Maria

Ekobo pï nywölö Yecu

26 Ï dwe më abicël më yac k’Elicabeth, Obanga ooro malaika Gaburiel ï taun na nyïngë Najaret n’onwongo ut ï lobo më Galilaya, 27 both nyakö n’ecwodo nï Maria na ba ongeo ëcwö. Ën onwongo öcïkërë më nyömërë kï Yocepu akwar Daudi. 28 Malaika öcïdhö bothe cë okobo nïnë nï, "Kuc obed kodi! In na kome gum, Rwoth ut kodi."*

30 Cë malaika okobo nïnë nï, "Kür ilwor, Maria, inwongo gum kï both Obanga. 31 In ibino yac ëka ïnywölö athïn awobi, cë ibino cakö nyïngë Yecu. 32 Ën bino bedo na dit, n’ebino cwodo nï Wod k’Obanga na Malö Rwök. Rwoth Obanga bino mïö ën twër, më then ker kite n’ëmïö both kwarö mërë Daudi. 33 Ën bino löönö jö më öt ka Jakob na twal, ëka ker mërë ba bino jik."✝

Nywölö Yecu Kiricito

18 Man ënë kite n’ënywölö kï Yecu Kiricito: Ï karë na Maria onwongo öcïkërë më nyömërë kï Yocepu, na gïn bara örwatërë kanya acël, enwongo nï Maria öyac kï tëkö ka Tipo Naleng.

Wer ka Maria më pakö Obanga

46 Maria okobo nï,✝

"Tipona pakö Rwoth,

47 cwinya yom ï kom Obanga Alarna,

48 Pïën ën öparö pï atic mërë,

kadï bed rwöm mërë ute pïny.

Cakërë kobedini, jö më karë kïbëc bino cwodona nï akome gum.

49 Obanga Won Twër ötïmö gin na döngö pïra,

Ën nyïngë leng.

50 Ën nyutho kïca mërë both jö na winyo ën

pï karë kïbëc.

51 Badë na ute kï tëkö, otio tic na döngö.

Wegi awaka ï cwinygï ëkëthö ökö.

52 Ën ötürö löc ka rwodhi,

ëka otingo jö na bwönërë malö.

53 Ën ömïö cem ëka jami na bëcö both jö na kec neko,

ëka öryëmö ëlönyö kï cïng-gï nono.

54 Obanga ökönyö etic mërë Icarael.

Ën opo më tïmö kïca,

55 both Abraam ëka ëkwaë mërë kïbëc,

kite na yam öcïkërë ködë both kwerewa."

4 Yocepu mene öya kï ï lobo më Galilaya kï ï taun n’ecwodo nï Najaret, öcïdhö yo lobo Yudea ï taun n’ecwodo nï Bethelem, kany na yam ënywölö Daudi ïë. Ën yam obedo ngat acël ï kin ëkwaë ka Daudi. 5 Öcïdhö ëk ëkwanë gïn kï Maria, n’onwongo ën öcïkërë më nyömö ëka onwongo dong ute kï ïë. 6 Na gïn ut ï Bethelem, karë ka Maria më nywöl örömö. 7 Ën önywölö athïn kaö mërë wode ëka oumo kome kï böngü k’athïn. Cë opyelo ï pwa më cem ka dhok, pïën onwongo kabuto opong ökö nïgï ï öt apanga pï wele.

19 Ëka Maria obedo gwökö köp ni kïbëc ï cwinye ëka obedo thamö ï komgï.

34 Cë Cimeon ölamö gum ï komgï ëka okobo n’aya mërë Maria nï, "Athïn ni bino mïö jö na pol kï ï lobo Icarael podho pïny ëka yaa malö, ëka bino bedo anyuth n’ebino twak ïë na rac, 35 ëk tham më cwiny jö na pol omore yökö. Cwer cwiny bino cöböni calö ëcöbö cwinyi kï pala abadë."

48 N’enyodo mërë önënö ën, gïn ouro aura. Aya mërë openyo ën nï, "Athïn-na, pïngö ïtïmöwa köman? Nën! An k’apapni ebedo rangöni kï par na dit."

49 Ën ögamö nï, "Ïranga unu pïngö? Ba ingeo unu nï myero abed ï öt k’Apapna?" 50 Ëntö gïn ba önïang ngö n’onwongo ën kobo nïgï.

51 Cë Yecu olungo ködgï yo Najaret, ëka obedo winyogï. Ëntö aya mërë ögwökö köp kïbëc ï cwinye.

3 Ï karë na köngö ölök othum ökö, aya ka Yecu okobo both Yecu nï, "Köngö ölök mörö dong ope."

4 Yecu ögamö n’aya mërë nï, "Aya, pïngö ikobo nïna köp ni? Caana bara örömö."

5 Aya mërë okobo both etic nï, "Tïm unu gin mörö këkën na ën bino kobo niwu."

25 Jö n’ocung ï nget yath arïa ka Yecu ene, aya ka Yecu, amïn aya ka Yecu, Maria dhakö ka Kelopa, ëka Maria më Magadala. 26 Ï karë na Yecu önënö aya mërë k’alübkörë na ën marö ocung gïnï ï ngete kany nön, okobo both aya mërë nï, "Aya, wodi ene!" 27 Cë okobo both alübkörë nï, "Nën, ayani ene." Cakërë ï caa nön më cïdhö ködë anyim, alübkör Yecu ni otero ën yo pacö mërë.

Aya ka Yecu ëka utmego mërë

31 Cë aya ka Yecu ëka utmego mërë obino gïnï. Gïn ocung yökö ëka eoro ngat mörö both Yecu ï öt, ëk obin yökö ötwak ködgï. 32 Lwak onwongo obedo nakun ögürö gïnï Yecu ï dyere, cë ekobo nïnë nï, "Ayani ëka utmegoni ocung yökö tye gïnï ka rangöni."

33 Yecu ögamö nïgï nï, "Nga ënë obedo ayana ëka utmegona?" 34 Cë önënö jö n’obedo pïny n’ögürö ën dyere ëka okobo nï, "Man ënë ayana ëka utmegona. 35 Ngat mörö na tïmö ngö n’Obanga mïtö, ënë ömëra, amëra, ëka ayana."

55 Man ba obedo wod k’apaa bao? Aya mërë pathï Maria, ëka utmego mërë ba gïn ënë Yakobo, Yocepu, Cimon ëka Yuda? 56 Amege mërë kïbëc ba tye gïnï kod onu kany? Cë dhanö ni onwongo köp ni kïbëc kï kwene?"