Maria

Angela neil wou Maria en Yesu xe umbekeing

26 Eivek dentouk tiwei limti eno Anutu wong angela Gabriel la Nasaret inyei beyeeng ti eivek Galili. 27 La wou vexawo* wei paleveeng o ti wei xel tup qayeeng lekti bei e na wou moux ti e lei Yosep bei e dii, inyon Dawit buyeiw ti. Vexawo paleveeng on lei Maria. 28 De angela la wou vexo me neil embei, "Bendiyeing vex, Anutu lalei wo nimza wou wang. Tambiy Ngandoung e toumendei is wang."

30 Ekom angela neil wou vexo bei, "Maria, wa seng gwaleeng, en Anutu lalei wo nimza wou wang. 31 Wei, tyek wa xeim a qou veil me wang bou neum moux ti, me wa taxe e lei Yesu. 32 Tyek moxo bo lei ngandoung me tyek xel a neimbei Anutu gheyapu neu moux. De Tambiy Ngandoung Anutu tyek bong siaking wei bu Dawit xe eno wou e. 33 Me tyek mendei king en xomek wei Yakop o luta, e xe tete lalei tyek se tip."

Yesu Kilisi umbek

18 Tine inye pavulek en ingwei Yesu Kilisi umbek o: Moxo ta Maria eno xel beyal bei e mendei wou Yosep, luw se ghei dei lekti ekom vexo xei qou veil en Laweeng Vambuing nikanzek.

Maria xe lalo

46 Me Maria neil ambei nye:

"A nung pieing e sanghoxe Tambiy Ngandoung

47 me axe laweeng wo xeilala en Anutu, en e axe vineing,

48 en ay eno e xe xukxe vexawo wei lei maeing

ekom yei ay me lalei pyaxow en ay.

Om ngo, gweimbeeng me e mi na eno moux alis vex dalus tyek na mi taxe bei Anutu wong mata wou ay.

49 En tambiy nikanzekta ti wong lul ngandoung tine wou ay,

e lei yon vambuing.

50 E lalei mi pyaxow en moux alis vex wei mi yaleeng en e yo,

tyek bong ambei nyon wou moux alis vex wei gweimbeeng ne yo,

me moux alis vex wei yusyus o.

51 E mema wong xuk wei nikanzek o,

xel wei mi wou naleind en xow me toxleind eno tiy xel la danghei danghei nei.

52 Moxo toung mema lek xel king lox nge xo veil xel xe siaking

de zeim xel wei leind maeing eno lek la.

53 Moxo wong lul nimzamza ngenong pup wou xel wei maxepya xel o, dom wong xel wei lulul ana eno la bandaing.

54 Moxo vind e xe xukxeyeiw wei Israel o,

en mi wounalei en e xe lalei pyaweingxow,

55 wei wong wou Apraham me e neumambu takwei takwei, nambei ingwei e neil wou xey mendyeiw o."

4 Yosep on neumambu wei king Dawit o. Om la veil beyeeng Nasaret eivek Galili, me lek me la Yudia, la Dawit beeng wei Betelem o. 5 Moxo la inyei is Maria wei xel tup qayeeng lekti bei e mendei wou e yo bei seyap a qou luw leind, gyeik inyon eno Maria xei qou veil. 6 Ka luw la toundei inyei, eno bouk la wou eivek ingwei yakyeis on embei dumbek o. 7 Om vexo wou neu touk, me beliv e eivek qaeing me liw eivek manghaxo xe dipek, en xomek wei vateivek o pup zeyi xel.

19 Ekom Maria mi zeimaxoun qayeeng ti beimambei yon dalus eivek lalei me mi wounalei en.

34 Woyom Simion wo mata wou lal me neil wou moxo ta Maria, "Yakyeis tine nambei beyaleing wei tyek bong xel ngenong detei de xel ngenong qandi lek eivek Israel, me tyek mendei nambei dee ti, wei xel ngenong tyek bo vyend wou e yo. 35 En kandek xel ngenong xe laleind peyei eno tyek nam yanyateiv. De ngeyeing vevek ti tyek beum wamaxow num pieing is."

48 Gyeik ingwei ma luw ta yei e, eno luw etek. Moxo ta neil wou e bei, "Touk, nambei nya wang wong ambei nyon wou uw? Uw mam laleimi wo maying en wang om uw a mi ximexe wang."

49 Moxo teling wou luw, "Nambei nya muw ghe mi wimexe ay? Muw seng woulek bei a toundei eivek mang beeng?" 50 Ekom luw se woulek vati wei di neil wou luw o.

51 Woyom lep me la xo Nasaret nei is luw me mi betiwou luw xe qayeeng. Ekom moxo ta mi toung lulti beimambei yon dalus eivek lalei me mi wounalei en.

3 Gyeik ingwei wain ma, eno Yesu ta neil wou e, "Wain ma veil xel o."

4 Yesu neil elox bei, "Tang, wang neil ambei nyon wou ay enva? Bouk wei ay eno se ghei lam."

5 Moxo ta neil wou xel xukxe, "Xam ghe bong vati wei embei neil wou xam o."

25 Paviy Yesu xe xax pepeeng eno ta me ta li vex toukale, me Maria wei Klopas venei me Maria wei Makdala yo. 26 Gyeik ingwei Yesu yei ta nanghei inyon me betiyeing tiwei e lalei vind o toukale paviyeing, eno Moxo neil wou ta, "Vex wei, wa neum moux inyon," 27 woyom neil wou betiyeing tiyon bei, "Wei, vex tiyon wa tam." Lek bouk kayon me e mi la, eno betiyeing tiyon qou vexo me la e maxow beeng.

Yesu ta me liyeiw moux

31 Woyom Yesu ta me liyeiw moux lam tyip me nale myayaing de wong xelti la lalei me taxe e. 32 De xel qendu ngandoung ti toundei vivekwou e. Om xel neil wou e, "Tam alis limyeiw moux toungale myayaing en embei gyei wang."

33 Ekom neil elox, "Inyon a tang me a lingyeiw moux on eti?"

34 Woyom yei xel wei toundei vivekwou e yon me neil, "Wei! Xel ne a tang me a lingyeiw moux! 35 Eti yeiw wei mi wong ambei Anutu lalei vind o, yond inye a ling moux me a ling vex me a tang."

55 Beip inye se kamunda neu? De ta se lei Maria, me Jems, me Yosep me Simon me Yudas eno se e liyeiw? 56 Beip inye e liyeiw vex se toundei is xey? Woyom moux tine qou lulti beimambei ne dalus nanghei inya?"

14 Xel xouing dalus mi qekuma me toung laleind lekti de mi zeimemend taxombouk, xel vex lam is me Maria wei Yesu ta, me liyeiw moux is.