Maria

Aŋêla hêyô vo Malia

26 Elisabet ya ayông hethambeng hîtôm bahevi be lahavôte me Wapômbêng hêv aŋêla Gabliel be hê hêyô melak lông te be elam nena Nasalet hêk Galili kapô. 27 ✝Yêni hê hêyô vo avî voyavô te be bôk mî ninjêk imbing anô amî denang. Avî êng ya athêng nena Malia be ya avîlanô bôk îtôk yêni yôv vo nimbua anô te be ya athêng nena Josep. Josep me King Devit lim. 28 Aŋêla hê hêndêng Malia me henang nena, "Waklîvông mavî ong! Anômbêng hîmô hiving ong be bôk hêv ya wapôm hêndêng ong."

30 Metom aŋêla henang ethak yêni nena, "Malia, dô nôkô andô vômbê nena lêk huwa Wapômbêng ya wapôm yôv. 31 ✝Nondaŋô. Tem nothambeng be nombathu sêik anô te be nondam ya athêng nena Yisu. 32 ✝Yêni tem nimbutak anô lêk athêng bêng. Me tem endam yêni nena Wapômbêng Leng Nakandung. Me tem Anômbêng Wapômbêng nêŋgêv lim Devit ya ku king êndêng yêni. 33 Me tem nîmô îtôm Jekop limi ning king wak nômbêng iti sapêng. Me ya ku king tem nîmô bêng yom me ya dang mî."

Malia hevathu Yisu

18 ✝Diti me Yisu Kilisi ya kôkôthing hivutak pîk iti. Malia ya avîlanô bôk epesang ambô yôv vo endom yêni ethak Josep. Thêi mî bôk êk iving i amî denang me êyê nena Malia lêk hethambeng. Lovak Matheng da hevong be sêik êng hivutak.

Malia ya yeng

46 ✝Me Malia henang nena,

"Ya kapôlông hêv Anômbêng ya athêng ling,

47 me ya dôhôlông la mavî hêndêng Wapômbêng yînîng Malatine,

48 vômbê nena yêni hêyê ya avî oyang atu be ya havong ya ku be la hiving ya.

Avîlanô lêk be eveng yam sapêng tem enang nena ya hauwa mek mavî

49 vômbê nena Wapômbêng Lêklokwang Anông hevong nômbêng ethak ya

be ya athêng thak hêk matheng.

50 ✝Yêni thak hêv kapô hêndêng ŋa takatu be elaŋô ya ambô hêndêng sêmbôk lêk ŋa diti me ŋa tem embeng yam imbing.

51 ✝Me hevong ku bêŋbêng hethak yêni da ya lêklokwang.

Me avîlanô takatu be êv loho da ning athêng lêk auk kambom ling me thak hêv loho vê ê mayaliv.

52 ✝Me thak hêv king ining lêklokwang vê.

Me hêv athêng bêng hêndêng ŋa takatu be thak etaving i.

53 ✝Me thak hevakông avîlanô takatu be ema vo leŋing hethak nôm mavî bêng anông be leŋiŋviŋyak.

Metom ŋa lêk nômkama bêng me thak hêv loho vê be ê oyang.

54 ✝Me yêni thak hêv ya avîlanô ku Islael livung

me la hêv ya tava be hêv kapô hêndêng loho wak nômbêng iti sapêng

55 hîtôm ambô atu be bôk hevak hiving aô ning bumalô loho

lêk Ablaham lêk limi sapêng."

4 Josep hivutak nang King Devit ya lêkma, be ditu hetak Nasalet nang Galili me hê Devit ya melak ondong Betlehem nang Judia. 5 Yêni hê hiving Malia, avî atu be tem nimbua, vo nekavu thêi ning athêng. Wak êng me Malia bôk hethambeng yôv.

6 Thêi mô Betlehem denang me Malia ya waklavông hêyô vo nembathu. 7 Me hevathu namalô bôp be hivuliv îlôk kwak be hêndô hêk bokmaŋkao* ning kambum, vômbê nena melak kapô te mî hêk oyang vo thêi mô amî.

19 ✝Me Malia la hêv ambô takêng be hevalong long hêk kapô.

34 ✝Yôv me Simion hêv mek êndêng loho be henang ethak sêik êng talêmbô Malia nena, "Nondaŋô. Wapômbêng hetak wakna ti vo nembong avîlanô Islael bêng anông tem imbua vuli kambom me bêng anông tem imbua vuli mavî. Yêni tem nîmô îtôm Wapômbêng ya lavuning te, metom avîlanô bêng anông tem enang ambôma ethak yêni. 35 Be ditu tem avîlanô bêng anông ining auk long kapô tem nimbutak yêing. Be tem kapôlôm inding ong îtôm bîng vovak hevatho ong bimdaluk."

48 Me lambô lo talêmbô êyê yêni be esong kambom hiving. Be talêmbô henang nena, "Yînîng wakna, hovong ômbête bêng ethak yêi? Yêi leŋing malêing bêng be athalo ong eveng."

49 Me Yisu henang viyang nena, "Mamu thalo ya vo? Mî mamu yala nena tem ya mô Wakamik ya melak amî mesa?" 50 Metom thêi thông ambô êng ya ondong paling.

51 ✝Yôv me hiving talêmbô lo lambô be loho ê Nasalet me thak helovak thêi ning ambô vimbing. Me talêmbô hevalong nôm takatu be henang be hevong long hêk kapô.

Yisu talêmbô lêk viyaŋi

31 ✝Me Yisu talêmbô lêk viyaŋi eleva yêing me êv ambô hê vo enang ethak Yisu nena nêlêm yêing. 32 Avîlanô bêng anông ekalambu yêni thing be enang nena, "Lemtambô lêk aviyami eva yêing be leŋing iving injê ong." 33 Me Yisu henang ik ling nena, "Opalête me yînîng wakatik lêk yînîng aiyang?"

34,35 Me Yisu hêyê avîlanô nômbêng atu be ekalambu yêni thing hêwê heveng me henang nena, "Avîlanô takatu be esopa Wapômbêng ya la hiving, ŋa êng me yînîng wakatik lêk aiyang me lîvô loho. Bêng be ditu môlô takiti me yînîng wakatik lêk aiyang loho."

55 ✝Ôpiti me anô helav melak nakandung be talêmbô me Malia. Be viyaŋi me Jems lo Josep me Saimon lo Judas. 56 Me livi îmô long iti hiving aô. Me bisête be ôpiti hîtôm nembong nôm takiti êng?"