26 Mumweezi wamusanu awumwi wakumita kwaElizabati mungelo Gabburiyeli wakatumwa aLeza kuya chisi chaGalili chitegwa Nazareti. 27 Mungelo wakatumwa kuli nakalindu wakali watangilwa kumwaalumi utegwa Jozefu, waŋanda yaDevidi; izina lya nakalindu wakali kutegwa Meri. 28 Mpawo wakaza kuli nguwe alimwi wati, "Luumuno lube anduwe, ulaachoolwe kapati, Mwami ulaanduwe!"

30 Alimwi mungelo wakati kulinguwe, "Utayoowi, Meri, nkaambo wajana choolwe kuli Leza. 31 Alimwi laanga, uyoomita mubula bwako alimwi uyootumbuka mwana mulombe, nguyoowulika zina lyaJesu. 32 Uyooba mupati, alimwi uyootegwa Mwana Mulombe waSijulu waMajulu, alimwi Mwami Leza uyoomupa chuuno chabwami bwawisi Devidi, 33 mpawo uyooyendelezya kuŋada yaJakkobbu kwalyoonse; abwami bwakwe butakwe kuyoomana."

46 Mpawo Meri wakamba wati,

"Muuya wangu awutembawule Mwami;

47 alimwi muuya wangu wakondwa muli Leza Mufutuli wangu,

48 nkaambo wasumpula mulanda wakwe ulifwiinsya.

Nkaambo laanga kuzwa lino mazyalani woonse ayoondiita kuti ulaachoolwe;

49 nkaambo ooyo Singuzu wandichitila zintu zipati,

alimwi lila salala izina lyakwe.

50 Alimwi luse lwakwe luli alibaabo bamuyoowa

kuzwa kumazyalani amazyalani.

51 Wakatondezya nguzu muluboko lwakwe,

wakasansaniya balisumpula mumiyeeyo yamyoyo yabo,

52 waselusya aansi chuuno chabwami chabeendelezi aabo bajisi nguzu,

wasumpula balangilwa aansi;

53 ukkutya basinzala azintu zibotu,

abavubi wabatanda kabatakwe chintu pe.

54 Wagwasya mulanda wakwe Izirayeli,

mukuyeeya luse lwakwe,

55 mbuli mbwakaambula kumataata eesu,

kuli Abburahamu akulunyungu lwakwe kwalyoonse."

4 Lino Jozefu wakeenda alubo kuzwa muGalili, muchisi chaNazareti, wakaya kuJudiya, kuchisi chaDevidi, chitegwa Bbetelehemu, nkaambo wakali waŋanda yamukowa waDevidi, 5 kuchitila kuti bakaakulembwe amwanakazi wakwe Meri, ngwakali watangila, mpawo wakali waamba kutumbuka. 6 Mpawo nibakachili nkukooko, chiindi chakazulila chakuti mwana atumbukwe. 7 Wakatumbuka mwana mutaanzi mulombe, wamuputila amudabba, wamulazika muchilyido chaŋombe nkaambo tekwakali busena muŋanda yabanakweenda.

19 Pesi Meri wakabamba aaya majwi woonse, kalokuzilikila mumoyo wakwe.

34 Mpawo Simiyoni wakabalongezya mpawo wati kuli Meri banyina amwana,

"Laanga, ooyu mwana ulachoolwe akubambililwa kuwa akubuka kwabayingi muIzirayeli.

Alimwi uyooba chitondezyo chiliikwambuulwa atala anguwe.

35 (Alimwi kuusa kupati kuyooyasa muuya wako),

kuti mizeezo yamyoyo myiingi ikayubununwe."

48 Alimwi nibakabona, bakagamba; mpawo banyina bakati kulinguwe, "Mwanaangu, nkaamboonzi niwatupenzya oobu? Laanga, wuso andime twalikukuyanduula loko."

49 Mpawo Jesu wakabuzya wati, "Nkaamboonzi nimundiyanduula? Tamuzi na kuti ndeleede kuba muŋanda yaTaata?" 50 Alimwi bazyali bakwe tebakaamvwisisisya pe nzyakali kwaamba kulimbabo.

51 Alimwi wakeenda aabo mpawo baya kuNazareti, alimwi wakalibombya kulimbabo; mpawo banyina bakabamba majwi woonse mumoyo wabo.

31 Mpawo banyina Jesu abanike bakwe bakasika; alimwi kabayimvwi anze bakatuma umwi kuti amwiite. 32 Alimwi nkamu yakamubunganina; mpawo bakati kulinguwe, "Banyoko, bakulana abanike bako balaanze, baliikukulanguula."

33 Wakabavwiila wati, "Mbaani baama abakwesu bangu?" 34 Alimwi kalanga aabo bakakkede kabamuzyungulukide, wakati, "Mbaba baama abakwesu! 35 Kufumbwa uuchita kuyanda kwaLeza nguumwanike wangu, amuchizi, abaama."