Milagres de Jesus

Yesuusa iilɂoo kadiyaannon ibaaddo lama fayyiise

27 Yesuusana esekko bee seetaa giraan iilɂo kadiyaannon ibaaddo lama, «Ere kadaawute! Maari» amaa iyyaa usuu debee sesseeteen.

28 Iilɂo odiyaannonna Yesuusa katabero min tos debee tabeen; Yesuusana, «Ani iilɂoɂoottisin denddeesin kadaanddaaro laano ammanattaan?» ame iso hoosate. Isona «Iɂii Goottaa» ameen abbaabeen.

29 Esekkona Yesuusa iilɂoɂoottisoo dinddinegure, «Ammanokkisinkki malee halleewo» ame. 30 Iilɂoɂoottisona deenddeen; Yesuusana, «Hikka maayyona arooɂaddeeso» ame ataayise segee. 31 Iso goɂameen esekko beengureen usu ulii kagiro ibaaddo dubbaan gara kayesuusa ayeeseen.

Yesuusa Iilɂo oddeyaannon ibaaddojja lama fayyiisano

29 Yesuusana usukko oɂagaalssatareen Iyaarkokko been seetaa giraan gosa kamooggan usuu debee sesseete. 30 Eseenna ilɂo odeyaannon ibaaddojja lama raadii hamas’s’een gireen, Yesuusa esene roorano kakkomaalareen goorata; «Goottaa! Ere kadaawute; noon nenɂeyisana» amaa iyyeen.

31 Gosana iso c’alɂi goggoɂamirawun hadise, iso goɂameen, «Goottaa ere kadaawute maganne noon nenɂeyisana» amaa aaloo iyyeen.

32 Yesuusana takki ame aallee iso uume «Ani isinuun me goggoyelloo dootaattan?» ame.

33 Isona «Goottaa!» «Noo Iilɂoɂoottaani goggodeerawun dootatanna ameen.»

34 Yesuusana isoon nenɂeyisategure Iilɂoɂoottiso dinddinegure goorsewa Iilɂoɂoottiso deenddeen, isona usu debee sesseeteen.

Yesuusa tabeetesayida katamaayi ilɂo kabayere ibaaddoti koo fayyiise

22 Esekkona Beetesayida tos kakkogeyaaren goorata ibaaddo iilɂo kadiyaannon ibaaddoti koo Yesuusa tos keenen, goggodinddinnoon ebaaten. 23 Yesuusana iilɂo kabayero ibaaddotikotti gene abere maamankko sar beese, iilɂo ootteessa gutii hanc’c’ufe tufere genetteessa gutii kayere, «Kuun kamutara meyya?» ame hoosate.

24 Ibaaddotina t’ok’k’i ame deere, «Ibaaddo gaa aani lee kasesseetaro diyaara» ame.

25 Yesuusana adena genennoɂootteessa iilɂo oɂibaaddoti gutii kaye, hassu goorata iilɂo tichchise dee, fayyeegure kaɂameen dubba madaare diyaano haggaɂabe. 26 Esekkona Yesuusa, «Maaman tos arootabtte!» «Hassu maamanii maayyoonna aroosegite» amere minkkeessa galise.

Yesuusa nebe kaduudena hiɂi oɂayyeesoon ibaaddojja fayyiise

31 Yesuusa tat’iroosa katamaakko keegure, mina tasidoona tonsse katamaa tomon taɂamamatte minane roore tagaliila labu tos emeete. 32 Eseenna ibaaddo nebee kamaalonna hiɂi kaɂayeeson ibaaddoti koo usu tos keenen; genenna gutii goggokayiroo ebaaten. 33 Yesuusana ibaaddoti gosakko kale beesegure, fererroɂoottessa nebebbo oɂibaaddotii orddeese tabise, esekkona hanc’c’ufe ferii tufegure ibaaddotikokki erreb dine. 34 Daruuri tos t’ok’k’iɂame diyaa eerinnaa neefssategure, «Efittahi» ame, hikkina «Banami» amanoya.

35 Banneewa nebebbo banameen, errebnna furamegure k’ulleessi ayeesano haggaɂabe. 36 Yesuusana hikka ayees maayyoonna iso goggoɂayeesonkko ajajee, halleewo kuwaarre usu ibaaddon goggoɂayeesonkko ataayise ajaja kakkosisare goorata iso adeen balɂayiseen ayeeseen. 37 Gosana aaloo saadaa «Usu kafelera dubba kaɂidanyya, nebebboo omaaloonna goggomaallawun, hiɂi oɂayyeesoonna goggoɂayeesirawun yelara» ame.

Yesuusa Iilɂo kabayero Bert’elomeewosa fayyiise

46 Esekko abbaabateeren taɂiyyaarkko katamaa tos emeeten. Yesuusana usukko oɂagaalssatareen gosa kamoogganne wota Iyaarkokko biyaa giraan iilɂo kadiyaannon kat’t’emewosa ere Bert’elomeewosa raa giridii hamas’s’eere ebaataa gire. 47 Usuna esene karoorara kanaazireti Yesuusa laano kakkomaalare goorata, «Ere kadaawute, Yesuusa; in maari!» amaa okkaano haggaɂabe. 48 Kamoogganna usu c’alɂi goggoɂamiroo hadiseen; usu goɂameen, «Ere kadaawute; in maari!» amaa aaloo jiinase iyyee. 49 Yesuusana aalleegure; «Uuma!» ame. Isona Iilɂo kabayerone; «Allamandde! Ki! Yesuusa uumara!» ameen. 50 Usuna sarssikkeessa shafegure fit’a ame kee aallee Yesuusa tos emeete. 51 Yesuusana «Me goggoyelloo dootatta?» ame. Iilɂo kadiyaannonna «Kaɂagaalssisatto; din dootara» ame. 52 Yesuusana; «See ammanokka ku fayyiisera» ame; goorsewa iilɂo deenddeen; usu raannewa Yesuusa debee sesseete.

Iilɂo kabayerekokki fayyaano

35 Yesuusa taɂiyyaarkko katamaa tos kakkogabbalamare goorata, koo Iilɂo kabayere raagriidi hamas’s’eere ebaataa gire.

36 Iilɂo kabayerena gosa esene rooraa giraan maalegure, hikki meyya? Ame iso hoosate.

37 Isona, «Kanaazireti Yesuusaya hittanne karoorara» ameen usuun segeen. 38 Usuna, «Ere kadaawute, Yesuusa, in maari!» amaa iyyee.

39 Horehaye kasessetare ibaaddona, c’alɂi usu goggoɂamiroo hadiseen, usu goɂameen, «Ere kadaawutee, in maari!» amaa jiinase iyyee.

40 Yesuusana aalleere ibaaddoti usu tos goggokeennawun ajajee. Usu tonssa kakkogabbalamare goorata, 41 Yesuusana «Ani kuun me goggoyelloo dootatta?» ame usu hoosate.

Iilɂo kabayerekkina, «Goottaa, din dootatara» ame.

42 Yesuusana, «Deena, ammanokka ku fayyiisera» ame.

43 Ibaaddotina goorsewa din daanddee. Waanna kabajaa Yesuusa debee sesseete. Gosa dubba hikka deegure Waa galatee.

Yesuusa Iilɂo baye kaɂumulamero ibaaddoti fayyiise

1 Yesuusa raanne rooraa giraan takkoɂumulamekko haggaɂabere Iilɂo kabbayere ibaaddoti dee. 2 Usukko oɂagaalssatareenna Yesuusane, «Kaɂagaalssisatto! Hikki ibaaddoti Iilɂo bayi goggoɂumulamiron c’ubbo kafelera ayyoyya? Usuya muu oɂumuleeraanyan?» ameen hoosaten.

3 Yesuusana, «Usu goorttun oɂumuleeraan c’ubbo lakkofeleeran,» «Hikki kakkoonleera ade felo owaa usuu goggomutinaawunya. 4 Arri giraan in kafarerokonɂi felo felano dootisara, maayyona felin takkodaanddenon hemeen emaatta, 5 Hikka alamii giraan alamikokki ifa aniya ame.✝»

6 Hikka ame abbaabatere ulii hanc’c’ufe tufere hanc’c’ufee erre c’awudisere Iilɂo oɂibaaddotii shigidere, 7 «Seedde Selihoomi kaɂamamaro eelaa aalina» ame. (Selihoomi amano «Kafarame» amanoya.) Ibaaddotina seete aale. Deenddaanna abbaabate emeete.

2 Hassu goorata maarii bar kaɂabanaaye ibaaddoti koo Yesuusa tos emeetegure horee gilbbise sagadaa, «Goottaa! Feɂitaa golleete in muc’c’isin daanddaatta» ame.

3 Yesuusana genetteessa diriirssategure dinddinaa, «Ani kuun feɂi sisera! Muc’c’imi!» ame. Ibaaddotina goorsewa barkko muc’c’ime. 4 Esekkona Yesuusa, «Fayyaanokkaa maayyonna aroosegite; ayesuun goɂameen seegudde isiɂoottaa tuuk’aamon tusa, Muse kuun kaɂajajeero meebaa sisi hikkina isoon ato leera» ame.

2 Esekko ibaaddo naafaleessati koo alggaayi sideengureen usu tos aateen emeteen. Yesuusana ammanokkisoo deegure naafaleessatine «Ko allamandde! C’ubbokka haheso amamera» ame. 3 Hassu goorata seera kamuse kaɂagaalssisara, «Hikki Waa habaaranoyya» amaa wodanattisooyi gumggumeen.

4 Yesuusa k’ofattisoo addeesegure haa ame; «Kameellan ayees wodanattisinii muun k’oppaattan? 5 Afo, ‹C’ubbokka haheso amamera amanokkona› ‹Kingudde sessee amanokko eekiya ene kallaara›? 6 Ayesuun goɂameen ere kaɂibaaddo ul gutii c’ubbo haheso kakkoɂamiro odonnati kaɂabo laano goggoɂaddeessanunya» amegure; naafaleessatine «Ki alggaattaa sidadde min gali» ame. 7 Naafaleesaatina keegure minkkeessa gale.

10 Eseenna gene kakkonaafattette ibaaddoti koo gire; Yesuusa mootin dootengureen, «Ayihuudin tafoolssi arri ibaaddo fayyiisin feɂi sisanttetta?» ameen hoosaten.

11 Yesuusana, «Isin orrokko ibaaddoti kookkotti idaado Ayihuudin tafoolssi arri gumbbi orroddi goɂiite, idaado kakkoɂiitetto gumbbi orrokko natti isin lakkobeessanya?✝ 12 Hayya, ibaaddo idaadokko lakkorooraroya? Haanssun tafoolssi arri taɂidan felin feɂi sisanttetta» ame.

13 Esekkona Yesuusa ibaaddotine, «Genettaa diriirssa» ame, ibaaddotina genetteessa diriirssate, aantti gene taɂidantti aani leete.

30 Tasimoona soddo maar kagubaro hawɂaami hawɂaamaa huddurtte gitte; garakkiseenna Yesuusaan segeen. 31 Haanssun usuna ese mankkohuddurtette tos seetere genettisee abe keese; maar kagubarena iise; keetegudde handdaano haggaɂabtte.

Yesuusa bar kaɂabo ibaaddoti fayyiise

40 Maarii bar kaɂabanaaye ibaaddoti koo Yesuusa tos emetere luki hegelii gilbbisere; «Feɂittaa golleete in muc’c’isin daanddaatta» ame ebaate.

41 Yesuusana ibaaddotin nenɂeyisatere gene diriirssate abere «Feɂi sisera muc’c’imina» ame. 42 Ibaaddoti banneewa barkko muc’c’ime, fayyee.

3 Hassu goorata ibaaddo afarro naafaleessakki ibaaddoti sideengureen usu tos keenen 4 Gosa mooggankko kakkeey Yesuusa tos gabbaliin minkko waateen maraan taminee heelinchcho Yesuusa mankkogirone butto beesengureen naafaleessati takkohuddurere alggaanne wota dagiseen. 5 Yesuusana ammanokkisoo deegure naafaleessatine «Ati hikki unnu c’ubbo kakka shaaga leera!» ame.

6 Eseenna hamas’s’een ogireen kookkoo seera kamuse oɂagaalssisareen wodanattisooyi haa ameen hedeen. 7 «Hikki ibaaddoti misii haa amara? Hedo gutii haafura kahabaari kahabaarara! Waa koo kuwaarre c’ubbo shaaga yelin kadaanddaara ayyoya?» ameen k’oppeen.

8 Yesuusana banneewa wodanattisooyi kahedaran ayyaanakkeessayi addeesere; «Misii haa k’oppaattan? 9 Naafaleessakki ibaaddotine ‹C’ubbokkakkaa shaaga leera› amanokkona, kingudde alggaattaa sidadde gali, amanokko eekiya enekki? 10 Ayesuun goɂameen ere kaɂibaaddo ul gutii c’ubbo shaaga yelin odonnati kaɂabo laano goggoɂaddeessawun» amere naafaleessatine, 11 «Kingudde alggaattaa sidadde minkaa gali» ame.

12 Naafaleesatina goorsewa keegure alggaa sidatere ibaaddo dubba diyaagiraan bee. Haanssun ibaaddo saadere hikkamalekki ayees «Noo duuddo deenne laakkansso amaa Waa galateen.»

Yesuusa gene kakkonaafatette ibaaddoti fayyiise

1 Yesuusa kallami abbaabate Ayihuudikokki min kaɂebi tos tabe, eseenna gene kanaafatere ibaaddoti koo gire. 2 Aalanttina Yesuusa mootin kaddootare ibaaddo tafoolssi arri gofayyisaro deenna, ameeren oora gireen. 3 Yesuusana gene kanaafatere ibaaddotine «Kingudde iso t’eɂee aalliina» ame. 4 Esekko abbaabatere «Afo tafoolssi arriwuun feɂi kakkosisanttetta taɂidan feliinya muu tameellan feliinya? Neefo fayyisanoya muu baasanoya?» Ame iso hoosate, isona adene c’alɂi ameen. 5 Yesuusa wodanattiso duudaanon gaddeegure usu maraamurene oɂalleeraan iɂone deegure ibaaddotine, «Genettaa diriirssa!» ame, ibaaddotina gene diriirssate genettesana duuddo fayyiite.

Yesuusa maarii bar kaɂabanaaye ibaaddoti fayyiise

12 Yesuusa katamaalkko tooyi kakkogiree, koo maarii bar kakkonɂammagantttete ibaaddoti ese katamaayi gire; hikki ibaaddoti Yesuusa kakkodeyaare goorata bebbeedtteessaa ul oyeegure, «Goottaa, feɂittaa golleete in muc’c’isin daanddaatta» ame ebaate. 13 Yesuusana gene diriirssategure maar kaɂibaaddoti aɂabegure «Ani feɂi sisera» «Muc’c’iɂami!» ame. Goorsewa bar ibaaddotikko muc’c’iɂantte.

18 Hassu gooratana ibaaddo naafaleessati koo alggaayi sideen aateen emeeten. Yesuusa horee kayin min orroo tabisin hedeen. 19 Gosa mooggankkona kakkeeyi min orro tabisin mankkowaaten maraan heelinchcho gutii korateenee heelinchcho butto beeseren kahawɂamaro alggaanne wota gosaa t’eɂee tukkulii Yesuusa hore dagiseen. 20 Yesuusa ammanokkisoo deegure, «Ati ibaaddoti c’ubbokka haheso amamera» ame. 21 Seera oɂagaalssisaranna kafarasaawi ibaaddo, hikki «Waa kaɂinggaamara ayyoyya? Waa koo kuwaarre c’ubbo haheso amin kadaanddaara ayyoyya?» ameen k’ofa geggeesatano haggaɂabeen. 22 Yesuusana k’ofattisoo mankkoɂaddeesere maraan haa ame; «Muun wodanattisinii haa k’oppaattan? 23 ‹C’ubbokka haheso amamera› amanokkona ‹Kigudde gali› amanokko eekiya enekki? 24 Ayesuun goɂameen hikka usu kakkoonɂamera ere kaɂibaaddo ul gutii c’ubbona haheso amin odonnati kaɂabo laano goggomalabtaanunya.» Naafaleessa lee kagire ibaaddotine, kigudde alggaattaa sidadde minkakkaa gali ame. 25 Usuna goorsewa keegure isoo hore aallee; huddure takkogire alggaa sidategure Waa galataa minkkeessa gale.

6 Takkalee Ayihuudikkotti tafoolssi arriinna Yesuusa kaɂayihuudi min kaɂebii tabere agaalssisaa gire; esena gene tamergge kakkonaafattette ibaaddoti koo gire. 7 Seera oɂagaalssisareenna kafarasaawi ibaaddo Yesuusa mootin aalantti dootaa, tafoolssi arrittisooyi usu gofayyisinarona din oora gireen. 8 Yesuusana k’ofattisoo addeesegure gene kakkonnafattette ibaaddotine, «Kigudde t’eɂee aallii» ame; ibaaddotina kee aallee. 9 Esekko Yesuusa, «Alla ayees koo ani isin hoosaro; tafoolssi arriin feɂi kakkonsisanttetta idane feliinya muu meellane feliinya? Neefo haasanoyya muu baasanoya?» ame. 10 Yesuusa ade usuu maraamure kagiro ibaaddo dubbana deegure ibaaddotine, genettaa diriirssa ame; ibaaddotina goggoɂamameroo yele; genena suure fayyiite.

Wotaadara booluun woyichcha kalleerokokki ammano

1 Yesuusa hikka dubba gosaa hore ayeese gudisere K’ifirenaahoomi tos tabe. 2 Esena karoomi wotaadara booluun woyichcha kalleere gire; usu aaloo kageelaatare usuun kahandaarekki hawɂaamere goyin gabbalame gire. 3 Usuna Yesuusakokki gara kakkomaalare goorata usuun kahandaarekki goggofayyisiroo goggoɂebaanawun ul kaɂayihuudatti jaarsoleekko fare. 4 Handdaa ofarameerenna Yesuusa tos emetengureen haa ameen ataayiseen ebaaten; «Hikka ibaaddotin ati hikka felin dootisara; 5 Aalanttina hikki ibaaddoti gosakkaani geelaatara; min kaɂebikaani noon kamadaarsiserana usuya.» 6 Yesuusa isone wota seete. Usuna min tos kakkogabbalamare goorata, wotaadara boolkokki woyichchati ogeelaatare farere Yesuusane haa ame; «Goottaa; ati minkkee orddi tabin ani kadootisaro ibaaddoti lakkoyo aroohartte; 7 Hikkakko kakkeeyi ku hore gabbalamiin duuddo kadootisaro aani isiɂootte lakkotootataro; haafura koo kaalaal ayeesi; iin kahandaarekki fayyirowa. 8 Ani metekkeewun kaguutee woyichcha aba inkko hegelle ade iin kahandaara wotaadara gira; koonne ati ‹See› goɂamiro seetara; kakkalennena, ‹Koyya› goɂamiro emeetara; iin kahandaarana, ‹Hikka feli› goɂamiro iin ajajaamara.» 9 Yesuusana hikka kakkomaalare goorata usuu saade; kambbal amerena debeesseeta kagire gosane, «Ani isinne haa amara; hitta aanttitti tanjiintti ammano Isiraɂeelii duuddo ani lakkohelero» ame. 10 Handdaa kaseetere ibaaddo min kakkoɂabbaabatare goorata, usuu kahandaarekkina kafayyeero deen.

11 Eseenna battiikki ayyaanayi gees tomonkko siddeed dubba zuurɂo tabeessette heleelttiti too gitte. Eseenna zuurɂo beesanokko kakkeeyi duuddo t’ok’k’i amin lakkodaanddeetette. 12 Yesuusana ese kakkodeyaare goorata uumegure, «Abbattee, hawɂaamikaakko fayyiitetta» ame. 13 Genetteessa esee gutii kaye, esena goorsewa tukkul aallite, Waanna galatiite.

Yesuusa Farasaawiti kookokki minii

1 Ayihuudin tafoolssi arri tooyi, Yesuusa babo aamin kafarasaawi woyichchaalkko koo kalleere ibaaddotikokki min tos kakkotabare goorata, ibaaddo usuu gutii maraamurisaa gire. 2 Eseenna maarkkokki duddubbeeli kaɂabbosamare ibaaddoti koo usu hore gire. 3 Yesuusana, seera oɂagaalsisarannena Farasaawilnne, «Ayihuudin tafoolssi arri dhukkubaleessaal fayyiisano dootisara muu lakkodootisaroya?» ame iso hoosate.

4 Isona adeen c’alɂi ameen. Usuna ibaaddoti abe fayyisere galise.

Bar tamaarekko kamuc’c’imero ibaaddo tomon

11 Esekko abbaabatere Yesuusa Iyyerusaalemi tos seetaa giraan mina tasemaryaannena tagaliila maamankokki meessane roore. 12 Maaman koo tos goggotabee maarii bar oɂabanaayen ibaaddojja tomonno Yesuusane wota esele, isona ebbaa aalleeren; 13 taɂatii yaaye, «Goottaa Yesuusa, noon nenɂeyisa!» ameen.

14 Usuna iso kakkodeyaare goorata, «Seyeenddeen isiɂoottisin tuuk’aamolun tusayeen» ame.

Isona eserraa seeto gutii giraan muc’c’imeen.

15 Isokkona koo fayyaanokkeessa kakkodeyaatare goorata yaaye t’ok’k’i taɂanttee Waa kabajaa abbaabate. 16 Luki tayesuusa gutii hore hore iyyegure galatee, hikki ibaaddotina samaraawitiyye.

17 Yesuusana haa ame usu hoosate; «Kamuc’c’imere ibaaddo latomonyella? Hayya, saagallo hagge seete? 18 Hikka kasamaraawi allaggati kuwaarre abbaabateren Waa kagalatara kakkalee lakkogiro amanoya?» 19 Ibaaddotinena, «Kiigudde gali, ammanokka ku fayyiisera» ame.

Beetesayidaa kafelamero fayyinna

1 Esekko abbaabatere kaɂayihuudi baala mankkogire maraan, Yesuusa Iyyerusaalemi tos bee. 2 Iyyerusaalemiinna, kaɂidaad ufa dollee, karra ken guuntte kasaarame kakkosesseetaran taɂabtta, heɂi taɂaramayikkii Beetesayida taɂamamatte banɂee kakkot’ammak’araan kafultto eela koo gire.* 3 Hikka kakkosesseetaran raajjoolii kamooggan naafaleessaal, Iilɂoo kadiyannoon, oɂesaraanna naafaleessaal huddureen gireen. [Bekekokki aɂaanona oorataa, 4 Roore roore erggichcha kawaa dage beke kakkoɂaaɂisaro goorata, t’aye eela tos katabe kaɂabo dhukuba maamisikikkona fayyaa gire.]* 5 Eseenna gees sonddomkko siddeedun dhukubaaleessa lee kagire ibaaddoti koo gire. 6 Yesuusana hikka ibaaddoti esee kahuddurero deegure, goorata kamoogganun hikkamalee girano addeesere «Fayyiin dootaatta?» ame.

7 Dhukubaaleessatinna abbaabere, «Goottaa! Beke kakkoɂaaɂiraan goorata eela tos in kadagisiro ibaaddo lakkoɂabo, ani tabin gohediro kakkalee horehaara» ame.

8 Yesuusana, «Ki! Takkohuddurttetto alggaattaa sidadde gali» ame. 9 Ibaaddotina goorsewa fayyee, takkohudurere alggaana sidate gale.

Hikkina kalleera Ayihuudin tafoolssi arriiyye,

46 Yesuusana beke t’amo kawoyinii tos takkoɂiggilsero, Galiilaa tagitto K’aana katamaa tos kallami emeete, K’ifirenaahoomina ere kakkoonhawɂaamere koo min kawonokokki shuumii gire.✝ 47 Hikki ibaaddotina Yesuusa Yihuudakko Galiila tos emeetano kakkomaalare goorata, usu tos seetere hawɂaamere goyi hiɂi kagiro erekkeessa emeeyi goggofayyisiroo ebaate. 48 Yesuusana, «Maagoreenna isin malaatana baasakki ayees goddeennoon lakkoɂammanattaan» ame.

49 Shuumitina, «Goottakki, erekki gowaanokko horenne maganne geena» ame.

50 Yesuusana, «Erekka neefo gira see» ame,

Ibaaddotina Yesuusa kaɂayeesero haafuraa ammane seete. 51 Raadii giranttuunna ohanddaaren usu heleeren, «Erekka fayyeera» ameen usuun segeen.

52 Usuna erekkeessa saatii miyyaayi iidero gohoosaro, «Maar gubanona usu kakkogafarera kele saatii todobaayiya» ameen. 53 Kaɂunnuti odona Yesuusa, «Erekka neefone gira» takkoɂamero saatii laano addeese, usuna kaminee ibaaddo keessa dubba Yesuusaa ammaneen.

54 Hikkina, Yesuusa Yihuudakko Galiila tos emeete kafelero kallamikki baasakki malaataye.

20 Esekko gees tomonkko lama dubba iigi ubataa abboosa diyaa tagitte heleelttiti too haarre emeettegudde sarssikkeessa dintte.✝ 21 Esena wodanattiseeyi, «Sarssikkeessa godine suure fayyinnara» amaa gitte.

22 Yesuusana haar abbaabate heleelttiti deegure, «Allamandde unnutti! Ammanokka ku fayyiisera» ame. Heleelttitina goorsewa fayyiite.

25 Gees tomonkko lama iigi ubataa takkogire heleelttiti too esee gitte. 26 Omooggan odo doobjjoolun dollee rakkataa tagitte kaɂabtto dubba goggussattena, dhukkuba haggaaɂataate kuwaarre lakkoɂiisere. 27 Esena gara kayesuusa kakkomaalatte goorata haarre ibaaddo orromartte emeetedde sarssikkeessa dintte, 28 Aalanttina «Mamisi ligure suure sarssikkeessa kaalaal godine fayyinnara» kaɂamaro ammano abanaayite.

29 Kaɂubatare iigi banneewa aallee, abboosakko hesano maarkkiseyi addeesame.

43 Gees tomonkko lama iigi ubataa takkogire heleelttiti too gitte; kaɂabtto dubba odo doobjjoolun gussattedde fayyiisinna kadanddeere maayyona lakkogire. 44 Esena mina tahaarenne gabbalanttedde sarssikotti birt’e dintte; ubataa kagire iigina goorsewa aallee. 45 Yesuusana, «In kadinera ayyoyya?» ame. Dubbana dinanawaattikisoo kakkokakatareen goorata P’et’iroosa Goottaa, gosa dubba maraamure ku harisara ame. 46 Yesuusa ade ibaaddoti, «Koo in dinera; hunnana inkko biyaano kasa» ame.

47 Heleelttitina isi siyamissayi galin daanddaanawaatti kakkoɂaddeesatte goorata, harɂaa emeettedde usu hore iite; mewuun dinttettona misii goorsewa fayyitetto gosa dubbaa hore segaatte. 48 Usuna, «Unnuttee; ammanokka ku fayyiisera; nogoddaa gali» ame.

Goyikko takeetetto unnutina iigi takkoɂubatare heleelttitikokki fayyaano

18 Yesuusa ibaaddo ayeesisaa giraan, Ayihuudikokki woyichchati koo usu horee gilbbisegure, «Unnutti gidda gootetta neefone goggohessoo emeedde genettaa esee gutii kayi» ame. 19 Yesuusana keegure woyichchatine wota seete, Yesuusakko oɂagaalssatareenna usu debee keen.

23 Yesuusana min woyichchati tos goggogeeyi malakata ufuufaa, ootaanna oyisaa kagire gosa deegure, 24 «Dubbana hittakko biyaa! Unnu huddurttetta kuwaarre lakkogootetto» ame. Iso goɂameen k’ac’c’ifataa osoleen. 25 Ibaaddo min orrokko kakkobiyaare goorata min orroddee tabegure genettisee abe, unnuna keete.

22 Ayihuudikokki min kaɂebiwuun woyichcha kallerokko koo Iyaaɂirosi kaɂamamare eserraa emetere Yesuusa kakkodeyaare goorata luk’k’aa gutii iyyere, 23 «Tic’c’artti unnutti goyi hiɂi gitta fayyidde neefone goggogirttoo emeedde genettaa ese gutii kayi» amaa ataayise ebaate.

24 Yesuusana wota seete kamooggan gosana usu maraamure unɂee debee sesseeteen.

38 Min kawoyichchaati kakkogiyaaren goorata Yesuusa ibaaddo woo woo amaa yururu ame ootaa giraan dee. 39 Min tos tabere, «Hikki dubba iyyana oottan metta? Unnuna huddurttetta kuwaarre lakkogootetto» ame.

40 Ibaaddo ade k’ac’c’ifataa usuun osolee. Yesuusa ade ibaaddo dubba minkko beesere unnukokki Odona Aanna usumalee usu wota oɂemeetereen usukko oɂagaalssatareen wota unnu mankkogitto tos tabe. 41 Esekkona taɂunnu gene abere «T’aalta ki aallii!» ame. «Fureenna, teɂunnu ki amara» amanoya.

42 Unnutina banneewa keete aallite hasserraa hittarraa sesseete. Geeskkisena tomonkko lamaye. Ibaaddona kalleero ayeesii aaloo saade.

31 Yesuusa ade, «Goortta hitta alattankkokki ibaaddo ani meyii masuussira? Me aani laaran? 32 Banɂe tagiyyaayi hamas’s’eereen isi isirroo isi uɂuumataa haa kaɂamaro yiisaas aani laanan, ‹Noo sussullee isinuun ufuufinne, lakkoduddurtteen; boochcho isinuun beensse, lakkoɂootteen.› 33 Aalanttina kat’ammak’aara Yaannisa agabuuyi kaami haɂamoonna kawoyinii t’amo hant’amooni goɂemeete, ‹Battiikki ayyaana aba› antteen. 34 Ere kaɂibaaddo adi aamaanna t’amaa goɂemeete ‹Aamoonna t’amoon kagap’igap’aaro, k’arat’a okukkuyisaraanna c’ubbaalessaal kageelaataro› antteen. 35 Goortta k’arummakokki likkii laano kaɂatatero ibaaddo dubbaa dollee addeesantte ame.»

Heleelttiti too Yesuusaan shittoo shigidde

36 Eseenna ibaaddo kafarasaawikko koonne wota babo goggoɂaamiroon Yesuusa uumate, usuna Farasaawitikokki min tos tabegure babo aamin hamas’s’ee. 37 Ese katamaayi tagitte too c’ubbaalettii heleelttiti, Yesuusa Farasaawitikokki minii babo aamin hamas’s’aano kakkomaalatte goorata koo Alibast’iros kaɂamamaro eɂemokko k’orame kafelamero bilk’aade mig talleetetto shittoo aatte emeette;

41 Usu goorata Iyaɂirosi kaɂamamere kaɂayihuudi min ebikkokki woyichcha emetere, luki tayesuusa gutii iyyegure minkkeessa goggoseero ebaate; 42 Hikka ebi kakkoonɂebaatere gees tomonkko lama takkoleere too unnutti taalaal mankkogitte maraanye; esena hawɂaanttedde goyii hiɂi gutii gitte. Yesuusa eserraa seetaa giraan gosa isiɂisi shashafataa aaloo harisaa gire.

49 Yesuusa ganaa ayeesaa giranttii, ibaaddoti koo Ayihuudikokki min kaɂebii woyichcha kalleere kaɂiyaaɂiroosi minkko emetere, «Unnutatta gootetta; hittakko danbbeebaan kaɂagaalssisaro arooharisse» ame.

50 Yesuusana hikka maalere iyyaɂiroosine allamandde, «Aroo abssatte; amana kuwaarre unnutatta fayyinatta» ame. 51 Min kaɂiyaaɂiroosi tos gotabiro P’et’iroosa, Yaannisana Yayik’oobakko usumalee unnutikotti Aanna odona kuwaarre maayyona usu wota goggotabroo lakkodootero. 52 Hassu goorata ibaaddo dubba woo woo amaa eseen ootaa gire. Yesuusa ade, «Aroo ootteen; huddurttetta kuwaarre lakkogootetto» ame.

53 Ibaaddona gowaanokkisee mankkokaso maraan usuun osole. 54 Usu goɂameen genettisee abere, «Teɂati unnu, ki» ame. 55 Neefo taɂunnutinna abbaabatte; goorsewa keete aallite, Yesuusana ese kaɂaantto kooko goggosisirawun segee. 56 Oɂumuleeraanna saadeen; usu goɂameen kalleero ayees maayyonna goggoɂayeesonkko segee.

Goyi kaɂalaazari

1 Kamayiraamena abbattiseekki kamaartta maamani Bitaanyaayi kagire Alaazari hawɂaamaa gire. 2 Hitti abbikkise Alaazari takkoon hawɂaamare Mayiraame, Goottaa gutii shittoo kibttedde lukkitteessa metekkiseeyi tashaakkaratetta. 3 Abbalaal lama, «Goottaa; ati kageelaatta ibaaddoti hawɂamara» ameen handdaa fareen.

4 Yesuusa hikka kakkomaalare goorata, «Hikki hawɂaami Ere kawaa usu goggokabajaamironna kabaja tawaawunya kuwaarre goyiin kageegisiro lakkoyo» ame.

5 Yesuusana Maartana, abbatisee Mayiraamena abbikkisoo Alaazari geelataa gire. 6 Golleenna kaɂalazaari hawɂaamano maale giraan takkogire banɂee arriti lama haye. 7 Esekko abbaabatere usukko oɂagaalssataranne «Ul kayihuuda tos abbaabana» ame.

8 Usukko oɂagaalssataranna, «Kaɂagaalssisatto, arri tic’c’arkko horeene Ayihuudi ku eɂemoo eeggiin dootaa gire, adena eserraa seeyinatta?» ameen.

9 Yesuusana «Arri too la saatii tomonkko lammattola? Hikka alamikokki ifakko kakkeeyi mankkodiyaaro maraan arrii kasessetara lakkohanduddufataro. 10 Kahanduddufatarana ade hemeen kasesseetaroya, aalanttina ifa lakkoɂabo ame abbaabe.» 11 Hikka segee abbaabatere, «Noo kageelaattanna Alaazari huddurera, aninna huddurokko usu keesin seeyinara» ame.* 12 Yesuusakko oɂagaalssatareen «Gootta! Gohudurero fayyirowa» ameen. 13 Yesuusa hikka kakkoseegera kaɂalazaari goyikokki garaye, usukko oɂagaalssatareen adeen hudduranokokki gara kaɂayeesero aani leera. 14 Haanssun Yesuusa addeesise, «Alaazari goyera.

Yesuusa gaashimallo c’alɂise

23 Esekko Yesuusa wolabo orro tabe, usukko oɂagaalssatareenna usuu debee tabeen seeten. 24 Derɂa kaɂatii irggado keegure gaashimallo wolabo taa lichisiroo shalagaame, hassu goorata Yesuusa ade huddure gire. 25 Usukko oɂagaalssatareenna gabbalameen usu nabbaadisen gureen, «Goottaa! Baannewa, no haasi» ameen.

26 Yesuusana, «Isin ammano okkoonhank’atera! Muun hikkamalee abssaattaan?» ame. Esekko keegure irggadona gaashimallo hadise, goorsewa beke k’ooden.

27 Ibaaddona, «Hikki irggadona gaashimallona kakkoon ajajaamaraan misikki ibaaddotiyya?» amaa saaden.

15 Ul hemeen laa kakkoseetare goorata Yesuusakko oɂagaalssatareenna usu tos gabbalameengureen «Hitti banɂe koonna takkoginnoon k’alullattokki ulya; gooratana hemeen mankkollaaro maraan; maamanjoolkko seeyigureen kaɂaamiraan babo goggoɂiminaraawun gosa gafarina» ameen.

16 Yesuusa goɂameen «Iso seeyin lakkodootisaro, iso kaɂaamiraan isinwa sisa» ame.

17 Isona, «Noo hittanii kaɂabnna babo bit’e kenna kunɂub lama kaalaal abnna» ameen.

18 Yesuusana, «Alla kaɂabttaan in tos keena» ame. 19 Esekkona gosa ees gutii goggohamas’iron ajaja sise; babo bit’e kenna kunɂub lamana aategure elddee daruurii tos diyaa galateere babokko ibise aategure usukko oɂagaalssatareenun sise, isona gosaan siseen. 20 Dubbana aameen barareen, esekkona usukko oɂagaalssatareenna tahessetto hanbba dugud tomonkko lama mig keeseen. 21 Kaɂaamere ibaaddo heleelnna yiis kallayi kuma ken kalleero babbaarye.

25 Hemeenkko saatii saagaalkko abbaabatere Yesuusa bekee gutii sesseetaa usukko oɂagaalssatareen tos emeete.

Yesuusa ibaaddo kuma afar babo aamisano

32 Yesuusa usukko oɂagaalssataran uumegure «Gosa iinne wota arri seed mankkohayero maraan kaɂaamiraan mankkowaatenaan maraan ani isoon nenɂeyisatara, raadii uuɂigureen ul goggoɂiinnoonkko uɂine gafarin ani feɂi lakkosisinaro» ame.

33 Usukko oɂagaalssatareenna «Hikka koonna kallayikki k’alullattokki uli, hikka gosa dubbaan kalleero babo aamisin no hayekko helnanna?» ameen.

34 Yesuusana, «Golleenna isin babo bit’e miyyaa abttaan?» ame hoosate. Isona; babo bit’e titiic’c’ar «Todobana» «kunɂubja otitiic’c’ar abnna» ameen.

35 Usuna gosa ul goggohamas’iroon feɂi sise; 36 Babo bit’e todobanna kunɂubja abegure Waa sommaasate abbaabategure babo eɂebise usukko oɂagaalssatareenun sise, isona gosaan hedeeden. 37 Dubbana aameen barareen, usukko oɂagaalssatareenna tahessetto hanbba dugud todoba mig keeseen. 38 Kaɂaamere ibaaddona heleelnna yiinssa antootamonii kuma afar babbaarye.

K’ulluukki min Waa maraan giira murano

24 Yesuusana usukko oɂagaalssatareen K’ifirenaahoomi tos kakkogiyaaren goorata k’ulluukki min kawaakkokki giira oɂabaabareen P’et’iroosa tos gabbalameengureen, «Kaɂagaalssisarakkisin k’ulluukki min kawaakkokki giira lakkomuraroya?» ameen.✝

25 P’et’iroosana, «Ii murara» ame. P’et’iroosa min orroddee goggotabeeyi, Yesuusa horaarjje, «Simoona! Kaɂulee wonojjoolkokki giira goorttun k’arat’a kakkoɂaatinnaraan kaɂulee ibaaddokkoya muu kakkaleekko aani laara?» ame.

26 P’et’iroosana, «Kakkaleekkoyya kakkoɂatamara» ame. Yesuusana, «Goorttanun yiisaaskkisin tagiira muraakko hesera.

27 «Golleenna noo isoon handuddufo goggolleenoonkko labu tos dagiggudde mant’ak’k’oo luguda, horaarjje kaɂabato kunɂub aatigudde hiɂi goggobantteeyi maragade helnnatta, hassu aatigudde in marantinuuna megekkaa maraan muri» ame.

Il kallayikki gaa kabalasi

18 Yesuusa bari bullane katamaa tos abbaabate setaa giraan uuɂee; 19 Raadii giridii kagire gaa kabalasi koo deegure kakkoseero goorata baalallo kuwaarre il toonna helayiin waategure; «Goortta jiroomman kuun il aroogginno!» ame. Gaa kabalasina goorsewa angage.

20 Usukko oɂagaalssatareenna kalleero deeguren saadeen, «Gaa kabalasi misii kooyikkii angagin daanddee?» ameen.

21 Yesuusana, «Ani rumminaa amara; ammano isinuun girewa lakkohedatatteen; gaa kabalasi gutii kalleero aani felano kaalaal anlleennon giraan hitta wodami hittakko, ‹Tagamigudde beke orroddee tabi› goɂantteen isinuun laarewa.✝ 22 Ammanatteeddeen ebii kaɂebaattan dubba atayinattaan.»

37 Usu goorata kaɂatii irggado kee, gaashimallonna beke wolabooyi taa ammagamiraani shalagaa gire. 38 Yesuusa ade borkkaano borkatere wolabo orroo huddure gire. Isona nabbaadiseeren, «Kaɂagaalssisatto! Noo gogudanno ku lakkot’ibaroya?» ameen.

39 Usuna nabbaade keegure irggado hadise, bekena, «c’alɂi ameen!» anbbalnna c’aliɂantte, duuddo c’alɂeetti leete. 40 Yesuusana, usukko oɂagaalssataranne, «Mewuun haa abssatteen? Misii ammano waattaan?» ame.

41 Isona aaloo abisateen guuren isiɂisi orroo, «Afo, iriggadona gaashimallo c’alɂi kakkoonɂamaraan hikki ayyoya?» ameen.

35 Usu goorata ul hemeenllaa kakkosetare goorata usukko oɂagaalssatareen usu tos gabbalameeren, «Hitti banɂe k’alullattotta, ul hemeen leera. 36 Ibaaddo kakkogiro maaman tos seeyigure kaɂaamiraan kooko iminayi goggoɂaminarawun gosa gafarina» ameen.

37 Yesuusa ade «Kaɂaamiraan isinwa sisa» ame abbaabe. Isona, «Seeyinne iso kaɂaamiraan lama boolee t’agaraayi babo imininne isoon sinissu?» ameen.

38 Usuna, «Babo miyyaa abittaan? Alla seyeenddeene diyaa» ame. Deengureen, babo kenna kunɂub lamana girowa ameen.

39 Esekkona gosa eesii c’aree gutii una unaa goggohamas’iroon ajajee. 40 Gosana bool booli konttom konttomi una unaa hamas’s’ee. 41 Yesuusa babo kenna kunɂub lamana abere daruurii tos diyaa sommaasate, babona ekkaɂebise usukko oɂagaalssatarawun sise; usumaleenna kunɂub lamana dubbaawun hedeede. 42 Dubbana babo aameen barareen. 43 Usukko oɂagaalssatareenna kaɂaamamero babokkona kunɂubkko tahessetto hanbba dugud tomonkko lama mig keeseen. 44 Babo kaɂaamere babbaar kuma kenye.

48 Anbbalnna ataatte foffol kiyaa mankkogitte maraan, usukko oɂagaalssatareen duudaataa feriferattisone wota moɂabataa giraan dee, hemeenkko saatii saagaalkko taa tomonkko lama saatii geeroo kagiro goorata orroo bekee gutii sesseetaa iso tos emeete iso doolmari iisi roorin dootere, 49 Ayesuun goɂameen beke gutii sesseetaa giraan kakkodeyaaren goorata gaari aani lee kakkomutare goorata iyyeen. 50 Dubbana usu kakkodiyaaren goorata neen.

Yesuusa ade banneewa, «Allamandde! Aniwayya arooɂabssatteen!» ame.

51 Usuna wolabo gutii koratere isone wota hamas’s’ee, anbbalnna iise, usukko oɂagaalssatareenna aaloo saadeen.

Yesuusa ibaaddo kuma afar aamise

1 Hassu goorata abbaabate gosa kamooggan kukkume, iso kaɂaamiraan babo koonna mankkoginnoon maraan Yesuusa usukko oɂagaalssataran isi tos uumegure, haa ame. 2 «Hikki ibaaddo iinne wota arri seed mankkoɂadallaateran maraanna iso kaɂaamiraan babo mankkowattamero maraan in nenɂyisaraan, 3 hikkamalee iso uuɂeen giraan minkkiso gogafare kookkoo ibaaddo ul kaɂeerkko kaɂemeetero mankkollee maraan raadii harigureen iiraanwa ame.»

4 Usukko oɂagaalssataren abbaabeen, «Hikka k’alullattokki ulii hikka ibaaddo dubba aamisin kalleero babo haggekko helaminnara?» ameen. 5 Yesuusana, «Babo miyyaa abttaan?» ame iso hoosatte.

Isona «Babo todoba abnna» ameen.

6 Usuna gosa ulii goggohamas’iroon ajajee, babo todoba abere sommaasate abbaabatere babokko ekkaɂebisere ibaaddon goggohedeedinawun usukko oɂagaalssatarawun sise, isona gosaan hedeeden. 7 Usumaleenna uc’c’ar kidiic’c’ar kunɂub abbanayeen, usuna hikka kunɂubbeelun Waa galateere gosaan goggohedeedirawun ajajee. 8 Gosana aame barare, esekkona usukko oɂagaalssatareenna tahessetto hanbba dugud todoba mig ammageen keeseen. 9 Kaɂaamerena kuma afar kalleero ibaaddoya, isona galise,

Yesuusa kak’anggeero kabalasi gaa

12 Tallami arri Yesuusa Bitaanyakko biyaa giraan uɂee. 13 Usuna baalallo kaɂabo kabalesi gaa ebbaa dee; woddaasa il dubami girtto amaa usu gaa tos seete; ayesuun goɂameen usu gaa takkodubaamaro diginni lakkotte baalallo kuwaarre koonna lakkohelate. 14 Esekkona Yesuusa kabalasi gaanne; «Giddakko haggaɂabire jiruu jiroomman maayyonna kukko il arooɂaamo» ame. Usukko oɂagaalssatareen usu hikka ayeesaa giraan maaleen.

Gaa kabalasi angage

20 Tallami arri bari raane rooraa giraan, gaa kabalasi hididinnee kaɂangagero deen. 21 P’et’iroosa ayees k’alli kakkoɂamare goorata Yesuusane, «Kaɂagaalssisatto; hikkima ati kak’anggitetta kabalasi gaa angagera» ame.

22 Yesuusana abbaabere; «Waayi ammana.» 23 «Ani rumminaa amara; maayyonna hitta wodamine, ‹Tagamidde beke orroddee ii› goɂame hikkana wodanatteessayi ahedannoonii goɂebaate leerowa. 24 Haanssun ebii kaɂebaatattaan dubba kaɂatatteettaan aani yeli goɂammanatteen leerowa. 25 Adena ebaayin kakkoɂaalliteen goorata; kadaruure Aabbokkisin c’ubbokkisin haheso goggoɂamiroo; isinna ibaaddo gutii taɂabttaan kajju dubba haheso ama.

Usukko oɂagaalssatarankokki uumamano

1 Gosa Yesuusa mareɂabere isiɂisi shashafataa usu kaɂagaalssisare haafura kawaa maala, tagenssaaret’i labuu girii aallee gire. 2 Usu goorata wolabo lama baga girii taɂaallitetto dee; kunɂub oɂabatareen adeen wolaboolkkona dageeren maarrabil aalisataa gireen. 3 Wolabool orrokko tasimoona talleetetto tos tabere, bagakko badi tos abaraanttii goggofakkisiroo hoosate; esekkona usu wolaboo gutii hamas’s’eere gosana agaalssisano haggaɂabe. 4 Ayees gudise abbaabatere Simoonane, «Badi tos fakki amidde kunɂub abayin maarrabjjoolkkisin lugudayeene» ame. 5 Simoonana Yesuusane abbaabere, «Kaɂagaalssisatto! Hemeen duuddo daafuraa barinenne koonna lakkoɂabanenno; ati goɂantte haafurakkaayi adi maarrabjjoolnna lugudaroowa» ame. 6 Kakkolugudatareen goorata aaloo kajiinjjii kamooggan kunɂub abeen, maarrabijoolnna fiilamiin leete. 7 Wolabo takkaleetii tagitte una tattisoo emeeyidde iso goggogarggaarttoo malaataayi uumeen; isona emeeteren wolabo lama kunɂubi ammageen; wolabona lichchimiin leete. 8 Simoona P’et’iroosana hikka kakkodiyaare goorata Yesuusa hore gilbbisere, «Gootta; ani c’ubbaalessakki ibaaddotiya inkko kalebbee» ame. 9 Hikkana kakkonɂamera usuna usune wota ogireen dubba kaɂabeeraan kunɂubikokki moggaanii mankkosaaderen maraanye. 10 Usumaleenna saatilaal tasimoona kalleere yiis kazabddoosa, Yayik’oobana Yaannisana saadeen. Yesuusana Simoonane, «Arooɂabssatte! Goortta ibaaddo in tos kakkeentto leeta» ame. 11 Isona wolaboolkkisoo baga beeseren kaɂameen dubbana iiserene usu debee sesseeteen.

Yesuusa gaashimallo c’alɂisano

22 Arriilkko arri tooyi Yesuusa usukko oɂagaalssataranne wota wolabooyi koratere, «Bekekko gama nak’ina» ame; esekkona duudaatano horeddeen. 23 Bekee orroo duudaataa giraanttini Yesuusa wolaboo orroo huddure; usu goorata beke gutii gaashimallo kaɂatii kee, bekena wolaboo k’amakko rooreene mankkotabeene maraan bayikkotti hiɂi geegeen. 24 Yesuusakko oɂagaalssatareen usu tos gabbalameeren, «Goottaa, Goottaa! No lagudannella!» amaa huddurokko usu nabbaadiseen, usuna nabbaadere ambbalnna, bekekkokki shalagaamano hadise; usu goorata ambbalnna shalagaamano iisse c’alɂeetti leete. 25 Usuna usukko oɂagaalsatanaanne, «Ammanokkisin eeko hayya? Ame. Isona abssiinna saadanoyi, hikki ambbalnna bekena kakkon ajajaamaraan afo ayyoyya?» ameen isi isiɂorroo ayeeseen.

Yesuusa gaashimallo c’alɂisano

22 Arriilkko arri tooyi Yesuusa usukko oɂagaalssataranne wota wolabooyi koratere, «Bekekko gama nak’ina» ame; esekkona duudaatano horeddeen. 23 Bekee orroo duudaataa giraanttini Yesuusa wolaboo orroo huddure; usu goorata beke gutii gaashimallo kaɂatii kee, bekena wolaboo k’amakko rooreene mankkotabeene maraan bayikkotti hiɂi geegeen. 24 Yesuusakko oɂagaalssatareen usu tos gabbalameeren, «Goottaa, Goottaa! No lagudannella!» amaa huddurokko usu nabbaadiseen, usuna nabbaadere ambbalnna, bekekkokki shalagaamano hadise; usu goorata ambbalnna shalagaamano iisse c’alɂeetti leete. 25 Usuna usukko oɂagaalsatanaanne, «Ammanokkisin eeko hayya? Ame. Isona abssiinna saadanoyi, hikki ambbalnna bekena kakkon ajajaamaraan afo ayyoyya?» ameen isi isiɂorroo ayeeseen.

Durrisa kaɂabere ibaaddotikokki fayyaano

26 Esekko abbaabatere Galiilakko gamaa kagiro kagerggesennooni ul tos wolabooyi nak’een.

12 Ul hemeen liin laa giraan, tomonkko lama usu tos gabbalameeren, «Kakkogginna ul k’alullattokki mankkollee maraan, gosa usu gobobii k’amanne kagiro maaman tos seeyireen babo mankkoɂiminaranna tabariisanoo banɂe goggodootarawun gafari» ameen. 13 Yesuusa ade, «Kaɂaamiraan isinwa isoon sisa ame. Isona, hikka gosa dubbaan kalleera babo seeyinne goɂiminne kuwaarre, noon kagira babo kenkkona kunɂub lamakko lakkorooraro» ameen. 14 Kuma ken kalleera babbaar esee gire. Yesuusana usukko oɂagaalssataranne, «Gosa konttom konttomii beesa hamas’iisa» ame.

15 Usukko oɂagaalssatareenna goggosegaamero malee ibaaddo goggohamas’iroon yeleen. 16 Yesuusana babo kenna kunɂub lamana abere daruur tos eleddee diyaa Waa galateere, ebise aatere gosaawun horee goggoroorisirawun usukko oɂagaalssatarawun sise. 17 Dubbana aameen barareen; usukko oɂagaalssataranna isokko tahessetto hanbba dugud tomonkko lama mig keeseen.

Yesuusa beke t’amo kawoyinnii tos iggilise

1 Taseedi arri tagaliila awuraajjaa, tak’aana katamaayi haassino gitte, Aaye tayesuusana esee gitte, 2 Yesuusana usukko oɂagaalssatareenna banɂe tahaasinoo uumameen gireen. 3 T’amo kawoyinnii kakkogudatare goorata Aaye tayesuusa, «T’amo kawoyinnii gudatelle antte.»

4 Yesuusana, «Ati heleelttiti ani me goggoyelloo dootatta? Gooratakki ganaa lakkogeero» ame.

5 Aayetteessana esee ogireen ohandaaraawun, «Usu kaɂamaro dubba fela» antte.

6 Kaɂayihuudi kahurufa seera malee, todobaatamkko kenkko taa boolnnee tomonkko ken liitiroo kaɂabara toossa lewo esee gire. 7 Yesuusa ohandaaranne «Toossaalii beke ammaga» ame. Isona toossaalii hiɂi geegiseen ammageen. 8 Usuna, «Guukko hummuusaddene min kahaasinokki aamoonna t’amoon odonnati kaɂaboon sisa» ame. Isona usu goggosegeerokki malee yeleen. 9 Odonnati kaɂabanaayekkina t’amo kawoyinii tos oɂiggilssameraan beke hummuge dee. Golleenna eetikko emeteeraan lakkoɂaddeesero, beke ohummuseraan ohandaareen adeen kasanayenwa; usuna kamashashee kale uumere, 10 «Ibaaddo dubba horaarjje karoorisara kaɂidankki t’amo kawoyiniiyya, ibaaddona aaloo t’ame abbaabatere kadanbbee t’amo kawoyinnii roorisara ati adde kaɂidankki t’amo kawoyinnii gidda gin kayitetta» ame.

11 Yesuusana hikka baasakki malaataalkko kahoree tagaliila awuraajjaa K’aana katamaayi fele, kabajana tuse, usukko oɂagaalssatareenna usuu ammaneen.

6 Hikka kakkonhoosatera usu c’aafinya kuwaarre usu ussun felin kahedere kasanaayewa.

7 Filp’oosana, «Mete metee ibaaddo kic’c’ar kic’c’ar goggok’ammasiroon yelin, diinaara lama booleekki buddeena lakkolleero» ame abbaabe.*

8 Yesuusakko oɂagaalssatarenkko koo, kasimoona P’et’iroosakokki abbi Indiraasana haa ame; 9 «Kahaɂuree babo kenna kunɂub lama kaɂabera unnu koo hittanii gira, hikki ade hikka gosa dubbaan misii geeginara?»

10 Yesuusana, «Ibaaddo goggohamas’iroon yela» ame, ese banɂee ees kamooggan gire, ibaaddona hamas’s’ee tootoɂoottisona kuma ken kalleeroye. 11 Yesuusa babo ken keese galatee kakkoɂabbaabatare goorata, kahamas’eero gosaan hedeeden, kunɂubna usumaleewwa hedeeden dubbana kadootisaro gitakki helateen. 12 Dubba aame kakkobararare goorata, Yesuusa usukko oɂagaalssatarenne, «Tahessetto hanbbakko toonna goggodarɂaamonkko kukkuyisa» ame. 13 Isona, kaɂaamamero kahaɂuree babo kenkko tahessetto hanbba dugud tomonkko lama kukkuyiseen ammageen.

19 Kilo metira ken goorttun le duudeen giraan, Yesuusa beke gutii sesseetaa wolabo tos kaɂemeetaro deenee abssateen. 20 Yesuusa ade, «Aniya, arooɂabssatteen» ame. 21 Isona usu goggokoraroo dootateen, wolabona goorsewa mankko seetaraan geete baga abatte.

Yesuusakko oɂagaalssatareen baasaa kunɂub abatano

1 Esekkona danbbene Yesuusa tat’ibraadosi labuu adena usukko oɂagaalssatareewun mute, hikkamaleena ade mute. 2 Simoona kaɂamamare P’et’iroosa, Didimoosa kaɂamamare Toomaasa, kak’aana Zegaliila Naatinaɂeeli, yiis kazabddoosana Yesuusakko oɂagaalssatareen okkalee lama raattoo gineen. 3 Simoona kaɂamamare P’et’iroosana, «Kunɂub abayin daganoya» ame.✝

Isona, «Noo kunne wota daginanna» ameen. Emeetene wolabo oriddeen tabeen, ese hemeen adeen koonna lakkoɂabateen. 4 Bariinoo, Yesuusa labu girii aallee gire, usukko oɂagaalssatareen adeen Yesuusa laano lakkoɂaddeesen. 5 Yesuusana, «Yiiso, kunɂub abitaane?» ame.

Isona, koonna «Lakkoɂabino» ameen.

6 Usuna, «Maarrabittisin wolabokko mina tamerggenne lugudayeen, kunɂub helattaanwa» ame. Isona kakkolugudatareen goorata kunɂub mooggankko kakkeeyi maarrabi nattin waateen.✝

7 Hassu goorata Yesuusa kageelaatare usukko kaɂagaalssatare, P’et’iroosane, «Goottayo!» ame. Simoona P’et’iroosana, «Goottayolla!» kaɂamaro haafura kakkomaalare goorata, beesate kagire sarssi tabsatere firime bekerro tabe. 8 Okkalee Yesuusakko oɂagaalssatareen adeen bagakko badi tos fakkikameeran hisil lama boolee kalleero kuwaarre aaloo lakkofakkimeenan, kunɂub takkoɂammagamere maarrabi nattaa baga emeeten. 9 Bagana kakkogiyaanee goorata, boolaal kaɂeleenee gutii kagiro kunɂubnna babo deen. 10 Yesuusana, «Gidda kaɂabtteettan kunɂubkko alla keena» ame.

11 Haanssun Simoona kaɂamamere P’et’iroosa wolaboo tabere maarrabi baga tos nattee, 153 kajinjjiin kunɂub ammagame gire, hikka gitakki kunɂub goɂabttena maarrabi lakkofiilanttetto.

Kabooloo woyichchatikokki ammano

5 Yesuusa K’ifirenaahoomi tos goggotabee, kabooloo woyichchati kalleere koo usu tos gabbalamere; haa ame ebaate. 6 «Goottaa, iin kahandaarekki naafaleessa leegure aaloo abboosa diyaa minkkeeyi huddure gira» ame.

7 Yesuusana, «Ani emeeyigure usu fayyisinnara» ame.