Maria

A bele ongmenga Kena ka Ashili

26 A nyimi oreka o taashe e tumǝ Alisabatu, na Ashili tong otoma ai o sure a zaa shili Jibrailu a Nazarat apeng ayende a nyimi a makeke ma Galili, 27 ara kagala kamea kata ka tukǝ o mora ka ondaleme ne. Ka Yusupu waya caasa kai, Yusupu ondo abuudu ana Daoda. Leze le kagala kamea Mariya. 28 Nawa de a kai a wa bekaana, "A beyo ko bo ka ba cǝ o sana ara Ashili. A Ateokora waye legwa ka bo."

30 Na otoma Ashili o zaa shili bekaa kai na, "Tana o kone boome ne Mariya, ba cǝ o sana ara Ashili. 31 Oyo ya e tumǝ ka ongmeng kena ka lome, ka oyo nya kai leze na Yeso. 32 Kena kame kayo itǝ ondo o gongnga a rare kai na kena ka ondo kala o gongnga. A Ateokora Ashili wayo nya kai ara o cikǝ togomo te abuudu ate a kai Daoda, 33 aka eze togomo te bedake ba za akora a Yakub. Togomo te kai teto ya ka bekazo ne."

Ongmenga o Yeso Kiristi

18 Nannaa ongmenga o Yeso Kiristi waze. Awere aka Yusupu waya caasa Mariya kamea ka ngmeng Yeso, zongka wa ana kai, na manaa ka ana etumǝ a surǝ a Obere Ashili.

Leera le Mariya le o saba a Ashili

46 A Mariya bekaana,

"Lenyong leng sabeze Ateokora,

47 a mi okpwe ong zante o bena

Ashili aya ondo boza ong,

48 ka wa rintǝ

o nata okpwe o kazara ka wai.

Laka pa, nannamena ba ale a izi

pate aromo neyo rarang na ondo sana,

49 aza o bekaana ondoogong me wa ezeng epa e gong.

Ashili aya ondo o sangsang.

50 Egonegone ai kanza eya kazo ondooka wa tare ai,

a ale a pate aromo.

51 Wa ezeze ma gole ma moole ka legoone le wai.

Wa bacakareze ana o ara okpwe a nyimi madoola mane.

52 A wa jǝpǝrǝzǝ agomo ana o arsaza tokpwe

aza togomo tone

andaaka ne jipǝrǝzǝ tokpwe tone a wa zalaraza ne.

53 Wa nya ana o kona e komo etii ka magogoro ma rere

a wa tarangga ana ocǝ zora eyapa a taara tene.

54 Wa kankama azara a wai abuudu a Yakubu,

o bena wa rintǝ ne egonegone wai.

55 Nangka wa beke anate aro,

o era a Ibraheng ka andaame ne tare wai ba dimǝ

zora bekazo."

4 A Yusupu wa ere apeng Nazarat a nyimi makeke ma Galili na wa ale apeng Baitalami a makeke ma Yahudiya, araaka a ngmeng ogomo Daoda ne. Yusupu wa ale saname aza o bekaana ne abuudu ayende ai ka na Daoda 5 Wa ale ka Mariya kando kamea wa ya caasa me a kaye ka etumǝ, adorana a bale ne. 6 A were aka neya Baitalami, na tomore to ngmenga kai toye, 7 naka ngmeng kena ka kai ka o bora. Naka urǝ kai ka majembele aka nata kai a nyimi o onggo o nyaza emande epaolya, aza o bena a dera odo akwilǝ ageng.

19 Na Mariya onte pate epa eka a beya a lenyong le kai.

34 A Siman me bekaa angmǝ lebo aza one, a wa bekaa Mariya iini kena kame na, "Ashili a Zaka kena kaana ka ka itǝ orona o rizi andaaka ne nyana kai ka o boza ona ondo ba cake a Yahuda aka ne emba kai, kanza wa itǝ e epa eka aromo a cake neto yeme ne. 35 Aza nyimi a yo bangali madoola ma nyongnga cake. Bo ma Mariya oyo kona a kpwaiye na o sagali wa donga lenyong leo."

48 Nangka ate ka iini Yeso ne laka kai, nane kerke ko kona o leba. Na iini kai bekaa kai na, "Kena, eyaka baya ro nanna? Me ka ate au te zitǝ a gera o."

49 Naka pirkǝ ne na, "Eyaka eya gera ong? Eta rosa o bena ma era anta arnang ka kwilǝ ate ang ne na?" 50 Nane ta rosa epa eka ka ya beya me ne.

51 Naka kuri apeng a Nazarat kaa ne aka tare ngmǝ ane. A iini kai onte pate epaname a lenyong le kai.

55 Teya beyana kanna, kena ka o ondo cocoza sang? Iini kai kaya Mariya sang? Arone kai neya Yakubu, Yusupu, ka Saminu, kangza kaa Yahuda sang? 56 Arone kai andaye neya ara yendea kaa ro sang? Karomo kaana ka cǝ epa eena ba?