Maria

Thi anj ndej gal Jesus

26 Senꞌ ngoxo’b xop mbeꞌ ndo xa' yistan, Dios mtelꞌ anj Gabriel thi yez ndole Nazaret jwanꞌ nax lo xyon Galilea, 27 tenꞌ nzo thi mzaꞌ yenꞌ ndole Mari, jwanꞌ tera gaxno mbiꞌ, jwan' nak di’sla selyaꞌ kon thi xaꞌ biꞌ ndole Jose, jwanꞌ nde lo bin rey David. 28 Nde ngote anj ten' ndo mzaꞌ, mni anj dyux lo mzaꞌ nchab anj:

—¡Maa Mari, wen toz ngwiꞌ Dios la! Mbli leyꞌ Dios la xij re ngol nde ndono Dios la.

30 Zyasa nchab anj lo Mari:

—Naꞌzyebta la Mari, tak wen toz ngwiꞌ Dios la. 31 Nde naya kelo xinꞌ la nde kaa thi mbed biꞌ nde tob lea or Jesus. 32 Nde or ak thi xaꞌ ntak toz, nde ryoꞌ le or Xinꞌ Dios ro, nde Dios Xaꞌ Nyebeꞌ ta' ten' mnebe' rey David nyebe' or, lo bin David tenꞌ nde or. 33 Sa nyebeꞌ or lo reta men Israel thibtane, nde yalnyebeꞌ chanꞌ or naꞌluxtay.

Jesús ngol

18 Cheꞌ mod ngol Jesucrist: Mari xnaꞌ Jesús nakdiꞌsla selyaꞌno xaꞌ Jose, nde benꞌ tera tyobno xaꞌ ta xaꞌ, Mari mkelo xinꞌ naꞌ por yalne chanꞌ Mbi Nayon.

46 Zyasa nchab Mari:

Dib nzo lazoꞌn nin diꞌs wen lo Dios,

47 nde xbin na nale toz nzo lazo’n lo Dios, Xaꞌ li sa lya’n.

48 Nde mblí Xa' na sa li rsinꞌ Xaꞌ na,

teꞌnye nanakta na xaꞌ ntak nde naya dib tyemp gab reta men nzo lo izyo, Dios mbli ley' xa'.

49 Tak Dios ta ngeno dib yalne, mbli yalnaro toz lon,

nayon nak le Dios.

50 Nde Dios thibla' ndlat lazonꞌ reta men jwanꞌ nzeb lazon' Dios.

51 Naro nak re jwanꞌ ndli Dios kon yalne chanꞌ Dios,

nde mcha’s Dios re xa' nchak naro.

52 Mkib Dios yalnyebeꞌ lo re rey nchak naro,

nde mbli naro Dios re xaꞌ nadoꞌ nak.

53 Re xaꞌ ndyak win mdaꞌ Dios bro jwan' lo xaꞌ,

Le' re xaꞌ ngeno bro jwanꞌ, tatanya xa' mse’re Dios xaꞌ.

54 Dios mblasto xaꞌ Israel xa' ndli sin' lo Dios,

nde nanchajta yek Dios ndlat lazoꞌ Dios xaꞌ,

55 ta xa thibtane mda' Xa' xki’s Xa' lo re xa' gox lon' pola,

lo Abraham nde lo re xa' nde lo bin Abraham.

4 Jwanꞌ nasa, mbroꞌ Jose yez Nazaret, jwanꞌ nax lo xyon xaꞌ Galilea, nda xaꞌ yez Belen jwanꞌ nax lo xyon Judea, tenꞌ ngol rey David, tak Jose nde lo bin rey David, 5 sa yo le xa' lo ye’s kon Marí sal' xa', jwan' ndo lo yistan. 6 Nde laja benꞌ nzi xaꞌ yez Belen, mzin wiz gal xinꞌ Mari. 7 Tya ngol xinꞌ xaꞌ or ner, mchal lar xaꞌ or nde mdix xaꞌ or len' ya ten' ncho jwan' ncha ma' tak naꞌngasalta ti yo kwed xaꞌ.

19 Per Mari mblosa' reta jwan' na len' lazo' Mari, nde thibla ndli Mari xgaba.

34 Zyasa mbli leyꞌ Simeon xaꞌ, nde nchab Simeon lo Mari xnaꞌ Jesus:

—Wiꞌ nea, Dios mtelꞌ or sa lir bro toz xa' Israel lyayo nde bro toz xa' tyotsa'. Jwan' lo' ak or, bro toz men na’ryo’d lazo' xa’y. 35 Per reta jwanꞌ reꞌ aka xaja thi espada yada lazo’a. Nde men thoz ryo’xo’b jwan' nzo lazoꞌ xa'.

48 Senꞌ mbwiꞌ xud or kon xnaꞌ or, leꞌka nzoyen xaꞌ; nde xnaꞌ or nchab lo or:

—Xinꞌ na, ¿Kwan ta mblinoa ná'? Rop náꞌ xud la jwanꞌ toz ndli náꞌ xgab maa nde ngete kwanꞌ náꞌ lu. 49 Jesus mkab lo xaꞌ:

—¿Kwan liy nkwanꞌ goꞌ na? ¡Mnea go', lo rsin' xud na nakinꞌ ton!

50 Per naꞌngyenta xaꞌ jwanꞌ nchab or.

51 Zyasa mbere or kon xaꞌ yez Nazaret nde mxobyek or reta jwanꞌ nyebeꞌ xud or, nde xnaꞌ or. Per xna' or ndli toz xa' xgab reta jwanꞌ ta ngoka.

3 Nde mbis nit ub, sa nchab xnaꞌ Jesus lo Jesus:

—Na’ngenotra xa' nit ub.

4 Leꞌ Jesus nchab:

—¿Cho kwan liy lon ta mbez la ngol? Teraꞌ sin hor chanꞌ na.

5 Leꞌ xnaꞌ Jesus nchab lo re men jwan' ndli sinꞌ tya:

—Bli goꞌ reta jwanꞌ nye Xaꞌ lo goꞌ.*

25 Gaxta tenꞌ ndoli kruz jwanꞌ nge Jesus, tya ndo xnaꞌ Jesus, nde xnit Jesus, noga Marí salꞌ Cleofas nde Marí xaꞌ yez Magdala. 26 Senꞌ mbwiꞌ Jesus lo xnaꞌ Jesus nde lo xinꞌ teꞌd Jesus xaꞌ nkeꞌ lazoꞌ Jesus nde nchab Jesus lo xnaꞌ Jesus:

—May, xaꞌ ba ak xinꞌ la.

27 Xisa, nchab Jesus lo xinꞌ teꞌd Jesus:

—Xaꞌ ba ak xnaꞌa.

Nde xata zya, leꞌ xinꞌ teꞌd Jesus ya, mbeꞌ xaꞌ Marí liz xaꞌ.

Xnaꞌ Jesús nde re wes xaꞌ

31 Xisa zyara' mzin xnaꞌ Jesús kon re wes xaꞌ, nzi xaꞌ le, mbloned xaꞌ tib men sa yachez xaꞌ Jesús. 32 Nde re men jwanꞌ nzi ndob cho Jesús tya, nchab xa' lo Jesús:

—Xnaꞌa nde re wes la nzi le, ndekwanꞌ xaꞌ lu.

33 Jesús mkab lo xa':

—¿Cho nak xnaꞌn nde re wes na, ndyak goꞌ?

34 Nde mbwiꞌ Jesús lo re men jwanꞌ nzindob dib cho Jesus, nchab Xa':

—Bwiꞌ goꞌ, le’ga goꞌ nak xnaꞌn nde wes na. 35 Tak re men ndli jwanꞌ ncholaꞌs Dios, xaꞌ ya nak wes na, btanꞌ na nde xnaꞌn.

55 ¿Cho nanakta xud Xaꞌ ba ndoxkwaꞌ ya ya? ¿Cho na Marida nak xnaꞌ Xaꞌ nde re wes Xaꞌ nak Jakob, Jose, Simón nde Judas? 56 ¿Cho naxijta naꞌ reꞌ nzo re btanꞌ Xaꞌ? ¿Ploga ngwa ted Xaꞌ reta jwanꞌ nchak Xaꞌ?

14 Reta xaꞌ reꞌ thiblaꞌ ndyop xaꞌ sa thita ndyodiꞌsno xaꞌ Dios nde nyaꞌb xaꞌ lo Dios, xija nzo tipla ngol nde noga Marí xnaꞌ Jesús nde kon re wes Jesús.