26 Mwezi wa mtandatu we inda ya Elizabeti Chohile amsigilaga mndima ywa kwembingu Gabulieli aite kwe isi ya Galilaya ikwitangwa Nazaleti. 27 Nakasigilwa kwa mwana chiche akwitangwa Maliyamu henati kudugana na mgosi. Mwana chiche uyo nakalombwa ni mgosi akwitangwa Yusufu, akulaila mo lukolo lwa Daudi. 28 Mndima ywa kwembingu niyo amlaila Maliyamu na kumlamsa, "Utondowazi utende naweye! Zumbe ehamwenga na weye naye kakujimbika vidala!"

30 Akaheza mndima ywa kwembingu amgamba, "Maliyamu, usekogoha, kwaviya Chohile kakufila mbazi. 31 Nawinule nda, naho naweleke mwana chilume, namwitange zina dyakwe Yesu. 32 Uyo natende mkulu naho netangwe Mwana Chohile Mkulu. Zumbe Chohile namwinke chigoda chakwe cho useuta, saviya endaga mwelesi ywakwe Daudi, 33 naho natende seuta ywa lukolo lwa Yakobo mazuwa yose, useuta wakwe hauna udumo!"

18 Vino nivyo elekagwa Yesu Kulisito, Maliyamu nine dya Yesu nakalombwa ni Yusufu. Mna umo hawenati kusolana, Maliyamu nakawoneka ana nda kwa udahi wa Muye Ukukile.

46 Maliyamu niyo alonga,

"Umoyo wangu wamtogola Zumbe,

47 no muye wangu wamwelelwa Chohile Mwambula ywangu,

48 kwaviya kanikumbuka, mtumwa wakwe mnyanyahala!

Kukongela vino haluse na kujendeleza,

vyeleko vyose navinitange mjimbikwa,

49 kwaviya Chohile mta Udahi anidamanyiza vintu vikulu.

Zina dyakwe ni ukuka.

50 Mbazi zakwe zekala vyeleko na vyeleko

kwa wadya wakumwogoha.

51 Kadamanya vintu vikulu kwa mkono wakwe.

Kawasambalagasa wata kweduvya fanyanyi zawo mwe myoyo yawo.

52 Kawaseleza maseuta wata nguvu kulaila mwe vigoda vyawo vyo useuta,

na kuwakweza wachiwa.

53 Kawegusa wata sala kwa vintu vyedi,

na kuwabalaza wagoli mikono ibule.

54 Kamwambiza Izulaeli, mndima ywakwe,

naho kawafila mbazi wantu wakwe mazuwa yose.

55 Saviya alongile kwa wababa zetu Bulahimu

na lweleko lwakwe lose mazuwa yose!"

4 Yusufu naye ahalawaga heisi ya Galilaya mo mzi wa Nazaleti, niyo aita kwe isi ya Yudeya, mo mzi wa Beselehemu, hantu elekagwa zumbe Daudi. Yusufu nakaita uko kwaviya nani mntu akulaila mo lukolo lwa Daudi. 5 Niyo aita wawazwe hamwenga na Maliyamu mchumbakwe, endile ni msoka. 6 Umo wecheyuko Betilehemu, zuwa dya Maliyamu dyo kwefungula niyo dyabula. 7 Niyo efungula mwanawe ywa nkongo, mwana chilume. Amvisa vibwende, amgoneza mwe hondo, kwaviya nahehena he kwikala mwe nyumba za kufikila wajeni.

19 Mna Maliyamu niyo ayaika yose mo moyo wakwe, akayafanyanya vitendese.

34 Niyo Simoni awajimbika na kumgambila Maliyamu, nine dya Yesu, "Mwana yuno kasagulwa ni Chohile kutenda luhosa lwa kugwa na kuuyuka kwa wantu walozize mwe isi ya Izulaeli. Naho natende chilagiso kulaila kwa Chohile, na wantu walozize nawamlemele. 35 Naho fanyanyi za mwe myoyo ya wantu walozize nazigubulwe pwilili. Nawe mwenye, usungu saviya bamba dikutwa naukusenge mo umoyo wako."

48 Welesi wakwe weze wamwone wehelwa. Mami yakwe amgamba, "Mwanangu, ni mbwani ukuchitenda vino? Kaula, miye na iso nachikakulonda kwa chinyulu."

49 Yesu awagamba, "Kwa mbwani mwanilonda? Hammanyize kugamba naungwa nikale mwe inyumba ya Tate?" 50 Mna wowo hawaimanyize imbuli idya awagambile.

51 Yesu niyo auyanya na welesi wakwe kubula Nazaleti, naye nakawevisa ise na nine. Nine azika izimbuli zose mo moyo wakwe.

3 Divai eze isile, nine Yesu amgamba, "Divai iwasila!"

4 Yesu ahitula, "Mnala, usekunigambila dya kudamanya, chipindi changu hachinati."

5 Aho mamiyakwe awagambila wandima, "Damanyani dyodyose nawagambileni."

25 Haguhi no msalaba wakwe Yesu wendaga wachimala mamiyakwe na lumbudye dya mamiyakwe na Maliyamu mkaza Kilopa na Maliyamu Magidalena. 26 Yesu eze amwone mamiyakwe, ne haguhi hakwe kachimala yudya mwanampina amungile, amgamba mamiyakwe, "Mnala, kaula, yuno nuyo mwanawo."

27 Vikaheza amgamba yudya mwanampina, "Haluse yuno nuyo mamiyako." Kukongela aho yudya mwanampina niyo amguha ekale naye kukaya kwakwe.

31 Nine na walukolo wakwe Yesu niyo weza. Wachimala heise na kusigila Yesu etangwe. 32 Yesu nakazungulukwa ni fyo dya wantu. Wamgamba, "Nyokwe na walukolo wako we heise, wakulonda."

33 Yesu awahitula, "Mnala ni yuhi? Naho niwahi walukolo wangu?"

34 Niyo asinya wantu wamzunguluke na kugamba, "Wano nawo wamnala na walukolo wangu! 35 Mntu yoyose akudamanya viya akunga Chohile, nuyo mlukolo ywangu na lumbu dyangu na mnala."

55 Yuno suyo yudya mwana ywa msongola? Mami yakwe suyo yudya akwitangwa Maliyamu? Naho walukolo wakwe sawo Yakobo na Yusufu na Simoni na Yuda? 56 Naho walumbu zakwe wose hawahali hano hetu?"

14 Chila nkanana nawakadugana hamwenga mwe fyo wakalombeza kwa Chohile, kwa moyo umwenga umo namna wavyele na Maliyamu mamiyakwe dya Yesu hamwenga nawalukolo wakwe.