Milagres de Jesus

Yesu akuvalowola vangalimesu vavili

27 Yesu kawuka pala, paghaveyi akuyenda, vangalimesu vavili vamkovekelili kunu pavavika umatu, "Mwana wa Dawudi, utuwoneli lusungu!"

28 Yesu pafikili kaya, vangalimesu vala vavili vamuyendela, mweni kavadasha, "Mukujumila kucha nguwesha kuvagolela chilongu achi?"

Veni vamuyangula, "Yina Bambu!"

29 Pavayangulili naha, Yesu kavagufya mesu vawu, kadeta, "Na yivi ngimu wumujumilili!" 30 Na mesu vawu vafuwuka valola. Yesu kavakayika kwa kuvalakalila, "Mukotoo kumuwombela mundu yoyosi chilongu achi."

31 Lakini veni vawuka, vakwisha filongu fya Yesu mumlima wula wosi.

Yesu akuvalowola vangalimesu vavili

29 Yesu paghaveyi akuwuka mbwani ya Yeliku, lipinga lya vandu lyamukovikelili. 30 Topi kwavelili na vangalimesu vavili vayikalili mumbalimbali ya deha, pavapikanishili kucha Yesu akupita pala, valandushili lishu, "Bambu, mwana wa Dawudi, wutuwoneli lusungu!"

31 Lila lipinga lya vandu livalakalila na kuvawombela vanyamali. Lakini veni valandusha nendu lishu, "Bambu mwana wa Dawudi, wutuwoneli lusungu!"

32 Yesu kawoloka, kavakema na kuvadasha, "Mukudayila ndivagoleli liki?"

33 Vamuyangula, "Bambu, tukuluva tuloli."

34 Topi, Yesu kavawonela lusungu, kavagufya mesu vawu na tepu vawesha kulola, pambeli vamukovikela.

Yesu akumlowola ngalimesu aku Betisayida

22 Yesu kafika Betisayida pamu na vanachuli vaki. Kuna vandu vamuyeghilili mundu ngalimesu, vamluvili amugufyi. 23 Yesu amkamulili liwoku yula ngalimesu, kamyegha panji ya kaya yila. Amutemilili mita mumesu, kamvikila mawoku, kamdasha, "Wuli ukuwesha kulola chindu?"

24 Ayu ngalimesu kalola, kadeta, "Nguwona vandu vakuyendayenda vakuwoneka kucha mibiki."

25 Yesu amuvikilili kandi mawoku mumesu mweni kafulutula mesu, uwesu wa kulola umuwuyila, kila chindu kachiwona uswanu. 26 Yesu kamuwombela ayendi kaya na kumulayila, "Akotoo kuwuya muchijiji chila!"

Yesu akumlowola mundu majogu na ngadeta

31 Pambeli Yesu kawuka mumbwani ya Tilu, kayenda mbaka Sidoni afikili lihiva lya Galilaya, kupitila Dekapoli. 32 Vandu vamu vamuyeghela mundu yavelili majogu na yangajila kudeta unofu. Vamluva Yesu amvikili mawoku. 33 Yesu kamukwegha pambali na vandu. Kavika fyala fyaki mumajeji va mundu ayu. Pambeli atemili mita na kugufya lulimi lwa mundu yula. 34 Pambeli Yesu kalola kumbindi, kapumula nendu na kumuwombela mundu ayu, "Efwata" Mana yaki "Fuwuki!"

35 Bahala pala majeji va mundu yula vadiwuka, lulimi lwaki lufuwuka, kakanda kudeta unofu. 36 Yesu kavakanila kumuwombela mundu yoyosi. Lakini ndambu payendelelili kuvakanila, ndi ndambu yayendililili kukwisha filongu fyaki. 37 Vandu vajinga nendu. Vadeta, "Kagola fyosi finofu. Kavagola majogu vapikana na vangadeta vadeti!"

Yesu akumlowola ngalimesu Balitimayu

46 Topi vafikili Yeliku, Yesu paghaveyi akufuma pala na vanachuli vaki pamu na lipinga likomi lya vandu, ngalimesu, mwana va Timayu vakumkema Balitimayu, avelili kayikala mumbali ya deha akudadava vamutangi. 47 Papikanishili Yesu wa Nasaleti akutyangila pala, kakanda kukema kwa lishu likomi, "Yesu, Mwana va Dawudi! Ung’oneli lusungu!"

48 Vandu vatangalili vamlakalila, Unyamali lakini mweni awutili nendu, "Mwana wa Dawudi, ung’oneli lusungu!"

49 Yesu awolukili, kadeta, "Mumkemi."

Topi vamkema yula ngalimesu, vamuwombela, "Uyikangashi! Uwoloki akukukema."

50 Mweni ayasili ligololi lyaki pambali, ajumbili kamyendela Yesu.

51 Yesu amdashili, "Ukudayila ngugoleli liki?"

Yula ngalimesu kamuwombela, "Muwula, nguluva kulola."

52 Yesu amuwombilili, "Yendi, kujumila kwaku kukulowola."

Bahala pala yula ngalimesu aweshili kulola, amkovikelili Yesu mumwanja.

Yesu akumulowola ngalimesu

35 Chipindi Yesu paghaveyi pabehi na Yeliku, pavelili na mundu yumoyu ngalimesu kayikala munjila paluva. 36 Papikanishili lipinga lya vandu palipita avadashili, "Kuna chindu liki?"

37 Vamuwombilili, "Yesu wa Nasaleti akupita."

38 Mweni kayangula kwa lishu likomi, "Yesu, mwana va Dawudi, ung’oneli lusungu!"

39 Vala vandu valongulili vakamlakalileyi anyamali, lakini mweni ayongishili lishu likomi, "Mwana wa Dawudi, ung’oneli lusungu!"

40 Yesu awolukili, kavawombela vamuyeghi pawulongolu yaki. Yula ngalimesu pafikili pabehi, Yesu amudashili, 41 "Ukudayila ngugoleli liki?"

Mweni ayangulili, "Bambu, ngudayila kulola."

42 Yesu kamuwombela, "Loli! Ujumilwa waku wukulowola."

43 Tepu yula ngalimesu akandili kulola, akamukovekeleyi Yesu kunu pamuwombela chikomu bambu Chapanga. Vandu vosi pavawonili nawula, vamjuma Chapanga.

Yesu akumlowola yangajila kulola kukandila awoneki

1 Yesu papiteyi kamuwona mundu yumu, ngalimesu kufumila kuwoneka kwaki. 2 Vanachuli vaki vamudasha, "Muwula! Ghani yagolili sambi, Mundu ayu awu vala vamlelili ngalimesu.?"

3 Yesu kayangula, "Ayu kagola ng’odu sambi na vala vamlelili vagola sambi ha, nongwa chichuku cha Chapanga chiwoneki kwa mweni. 4 Yikudayiliwa tugoli fichuku fya mweni yanyeyili nongwa ponopa pamusi na lumihi lukwisa mundu daweshi ng’odu kugola chichuku. 5 Pandiva mumlima awu, nenga lwengi lwa mlima."

6 Pawombili nawula, katema mita pasi, kadaka na uganga kagola mitika, kamushagha mumesu mundu yula ngalimesu. 7 Kamuwombela, "Yendi kayipwembuli kuwushu mulitanda lya Siloamu." Siloamu mana yaki, Vamlayishili. Kayenda kuyipwembula kuwushu, kawuya kunu palola.

2 Ayisili mundu yumu yaveli na ukalava. Kamugondamila padeta, "Bambu, pawudayila ukuwesha kung’ofuwa!"

3 Yesu katola liwoku lyaki kamugufya pambeli kudeta, "Ngudayila! yuwi ung’ofuwi." Tepu mundu yula kalowoka utami waki wa mwiku. 4 Pambeli Yesu kamuwombela, "Pikani, kotoo kumuwombela mundu, yendi kayilangushi kwa mtambika na kutawula litambiku lilayishilwi na Malawu va Chapanga vamupili Musa kutovilela kucha nakaka kunana."

2 Aku vandu vamuyeghilili mundu yumu yapombalili muvili, vamuwonjesha muulili. Yesu pawonili ujumilwa wawu, kamuwombela mundu yula yapombalili, "Mwana wangu wuyikangashi! Kupomiliwa sambi shaku."

3 Vawuli vamu va Malawu vakandili kuyiwombela veni, "Mundu ayu akumduka Chapanga!"

4 Yesu asimanyili kala hoshu shawu, kadeta, "Kwa nongwa liki mukwihosha fya wafu mundima shenu? 5 Lyoti lipusukili nendu, kudeta, ‘kupomiliwa sambi shaku’, awu kudeta, ‘Woloki yendi yendi?’ 6 Ponopa ngudayila mumanyi kucha Mwana wa Mundu kana uwesu wa kupomela vandu sambi mumlima awu." Topi kamuwombela yula mundu yapombalili. "Tandamuki, toli ulili waku yendi kaya yaku!"

7 Mundu yula yapombalili katandamuka, kayenda kaya yaki.

10 Kwaveli mundu yumu munaliwoku lipombalili. Topi, vandu vamudasha Yesu, "Finofu kumulowola mundu lijuva lya kupumulila?" Vamudashili nahawu ili vapati pa kumuhighila.

11 Lakini Yesu kavawombela, "Tudeti mundu kana meni waki kadubukila mumyowu, akotoo kumujabula kwanongwa lijuva lya kupumulila? 12 Lakini mundu katauka pitu meni! Topi, tukujumishwa kugola chindu cha nyanyi lijuva lya kupumulila." 13 Pambeli kamuwombela yula mundu, "Hololi liwoku lyaku."

Kaliholosha na lyeni liva linofu kucha lila liwoku lingi.

30 Nafyala wa Simoni avelili kawonja pawulili akutamika. Yesu pafikili, bahala pala vamuwombela chilongu cha mawu ayu. 31 Topi Yesu kaselela kwa mawu yula mtami, kamkola liwoku kunu pamtandamusha. Utami umfuma mawu yula na mweni kakanda kuvakimbanikila.

Yesu akumlowola mundu avelili na ukalava

40 Mundu yavelili na ukalava amuyendilili Yesu kamtundamila na kamluva, kadeta, "Pawudayila, ukuwesha kung’ofuwa!"*

41 Yesu amuwonilili lusungu, kaholosha liwoku lyaki, kamkamula. Pambeli kamuwombela, "Ngudayila ngutangi ung’ali!" 42 Bahala pala ukalava umfuma mundu yula, kang’ala.

3 Vandu vamu, mchechi vamuyeghili mundu yumu yapombalili, vamuyeghela Yesu. 4 Kwanongwa vandu vaveli vatangala, valemwili kumuyegha mundu yula pala paveli Yesu. Topi vatobulili kulituvili, mwaveli Yesu. Pavatobulili kala lilanga, vamsunusha mundu yula yaveli kawonja muwulili. 5 Yesu pamuwonili ndambu ya ujumilwa wawu, kamuwombela mundu yula yapombalili, "Mwana wangu, ngupomela sambi shaku."

6 Vawuli vamonga va Malawu yivaveli vayikala pala vakaiholeyi ndima shawu. 7 "Akwidumba liki pawombeyi nawula? Akumjowola Chapanga! Kwa hela mundu yapomela sambi, ila Chapanga weka yaki."

8 Bahala pala Yesu amanyili kala Chivayihola, avawombilili, "Wuli mbona mukwihola ndambu ayi mundima shenu?. 9 Choti chiveli chipusuka, kumuwombela mundu ayu yapombalili, ‘Kupomiliwa sambi shaku’, Awu kumuwombela, ‘Utoli ulili waku, witwiki yendi’?. 10 Ponopa ngudayila mumanyi, Mwana wa Mundu kana uwesu wa kuvapomela vandu sambi shawu pamulima." Pala pamuwombilili mundu yula yapombalili, 11 "Ngukuwombela tandamuki, toli ulili waku na yendi kaya yaku!"

12 Pala vandu vosi vaveli vakumlola, mundu yula kawoloka, katola ulili waki, kayenda. Vandu vosi vayikanganika, vamjuma Chapanga pavadeta, "Tukali hela kuchiwona chindu kucha achi!"

Yesu akumlowola mundu yapombalili liwoku

1 Pambeli Yesu kayenda kandi Munyumba ya kudadavila. Amu kwavelili na mundu yavelili na liwoku lipombalili. 2 Vandu vamu vavelili mula vaveli vakumsakila nongwa ya kumhigha. Ponopa vamlolela kucha angamlowulili Lijuva lya kupumulila. 3 Yesu kamuwombela mundu ayu yapombalili liwoku, "Wisi apa." 4 Pambeli kavadasha, "Wuli malawu vetu vakutujumisha kugola liki mulijuva lya kupumulila? Kugola findu fya nyanyi awu fya wafu, kumlowola mundu akotoo kusova awu kumuwulagha?"

Lakini veni vayangulili chindu ha. 5 Apa kavalola vosi kwa maya, kunu kavawonela lusungu ndambu ndima shawu sikamalili, Pambeli kamuwombela mundu yula, "Holoshi liwoku lyaku!" Mweni kaholosha liwoku lyaki, bahala pala liwoku lyaki liva kandi linofu.

Yesu akumlowola muna ukalava

12 Yesu paveli mbwani yimu yaveli na mundu yumoyu yavelili na ukalava mvili wosi. Pamuwonili Yesu, mweni kamuwila pasi kamluva, "Bambu, pawudayila, ukuwesha kung’ofuwa."

13 Yesu kamuwolushela liwoku lyaki na kumkamula padeta, "Ngudayila! Ung’ali!" Tepu ukalava wula uwuka.

18 Tepu vandu vayisa, vamuyegha mundu yumu yapombalili muluhagha, vayesha kumuyingisha munyumba, paulongolu pa Yesu. 19 Lakini, kwanongwa ya lipinga lya vandu, valemwili kwingila munyumba. Topi, vakwela kumbindi ya lituvili liveli ligalamu, vakwemula midasi, vampenesha yula yapombalili pamu na ulili waki vamvikili paulongolu ya Yesu.

20 Yesu pawonili ujumilwa wawu mkomi, amuwombilili mundu yula, "Ghanja, ngupomela sambi shaku."

21 Vawula va Malawu na Mafwalisayu vakandili kuyidasha, "Ghani yadeta filongu fya kumduka Chapanga? Kwa hela mundu yawesha kupomela sambi, ila Chapanga weka hela!"

22 Yesu avamanyili kala chivayihola, kavadasha, mkuyihola liki mundima shenu? 23 Choti chivelili chipusuka nendu: kudeta, kupomeliwa sambi, awu kudeta, "Woloki yendi? 24 Topi, ngudayila mumanyi mwana wa mundu kana uwesu wa kupomela vandu sambi kumlima." Kamuwombela, yula mundu yapombalili, "Tandamuki, toli ulili waku yendi kaya."

25 Tepu, ayisili kuwoloka paulongolu ya vosi, akatolili ulili waki kayenda kayaki kunu pamujuma Chapanga.

Mundu muna liwoku lipombalili.

6 Lijuva lingi lya lijuva lya Kupumulila, Yesu ayingilili munyumba ya kudadavila kuvawula vandu. Mula kwaveli mundu yumu liwoku lyaki lya mlilu lyapombalili. 7 Vawula va Malawu na Mafwalisayu vakamuloleyi Yesu kucha dalowoli mundu Lijuva lya Kupumulila, ili vapati nongwa ya kumuhigha. 8 Yesu amanyili chivayihola, kamuwombela yula yaveli na liwoku lipombalili, "Tandamuki, woloki pawulongolu." Yula mundu ayendili, kawoloka pawulongolu. 9 Pambeli Yesu kavawombela kandi, "Nguvadasha, Malawu vetu vakujumisha kugola chindu cha nyanyi awu kugola chindu chivifyili Mulijuva lya Kupumulila? Kutanga awu kuvifya? Kulowola mundu awu kumleka adanganyiki?" 10 Pavawolukili wosi vavelili pala, amuwombilili mundu yula, "Woloshi liwoku lyaku." Bahala pala mweni kagola wuwula na liwoku lyaki linana.

Yesu akumulowola ndumindumi wa mkomi wa machonda

1 Pawombanili kala na vandu, Yesu ayendili Kapelinaumu. 2 Aku kwavelili na mkomi wa machonda mya wa Loma aveli na ndumindumi waki yamtamili munu. Ndumindumi ayu avelili mtami dabadaba. 3 Yula mkomi wa machonda papikanishili milandu ya Yesu, kavalayisha vavaha vamova Vayawudi vayendi kumluva Yesu ayisi kumlowola ndumindumi waki. 4 Pavafikili kwa Yesu, vamudediveka, vadeta, "Mundu ayu nakaka akudayiliwa kutangiwa na yuwi. 5 Mweni kawutama vandu va mlima wetu na mweni yatujengilili yila Nyumba ya kudadavila."

6 Topi Yesu kayenda pamu na veni. Pavaveyi samba vafika kaya ya yula mkomi wa machonda wa Loma avatumili vaghanja mundu vamuwombeli Yesu, "Bambu, kotoo wiyasha, kwingila munyumba yangu kwanongwa nenga ngujakwa ha. 7 Nongwa nguyiwona ngulemwa kuyisa kwa yuwi. Ila yuwi deti chilongu chimu hela, ndumindumi wangu danani. 8 Nongwa nenga wuwowu mundu yimeli pasi ya uwesu na ndiva nawu machonda pasi yangu. Pandimuwombela yumu, ‘Yendi!’ Akuyenda, pandimuwombela wingi, ‘Wisi!’ Akwisa na ndumindumi wangu, ‘Goli chindu achi!’ Mweni akugola."

9 Yesu papikanishili afi kayikang’anika, kaliyendela lila lipinga lya vandu liveli likumkovikela na kudeta, "Nguvawombela ngalihela kumuwona mundu yoyosi amu Muyisilaeli yavelili na ujumilwa mkomi kucha ayu!"

10 Vala vanjagila pavafikili kaya ya mkomi wa machonda wa loma vamuwona yula ndumindumi kanana.

11 Na apa pavelili na mdala yumu yavelili mtami kwa myaka lilongu limu na minani avelili na chinyamukela kamwingila. Kwa nongwa ayi, mvili vaki wavelili ugondama hata akulemwa kuwoloka chimimi. 12 Yesu pamuwonili, kamkema, kamuwombela, mawu utami waku wunana. 13 Amuvikilili mawoku na tepu mvili waki uwoloka kandi, kamjuma Chapanga.

Yesu akumlowola mundu yumu

1 Lijuva lya kupumulila limu, Yesu ayendili kulya filivi kaya ya mkomi yumu wa Mafwalisayu, vandu vavelili pala vavelili vakumlolesha. 2 Mundu yavelili na utami wa kumema mawoku na mawulu ayisili kwa Yesu. 3 Yesu avadashili vawula va Malawu na Mafwalisayu, "Wuli Malawu vetu vakutujumisha kumulowola mundu lijuva lya kupumulila?"

4 Lakini veni vayikalili jii. Yesu kamkamula yula mtami, kamulowola, amulekili ayendi.

Yesu akuvalowola vaveli na ukalava lilongu

11 Yesu paghaveyi mumwanja kuyenda Yelusalemu apitilili Samaliya na Galilaya. 12 Payingileyi chijiji chimu, atanganili na vandu lilongu vavelili na ukalava, vawolokili kutali. 13 Vadetili kwa kulandusha, Yesu, Bambu, tuwoneli lusungu!

14 Pavawonili kavawombela, muyendi mukayilangushi kwa mtambika.

Topi pavayendeyi vang’alili. 15 Yumu wa vala pawonili kanana, kawuya kunu pakamjuma Chapanga kwa lishu likomi. 16 Kayiyasilila pasi paulongolu pamawulu va Yesu kunu pakamuwombela Chapanga chikomu Bambu. Ayu avelili Msamaliya. 17 Apa Yesu kadeta, "Wuli vandu vang’alishiwili vavelili lilongu duhu? Vala vamonga tisa vawa koti? 18 Awonikili ng’odu mundu wingi kandi yawuyili kumgayila Chapanga ukomi, ila ayu mhenja weka hela?" 19 Pambeli kamuwombela mundu yula, "Woloki uyendi, ujumilwa waku ukulowola."

Yesu akumulowola mtami wa aku Betisata

1 Pambeli Yesu kayenda Yelusalemu kulihungu lya Vayawudi. 2 Aku Yelusalemu pabehi na mlyangu wukemiwa "Mlyangu wa Fungami" Kwaveli na litanda lya machi livalikema kwa Chibulaniya Betisata na lyeni lyaveli na fibudi fimuhanu. 3 Vatami vatangalili vawonjagha mula mufibudi fila vangalimesu na vandevindevi na vapombalili. Vavetilagha machi vatimbushiwi, 4 kwanongwa makungu wa Bambu asunukeyi teputepu mulitanda lila na kutimbusha machi. Mtami yava wa kwaa kuyingila mulitanda machi pavatimbushiwa, ananili utami wowosi wavelinawu. 5 Pala kwavelili mundu yumu mtami kwa myaka milongu mitatu na minani. 6 Yesu pamuwonili mundu ayu kawonja pala, kamanya kucha aveli mtami kwa myaka yitangalili. Kamdasha, "Ukudayila kunana?"

7 Yula mtami kamuyangula, "Bambu, nenga ndivahela mundu wa kunyegha mumachi pavatimbushiwa. Kila panyesha kuyingila, mundu wingi akunongulela."

8 Yesu kamuwombela, "Tandamuki, toli litefu lyaku, yendi." 9 Tepu mundu yula kanana, katola litefu lyaki, kakanda kuyenda.

Chilongu achi chagolikili Mulijuva lya kupumulila,

46 Pambeli Yesu kayenda kandi Kana, mumlima wa Galilaya, pala paghalambulili machi kuva difwayi. Apa kwaveli na mkomi yumu yavelili na mwana mtami aku Kapelinaumu. 47 Topi mkomi yula papikanishili Yesu kafuma Yudeya kafika mumlima wa Galilaya, kamyendela, kamluva amlowoli mwana waki yatamikili dabadaba. 48 Yesu kamuwombela, "Pamuwona ng’odu chilangushilu na findu fya filoja mujumili ha!"

49 Yula mkomi kamuwombela, "Bambu, deku tuyendi ponopa mwana wangu akali hela kusova."

50 Yesu kamuwombela, "Yendi, mwana waku mnofu."

Mundu yula kajumila filongu fya Yesu, pambeli kayenda. 51 Paghaveyi mudeha akuwuya kayaki, vatanganili na vandumindumi vaki, vamuwombela, "Mwana waku kanana!"

52 Mweni kavadasha chipindi liki mwana waki pananili. Veni vamuyangula, "Yikaveli saa saba pamusi." 53 Pambeli tati ayu kamanya kucha yikaveli pamusi yiyila Yesu pamuwombilili, "Mwana waku akunana." topi mweni na nyumba yaki yosi vamjumila Yesu.

54 Achi ndi chilangushilu cha pili Yesu chalangushili yaveli paghaveyi akuwuya Galilaya kufuma Yudeya.

20 Mawu yumu mtami wa liholuveya kwa chipindi cha myaka lilongu na mivili, kamukovekela Yesu kumbeli, kagufya luviniku lwa yingwa yaki. 21 Agolili nawula kwanongwa ayihoshili mundima yaki, "Pagufya hela yingwa yaki danani."

22 Topi, Yesu kaghalambuka kamuwona kamuwombela, "Kamwali, wuyikangashi ujumilwa waku wukulowola." Mawu yula kanana mwanja wuwula wula.

25 Paveli mdadala yumu yavelili na utami wa liholuveya myaka lilongu na mivili. 26 Mdadala ayu aifwashili nendu kwa vayilwana na amalili findu fyaki fitangalili, lakini kanana ha, ila kayendelela kutamika nendu chipindi chosi. 27 Papikanishili chilongu cha Yesu kwa vandu, kayisa na kayikekeneka kekeneka kupita mulipinga lya vandu. Kamyendela Yesu kwa kumbeli na kuyigufya yingwa yafwalili Yesu, 28 mweni ayidetilili, "Pagufya yingwa yaki hela, danani."

29 Kagufya yingwa ya Yesu, bahala pala liholuveya limuwoloka na mweni kayiwona mumvili waki kucha utami unana.

43 Topi kwavelili mdala yumu mulipinga lila aveli mtami wa liholuveya kwa myaka lilongu limu na mivili, avelili kamalila kala mbiya shaki shosi kwa valungwana, kwa hela mundu aweshili kumlowola. 44 Mdala ayu amkovikelili Yesu kumbeli na kugufya luviniku lwa yingwa yaki. Bahala pala kanana wula utami wa liholuveya. 45 Yesu adashili, "Ghani kangufya nenga?"

Vandu vosi pavakanili, Petili kamuwombela, "Bambu, lipinga lya vandu likushengeta na kukukekeneka!"

46 Lakini Yesu kadeta, "Kwaveli mundu kangufya nenga, nongwa nguyiwona liwovi lyangu linyangila." 47 Yula mdala kalemwa kuyifisa, kafumbuka mweni kunu pakabagama kwa lyogha, kayiyasila paulongolu ya Yesu. Kakanda kuvahimulila vandu ndambu yamgufili Yesu na ndambu apatili kulowoka bahala pala. 48 Yesu kamuwombela, "kamwali wangu kujumila kwaku kukulowola. Uyendi kwa kusika."

Kamwali wa ofisa na mawu yumu

18 Yesu paghaveyi akudeta afi, mkomi yumu Myawudi afikili, kamugondamila kunu padeta, "Kamwali wangu kasova ponopawu. Lakini deku tuyendi ukamuvikili liwoku lyaku na mweni danani."

19 Yesu kawuka pamu na vanachuli vaki, vamukovikela.

23 Pambeli Yesu kayingila munyumba ya yula mkomi. Pavamuwonili vakuva lindenda lipinga lya vandu likanda kulila, 24 kadeta, "Muwukepa! Muhinja ayu kasova ng’odu, kawonja hela!" Veni vamuseka. 25 Topi lipinga lya vandu pavaliwushili, Yesu kayingila mugati, kamukola liwoku muhija yula na mweni kawoloka.

22 Mundu yumu yavelili mkomi wa nyumba ya kudadavila, litawa lyaki Yailu ayendili, pamuwonili Yesu, kamtundamila, 23 kamluva Yesu padeta, "Muhinja wangu akutamika dabadaba. Dekudeku wisi, umvikili mawoku vaku, ili anani."

24 Topi, Yesu awukili pamu na Yailu. Vandu vamkovikela na kumkekeneka-kekeneka kwanongwa vatangalili ngenju.

38 Pavafikili kaya kwa Yailu mkomi wa nyumba ya kudadavila, Yesu kawona ndilingu na papikanishili vandu vakulila na kudadava. 39 Yesu kayingila munyumba, kavawombela "Wuli mkugola ndilingu na kulila? Mwana kasova ng’odu, kawonja hela!"

40 Lakini veni vamseka, topi, kavafumisha vosi panji. Kavatola tati na mau wa mwana yula, pamu na vanachuli vaki vatatu vavelili nawu, vayingila muchumbagati chivamuwonjishili mwana yula. 41 Yesu katola liwoku, kamuwombela, "Talita koumu!" Mana yaki, "Muhinja, ngukuwombela tandamuki!"

42 Bahala pala muhinja yula kayimuka na kakanda kuyendayenda. Muhinja yula aveli na myaka lilongu limu na mivili. Pafibwitukili afi, vandu vajinga nendu.

31 Yesu kayendilela kudeta, "Vandu va chileli achi dandivalinganishi na chindu liki? Vava wuliwuli? 32 Vava kucha vasongolu vayikaleyi kusoku vakwikemesha lipinga limu na limonga, ‘Tuvakuvila ng’oma, lakini mudinga ha! Tuvasomulela msambu wa makiva lakini mlila ha!’ 33 Kwa nongwa Yohani mbatisha ayisili, kuyikaja kulya na kuleka kulanda difwayi, yumwi mudeta chimkwela chinyamkela! 34 Mwana wa Mundu kayisa, akulya na kulanda, yumwi mukawombeyi, ‘Mumulole ayu mbafu na njayila, vaghanja vaki vasumula mbiya na vaveli na sambi.’ 35 Hata naha, luhunja lwa Chapanga ulinganila luwoneka kwa vosi vamjumilili."

Yesu mukaya ya Simoni Mfwalisayu

36 Mfwalisayu yumu amlalikili Yesu kulya filivi kaya yaki. Ayingilili munyumba ya yula Mfwalisayu, kayikala na kulya filivi. 37 Kula kumbwani kwavelili na mawu yumu yaveli na sambi. Aveli kapikana Yesu kava kayaki yula Mfwalisayu, atolili supa yitalamili ya alabasta yimemili utuli.

41 Ayisili pala mundu yumu yivamkema Yailu, aveli mtambika wa munyumba ya kudadavila. Kamtundamila Yesu, kamluva ayendi kaya yaki, 42 Kwanongwa mwana waki aveli yumu hela, aveli muhinja wa myaka lilongu limu na mivili, aveli dabadaba.

Yesu pakayendeyi, vandu vamukikili mbembi shosi.

49 Chipindi Yesu akali pakawomba, ayisili ndundami wa mtambika mkomi wa munyumba ya kudadavila, kamuwombela, "Muhinja waku kasova kala, ukotoo kumfwasha muwula kandi."

50 Yesu papikanishili naha, kamuwombela Jailosi, "Ukotoo kutila, ujumili hela, mweni dalowoki."

51 Pavafikili kaya yaki, Yesu amjumishili ng’odu mundu kuyingila pamu ila Petili, Yohani, Yakobi na valelwa va muhinja yula. 52 Vandu vosi vaveli vakulila na kudadava, Yesu kavawombela, "Mkotoo kulila mweni kasova ng’odu, kawonja hela."

53 Vandu vosi vakamsekeyi, veni vamanyili aveli kasova. 54 Lakini Yesu amkamulili liwoku, kadeta, "Mwana wangu, tandamuki!" 55 Ufuki waki wumuwuyila mhinja yula, katandamuka. Yesu kavalayila vamugayili filivi. 56 Valeli vaki vayikanganika nesu, lakini Yesu kavawombela vakotoo kumuwombela mundu milandu yigolikili.

Njifwa ya Lasalu

1 Mundu yumu yivamkema Lasalu, mweni kaya wa Betaniya, alwalili. Betaniya yaveli mlima wayikalagha Maliya pamu na Malita, vahaja mundu Lasalu 2 Ayu Maliya ndi mweni yamshaghili Bambu mafuta va kunungilila mumawulu na kuvapukuta na fwili shaki. Mhaja mundu Lasalu ndi yaveli akulwala. 3 Topi vala vahaja mundu valayisha lulayilayi kwa Yesu, vadeta, "Bambu, yula ghanja waku yumtamili kalwala!"

4 Yesu papikanishili, kadeta, "Lasalu asovi kwa utami awu ha, lakini afi figoleka ili ukomi wa Chapanga wuwoneki kwa utami awu na mwana wa Chapanga na mweni ajumiwi." 5 Yesu avatamili Malita na mhaja mundu na Lasalu. 6 Hata naha, papikanishili kucha Lasalu katakwa ayikalili majuva mavili kukula kula ngajila kuyenda kumlola. 7 Pambeli kavawombela vandundami vaki, "Tuyendi kandi Uyawudi!" 8 Vala vandundami vamuwombela, "Muwula! Mwandi mwandi hela Vayawudi vakakusakeyi vakugumi na miganga kukula kula, yuwi ukudayila kuyenda kandi kuku?" 9 Yesu kayangula, "Saa sha pamusi lilongu na mavili, duhu? Mundu payendayenda pamusi ayikwali ng’odu, nongwa akulola lwengi lwa mulima. 10 Mundu payendayenda pamihi dayikwali, nongwa kavahela lwengi." 11 Yesu pamalilili kudeta naha, kavawombela, "Ghanja wetu, Lasalu kawonja, lakini nguyenda ngamyimushi." 12 Vanachuli vaki vamuwombela, "Bambu leki pawonja, akunana." 13 Veni vamanya kucha Yesu kawomba milandu ya kuwonja ng’onju, kumbi kawomba milandu ya njifwa ya Lasalu. 14 Yesu kavawombela ngatu hela, "Lasalu kasova,

Yesu akulilakalila liwumbula linyamali

23 Yesu kayipaka muwatu pamu na vanachuli vaki vayenda. 24 Tepu liwumbula likomi likanda mulihiva, mbaka majinga vakanda kudibasha watu. Mwanja wula Yesu aveli mung’onju. 25 Vanachuli vamuyendela, vamuyimushi kunu pavadeta "Tulowoli Bambu tukusova!"

26 Yesu kavawombela, "Yumwi vandu yimuveli na ujumilwa mdokwa mbona mukutila?" Topi katandamuka, kalilakalila liwumbula na liyegha kuva nyanyi.

27 Vandu vayikanganika, vadeta, "Mundu ayu wa wuliwuli? Hata liyegha na liwumbula likumpikana!"

15 Payifikili lumihi, vanachuli vaki vamuyendela vamuwombela, "Apa paweka na ngesha yikupela. Topi, wuvaleki vandu ava ili vayendi kufijiji vakayihemileli filivi."

16 Yesu kavawombela, "Mukotoo kuvaleka vayendi, yumwi muvapi filivi valiyi!"

17 Lakini veni vamuwombela, "Tuva na mibumunda muhanu na vasomba vavili hela."

18 Yesu kavawombela, "Munyegheli apa." 19 Kavawombela vandu vayikali pasi mumidasi. Pambeli Yesu kayitola yila mibumunda muhanu na vala vasomba vavili, kayinula mesu kalola kumbindi kwa Chapanga kafinemela, pambeli kayimetula yila mibumunda, kavapa vanachuli vaki na veni vavapa vandu. 20 Vandu vosi valya, vayikuta. Pambeli vanachuli vakungasha fisighalili, vamemesha vitandavala lilongu na fivili. 21 Tolitoli ya valulumi yivalili vaveli alufu muhanu ngajila kuvalanga vamawu na vana.

25 Pamihi paliveyi samba kuchia, Yesu avayendilili vanachuli payendayenda mumbindi ya machi.

Yesu akuvapa filivi vandu elufu mchechi

32 Topi Yesu avakemili vanachuli vaki, kadeta, "Nguvawonela lusungu vandu ava kwanongwa vayikala na nenga kwa majuva matatu, ponopa vavahela filivi. Ngudayila ha kwivatawula na kuvaleka na njala vakuwesha kushunga mudeha."

33 Vanachuli vaki vamdashili, "Tuva pachivala, datupati koti filivi fya kukwila lipinga lyosi ali?"

34 Yesu kavadasha, "Muvanayu mibumunda miningi?" Vamuyangula, "Saba na fisomba fidokwa." 35 Topi, Yesu kaliwombela lipinga lya vandu liyikali pasi.

36 Pambeli kayitola yila mibumunda saba na fila fisomba, kamulumba Chapanga, kafidumula, kavapa vanachuli vaki na veni vavavaghashila vandu. 37 Vosi valya, vayikuta, pambeli vakungasha fisighalili, vamemesha fitandavala saba. 38 Ava valili vaveli valulumi elufu mchechi ngajila kuvalanga vadadala na vana.

Kuhomba saka ya nyumba ya kudadavila

24 Pavafikili Kapelinaumu vandu yivakunganya kodi ya Nyumba ya kudadavila vamuyendilili Petili, vamudasha, muwula wenu akuhombaya kodi ya Nyumba ya kudadavila?

25 Petili kayangula, "Yina, akuhomba." Topi, Petili payingilili munyumba, hata akali hela kudeta chilongu chochosi, Yesu kamudasha, Simoni, "Yuwi ukuwona wuliwuli? Vatwa va mlimawu vakukunga ushulu awu kodi kufuma kwa vaghani! Kufuma kwa vanamlima awu kwa vahenja?"

26 Petili kayangula, "Kufuma kwa vahenja, Yesu kavawombela mani naha vanamlima yikuvayilata ha." 27 Lakini tukotoo kuvavifya, yendi kulihiva kalopoli, Toli somba yatalili kuwomela, umutumbuli, mugati ukusiwona mbiya sha saka. Toli ukahombi kwanongwa ya nenga na yuwi.

Likuyu lingajila kulela

18 Pamavavila puti Yesu paghaveyi akuwuya kumbwani, katopa njala, 19 kaliwona libiki limu mumbalimbali ya deha kaliyendela lakini kaliwona livahela chindu ila mihamba weka. Topi, kaliwombela, "Kotoo kulela fivelekwa kandi jola!" Bahala pala libiki lila linyala. 20 Vanachuli pavawonili nawula vajinga, vadeta, "Nongwa liki libiki ali linyala kalopu?"

21 Yesu kavayangula, "Nakaka nguvawombela, leki pamuva na ujumilwa ngajila hoshu, mukuwesha kugola nahawu. Wekahela ha, ila hata pamuchiwombela chidunda achi ‘Tupuki kayilyasili mubahali,’ dachigoleki nahawu. 22 Pamuva na ujumilwa, chochosi damuluvi kwa kudadava damupati."

37 Bahala pala, liyisa liwumbula na majinga vakanda kutova watu mbaka machi vakanda kumema muwatu wula. 38 Yesu aveli kumbeli muwatu kasaghamila musahamu. Vanachuli vamuyimusha, vamuwombela, "Muwula, ukulola ng’odu ndambu yitumilwa?"

39 Yesu kayimuka, kalilakalila liwumbula lila na kavawombela majinga, "Nyamali jii!" Liwumbula linyamala na kulindivala jii. 40 Pambeli Yesu kavawombela, "Mukutila liki? Mukali muvahela ujumilwa?"

41 Na veni vatila nendu na vayidasha veni, "Ayu mundu wa ndambu liki? Hata liwumbula na majinga fyosi fikumjumila!"

35 Lumihi palufikili, vanachuli va Yesu vamyendela na kumuwombela, "Mahali apa pangajila vandu na lijuva lihonga. 36 Uvaleki vandu vayendi kufitava na mufijiji fya pabehi vakayihemeleli filivi."

37 Lakini Yesu kavayangula, "Yumwi muvapi filivi valyi."

Vamdasha, "Ponopa tuyendi tukahemeli mibumunda ya mbiya sha ijala ya myesi minani."

38 Kavadasha, "Muva na mibumunda miningi? Muyendi mkaloli."

Pavalolili kala, vamuwombela, "Tuva na mibumunda muhanu na vasomba vavili hela."

39 Pambeli Yesu kavawombela vanachuli vaki vavawombeli vandu vosi vayitapuli mufipinga-fipinga, vayikali pasi mulugobi. 40 Topi, vandu vayikala mufipinga fya vandu miya yimu fya vandu milongu muhanu. 41 Pambeli Yesu kaitola mibumunda yila muhanu na vasomba vavili. Kalola kumbindi, kamlumba Chapanga na kuyimetula yila mibumunda. Pambeli kavapa vanachuli vaki vavapi vandu. Wuwula wula kavapa vandu vosi vala vasomba vavili. 42 Vandu vosi valya vayikuta. 43 Vanachuli va Yesu vasola mibumunda na vasomba vasighalili vamemesha fitandavala lilongu limu na fivili. 44 Vandu vosi valili valulumi vaveli alufu muhanu.

48 Kavawona vanachuli vaki vakukimbanika kuguba watu kwa ngafi, kwanongwa liyegha lyaveli likuvalimba. Payiveyi samba kulangala, Yesu kavayendela payendayenda kumbindi ya machi. Akadayileyi kuvapita, 49 kumbi veni pavamuwonili akuyendayenda kumbindi ya machi, vadeta aveli chishuka. Vawuta, 50 kwanongwa vosi pavamuwonili vatilili nendu.

Bahala pala Yesu kavawombela, "Ndiva nenga! Mkotoo kutila, mugangamali." 51 Pambeli kayingila muwatu pamu nawu na uyegha unyamala. Vanachuli vaki vajinga nendu,

Yesu akuvapa filivi vandu nendu ya elufu mchechi

1 Chipindi achi, lipinga lingi likomi lya vandu vayikungula, vaveli vahela filivi. Topi Yesu avakemili vanachuli vaki, avawombilili, 2 "Nguvawonela lusungu vandu ava nongwa tuyikala pamu kwa majuva matatu nalelu vavahela filivi. 3 Panivaleka vayendi kaya na njala davashungi mudeha, nongwa vamonga vafuma kutali." 4 Vanachuli vaki vamudasha, "Kunu kudasi datupati koti mibumunda ya kuyikuta vandu vosi ava?" 5 Yesu avadashili, "Muna mibumunda miningi?" Vamyangula, "Tuva na mibumunda saba." 6 Topi kavalayila vayikali pasi, kayitola yila mibumunda saba, kamdadava Chapanga, kayimetula mibumunda, kavagayila vanachuli vaki, veni vavagayili vandu. 7 Vavelili kandi na fisomba fidokwa. Yesu kafinemela, wuwula kavagayila, vavagayili vandu. 8 Vandu valya, vayikuta. Vayola fisiyalili vamemesha fitandavala saba. 9 Vandu valili vaveli vatangalili nendu ya elufu mchechi vavalangiwili. Pambeli Yesu avatawulili,

Yesu akulilapila likuyu

12 Chilawu yaki pavafumeyi Betaniya, Yesu aveli na njala. 13 Topi kwa kutali aliwonili likuyu livelili na mahamba vatangalili. Kaliyendela aloli kucha liveleka. Pafikili kawona liveleka ng’odu lina mihamba hela, chipindi chaki cha kuveleka chavelili chakali. 14 Bahala pala kaliwombela likuyu, "Kufumila nalelu mbaka jola, mundu yoyosi akotoo kulya fivelekwa fyaku."

Vanachuli vaki vakapikanisheyi filongu afi.

Mawuli kufuma kulikuyu liyumili

20 Pamalavila putiputi, pavapiteyi, valiwonili lila likuyu liyuma kukandila mikigha mbaka kumbindi. 21 Petili akumbukili, chawombili Yesu, "Muwula, loli! Lila likuyu wulilapilili, liyuma!"

22 Yesu kamuwombela, "Mumjumili Chapanga. 23 Nguvawombela nakaka, mundu pachiwombela chidunda achi, ‘Tupuki kadubukili mulihiva,’ na pangajila hoshu mundima yaki, topi pajumila kucha chadetili dachifumbuki, dachigoleki kwa mweni. 24 Ponopa nguvawombela, pamdadava na pamumuluva Chapanga chindu chochosi mjumili mupokela kala davavapi. 25 Pamdayila kudadava, pomeli kila mundu chila chavavifyili ili tati wenu wa kumbindi avapomeli fimuvifyili."

Yesu akuvakema vandundami va pakwandi

1 Lijuva limu, Yesu aveli kawoloka muluwongu ya lihiva lya Genesaleti, vandu vatangalili vaveli vamushengitela na kuyikekeneka, vakupikanisha chilongu cha Chapanga. 2 Kavawona matu mavili mung’emula ya lihiva. Valovi veni vajabukili, vakusambula njafu shawu. 3 Payingilili muwatu wumu wa Simoni, Yesu akamuluveyi Simoni awuseleshi kumachi, kutali padokwa na ng’emula ya lihiva. Kayikala pasi, akuwula lipinga lya vandu paghaveyi muwatu.

4 Pamalili kuwula, kamuwombela Simoni, "Soli watu awu mbaka pamachi matali, mukadangi njafu shenu muwomeshi vasomba."

5 Simoni kamuyangula, "Bambu tuyifwasha kutegha njafu pamii posi tupata chindu ha, leki pawudeta yuwi datuyasilili njafu." 6 Pambeli pavagolili kala, vawomesha vasomba vatangalili hata njafu sikakandeyi kudumuka. 7 Vavakema vayawu vavelili muwatu wingi vayisi kuvatanga. Vayisa, vamemesha vasomba matu vosi mavili, hata vakacheyi vadibali. 8 Simoni Petili pawonili nawula, kamtundamila Yesu kadeta, wuki pawushu panenga, yuwi Chapanga, nenga muna sambi!

9 Simoni pamu na vamonga vosi vakayikang’anikeyi munu kupata vasomba vatangalili nawula. 10 Wuwula wula Yakobi na Yohani, vana va Sebidayu, vaveli valova vayaki Simoni. Yesu kamuwombela Simoni, "Kotoo kutila, kukandila ponopa dawuvi mufuva vandu."

11 Topi, pavapayikili matu mung’emula ya lihiva, vafilekili findu fyawu fyosi, vamkovikela Yesu.

Yesu akulilakalila liwumbula

22 Lijuva limu, Yesu kayipakili muwatu pamu na vandundami vaki, kavawombela, "Tujabuki kumwambu ya lihiva." Topi vakanda mwanja, 23 pavaveghi muwatu vakuyenda, Yesu simkamulili mbota, kawonja. Tepu liwumbula lyakandili mulihiva, machi vakandili kuyingila muwatu, vaveli munjifwa. 24 Vala vandundami vamyendela Yesu vamuyimusha, pavawomba, "Bambu, Bambu! Tukusova!"

Yesu kayimuka, kafiwombela majinga na liwumbula finyamali, Tepu finyamala, filindivala jii. 25 Yesu kavawombela vandundami vaki "Kujumila kwa yumwi kuva koti"

Lakini veni vakayikang’anikeyi na kutila, kunu vakwidasha, "Ayu mundu liki? Kavawombela majinga na liwumbula linyamali vamuyitikila?"

Yesu akulilakalila liwumbula

22 Lijuva limu, Yesu kayipakili muwatu pamu na vandundami vaki, kavawombela, "Tujabuki kumwambu ya lihiva." Topi vakanda mwanja, 23 pavaveghi muwatu vakuyenda, Yesu simkamulili mbota, kawonja. Tepu liwumbula lyakandili mulihiva, machi vakandili kuyingila muwatu, vaveli munjifwa. 24 Vala vandundami vamyendela Yesu vamuyimusha, pavawomba, "Bambu, Bambu! Tukusova!"

Yesu kayimuka, kafiwombela majinga na liwumbula finyamali, Tepu finyamala, filindivala jii. 25 Yesu kavawombela vandundami vaki "Kujumila kwa yumwi kuva koti"

Lakini veni vakayikang’anikeyi na kutila, kunu vakwidasha, "Ayu mundu liki? Kavawombela majinga na liwumbula linyamali vamuyitikila?"

Yesu akumuwusha mundu finyamkela

26 Vayendelela na mwanja, vakafiki mbwani ya Vagelasi pabehi na Galilaya, kumwambu ya lihiva.

12 Lijuva palihongili, vala lilongu na vavili vamuyendela na kumuwombela, "Wuvayitawuli vandu vayendi kaya shawu vakasaki filivi na pakuwonja. Apa patuvelili padasi."

13 Lakini Yesu kavawombela, "Yumwi damuvapi filivi."

Vamyangula, "Tuvahela chindu, tuva na mibumunda muhanu na vasomba vavili hela. Yuwi ukudayila tuyendi tukavahemileli filivi lipinga lyosi ali?" 14 Pala paveli na vandu vatangalili, valulumi weka vaveli milongu mya muhanu.

Topi Yesu kavalayila vandundami vaki, "Muvawombeli vandu vayikali fipinga fya vandu milongu muhanu milongu muhanu."

15 Vandundami vaki vagola kucha wavalayilili, vosi vayikala pasi. 16 Pambeli Yesu katola yila mibumunda muhanu na vala vasomba vavili, kalola kumbindi, kamlumba Chapanga, kametula, kavapa vandundami vaki, vavapi vandu valyi. 17 Vandu vosi valya, vayikuta. Pavasosolili filivi fisighalili, vamemesha fitandavala lilongu na fivili.

Yesu akughalambula machi kuva difwayi

1 Lijuva lya tatu kwavelili na lihungu lya kuyiheta mumbwani ya Kana ya mlima wa Galilaya. Mawaki Yesu avelili pala. 2 Wuwula wula Yesu pamu na vandundami vaki valalikiwili mulihungu lila. 3 Difwayi payipelili, mawaki Yesu kamuwombela Yesu, "Vandu vavahela difwayi."

4 Yesu kamuyangula, "Mau, ukotoo kung’ombela cha kugola, saa ya nenga yikalihela kufika."

5 Pambeli mawaki Yesu kavawombela vala vandumindumi, "Chochosi chavawombela, mugoli."

6 Pala pavelili na ngwangu sita sigoliwili na migonguveli. Ngwangu asi shavikiwili na Vayawudi kwanongwa ya kutayila machi va kuying’alisha kucha chishovi chawu. Kila ngwangu yimu yayingilagha ndowu mbili awu ndatu sha machi. 7 Yesu kavawombela vala vandumindumi, "Mumemeshi machi mungwangosi." Veni vamemesha dali. 8 Pambeli Yesu kavawombela, "Ponopa muteki machi ava muyeghi kwa mkomi wa lihungu." Vandumindumi vavayegha 9 machi vala yivaghalambukili kuva difwayi kwa mkomi wa lihungu, mweni kavayesha. Mkomi yula amanyili ha koti kuyifumili difwayi yila, lakini vandumindumi yivamyeghilili machi vamanyili koti kuyifumili. Topi kamukema yula yaheta, 10 kamuwombela, "Vandu vosi vakutawula tanila difwayi yiveli nofu, pambeli vakutawula yila yingajila kuva nofu. Lakini yuwi kuyilindila difwayi nofu mbaka ponopawu."

11 Yesu kagola muhilu awu wa kwaa aku mbwani ya Kana, mumlima wa Galilaya. Pala palangushili ukomi waki na vandundami vaki vamujumilili.

6 Yesu adashili naha ili amuteghi Filipu, kwanongwa mweni amanyili kucha dagoli wuliwuli.

7 Filipu kamuyangula, "Dinali mya mbili hela dasikwili ha kuhemela mibumunda ya kukwila kila mundu."

8 Mwanachuli yumu wa Yesu litawa lyaki Andeleya, mlongumundu Simoni Petili kamuwombela Yesu, 9 "Apa pana mwana kava na mibumunda muhanu na fisomba fivili. Lakini achi chindu ng’odu kwa vandu vatangalili nahawu!"

10 Yesu kavawombela vandundami vaki, "Muvawombeli vandu vayikali pasi." Pahali pala pavelili na lugobi posi. Topi vandu vosi vayikala pasi. Valulumi weka mulipinga lila vavelili milongu mya muhanu. 11 Pambeli Yesu kayitola yila mibumunda, kamulumba Chapanga, kayimetula na kuvagayila vandu vosi vayikalili pala. Katola fisomba, kagola ngimu wuwula wula. 12 Vandu pavayikutili kala, Yesu kavawombela vanachuli vaki, "Mukungashi filivi fisighalili chikotoo kuyaghamila chindu chochosi." 13 Topi vandundami vakungasha fisighalili, vamemesha fitandavala lilongu na fivili fya fibumunda fisighalili.