27 Yesu afumine kuli ilya kende, kabili kilya aleya, abaume babili impofu batampile ukumukonka. Bapundile ukuti, "Mwana Davidi, tubelele uluse!"

28 Lintu Yesu aingile muŋanda, impofu syaisile kuli ena, kabili nao asipwisye ukuti, "Busye namusumina ati, kuti nakitefi?"

Bayaswike ukuti, "Eee, Mwemfumu?"

29 Yesu aikete amenso yabo nokulanda ukuti, "Nakikitwe, ukulingana ne kitetekelo kyenu!" 30 Kabili namenso yabo yaliswike. Yesu abasokele ukuti, "Mwiebako nangu umo pali ifi!"

31 Lelo bailesabankanya ilyasi pali Yesu muli ilya nkende yakyalo yonse.

29 Lintu balefuma ku Yeriko, ibumba ilikalamba lyalibakonkele. 30 Abantu babili abaali impofu abaali nabekala mumbali yamusebo lintu baumfwile ukuti Yesu alepita babilisye ukuti, "We Mfumu Mwana Davidi! Tubelele uluse!"

31 Ibumba lyalibakalipile nokubeba ukuti bekale tondolo. Lelo bena bakonkenyepofye ukubilisya ukuti, "We Mfumu, Mwana Davidi tulangulukileko!"

32 Yesu aiminine nokubeta alabepusya ukuti, "Kinsi mulimukufwaya imikitile?"

33 Nabo bamwaswike ukuti, "We Mfumu, tulimukufwaya ukumona!"

34 Yesu abomfwilile inkumbu kabili abakwete mumenso, palyapene balimwene nokwamba ukumukonka.

2 Elo umuntu uwalekyusiwa nobulwele bwafibasi aisile mufukamina nokulanda ukuti, "Mwemfumu ngamulefwaya kuti mwangundapa."

3 Yesu atambulwile ukuboko amwikata, nokumwasuka ukuti, "Ndefwaya, pola!" Palya pene alipolele kubulwele bwakwe. 4 Yesu amwebele ukuti, "Usininkisye ukuti tawebeleko umuntu nangu umo, lelo kailange kuli basimapepo, upela nelambo lintu Mose akonkomesye ngo bunte kuli bena."

2 Abantu bamo baletele kuli ena uwabulebe ninsi nalala pabutanda. Kabili lintu Yesu amwene ikitetekelo bakwete, aebele uwabulebe ukuti, "Sipa, wemwana wandi! Imembu syobe syaelelwa."

3 Pali ifi, bakafundisya bamafunde bayebele abene beka ukuti, "Uyu muntu alepontela Lesa!"

4 Lelo Yesu ikyo alisibe amatontonkanyo yabo, abepwisye ukuti, "Nikinsi muletontonkanisisya ifyabubifi? 5 Busye kinsi kyayangukapo pakulanda ati, ‘Imembu syobe syaelelwa’ nangu ukulanda ati, ‘Ima nokwenda’? 6 Lelo nalamilangisya nomba ukuti Umwana wa Muntu alikwata amaka yakwelela imembu." Eikyo aebele uwabulebe ukuti, "Ima, piita ubutanda bobe kabiye kuŋanda"

7 Kabili alimine nokuya kwakwe.

10 kabili kwali umuntu uwali nekisansa kyalemana. Baipwisye Yesu ukuti, "Busye kyalisuminisiwa ukundapa Pesebata?" Pakuti bamupele umulandu.

11 Yesu ayaswike ukuti, "Ngakyakuti umo pali mwebo nakwata Impaanga elo yawila mukikulo Pesabata, busye tekuti ailobole? 12 Busye umuntu takindamapo ukukila Impaanga! Eikyo kyalisuminisiwa ukukita ikisuma pabusiku bwe Sabata." 13 Elo aebele umuntu ukuti, "Tambalika ukuboko kobe."

Umuntu atambalike ukuboko, kabili kwalipolele nga kumbi ukwasyala.

20 Umwanakasi uwalekyusiwa nomukunko pamyaka ikumi limo naibili aisile kunuma yakwa Yesu, nokukumya kupela yansalu yakwe. 21 Aebele mumutima wakwe ukuti, "Nganakumyafye kunsalu yakwe ndepola."

22 Yesu apilibwike nokumona, alandile ati, "Sipa wemwana wandi umwanakasi," "Ikitetekelo kyobe kyakuposya." Pali ilya ine nsita umwanakasi alipolele.

18 Yesu palya akili alelanda ifi, kwaisile intungulusi yaba Yuda kuli ena, yamufukamina nokulanda ukuti, "Umwana wandi afwafye ililine, nomba twende umutambalikepo amaboko kabili alaba nomweo."

19 Eikyo Yesu aimine nokumukonka kabili nabasambi bakwe baile nao.

23 Yesu aingile muŋanda yantungulusi yaba Yuda. Lintu amwene abalelisya imitolilo nebumba lyabantu abalelolosya, 24 alandile ukuti, "Bonse fumineni panse! Uyu mukasyana tafwile alelefye!" Elo bonse bamuseka. 25 Lelo lilyafye abantu bafuma panse, aingile ayamukwata pakuboko, kabili nao aima.

23 Kabili nalintu Yesu apateme mubwato, abasambi bakwe balimukonkole. 24 Apopene akashululu kaima pamumana namaputa yalapumaula kubwato, Yesu ena ninsi ali mutulo. 25 Abasambi baile kuli Yesu mukumusibusya. Bamwebele ukuti, "Tupususwye we Mfumu, twalafwa!"

26 Yesu abaswike ukuti, "Kinsi muletiina, mwebakitetekelo ikinono!" Aimine nokukalipila umwela namaputa, kabili kwali icilenga.

27 Abasambi balipapile, nokulanda ukuti, "Busye muntu wamusango syani uyu? Nomwela namaputa nafyo filemumfwila!"

15 Mukyungulo abasambi bakwe baisile kuli ena nokumweba ukuti, "Kuno tuli nikukiswebebe kabili nakasuba nakawa, eba abantu baye mumisi bayesita ifyakuti balye."

16 Yesu nao abaswike ukuti, "Tabafwile ukuya, mwebobene bapeniko ifyakuti balye!"

17 Bayaswike ukuti, "Tukwetefye imikate isano nesabi libili."

18 Yesu alandile ukuti, "Leteni kuli nebo." 19 Aebele amabumba ukwikala pafyani, elo abuula imikate isano ne sabi libili, alolesya mu mulu aapala ifyakulya. Aamokwele imikate isano apela abasambi, nabo abasambi bayakanya abantu. 20 Abantu bonse balilile nokwikuta. Kabili nabasambi bapiitile ifitunga ifyaisula ifyakulya fyasyelepo. 21 Impendwa yabaume abalile yali amakana yasano (5,000) ukwabula ukupendelako abanakasi, na baana.

25 Kuli kakula Yesu aisile ku basambi, aleyenda pamumana.

32 Yesu aitile abasambi bakwe abeba ukuti, "Nabomfwila inkumbu aba bantu, pantu baaba nanebo pansiku sitatu nomba apa tabakwete ifyakuti balye. Nsilefwaya ukubatuma baye ukwabula ukulya pantu kuti bapona ulushile pakuya."

33 Abasambi bamwipwisye ukuti, "Nipi twalasanga ifyakulisya ili ibumba muno mukiswebebe?"

34 Yesu abepwisye ukuti, "Mukwete imikate inga?"

Nabo bamwaswike ukuti, "Tukwete imikate kinelubali nesabi ilyalinga."

35 Yesu aebele ibumba ukwikala pansi. 36 Elo apiita imikate kinelubali nesabi, atasya Lesa, amokola apela abasambi nabo bapeela abantu. 37 Bonse balilile nokwikuta fyasyalanapo. Abasambi bapiitile ifitunga kinelubali ifyaisula ifyakulya fyasyelepo. 38 Impendwa yabaume abaalile ukwabula ukupendelako abanakasi nabana yali amakana yane.

24 Lintu Yesu nabasambi bakwe baisile mu Kapenamu, bakasonkesya bamusonko wamwi tempele baisile ipusya Petelo ukuti, "Busye kafundisya wenu talipila umusonko wa mwi tempele?"

25 Petelo nao abaswike ukuti, "alalipila."

Kabili lintu Petelo aisile paŋanda, Yesu ewabalilepo ukumwipusya ukuti, "Simoni ngawebo uletipo syani? Nibani balipila umusonko ku mfumu syapano kyalo? Busye bana babo nangu bantu bambi?"

26 Petelo alandile ukuti, "bantu bambi"

Yesu amwebele ukuti, "Ikilepilibula ukuti abana babo tabafwile ukulipila. 27 Lelo tatulefwaya ukuleta ubwafya. Kabiye ku mumana uposepo indobani, isabi ulebalilapo ukuloba, wisule mukanwa ulesangamo ulupiya ulwalinga ukulipila umusonko wamwi tempele ulobe nolwandi. Ulupiite uleyabalipila umusonko wesu."

18 Kumakya, lintu Yesu alebwelulukila ku musumba wa Yerusalemu, ali naumfwa insala. 19 Amwene ikimuti kya mukunyu mumbali yamusebo, lelo lintu aileko ailesanga takuli nangu kimo kwalifye amabula. Eikyo alandile kukimuti ukuti, "Tawakatwalepo ifisabo nakabili!" Palyapene ikimuti kya mukunyu kyauma.

20 Lintu abasambi bamwene ifi, balipapile ngansi. Baipwisye ukuti, "Busye umukunyu wauma syani apapene?"

21 Yesu abaswike ukuti, "Ndemyeba ukuti, nganamukwata ikitetekelo kabili tamutwisike, teifi fyeka nakita mwingakita lelo, kuti mwaeba nolu lupili ukuti, ‘Ima, ipose muli bemba’ nalo lukaiposa. 22 Nganamusumina, mukapokelela kyonse kintu mwalomba mwipepo."

5 Lintu Yesu aingile mu Kapenamu, umukalamba wabasilika alimukumenye nokumulomba ubwafwilisyo, 6 aebele ati, "Wemfumu umubomfi wandi nalala pabulo, taleyenda kabili nakyusiwa apakalamba."

7 Yesu amwaswike ukuti, "Nalaya mundapa."

8 Lelo umukalamba wabasilika ayaswike ukuti, "Iyoo Mwemfumu, nsilingile ukuti mwise muŋanda yandi, lelo landenifye isiwi umubomfi wandi alapola. 9 Pantu nanebo nalikwata abonakila, kabili nalikwata nabasilika abanakila. Ndeba umo ukuti, ‘Kabiye!’ Nao ayaa kabili naeba umbi ukuti, ‘Isa!’ Nao aisa, kabili ndeba umusya wandi ukuti, ‘kitefi!’ Nao akita."

10 Lintu Yesu aumfwile ifi alisungwike nokweba abamukonkele ukuti, "Ndemyeba ikine kine, nsyasangapo uwakitetekelo mu Israeli ngoyu. 11 Ndemyeba ukuti, abengi bakesa ukufuma kukabanga nakumasamba nokwikala pamo na Abulahamu, Isaaki na Yakobo pamutebeto Mubufumu bwamumulu. 12 Lelo abana babufumu bakaposwa mumfimfi, ukukaba ukulila nokusumanya ameno." 13 Yesu aebele umukalamba wabasilika ukuti, "Kabiye, kyalaba ngafintu usumine."

Kabili nomubomfi wamusilika alipolele pali kalyakene kasita.

28 Lintu Yesu afikile busilya bwamumana, kukyalo kyabena Gadara, bamukumenye kubantu babili abafumine mumanda. Aba bantu balikwete ingulu kabili bali nabakalipa ikyakuti tapali abalepita kuli ilya nsila. 29 Palyapene balapunda ukuti, "Nifinsi ulefwaya kuli fwebo, Wemwana wakwa Lesa? Busye waisa mukutukanda ilyo insita yapekanisiwa tailafika?"

30 Nomba akatalamukilafye kwali umukuni uwankumba uukalamba isyalelya. 31 Kabili ingulu syapapete Yesu ukuti, "Ngawalatutamfyamo, ututume mumukuni wankumba."

32 Kabili Yesu asyebele ukuti, "Kabiyeni," Syafumine nokuya mumukuni wankumba kabili nomukuni wa nkumba watentemukila mumukonko wayawila mumumana nokufwa.

33 Abantu abalesunga inkumba, balibutwike, baile mumusumba, mukulondolola ilyasi lyonse nefyakitike kubantu abakwete ingulu. 34 Bonse mumusumba baile mukukumanya Yesu, lintu bamumwene bamupapete ukuti afume mukyalo kyabo.

32 Lintu abaume babili baleya, baletele umuntu uusyalelanda kuli Yesu pantu alikwete ikibanda. 33 Kabili lintu ikibanda kyantafiwe muli ena, umuntu usyalelanda atampile ukulanda, kabili nabonse balisungwike. Bapundile ukuti, "Tatwatala monapo ifyaifi mu Israeli!"

22 Baletele kuli Yesu umuntu uwali impofu kabili talelelanda pantu alikwete ifibanda. Nao Yesu aundepe umuntu ayamba ukumona nokulanda.

21 Kabili Yesu afumine kulya nokuya kufitungu fya Tare na Sidoni. 22 Namayo waku Kenani uwaleikala muli ilya nkende aisile alebilisya ukuti, "We Mfumu, Mwana Davidi mbelela uluse! Umwana wandi umwanakasi alekyusiwa nekibanda."

23 Lelo Yesu tamwaswikepo isiwi nangu limo. Kabili abasambi baisile kuli Yesu no kumupapata ukuti, "Mwebeni aleya! Aletupangilafye ifyongo!"

24 Yesu ayaswike ukuti, "Natumwafye kumpaanga isyaluba isya muŋanda yakwa Israeli."

25 Lelo namayo apalamine mupepi, afukama pansi nokumupapata ukuti, "Ngafwilisyeni mwe Mfumu!"

26 Yesu ayaswike ukuti, "Tekintu ikyayana ukupiita umukate wabana ukuposela imbwa."

27 Nao ayaswike ukuti, "Kisinka mwe Mfumu, lelo nembwa sine silalya ubufungau bupona kwitebulo lyakwa wisikulu."

28 Yesu epakumwasuka ukuti, "Uli namayo wakitetekelo ikikalamba! Kintu wakilafwaya kyalakitwa kuli webo." Kabili pali ilya ine nsita, umwana wakwe alipolele.

14 Lintu babwelele kwibumba, umuntu aisilefukamina Yesu nokumweba ukuti, 15 "We Mfumu belela umwana wandi uluse! Pantu alapona ikifulubi kabili alakyula ububi. Ilingi alaponena mumensi na mumulilo. 16 Nakimuleta ku basambi bobe lelo tabakimundapa."

17 Yesu ayaswike ukuti, "Mwenkulo iisyasumina, kabili iyaumalala imitima! Busye nkekala namwebo ukufika lisa? Busye nkasipikisya ukwikala namwebo ukufika lisa? Leteni akalumendo kuli nebo!" 18 Yesu akalipile ikibanda, nakyo kyafumine mukalumendo napali kalya kene kasita kapola.