Maria

Kkepesaen Wupwutiwen Jesus

26 Noan oawonowuwaen meremaen Elizabeth Deus a fangetiw angkenus we Gabriel noan eew aepinoamwon Galilee itan Nazareth. 27 Eyor eew aan kkepesaen oarong ngaeni erhai rhooapwut a kkefoat ngaeni mwaaen we itan Joseph, iwe itto saengi teeo we aan king David. Itan nge Maria. 28 Angkenus we a itto reen niewe nge a iura pwe, "Oapoas epwe no reemw! Soamwoon eno reemw nge a aewenepwuwoag."

30 Angkenus we a aengaeni niewe pwe, "Wosoapw mesag, Maria; pwe Deus minne e igin mwamwaai ngaeniug. 31 Wopwene pwoopwo nge wa nainitiw erhai aetemwaaen, nge wa aeitae ngaeni pwe Jesus. 32 Epwe igin taegias nge epwe ffai pwe iiy naiun Deus na oarosaen taegias. Soamwoon Deus epwene feeori pwe iiy king taeppen rhag David we aan rhaepeto, 33 nge epwe no pwe king reen teeo we aaen Jacob oanongaen oat; minna mweoiun ina esooar aigiugiun!"

Wupwutiwen Jesus Kristus

18 Ieen wunuunun aaen Jesus Kristus wupwutiw. Maria we inan a kkefoat ngaeni Joseph, nge igiwe resaaen pwiuppwiuniuw mwo nge a pwae pwe niewe a pwoopwo reen kkemenaen Espritu Santus.

Aaen Maria Keoniun Aepingeping

46 Maria a iura pwe,

"Nee tipaei a aepingepinga Soamwoon;

47 ngeoniuy apwapwa pwe aegin Deus iiy aaei Rhooan Aemenaw,

48 pwe iya maengiaei ngaang naiun rhooan akkiuneo man sessoan!

Saengi igina oanongeer aeremas nge repwene faingiaei pwe ngaang wenepwu,

49 pwe reen min mwamwaai kka Deus na oarosaen kkeman a feeori ngaeniaei.

Minna itan ina essoar;

50 saengi eew me eew saaer e pwaeri aan ffayeo ngaeniir rhooan oassoara.

51 A aeiti noa paiun na e kkeman

nge e oamwotoraar noa rhooana re namanam taegias noan aar niunniuwaen.

52 A oatoraar tiw king kka re mamaaw me wooan nenien mooatoor,

nge e saeregiir tae ikka re sessoan.

53 A oamwongoor rhooa pecchai ngaeni min mwamwaai,

nge a aefengaar noa rhooa pisaegisaeg nge esooar oawton paiiur.

54,55 Iiy e ammwarhiuto rhag ppwon we aan ngaeniir rhooawe rhaepetorh,

nge a itto pwe epwe fang tipaengieer rhooawe re Israel iwe naiun rhooan akkiuneo.

Iiy e maengiy rhag pwe epwe pwaeri ffaayeo we aan ngaeni Abraham

me oanongeer rhooan teowe aan iwe esooar iaenin!"

4 Joseph a noa saengi Nazareth noan Galilee a noa ngaeni Bethlehem noan Judea, igiwe esiupwutiw king David me ee. Joseph a noa igiwe pwe igiwe iiy teoteeon David. 5 A noa pwe enoa foatogi iteer me Maria, rhooapwut we a no pwe kkefoaton. Niewe a pwoopwo, 6 oatowe reno Bethlehem, a toori oaton aan supw aetewe naiun. 7 Niewe a timenewaegini aetemwaaen we mesaemmwaei naiun, nge a tiugiumi nong noan mengaag nge e oana nong noan miniwe nenien anan maan, pwe igiwe esooar no nenieer me noan imwaen waseona we.Sheep

19 Maria a maeng ngaeni oanongaen minikkeei nge a niuwaennei nong rhag nee tipan.

34 Simeon a aepiniir nge a aengaeni Maria, iwe inaen aetewe, "Aeteei a ffin tae me reen Deus pwe epwe oatoaropa nge e aemenewaer towunepaen re Israel. Iiy epwe no pwe eew aeginn me reen Deus pwe towunepaen aeremas repwe appaniuwaeni noan aar kkepas, 35 iwe a pwaeritae noan niunniuwaen mwoanomwoan kena aar. Nge niemaam eweei kaengin saeitan, epwe fereei pwunnomw."

48 Rhooawe inan me seman re riutae reen igiwe ra noa weri, iwe nge rhooapwut we inan a aengaeni pwe, "Naeyi, meeta wa feeori ngaenigemaem minneei reen? Pwe ngaang me mwaaen e semoamw aeiya gin noanineeng reen aemaem giutta fetaeneog."

49 Nge iya paniuwaeniir nge a iura pwe, "Meeta aaemi oawnoa giutta fetaeneaei reen? Oawse giuneei pwe ngaang ipwe no noan imwaen minna Semaei?" 50 Nge iir rese metaf reen miniwe e iura.

51 Iwe Jesus a tapweei sefaaeniir noa Nazareth, nge a noa aiussaening ngaeniir. Miniwe inaan a iseni nong rhag oanongan nee tipan.

3 Igiwe a ros noa wine, rhooapwut we inaen Jesus a aengaeni pwe, "A ros noa aar wine."

4 Jesus a iura pwe, "Een wosoapw aengaeniaei meeta ipwe feeori, pwe minna oatoi ina esaaen itto."

5 Rhooapwut we inaen Jesus a aengaeniir rhooan akkiuneo kkewe pwe, "Oawfeeori ese tiwegin minikkena e aengaenigaemi."

25 Rhooakka re igin iu arap ngaeni miniwe kurusun Jesus, nge manewe inan, manewe pwiin inan, Maria we pwiuniuwaen Clopas, me Maria Magdalene. 26 Jesus a weri miniwe inan me rhooan kkayeo we naiun iwe e igin aerhaengi pwe re iu; a aengaeni miniwe inan pwe, "Ina iiy mwaaen we noawumw."

27 Iwe nge a aengaeni rhooan kkayeo we pwe, "Ina iiy minimwu inoamw." Iwe saengi oatowe a noa, rhooan kkayeo we a pwigi niewe pwe epwe noa no reen noan iimw we imwan.

Inaen Jesus me Rhooawe Pwiin

31 Iwe rhooawe inaen Jesus me pwiin ra wareto. Ra iu niugiun iimw we nge ra tengaeg nong pwe epwe itiwow. 32 Iwe rhooanap we oaron Jesus ra aengaeni pwe, "Pipiiy, inoamw me rhooawe pwiimw me rhooapwutomw ra no niugiun, nge ra mwerhaen rhuungiug."

33 Jesus a paniuwaeniir pwe, "Iyo inaei me iyo pwiiy?" 34 A wegitaeg ngaeniir aeremas kkewe remooat oaron nge a aengaeniir pwe, "Oaw wonoa, ikkaan iir inaei me pwiiy! 35 Pwe iyo na a feeori nee tipaen Deus, nge iiy pwiiy, me mwengeaei me inaei."

55 Ifa wusun, soapw woneei miniwe naiun taikusang we? Saapw Maria miniwe inan? Me saapw James, Joseph, Simon me Judas nge pwiin? 56 Soapw oanongeer mwengeyan nge reno igeei? Iya woneei a pwigi oanongaen minikkeei me ee?"