Milagres de Jesus

Yesu Kowahonya Vimbugumbugu Wabili

27 Yesu viyakalile yochola kulawa haja, vimbugumbugu wabili wamkweleleza, woguta nyangi, "Tonele bazi, Mwana wa Daudi!"*

28 Yesu viyengile mng’anda, waja vimbugumbugu wamcholela, na Yesu kawauza, "Motogola kamba nie nodaha kuwahonya mweye?"

Wedika, "Ona, Mndewa!"

29 Abaho, kagakwasa meso gao, kalonga, "Mtendeligwe kamba vija vumtamanila!" 30 Na meso gao gagubuligwa. Yesu kawazuma ng’hani, kawalongela, "Sambimmulongele munhu yoyose mbuli ino!"

31 Ila hewo wachola na kubwililisa mbuli za Yesu kila hanhu muisi ija.

Yesu Kowahonya Vimbugumbugu Wabili

29 Yesu na wanahina zake viwasegele Yeliko, wanhu bwando wamkweleleza. 30 Haja kukala na vimbugumbugu wabili wakalile hamgwazo wa inzila, na viwahulike kamba Yesu kobita, wenula dizwi, walonga, "Mndewa, Mwana wa Daudi,* tonele bazi!"

31 Didale da wanhu diwakomhokela na kuwalongela wanyamale. Ila wagendelela kwinula dizwi, wolonga, "Mndewa, Mwana wa Daudi, tonele bazi!"

32 Yesu kema, abaho, kawakema kawauza, "Molonda niwatendele choni?"

33 Wamulongela, "Mndewa, tolonda tulole!"

34 Yesu kawonela bazi, kagakwasa meso gao. Bahaja wadaha kulola, abaho, wamkweleleza.

Yesu Komuhonya Kimbugumbugu ako Betisaida

22 Wavika Betisaida, wanhu wamgala munhu kimbugumbugu ha Yesu, wamuyalalila yamkwase. 23 Yesu kamgoga mkono ija imunhu kimbugumbugu, kamgala kutali na ikiwambo. Kamtemela visite mmeso, abaho, kamwikila makono gake, kamuuza, "Kodaha kulola kinhu chochose?"

24 Ija imunhu kalola uchana kalonga, "Nowona wanhu, ila wokoneka kamba mibiki itembela."

25 Yesu kamwikila makono mwanza uyagwe mmeso, mwanza uno kaiyoha kubunhula, na meso gake gananazuka, kadaha kulola goya kila kinhu. 26 Abaho, Yesu kamulagiza yachole ukae yomgong’ondeza, yolonga, "Sambiubweleganye muna ikiwambo."

Yesu Komuhonya Munhu Kinziwi na Bubui

31 Abaho, Yesu kasegela muna iisi ya Tilo, kachola Lamba da Galilaya kubitila Sidoni mbaka muisi ya viwambo longo dimwe vikemigwa Dekapoli. 32 Wanhu wamgalila munhu yakalile kinziwi na bubui, wamuyalalila Yesu yamwikile makono gake. 33 Yesu kamsola yeiyeka, kamgala kutali na ididale da wanhu, kagela vidole vake mmagwiti ga ija imunhu, kazenha vizite, abaho, kalukwasa lulimi lwake. 34 Abaho, Yesu kalola uchana kuulanga, kabweza mhumuzi, na kumulongela ija imunhu, "Efata!" Nhegulo yake, "Vuguka!"

35 Bahaja munhu ija magwiti gake gahulika, kigagaziko chake kisegezigwa, avo kasonga kulongelela bila kugaya. 36 Abaho, Yesu kawagong’ondeza wanhu sambiwamulongele munhu yoyose mbuli ija. Ila avija viyakalile yowagong’ondeza ng’hani vivo vowokala wobwililisa ng’hani. 37 Wanhu wose wahulike wakanganya ng’hani na walonga, "Kila kinhu kotenda goya! Kawatenda hata vinziwi wahulike na mabubui walonge!"

Yesu Komuhonya Kimbugumbugu Yokemigwa Batimayo

46 Wavika kudiwambo dikemigwa Yeliko, Yesu viyakalile yolawa mkiwambo na wanahina zake na dale kulu da wanhu, kimbugumbugu imwe yakalile yopula vinhu yokemigwa Batimayo mwanage Timayo kakala yakalile hasi behi na inzila. 47 Viyahulike kamba Yesu wa Nazaleti kobita, kasonga kwinula dizwi yolonga, "Yesu! Mwana wa Daudi! Nyonela bazi!"

48 Wanhu bwando wamkomhokela na wamulongela yavudale. Ila kagendelela ng’hani kutoa nyangi, yolonga, "Mwana wa Daudi! Nyonela bazi!"

49 Yesu kema, kalonga, "Mkemeni."

Avo wamkema ija imunhu kimbugumbugu wamulongela, "Deng’helela! Inuka kokukema."

50 Kajasa guo jake, kazumha kachola ha Yesu.

51 Yesu kamuuza, "Kolonda nikutendele choni?"

Ija imunhu kamwidika, "Mkulufunzi, nolonda kulola."

52 Yesu kamulongela, "Genda, nhamanila yako ikuhonya."

Bahaja kadaha kulola na kamkweleleza Yesu mnzila.

Yesu Komuhonya Kimbugumbugu Yapulaga

35 Yesu viyakalile behi na wambo da Yeliko, kukala na kimbugumbugu imwe yakalile mumgwazo wa inzila yopula. 36 Viyahulike dale da wanhu dobita, kauza, "Kuna choni?"

37 Wamulongela, "Yesu wa Nazaleti kobita."

38 Kenula dizwi yolonga, "Yesu, Mwana wa Daudi, nyonela bazi!"

39 Wanhu walongole wamkomhokela wamulongela yanyamale. Ila heyo kagendelela kwinula dizwi kulu ng’hani, yolonga, "Mwana wa Daudi, nyonela bazi!"

40 Avo Yesu kema, kawalagiza wamgale hamwake ija imunhu kimbugumbugu. Viyavikile behi, Yesu kamuuza, 41 "Kolonda nikutendele choni?"

Na heyo kamwidika, "Mndewa, nolonda kulola kabili."

42 Yesu kamulongela, "Lola! Nhamanila yako ikuhonya."

43 Bahaja munhu ija kadaha kulola kabili, kamkweleleza Yesu, kuno yomuyenzi Mulungu. Wanhu viwonile gaja, wose wamuheweza Mulungu.

Yesu Komuhonya Munhu Yavumbuke Kimbugumbugu

1 Yesu viyakalile yobita mnzila, kamona munhu yavumbuke kimbugumbugu. 2 Wanahina zake wamuuza, "Mkulufunzi, yalihi yalozile, kileka mana munhu ino yavumbuke kimbugumbugu, heyo mwenyego ama wamulelile?"

3 Yesu kawalongela, "Sio munhu ino ama waja wamulelile watendile vilozo, gano galawilila giladi sang’hano za Mulungu zoneke mkubitila heyo. 4 Kipigiti chose cha imisi tolondigwa kutenda sang’hano za ayo yanhumile. Kilo chokwiza haduhu munhu yondayadahe kusang’hanika. 5 Kipigiti nie ning’hali muulumwengu, nie iyo mulangaza wa ulumwengu."

6 Viyeshile kulonga gano, Yesu kazenha vizite hasi muisi, abaho, katenda tope yovulugiza na ivizite, abaho, kam’baka mmeso ga ija imunhu. 7 Kamulongela, "Genda ukainave kihanga chako Mdibwawa da Siloamu." Nhegulo ya twaga dino iyo, "Yatumigwe." Avo ija imunhu kachola kaisuluza, kabwela yolola.

2 Na munhu yakalile na dikulu kamwizila na kamfugamila mavindi, kalonga, "Mndewa, uhalonda, kodaha kunihonya."

3 Yesu kagolosa mkono wake, kamkwasa, kamulongela, "Nolonda, uhonyigwe!" Bahaja kahonyigwa utamu wake. 4 Abaho, Yesu kamulongela, "Tegeleza, sambiumulongele munhu, ila genda ukailaguse ha mkulu wa nhambiko, abaho ukalave nhosa kamba viyalagize Musa, giladi wanhu wose watogole kamba kuhona."

2 Wanhu wayagwe wamgalila munhu yaholole, yatambalale mulusazi. Yesu viyaiwene nhamanila yao, kamulongela ija imunhu yaholole, "Gangamala, mwanangu! Vilozo vako vigeligwa kumgongo."

3 Abaho, wafundiza Malagizo ga Musa wakalile baho wailongela wenyego kwa wenyego, "Munhu ino kofukula!"

4 Yesu kavitanga vija viwakalile wogelegeza, kalonga, "Habali mgelegeza vihile mmioyo yenu? 5 Dilihi dibuhile ng’hani, kulonga, ‘Vilozo vako vigeligwa kumgongo,’ ama kulonga, ‘Ima wima utembele?’ 6 Nolonda m’vitange kamba, nie, Mwana wa Munhu, nna udaho wa kuvigela kumgongo vilozo va wanhu muisi." Abaho, kamulongela ija imunhu yaholole, "Ima wima, papa lusazi lwako, uchole ukae yako!"

7 Ija imunhu kema wima, na kuchola ukae.

10 na muja kukala na munhu yaholole mkono. Kuno wozahila kilamso cha kumtagusa, wamuuza, "Malagizo ga Musa gotogoza kumuhonya munhu Mdizua da Mhumulo?"

11 Yesu kawalongela, "Munhu yalihi mmwanza wenu yali na ng’hondolo imwe yengile mdikolongo Mdizua da Mhumulo, yondayaleke kumgoga na kumulava hanze? 12 Munhu kazama mianza mingahi kubanza ng’hondolo! Avo, Malagizo ga Musa gotogoza kutenda ganogile Mdizua da Mhumulo." 13 Abaho, kamulongela ija imunhu yaholole umkono, "Golosa mkono wako."

Avo kaugolosa, na uwa mgima, kamba uja uyagwe.

30 Mama mkwe yake Simoni kakala mtamu wa homa, kipigiti kikija Yesu viyavikile wamulongela. 31 Yesu kamcholela, kamgoga mkono kamwinula. Homa imulawa, na heyo kasonga kuwasang’hanikila.

Yesu Komuhonya Munhu Yali na Dikulu

40 Munhu imwe yakalile na dikulu keza ha Yesu, kafugama mavindi kaiyalala yolonga, "Uhalonda, kodaha kunihonya."

41 Yesu kamwonela bazi, kagolosa mkono wake kamkwasa, kalonga, "Nolonda, hona!" 42 Baho utamu umulawa, kahona.

3 Abaho, weza wanhu, wamgalila munhu yaholole, yakalile yapapigwe na wanhu wane wakalile mmwanza wao. 4 Avija wanhu viwamemile, hawadahile kumgala ija imunhu ha Yesu. Avo watenda zonzo mkiswili walinga hayali Yesu. Viwatendile idizonzo, wamuhumulusa hasi ija imunhu, yawasile mulusazi. 5 Viyaiwene nhamanila yao, Yesu kamulongela ija imunhu yaholole, "Mwanangu, vilozo vako vigeligwa kumgongo."

6 Wafundiza wayagwe wa Malagizo ga Musa wakalile baho, wasonga kugelegeza munda kwa munda. 7 "Habali munhu ino yolonga kamba vino? Uno ufukuzi! Mulungu yeiyeka yodaha kugela kumgongo vilozo va wanhu!"

8 Bahaja Yesu kagatanga gaja gawakalile wogelegeza, avo kawalongela, "Habali mgelegeza vinhu kamba avo? 9 Dilihi dibuhile ng’hani, kumulongela munhu yaholole ‘Vilozo vako vigeligwa kumgongo,’ ama kulonga, ‘Ima wima upape lusazi lwako, utembele?’ 10 Nolonda m’vitange kamba, nie, Mwana wa Munhu, nna udaho wa kuvigela kumgongo vilozo va wanhu muisi." Abaho kamulongela ija imunhu yaholole, 11 "Ima wima, papa lusazi lwako, uchole ukae yako!"

12 Hameso gao ija imunhu kenuka kapapa lusazi lwake himahima kachola. Wanhu wose wakanganya ng’hani wamuyenzi Mulungu wolonga, "Hatunayona mbuli kamba ino!"

Yesu Komuhonya Munhu Yaholole Mkono

1 Abaho, Yesu kabweleganya kabili muing’anda ya nhambiko. Amo kukala na munhu yali na mkono uholole. 2 Wanhu wayagwe wakalile haja wakala wozahila kilamso cha kumtagusila Yesu, avo wamulola ng’hani wone kamba kohonya Mdizua da Mhumulo. 3 Yesu kamulongela ija imunhu yali na mkono uholole, "Ima hano haulongozi wa wanhu wose." 4 Abaho, Yesu kawauza waja iwanhu, "Malagizo getu gotulongela tutende kinhu chaki Mdizua da Mhumulo? Kutenda ganogile ama gehile? Kuukombola ugima wa munhu ama kuubananga?"

Ila hawalongile kinhu chochose. 5 Yesu kawalola wanhu wose na lusango, ila kipigiti kikija kona bazi na giogio sama yao, kwavija wakala na mioyo midala na wapotela. Abaho, kamulongela ija imunhu, "Golosa mkono wako." Na heyo kaugolosa, na mkono wake uhona.

Yesu Komuhonya Mtamu wa Dikulu

12 Yesu viyakalile mdiwambo dimwe da hiko, kaiting’hana na mbigalo imwe yakalile na dikulu lukuli lugima. Viyamonile Yesu, kafugama mavindi, kamulongela mkuiyalala, "Mndewa, uhalonda, kodaha kunihonya."

13 Yesu kagolosa mkono wake kamkwasa yolonga, "Nolonda, hona!" Kipigiti kikija kahona utamu wa dikulu.

18 Baho weza wanhu wampapile munhu yaholole mulusazi, wageza kumwingiza mng’anda wamwike haulongozi wa Yesu. 19 Avija wanhu viwakalile wamemile hawadahile kumwingiza mng’anda. Avo wampapa, wamgala uchana mkiswili, wafumula usoti, wamuhumulusa hamoja na lusazi lwake, na kumwika hagatigati ya ididale da wanhu haulongozi wa Yesu. 20 Yesu viyonile avija viwakalile na nhamanila ng’hulu, kamulongela ija imunhu, "Mbwiga, vilozo vako vigeligwa kumgongo."

21 Wafundiza Malagizo ga Musa na Mafalisayo wasonga kukiiuza, "Iyo yalihi yofukula? Mulungu yeiyeka yodaha kugela kumgongo vilozo va wanhu!"

22 Ila Yesu kazitanga ngelegeza zao, kawauza, "Habali mgelegeza mbuli kamba azo? 23 Dilihi dibuhile ng’hani, kulonga, ‘Vilozo vako vigeligwa kumgongo,’ ama kulonga, ‘Ima wima utembele’? 24 Nolonda m’vitange kamba, nie, Mwana wa Munhu, nna udaho wa kuvigela kumgongo vilozo va wanhu muisi." Abaho kamulongela ija imunhu yaholole, "Ima wima, papa lusazi lwako, uchole ukae yako."

25 Baho ija imunhu kema wima hameso gao wose, kasola lusazi lwake lwayakalile yaluwasile, kachola ukae yake kuno yomuyenzi Mulungu.

Munhu Yali na Mkono Uholole

6 Zua diyagwe da Mhumulo Yesu kengila mng’anda ya nhambiko na kufundiza. Kukala na munhu yaholole mkono wake wa ukulume. 7 Mafalisayo na wafundiza Malagizo ga Musa wakala wozahila kilamso cha kumtagusila Yesu, avo wamulola ng’hani wone kamba kohonya Mdizua da Mhumulo. 8 Yesu kazitanga ngelegeza zao avo kamulongela ija imunhu, "Ima wima, wize hano haulongozi." Ija imunhu kema wima, abaho, kachola haulongozi. 9 Abaho, Yesu kawalongela, "Nowauza, Malagizo getu golonga tutende choni Mdizua da Mhumulo? Tutende ganogile ama gehile? Kumuhonya munhu ama kumkoma?" 10 Kawalola wanhu wose, abaho, kamulongela ija imunhu, "Golosa mkono wako." Na heyo kaugolosa, na mkono wake ubwela goya.

Yesu Komuhonya Nyakadala wa Mkulu wa Asikali Mia wa Loma

1 Yesu viyeshile kulonga mbuli zino zose mwa wanhu, kachola kukiwambo cha Kapenaumu. 2 Mkulu wa asikali mia wa Loma kakala na nyakadala yakalile yamnogele ng’hani, ija inyakadala kakala mtamu ng’hani behi na kudanganhika. 3 Ija imkulu wa iwaasikali mia wa Loma viyahulike singilimo za Yesu, kawatuma wakulu wa Wayahudi wakamulongele yeze yamuhonye nyakadala wake. 4 Viwavikile ha Yesu, wamuyalalila, wolonga, "Munhu ino kalumba kutendeligwa mbuli ino, 5 kwavija kawanogela wanhu zetu, na heyo iyo yatuzengele ng’anda yetu ya nhambiko."

6 Avo Yesu kachola na hewo, viwavikile behi na ing’anda, ija imkulu wa iwaasikali mia wa Loma kawalagiza wambwiga zake wamulongele Yesu vino, "Mndewa, sambiugaye, nie silumbile gweye wize wingile mng’anda yangu, 7 kileka nivigesile kamba silumbile kwiza hamwako nene mwenyego, ila longa mbuli! Na nyakadala wangu kohona. 8 Nie vivija na munhu nikigwe hasi ya udaho wa wakulu zangu wa uchana yangu, na nna asikali hasi yangu. Nihamulongela ino, ‘Genda!’ kochola, nihamulongela ija, ‘Izo!’ kokwiza, na nihamulongela nyakadala wangu, ‘Tenda vino!’ kotenda."

9 Yesu viyahulike gano, kamkanganya munhu ija, kahinduka kuchugu na kudilongela dale da wanhu dikalile dimsondolela, "Nowalongela, sinakona nhamanila ng’hulu kamba ino, hata mwa wanhu wa Islaeli!"

10 Waja watumigwe wabwela kung’anda ya ija imkulu, wam’vika nyakadala wake kahona.

11 Na haja kukala na mtwanzi yalemazwe na kinyamkela mmilao longo dimwe na minane. Kakala yabongomale na hadahile kugoloka hata kidogo. 12 Yesu viyamonile, kamkema haulongozi, kamulongela, "Mama, utamu wako uhona!" 13 Kamwikila makono gake, na bahaja kagoloka na kusonga kumuyenzi Mulungu.

Yesu Komuhonya Mtamu wa Kuvuha Lukuli

1 Zua dimwe da Mhumulo Yesu kachola kuja mandia kung’anda ya mkulu imwe wa Mafalisayo, wanhu wakala womulola goya. 2 Haulongozi wake kukala na munhu yali na utamu wa kuvuha lukuli. 3 Yesu kawauza wafundiza Malagizo ga Musa na Mafalisayo, yolonga, "Malagizo getu gotutogoza kuhonya Mdizua da Mhumulo, ama gotugomesa?"

4 Ila hewo hawalongile kinhu chochose. Yesu kamgoga ija imunhu kamuhonya, abaho, kamuleka yachole na zake.

Yesu Kowahonya Wanhu Longo Dimwe

11 Yesu viyakalile yochola Yelusalemu, kabitila muimbaka ya isi za Samalia na Galilaya. 12 Viyakalile yokwingila muna ikiwambo kimwe, wanhu longo dimwe wolumwa dikulu wamwizila, wema kutalitali, 13 wenula dizwi wolonga, "Mndewa, Yesu, utonele bazi!"

14 Yesu viyawawene kawalongela, "Gendeni ha iwakulu wa nhambiko wakawalole goya."

Viwakalile wochola mnzila wahona. 15 Munhu imwe mmwanza wao viyonile kahona, kabwela, kenula dizwi yomuyenzi Mulungu. 16 Kamfugamila mavindi Yesu na kumgwaa hewela. Na munhu ija kakala Msamalia. 17 Ila Yesu kauza, "Hawakalile wanhu longo dimwe wahonyigwe? Wakwahi wayagwe tisa? 18 Haduhu hata munhu imwe yabwelile kumuheweza Mulungu ila muhenza ino yeiyeka?" 19 Yesu kamulongela, "Ima wima uchole, nhamanila yako ikuhonya."

Uhonyaji hana Dibwawa

1 Abaho, Yesu kachola Yelusalemu kuna ulusona lwa Wayahudi. 2 Kuja Yelusalemu, behi na Lwivi lwa Ng’hondolo, kukala na bwawa dikemigwa Mkieblania "Betizata," dikalile na mhelengo tano. 3 Wanhu bwando wakalile watamu wakala wowasa mmhelengo zija, vimbugumbugu, mbetembete, na wanhu waholole wakala wobeta mazi gatibuke. 4 Kwavija watogola kamba kuna kipigiti msenga wa Mndewa wa kuulanga kohumuluka mdibwawa na kugatibula gamazi. Na mtamu wa ichanduso kwingila mdibwawa kipigiti msenga wa Mulungu yehesha kugatibula, kohonyigwa utamu wose uyalinao. 5 Haja kukala na munhu yakalile mtamu mmilao malongo madatu na minane. 6 Yesu viyamonile munhu ija kawasa haja na viyavitangile kamba munhu ija kakala mtamu mkipigiti kitali, kamuuza, "Kolonda kuwa mgima?"

7 Ija imtamu kamwidika, "Mndewa, nie nabule munhu hano wa kunigela mdibwawa kipigiti mazi gahatibuligwa. Nihalonda kwingila, munhu iyagwe konilongola."

8 Yesu kamulongela, "Ima wima, papa lusazi lwako utembele." 9 Bahaja ija imunhu kahona, kapapa lusazi lwake, kasonga kuchola.

Mbuli ino ilawilila Mdizua da Mhumulo.

46 Abaho, Yesu kabweleganya kuna ikiwambo cha Kana muisi ya Galilaya, ako kuyagalule mazi kuwa divai. Haja kukala na mkulu imwe wa silikali yakalile na mwanage mtamu ako Kapenaumu. 47 Viyahulike kamba Yesu keza kulawa Yudea kwiza Galilaya, kamgendela na kumuyalalila yachole Kapenaumu yakamuhonye mwanage yakalile behi na kudanganhika. 48 Yesu kamulongela, "Kamba hamonile vilaguso na mikanganyo, hamtogola."

49 Ija imkulu wa silikali kamulongela, "Mndewa, izo kipigiti mwanangu hanadanganhika."

50 Yesu kamulongela, "Genda ukae yako, na mwanago kohona."

Ija imkulu wa silikali kazitogola mbuli za Yesu, avo kachola. 51 Viyakalile yobwela ukae, mnzila kaiting’hana na nyakadala zake, wamulongela, "Mwanago kahona."

52 Kawauza kipigiti kilihi mwanage chayahonile, wamulongela, "Ikala saa saba imisi mayo homa imsegela." 53 Avo ija tata wa imwana kakumbukila kamba kikala kipigiti kikija Yesu chayamulongele, "Mwanago kohona." Avo heyo na mulango wake wose wamtogola Yesu.

54 Uno ukala mzonza wa ikabili waatendile Yesu viyalawile Yudea kuchola Galilaya.

20 Baho mtwanzi yakalile na utamu wa kutumika mkipigiti cha milao longo dimwe na mibili kamwizila Yesu kukisogo, abaho, kalukwasa lugigo lwa kivalo chake. 21 Kwavija kakala yoilongela mwenyego, "Ihawa nihagoga tu valo jake, nohona."

22 Yesu kahinduka kamona, kamulongela, "Mndele, gangamala! Nhamanila yako ikuhonya." Kipigiti kikija mtwanzi ija kahona.

25 Bahaja kukala na mtwanzi yakalile na utamu wa kutumika mkipigiti cha milao longo dimwe na mibili. 26 Kakala yagangigwe na mafundi bwando, kasa hela zake zose, na utamu wake ugendelela kongezeka ng’hani. 27 Viyahulike singilimo za Yesu, kengila mdidale da wanhu hachugu cha Yesu na kudikwasa valo jake. 28 Kwavija kalonga munda kwa munda, "Nihakwasa vivalo vake, nohona."

29 Bahaja kutumika kuleka, na kakiihulika mulukuli lwake kamba kahonyigwa utamu wake.

43 Mdidale dija da wanhu kukala na mtwanzi imwe yakalile na utamu wa kutumika mkipigiti cha milao longo dimwe na mibili, kasa vinhu vake vose ha mafundi, ila haduhu yadahile kumuhonya. 44 Kaibabanika mdidale da wanhu hachugu cha Yesu na kukwasa ulugigo lwa guo da Yesu, na bahaja kahona. 45 Yesu kauza, "Yalihi yang’hwasile?"

Wanhu wose wabela, Petulo kalonga, "Mndewa, wanhu wamema woikunhizila kumwako."

46 Ila Yesu kalonga, "Hana munhu kang’hwasa kwavija nokona mhiko zinilawa." 47 Ija mtwanzi viyawene gayatendile gatangigwa, keza yogudema, kafugama mavindi haulongozi wa Yesu. Bahaja hameso ga wanhu wose, kamulongela kimtendile yamkwase na vija vayahonyigwe mkipigiti kiguhi. 48 Yesu kamulongela, "Mwanangu, nhamanila yako ikuhonya. Genda mditindiwalo."

Mndele wa Mkulu na Mtwanzi Yakwasile Valo da Yesu

18 Yesu viyakalile yolonga vino, mkulu imwe wa ng’anda ya nhambiko kamcholela, kamfugamila mavindi, kamulongela, "Mndele wangu sambisambi kadanganhika, ila izo umwikile mkono wako na heyo kowa mgima."

19 Avo Yesu hamoja na wanahina zake, wenuka, wamkoleleza.

23 Yesu viyavikile hakae ya ija imkulu wa ng’anda ya nhambiko, na viyawawene wotoa mhalati,* na wanhu bwando wolila ng’hani, 24 kalonga, "Segeleni! Mndele ino hadanganhike, ila kawasa!" Abaho, wanhu wose wamseka. 25 Didale da wanhu vidilavigwe kunze, Yesu kengila mng’anda, kamgoga mkono ija imndele, na heyo kenuka.

22 Mkulu imwe wa ing’anda ya nhambiko, yokemigwa Yailo, kavika. Viyamonile Yesu, kaibwanha hasi ha magulu gake, 23 kaiyalala kamulongela yomgong’ondeza, "Mndele wangu imdodo mtamu ng’hani. Avo izo umwikile makono gako yahone!"

24 Avo Yesu kachola nayo. Wanhu bwando wamkoleleza wakala wokiibabana nayo ng’ambu zose.

38 Wavika hang’anda ya Yailo, Yesu kona kiyahiyahi na wanhu wolila na kulombokeza. 39 Kengila mng’anda na kuwalongela, "Kiyahiyahi chose kino cha choni? Habali mulila? Mwana hadanganhike ino, ila kawasa!"

40 Wamseka, avo kawalava kunze wose, kawasola tata na mama wa imwana na wanahina zake wadatu, abaho, wengila kugati kuyatambalikigwe imwana. 41 Kamgoga mkono na kumulongela, "Talita komu!" Nhegulo yake, "Mndele, nokulongela, lamuka!"

42 Kipigiti kikija ija imndele kenuka, kasonga kutembela, kwavija kakala na milao longo dimwe na mibili. Vigalawilile gano wanhu wakanganya ng’hani.

31 Yesu kagendelela kulonga, "Vino niwalinganyize na choni wanhu wa mazua gano? Walinga na wanhu walihi? 32 Walinga na wana wakalile hadibugano da soko. Dale dimwe dowalongela dale diyagwe, ‘Tuwatoela ngoma ya lusona lwa zengele, ila mweye ham’vinile! Twimba vawembaga hauzisi, ila mweye hamulilile!’ 33 Yohana M’batiza keza kafunga na hang’wile divai, na mulonga, ‘Kana kinyamkela!’ 34 Nie, Mwana wa Munhu, niza, noja na kung’wa, mulonga, ‘Loleni munhu ino, mmelo na mng’waji, mbwiga wa wawila kodi na wene vilozo wayagwe!’ 35 Kwa vovose vija ng’hungwe ya Mulungu yonekaga mmeso ga awo wose waitogole."

Yesu Hakae ya Simoni Mfalisayo

36 Mfalisayo imwe kamulonda Yesu yeze kuja na heyo mandia ga ikilo, avo Yesu kachola hang’anda ya ija Mfalisayo, kakala hasi yaje. 37 Mkiwambo kija kukala na mtwanzi imwe yakalile yotenda vilozo mazua gose. Kahulika Yesu kakala yoja mng’anda ya Mfalisayo, avo kagala nyhupa ya alabasta ikalile na mavuta ga kunung’hila.

41 Abaho, keza munhu yokemigwa Yailo, kakala munhu mkulu muing’anda ya nhambiko. Kafugama mavindi haulongozi wa Yesu, kamuyalalila yachole kung’anda yake, 42 kwavija mndele wake yavumbuke yeiyeka, yakalile wa ukulu wa milao longo dimwe na mibili, kakala mtamu, behi na kudanganhika.

Yesu viyakalile mnzila, wanhu wammemela ng’ambu zose.

49 Yesu viyakalile yang’hali yolonga gano, keza munhu imwe kulawa kung’anda ya Yailo. Kamulongela Yailo, "Mndele wako kadanganhika, sambiumgaze Mkulufunzi."

50 Yesu kahulika kamulongela Yailo, "Sambiudumbe, tamanila, na mndele wako kohona."

51 Viyavikile hang’anda ya Yailo, hamulondile munhu yoyose kwingila na heyo mng’anda, ila Petulo, Yohana, Yakobo, na tata na mama wa imndele. 52 Wanhu wose walila na kona giogio sama ya ija imndele, Yesu kawalongela, "Sambimulile, mwana mgima, kawasa tu!"

53 Wanhu wose wamseka, kwavija wavitanga kamba kakala yeshile kudanganhika. 54 Ila Yesu kamgoga mkono na kwinula dizwi yolonga, "Mwanangu, lamuka." 55 Loho yake ibwela, kipigiti kikija kalamuka, Yesu kalagiza wamgwelele kinhu yaje. 56 Tataake na mamaake wakanganya ng’hani, ila Yesu kawagong’ondeza sambiwamulongele munhu yoyose gaja galawilile.

Lazalo Kodanganhika

1 Munhu imwe yokemigwa Lazalo, yakalile yokala Betania, kakala yolumwa. Betania kikala kiwambo chawakalile wokala Mata na lumbu jake Maliamu. 2 Maliamu ino iyo yamwitile mavuta ga kunung’hila Mndewa mmagulu na kumuhangusa na mvili zake. Lazalo yakalile yolumwa kakala lumbu jake. 3 Walumbu wano wamgalila usenga Mndewa, wolonga, "Mndewa, mbwigaako yuumnogele kolumwa." 4 Yesu viyahulike, kalonga, "Kimambukizo cha malawililo ga utamu uno hakigala ifa ya Lazalo, ila ulawila giladi Mulungu yayenzigwe. Na mkilamso kino, Mwana wa Mulungu koyenzigwa."

5 Yesu kakala yamnogele Mata na lumbu jake na Lazalo. 6 Viyahulike kamba Lazalo kolumwa, kakala bahaja hayakalile mazua mabili. 7 Abaho, kawalongela wanahina zake, "Tubweleganye Yudea." 8 Wanahina zake wamulongela, "Mkulufunzi, kipigiti kiguhi kibitile Wayahudi wa kuja walonda kukutoa na mabwe, abaho, konda kubweleganya kukuja?"

9 Yesu kalonga, "Zua hadili na masaa longo dimwe na mabili? Avo munhu yoyose yotembela imisi hadaha kuikwala, kwavija kowona mulangaza wa ulumwengu. 10 Ila yahatembela ikilo kokiikwala, kwavija kabule mulangaza." 11 Viyamambukize kulonga gano, kawalongela, "Mbwiga wetu Lazalo kawasa, ila nochola nikamulamuse."

12 Wanahina zake wamulongela, "Mndewa, kamba kawasa, basi kohona."

13 Yesu kakala yalongile ifa ya Lazalo, ila wanahina zake wagiza kawasa utulo wa mazua gose. 14 Avo Yesu kawalongela bila kufisa, "Lazalo kadanganhika,

Yesu Kodikomhokela Beho Mdilamba

23 Abaho, Yesu kakwela muingalawa hamoja na wanahina zake. 24 Bahaja dilawila kukuzumbi kulu mdilamba, avo mawimbi gaimemeza mazi ingalawa. Ila Yesu kakala yawasile. 25 Wanahina zake wamcholela wamulamusa, walonga, "Mndewa, tukombole! Todanganhika!"

26 Yesu kawedika, "Mweye wanhu muli na nhamanila ndodo, habali mkona bwembwe?" Abaho, kenuka na kudikomhokela dibeho na gamawimbi, na kukala hapozike.

27 Wanahina zake wakanganya, walonga, "Ino iyo munhu wa vilihi? Hata beho na mawimbi vomuhulika!"

15 Viivikile ichungulo wanahina wamcholela wamulongela, "Zua diswa na hano twa mkiwala, avo walongele iwanhu wachole m’viwambo wakaigulile mandia."

16 Yesu kawedika, "Hawalondigwa wachole, wagweleleni mweye kinhu cha kuja!"

17 Na hewo wamulongela, "Hano twabule kinhu ila mikate mitano na somba wabili viiyeka."

18 Yesu kawalongela, "Vigaleni hano hamwangu." 19 Kawalagiza wanhu wakale hasi muluzondo, abaho, kaisola imikate mitano na iwasomba wabili, kalola kuulanga, na kumuheweza Mulungu. Abaho kaimogola imikate, kawagwelela wanahina, na wanahina wawagwelela iwanhu. 20 Wose waja na kwiguta. Abaho wanahina wadondola vidanga va imikate na iwasomba visigale, wamemeza vigelo longo dimwe na vibili. 21 Mheta ya wanhu wadile imikate wakala wambigalo alufu tano, uhaleka watwanzi na wana.

25 Mkipigiti cha nzogolo zikwika Yesu kawacholela wanahina zake, yotembela uchana ya igamazi.

Yesu Kowagwelela Mandia Wanhu Bwando Wayagwe

32 Yesu kawakema wanahina zake kawalongela, "Nowonela bazi wanhu wano, kwavija wakala na nie mazua madatu na sambi wabule kinhu cha kuja kisigale. Na nie silonda niwaleke wachole na nzala, sambiweze kusinduka mnzila."

33 Wanahina zake wamulongela, "Kwahi kondatupate mandia ga kuwegutiza wanhu bwando kamba wano mkiwala kino?"

34 Yesu kawauza, "Mikate mingahi imulinayo?"

Wamulongela, "Mikate saba na visomba vidogodogo."

35 Avo Yesu kawalagiza waja iwanhu wakale hasi. 36 Kaisola imikate saba na ivisomba, kamuheweza Mulungu, abaho, kaimogola na kuwagwelela wanahina, na wanahina wadigwelela didale da wanhu. 37 Wose waja na kwiguta. Abaho, wanahina wadondola vidanga va imikate na ivisomba visigale, wamemeza migelo saba. 38 Wanhu wose wadile wakala wambigalo alufu nne uhaleka watwanzi na wana.

Kuliha Kodi ya Ng’anda ya Mulungu

24 Yesu na wanahina zake viwavikile Kapenaumu, wawila kodi wa Ng’anda ya Mulungu wamcholela Petulo wamuuza, "Mkulufunzi wako kalihaga kodi ya Ng’anda ya Mulungu?"

25 Petulo kawedika, "Ona, kalihaga."

Petulo viyengile mng’anda, Yesu kakala waichanduso kulonga nayo, "Simoni, gweye kokonaze? Wandewa wa isi wowila kodi kulawa ha wanhu walihi? Kulawa ha wenekae ama kulawa ha wahenza?"

26 Petulo kamulongela, "Kulawa ha wahenza."

Abaho, Yesu kamulongela, "Kulonga goya, kwavija wenekae hawalondigwa kuliha kodi. 27 Giladi sambituwagevuze, avo genda hana dilamba ukase nduwano, abaho, msole somba yondayalongole kunamata, na uhaunanazula mulomo wake, kovika hela, abaho, isole ukanilihile nie na gweye mwenyego."

Yesu Kowikila Kinyulu Mtini

18 Imitondo ng’hani Yesu viyakalile mnzila yobwela mdiwambo, kona nzala. 19 Kawona mtini hamgwazo wa inzila, kaukwenhukila, ila honile chochose uchana yake ila mijani iiyeka. Abaho, kaulongela, "Sambiulele mujo milao yose!" Bahaja umtini unyala.

20 Wanahina viwawene vino wakanganya, wauza, "Habali umtini unyala himahima?"

21 Yesu kawedika, yolonga, "Nowalongela ikweli, kamba muhawa na nhamanila bila kusinha mmioyo yenu, sio kamba modaha kutenda kija kitendigwe mumtini uno, ila vivija modaha kukilongela kigongo kino, ‘Goboka, uiyase m’bahali,’ na yotendeka. 22 Kamba muhawa na nhamanila, chochose chondampule mkutambika, mogweleligwa."

37 Baho dilawilila kukuzumbi, na mawimbi gasonga kuikunhiza ingalawa, avo isonga kumema mazi. 38 Yesu kakala kukisogo mwa ingalawa kawasa kuno pala jake kasagamila muna umto. Wanahina wamulamusa wamulongela, "Mkulufunzi! Hukona vihile vitulonda kudanganhika?"

39 Yesu kema wima kadikomhokela dibeho, yolonga, "Nyamala!" Na kagalongela ga mawimbi, "Ituze!" Beho dinyamala, na kukala hapozike. 40 Abaho, Yesu kawalongela wanahina zake, "Habali mkona bwembwe? Mng’hali mwabule nhamanila?"

41 Ila wakala wodumba ng’hani na wakala wokiilongela, "Munhu waki ino? Hata beho na mawimbi vomuhulika!"

35 Zua vidiswile, wanahina zake wamcholela wamulongela, "Zua diswa na hano hatuli twa muluwala, 36 walongele wanhu wachole mmigunda na m’viwambo va mmabehi giladi wakagule vinhu vakuja."

37 Yesu kawedika, "Wagweleleni mwenye vinhu vakuja."

Na hewo wamuuza, "Kolonda tuchole tukawagulile mikate ya kitumetume cha munhu cha milenge minane tuwagwelele waje?"

38 Avo Yesu kawauza, "Mikate mingahi imulinayo? Gendeni mkalole."

Viwayonile, wamulongela, "Ilibaho mikate mitano na somba wabili."

39 Abaho, Yesu kawalongela wanahina zake wawagole wanhu wose muna gamadale na kuwalongela wakale hasi muluzondo. 40 Avo wanhu wakala hasi mmadale ga wanhu miamia na wanhu malongo matanomatano. 41 Abaho, Yesu kaisola ija imikate mitano na iwasomba wabili, kalola uchana kuulanga, na kamgwelela hewela Mulungu. Kaimogola imikate na kuwagwelela wanahina zake wawagolele wanhu. Vivija kawagolela iwasomba wabili wanhu wose. 42 Wanhu wose waja na kwiguta. 43 Abaho, wanahina wadondola migelo longo dimwe na mibili ya imikate na iwasomba wasigale. 44 Mheta ya wambigalo wadile wakala alufu tano.

48 Kawona wanahina zake wogaya kuzikunhiza zinyiko kwavija wakala wochola kudilawa beho, avo mkipigiti cha hagatigati ya nzogolo zikwika na imitondo, kawacholela yotembela uchana ya igamazi. Kalonda kuwabita, 49 ila wamona yotembela uchana ya igamazi. Watoa nyangi wagiza wona mzimu. 50 Wose viwamuwene wona bwembwe.

Bahaja Yesu kawalongela, "Iyo nie, sambimdumbe." 51 Abaho, kakwela mngalawa hamoja nao, na dibeho dinyamala. Wanahina zake wakanganya ng’hani.

Yesu Kowagwelela Mandia Wanhu Alufu Nne

1 Mazua madodo hamwande, dale kulu diyagwe da wanhu waiting’hana hamoja. Wanhu wakala wabule kinhu chochose cha kuja, Yesu kawakema wanahina zake kawalongela, 2 "Nowonela bazi wanhu wano, kwavija wakala na nie mazua madatu, na kipigiti kino wabule kinhu cha kuja. 3 Nihawalongela wachole mkae zao na nzala, wosinduka mnzila, kwavija wayagwe walawa kutali."

4 Wanahina zake wamuuza, "Muluwala luno kwahi munhu kondayazahile mandia ga kuwagwelela wanhu wose wano?"

5 Yesu kawauza, "Mikate mingahi imulinayo?"

Wamulongela, "Mikate saba."

6 Yesu kadilongela didale da wanhu dikale hasi. Abaho, kaisola ija imikate saba, kalonga hewela ha Mulungu, kaimogola na kuwagwelela wanahina zake wawagolele iwanhu, na wanahina watenda kamba viwalagizwe. 7 Vivija wakala na visomba vidogodogo. Yesu kalonga hewela ha Mulungu, vivija kawalongela wanahina zake wawagolele iwanhu. 8 Wanhu wose waja weguta, wanahina zake wadondola, wamemeza migelo saba ya vakuja visigale! 9 Wakala wanhu alufu nne. Yesu kawalaga iwanhu wachole kumwao.

Yesu Kawikila Kinyulu Mtini

12 Imitondo iyagwe, viwakalile wosegela kulawa Betania, Yesu kakala na nzala. 13 Kawona hatalitali m’biki ukemigwa mtini utimile mitepo, avo kachola kuulola siku kovika tini. Ila viyaukwenhukile, kavika mitepo yeka, kwavija haukalile msimu wa tini. 14 Yesu kaulongela uja umtini, "Haduhu munhu yoyose yondayaje tini kulawa kumwako milongo yose!"

Na wanahina zake wamuhulika.

Fundo da Mtini

20 Imitondo iyagwe, viwakalile wobita mnzila, wawona umtini unyala kusongela kunhembeti mbaka mmizizi. 21 Petulo kakumbukila mbuli zija Yesu zayaulongele umtini, kamulongela Yesu, "Lola, mkulufunzi, uja umtini uwikile kinyulu uholola!"

22 Yesu kawedika, "Mtamanileni Mulungu. 23 Nowalongela ikweli, munhu yoyose yahakilongela kigongo kino, ‘Goboka ukalagalile m’bahali,’ bila kudungwadungwa mmoyo wake ila kotamanila gaja gayalongile, kotendeligwa. 24 Avo nowalongela, avija vumtambika na kupula kinhu kulawa ha Mulungu, tamanileni kamba m’bokela, na mogweleligwa kinhu chochose chumpula. 25 Na muhawa muna inhambiko, geleni kumgongo kinhu chochose chumuihasanye na munhu yoyose, avo Tata wenu wa kuulanga kovigela kumgongo vilozo venu vumtendile."

Yesu Kowakema Wanahina wa Ichanduso

1 Zua dimwe Yesu kakala yemile hamgwazo wa Idilamba da Genesaleti. Wanhu wakala wokiibabanika wokwenhuka behi na heyo kutegeleza mbuli za Mulungu. 2 Kazona ngalawa mbili mulugigo lwa idilamba, zikigwe haja na waloa somba, wakalile wosuluza nhando zao. 3 Yesu kengila mngalawa imwe ikalile ya Simoni, kamulongela Simoni yaikwenhuse hamwande, hatalitali na ulugigo lwa idilamba. Yesu kakala mngalawa yowafundiza wanhu bwando.

4 Viyeshile kulonga kamulongela Simoni, "Kwenhusa ingalawa hamwande hana ididindi da idilamba, na gweye na wayago tandeni nhando zenu muloe somba."

5 Simoni kamulongela, "Mndewa, tugonelela tuloa somba hatupatile kinhu, ila kwavija gweye kulonga, nozitanda nhando." 6 Viwazitandile izinhando, wonza somba bwando, na nhando zao zisonga kukanhika. 7 Wawakema wayao wakalile mngalawa iyagwe weze kuwataza. Weza wamemeza somba ngalawa zose mbili, avo ngalawa zikala mmabehi kudidimila mmazi. 8 Simoni Petulo viyagonile gaja, kafugama mavindi haulongozi wa Yesu, yolonga, "Mndewa, sambiung’hwenhukile kwavija nie nna vilozo!"

9 Simoni na wayage wose wakanganya avija viwonzile somba bwando kamba vija. 10 Yakobo na Yohana wanage Zebedayo, wakalile waloa somba wayage Simoni, vivija wakanganya. Yesu kamulongela Simoni, "Sambiudumbe, kusongela lelo kowa muloa wanhu."

11 Wazikwekwesa zingalawa wazika mumgwazo wa idilamba, waleka gose wamkweleleza Yesu.

Yesu Kodikomhokela Beho Mdilamba

22 Zua dimwe Yesu kawalongela wanahina zake, "Natuloke mwambu wa ikabili wa idilamba." Avo wengila mngalawa wasonga kuloka. 23 Viwakalile woloka, Yesu kawasa utulo. Wedukila kukuzumbi dikwiza mdilamba, na ingalawa isonga kumema mazi, avo wose wakala mmwangalo. 24 Wanahina wachola ha Yesu wamulamusa, wolonga, "Mndewa, Mndewa! Todanganhika!"

Yesu kalamuka kadikomhokela dikukuzumbi na umnyukwamnyukwa wa igamazi, vose vihola, hakala hapozike. 25 Abaho, kawalongela wanahina zake, "Nhamanila yenu ili kwahi?"

Wakanganya ng’hani, kuno wona bwembwe, wakiilongela, "Ino munhu waki? Kodikomhokela beho na igamawimbi, na vose vomtegeleza!"

Yesu Kodikomhokela Beho Mdilamba

22 Zua dimwe Yesu kawalongela wanahina zake, "Natuloke mwambu wa ikabili wa idilamba." Avo wengila mngalawa wasonga kuloka. 23 Viwakalile woloka, Yesu kawasa utulo. Wedukila kukuzumbi dikwiza mdilamba, na ingalawa isonga kumema mazi, avo wose wakala mmwangalo. 24 Wanahina wachola ha Yesu wamulamusa, wolonga, "Mndewa, Mndewa! Todanganhika!"

Yesu kalamuka kadikomhokela dikukuzumbi na umnyukwamnyukwa wa igamazi, vose vihola, hakala hapozike. 25 Abaho, kawalongela wanahina zake, "Nhamanila yenu ili kwahi?"

Wakanganya ng’hani, kuno wona bwembwe, wakiilongela, "Ino munhu waki? Kodikomhokela beho na igamawimbi, na vose vomtegeleza!"

Yesu Komuhonya Munhu Yali na Vinyamkela

26 Yesu na wanahina zake wagendelela kuloka, wavika mhwani ya isi ya Gelasi ili mwambu wa ikabili wa Idilamba da Galilaya.

12 Zua vidisongile kuhonga, wanahina longo dimwe na wabili wamwizila wolonga, "Walongele wanhu wachole kuviwambo na kumigunda ili behi wakazahile mandia na uwaso, kwavija hano hatuli twa muluwala."

13 Ila Yesu kawalongela, "Wagweleleni mweye wenyego kinhu cha kuja."

Wamulongela, "Vitulinavo tweye mikate mitano na somba wabili. Kolonda tuchole kuwagulila mandia wanhu wano wose?" 14 Haja wakala wanhu wambigalo kamba alufu tano vino.

Yesu kawalongela wanahina zake, "Walongeleni wanhu wakale hasi mmadale ga wanhu malongo matanomatano."

15 Wanahina watenda vija, na wanhu wose wakala hasi. 16 Yesu kasola imikate mitano na iwasomba wabili, kalola uchana kuulanga, kamgwaa hewela Mulungu, kavimogola kawagwelela wanahina zake wawagolele iwanhu. 17 Wanhu wose waja weguta, wanahina wadondola vidanga va vakuja visigale migelo longo dimwe na mibili.

Lusona lwa Zengele Mkiwambo cha Kana

1 Zua da ikadatu kukala na lusona lwa zengele mkiwambo kikemigwa Kana muisi ya Galilaya. Mamaake Yesu kakala bahaja. 2 Yesu na wanahina zake vivija wagonekigwa hana ulusona luja lwa zengele. 3 Divai viimalile, mamaake Yesu kamulongela, "Wabule divai."

4 Yesu kamulongela, "Mama, gano gavikaze kumwetu? Kipigiti changu hakinavika."

5 Abaho, mamaake Yesu kawalongela waja wakalile wosang’hanika na vakuja, "Tendeni chochose chondayawalongele."

6 Haja kukala na minongo sita ya mazi itendigwe na mabwe, na kila nongo dimwe dikala na ukulu wa nongo mbili ama ndatu kwavija Wayahudi wakala na nzoela ya kuinava makono na magulu. 7 Yesu kawalongela waja wakalile wosang’hanika, "Memezeni mazi minongo ino." Avo wamemeza minongo yose mbaka hamulomo. 8 Abaho, kawalongela, "Haya, deheni vimazi vidodo mkamgwelele mkulu wa ulusona." Wasola gamazi wamgalila mkulu wa ulusona. 9 Mkulu wa ulusona viyagalanzile gamazi gakalile gagaluke divai, kakanganya kwahi kuilawile divai ija. Ila waja wakalile wosang’hanika na ulusona wadehile gamazi wavitanga, avo kamkema imulawilamhambe, 10 kamulongela, "Wanhu wose wagomelaga divai inogile haichanduso, na iwahenza wehesha kung’wa ng’hani kowagomela divai igwaduke, ila gweye kwika divai inogile mbaka vino!"