Maria

Isá Mosihr zormor agun hotá

26 Sów mac soler de októt, Alla ye Jibrail fírista re Galil or Nasárat nam or ekkán cóor ot 27 eggwá kuwári mayafuar hañse difeṛáiye, zibár zuragatá Dawud or nosól or Yusúf nam or ézzon manúc lói óoil. Hé kuwári mayafuar nam Moriyam. 28 Fírista wa híbar hañse aái hoór de, "Tuáñre sólam, tuñí zibár uore ḍoóñr rahámot óiye. Mabud tuáñr fúañti asé."

30 Fírista wa ye híba re hoór de, "Ó Moriyam, no ḍooraiyó, kiyólla-hoilé tuáñr uore Allar rahámot óiye. 31 Fúno, tuñí hámil óiba, aar tuáñr ttu eggwá Morotfua óibo, tuñí Íbar nam Isá rakíba.* 32 Íba muhán óibo, aar Íba re Alla* Tálar Fua howá zaybo. Mabud Alla ye Íba re Íbar baf Dawud or toktó diibo. 33 Íba ye Yakub or nosól or uore abadulabad hókumot goríbo, aar Íbar raijjo honódin hótom no óibo."

Isá Mosihr zormo

18 Isá Mosihr zormo endilla gori óiye: Íbar maa Moriyam or zuragatá Yusúf lói óoil, montor ítara milmilab goríbar age, Pak-Ruhr kudurute híba hámil óiye de faa giyéh.

Moriyam or taarif or gozól

46 Moriyame hoór de:

"Añr kollófe Mabud or taarif gorér,

47 aar Alla añr Nejatdoya re lói añr ruh kúci óiye.

48 Kiyólla-hoilé Íba ye toh Íbar bañdir niróc tokkar uzu nozor diyé,

hétolla, soó, yala lóti añré mubarek hoibó nosól beggúne.

49 Kiyólla-hoilé zibá Taakotwala Íba ye goijjé añr lla ḍoóñr-ḍoóñr ham,

pak Íbar nam.

50 Ḍoora zetará Íba re,

Íbar rahámot zari táke ítarar nosóle-nosóle.

51 Nizor ḍuwáñ lói Íba ye ḍoóñr-ḍoóñr ham goijjé,

aar dile-dile zetará nizoré ḍoóñr báfe ítara re cíñṛaciñṭṭá gorífelaiye.

52 Íba ye toktó ttu lamaidiyé hókumot-goróya ókkol ore,

montor uoror tokkat goijjé niróc cún ore.

53 Búka ókkol ore Íba ye gom jiníc lói bóraidiye;

montor tuangor ókkol ore háli áte duñraidiyé.

54 Íba ye Nizor gulam Isráil ore modot goijjé,

Íbar oh rahámot monot rakí yore,

55 ziyán tákibo abadulabad Ibrahím edde íbar nosól ókkol or uore,

zendilla hoóil Íba ye añárar bafdada ókkol ore."

4 Héndilla, Yusúf óu Galil or cóor Nasárat ottu neeli, uore Yohúdiya elakat Dawud or cóor Betélhem hoó de híyan ot giiyé, kiyólla-hoilé Yusúf óilde Dawud or háandan ottu edde nosól ottu. 5 Héṛe giiyé de, yóggwar zuijja bou Moriyam or fúañti nam lekái bolla; héñtte híba hámil accíl. 6 Ítara héṛe tákite, híba ttu fua hálas óibar din furafuri aáigiyoi. 7 Tói híba ye híbar foóila-fua morotfua zormo diyé. Híba ye Fua wa re hoor berái hánḍail* ot neṛai raikkíl, kiyólla-hoilé héṛe ítara lla musáfer-hánat honó zaga nu accíl.

19 Montor Moriyame hotá híin beggún dil ot gañtí rakí híin báfi-báfi accíl.

34 Baade Símiyone ítara re dua diyé, aar Íbar maa Moriyam ore hoór de, "Soó, e Fua wa re basílowa gíyeh de, Boni Isráil or boóut zon ore félai bolla edde tulí bolla, edde endilla ekkán nicán ói bolla ziyán or muhálef gorá zaybo, 35 zeéne boóut dil or kolfona ókkol zahér óizagoi. Héñtte tuáñrar kollóf óu ekkán súri lói gañtá zaybo."

48 Zeñtté Íbar bafmaa ye Íba re deikké, ítara ammúk óigiyoi. Maa ye Íba re hoór de, "O Fut, Tuñí añára llói héndilla kiyá goijjó? Soósai, Tuáñr baf loi añí loi sinta gorí-gorí Tuáñre tuwat así."

49 Isá ye ítara re hoór de, "Tuáñra Añré tuwoór kiyá? Tuáñra no zano né, Añr ttu Añr Baf or gór ot tákar zorur dé?" 50 Montor Íba ye ítara re ziyán hoiyé híyan ítara nó buzé.

51 Baade Íba ítarar fúañti bacá lói nise Nasárat ot waafes aiccé, aar ítarar hotá mani soillíl. Aar Íbar maa ye hotá híin beggún nizor dil ot gañtí raikkíl.

3 Zeñtté héṛe anggur or roc fúraigiyoi, Isár maa ye Isá re hoór de, "Itará ttu ar anggur or roc nái."

4 Isá ye maa re hoór de, "Maá, híyan or baabute tuñí lói Añí lói kii bazá asé? Añr októ de aijjó nú aiyé."

5 Isár maa ye háadem ókkol ore hoór de, "Ibá ye tuáñra re ziín goittó hoó, híin goijjó."

25 Isár kúruc or ḍáke Íbar maa, Íbar maar bóin, aar Klopas or bou Moriyam edde Moriyam Makdálini tíyai accíl. 26 Zeñtté Isá ye Nizor maa re edde Nize ador goittó de cárit twa re ḍáke tíyaiya deikké, Íba ye maa re hoór de, "Ó maa, soó tuáñr fua óilde ibá."

27 Baade hé cárit twa re hoór de, "Soó, tuáñr maa óilde ibáh." Héñtte lóti hé cárit twa ye híba re yóggwar nizor gór ot loigílgoi.

Isár maa edde báiyain

31 Yárbaade héṛe Isár maa edde báiyain aiccé, aar baáre tíyai táki Íba re mataitó difeṛáiye. 32 Íbar sairókul ttu ek dol manúc boiṛá accíl; ítara Íba re hoór de, "Soó, Tuáñr maa edde báiyain baáre Tuáñr talac gorér."

33 Íba ye zuwabe ítara re hoór de, "Añr maa hon? Aar Añr báiyain hontará?"

34 Baade Íba ye zetará Íbar sairókul ttu boiṛá asé, ítarar uzu saái hoór de, "Ótiya, Añr maa edde Añr báiyain. 35 Kiyólla-hoilé zee niki Allar moncá mozin sole, yóggwa óilde Añr bái, bóin, aar maa."

55 Ibá kí mistírir fua no? Ibár maa Moriyam hoó de híba no né, aar Ibár báiyain Yakub, Yusúf, Sáimon edde Yohúdah no né? 56 Ibár bóinain beggún añárar fúañti asé de no né? Tói Ibá ye iín beggún hontú faiyé?"

14 Ítara beggúne Isár maa Moriyam, oinno hoozzon mayafuain, edde Isár báiyain dor fúañti ek mone nitti dua goittó.