbor

26 Bade Elizabet so maišša hamil oiyede šomot, Allaye Zibrail firistare Galil elehar Nasarat farar ek kumarir hãse defeṛaiye. 27 Hibare loi badša Daudor bongšor Yusuf name ekzon loi hibar biyar hotabattara ṭik oil. He kumarir nam Moriyam. 28 Firistaye hibar munttu zaiyore hodde, "Tor šanti ok! Tui ḍõr rahamot faiyos! Mabud tor fũwati ase."

30 Kintu firistaye hibare hodde, "No ḍorais Moriyam; kiyollahoile tui Allattu rahamot faiyos. 31 Ar fun! Tui hamil oibi edde tottu ek futore biyaibi, ar hibar nam rakibi Isa. 32 Hiba mohan oibo, hibare šorbo šoktiwalar fut ḍaka oibo. Allah Mabude hibar baf Daudor šingašon hibare dibo. 33 Yakubor bongšor uwore hibaye abadul abad razagiri goribo, ar hibar razagiri hono din šeš no oibo."

Moriyamor šukurana gozol

46 Hetunot Moriyame hodde:

"Ãr forane Malikor šanor tarif gorer!

47 ar ãr ruh ãr basailoya Allare loi kušiye ullaš,

48 kiyollahoile hibaye ei nihait gorib bandir uwore nozor diye.

Ar so, ehonottu loti hár mainše ãre mubarak hoibo.

49 kiyollahoile hiba, he Šoktiwalaye ãlla beši ḍõr ham okkol goijje,

paki oilde hibar nam.

50 hibar doya bongšor bade bongšolla,

zara Hibare ḍorar.

51 Allaye nizor ḍũwa loi ḍõr šoktir ham goijje.

Zarar nizor dilot ohonkare bora,

hitarare Allaye šiṛa šitta gori felaiye.

52 Allaye šingašonottu raza okkolore lamai diye,

kintu nisorgunore usolot goijje.

53 Zetarattu obaf ase, hitarare bala bala hána fani diye,

kintu tuwangor okkolore hali hate bidai goijje.

54 Allaye ãrar fordada okkolor hãse ze wada dil,

he mozin hibaye hibar gulam Israilore ufohar goijje.

55 Ibrahim edde hibar bongšor manuš okkolor uwore,

abadul abad adorhatir goribar hota Allaye monot raikke."

4 Ar Yusuf aššilde badša Daudor bongšor manuš. Badša Daudor zormostan aššilde Ehudiya elehar Betlehem šohorot. Hetolla Yusuf o nam leka dibolla Galil elehar Nasarat farattu uwore Daudor šohor Betlehemot gil. 5 Moriyam, zar loi Yusufor biyar hotabattara ṭik oil, ar he šomot hiba hamil aššil, hibaye o Yusufor fũwati nam leka dibolla heṛe giye. 6 Hitara heṛe giyede šomot hibar fuwa halasi oibar ṭaim oiye. 7 Toi hibaye foila fuwa morod fuwa halasi goijje. Ar hibaye he fuware hoor berai di hanḍailot neṛai diye. Kiyollahoile hitaralla heṛe hiyan sara ar hono mikka takibar zaga no aššil.

19 Kintu Moriyame he šob hota mone mone bafa šuru goijje edde hin nizor dilot gãti raikke.

34 Ar Simeone hitarare duwa goijje edde Isar mare hodde: "Sa, ei fuwaye Israilor butore boutore tole felaibo edde uwore tulibo, ar iba en ek sinno oibolla aišše zar bifokke boute matibo. 35 Henot hitarar monor sinta forhaš oi zaiboi. Hin bade o, Moriyam tor dilot surir agator ḍoilla duk oibo."

48 Isar baf maye Isare deki ammuwak oiye. Maye Isare hodde: "Oh fut, tũi ãrar loi en kiyolla goijjo? Tũwar baf edde ãi hoto suhara oi tũware tuwa šuru goijjilam."

49 Kintu Isaye hodde: "Tũwara kiyolla ãre talaš goijjila? Tũwara no zano ze ãttu ãr bafor górot taka foribo?" 50 Kintu Isaye hitarare ki hoiye hin hitara buzi no fare.

51 Tarfore Isa hitarar fũwati Nasarat uwafes firi giyegoi, edde baf mar hota mani soille. Isar maye in beggunore dilot gãti raikke.

3 Bade šoraf zehon furai giyegoi Isar maye Isare hodde, "Hitaratu šoraf furai giyegoi."

4 Isaye hodde, "He maya fuwa, ãre kiyolla ei babute šamil goror? Ãr ṭaim aizo nu aiye."

5 Hibar maye sakor okkolore hodde, "Hibaye tũwarare zen goitto ho, tũwara hendilla goro."

25 Ar Isar kurušor ḍake hibar ma, hibar mar boin, Klofasor bou Moriyam, edde Mogdaleni Moriyam, itara tiyat aššil. 26 Isaye, mare edde sahabi zare hibaye ador gorito, hitara tiyai taikkede dekiyore, hibaye mare hodde, "Mayafuwa, sa, iba tor fut." 27 Tarfore he sahabire hodde, "Sa, iba tor ma." He oite, he sahabiye hibare hitar nizor górot loigiyegoi.

Isar ma báiboinain hontara?

31 Tarfore hibar ma edde báiboinain okkol aišše. Hitara baire tiyai taki Isare aibolla hóbor defeṛaiye. 32 Isar sairo ḍakottu hẽtte ek ḍõr mainšor dol boiṛa aššil. Hitara hodde, "Õnor ma báiboinain okkol baire, edde õnor talaš gorer."

33 Isaye hodde, "Ãr ma, báiboinain hontara?"

34 Zara hibar sairo ḍakottu boišše, hitarar uzu saiyore hodde,"So, itara oilde ãr ma, báiboinain okkol! 35 Kiyollahoile ze honokiye Allar issa falon gore, hitara oilde ãr bái, boin edde ma."

14 Itara hoekzon mayafuwain edde Isar ma Moriyam ar Isar báiyain okkolor fũwati hamiša beggune ekmone duwa gorat roiye.