Milagres de Jesus

Os Evangelhos registram dezenas de milagres realizados por Jesus — curas, ressurreições, domínio sobre a natureza e libertações. Cada milagre revelava sua divindade e compaixão.

Curas de cegos e surdos

Jesus devolveu a visão aos cegos e a audição aos surdos, manifestando seu poder sobre toda enfermidade e deficiência.

Ana Jisos limi awakamahr, ane abal, bo nyehn

27 Jisos kehm tahme edi jio, jo jen asongo. Awakamahr ane abal kehm-e kehme eltoono, fere jo rabe re, "Mmon no Devid, nong, wahr lub fil-a ndon!"

28 Eji Jisos yele go ekpꞌkpa, awakamahr ane bao kehm ba kpir-e. Owo Jisos kehm bahbe bo re, "Anv, ń kpꞌtaame re m bahke ma lim ejum ana jiaa?"

Owo bo kehm taame re, "Ee nsoo."

29 Jisos kehm kooro bo go amahr, kehm bungu re, "Nong, jol ana ḿ ma taame."

30 Amahr ebo kehm soro lennge.

Jisos kehm bungu a bo tꞌtahne re, "Kana tiki tong nnene!"

31 Bo kehm tahme, song tooro tong ejahbe jio kpee ji Jisos ma lim.

Mateus 9:27-31

Ana Jisos limi awakamahr abal, bo nyehn

29 Eji bo jo tahm go Jeriko asongo, ellong ane gbalee kehm tahme toono Jisos.

30 Awakamahr na abal ji o nkpe a mbang. Eji bo wuku re, Jisos kpꞌbake elsehnge, bo kehm kehme elrabe re, "Mmon no Devid, nong, wahr fil-a ndon!"

31 Ellong ane bao kehm sahde bo re bo rahke ewok. Bo jo kpe nyennge na rabe re, "Mmon no Devid, nong, wahr fil-a ndon, nsoo!"

32 Jisos kehm yiimi, lung bo re bo ba. Á kehm bahbe bo re, "Ń kpꞌsebe re me n lim jen ka-n?"

33 Owo bo kehm-e faange re, "Nsoo, lub lenng-r amahr enyahre!"

34 Owo Jisos ndon kehm-e fili. Á kehm song kooro bo abo go amahr, bo kehm soro nyehn tvtv, soro tahm toon-e.

Mateus 20:29-34

Ana Jisos lim nwakamahr, á nob go Betsaida

22 Jisos, a abatꞌtoono ebe je go Betsaida. Ane bako kehm koko nwakamahr je goji Jisos, song gboong-e re, á lub koor-e.

23 Jisos kehm jabbe nwakamahr nyio go ebo, lohng a ne tahm go esi mbang. Á so atel, kak nne noo go amahr, kehm-e kooro abo go amahr, kehm-e bahbe re, "Anv, a bahke ma nyehn ejuma?"

24 Nne noo kehm lennge amahr enye, kehm bungu re, "N kpꞌnyehne ane. Bo li na li, are nti nyi kpꞌjene yannge."

25 Jisos kehm-e kpe kooro abo go amahr. Ngare nyio nne noo kehm gohro lennge amahr enye, amahr enye kehm feere ana wuku wuku. Á kehm nyehne ejum ajehng ajehng saang.

26 Jisos kehm-e tumu re, á song kehnge, fere tong-e re, á kꞌsehng mbang ejahbe jio ji bo kpꞌna lohngo abake.

Marcos 8:22-26

Ana Jisos limi nlakatung wuk

31 Jisos kehm sehnge go Taya asongo, song rehng go Saidon, fere song rehng go Dekapolis, tete song rehng go eto ji Galili.

32 Ane kehm koko nlakatung nyi ki jo ma bung nob nob, ba a ne goji Jisos, fere gboongo Jisos re, á lub kun-e ebo.

33 Jisos kehm-e koko, lohng a ne go ellong ane bao, kehm-e lohko anyohkebo go atung, fere so atel wohngo go ebnyohkobo abehng, ko song behd-e go ebliki. 34 Jisos kehm kpiidi amahr enye go elbung, tub eromo, kehm bungu tong nne noo re, "Efata," ji lohngo re, "Lennge!"

35 Tvtv o atung nne noo soro lennge, ebliki soro tahm. Á kehme elbungu nob nob. 36 Jisos kehm bungu tong bo re, bo kꞌtooro tong ane. Jol eji á rehke rehke bo o, ano wo fvfo bo tob tooro kpee.

37 Nne awohng awohng no wuku no, jo kpo-e esi area. Bo re, "Yeblim ejum ajehng ajehng ebnob go nseenga nseenge, ye jio ji kpo lim alakatung, bo wuk, fere lim akamme, bo bung."

Marcos 7:31-37

Ana Jisos limi Batimos, á nyehn

46 Bo kehm bake go Jeriko. Eji Jisos lohngo no, a abatꞌtoono ebe, a ellong ane ba jo toon-e, nwakamahr a nne no bo jo lung-e re Batimos ji mmon a Timeus ji nkpe a mbang ona, jo gboongo ane nsol. 47 Á wuku kan a re Jisos ji Nasaret wo, á kehm kehme elrabe re, "Jisos ji mmon a Devid, me n lub fil-a ndon!"

48 Ane gbalee kehm-e kehme elnyame re, á rahke ewok.

Jol á jo kpe rabe na wahre wahre re, "Mmon a Devid, me n lub fil-a ndon!"

49 Jisos kehm yiimi, kehm bungu re, "Lungen ye tv-m!"

Bo kehm lungu nwakamahr nyio re á ba. Bo kehm-e tongo re, "Bob eltim, wo tahm ba, á kp-a lungu." 50 Á kehm tahnge mbomo eme tub, mehl karab yiimi, kehm jeke goji Jisos.

51 Jisos kehm-e bahbe re, "A kpꞌsebe re me n lim jen ka-a?" Nwakamahr nyio kehm bungu re, "Ntꞌtibi, n kpꞌsebe re me n lub nyehn!"

52 Jisos kehm-e tongo re, "Song, eltaame ena ni ma wahng ka, a ma nyehn."

Tvtv o á kehm soro nyehn, tahm toono Jisos mbang mbang asongo.

Marcos 10:46-52

Ana Jisos limi nwakamahr, á nyehn

35 Jisos kehm jene song kabbe go Jeriko. Nwakamahr anyehng ji o nkpe a mbang, jo gboongo nsol. 36 Eji á wuku ellong ane kpꞌsehnge, á kehm bahbe re, "Nenan ana?"

37 Bo kehm-e tongo re, "Jisos ji Nasaret wo kpꞌsehnge."

38 Owo á kehm soro rabe re, "Jisos mmon no Devid, nong, me n lub fil-a ndon!"

39 Ane ba jolo esꞌsong kehm-e nyame re á rahke ewok. Á kehm kpe tuungu na, rabe wahre wahre re, "Mmon no Devid, nong, me n fil-a ndon!"

40 Jisos kehm yiimi, kehm tongo bo re, bo ko-e ba. Eji á ba rehng kabbe Jisos, owo Jisos kehm-e bahbe re, 41 "Anv, a kpꞌsebe re me n lim jen ka-a?"

Á kehm faange re, "Nsoo, n kpꞌsebe re me n lub nyehn."

42 Owo Jisos kehm-e tongo re, "Fere jo nyehn anv! Eltaame ena ebwahng, wobnob."

43 Tvtv ona á kehm soro nyehn, fere tahm toon-e, jo ka Esowo ellub.

Eji ane bako kpee nyehne ano, bo kehm kehme Esowo tehk.

Lucas 18:35-43

Ana Jisos limi nwakamahr, á nyehn

1 Eji Jisos jo sehng go mbang, á kehm nyehne nne no bo jel-e nwakamahr.

2 Abatꞌtoono ebe kehm-e bahbe re, "Ntꞌtibi, ye wo limi abiafema, afi nde abola nnyehn ba limi abiafem, ji wahng ka bo kehm-e jele ano?"

3 Jisos kehm faange bo re "Lohngem re abiafem nya nne noa nya, jol nya nde, a nnyehn sang. Jia li, eji ane lꞌnyehn nkpokosi nyi Esowo bahke limi go ege elkpin. 4 E bahke tiki jo lim eltum ni nne no tum-m no, eji njul kpeke li. Tibre atv bahke behde, ma nnene lꞌkꞌkpe ma lim eltum. 5 Me wo li ellennge ni njini, eji n kpeke li go njini."

6 Á bungu kan ano me, á kehm soro so atel wohngo ndi, nyob ndi, roongo nne noo go amahr, 7 kehm-e tongo re, "Song, wo song ru esamahr eba go eto ji Siloam!" (ji lohngo re "eltumu").

Nwakamahr nyio kehm soro tahm, song ru esamahr ebe, soro nyehn, kehm feere ba.

João 9:1-7

Curas de paralíticos e enfermos

Paralíticos caminharam, leprosos ficaram limpos e todo tipo de doença foi curada pelo toque e pela palavra de Jesus.

2 Nne abili kehm lohngo ba go ege, kehm ba jamm-e alahng, kehm bungu re, "Nsoo, lꞌkor-a, a li-m ma lim, n nob."

3 Jisos kehm tanne ebo ebe, koor-e, kehm bungu re, "Kor-m kor, wobnob!" Tvtv ona á kehm soro nob abili enye.

4 Owo Jisos kehm-e tongo re, "Ka tiki tong nne awohng awohng, wobwuka? Song goji nlimajom, wo song tib-e elna, fere lim njom nyi Moses tibi no, eji lꞌjol ejum ntianse ka ane."

Mateus 8:2-4

2 Ane bandiki kehm koko mbanne nyi noongo go edilnong ba a ne go ege. Eji Jisos nyehne eltaame ebo, á kehm tongo mbanne nyio re, "Mmon ewame, bob eltim! Abiafem enya, me n tahm ka-a."

3 Owo atꞌtibi ba atahm bandiki kehm kehme elbungu atemtem re, "Nne noa kpꞌsuku Esowo, eji á ma rod elne bum ana Esowo."

4 Jisos kꞌkahn ntir atahng ebo, owo á kehm bungu re, "Jen ji wahnge ń kpꞌtiri elkohn abi nsol ana nyao go egahna ntim? 5 Anv, jen ji ga riidi, n lꞌtong-e re, ‘Abiafem enya me n tahm ka-a,’ afi n lꞌtong-e re, ‘Tahm, wo jen!’? 6 M bahk-n tibi re, Mmon no nne kpi nsahm go njini nyia nyi á bahke ma tahm ka nne go ege abiafem."

Owo á kehm tongo mbanne nyio re, "Mehl, wo rod edilnong eja, song kehnge!"

7 Nne noo kehm mehle yiimi, tahm eje kehnge.

Mateus 9:2-7

10 Nne jolo o, no ebo ebe lohngo no. Bo kehm bahbe Jisos re, "Anv, nꞌnob re nne lim ane, bo nob ayam ebo efung Esabata?" Tibre bo jo sebe ejum ji bo bahke koko ka Jisos ebi.

11 Owo Jisos kehm tongo bo re, "Anv, nne awohng ewahne lꞌbel njoro, njoro nyio lꞌfere gbo yel go elbing efung Esabat, á nehm song yehk-ea? 12 Anv, nne sang ga gbal sehnge njora? Ano wo wahng ka atahm enyahre bungu re, nne jo lim nnoobo efung Esabat."

13 Owo á kehm tongo nne noo re, "Tanne ebo eba!" Á kehm tanne ebo, ebo fere feere ana wuku wuku, nob kpee ana ebo behko.

Mateus 12:10-13

30 Saimon, nnyehn nkal ewe noongo edilnong, jo yam arumbum. Jisos rehnge kan a me, bo kehm-e tongo bada nnenkal noo. 31 Á kehm jeere kohl-e, song jabb-e go ebo, tab-e yiimi. Á soro nob arumbum nyao. Nnenkal noo kehm tahme fvfo, kehme bo loko.

Marcos 1:30,31

Ana Jisos limi nne abili, á nob

40 Efung abehng nne abili kehm bake goji Jisos, ba gbo jamm-e alahng, kehm-e gboongo re, "Lꞌfere kor-a, lim-m, me n nob."

41 Jisos, ndon kehm-e fili. Á kehm tanne ebo, koor-e, kehm-e tongo re, "Kor-m kor, wobnob."

42 Tvtv o nnenlum noo kehm soro nob abili nyao.

Marcos 1:40-42

3 Ellong ane bako kehm kpe ba. Ane ani woomo go bo ellong o, ba solo mbanne, jo ba a ne goji Jisos. 4 Bo kahnem mbang nyi bo bahke sehnge a ne rehng goji Jisos, tibre ane ruru sehng. Bo kehm lahme elbultahk, kanne alehke go edilnong, kehm kehme eltahre, tete nne eyam noo song rehng edi ji Jisos jehk no.

5 Eji Jisos nyehne ana bo taame no tv-e, á kehm bungu tong mbanne nyio re, "Abiafem enya, me n tahm ka-a."

6 Atꞌtibi ba atahm bandiki ba ji o, kehm kehme eltiri go bo a ntim re, 7 "Jen ji wahnge á ma daange Esowo, fere bung elkohn ellum ana nia? Nne awo bahke ma tahm ka nne go ege abiafem? Esowo ntahngtahng bi bahke ma tahm ka nne go ege abiafem."

8 Tvtv o Jisos kehm soro kahn ntir atahng abo, kehm bahbe bo re, "Jen ji wahnge ń tiri ntir ana nyia? 9 Jen ji ga riidi, n lꞌtong mbanne nyio re, ‘Abiafem enya, me n tahm ka-a,’ afi n lꞌtong-e re, ‘Mehl, wo rod edilnong eja, tahm jen?’ 10 M bahke lennge fvfo tib-n re, Mmon no nne kpi nsahm go njini nyia, nyi á bahke ma tahm ka nne go ege abiafem."

11 Owo wahnge Jisos kehm tongo mbanne nyio re, "Mehl, wo rod edilnong eja, song kehnge!"

12 Bo kehm kehme elseenge. Nne eyam noo soro mehl tvtv, rod edilnong eje tahm.

Kehm kpoko bo esi, bo ane kpee. Bo kehme Esowo tehk re, "Elkohn ana nia, e ka nyehn a nyehn!"

Marcos 2:3-12

Nne no ebo ebe lohngo no

1 Jisos kehm kpe feere go etahk ero. Nne jolo o, no ebo ebe lohngo no. 2 Ane ba jolo o jo kpuru Jisos, joare á bahke limi nne noo, á nob efung Esabat. Tibre bo jo sebe ejum ji bo bahke kake Jisos ebi.

3 Jisos kehm bungu tong nne no ebo ebe ma lohng re, "Mehl, wo jeere ba!" 4 Jisos kehm bahbe ane bako re, "Ejum aji atahm enyahre bungu re nne jo lim efung Esabat? Á jo kak nne eboa, afi á jo rannge na? Á tahre elkpin nnea, afi á rannge elkpin nne?"

Jol ejumjum bo we faangem.

5 Jisos, atahng kehm-e rake, eji á mehle no jang. Ndon kehm-e fere fili bada bo. Tibre bo bele etahnsi. Á kehm tongo nne noo re, "Tanne ebo eba!"

Á kehm tanne ebo ebe, lohko nob tvtv.

Marcos 3:1-5

Ana Jisos limi nne abili, á nob

12 Efung abehng eji Jisos jolo ejahbe ajehng, nne jolo ona, no abili saab-e na saabe go ngubjing. Á nyehne kan Jisos, á kehm gboko, kohk esamahr ebe go ndi, fere jo gboong-e re, "Ntul, lꞌfere kor-a, a li-m ma lim, n nob."

13 Jisos kehm soro tanne ebo ebe, koor-e, kehm bungu re, "Kor-m kor. Wobnob!" Tvtv o á kehm soro nob abili nyao.

Lucas 5:12,13

18 Ane kehm koko mbanne ba a ne, nyi bo sol-e go edilnong. Bo jo gare re bo yel a ne go ekpꞌkpa, song bum-e go alata Jisos. 19 Bo tingem mbang anyehng anyehng nyi bo bahke sehnge a ne tib ellong ane bao. Owo bo kehm wahre a ne go ero etahk, kehm song lahm elbulu, kehm tahre alehke nya bo kanne go edilnong jio tete ba rehng go elka ane bao, edi ji Jisos jolo no.

20 Eji Jisos nyehne ana bo ma taame tv-e, owo á kehm bungu re, "Mbi, abiafem enya, me n tahm ka-a."

21 Atꞌtibi ba atahm, a Bab Farisi kehm kehme elbungu atemtem re, "Anv, ye elkohn nne awo, no kpꞌbungu abꞌbi alum ana nyaa tob Esowo? Nne awo bahke ma tahm ka nne go ege abiafem? Esowo ntahngtahng bi bahke ma tahm ka nne go ege abiafem!"

22 Eji Jisos ma seb kahn ana bo jo tir, owo á kehm faange bo re, "Elkohn ntir anyi ń kpꞌtiri go egahna ntim? 23 Jen ji ga riidi, n lꞌtong nne noa re, ‘Abiafem enya me n tahm ka-a,’ afi n lꞌtong-e re, ‘Mehl yiimi, wo jen?’ 24 M bahk-n tibi re, Mmon no nne kpi nsahm go njini nyia, nyi á bahke ma tahm ka nne go ege abiafem." Owo á kehm tongo mbanne nyio re, "N kp-a tongo re, wo tahm, rod edilnong eja, song kehnge!"

25 Tvtv o nne noo kehm soro mehl yiimi go esamahr ane bao, rod edilnong ji á noongo no, tahm eje kehnge, jo tehk Esowo asongo.

Lucas 5:18-25

Nne no ebo ebe lohngo no

6 Efung Esabat bi Jisos kpe je go etahk ero song tib, nne awohng jolo o, no eboblum ebe lohngo no.

7 Atꞌtibi ba atahm, a Bab Farisi, bo jo baab-e, joare á bahke limi nne awohng awohng, á nob efung Esabat.

8 Jisos kꞌkahn ntir atahng ebo, owo á kehm tongo nne no ebo ebe lohngo no re, "Ba, wo ba yiimi ana!"

Nne noo kehm mehle yiimi, jen song yiimi ona.

9 Owo Jisos kehm tongo bo re, "N kp-n bahbe re, Anv, ntahm enyahre bungu re wahr jo lim jen efung Esabat, wahr jo kak na nne ebo, afi wahr jo rannge na? Wahr jo tahre elkpin nne, afi wahr jo rannge elkpin nne?"

10 Eji á ma seenge bo, song jahm, owo á kehm tongo nne noo re, "Tanne ebo eba!" Á kehm limi ano. Ebo ebe kehm feere jol ana behko jang jang.

Lucas 6:6-10

Ana Jisos limi nlokeltum a nne a Rom, á nob

1 Eji Jisos ma bung nsol nyia kpee mal, tong ane bao, á kehm tahme go Kapenium.

2 Ntubesi a nsoja awohng jolo o, no bele nlokeltum no jo sahb kor-e kor. Nlokeltum ewe noo jo yame, are á bahke kpoko. 3 Eji ntubesi a nsoja noo wuku bada Jisos, á kehm tumu anebkul Jus bandiki re bo song gboong-e, á ba lim nlokeltum ewe nob.

4 Eji bo ba rehng goji Jisos, bo kehm sahb gboong-e gboongo re, "Ntubesi noo, fꞌfuumu re wo kak-e ebo. 5 Tibre ejahbe ejahre kpo kor-e sehng. Yebsi etahk ero ka-r."

6 Owo Jisos kehm tahme toono bo. Eji á ma kabbe etahk jio, ntubesi a nsoja noo kehm tumu ate ebe tv-e.

Bo kehm-e song tong re, "Ntubesi re, wo kꞌkpe gbiingi elna mbol mbol, are ye fuumem re wo song yel ege ekpꞌkpa. 7 Jol á fuumem re á ba go ega. Are, wo lub bung ellum ellum, nlokeltum ewe bahke nobo. 8 Ntubesi re, á li nne no wob go elwo nne. Á tob kpi nsoja nyi tob wob-e go elwo. Á lꞌtong nne noko re, ‘Song!’ Tahm. Á lꞌtong nne noka re, ‘Ba!’ Á ba. Á lꞌtong nlokeltum ewe re, ‘Lim ejum jia!’ Á lim na lim."

9 Jisos, esi kehm-e kpoko, eji á wuku ano. Á kehm keebe, kehm bungu tong ellong ane ba jo toon-e re, "N kp-n tongo re, Jol go Israel n ka tiki nyehn nne no kpi elkohn egburu eltaame ana nia."

10 Eji ane ba ntubesi a nsoja noo tumu bo feere no, ba rehng ege etahk, bo ba nyehne nlokeltum noo ma lohko nob.

Lucas 7:1-10

11 Nnenkal awohng jolo o, no bele ebi etohko ji bum-e eyam, bi ma kang elku a nnya era. Nnenkal noo fehde na fehd, á joom kpe ma tanne etannetanne.

12 Eji Jisos nyehn-e no, á kehm-e lungu tv elne, kehm-e tongo re, "Nnenkal, ngubjing enya ebfannge!" 13 Jisos kehm-e kunu abo, nnenkal noo soro tanne tvtv, fere jo tehk Esowo.

Lucas 13:11-13

Ana Jisos limi nne eyam, á nob

1 Efung Esabat abehng Jisos kehm tahme song li nsol go etahk ntubesi a nne a Farisi awohng. Owo bo jo baab-e.

2 Nne awohng no gbo eyam ebyeenge kehm bake goji Jisos.

3 Owo Jisos kehm bahbe atꞌtibi ba atahm, a Bab Farisi re, "Anv, ntahm enyahre tꞌtaame re nne jo lim ane, bo nob efung Esabata, afi?"

4 Bo kehm belle.

Owo Jisos kehm rodo nne eyam noo, lim-e, á nob, fere yak-e, á song.

Lucas 14:1-4

Ana Jisos limi aneb abili na awubu, bo nob

11 Eji Jisos je go Jeusalem, á sehnge go Samaria, a Galili.

12 Eji á rehnge go ejahbe ajehng, aneb abili na awubu kehm ba wan-e. Bo yiimi go fee, 13 kehm rabe re, "Jisos nso ejahre, nong, wahr fil-a ndon!"

14 Eji Jisos nyehne bo, á kehm tongo bo re, "Songen, wahn song kpiri abalimajom, fere tib bo elnahne."

Eji bo jo jen asongo, bo kehme elnobo.

15 Nne awohng go bo ellong, eji á nyehne re yeblohko nob, á kehm feere abake, jo tehk Esowo wahre wahre, 16 kehm ba gbo go alata nya Jisos, kehm-e kake saam. Nne noo jolo nne a Samaria.

17 Owo Jisos kehm bungu re, "Anv, ane awubu sang nobo noa? Ane asehmwubu bako bana? 18 Nnene feerem ba re á ba tehk Esowoa, sehngem njenne nyia nyi nyi feere noa?"

19 Owo á kehm-e tongo re, "Mehl, wo song, eltaame ena eblim, wobnob."

Lucas 17:11-19

Nne no nobo no go Betsata

1 Eji nsol nyio ma sehng kpee, owo Jisos kehm tahme go Jeusalem. Tibre ngare nyio jolo ngare elkak ni Jus. 2 Go Jeusalem, go eti mbu jio ji bo jo lung re, Eti Mbu Ejoro, owo eto jolo no, ji bo si nkpatahk elon sennge kak. Eto jio bo jo lungu go alum Hibru re Betsata. 3 Ona wo ellong ane gbalee noongo no, jo yam, awakamahr, abanne, a aneb ayam bandiki. (Bo jo baabe re alahb gbehke. 4 Tibre ngare nyimongo enjel nyi Jehova jo ba yel alahb mao, jo gbehke alahb. Nne eyam awohng awohng no lꞌfere gbo mbang song yel go alahb, eji kpꞌgbehke, ye wo bahke nobo eyam ebe, afi á bele elkohn eyam abehng abehng.)

5 Nne awohng jolo noa, no eyam ebe ma kang eltahl a nnya elku a nnya era. 6 Eji Jisos nyehn-e no, fere kahn re, yebnoongo ona edi jio ekidi eblab, á kehm-e bahbe re, "Anv, a kpꞌsebe re wo noba?"

7 Nne eyam noo kehm-e faange re, "Ee nsoo, wo, nnene n kpimm, no bahk-m rodo kak go eto jia, eji alahb ma kehme elgbehke. N lꞌtahm re me n song yel, nne noko go tohko gbo mbang ka-m."

8 Jisos kehm-e tongo re, "Tahm, wo rod ekpa eja, jen song!"

9 Tvtv ona nne noa kehm soro nob eyam ebe, kehm rodo ekpa eje, kehme eljene.

Efung bio jolo efung Esabat.

João 5:1-9

46 Á kehm feere tahm go Kena ji Galili, ejahbe jio ji á ko alahb lim, siingi amahm. Ntubesi ejahbe awohng jolo go Kapenium, no mmon ewe jo yam. 47 Á wuku kan re, Jisos eblohng go Judea ba go Galili, á kehm bake goji Jisos, ba gboong-e re, á je go Kapenium, song lim mmon ewe, á nob. Tibre mmon ewe nong go emel elkv.

48 Owo Jisos kehm-e tongo re, "Tohko tiki jol re, ń nyehne akpokosi, ń kpehme tiki taame."

49 Ntubesi ejahbe noo kehm-e tongo re, "Nsoo, ba wahr tahm, mmon ewame yahke kpo."

50 Jisos kehm-e faange re, "Song, mmon ewa bahke kpini!" Nne noo kehm soro taame tv alum nya Jisos bungu no tong-e, kehm soro tahm eje.

51 Eji á jo kehnge, alokeltum ebe kehm ba wan-e go mbang, kehm-e tongo re, "Mmon ewa kpeke li go elkpin."

52 Á kehm bahbe bo ngare nyi mmon ewe kehme elnobo. Bo kehm-e tongo re, "Nyaane ngare efin nkaranka anyehng, owo á nobo arumbum nyao."

53 Nde mmon kehm soro buumu tvtv re, ngare nyio nyi Jisos tong-e re, "Mmon ewa bahke kpini." Yefono antahng kehm taame tv-e, a ane ba lene go ege a nlaaga kpee.

54 Etoono nkpokosi nyi a, nyi Jisos kpe lim ngare nyio nyi á lohngo go Judea, feere go Galili.

João 4:46-54

A mulher com fluxo de sangue

Uma mulher que sofria há doze anos tocou a orla do manto de Jesus e foi curada instantaneamente pela sua fé.

20 Mmonankal awohng no alung sa-e go nnahb ewubu a nnya ebal, kehm kehme Jisos toono go njahm, kehm kooro esꞌsili nsubu enye. 21 Tibre á bungu go ege eltim re, "N lꞌlub kooro nsubu enye nyi nyi, m bahke nobo."

22 Jisos kehm keebe, nyehn-e, kehm-e tongo re, "Mmon ewame, bob eltim! Eltaame ena ni ma-a lim, a ma nob." Ngare nyꞌnehm ona nyi nnenkal noo kehm soro nob.

Mateus 9:20-22

25 Nnenkal awohng jolo o, no alung sa-e nnahb ewubu a nnya ebal. 26 Á jo nyehne erem sehng, eji abalimakahm tvv jo lim-e akahm. Á rannge akpohko enye kpee re á nob eyam bio, eyam jo kpe-e nyede na. 27 Á wuku bada Jisos. Owo á kehm jene a ellong ane ba jo toono Jisos go njahm, ba kooro nsubu enye. 28 Tibre nnenkal noo bungu go ege eltim re, "N lꞌlub koor-e na kooro go ege a nsubu, m bahke nobo." 29 Á kehm soro kooro nsubu enye. Alung eme soro mal. Á kehm soro kahn tvtv re, yeblohko nob eyam ebe.

Marcos 5:25-29

43 Nnenkal awohng jolo o, no alung jo lohng-e go nnahb go ewubu a nnya ebal. Á rannge akpohko nya á bele no kpee, ka abalimakahm. Jol nnene we tikem ma lim, á nob. 44 Owo á kehm jeere kohlo Jisos go njahm, fere koor-e go ege esꞌsili nsubu. Tvtv o, alung eme kehm soro kimi.

45 Jisos kehm bahbe re, "Nne awo ma-m kooro a?"

Eji ane kpee ma ten, Pita kehm bungu re, "Nsoo, ellong ane ni kpꞌjene a na, ni ni kp-a sehme."

46 Owo Jisos kehm kpe bung re, "Nne ma-m kooro. Tibre me n kahn re, nsahm ma-m tele lohng."

47 Eji nnenkal noo sebe kahn re, á nehm ma biiri, á kehm lohngo kpꞌkahme abake, ba gbo jamm-e alahng, kehm tooro go esamahr ane kpee, ana ji wahnge á koor-e no, fere tong ana á soro nob ngare nyꞌnehm o.

48 Owo Jisos kehm bungu re, "Mmon ewame, eltaame ena ni ma-a lim, a ma nob. Song go eyebatahng!"

Lucas 8:43-48

Ressurreições

Jesus ressuscitou mortos — a filha de Jairo, o filho da viúva de Naim e Lázaro. Ele é Senhor sobre a morte.

Mmon a ntubesi, a nnenkal no kooro Jisos go ege a nsubu

18 Eji Jisos jo bung nsol nyia tong bo, owo ntubesi a Jus awohng kehm lohngo ba, ba jamm-e alahng, kehm bungu re, "Mmon ewame kpꞌna kpoko. Ba wahr tahm, wo ba koor-e ebo, eji á lꞌfere bel elkpin."

19 Jisos kehm tahme toon-e, a abatꞌtoono ebe fvfo.

Mateus 9:18,19

23 Owo Jisos kehm ba rehng go etahk ntubesi noo, ba nyehn aneb ase, a ane ba ba elkv, bo kpꞌkubu ase, jo lim ewok. 24 Á kehm tongo bo re, "Tahmen, tibre mmon noa ka kpo, á kpꞌlale na."

Owo bo kehm-e elwolo.

25 Bo kame kan ane bao yehke me, Jisos kehm yele ekpꞌkpa song jabbe mmonse nkal noo go ebo, á kehm mehle ji.

Mateus 9:23-25

22 Ntubesi awohng go ellong atubesi ba etahk ero, no bo jo lung-e re Jairus kehm bake. Á nyehne kan Jisos, á kehm gboko jamm-e alahng go alata, 23 kehm-e gboongo gbalee re, "Mmon ewame yahke kpo, titi, ba wo ba kun-e ebo go esi, eji á lꞌnob, fere bel elkpin."

24 Jisos kehm soro tahm toono Jairus. Ellong ane tvv jo tob toono bo go njahm. Bo jo gbulu na gbul atemtem mbang mbang.

Marcos 5:22-24

38 Bo kehm soro rehng etahk ntubesi noo. Jisos kehm nyehne egom jehko ji kpꞌlingi, fere nyehn bako ba kpꞌkake agohrobi, fere jo jokko na jokko edi. 39 Á kehm maade yel go ekpꞌkpa, song tong bo re, "Jen ji wahnge ń kpꞌlimi ana? Jen ji wahnge ń kpꞌlꞌling? Mmon noa ka kpo. Á kpꞌlale na."

40 Bo kehm-e kehme elwolo. Á kehm nyame bo re, bo lohng elatahk. Owo á kehm lungu nde mmon, fere lung nnyehn mmon, a abatꞌtoono ebe, ane ara ba toon-e no.

Bo kehm yele ekpꞌkpa jio ji mmon noo noongo no. 41 Jisos song jabbe mmon noo go ebo, kehm bungu tong-e re, "Talita kumi," ji lohngo re, "Mmon ewame, n tong-a re, wo mehl yiimi."

42 Á kehm soro mehl tvtv, soro kehme eljene yannge. Ngare nyi nkpokosi nyio limi no, yebkang ewubu a nnya ebal. Kpo bo esi area.

Marcos 5:38-42

31 "Anv, m bahke koko ane ba li anv gara jen? Bo li renan? 32 Bo li ana abonse ba ma lohng song ji go elatahkgur kpi mbene lim. Egom jindiki tong egom jehko re,

" ‘Wahr ebwor afiri ka-n,

ḿ bahnem.

Wahr ebling aling,

wahn tobem ling fvfo.’

33 Eji Jon ji nwohngalahb ba no, á joom li abred, fere jo wo amahm, ń jo tongo re, ‘Á kpi ebi etohko go ege atahng.’ 34 Wo anv, Mmon no nne ebba, kpꞌlehke, fere jo wꞌwo, ń fere jo bungu re, ‘Nyehnen nlehke ebno noa! Á li nwokamahm, a ntem no abakokatak, a ntem no aneb abꞌbi.’

35 "Nne lꞌkpur nsol nyi aneb elkahne kpo lim, owo á bahke tob kahn ana elkahne li no."

Ana Jisos jolo go etahk Saimon, nne a Farisi

36 Nne a Farisi awohng kehm tiingi Jisos re á song li nsol a ne. Jisos kehm jeke go etahk nne a Farisi noo, song ji go ekpꞌkuru nsol alehke. 37 Nnenkal awohng jolo ejahbe jio, no jolo nne abiafem. Eji á sebe kahn re Jisos noa, kpꞌlehke nsol go etahk nne a Farisi noo, owo á kehm koko elom akehng tahm a ji,

Lucas 7:31-37

41 Owo nne awohng kehm lohngo ba, no bo jo lung-e re Jairus ji jolo ntubesi etahk ero, ba gbo jamme Jisos alahng, fere gboong-e re, á lub je go ege etahk. 42 Tibre á bele mmon mmon awohng no nkal, no ma kang ewubu a nnya ebal. Á noongo go emel elkv.

Eji Jisos jo jen mbang mbang asongo, ellong ane jo fahd-e na fahd kak.

Lucas 8:41,42

49 Eji Jisos kpi mbungu mbungu, nne awohng kehm lohngo etahk ntubesi ero noo, ba tong-e re, "Mmon ewa ebkpo. Ka kpe gbiingi ntꞌtibi mbol mbol."

50 Eji Jisos wuku ano, owo á kehm-e faange re, "Ka kpe fahl, taame na taame! Á bahke nobo."

51 Eji á ba rehng etahk jio, á taamem re nnene kpe yel ekpꞌkpa, sehngem Pita, Jon, a Jems, go nde mmon, a nnyehn, bo ba, á taame no bo yel.

52 Nne awohng awohng jo ji ndon ndon, fere jo ling.

Owo Jisos kehm bungu re, "Kana kpe ling, mmon noa ka kpo, á kpꞌlale na."

53 Bo kehm-e elwolo, tibre bo jo kahne kpee re, mmon noo ebkpo. 54 Jisos kame kan ane bao yehke, á kehm jabbe mmon noo go ebo, kehm rabe re, "Mmon, mehl!"

55 Etohko mmon noo kehm soro feere ba yel-e, á soro mehl tvtv. Owo Jisos kehm tongo bo re, bo ka mmon noo nsol alehke, á li. 56 Nde, a nnyehn, kpo bo esi sehng. Owo Jisos kehm tongo bo re, bo kꞌtong nne awohng awohng ji ma lim.

Lucas 8:49-56

Ana Lasaros kpo no

1 Nne awohng jolo gona, no bo jo lung-e re Lasaros ji jo yam. Á lene go Betani, ejahbe ji Meri lene no, a Mata mmonannyehn. 2 Meri jio wo yaange akehng ma nno a nno wohngo Ntul a Jisos, fere ko alv esi enye dohk-e akpade. Ye wo, Lasaros mmonannyehn jo yam.

3 Abonanyehn Lasaros bao kehm tiingi etib tv Jisos re, "Ntul, ekpondahme eja ji kpo kor-a sꞌsehng kpꞌyame."

4 Eji Jisos wuku no, á kehm bungu re, "Eyam bio, eyam elkv sang, li re Esowo tib ellub ene, eji Mmon Esowo lꞌbel ellub."

5 Jisos, Mata jo kor-e sehng, a Meri mmonannyehn, go Lasaros. 6 Jisos wuku kan re, Lasaros kpꞌyame, á kpe kang nfung ebal edi jio ji á jolo no. 7 Owo á kehm tongo abatꞌtoono ebe re, "Ba, wahr feeren go Judea!"

8 Abatꞌtoono ebe kehm-e tongo re, "Ntꞌtibi, nyanjehle Jus jo sebe re bo tuub-a atal, anv ana, a kpꞌkpeke seb re wo kpe feere goa?"

9 Jisos kehm faange bo re, "Ewubu awa na abal sang li go efung kohro kohra? Nne awohng awohng no lꞌjen ngara njul, á kpehme seele. Tibre á kpꞌnyehne ellennge ni njini nyia. 10 Nne awohng awohng no lꞌjen go ejannge, á kpo sꞌseele. Tibre ellennge go ege atahng limm."

11 Ana wo Jisos bungu no, kehm kpe soro asi bung tong bo re, "Lasaros, nte ewahre kpꞌlale. N kpꞌtahme song nyahm-e."

12 Abatꞌtoono ebe kehm-e tongo re, "Ntul, lꞌjol re Lasaros kpꞌlale na, eyam ebe bahk-e tele."

13 Jisos bungu bade elkv ni Lasaros. Bo jo tiri re, Jisos bungu bade ellu nehka nehka ni nne kpo lal. 14 Owo Jisos kehm lennge tong bo re, "Lasaros ebkpo.

João 11:1-14

Domínio sobre a natureza

Jesus acalmou a tempestade, andou sobre as águas e multiplicou pães. A natureza obedece à voz do seu Criador.

Ana Jisos bungu tong nfeb, a ebuku

23 Jisos kehm yele go egbang, abatꞌtoono ebe tahm toon-e. 24 Owo egburu nfeb nyi nnen a nnen kehm ba kehme ellimi go eto jio, ebuku jo lim, bulu egbang. Ngare nyio Jisos jo lꞌlal. 25 Abatꞌtoono ebe kehm jeke go ege, song nyahm-e, kehm-e tongo re, "Nsoo, tahr-r, e kpꞌtane na a!"

26 Jisos kehm faange bo re, "Jen ji wahnge ń kpꞌfahle ana, wahn ji kpꞌkahn taame ntiil?" Owo á kehm mehle yiimi, kehm nyame nfeb, a ebuku. Edi kehm naange soom.

27 Owo kehm kpoko ane bao esi. Bo kehm bungu re, "Elkohn nne awo anae, no kpo bung tong nfeb, a ebuku, bo wuk-e?"

Mateus 8:23-27

15 Eji elgung ma ba, abatꞌtoono ebe kehm song kpir-e, kehm-e tongo re, "Tahm edi jia ana rehng go ajahbe, ekidi kpꞌlabe. Wo gana, ngare ebsehng. Nong, ane baa song gunu nsol alehke go abon ajahbe li me."

16 Owo Jisos kehm tongo bo re, "Bo sang bahke tahme song gunu nsol alehke li, wahn kaan bo nsol alehke, bo li."

17 Owo bo kehm-e faange re, "Nsol nyi e kpi a kpee li abon abred na alon, kumu abon nsahre abal."

18 Jisos kehm tongo bo re, "Koon nsol nyio ba ka-m wahn!" 19 Owo á kehm tongo ane bao re, bo ji go ajele. Á kehm rodo abon abred bao na alon, a abon nsahre na abal, kehm kpiidi amahr enye go elbung, kak Esowo saam, fere bakke abon abred bao, ka abatꞌtoono ebe. Abatꞌtoono ebe ko, song bak ellong ane bao.

20 Bo li ane kpee wohngo. Abatꞌtoono ebe kehm song taare bo erik ji sa no, ruru ewubu ejeere na ebbal. 21 Aneblum ba li nsol nyio jolo ejum ane atahltahl nkpel ewubbal ane atahl awubu (5,000). Jol anebkal, a abonse, bo fangem bo.

Mateus 14:15-21

25 Nkpese efungfu wo, Jisos jene ero alahb, song kpiri bo.

Mateus 14:25

Ana Jisos kpe le ellong ane nehko (4,000)

32 Jisos kehm lungu abatꞌtoono ebe tv elne, kehm tongo bo re, "Ane baa ma-m fili ndon. Tibre nfung era nyi a, nyi bo ma kang a name. Anv, bo kpeem kpi ejum alehke ajehng ajehng. N nehme seb re me n yake bo, bo song njal njal. Fundiki bo bahke gboko awo go mbang."

33 Owo abatꞌtoono Jisos kehm-e bahbe re, "Gan wo e bahke tingi nsol alehke elka emahng nia, kehm leke ellong ane ana nia?"

34 Owo Jisos kehm bahbe bo re, "Abon abred abik ń kpi no?"

Bo kehm-e faange re, "E kpi abon abred na asehma, kunu abon nsahre abik abik."

35 Jisos kehm tongo ellong ane bao re, bo ji go ndi. 36 Á kehm rodo abon abred bao na asehma, a nsahre nyio, kehm kake Esowo saam, bakke, ka abatꞌtoono ebe, abatꞌtoono ebe kehm koko, song bak ane. 37 Bo li ane kpee wohngo. Abatꞌtoono ebe kehm taare bo erik ji sa no, ruru ejeere na ebsehma. 38 Aneblum ba li nsol nyio jolo ane atahltahl nkpel ewubu (4,000). Jol anebkal, a abonse, bo fangem.

Mateus 15:32-38

Bade etak atahbe

24 Eji Jisos, a abatꞌtoono ebe ba rehng go Kapenium, ane ba kpo ko etak ji etahk Esowo kehm ba bahb Pita re, "Anv, ntꞌtibi ewahne kpehme tahb etak ji etahk Esowoa?"

25 Pita kehm faange re, "Ee."

Eji Pita yele ekpꞌkpa, owo Jisos kehm gboko mbang bahb-e re, "Saimon, anv, a kpo tir renan bade ejum jia? Atul ba njini nyia kpo ko atak goji abon ebo, afi bo kpo ko goji ane baka baka?"

26 Owo Pita kehm faange re, "Goji ane baka baka."

Jisos kehm bungu re, "Lꞌfere jol ano, lohngo re, abon, ntahm bo wobem. 27 Nong, wahr lim, eji lꞌkꞌsab bo. Song, wo song tub eblo go eto! Yehke ngbokambang a nnyam alahb nyi gbo eblo, wo lennge nnyo eme. Owo a bahke nyehne akpohko nya bahke biingi etak ejame, a jꞌja. Nyao nya a bahke koko, song ka bo."

Mateus 17:24-27

Ana Jisos nyehne amahr bade efig

18 Efungfu atv atv eji Jisos feere asongo go Jeusalem, njal kehm-e yame. 19 Á kehm nyehne eti ji bo kpo lung re efig go nkpe a mbang. Á jeere kan kohlo o me, á nyehnem nkab anyehng anyehng, sehngem anyane nya nya á nyehne no. Owo á kehm tongo eti jio re, "A nehm kpe tiki kab akab go njinanjini." Tvtv ona eti jio kehm soro kpo.

20 Eji abatꞌtoono ebe nyehne ano, kehm kpoko bo esi. Bo kehm bungu re, "Jen ji wahnge eti jia ma tahr kpꞌkpo elwaare elwaare anae?"

21 Owo Jisos kehm faange bo re, "Etingitingi, n kp-n tongo re, Ń lꞌtaame, kꞌjo faabe, ḿ bahke jo lim ana m ma lim eti jia, jol sꞌsehnge na ana. Ń li ma tong ewong jia re, ‘Mehl, song yel aya!’ Bahke lohko lim ano. 22 Ejum ajehng ajehng ji ń lꞌbahb go egahne ero bi ń kpꞌkake, ń lꞌtaame, ḿ bahke bele."

Mateus 21:18-22

37 Nfeb nyi kpꞌtahne kehm bake. Ebuku kehm kehme ellimi. Alahb kehm jo kim, yel egbang, ba elruru.

38 Jisos noongo go nnahb egbang jo lal. Á kunu esi go etisi. Abatꞌtoono ebe kehm-e nyahme re, "Ntꞌtibi, wa nehme luba, wahr ga yahke tano?!"

39 Jisos kehm mehle yiimi, kehm bungu tꞌtahne, tong nfeb re, "Rahke!" Á kehm fere tong ebuku re, "Goomo!" Nfeb nyio kehm rahke. Edi kehm naange soom.

40 Jisos kehm fere bung tong abatꞌtoono ebe re, "Jen ji ń kpꞌfahle ana? Jen ji wahng ka ń kil-m elbumu go etingitingi?"

41 Tibre bo fahle sehng. Bo kehm kehme elbungu atemtem re, "Anv, elkohn nne awo anae, no kpo bung tong nfeb, a ebuku, wuk-e?"

Marcos 4:37-41

35 Eji atv yahke behde, abatꞌtoono ebe kehm bake, ba bung tong-e re, "Tahm edi jia ana rehng go ajahbe, ekidi kpꞌlabe, gana, atv yahke behde. 36 Tum bo, bo song go abon ajahbe ba li a kpidi kpidi, song gunu nsol alehke."

37 Jisos kehm faange re, "Wahn kaan bo nsol alehke, bo li!" Bo kehm-e bahbe re, "A kpꞌsebe re, wahr song gunu nsol go mpon atahl alon, ba le boa?"

38 Jisos kehm bahbe bo re, "Ebred ebbik ń kpi no? Song kpuren!" Eji bo ma song kpur, bo kehm bake, ba tong-e re, "Ebred eblon, kunu abon nsahre abal."

39 Jisos kehm tongo ane bao re, bo ji agꞌgabe agꞌgabe go ajele nya kpꞌna kohdo. 40 Bo kehm jehke. Nlong nyindiki jo jolo ane atahl alon alon. Nlong nyindiki jo jolo ane atahl abal ane awubu, ane atahl abal ane awubu. 41 Jisos kehm rodo ebred eblon bio, a abon nsahre abal, seenge go elbung, kak Esowo saam, kehm bakke abred nyao, ka abatꞌtoono ebe re bo ko song bak bo. Fvfo, á kehm kpe bakke abon nsahre bao na abal, bo tob song bak bo kpee. 42 Bo kpee li wohngo.

43 Abatꞌtoono ebe kehm taare erik abred nyao, a nsahre, kak ajeere, ruru ewubu ejeere ebbal. 44 Aneblum ba li abred nyao jolo ane atahltahl nkpel ewubbal ane atahl awubu (5,000). Anebkal, a abonse, bo fangem bo.

Marcos 6:35-44

48 Jisos kehm nyehne re, abatꞌtoono ebe ebbel nfem go egbang, nyi jo lim bo re, bo kꞌma kpe fing egbang. Tibre nfeb jo gbulu bo, feere njahm njahm. Eji ma rehng ejum nkaranka eni nyi efungfu, Jisos kehm kehme eljene go ero alahb asongo goji bo. Á jo jene, are á yahke sehng bo. 49 Bo kehm-e nyehne, á kpꞌjene go ero alahb. Bo tiri re, etohko ji. Bo kehm kehme elrabe.

50 Eji bo kpee nyehn-e no, bo kehm kehme elfahle. Jisos kehm soro tong bo re, "Me wo, kana kpe fahl! Boben eltim!"

51 Á kehm ba yel egbang. Nfeb kehm soro rahke. Abatꞌtoono ebe kpo bo esi sehng.

Marcos 6:48-51

Ana Jisos kpe le ellong ane bako (4,000)

1 Gaam kang fvfo, ellong ane bako kehm kpe ba. Eji bo ki kpe bel ejum ellehke ajehng ajehng, Jisos kehm lungu abatꞌtoono ebe tv elne, kehm bungu tong bo re, 2 "Ndon ma-m fili sehng. Tibre ane baa ebkang nfung era a name. Ejumjum bo kpeem kpi ji ellehke. 3 Re me n tum bo ana, bo song kehnge, egom jindiki bahke kehme awo gbo mbang mbang, tib ane bandiki lohng nlaabambang ba."

4 Abatꞌtoono ebe kehm-e faange re, "Elka emahng nia, gan wo nne bahke tingi nsol alehke, kehm leke elkohn ane ana baa kpee?"

5 Jisos kehm bahbe bo re, "Ebred ebbik ń kpi no?" Bo kehm-e faange re, "E kpi ebred ebsehma."

6 Á kehm tongo ellong ane bao re, bo ji ndi. Á kehm rodo ebred ebsehma bio, kehm kake Esowo saam, kehm bakke ka abatꞌtoono ebe re bo song bak. Abatꞌtoono ebe lohko lim ano. 7 Bo bele abon nsahre abik abik o fvfo. Jisos kehm kake Esowo saam go nsol nyia, fere tong abatꞌtoono ebe re bo tob song bak.

8 Nne awohng awohng lꞌli wohngo. Owo abatꞌtoono ebe kehm taare erik ji sa no, ruru ejeere na ebsehma. 9 Bo jolo ejum ane atahltahl nkpel ewubu (4,000). Jisos kehm tongo ane bao re bo song kehnge.

Marcos 8:1-9

Ana Jisos nyehne amahr bade efig

12 Etoono efung behko eji bo tahme go Betani, jo jen asongo, Jisos, njal kehm-e yame. 13 Á kehm nyehne eti ji bo kpo lung re efig go fee ma tahb na tahb, jolo anyane anyane. Á kehm jeere, song rehng go nnahb re, fundiki á bahke tingi nkab anyehng. Eji á jeere no kohlo re á kpur me, jol kabem. Tibre ngare ka rehng nyi kpo kab. 14 Jisos kehm tongo eti jio re, "Nnene limm, no bahke kpe li nkab anyehng anyehng enya go etingitingi." Abatꞌtoono ebe tꞌtob wuk.

Marcos 11:12-14

Ejum akpili bade eti jio

20 Etoono efung behko eji bo jo jen mbang mbang asongo, bo kehm nyehne eti jio ji ki kab akab ma kpo kpee tete rehng go alohk.

21 Pita kehm buumu ji ma lim, kehm bungu tong Jisos re, "Ntꞌtibi, nyehn! Eti ji nyaane a bungu no re bahke kpoko, eblohko kpo."

22 Jisos kehm faange bo re, "Taamen tv Esowo! 23 Etingitingi, n kp-n tongo re, Nne lꞌtaame tv Esowo, á li ma tong re, ‘Ewong mehl, song yiimi go aya!’ Ewong jio lohko mehl. Á tohko bel nfaabe go ege eltim, á lꞌfere taame re, ji á bahbe no bahke lohko lim, ji ji Esowo bahke tiki lim ka-e. 24 Owo wahng ka n kp-n tongo re, Ń lꞌkak ero, bahb ejum ajehng ajehng, taamen re wahn eblohko bel, ji ji ḿ bahke bele.

25 "Ń lꞌkehme ero kak, jo tahmen ka ate ebahne go ejum ajehng ajehng ji ń kpi no bada bo, goji Nso ejahne no li go ero lꞌtob tahm ka-n go egahne abiafem.

Marcos 11:20-25

Ana Jisos lungu agbokombang abatꞌtoono ebe

1 Efung abehng eji Jisos yiimi go nkpe eto nyi Genesaret, ane kehm ba rur, jo fahd-e tv re bo wuk alum Esowo. 2 Owo á kehm nyehne agbang na abal go elga. Abasahre nsahre eblohng go agbang nyao, song kehme arim ebo faare. 3 Á kehm song yel egbang abehng bi jolo bi Saimon, kehm-e tongo re, á reenge egbang feere go elka alahb. Owo á kehm jehke go egbang, jo tib ane bao.

4 Eji á ma bung mal, owo á kehm tongo Saimon re, "Reenge egbang, song rehng edi ji kpꞌrahbe, wahn yake arim enyahne kak o, bob nsahre."

5 Owo Saimon kehm-e faange re, "Nsoo, wahr eblim eltum atv atv maa ana tete, jol ejumjum e tikem bob. Wo, eji a ma bung ano, m bahke yake erim ebame kak."

6 Eji bo ma lim ano, bo kehm bobo nsahre gbalee, erim kehm kehme elyare. 7 Owo bo kehm soro kehme atem ba woomo go egbang behko mahk re bo ba tob bo. Bo kehm bake, ba yehke nsahre nyio, ruru agbang abal abal, fere jol are agbang yahke ter.

8 Eji Saimon Pita nyehne ano, á kehm gboko jamme Jisos alahng, kehm bungu re, "Ntul, jeere song, tibre me nne abiafem wo."

9 Tibre nkpokosi nyio jo kpo-e esi sehng, a ane bako kpee ba tob jolo a ne o, tib go elkohn nsahre nyi bo bobo no. 10 Ano wo fvfo, Jems a Jon ba jolo abon Sibidi, bo ji jo lim eltum ano a Pita, jo tob kpo bo esi.

Owo Jisos kehm tongo Saimon re, "Ka kpe fahl! Bomo anv asongo, a bahke fere jo bim ane."

11 Eji bo ma tohng agbang ebo kunu egbuk, bo kehm tahme ejum ajehng ajehng sa, tahm toono Jisos.

Lucas 5:1-11

Ana Jisos nyame nfeb, a ebuku

22 Efung abehng Jisos kehm yele go egbang, a abatꞌtoono ebe, kehm tongo bo re, "Nong, wahr siiren rehng egbuk eto jehko." Owo bo kehm soro tahm. 23 Eji bo jo fing asongo, Jisos kehm gboko ellu. Owo egburu nfeb kehm ba kehme ellimi go eto jio, alahb kehm kehme elkimi yel egbang, ba elruru. Bo jolo efin efin ngare nyio.

24 Owo abatꞌtoono ebe kehm ba kpir-e, kehm-e nyahme re, "Nsoo, nsoo, e kpꞌtane na ao!"

Jisos kehm mehle yiimi, kehm nyame nfeb, a ebuku ji jo lim nsahm nsahm. Kehm rahke, edi naange soom. 25 Jisos kehm bungu tong bo re, "Anv, eltaame enahne nꞌna me?"

Owo bo kehm kehme elfahle, fere jo kpo bo esi. Bo kehm kehme elbungu atemtem re, "Anv, ye elkohn nne awoe, no kpo bung tong nfeb, a ebuku, wuk-e?"

Lucas 8:22-25

Ana Jisos nyame nfeb, a ebuku

24 Owo abatꞌtoono ebe kehm ba kpir-e, kehm-e nyahme re, "Nsoo, nsoo, e kpꞌtane na ao!"

Jisos kehm mehle yiimi, kehm nyame nfeb, a ebuku ji jo lim nsahm nsahm. Kehm rahke, edi naange soom. 25 Jisos kehm bungu tong bo re, "Anv, eltaame enahne nꞌna me?"

Owo bo kehm kehme elfahle, fere jo kpo bo esi. Bo kehm kehme elbungu atemtem re, "Anv, ye elkohn nne awoe, no kpo bung tong nfeb, a ebuku, wuk-e?"

Ana Jisos limi nne no bele abi atohko, á nob

26 Bo kehm song rehng go Gerasa ji jolo egbuk eto jehko. Galili egbuk jehka.

Lucas 8:22-26

12 Ngare nyi njul yahke ba ellahme, owo abatꞌtoono ebe, ewubu ane abal kehm bake ba tong-e re, "Tong ane baa, bo song go ajahbe nya li kpidi kpidi, a abon ajahbe bako, eji bo lꞌting nsol alehke li, fere ting adi nyao bo bahke kange. Tibre tahm edi jia rehng go ajahbe ekidi kpꞌlabe."

13 Owo Jisos kehm tongo bo re, "Wahnfono antahng kaan bo nsol alehke, bo li."

Bo kehm faange re, "E kpi abon abred na alon, kunu abon nsahre na abal ba ba. Anv, a kpꞌsebe re wahr tahm song gunu nsol alehke, ba ka elkohn ellong ane ana niaa?" 14 Tibre aneblum ba jolo o, jolo ejum ane atahltahl nkpel ewubbal atahl awubu (5,000).

Owo Jisos kehm tongo abatꞌtoono ebe re, "Nong, ane baa ji agꞌgabe agꞌgabe, ellong anehng anehng jo jol ane atahl abal ane awubu."

15 Abatꞌtoono ebe kehm limi ano, ane bao kpee ji ndi.

16 Owo Jisos kehm rodo abon abred bao na alon, kunu abon nsahre abal, kpiidi amahr enye go elbung, kak Esowo saam, bakke, ka abatꞌtoono ebe, eji bo lꞌsong bak ellong ane bao. Bo kehm song bak bo.

17 Ane bao li kpee wohngo. Abatꞌtoono ebe kehm taare erik ji ane bao li no sa, ruru ewubu ejeere ebbal.

Lucas 9:12-17

Elkak elbal ni jolo go Kana

1 Eji ma kang nfung ebal, elkak elbal jolo go Kena ji Galili. Nnyehn Jisos jolo ona. 2 Jisos, bo tꞌtob tiing-e elkak elbal nio, a abatꞌtoono ebe. 3 Eji amahm male no, owo nnyehn Jisos kehm bake ba tong-e re, "Amahm ebmal."

4 Jisos kehm-e faange re, "Nnenkal, nꞌnan a kp-m tohngo anv kak go ntong nyia? Ngare nyꞌnyame ka rehng."

5 Owo nnyehn Jisos kehm tongo alokeltum ba jolo o re, "Limen ajehng ajehng ji á bahk-n tongo!"

6 Etu ebrakebra jolo ona, nya bo bumu re bo jo ba ru elbo ana atahm ebo bungu no. Jolo agburu atulahb nya nnen a nnen, nya etu ajehng ajehng jo yele rehng egalon eltahl, tohko jol ano eltahl egalon ewubu. 7 Jisos kehm bungu tong bo re, "Song tuken alahb, wahn ba ruru go atulahb nyao!"

Bo kehm tuku alahb, ba ruru atulahb nyao kpee.

8 Á kehm tongo bo re, "Limen alahb maa, wahn song ka nfakamahm!" Bo kehm limi, tahm a ma.

9 Nfakamahm no elkak nio kehm wuungu alahb mao ma ma siingi amahm. Á kahnem edi ji lohngo lohng ba. Alokeltum bao ba limi lim alahb mao, bo jo kꞌkahn. Owo á kehm lungu nlumanne, 10 kehm-e tongo re, "Nne awohng awohng kpo tohko ka amahm ma nno. Eji bo ma wo kpꞌbuumu, á kehm gohro ka bo ma ki ga nob. Wobrod amahm ma nno bum gona tete sik anv!"

11 Ngbokambang a nkpokosi nyi Jisos limi no nyi a, á limi go Kana ji Galili. Owo á tibi ellub ene. Abatꞌtoono ebe kehm taame tv-e.

João 2:1-11

6 Á bungu ellum nia re á wuung-e. Tibre yefono antahng jo kꞌkahn kpee ji á bahke limi.

7 Filip kehm-e faange re, "Mpon eltahl, e lꞌko gunu abred, jol nehm tohko bꞌbiingi bo, afi nne awohng awohng jo li ntiil."

8 Ntꞌtoono ewe awohng no bo jo lung-e re Andru ji mmonannyehn a Saimon Pita, kehm-e tongo re, 9 "Mmonse awohng li ana, no kpi ebred na eblon, a abon nsahre na abal. Anv, nyaa a, tohko lꞌli jen, ka ellong ane ana nia?"

10 Jisos kehm tongo bo re, "Tongen ane bao, bo ji ndi." Tibre ajele jolo gbalee edi jio. Owo ane bao kehm jehke ndi. Bo jolo ejum aneblum atahltahl nkpel ewubbal atahl awubu (5,000).

11 Jisos kehm rodo abred nyao, kak Esowo saam, kehm bake ane bao ba ji go ndi. Ano wo fvfo á tob lim go abon nsahre bao.

Nne awohng awohng li ana kor-e no.

12 Eji bo ma wohngo ane kpee, Jisos kehm tongo abatꞌtoono ebe re, "Taaren bo erik ji ma sa, eji ejum ajehng ajehng lꞌkꞌrannge mbol mbol."

13 Ebred eblon bi ane bao li no, bo kehm song taare erik ji sa no, ruru ewubu ejeere na ebbal.

João 6:6-13

19 Bo fingi kan ejum mmal era, fundiki mmal eni, bo kehm soro nyehn Jisos kpꞌjene go ero alahb, jo kabbe go bo egbang. Bo kehm kehme elfahle.

20 Jisos kehm tongo bo re, "Kana kpe fahl, me wo!"

21 Eltim yebe bo sehng. Bo kehm-e solo go egbang. Tvtv ona egbang kehm soro rehng egbuk eto jehko ji bo jo jꞌje.

João 6:19-21

Ana Jisos kpe song lohng go ellong abatꞌtoono ebe

1 Owo Jisos kehm kpe song tib elne go ellong abatꞌtoono ebe go eto ji Taibirias. Ana wo á tibi elne.

2 Saimon Pita, a Tomos ji bo jo lung-e re Ayafele, go Natanael ji lohng go Kena ji Galili, a abon ba Sibidi, go abatꞌtoono ebe bako na abal, bo ane kpee jolo o edi ajehng. 3 Saimon Pita kehm tongo bo re, "N kpꞌtahme nsahre."

Bo kehm-e faange re, "E bahke tob tahm toon-a."

Bo kehm soro tahm, song yel go egbang. Jol ejumjum bo bobem atv mao ona.

4 Eji efungfu yahke se, Jisos kehm bake ba yiimi go nkpe eto. Abatꞌtoono ebe we liingem re, Jisos wo.

5 Jisos kehm bahbe bo re, "Abon ebame, ḿ bꞌbob nsahra?"

Bo kehm-e faange re, "Eꞌee, ejumjum e bobem."

6 Jisos kehm tongo bo re, "Yaken erim ebahne kak alahb go ejang eboblum bi egbang, ḿ bahke bobo nsahre."

Owo bo kehm limi ano. Bo kpeem ma tohng erim bio, tibre nsahre ruru go erim sehng.

7 Ntꞌtoono no jo kor Jisos sꞌsehng, kehm tongo Pita re, "Ntul ewahre wo o!"

Saimon Pita wuku kan a re, Ntul wo, á kehm soro kak nsol enye go ege a ngubjing, nyi á yehke no lim eltum, kehm soro yehb yel go alahb.

8 Abatꞌtoono Jisos bako fingi egbang, ba rehng go nkpe egbuk. Bo jo tohngo erim bi nsahre ma gbo gbalee, tibre nkpe egbuk gaam jol fee, jolo ejum eyake ego ewaya ajehng.

9 Eji bo rehnge go egbuk, bo kehm nyehne agun nya bo fohko go akal nsehng, fere nyehn nsahre kun go akal ngun, a ebred.

10 Jisos kehm tongo bo re, "Koon nsahre nyindiki ba a nyi, nyi ń kpꞌna bobo."

11 Owo Saimon Pita kehm tahme song tohng erim bio ona, lohng a bi go egbuk. Erim bio nsahre ruru sehng. Nfange enyamalahb bio jolo nnyamalahb atahl asehma kunu ewubu a nnyamalahb era. Jol eji nsahre ruru rur ano, erim yarem.

João 21:1-11

Libertações

Jesus expulsou demônios com autoridade. Os espíritos impuros não resistiam à sua palavra e saíam imediatamente.

Ana Jisos limi nlokeltum awohng, á nob go Kapenium

5 Eji Jisos rehnge go Kapenium, ntubesi a nsoja no Rom kehm bake, ba kpir-e, kehm-e gboongo 6 re, "Nsoo, nlokeltum ewame noa go etahk, kpꞌyame gꞌga, jol á nehme ma jen."

7 Jisos kehm-e tongo re, "M bahke bake ba lim-e, á nob."

8 Owo ntubesi a nsoja noo kehm-e faange re, "Nsoo, me n fuumem re wo ba yel go egame ekpꞌkpa. Lub bung na bung ellum, nlokeltum ewame bahke nobo. 9 Tibre me n li nne no wob nne go elwo. N tob kpi nsoja nyi wob-m go elwo. N lꞌtong noo re, ‘Song!’ á tahm. N lꞌtong noka re, ‘Ba!’ á ba. N lꞌtong nlokeltum ewame re, ‘Lim jia!’ á lim na lim."

10 Eji Jisos wuku ano, kehm-e kpoko esi. Á kehm tongo ane ba jo toon-e re, "Etingitingi, n kp-n tongo re, elkohn eltaame ana nia n ka nyehn a nyehn go Israel. 11 N kp-n tongo re, Ane gbalee bahke lohngo go ero nfam, a erede nfam ba ji a Ebraham, a Aisik, go Jekob go ejahbetul Esowo, jo li nsol a bo. 12 Wo, abon ntul ba jol lehke etul, bo bahke rodo bo, ro kak edi ji nkom ejannge li no. Owo ane bahke jo ling, fere jo kono amahn."

13 Owo Jisos kehm tongo ntubesi a nsoja noo re, "Song kehnge! Ana a ma taame, ano wo bahke jolo ka-a." Ngare nyꞌnehm ona nyi nlokeltum ewe nobo eyam ebe.

Mateus 8:5-13

Ana Jisos limi ane abal ba bele abi atohko, bo nob

28 Jisos kehm bake go Gadara ji jolo go egbuk eto jehko. Owo ane abal kehm lohngo edi ji alahm akvne jolo no, ba wan-e. Bo bele abi atohko go bo atahng. Bo jo mennge sehng. Jol nne awohng awohng joom sahb, sehng mbang nyio. 29 Owo bo kehm biingi tiim re, "Anv, Mmon no Esowo, jen ji e kpi no me atemtem? Anv, a ba na re wo ba kak-r erema, eji ngare kala biinga?"

30 Ellong akuk jolo ona kpidi kpidi, jo li nsol. 31 Abi atohko kehm gboongo Jisos re, "A lꞌkehm-r kame yake, nong, wahr song yel akuk nyao go atahng."

32 Owo Jisos kehm tongo bo re, "Songen!" Bo kehm soro lohng, song yel akuk nyao go atahng. Ellong akuk nio kehm soro rehm abahl, song fooro agbunggbung eto jio, yel go alahb tan.

33 Ane ba jo baabe akuk nyao, kehm soro be ebo tahm, song rehng go nla ejahbe, song tooro kpee, fere tooro ejum ji ma lim ane ba bele abi atohko. 34 Ejahbe jio kpee kehm tahme, song kpiri Jisos. Eji bo song nyehn-e, bo kehm-e gboongo re, á lub tahm ejahbe jio song.

Mateus 8:28-34

Ana Jisos limi nkamme, á bung

32 Eji ane bao kpꞌtahme asongo, ane bako kehm koko nkamme ba a ne go ege, nyi bele ebi etohko go ege atahng. 33 Jisos kehm kame nne noo ebi etohko jio yehke, nne noo soro kehme elbungu.

Ane bao kehm kpoko bo esi. Bo kehm kehme elbungu re, "Elkohn ejum ana jia, e ka nyehn a nyehn go Israel."

Mateus 9:32,33

Jisos abola ntul a nnehm

22 Ane bandiki kehm koko nwakamahr nyi ki jo ma bung, ba a ne, nyi bele ebi etohko go ege atahng. Jisos kehm limi nne noo, á nyehn, fere bung.

Mateus 12:22

Nnenkal no taame no

21 Jisos kehm tahme edi jio, song rehng go ejang bi Taya, a Saidon.

22 Nnenkal a Kenan awohng no lohng ejahbe jio kehm bake go ege, ba rabe gboong-e re, "Nsoo, mmon no Devid, nong, me n fil-a ndon! Mmon ewame, ebi etohko wob-e go atahng, kp-e gbiingi sehng."

23 Jisos we tikem faange.

Abatꞌtoono ebe kehm bake go ege, ba gboong-e re, "Tong-e á song. Tibre á kpꞌrabe tob-r sehng."

24 Owo Jisos kehm faange re, "Bo tum-m tv go ejoro bio bi Israel bi ma tan bi bi."

25 Owo nnenkal noo kehm ba gbo go ege alata, kehm bungu re, "Nsoo, kak-m ebo!"

26 Owo Jisos kehm faange re, "Nobem re nne rod nsol alehke nyi abon, ka ebv."

27 Nnenkal noo kehm taame re, "Ee nsoo, jol ebv kpo kpiimi akahb elang nya kpo fooro ekpꞌkuru nde ebo gbo."

28 Owo Jisos kehm-e faange re, "Nnenkal, eltaame ena kpꞌgbale gbalee. Nong, lohko jol ana a kpꞌsebe."

Ngare nyꞌnehm ona nyi mmon ewe noo no nkal nobo eyam bio.

Mateus 15:21-28

Ana Jisos limi mmon no bele ebi etohko, á nob

14 Eji bo feere no, ba rehng edi ji ellong ane jolo no, nne awohng kehm lohngo ba, ba jamme Jisos alahng, 15 kehm-e tongo re, "Nsoo, nong, mmon ewame fil-a ndon. Á kpo gbo ngboko, kpo gbiing-e sehng. Nkpel tvv á kpo kono elgboko yel agun, fere jo gbo yel alahb. 16 N ko-e ba a ne goji abatꞌtoono eba. Bo we maam lim, á nob."

17 Owo Jisos kehm faange re, "Wahn ane ba kpo soodo, fere kꞌtaame ba! M bahke kange renan a nahne? Anv, bahke kange renan, ji m bahke koko tib-n, ń kehm kahne? Ko mmon noo, ba a ne!" 18 Jisos kehm nyame ebi etohko jio, ebi etohko jio kehm soro lohng mmon noo. Mmon noo lohko nob tvtv.

Mateus 17:14-18

23 Nne no bele ebi etohko go ege atahng kehm soro lohng, ba yel ekpꞌkpa ero jio. 24 Á kehm rabe tong Jisos re, "Jisos ji Nasaret, a ba jen ko go egahre? A ba re wo ba ranng-ra? N kpꞌkahne elkohn nne no a li no. A li mbarebara nne no Esowo. Ebi ajehng ajehng wa wobem go ega eltim. A lohng goji Esowo ba."

25 Jisos kehm rabe tong ebi etohko jio re, "Rahke ewok, wo lohng nne noa!"

26 Ebi etohko jio limi nne noo, á soro gbo ngbabohngo, fere rabe tiim, kehm soro lohng nne noo.

Marcos 1:23-26

Ana Jisos limi nne no bele ebi etohko, á nob

1 Bo kehm rehnge go egbuk eto jehko go ejang bi Gerasa. 2 Jisos lohngo kan go egbuk, á kehm soro wane nne no lohng go edi ji alam akvne jolo no. Nne noo ona bele ebi etohko go ege atahng. 3 Á lene go alahm akvne. Nnene we kpeem ma kak agbekobo. 4 Nkpel tvv bo jo kak-e agbekobo. Ngare anyehng anyehng nyi bo gba-e no, á tohng nya abo kiimi, fere ruumu nya akpade kiimi. Nne ne jolem, no jo mal gon-e. 5 Atv a njul á jo yannge go alahm akvne, a awong, jo rabe tiim, fere jo rod atal, jo kadde elne, yehke alok.

6 Á jolo fee, eji á nyehne Jisos. Á kehm beke ba gbo jamme Jisos alahng, 7 kehm rabe tiim re, "Jisos ji Mmon no Esowo bi li go ero, a ba jen go egame? Tib go esi ji Esowo m ma-a gboongo re, wo ki-m kak erem!" 8 Á bungu jia, tib eji Jisos m-e tohko tong re, "Ebi etohko lohng-e!"

9 Jisos kehm bahbe ebi etohko jio re, "Mbing enya mee?"

Á kehm faange re, "Mbing enyame li re ‘Egomegom’. Tibre e li go egom." 10 Á kehm soro gboongo Jisos re, á kꞌkam bo yehke go ejahbe jio. 11 Ellong akuk jolo o kpidi kpidi, jo li nsol go ewong. 12 Abi atohko nyao kehm kehme Jisos gboongo re, á lub tum bo, bo song yel akuk nyao go atahng.

13 Jisos kehm taame. Abi atohko nyao kehm soro yake nne noo abo, tahm song yel akuk nyao go atahng. Bo kehm beke song fooro agbunggbung gbo yel go alahb tan. Kpee ellong akuk nio o jolo akuk atahltahl nkpel elon (2,000).

14 Ane ba jo baabe akuk nyao, be ebo tahm, song tiingi go etahk, a abon ajahbe bako fvfo. Ane bao kehm lohngo re bo song nyehn ji ma lim.

Marcos 5:1-14

11 "Ń kpo tib re, ‘Nne lꞌbel ejum ji kehn á jol kake nde ebo, a nnyehn, á lꞌfere bung re, Ejum jia li re Korban (ji lohngo re, li ka Esowo), 12 á nehm kpe kak nde ebo, a nnyehn.’ 13 Jia lohngo re, wahn ebten ellum ni Esowo, fere kpꞌtibi atahm nya babnso ejahne. Elkohn nsol ana nyia li gbalee, nyi ń kpo tob lim fvfo."

Nsol nyi kpo lim nne, á kꞌjo jol saang go ege eltim

14 Jisos kehm kpe lung ellong ane, kehm tongo bo re, "Wuungen atung, wahn ane kpee, wahn kahn! 15 Ejumjum limm, ji kpo yel nne go nnyo, kehm limi eltim ene sab. Ji kpo lohng nne go eltim, ji ji kpo lim eltim nne sab.

Marcos 7:11-15

Nnenkal no taame no

24 Jisos kehm tahme go ejahbe ajehng ji li kohlo Taya, song yel ekpꞌkpa ajehng. Tibre á joom seb re, nne awohng awohng kahn re, á li o. Á maam tiki biiri. 25 Nnenkal awohng no mmon ewe no nkal bele ebi etohko go ege atahng kehm wuku bada Jisos. Á kehm ba kpir-e, soro gbo tvtv, jamm-e alahng. 26 Mmonankal noo jolo nfono ejahbe no jo bung Grik. Á kehm gboongo Jisos re, á lub kam ebi etohko jio, yehke mmon ewe go eltim.

27 Jisos kehm-e faange re, "Nong, me n tohko gbo mbang le abon. Nobem re me n rod nsol alehke nyi abon, ka ebv."

28 Nnenkal noo kehm taame re, "Ee nsoo, fvfo, n kpꞌkahne re, akahb elang nya abon lꞌfooro gbo ndi, ebv bi kpo fohko li."

29 Jisos kehm bungu tong-e re, "Tib go ellum ni a faange no, a li ma song kehnge, tibre mmon ewa, ebi etohko m-e lohng go ege eltim."

30 Nnyehn kehm feere je, lohko song nyehn mmon ewe nong go edilnong sange sange. Ebi etohko jio m-e lohko lohng.

Marcos 7:24-30

17 Nne awohng go ellong ane bao kehm faange re, "Nsoo, n ko mmon ewame ba a ne. Tibre á kpi ebi etohko go ege atahng. Á nehme ma bung. 18 Edi ajehng ajehng ji ebi etohko jio lꞌsi mehl-e mehl, kpo rod-e tub ndi, nfahl jo tub-e na tub go nnyo. Á kpo kono amahn go esi, fere tahne na tahne. Me n gboongo abatꞌtoono eba re, bo kam-e ebi etohko jio jehke. Bo maam lim."

19 Jisos kehm tongo abatꞌtoono ebe re, "Jen ji wahnge ń kpi ekꞌtaame go egahna ntim? M bahke kange renan a nahne? Ko mmon noo, ba a ne!"

20 Bo ko-e kan a, ba a ne, ebi etohko jio nyehne kan Jisos a, á kehm limi mmon noo, á gbo ngboko, fere gbo ndi, kehm kehme elgbehde. Nfahl jo tub-e go nnyo. 21 Jisos kehm bahbe nde re, "Ebkang renan eji eyam bia bom-e no?"

Á kehm-e faange re, "Bomo ngare nyi á jolo mmonse ntiil, tete rehng anv. 22 Nkpel tvv ebi etohko jio kpo gare re á wul-e. Nkpel nyindiki tub-e kak agun. Nkpel nyindiki tub-e kak alahb. Nong, wahr fil-a ndon, wo kak-r ebo, tohk-a jahk!"

23 Jisos kehm bungu re, "Wobbung re, ‘Tohk-m jahk.’ Nne no lꞌtaame, ejumjum limm, ji bahk-e riidi."

24 Nde kehm soro rabe tvtv re, "Me n taame, kak-m ebo go egame ekꞌtaame."

25 Eji Jisos nyehne re, ellong ane bao kpꞌkame ba rur, á kehm nyame ebi etohko jio, fere tong-e re, "Etohko ji kpo lim nne gbo ekamme, fere lak atung, ka kpe tiki yel mmon noa!" 26 Tvtv o ebi etohko jio kehm biingi tiim, kehm soro yehke mmon noo, á gbo ngboko ekidi lꞌlab. Ebi etohko jio kehm soro lohng-e. Mmon noo kehm sake noongo, are nkvne nyi. Owo ane bandiki kehm kehme elbungu re, "Yebkpo."

27 Jisos kehm jabbe mmon noo go ebo, tab-e yiimi, mmon noo lohko yiimi.

Marcos 9:17-27

Ana Jisos limi ane tvv, bo nob ayam ebo

38 Jisos kehm lohngo ekpꞌkpa ero jio, song rehng go etahk Saimon. Nnyehn nkal a Saimon, arumbum nyed-e sehng. Bo kehm-e gboongo ka-e. 39 Á kehm tahme song yiimi go ege a nkpe edilnong, kehm nyame arumbum nyao, nnenkal noo soro nob, kehm mehle tvtv, soro kehme bo loko.

Lucas 4:38,39

27 Eji Jisos wahre go egbuk, nne awohng lohngo go nla ejahbe, kehm ba wan-e.

Nne noo bele abi atohko ekidi eblab. Á jo jene ebun ebun. Á joom kang etahk, á jo kange edi ji alahm akvne jolo no. 28 Á nyehne kan Jisos a, á kehm rabe, gbo-e go alata, fere jo bung wahre wahre re, "E li nfem anyi awahr a na, Jisos ji Mmon Esowo bi gbale sehng? N kp-a gboongo re, wo ki-m kak erem." 29 Tibre Jisos tohko tong esabsab etohko jio re á lohng nne noo. Nkpel tvv etohko jio jo yehk-e. Jol eji ane jo kak-e kak agbekobo go abo, a akpade akpade, fere jo baab-e, á jo kiimi na agbekobo nyao, ebi etohko jio jo yehk-e kak go elka emahng.

30 Owo Jisos kehm-e bahbe re, "Mbing enya mee?"

Á kehm faange re, "Egom." Tibre abi atohko gbalee woom-e go atahng.

31 Abi atohko nyao kehm gboongo Jisos re, á kꞌtong bo, bo je song yel go nrabbe elbing.

32 Ngare nyio ellong akuk gbalee jo li nsol ona go nkpe ewong. Abi atohko nyao kehm gboongo Jisos re á lub yake bo, bo song yel akuk nyao go atahng.

Jisos kehm yake bo. 33 Owo abi atohko nyao kehm lohngo nne noo, song yel akuk go atahng. Akuk nyao kpee kehm beke, song fooro egbunggbung aya, yel alahb tan.

34 Eji ane ba jo baabe akuk nyao nyehne ano, bo kehm beke, song tooro go etahk, a abon ajahbe ba jolo o. 35 Ane bao kehm lohngo ba re bo ba nyehn ejum ji ma lim. Eji bo ba kpiri Jisos, bo kehm tob ba nyehn nne no abi atohko lohng-e no, jehk go alata nya Jisos sange sange. Á ma kak nsol go ngubjing kpee. Owo bo kehm kehme elfahle.

Lucas 8:27-35

27 Etingitingi, n kp-n tongo re, Egom jindiki ji yim a, nehm kpo, tete bo nyehn etul bi Esowo go amahr."

Ana Jisos yaange ngubjing

28 Bomo ngare nyi Jisos bungu alum nyao, eji ma kang nfung enehkeni, owo á kehm rodo Pita, Jon, a Jems, wahr a bo go ewong re á song kak ero.

29 Eji á jo kak ero, esamahr ebe kehm yaange. Nsol nyi á kake no kehm bare, fere jo nyꞌnyane.

30 Owo ane abal kehm soro lohng ba kehme elbungu a ne, noko jolo Moses, noko jol Elaija. 31 Bo ba go ellub ba bung a Jisos bade elkv ni á yahke ba elkpoko go Jeusalem, eji á lꞌgohro lim ji Esowo toobo no bum-e.

Lucas 9:27-31

32 Wo gana, Bab Pita ebgbo ellu kpꞌlale. Eji bo ma nyahme, bo kehm nyehne Jisos a ellub ene, fere nyehn ane abal ba yiimi a ne ona.

33 Eji ane bao yahke tahm, owo Pita kehm tongo Jisos re, "Nsoo, nꞌnob re wahr jol a. Nong, wahr si nkpatahk era, behko bꞌba, behko bi Moses, behko bi Elaija." Jol á kahnem ji á jo bꞌbung.

Lucas 9:32,33

38 Nne awohng go ellong ane bao kehm rabe re, "Ntꞌtibi, n kpa gboongo! Nyehn mmon ewame ana! Ye ntahngtahng wo n kpi-e no. 39 Ebi etohko kpo yehk-e. Ngare anyehng anyehng nyi á lꞌyehk-e, á soro biingi tvtv, fere sok-e, tete nfahl jo tub-e nnyo, fere jo jahr-e. Kpo riidi kehm-e yake abo. 40 Me n gboongo abatꞌtoono eba re bo kam-e yehke. Bo maam lim."

41 Owo Jisos kehm faange re, "Jen ji wahnge wahn ane ba li anv kil taame? Ń kpo fere soodo! Anv, m bahke kange renan a nahne, fere jo tib-n, ń kehm kahne? Ko mmon ewa ba a ne!"

42 Eji mmon noo jo jen abake, ebi etohko jio kehm-e soro yehke tub go ndi, á soro gbo ngboko.

Owo Jisos kehm nyame esabsab etohko jio, fere lim mmon noo, á nob, fere yak-e ka nde.

43 Ane kpee kehm kpoko bo esi, eji bo nyehne egburu nsahm nyi Esowo.

Ana Jisos kpe bung bade elkv ene

Eji kpi nkpoko nkpoko ane bao kpee esi bade ejum ajehng ajehng ji Jisos ma lim, owo á kehm tongo abatꞌtoono ebe re,

Lucas 9:38-43

Jisos, a ntul a nnehm

14 Jisos kehm kame nne no jolo nkamme ebi etohko yehke. Eji ebi etohko jio ma lohng nne noo, nne noo kehm kehme elbungu. Owo kehm kpoko ellong ane bao esi.

Lucas 11:14

50 Nne awohng go bo ellong kehm fohko ekahngkahng ebe, kpale nju nyi ntubesi abalimajom etung eboblum.

51 Owo Jisos kehm-e tongo re, "Ka kpe lim ano!" Á kehm rodo etung nne noo, feere a bi lak-e, á nob.

Lucas 22:50,51

24 Eji ane ba Jon tumu bo ma feere fi, owo Jisos kehm bomo elbungu bada Jon, tong ellong ane bao re, "Ń jo lohngo je elka emahng re wahn song nyehn jen? Eljele ni nfeb kpꞌlimi, kpꞌneenga? 25 Jen ji ń jo jꞌje re wahn song nyehn? Nne no liibi anoobo nsola? Etingitingi, elkohn ane ba kpo liibi ano, fere jo li ebno, bo kpo kono eljolo go ntahk atul. 26 Anv, ejum aji ń jo je re wahn song nyehn? Nnyehnamahra?

"Etingitingi, n kp-n tongo re, wahn ebnyehn nne no gbale sehnge nnyehnamahr. 27 Tibre Jon wo li nne no nwer Esowo bungu no bada ne re,

" ‘M bahke tumu ntiingetib ewame re

á gbo-a mbang, song tuungu mbang bum-a.’

28 "N kp-n tongo re, Nne awohng awohng limm, no ma jꞌjol go njini nyia no gbale sehnge Jon. Wo, nne no sahb rꞌrede, no kun etul bi Esowo, á gbale sehnge ye."

29 "Ane kpee, a abakokatak ba wuk-e no, bo ba taame re, Esowo lohko li go etingitingi, tib eji bo ma bel ewohngalahb ji Jon.

30 "Bab Farisi, a atꞌtibi ba atahm tꞌten ji Esowo toobo re á lim ka bo, eji ki kor bo re bo bel ewohngalahb jio ji Jon.

Lucas 7:24-30