Milagres de Jesus

Yesu kowahonya vipofu waidi

27 Yesu kahasegela hanhu haja, wanhu waidi vipofu wamsondelela na kuno wolandula madizi yawo, "Mwana wa Daudi uchiwonele ubazi!"

28 Yesu viyengile mwikaye wanhu waidi vipofu wamsondelela, Yesu kawauza, "Vino mohuwila kuwa niye nodaha kuwahonya?"

Wamwidika, "Ona, Mwenevale!"

29 Maabaho Yesu kawadalisa meso yawo na kalonga, "Ilawilile fana vimuhuwila!" 30 Yameso yawo yafunguka. Yesu kawalagiliza, "Sekemumulongele munhu wowose ija mbuli zino!"

31 Mbali wasegela, na wapwililisa mbuli za Yesu muna isi ija yose.

Yesu kowahonya vipofu waidi

29 Yesu na wanahina wake viwakalile wolawa Yeliko, lung’husesa lukulu lwa wanhu lumsondelela. 30 Wanhu waidi vipofu wakala wakalile mumgwazogwazo ya inzila. Viwahulike Yesu kofosa, wandusa kuguta, "Mndewa! Mwana wa Daudi, uchiwonele ubazi."

31 Lung’husesa luwabwakila, wawalongela wanyamale. Mbali wawo waiyoha kulandula yamadizi, "Mndewa! Mwana wa Daudi! Uchiwonele ubazi!"

32 Yesu kema na kawatanga, kawauza, "Molonda nimtendeleni choni?"

33 Wamwidika, "Mndewa, cholonda kuwona!"

34 Yesu kawawonela ubazi na kawadalisa meso yawo. Bahobaho wadaha kuwona, nawo wamsondelela.

Yesu komuhonya chipofu uko Besisaida

22 Wafika mudibululu da Besisaida, wanhu wemwenga wamgalila Yesu munhu chipofu na wamulamba yandalise. 23 Yesu kamwamha mkono munhu ija chipofu, kanigala kunze ya dibululu. Maabaho kamtemela mate muna yameso, kamwikila makono yake na kumuuza, "Vino kodaha kulola chinhu?"

24 Munhu ija kalola kuchanyha, kalonga, "Ona! Nowona wanhu, mbali walinga mibiki yogenda."

25 Yesu kamwikila kaidi makono muna yameso. Maabaho meso yake yavuguka, nayo kawa mgima, na kawona vinhu vose funhufunhu. 26 Yesu kamulagiliza chipofu yahite ukaye kumwake na kamgomesa sekeyabwele mudibululu diya.

Yesu kamuhonya munhu yoyakalile chinziwi bubu

31 Maabaho Yesu kasegela isi ya Tilo na kahita mudilamba da Galilaya kufosela Sidoni na mwiisi ya Dekapoli. 32 Wanhu wamwenga wamgalila munhu yoyakalile chinziwi na yeli na ludanha, wamulamba Yesu yamwikile makono munhu iyo. 33 Ivo Yesu kamsola munhu iyo hamgwazo helibule wanhu. Kaguma vidole vake muna yamagutwi ya munhu iyo. Maabaho katema yamate na kumdalisa lulimi. 34 Maabaho Yesu kalola kuulanga, kabweleza umuhe na kumulongelela munhu iyo, "Efata!" Fambulo jake, "Vuguka!"

35 Bahobaho munhu iyo kandusa kuhulika na ludanha lwa lulimi lwake lulegela, kandusa kulonga goya. 36 Maabaho Yesu kawagomesa kumulongela munhu yoyose mbuli ino. Mbali vayagendelele kuwagomesa, niivo vawagendelele kuipwililisa mbuli iyo. 37 Wanhu wazanywa ng’hani, walonga, "Katenda yose vinogile. Kawatenda vinziwi wahulike na mabubu walonge!"

Yesu komuhonya chipofu Batulome

46 Maabaho wafika Yeliko. Yesu na wanahina wake hamwe na lung’husesa lukulu lwa wanhu vawakalile wosegela mudibululu ijo, chipofu imwe yoyatangigwe Batulome mwana wa Timayo kakala yakalile mumgwazogwazo mwa inzila, kopula. 47 Viyahulike Yesu Mnazaleti kofosa baho, kandusa kutanga kwa dizi kulu, "Yesu! Mwana wa Daudi! Niwonele ubazi!"

48 Wanhu wengi wambwakila na wamulongela yanyamale. Mbali yeye kagendelela kutanga kwa dizi kulu, "Mwana wa Daudi, niwonele ubazi!"

49 Yesu katimalala na kulonga, "Mulongeleni yeze."

Ivo wamtanga ija chipofu, wamulongela, "Igangamize! Ima, kokutanga!"

50 Kawasa ngolole wake, kazumha na kumwitila Yesu.

51 Yesu kamuuza, "Nikutendele choni?"

Chipofu iyo kamwidika, "Mfundiza, nolonda kuwona."

52 Yesu kamulongela, "Hita, kuhuwila kwako kukuhonya."

Lusita ulo chipofu kadaha kuwona, kamsondelela Yesu mzila.

Yesu komuhonya chipofu

35 Yesu viyakalile habehi kufika Yeliko, munhu imwe chipofu kakala mumgwazo ya inzila kopula. 36 Viyahulike lung’husesa lwa wanhu lwofosa, kauza, "Kuna choni?"

37 Wamulongela, "Yesu wa Nazaleti kofosa."

38 Nayo kalandula dizi, "Yesu! Mwana wa Daudi! Niwonele ubazi!"

39 Wanhu wowalongole wambwakila na kumulongela yanyamale, mbali yeye kaiyoha kulandula dizi, "Mwana wa Daudi, niwonele ubazi!"

40 Yesu kema, kawalongela wanhu wamgale kumwake. Chipofu ija viyafikile habehi, Yesu kamuuza, 41 "Kolonda nikutendele choni?"

Kamwidika, "Mndewa, nolonda kuwona."

42 Yesu kamulongela, "Lola! Kunihuwila kwako kukuhonya."

43 Bahobaho chipofu ija kadaha kuwona, kamsondelela Yesu kuno komwing’ha hewela Mulungu. Wanhu viwawonile ivo, ivia wamtunhiza Mulungu.

Yesu komuhonya munhu yoyelekigwe chipofu

1 Yesu viyakalile kofosa, kamuwona munhu imwe chipofu kusongela kwelekigwa kwake. 2 Wanahina wake wamuuza, "Mfundiza, yelihi yoyatendile uhasanyi hata munhu ino yelekigwe chipofu? Vino ni yeye mweneywo hebu tati yake na mami yake?"

3 Yesu kawedika, "Dino hadilawilile bule kwa sama ya uhasanyi wa munhu ino wala wa tati yake na mami yake. Munhu ino kelekigwa chipofu muladi nguvu ya Mulungu ilagusigwe muna ugima wake. 4 Cholondeka kumsang’hanila ija yanhumile kung’hali imisi. Kwaviya chilo chokwiza, habule munhu yoyose yondayadahe kusanana. 5 Vinili ning’hali muna iisi, Niye niijo bung’hulo da isi."

6 Viyamalile kuyalonga yayo, katema mate hasi, maabaho katenda nhope na kamuhaka ija ichipofu mmeso. 7 Maabaho kamulongela, "Hita ukanawe muna dilamba da Siloamu." Siloamu fambulo jake "Yoyatumigwe". Baho iyo chipofu kahita, kanawa chihanga chake, maabaho kabwela ukaye kuno kowona.

2 Maabaho munhu imwe yakalile na dikulu kamuhitila Yesu, kumtumbalila mavindi haulongozi wake na kumulongela, "Mndewa wahalonda kodaha kunisafya."

3 Yesu kaugolosa mkono wake na kumdalisa munhu iyo. Kamulongela, "Nolonda safyika!" Bahobaho munhu ija kasafyika. 4 Maabaho Yesu kamulongela, "Tegeleza! Sekeumulongele munhu yoyose, mbali uhite ukailaguse kwa mkulu wa nhambiko kulagusa kuwa kuhona. Maabaho katambike kuna Ikaye ya Mulungu fana Musa viyalagilize, na chila munhu kezavimanya kuwa kuhona."

2 Wanhu wamgalila munhu yaholole yoyatambalale muna dikomwa. Yesu viyawone uhuwilo wawo kamulongela munhu yaholole, "Mwanangu igangamize, kulekeleligwa uhasanyi wako."

3 Maabaho wafundiza Malagilizo wamwenga wailongela, "Munhu ino komuliga Mulungu!"

4 Yesu kavimanya yaja yowakalile wogesa, ivo kalonga, "Habali mwogesa yehile muna imizoyo yenu? 5 Vino dilihi dibuhile? Kulonga, ‘Kulekeleligwa uhasanyi wako,’ hebu kulonga, ‘Inuka uhite?’ 6 Mbali muvimanye vino, Mwana wa Munhu kana udaho wa kulekelela uhasanyi muna iisi." Maabaho kamulongela munhu yaholole, "Inuka, sola komwa jako uhite ukaye!"

7 Munhu iyo kenuka na kahita ukaye.

10 uko kukala na munhu yaholole umkono. Wanhu wamwenga wakalile haja wowalondile kumgeza Yesu muladi yabanange, ivo wamuuza, "Vino vinoga kumuhonya munhu muna Isiku ya Mhumulo."

11 Yesu kawedika, mweye vimuli hano yelihi ng’hondolo wake yahagwa muna dikombo muna isiku ya Mhumulo na hezamulava kunze bule? 12 Vimuwona mweye vino ng’hondolo kofaya kufosa munhu? Kwaviya vinoga kusang’hana yanogile muna Isiku ya Mhumulo. 13 Maabaho kamulongela munhu ija, "Golosa mkono wako." Nayo kagolosa mkono wake, na uhona fana viya mkono wake we kaidi.

30 Mkoi wa Saimoni kakala yagonile mudikomwa, kolumwa. Bahobaho Yesu viyafikile wamulongela mbuli za mtamu iyo. 31 Kamuhitila, kamwamha mkono na kumwinula. Utamu umulawa, naye kandusa kuwasang’hanila.

Yesu komuhonya munhu yoyakalile na dikulu

40 Munhu imwe yeli na dikulu kamwizila, kumtumbalila mavindi na kumpula. Kalonga, "Wahalonda, kwodaha kunihonya."*

41 Yesu kamuwonela ubazi, kaugolosa umkono wake, kamdalisa na kumulongela, "Nolonda kukutaza, hona!" 42 Na bahobaho dikulu dilawa, kahona.

3 Weza wanhu wane, wampapa munhu yahololile, wamgala kwa Yesu. 4 Kwa chimu kukala na wanhu wengi, hawadahile kuwa habehi na Yesu. Ivo watobola kuchisuwili, kulinga haja hayakalile Yesu. Baho, wamuhulumusa munhu ija yahololile muidilili. 5 Yesu viyawonile uhuwilo wawo, kamulongela munhu ija yahololile, "Mwanangu, kusegezigwa uhasanyi wako."

6 Wafundiza Malagilizo wamwenga wakalile baho wandusa kuyiuza wenyewo, 7 "Hambwe vino ni chinhu chilihi chochimtenda yalonge ivo? Ino komuliga Mulugu! Mulungu yaidumwe yodaha kusegeza uhasanyi!"

8 Bahobaho Yesu kavimanya yaja yawakalile wogesa mwi imyoyo yawo. Ivo kawalongela, "Habali mwogesa ivo mwi imizoyo yenu? 9 Dilihi dibuhile, kumulongela munhu yahololile, ‘Uhasanyi wako usegezigwa, hebu kulonga, inuka, papa dilili jako wite’? 10 Mbali muvimanye vino, Mwana wa Munhu kana udaho wa kusegeza uhasanyi mwiisi." Maabaho kamulongela munhu yahololile, 11 "Nokulongela, inuka, upape lili jako na wite ukaye!"

12 Nayo kenuka, kapapa lili jake na kulawa kunze wanhu wose womulola. Wose wazanywa na wamtunhiza Mulungu, walonga, "Hachina chiwona chinhu chino!"

Yesu komuhonya munhu yahololile mkono

1 Yesu kengila kaidi mwii Kaye ya Kutosela. Baho kukala na munhu yahololile mkono. 2 Wanhu wamwenga wakala wolonda chimu cha kumgwila Yesu. Ivo wamulola fana kezamuhonya mwii Isiku ya Mhumulo. 3 Yesu kamulongela munhu yahololile mkono, "Izo hano haulongozi." 4 Maabaho Yesu kawauza wanhu waja, "Chilihi chinogile kutendigwa muna Isiku ya Mhumulo, kutenda yanogile hebu kutenda yehile? Kuukombola ugima wa munhu hebu kuukoma?"

Mbali hawalongile chinhu. 5 Yesu kawalola waja wanhu kwa ludoko, na kawona usungu muumoyo wake kwa chimu cha udala wa mizoyo yawo. Maabaho kamulongela munhu yahololile, "Golosa umkono wako." Nayo kaugolosa, bahobaho umkono wake uhona.

Yesu komuhonya munhu yeli na dikulu

12 Yesu viyakalile muna dibululu dimwe, munhu imwe yeli yolumwa dikulu lukuli lwose keza. Viyamuwone Yesu, kaibwanha hasi chingubingubi na kumulamba, "Mndewa, wahalonda, kodaha kunihonyo!" *

13 Yesu kaugolosa mkono wake, kandalisa na kulonga, "Nolonda, Hona!" Bahobaho munhu ija utamu umulawa.

18 Wanhu wamwenga weza, wampapa muna dikomwa munhu imwe yaholole, wageza kumwingiza mgati wamwike haulongozi wa Yesu. 19 Mbali wapotwa kwingila mgati kwaviya wanhu wakala wengi. Ivo wamkweza iyo yaholole kuichisuwili, watobola zonzo, maabaho wamuhulumusa muna dikomwa jake na kumwika hagati ha lung’husesa lwa wanhu, haulongozi wa Yesu. 20 Yesu viyawone uhuwilo wowakalile nawo, kamulongela munhu iyo yaholole, "Mbwiyangu, kulekeleligwa uhasanyi wako."

21 Wafundiza Malagilizo na Mafalisayo wandusa kuiwuzagiza, "Ino yelihi yoyomuliga Mulungu! Vino kuna munhu yoyodaha kulekelela uhasanyi? Mulungu yaidumwe iyo yodaha kulekelela uhasanyi!"

22 Yesu kavimanya magesa yawo, kawauza, "Habali mwogesa mbuli izo muna imizoyo yenu? 23 Dilihi dibuhile, kulonga, ‘Kulekeliligwa uhasanyi wako’ hebu kulonga, ‘Inuka uhite?’ 24 Mbali muvimanye kuwa, Mwana wa Munhu kanawo udaho wa kulekelela uhasanyi muna iisi yose." Baho kamulongela ija yaholole, "Nokulongela, inuka wiitwike komwa jako, uhite ukaye yako!"

25 Bahobaho munhu ija yoyakalile kaholola kema haulongozi wawo, kaitwika dikomwa doyakalile kagonela, kahita ukaye yake yahamtunhiza Mulungu.

Munhu yaholole umkono

6 Muna Isiku ya Mhumulo dimwenga, Yesu kahita kufundiza wanhu mwiikaye ya kutosela. Muja mgati mwiikaye ya kutosela mukala na munhu yakalile kaholola mkono wa kulume. 7 Wafundiza Malagilizo na Mafalisayo wamwenga wakala wolonda chimu cha kumshitaka Yesu. Ivo wakala wogozela walole fana kezamuhonya munhu muna Isiku ya Mhumulo. 8 Mbali Yesu kavimanya magesa yawo, kamulongela ija yeli na umkono uholole, "Inuka, wize wime hano." Munhu ija kenuka na kwima haja. 9 Maabaho Yesu kawalongela, "Nowauza mweye, Vino Malagilizo yetu yochilonda chitende choni muna Isiku ya Mhumulo? Kutenda yanogile hebu yehile? Kuhonya ugima wa munhu hebu kuukoma?" 10 Kawalola wanhu wose wowakalile haja, maabaho kamulongela ija yaholole umkono, "Golosa umkono wako." Nayo katenda ivo na umkono wake uhona kaidi.

Yesu komuhonya mtumwa wa mkulu wa wakalizi gana dimwe wa Loma

1 Yesu viyakomeleze kulonga mbuli izo zose kwa wanhu, kahita Kapelinaumu. 2 Mtumwa wa mkulu imwe wa wakalizi gana dimwe wa Loma kakala mtamu, habehi na kudanganika. Mkulu iyo kakala komulonda ng’hani mtumwa ija. 3 Mkulu iyo viyahulike mbuli za Yesu, kawatuma walala wamwenga wa Chiyahudi kumulamba Yesu yeze yamuhonya mtumwa wake. 4 Viwafikile kwa Yesu, wamulamba ng’hani, walonga, "Munhu ino kofaya umtaze, 5 kwaviya kowalonda wanhu, iviya kachizengela kaye ya kutosela."

6 Ivo Yesu kahita hamwe na wawo. Viyakalile habehi kufika mwiikaye ya mkulu ija, mkulu ija kawatuma mbwiya zake wakamulongele Yesu, "Mndewa, sekewigaze kwiza kuno, kwaviya niye sifaya weye wingile mwiikaye yangu. 7 Iviya niiwona sifaya lekamana sizile kumwako. Mbali longa mbuli muhala, msang’hani wangu kezahona. 8 Kwaviya na niye ni munhu nili na udaho, na ninawo wakalizi hasi yangu. Nahamulongela imwe, ‘Hita,’ nayo kohita, na nahamulongela imwenga, ‘Izo,’ nayo kokwiza, na nahamulongela mtumwa wangu, ‘Tenda chino,’ nayo kochitenda."

9 Yesu viyahulike yayo, kazanywa, kauhindukila luja ulung’husesa wa wanhu woukalile womuinza, kalonga, nowalongelani, "Sinawona munhu yeli na uhuwilo mkulu fana uno hata munaiisi ya Isilaeli!"

10 Wanhu waja wowatumigwe viwabwelile ukaye kwa mkulu ija, wamfika mtumwa ija kahona.

11 Na baho hakala na mwanamke imwe yoyakalile na chinyamkela chochamtendile yawe mtamu kwa miyaka longo na minane. Kakala kaveduka na hadahile bule kugoloka. 12 Yesu viyamuwonile, kamtanga, kamulongela, "Mama, kuhonyigwa utamu wako!" 13 Maabaho Yesu kamwikila makono mwanamke iyo, na bahobaho mwanamke iyo kagoloka, kamtunhiza Mulungu.

Yesu komuhonya munhu mtamu

1 Siku imwe ya Mhumulo, Yesu kengila kuja mwiikaye ya mkulu wa Mafalisayo. Wanhu wakala womsepasepa Yesu. 2 Munhu imwe yoyakalile na safula keza kwa Yesu. 3 Yesu kawauza wafundiza Malagilizo na Mafalisayo, "Vino Malagilizo yetu yotogola kumuhonya munhu munaisiku ya Mhumulo hebu hayatogola bule?"

4 Mbali wawo hawalongile chochose. Yesu kamwamha munhu ija na kamuhonya, maabaho kamuleka yahite.

Yesu kowahonya wanhu longo wene dikulu

11 Yesu viyakalile mwiinzila kuhita Yelusalemu, kafosela Samaliya na Galilaya. 12 Viyakalile kokwingila munaichibululu chimwe, kaiting’hana na wanhu longo wene dikulu wema kutali. 13 Waguta kwa dizi kulu kuno wolonga, "Yesu, Mndewa, uchiwonele ubazi!"

14 Yesu kawalola, kawalongela, "Hiteni mukailaguse kwa wakulu wenu wa nhambiko."

Viwakalile mwiinzila, wasafyika. 15 Imwe wawo viyawonile kuwa kahonyigwa, kabwela, kamtunhiza Mulungu kwa dizi kulu. 16 Kaibwanha mmagulu ya Yesu na kumwing’ha hewela. Munhu iyo kakala Msamaliya. 17 Yesu kalonga, "Vino hawahonyigwe bule wanhu longo? Lelo waja kenda wakulihi? 18 Vino habwelile hata imwe kumwing’ha utunhizo Mulungu ila mgeni ino muhala?" 19 Maabaho Yesu kamulongela munhu ija, "Ima na uhite, uhuwilo wako ukuhonya."

Yesu komuhonya munhu

1 Hamwande Yesu kahita Yelusalemu kuna didugila da Wayahudi. 2 Uko Yelusalemu, habehi na ulwivi lukulu lwa ng’hondolo kukala na lamba doditangigwa kwa Chiyebulaniya Betisaza, najo dikala na vihelengo vitano. 3 Wanhu wengi wowakalile watamu wakala watambalala muvihelengo ivo. Vipofu na mbetembete na wanhu wowaholole. Wakala wogozela yamazi yatibuligwe. 4 Kwaviya lusita lumwenga msenga wa kuulanga kohulumuka na kwingila muna dilamba na kuyatibula yamazi. Mtamu yokwandusa kwingila munayamazi viyatibuke, kakala kohonyigwa utamu wowose uyakalile nawo. 5 Haja hakala na munhu yakalile kolumwa kwa lusita lwa miyaka malongo matatu na nane. 6 Yesu viyamuwone mtamu ija katambalala haja, kavimanya kuwa kakala mtamu kwa siku nyingi. Ivo kamuuza, "Vino weye kolonda kuhona?"

7 Mtamu ija kamwidika, "Mwenevale, nabule munhu wa kunika muna dilamba lusita yahatibuligwa. Chila honilonda kwingila, munhu imwenga konilongolela."

8 Maabaho Yesu kamulongela, "Inuka! Sola lili jako uhite." 9 Bahobaho mtamu ija kahonyigwa, kasola lili jake, kahita.

Chinhu icho chilawilila muna Isiku ya Mhumulo,

46 Maabaho Yesu kahita kaidi Kana muna isi ya Galilaya, hanhu hayagaluse mazi kuwa divai. Baho hakala mkulu imwe yeli na mwana mtamu uko Kapelinaumu. 47 Mkulu iyo viyahulike Yesu kafika muna iisi ya Galilaya kulawa Yudeya, kamulamba Yesu yahite Kapelinaumu yakamuhonye mwanage yoyakalile habehi kudanganika. 48 Yesu kamulongela, "Kumwenu habule munhu yoyodaha kutogola mbaka yawone vilaguso na mauzauza."

49 Mkulu ija kamwidika, "Mwenevale, chihite sambi mwanangu yang’hali hanadanganika."

50 Yesu kamulongela, "Hita, mwanago kezahona."

Mkulu ija kahuwila mbuli za Yesu, ivo kahita. 51 Viyakalile mwiinzila, kaiting’hana na watumwa wake, wamulongela, "Mwanago kahona!"

52 Nayo kawauza lusita luyahonile mwanage, watumigwa wamwidika, "Utamu umulawa igolo ifosile saa saba imisi." 53 Maabaho tata iyo kakumbuka lukala lusita luja luja Yesu viyamulongele, "Mwanago kezahona." Ivo yeye hamwe na kaye yake yose wamuhuwila Yesu.

54 Chino chikala chilaguso cha mauzauza chekaidi chiyatendile Yesu viyalawile Yudeya kuhita Galilaya.

20 Mama imwe yakalile na utamu wa kulawa damu kwa miyaka longo na midi, kamsondelela Yesu hachisogo, kahita na kadalisa mhindo ya walo jake. 21 Mama iyo kailongela mwenyewo, "One nihadalisa walo jake, nizahona."

22 Yesu kahinduka kamuwona mwanamke ija, kamulongela, "Ing’he moyo, uhuwilo wako ukuhonya." Na mwanamke ija kahona kusongela lusita luja.

25 Baho kukala na mwanamke imwe yoyakalile na utamu wa kulawa damu kwa miyaka longo na midi. 26 Mwanamke iyo kagaya ng’hani kuwahitila waganga wengi na kasang’hanila vinhu vake vose, hapatile muhavu mbali hali yake igendelela kwiha. 27 Viyahulike mbuli za Yesu, kafosa mgati muulung’husesa, kamsondelela Yesu kuchisogo na kudalisa walo jake, 28 kailongela mwenyewo, "Nihadalisa walo jake muhala, nizahona."

29 Viyamhile walo da Yesu, bahobaho damu ileka kumulawa, nayo kaihulika kuwa kahona.

43 Muna dibumbila diya dodi mmemele Yesu kukala na mwanamke yoyakalile na utamu wa kulawa damu kwa miyaka longo na midi. Kakala kasang’hanila vinhu vake vose kwa waganga, mbali habule yoyadahile kumuhonya. 44 Mwanamke iyo kamsondelela Yesu hachisogo, maabaho kadalisa mhindo ya walo da Yesu. Bahobaho damu ileka kumulawa. 45 Yesu kauza, "Yelihi yoyanidalise?"

Wanhu wose wabela. Mbali Petili kamulongela, "Mndewa, wanhu wakuzunguluka na kukusung’ha-sung’ha!"

46 Mbali Yesu kalonga, "Kuna munhu kanidalisa, kwaviya niwona ludabwa lwa uhonyaji lunilawa." 47 Mwanamke ija viyawone kuwa hadaha kuifisa bule, keza kogudemeka, kaibwanha muyamagulu ya Yesu. Maabaho kamulongela Yesu haiwanhu wose chimu cha kumdalisa Yesu, na viya viyahonyigwe bahobaho. 48 Yesu kamulongela, "Mndele wangu, kunihuwila niye kukuhonya. Hita kwa tindiwalo."

Mndele yoyadanganike na mwanamke mtamu yoyadalise walo da Yesu

18 Yesu viyakalile yolonga yayo, mkulu imwe wa Chiyahudi kamuhitila, kumtumbalila mavindi na kumulongela, "Mndele wangu kahabehi kudanganika, mbali wize wike makono yako mchanyha yake, nayo kezahona."

19 Yesu na wanahina wake wenuka na kumsondelela.

23 Yesu viyengile mchiheleto mwa imkulu iyo. Kawawona wotowa vilongelonge na lung’husesa lwa wanhu wodunhula ndilo, 24 kawalongela wanhu wakalile baho, "Segeleni hano, mndele ino hadanganike bule, kagona." Mbali wanhu wandusa kumseka. 25 Lung’husesa lwa wanhu viwalawile kunze, Yesu kengila mchiheleto chiyakalile mndele na kamwamha mkono wake, nayo kenuka.

22 Maabaho keza munhu imwe mkulu wa kaye ya kutosela zina jake Yailo. Viyamuwonile Yesu, kaibwanha hasi muyamagulu yake, 23 kampula, "Mndele wangu ni mtamu ng’hani. Nokulamba wize ukamwikile makono yapate kuhona."

24 Maabaho Yesu kahita hamwe na Yailo. Lung’husesa lukulu lwa wanhu lumsondelela na kumsung’ha-sung’ha.

38 Viwafikile mwiikaye ya mkulu wa kaye ya kutosela yatangigwe Yailo, Yesu kawona tibwilitibwili na kahulika nyangi na ndilo. 39 Yesu kengila mnyumba na kuwalongela, "Habali motenda tibwilitibwili na kulila? Mndele hadanganike bule, kagona tu!"

40 Mbali wamseka, ivo Yesu kawasegeza wose kunze, kamsola tati yake ija imwana na mamiyake yake na waja wanahina watatu, wengila mumsana muyatambalisigwe imndele. 41 Kamwamha mkono na kumulongela, "Talita, koumu!" Fambulo jake, "Mndele, nokulongela lamka!"

42 Bahobaho mndele ija kenuka na kandusa kugenda. Mndele iyo kakala na miyaka longo na midi. Chinhu icho vichilawilile, wanhu wazanywa ng’hani.

31 Iviya Yesu kagendelela kulonga, "Vino niwalinganyize na choni wanhu wa ulelwa uno? Ni wanhu walingile vilihi? 32 Walinga fana wana wakalile kudigulilo. Bumbila dimwe dodigutila bumbila dimwenga, ‘Chiwatoweleni chilonge-longe, mbali hamuvinile, chimba wila wa ndilo, mbali hamulilile!’ 33 Yohana Mbatizi keza, wala hadile na hang’wile divai, mbali mweye mulonga, ‘Kana chinyamkela!’ 34 Mwana wa Munhu keza, koja na kung’wa na mweye mulonga, ‘Munhu ino mmelo na mulevi, mbwiya wa wasola kodi na weli na uhasanyi!’ 35 Mbali ubala wa Mulungu ulagusigwa kuwa kweli kwa waja wose woutogola."

Yesu mwiikaye ya Saimoni Mfalisayo

36 Mfalisayo imwe kamgoneka Yesu kuja ndiya ya ichilo hamwe nayo. Ivo Yesu kahita kuikaye ya Mfalisayo iyo, kakala na kuja ndiya. 37 Muna dibululu diya, kukala na mama imwe yeli na uhasanyi. Viyahulike kuwa Yesu koja mwiikaye ya Mfalisayo iyo, keza na nyhupa ya alibasta imemile mafuta yonung’hila goya ng’hani.

41 Maabaho keza munhu imwe yoyatangigwe Yailo yakalile mkulu wa Kaye ya kutosela. Kaibwanha muyamagulu ya Yesu, kamulamba yahite ukaye yake 42 kwaviya mndele wake yoyelekigwe yaidumwe kakala habehi kudanganika. Mndele iyo kakala na miyaka longo na midi.

Yesu viyakalile kohita, wanhu wakala womsung’ha-sung’ha chila ubanzi mwiinzila.

49 Yesu viyakalile kolonga yayo, keza munhu kulawa kuikaye ya mkulu wa kaye ya kutosela. Kamulongela Yailo, "Mndele wako kamala kudanganika. Sekeungaze Mfundiza."

50 Mbali Yesu viyahulike yayo, kamulongela Yailo, "Sekeudumbe, huwila muhala na mndele wako kezahona."

51 Viyafikile kuikaye ya Yailo, halondile munhu kwingila hamwe nayo, mbali Petili, Yohana, Yakobo, tati yake na mami yake mndele ija. 52 Wanhu wose wakala wolila na kwimba wila wa usungu kwa ichimu cha mwana yoyadanganike. Yesu kawalongela, "Sekemulile kwaviya mwana hadanganike bule, kagona nhongo muhala."

53 Wanhu wamseka Yesu kwaviya wavimanya kuwa mndele ija kadanganika kamala. 54 Mbali Yesu kamwamha mkono, kamulongela, "Mwanangu, lamka!" 55 Ugima umbwelela mndele ija, na bahobaho kalamka. Maabaho Yesu kawalagiliza wamwing’he ndiya. 56 Tati yake na mami yake wazanywa ng’hani, mbali Yesu kawalongela sekewamulongele munhu yoyose dodilawilile.

Ifa ya Lazalo

1 Munhu imwe yoyatangigwe Lazalo kakala mtamu. Munhu ino kakala mkaya wa Besaniya, chibululu chiwakalile wokala Maliya na Masa ndugu yake. 2 Maliya ino iyo ija yoyabobode magulu ya Mndewa mavuta ya kunung’hila goya na kuyahangusa kwa mvili zake. Lelo Lazalo lumbu jake iyo yakalile mtamu. 3 Ivo ndugu zake Lazalo wamtumila Yesu usenga, "Mndewa, mbwiyako youmulonda kolumwa."

4 Yesu viyahulike vino, kalonga, "Utamu uno hauzamkoma Lazalo bule mbali unpata kwa ichimu cha ukulu wa Mulungu muladi Mwana wa Munhu yatunhizigwe kufosela utamu uno."

5 Yesu kakala kowalonda Masa na mwali wake na Lazalo. 6 Yesu viyahulike kuwa Lazalo mtamu, kongeza kukala siku mbili haja hayakalile. 7 Maabaho kawalongela wanahina wake, "Chibwele Yudeya"

8 Wanahina wake wamulongela, "Mfundiza! Siku ndodo zifosile Wayahudi walonda kukukoma na mabwe, habali kolonda uhite kaidi hanhu haja?"

9 Yesu kawedika, "Imisi ina masaa longo na maidi. Munhu yahagenda imisi hadaha kuikwala, kwaviya kodiwona bung’hulo da isi ino. 10 Mbali munhu yahagenda ichilo kezaikwala, kwaviya kabule bung’hulo." 11 Maabaho Yesu kagendelela kulonga, "Mbwiyetu Lazalo kagona, mbali niye nohita kumulamsa."

12 Wanahina wake wamwidika, "Mndewa, one kagona, kezahona."

13 Yesu kakala kolonga Lazalo kadanganika, mbali wanahina wake wagesa Lazalo kagona. 14 Maabaho Yesu kawalongela funhu funhu, "Lazalo kadanganika.

Yesu kodibwakila beho kulu

23 Maabaho Yesu kengila muna ingalawa na wanahina wake wamsondelela. 24 Bahobaho kulawilila beho kulu mudilamba, wimbi digubika ingalawa. Mbali Yesu kakala yagonile. 25 Wanahina wake wamuhitila na kumulamsa, wamulongela, "Mndewa, uchikombole chahabehi na kudanganika!"

26 Yesu kawalongela, "Mweye muli na uhuwilo mdodo!" Habali mwodumba vino? Maabaho kenuka na kadibwakila dibeho ijo na mawimbi, na dilamba dikala zinziwa.

27 Wanhu wose wazanywa na wauza, "Ino munhu waki? Mbaka beho na mawimbi vomuhulika!"

15 Viifikile ichigulogulo, wanahina wake wamuhitila na wamulongela, "Zuwa dihonga, na hanhu hano hachili ni chiwala muhala, walage wanhu wahite kuna yamabululu wakagule ndiya." 16 Yesu kawedika, "Wano wabule ulazima wa kuhita, mbali mweye wenyewo weng’heni ndiya."

17 Wamwidika, "Hano hochili chinayo magate matano muhala na somba waidi."

18 Yesu Kalonga, "Nigalileni niye hano." 19 Yesu kawalongela wanhu wakale hasi hana yamasavu, maabaho kayasola yaja yamagate matano, na somba waidi maabaho kalola kuulanga kamwing’ha hewela Mulungu. Kayamogola yamagate na kuweng’ha wanahina wake, na wanahina waweng’ha wanhu. 20 Wanhu wose wowakalile baho waja na weguta. Maabaho wanahina wadondola yaja yamasigavu na wamemeza vigelo longo na vidi. 21 Wadile wakala walume magana malongo matano, mbali wanaake na wana hawapetigwe bule.

25 Ivo ikala ichilo chili behi na kukunguzuka, Yesu kawahitila wanahina kuno kogenda na magulu mchanyha ya mazi.

Yesu koweng’ha ndiya wanhu wengi

32 Yesu kawatanga wanahina wake, kawalongela, "Nowawonela ubazi wanhu wano, vino lelo zifika siku nhatu wang’hali na niye na wabule ndiya. Silonda bule kuwalaga wahite muzimwawo bila ya kuja, sekeweze wasinduke nzila kwa nzala."

33 Wanahina wake wamuuza, "Kulihi kondachipate ndiya ya kufaya wanhu wose wano hano hana dibwilingu?"

34 Yesu kawauza, "Munayo magate mengahi?"

Wamwidika, "Magate saba na somba wadodo."

35 Yesu kawalongela wanhu wakale hasi. 36 Maabaho kayasola yaja yamagate saba na waja iwasomba, kamwing’ha hewela Mulungu, kayamogola, kaweng’ha wanahina wake. Wanahina nawo waweng’ha wanhu. 37 Wanhu wose waja na weguta. Maabaho wanahina wayadondoleza yamasigavu na wamemeza vigelo saba. 38 Wanhu wowadile wapetigwe wakala walume magana malongo mane, mbali wanaake na wana hawapetigwe bule.

Kuliha kodi ya Kaye ya Mulungu

24 Yesu na wanahina wake viwafikile Kapelinaumu, wasola kodi ya Kaye ya Mulungu weza kwa Petili, wamuuza, "Vino mfundiza wenu koliha kodi ya Kaye ya Mulungu?"

25 Petili kawedika, "Ona, koliha."

Petili viyengile mgati, Yesu kandusa kumulongela, "Kowonaze Saimoni? Vino wafalume wa isi wosola kodi na usulu kwa wanhu welihi? Kwa wanhu wa isi yawo hebu kwa wageni?"

26 Petili kamwidika, "Kwa wageni."

Yesu kalonga, "Vinoga. Ivo wakaya hawalondeka kuliha kodi bule. 27 Mbali hachilonda kuwadesa wanhu wawo bule. Ivo hita kuna dilamba ukalowe somba kwa ndwano. Somba wa mwanduso yondaunpate, muna umulomo wake kwizawona sente yoifaya kulihila kodi yangu na yako. Sola ukalihe kodi yetu."

Yesu koubwakila mbiki wa mtini

18 Imitondo ng’hani Yesu viyakalile kobwela kudibulu jake, kakala na nzala. 19 Kauwona mbiki wa mtini mumgwazo ya inzila, kauhitila mbali hawonile chochose, ila kawona mayani muhala. Ivo kaulongela mbiki uwo, "Whizakwima matunda kaidi ng’o!" Bahobaho mbiki uwo unyala.

20 Wanahina wake viwawonile ivo, wazanywa ng’hani, waiuza, "Vino, habali mtini uno unyala chihima hima?"

21 Yesu kawedika, "Nowalongela kweli, muhahuwila bila kwika shaka, hamwizatenda ijo dilawilile kwa mtini muhala, mbali hata muhaulongela lugongo luno, ‘Ng’oka ukayase mwenyewo mwiibahali,’ nawo wizatenda ivo. 22 One muhahuwila, mwizahokela chochose chondamupule muna inhambiko."

37 Beho kulu dilawilila na kutibula mazi, mawimbi yandusa kwingila mwiingalawa na mbaka ilonda kumema mazi. 38 Yesu kakala kuchisogo mwiingalawa, kagona na kadika ditwi jake mumto. Wanahina wamulamusa, wamulongela, "Mfundiza, hugesa cheye vichidanganika?"

39 Yesu kalamuka, kadibwakila beho na kayalongela mawimbi, "Nyamala!" Maabaho beho dikala hupi na kukala zinziwa. 40 Maabaho Yesu kawalongela wanahina wake, "Habali modumba? Mwabule uhuwilo mbaka sambi?"

41 Wanahina wadumba ng’hani, waiuzagiza, "Ino munhu waki? Hata mbeho na mawimbi vose vimtegeleza!"

35 Viifikile chigulogulo, wanahina wake wamuhitila na wamulongela, "Hanhu hano hochili ni chuwala muhala, na sambi diswa. 36 Walekelele wanhu wahite muna imigunda na muna yamabululu yeli habehi muladi wakagule ndiya waje."

37 Yesu kawedika, "Mweye weng’heni ndiya waje."

Wamuuza, "Vino chihite chikagule magate ya hela nyingi ng’hani chiweng’he waje?"

38 Yesu kawauza, "Munayo magate mengahi? Hiteni mkalole."

Viwavimanyile, wamulongela. "Kuna magate matano na somba waidi."

39 Maabaho Yesu kawalongela wanahina wake wawalongele wanhu wose waigole mwiivibumbila-bumbila, wakale hasi hana yamasavu mabisi. 40 Ivo wakala mwiivibumbila va wanhu gana-gana na va wanhu malongo matano-matano. 41 Maabaho Yesu kayasola yaja yamagate matano na somba waidi, kalola kuchanyha kuulanga na kumwing’ha Mulungu hewela. Maabaho kayamogola yamagate yaja, kaweng’ha wanahina wake wawagolele wanhu. Viyaviya kawagolela wose waja somba waidi. 42 Wanhu wose waja na weguta. 43 Wanahina wake wadondola yaja yamasigavu ya magate na somba na kumemeza vigelo longo na vidi. 44 Walume muhala wadile wakala magana malongo matano.

48 Kawawona wanahina wake wogayagaya kutowa zing’hafi, kwaviya beho kulu dikala dowabweleza kuwalawile. Nzogolo zikwika, Yesu kawahitila kuno kogenda mchanyha ya mazi. Kalonda kuwafosa, 49 mbali viwamuwonile kogenda mchanyha ya mazi, wagesa mzimu. Waguta ng’hondo. 50 Wose viwamuwone wadumba ng’hani.

Bahobaho Yesu kawalongela, "Ing’heni moyo! Ni niye! Sekemdumbe." 51 Maabaho kakwela mwiingalawa muweli wanahina wake, na beho dinyamala hupi. Wanahina wazanywa ng’hani,

Yesu kawegutiza wanhu kufosa magana malongo mane

1 Siku dimwe lung’husesa lumwenga lukulu lwa wanhu luiting’hana kaidi. Wanhu viwakalile wabule ndiya, Yesu kawatanga wanahina wake na kuwalongela, 2 "Nowaonela ubazi wanhu wano, ichimu wakala na niye siku nhatu, na sambi wabule ndiya. 3 Na niye nahawalaga wahite ukaye kumwawo wahawa na nzala, wezasinduka mwiinzila, kwaviya wamwenga wawo walawa kutali."

4 Wanahina wake wamuuza, "Hano chamwiichuwala, izapatika kulihi ndiya ya kuwegutiza wanhu wano wose?"

5 Yesu kawauza, "Munayo magate mengahi?"

Wamwidika, "Chinayo saba."

6 Yesu kawalongela wanhu wakale hasi. Kayasola yaja yamagate saba, kamwing’ha Mulungu hewela. Maabaho kayamogola yamagate yaja na kuweng’ha wanahina wake waweng’he wanhu, na wawo watenda ivo. 7 Iviya wakala na visomba vidodo. Yesu kamwing’ha Mulungu hewela, kawalongela wanahina wake wawagolele wanhu iviya. 8 Wanhu waja weguta. Amalabaho wanahina wadondoleza masigavu na wamemeza vigelo saba. 9 Na wanhu wadile wakala wafosa magana malongo mane. Yesu kawalaga wanhu.

Yesu kouduwila mbiki wa nhini

12 Siku isondelele vawakalile wolawa Besaniya, Yesu kakala na nzala. 13 Kauwona mbiki wa mtini kwa kutali uli na mayani mengi. Kaugendela yawone fana kodaha kupata nhini. Mbali viyafikile, hawonile tini, ila mayani muhala, kwaviya haukalile msimu wa nhini. 14 Maabaho kaulongela mbiki uja, "Kusongela sambi na kugendelela, habule munhu yonda yaje kaidi matunda yako ng’o!"

Na wanahina wake wahulika vayalongile ivo.

Fundizo dichipata kulawa kwa mtini unyalile

20 Siku isondelele imitondo, vawakalile wofosa wauwona mbiki wa mtini unyala kusongela muna yamazizi mbaka kwinhembeti. 21 Petili kakumbuka chayalongile Yesu, kamulongela, "Mfundiza, lola! Uja mbiki wa mtini wouuduwile unyala!"

22 Yesu kawedika, "Muhuwile Mulungu. 23 Nowalongela kweli, one munhu yahaulongela lugongo luno, ‘Hita ukayase muibahali,’ one hawile na begeta mumoyo wake, ila kohuwila kuwa chayalongile chizalawilila, chizatendeka kumwake. 24 Ivo nowalongela, vimtosa na kupula chinhu chochose, muhuwile kuwa muhokela, navo vizakuwa venu. 25 Vomtosa, mulekelele chila munhu yoyawahasanye chochose chiya, muladi Tati yenu yeli kuulanga nayo yawalekelele uhasanyi wenu."

Yesu kowatanga wanahina wa mwanduso

1 Siku dimwe Yesu kakala kema hamgwazo ya dilamba da Genesaleti, na wanhu wengi wakala wammemela na kuisung’ha-sung’ha kutegeleza mbuli ya Mulungu. 2 Kaziwona ngalawa mbili mumgwazo mwa dilamba zozilekigwe na wavulaji wowakalile wosunha nyavu zawo. 3 Yesu kengila mwiingalawa imwe ya Saimoni, kamulongela yaikwese hatali chidogo kulawa hamgwazo ha dilamba mbaka mmazi. Maabaho kakala umo mwingalawa na kufundiza lung’husesa lwa wanhu.

4 Viyakomeleze kulonga, kamulongela Saimoni, "Igale ingalawa mbaka hana yamazi mengi, maabaho mwase nyavu zenu mmazi muvule somba."

5 Saimoni kamwidika, "Mndewa, Chiiyoha kuvula somba ichilo chigima mbali hachipatile chinhu. Mbali kwaviya weye kulonga, nizakwasa nyavu!" 6 Wasa nyavu, wavula somba wengi mbaka nyavu zawo zandusa kudegeka. 7 Wawatanga wayawo wowakalile muna ingalawa imwenga weze kuwataza. Weza na wazimemeza ngalawa zose mbili somba, mbaka zandusa kuzama. 8 Saimoni Petili viyawonile yayo yoyalawilile, katumbala mavindi haulongozi ha Yesu kalonga, "Mndewa, sekewize habehi na niye! Niye ni munhu nili na uhasanyi!"

9 Saimoni hamwe na wayage wose wazanywa kwa kupata somba wengi viya. 10 Iviya wayage Saimoni, Yakobo na Yohana wana wa Zebedayo, nawo wazanywa. Yesu kamulongela Saimoni, "Sekeudumbe, kwandusila sambi na kugendelela kwizakuwa mvulaji wa wanhu."

11 Wazimiza mhwani ngalawa zawo, waleka chila chinhu, wamuwinza Yesu.

Yesu kodibwakila beho kulu

22 Siku dimwe Yesu kakwela ngalawa hamwe na wanahina wake, kawalongela, "Chikanhe lamba mbaka umwambu." Baho wandusa mwanza. 23 Viwakalile muumwanza, Yesu kagona nhongo. Bahobaho, beho kulu ng’hani diza mudilamba, ngalawa yandusa kumema mazi, wose wakala wogaya ng’hani. 24 Wanahina wamuhitila Yesu, wamulamsa na kumulongela, "Mndewa, Mndewa! Chodanganika!"

Yesu kalamka, kadibwakila beho diya na mawimbi ya mazi, navo vihupika hupii, kuwa zinziwa. 25 Maabaho Yesu kawalongela, "Uhuwilo wenu wakulihi?"

Mbali wawo wazanywa na kudumba, wailongela wenyewo, "Ino iyo yelihi? Kobwakila beho kulu na mawimbi, navo vomuhulika!"

Yesu kodibwakila beho kulu

22 Siku dimwe Yesu kakwela ngalawa hamwe na wanahina wake, kawalongela, "Chikanhe lamba mbaka umwambu." Baho wandusa mwanza. 23 Viwakalile muumwanza, Yesu kagona nhongo. Bahobaho, beho kulu ng’hani diza mudilamba, ngalawa yandusa kumema mazi, wose wakala wogaya ng’hani. 24 Wanahina wamuhitila Yesu, wamulamsa na kumulongela, "Mndewa, Mndewa! Chodanganika!"

Yesu kalamka, kadibwakila beho diya na mawimbi ya mazi, navo vihupika hupii, kuwa zinziwa. 25 Maabaho Yesu kawalongela, "Uhuwilo wenu wakulihi?"

Mbali wawo wazanywa na kudumba, wailongela wenyewo, "Ino iyo yelihi? Kobwakila beho kulu na mawimbi, navo vomuhulika!"

Yesu komuhonya munhu yeli na vinyamkela

26 Yesu na wanahina wake wagendelela na mwanza. Wafika mhwani ya isi ya Wagelasi yili umwambu wa dilamba da Galilaya.

12 Zuwa vidikalile doswa, wanahina longo na waidi wamuhitila na wamulongela, "Walage wanhu wahite muna ivibululu na muna imigunda ili mmabehi muladi wapate ndiya na hanhu ha kugona, kwaviya hano hachili ni chuwala muhala."

13 Mbali Yesu kawedika, "Weng’heni mweye ndiya waje."

Wawo wamwidika, "Cheye chinayo magate matano na somba waidi muhala. Kolonda chihite chikawagulile ndiya wanhu wose wawo?" 14 Wanaalume muhala wakala magana malongo matano.

Yesu kawalongela wanahina wake, "Walongeleni wanhu wakale muna ivibumbila va wanhu malongo matano-matano."

15 Baho wanahina watenda ivo, na wanhu wose wakala hasi. 16 Yesu kayasola yaja magate matano na somba waidi, kalola kuulanga, kamwing’ha hewela Mulungu. Maabaho kayamogola yamagate na somba, kaweng’ha wanahina wake wawagolele wanhu. 17 Wanhu wose waja na weguta. Wanahina wadondola vigelo longo na vidi va masigavu.

Dugila da sola uko Kana

1 Vizifosile siku nhatu, kukala na dugila da sola mudibululu da Kana, mwiisi ya Galilaya. Mami yake Yesu kakala uko. 2 Yesu na wanahina wake iviya wakala wagonikigwa kuna didugila ijo. 3 Divai viimalile, mami yake Yesu kamulongela, "Wabule divai."

4 Yesu kamwidika, "Mama, sekeunilongele cha kutenda. Lusita lwangu lung’hali halunafika bule."

5 Mami yake Yesu kawalongela wasang’hani, "Tendeni chochose chondayamulongeleni."

6 Baho hakala miziga sita ya mabwe ikigwa mazi kwa ichimu cha chihendo cha Wayahudi cha kunawa nhende. Chila ziga dodaha kumema nongo nne mbaka tano. 7 Yesu kawalongela wasang’hani, "Memezeni mazi muna imiziga." Nawo waimemeza neemhu. 8 Maabaho kawalongela, "Lelo deheni yamazi na mumgalile mkulu wa didugila." Wasang’hani watenda ivo fana viyawalongele. 9 Mkulu wa didugila kayalanza yamazi, nayo yagaluke divai. Havimanyile bule kuilawile divai ija, mbali wasang’hani wowadehile yamazi wavimanya. Maabaho mkulu ija kamtanga munhu ija yosola hamgwazo, 10 kamulongela, "Chila munhu teng’hu kolava divai inogile maabaho wageni wahamala kung’wa ng’hani, baho kolava divai ihile. Mbali weye kuika divai inogile mbaka sambi."