Milagres de Jesus

Yesu abhalamiha akangalola bhabheli

27 Yesu paakabhokiki pandu panipala, na paakabhi ajenda, akangalola bhabheli bhakanjengalili koni bhakajamalyaje, bhakapwaghaje, "Mwana waka Daude, utubhonila chiha!"

28 Yesu paakajingi munyumba, bhandu bhabheli bhakanjengalile, najombi akabhalalukile, "Bho, muhobhalela kubha nhweza kundamiha?"

Na bhombi bhakamuyangiki, "Ena, Bambo."

29 Panihapa Yesu akapapihi mihu ghabhu, akapwagha, "Na ibya kwinu ngati momuhobhalile." 30 Palapala mihu ghabhu ghakabhopuliwi. Na jombi Yesu akabhalakalili kwa makili, akapwagha, "Ngamwampwaghi mundu jokapi lijambu lenu."

31 Nambu bhombi bhakabhokiki, na kutangaza malobhi ghaka Yesu mu inchi jenijela jokapi.

Yesu abhalamiha akangalola bhabheli

29 Yesu na bhabhulwa bhaki pabhakabhi bhabhoka ku Yeliko, lipogha likolongwa la bhandu, bhakunjengalile. 30 Akangalola bhabheli bhabhakabhi bhatemi punkeghi ja indela, na pabhakajowini kubha Yesu apeta, bhakajamalili, "Bambo, Mwana waka Daude, utubhonila chiha!"

31 Lipogha la bhandu lela lakabhalakalili na kubhapwaghila mtumbalaje, nambu akangalola bhala bhakajonjuki kujamalila nakanopi, bhakapwaghaje, "Bambo, Mwana waka Daude, utubhonila chiha!"

32 Yesu akajemiki, na kubhaloha na kubhalalukila, "Bho, mpala nuntendila kike?"

33 Bhakamuyangiki, "Bambo, tupala kulola."

34 Yesu akabhabhoni chiha, akaghapapihi mihu ghabhu, na palapala bhakapatiki kulola, na bhakanjengalile.

Yesu andamiha mundu ngalola wa ku Betisaida

22 Yesu akahiki ku Betisaida papamu na bhabhulwa bhaki. Bhandu bhakundeti ngalola, bhakunjopiki ankamula nahuli andamihaje. 23 Yesu akunkamwi ngalola jola chiwoku akumpeliki kunja ja chijiji. Akunhuni imata mumihu, akumbeki mabhoku, na kundalukila, "Bho, uchibhona chindu?"

24 Ngalola jola akalingiki kunani, na kupwagha, "Nabhabhona bhandu bhabhonikana ngati mikongu jejijenda."

25 Bhela Yesu akumbeki kabheti mabhoku mumihu. Na jombi akatupiki mihu na uwezu waki wa kulola ukunkelabhukili na akaweni kila chindu wichu. 26 Yesu akumpwaghi abhuja kunyumba jaki na kundakalila, "Ngawikelabhuka kuchijiji, wala kumpwaghila mundu jokapi jola."

Yesu andamiha mpuli ngajowa

31 Yesu akabhokiki ku inchi ja ku Tilo, akapetili ku Sidoni, akahikiki ku bahali ja Galilaya kwa kupetela inchi ja ku Dekapoli. 32 Bhela bhakundeti mpuli, najombi akabhi ngajowa, bhakunjopiki ambekila mabhoku nahuli andamihaje. 33 Yesu akumbohiki mundu jola pa lipogha la bhandu na akunjingi ngonji mu makutu ghaka mundu jola, akahuni imata mu ngonji yaki na kunkamu mundu jola pa lulimi. 34 Panihapa Yesu akalingali kunani kumahunde kwaka Chapanga, akapomwi kwa makili, na kumpwaghila, "Efata," ndandi jaki, "Uhoghukaje."

35 Palapala mundu jola akatumbwi kujowana wichu, na chifungu cha lulimi lwaki chakabhopwiki, na kulonge wichu. 36 Yesu akabhakanaki ngabhampwaghi mundu jokapi jola lilobhi lenihele. Nambu ngati moakabhakanakili, nde mobhajendalili kutangaza lilobhi lenihele. 37 Bhandu bhakakangichi namaa na kupwagha, "Atehi ghokapi wichu. Abhatenda hata akangajowa kujowana, na akabhapuli kulongela!"

Yesu andamiha ngalola Batilomayo

46 Bhela, bhakahiki ku Yeliko, najombi Yesu paapitika mu muchi hoghu akabya na bhabhulwa bhaki papamu na lipogha likolongwa la bhandu. Mundu jumu ngalola joalowakeka Batilomayo, mwana waka Timayo, akabhi atami punkeghi ja indela akajopa bhunjangatyaje. 47 Paakajowini kubha Yesu wa ku Nazaleti akabhili apeta pandu panihapa, akatumbwi kujamalila, "Yesu, Mwana wa Daude, umonila chiha!"

48 Bhandu bhamahele bhakundakalile nahuli atumbalaje, nambu jombi akajonjuki kujamalila, "Mwana waka Daude, umonila chiha!"

49 Yesu akajemiki, na kupwagha, "Mundohaje."

Bhela, bhakundohiki ngalola jola, bhakumpwaghili, "Ulipekya mtima! Jemaje, akuloha."

50 Na jombi akaleki kutali ingobhu jaki, akahombiki, na kunjende Yesu.

51 Yesu akundalukile, "Bho, upala nukuhengila kike?"

Ngalola jola akayangike, "Mbola, nyopa mbata kulola."

52 Yesu akumpwaghile, "Jendaje, uhobhalelu waku ukulamihe."

Palapala ngalola jola akaweziki kulola, na akunjengali Yesu mwindela.

Yesu andamiha ngalola

35 Yesu paakabhi aheghali muchi wa Yeliko, kukabhi na mundu jumu ngalola akatemi punkeghi ja indela akajopaje. 36 Paakajowini lipogha la bhandu bhakapetaje, akalalukile, "Bho, kubhi na kyane?"

37 Bhakumpwaghile, "Yesu wa ku Nazaleti apeta."

38 Jombi akajamalili akapwagha, "Yesu! Mwana waka Daude! Umonila chiha!"

39 Bhandu bhabhalonguli bhala bhakundakalili na kumpwaghila atumbalaje. Nambu jombi akajendali kujamalila, akapwagha, "Mwana waka Daude! Umonila chiha!"

40 Yesu akajemiki na kubhalaghalaki bhundeta ngalola jola kwaki. Ngalola jola paakaheghalili pambipi, Yesu akundalukile, 41 "Bho, upala nukuhengila kyane?"

Akayangiki, "Bambo, mbala kubhona kabhate."

42 Yesu akumpwaghile, "Ubhonaje! Uhobhalelu waku ukulamihe."

43 Palapala ngalola jola akaweziki kulola, na kunjengale Yesu koni akundumbalya Chapanga. Na bhandu bhokapi bhabhaliweni lijambu leniheli, na bhombi bhakundumbali Chapanga.

Yesu andamiha mundu joabhelakiki ngalola

1 Yesu paakabhi apeta, akumbweni mundu joakabhi ngalola kutumbu kubhelakeka. 2 Bhabhulwa bhaki bhakundalukili bhakapwaghaje, "Mbola, bho, nane joatendiki mahoku, mundu ajoju au bhabheleka bhaki, mbaka abhelakika ngalola?"

3 Yesu akayangike, "Hajoju ngacheatendiki mahoku, wala bhabheleka bhaki, nambu akabhelakiki ngalola nahuli makili ghaka Chapanga ghabhonikanaje ghahenga lihengu mkati jaki. 4 Imbalika kuhenga mahengu ghaki jombi joandumike. Koni kwakali muhi, ikilu jihika, kwanga kuweza mundu kutenda lihengu. 5 Chikahi chemili pundema, nepani nde unang’anu wa ndema."

6 Paakajomwi kulongela ghanihagha, Yesu akahuniki imata pahi, akatendiki litopi kwa imata ghala, na kumpaka ngalola jola litopi mumihu, 7 na kumpwaghila, "Ujendaje ukachamba machi ku litanda la Siloamu. Silohamu ndandi jaki joatumakike." Bhela akapiti, na kuchamba machi, na kukelabhuka koni akabya alola.

2 Henu akahikiki mundu jumu joabhi na malohi, akanjojabhili na kupwagha, "Bambo, ngati anaupaliki, uweza kung’olola."

3 Yesu akahatambwi chiwoku, akankamwili na kupwagha, "Mbala! Ugholulikaje!" Palapala mundu jola akalamiki malohi ghake. 4 Yesu akumpwaghile, "Lingalya, ngawampwaghi mundu jokapi, nambu ujendaje ukalilangiya kwaka mpenganyambiku, na ukabhoha nyambiku ngati moakalaghalaki Musa, nahuli kulangi kubha utehi kulama."

2 Panihapa bhandu bhakandeti mundu jumu joatengwiki, koni bhungoniki panani ja chitala. Yesu paakaweni uhobhalelu wabhu, akampwaghi mundu joatengwiki jola, "Lipekya mtima mwanango! Ulekakiwi mahoku ghako."

3 Panihapa bhabhola bhakumu bha Shelia bhakatumbwi kuholalela mu mitima jabhu, "Mundu ajoju antondo Chapanga!"

4 Yesu akaghamanyi maholalelu ghabhu, akapwaghite, "Bho, maghambu kiki muholale mahakau mu mitima jinu? 5 Bho, laleku lelipepwiki nakanopi, kupwagha, ‘Ulekakiwi mahoku ghaku,’ au kupwagha, ‘Jemaje na ujendaje?’ 6 Henu, mbala mumanyaye kubha Mwana waka Mundu abhi na uwezu pundema wa kubhalekake bhandu mahoku." Panihapa akampwaghi mundu jotengwiki jola, "Jemaje, na utola chitala chaku, na ujendaje kunyumba jaku."

7 Mundu joatengwiki jola akajemiki, na kubhuja kunyumba jaki.

10 mkati mola kukabhi na mundu jumu joakatengwiki chiwoku. Bhela, bhandu bhakundaluki Yesu, "Bho, wichu le kundamiha mundu Lichobha la Sabato?" Bhakundaluki bhelabhela nahuli bhapata ndandi ja kuntakila.

11 Yesu akabhayangiki, "Ngati anaabhi mundu jumu pachilanda jinu abhi na limbeleli limu, na limbeleli lela analijingi mulibhomba Lichobha la Sabato, bho, ngaalikamuli na kulipiha mulibhomba mola? 12 Bho, mundu nga wambone nakanopi kupeta limbeleli? Bhela, nde wichu kutenda mambu ghambone mu Lichobha la Sabato." 13 Panihapa Yesu akampwaghi mundu joakatengwiki chiwoku jola, "Hatambula chiwoku chaku."

Akahatambwili, na chombi chikalamiki na kubha ngati chengi chela.

30 Bhela, nkowanu wa chimbomba waka Simoni, akaghoni pachitanda akabhi na chitamu. Paakahikiki Yesu pela bhakumpwaghi lilobhi lenihele. 31 Yesu akanjendi mabhu jola, akankamwi chiwoku, na kunjangati kujema. Na chitamu hechi chikandekakili, na kutumbu kubhatumakila.

Yesu ang’olola mundu joabhi na malohi

40 Lichobha limu mundu jumu joakabhi na malohi akunjendi Yesu, na kunchikamila na kundobha. "Anaupai, uweza kung’olola."

41 Yesu akumboni chiha, akahatambwi chiwoku chaki, akankamwi na kumpwaghila, "Mbala! Ugholulikaje!" 42 Palapala chitamu cha malohi chikandekaki mundu jola, na akagholulike.

3 Chikahi chenihechi bhandu ncheche bhakundetiki mundu joatengwiki kwaka Yesu. 4 Maghambu gha kutwele kwa bhandu, ngachebhaweziki kumpeleka mbaka paakabhi Yesu. Bhela bhakahotwi kunani ja nhwagala wa nyumba pandu pala paakajemiki Yesu. Pabhakapatiki mbekenyu bhakunheli mtamwa jola koni aghoni panani ja ulele, palongi jaka Yesu. 5 Yesu paakaweni uhobhalelu wabhu, akumpwaghi mundu joatengwiki jola, "Mwanango, ulekakiwi mahoku ghaku."

6 Bhabhola bhakumu bha Shelia, bhabhakabhi panipala bhakaholali mu mitima jabhu, 7 "Bho, aweza bhole kulonge bhenibhela? Antondola Chapanga! Bho, nde nane joaweza kulekake mahoku nambu jumu pela, yani Chapanga?"

8 Palapala Yesu akamanyiki maholalelu ghaghabhi mkati ja mitima jabhu, akabhapwaghile, "Bho, maghambu kiki muholale ghanihagha mu mitima jino? 9 Henu lelipepwiki nakanopi lako, kumpwaghi mundu joatengwiki ajoju, ‘Ulekakiwi mahoku ghaku,’ au kumpwaghi, ‘Jujmukaje! Utola uleli waku ujendaje’? 10 Nambu mbala mmanya kubha Mwana waka Mundu abhi na lujiniku lwa kubhalekake bhandu mahoku ghabho pani pundema." Panihapa akumpwaghi mundu joatengwiki jola, 11 "Nukupwaghi, ujemaje, utola uleli waku na ujendaje kunyumba jaku!"

12 Bhandu bhokapi bhakabya bhalingalila, mundu jola akajemiki na kutola uleli waki na kujenda. Bhandu bhala bhakakangichi na kundumbali Chapanga, bhakapwaghaje, "Ngachetulabhali kubhona chindu ngati cheniheche!"

Yesu andamiha mundu joatengwiki chiwoku

1 Yesu akajingi kabheti mu nyumba ja kuhimangani Bhayahude, na mkati mola akabhi mundu joatengwiki chiwoku. 2 Monimola, bhandu bhangi bhundingalya Yesu ngati andamiha mundu jola mu Lichobha la Sabato, nahuli bhapata ndandi ja kuntakila. 3 Yesu akumpwaghi mundu joatengwiki chiwoku jola, "Uhika pachilanda pambano." 4 Bhela, akabhalaluki anana, "Bho, wichu le kwa Lichobha la Sabato kuhenga ghambone au kuhenga mahakau, kujilamiha roho au kujikoma?"

Nambu bhombi bhakatumbi chinunu. 5 Yesu akabhalingali bhandu bhokapi kwa inyela na kuhakalila kwa ndandi ja kunonopa mitima jabhu. Bhela akampwaghi joakatengwiki chiwoku jola, "Uhatambula chiwoku chako!" Na jombi akahatambwi chiwoku chaki na akalamike.

Yesu andamiha mundu

12 Yesu paakabhi mu muchi ghumu wa Galilaya, akahikiki mundu joabhi na malohi hyegha jokapi. Mtamwa hoju paakambweni Yesu, akalihawi pahi, akalobhiki, "Bambo, ngati anaupala, uweza kung’olola!"

13 Yesu akahatambwi chiwoku chaki, akankamwi na kumpwaghila, "Mbala! Ugholulikaje!" Palapala malohi ghakumbokike.

18 Panihapa bhandu bhakahikiki, bhuntandaini mundu jumu joatengwiki pa uleli, bhakalengiki kunjingia mkati, nahuli bhumbeka palongi jaka Yesu. 19 Nambu, ngachebhaweziki kujingi mkati, kwa ndandi ja bhandu bhamaheli. Bhela bhakuntotwili bhakunkwehiki panani ja nhwaghala, bhakapekanywi, na bhakunheli pa uleli mpaka pachilanda ja bhandu bhala palongi jaka Yesu. 20 Yesu paakaweni uhobhalelu wabhu, akumpwaghi mundu joatengwiki, "Nkochi wangu, mahoku ghaku ghalekakiwi."

21 Bhabola bha Shelia na Mafalisayo bhakatumbwi kulilaluha, "Bho, hajo mundu bholi joantondo Chapanga? Bho, nane joaweza kulekake mahoku? Chapanga kanjika jaki nde joaweza kulekake mahoku!"

22 Yesu akaghamanyi maholalelu ghabhu, akabhalalukile, "Bho, muholale kiki mu mitima jinu? 23 Bho, lelipepwiki nakanopi lako, kupwagha, ‘Ulekakiwi mahoku ghaku,’ au kupwagha, ‘Jemaje na ujendaje?’ 24 Nambu mbala mmanya kubha Mwana waka Mundu abhi na amule pundema ja kulekakela bhandu mahoku ghabhu." Bhela akampwaghi mundu jola joatengwiki, "Nukupwaghila, jemaje, utola uleli waku, na ujendaje kunyumba jaku."

25 Palapala, mundu joatengwiki jola akajemiki palongi jabhu, akatoliki uleli waki na kujenda kunyumba jaki koni akabya andumbali Chapanga.

Mundu joatengwiki chiwoku

6 Mu lichobha lengi la Sabato, Yesu akapiti kubhola mu nyumba ja kuhimangani Bhayahude. Mkati ja nyumba ja kuhingani Bhayahude jela kukabhi na mundu joatengwiki chiwoku cha kumalelelu. 7 Bhabhola bhakumu bha Shelia na Mafalisayo bhakumu bhapalika bhapata ndandi ja kuntaki Yesu na bhela bhalendalya bhabhona ngati anaandamiha mundu mu Lichobha la Sabato. 8 Nambu Yesu akaghamanyiki maholalelu ghabhu, akumpwaghi mundu joatengwiki chiwoku jola, "Ujema, uwika palongi pambane." Mundu jola akajemiki pachilanda jabhu. 9 Bhela Yesu akabhapwaghile, "Nundaluki mwanganya, bho, wichu le mu Lichobha la Sabato kuhenga manyahi au kuhenga mahakau? Kukengale womi waka mundu au kuukoma?" 10 Akabhalingalili bhandu bhokapi bhabhabhi panipala, na akumpwaghi mundu jola, "Uhatambula chiwoku chaku." Akatendiki ngati Yesu moakampwaghile na chiwoku chaki chakalamike.

Yesu andamiha mtumika waka Nkolongwa wa manjolinjoli wa ku Loma

1 Yesu paakajomwili kulonge mambu ghanihagha kwa bhandu, akapiti ku Kapelenaumu. 2 Konihoku kukabhi na nkolongwa jumu wa manjolinjoli mia moja wa ku Loma, joakabhi na mtumika waki joakampaliki namaa. Mtumika hoju atendika kulwala pambipi na kupotela. 3 Nkolongwa hoju paakajowini malobhi panani jaka Yesu, akabhatumiki bhazee bhakumu Bhayahude bhajenda bhakundobha Yesu ahika andamiha mtumika waki. 4 Pabhahikiki kwaka Yesu, bhakumpembali namaa, bhakapwaghiki, "Unjangatya mundu ajoju, 5 maghambu abhapala bhandu bha inchi jitu, na nde joatuchengi nyumba ja kuhimangani Bhayahude."

6 Bhela, Yesu akapiti papamu nabhu. Paakaheghali kuhika pa nyumba jaka nkolongwa hoju, nkolongwa hoju akabhatumiki bhakochi bhaki bhumpwaghila Yesu, "Bambo, ngawaling’aha kuhika kone. Ndandi nenga ngachembalika kukujopale wenga ujingala mu nyumba jangu. 7 Nde ndandi nilibhoniki ngachembalika kuhika kwako. Henu ulongila pe lilobhi, na mtumika wangu anaalamaje. 8 Ndandi nepani nanatu nde na mundu nemi pahi ja ujemelelu wa bhakolongwa, na mi na manjolinjoli pahi jangu. Numpwaghi jumu, ‘Ujendaje!’ Na jombi ajenda, na numpwaghi jongi, ‘Uhika!’ Na jombi ahika. Na ananumpwaghi mtumika wangu, ‘Uhenga anana!’ Na jombi ahenga."

9 Yesu paakajowini malobhi ghanihagha, akakangichi namaa, na akaling’anambuki lipogha la bhandu lelabhi lunjengalela na kupwagha, "Chakaka numpwaghila ngachenabhali kumbona mundu joabhi na uhobhalelu ngati ghongone, njeta hata ku Izilaeli!"

10 Bhela bhandu bhala pabhahikiki kunyumba jaka Nkolongwa wa ku Loma jola bhakumketanili mtumika jola alamike.

11 Mkati mola kukabhi na mbomba joakakamuliki na lijobhi kwa chikahi cha hyaka komi na nane. Akabhi na chipendi na ngacheawezika kuhatambuka. 12 Yesu paakambweni mbomba jola, akandohiki, na kumpwaghila, "We mabhu, chitamu chaku ulamike." 13 Akabhei mabhoku panani jaki na kundamiha, na palapala akahatambwiki na kundumbali Chapanga.

Yesu andamiha mtamwa mu Lichobha la Sabato

1 Mu Lichobha limu la Sabato, Yesu akapiti kula chilebhe kunyumba jaka mundu jumu nkolongwa wa Mafalisayo, na bhandu bhabhakabhi panipala bhakabhi bhundingalakila. 2 Mundu jumu joakabhi na chitamu cha kuhimba hyegha akabhi palongi jaka Yesu. 3 Yesu akabhalalukili bhabhola bha Shelia na Mafalisayo, "Bho, Shelia jitu le jilaghalaki kundamiha mundu mu Lichobha la Sabato au nga wichu?"

4 Nambu bhombi bhakatemi chinunu. Yesu akamkamwi mtamwa jola, akandamihi na kundeka ajendaje.

Yesu alamiha bhandu komi

11 Yesu paakabhi mumwanja wa kujenda ku Yelusalemu, akapetiki mukulindakani mwa muchi wa Samalia na wa Galilaya. 12 Paakabhi ajingi mu chijiji chimu, akahimangini na bhandu komi bhana malohi. Bhakajemi cha kutali, 13 bhakajamalili, bhakapwaghaje, "Yesu! Bambo utubhonila chiha!"

14 Yesu paakabhaweni, akabhapwaghile, "Njenda mkalilangia kwa bhapenganyambiku."

Pabhakabhi mwindela bhakajendaje, bhakalamike. 15 Jumu wabhu paaliweni kubha alamike, akakelawiki kwaka Yesu koni akundumbalya Chapanga kwa kujamalila. 16 Akalileki pahi palongi ja magholu ghaka Yesu koni akunchengulaje. Mundu jonihoju akabhi Msamalia. 17 Yesu akalalukile, "Bho, nga bhandu komi le bhabhalamike? Bho, tisa bhala bhabhi kwako? 18 Bho, ngacheabhonakini mundu jongi joakelawiki kundumbali Chapanga nambu ngeni ajoju pela?" 19 Bhela Yesu akumpwaghi mundu jola, "Ujemaje, ujendaje, uhobhalelu waku ukulamihe."

Yesu alamiha pa litanda la machi

1 Paghapetiki ghanihagha kukabhi na uwangalalu ghongi wa Bhayahude, najombi Yesu akakweliki kujenda ku Yelusalemu. 2 Na ku Yelusalemu hoku pundyangu ukolongwa wa muchi ghoulowakeka Ndyangu wa Limbeleli, pambipi jaki pakabhi na litanda la machi lelilowakeka kwa Kiebulania Betizata, nalombi lakabhi na mabalaza nhwanu. 3 Mkati ja mabalaza hagha kukabhi na lipogha likolongwa la bhatamwa bhaghonile, akangalola, iwete, na bhabhatengwike, bhakabhi bhalendalela machi ghakilabhanwaje. 4 Kwa ndandi kubhi chikahi cheahele mtumika wa kunani kwaka Chapanga, na kujingi mkati ja machi, na kughakilabhana machi. Bhela jola joakubha wa kutumbula kujibhila chikahi machi paghakilabhanwa, alama chitamu chokapi cheakabhi apatike. 5 Na panihapa pakabhi na mundu jumu, joakabhi atengwike kwa hyaka selasini na nane. 6 Yesu paakumbweni jonihoju aghonile, najombi akamanya kubha jombi abhi mtamwa na hali jeniheji kwa chikahi chilachu, akundalukile, "Bho, upala kulama?"

7 Mtamwa jola akamuyangiki, "Bambo, nepani ngachemi na mundu wa kumbeleka mulitanda, machi paghakilabhanwa, nambu chikahi panhika nepani, mundu jongi ajingila mangani jangu."

8 Yesu akumpwaghile, "Jemaje, utola uleli waku, na ujendaje." 9 Palapala mundu jola akalamike, na akalitwekiki uleli waki, na kujenda.

Na lichobha leniheli lakabhi Lichobha la Sabato.

46 Bhela akahikiki kabheti ku Kana ja Galilaya, panihapa paakaghatendiki machi kubha divai. Panihapa pakabhi na ofisa jumu joakabhi na mwana waki mtamwa ku Kapelenaumu hoku. 47 Jombi paakajowini kubha Yesu ahikiki kuhuma ku Yudea mbaka ku Galilaya, akunjendili, akundobhiki ahelalaje na ajendaje kundamiha mwana waki joakabhi mtamwa, kwa ndandi akabhi pambipi kupotela. 48 Bhela Yesu akumpwaghile, "Nanga kubhona nginyulila na ngangachu, ngamwihobhaleli ng’o."

49 Ofisa jola akumpwaghile, "Bambo, chondi uhelalaje mangani mwana wangu ngacheapotile."

50 Yesu akumpwaghile, "Ujendaje, mwana waku alamike."

Mundu jola akalihobhali lilobhi lela leakalongi Yesu, najombi akapiti. 51 Na paakabhi ahelela, bhatumika bhaki bhakunjopalile, bhakapwaghaje, "Mwana waku alamike!"

52 Bhela akabhalalukili lisaa paakatumbwi kubha wichu, na bhombi bhakumpwaghili, "Lichu, saa saba ja muhi, chitamu chakundekike." 53 Bhela tati waki akamanyiki kubha lisaa lelalela leakumpwaghi Yesu, "Mwana waku alamike." Jombi na bhokapi bha munyumba jaki bhakunhobhali Yesu.

54 Jeniheji nde nginyulila ja kabheli jeakahengiki Yesu, paakabhi ahuma ku Yudea kujenda ku Galilaya.

20 Mabhu jumu mtamwa wa kupita mwahi kwa chikahi cha hyaka komi na ibheli, akanjengali Yesu cha kunyuma, na kunkamula nkungilu wa ingobhu jaka Yesu. 21 Maghambu akapwaghiki muntima waki, "Ananunkamwi pena ingobhu jaki, ananamaje."

22 Yesu akang’anambwiki na kumbona, akampwaghile, "Kamwali wangu, ulipekya mtima! Uhobhalelu waku ukulamihe." Palapala kamwali jola akalamiki.

25 Papuje akabhi mbomba jumu joakabhi na chitamu cha kupita mwahi kwa chikahi cha hyaka komi na ibheli. 26 Mbomba jonihojo akabhi ang’ahakiki kwa akasing’anga bhamahele. Koni akabya atumili hindu yaki yokapi, ngacheapepukile na hali jaki jakajendali kubha nga wichu. 27 Mbomba hoju paakajowini Yesu abhalamiha bhandu, akapekalaki pa lipogha la bhandu kuhuma kunyuma, na kukamula ingobhu jaka Yesu. 28 Akatendiki bhenibhela, maghambu akalipwaghi mweni muntima waki, "Anangamwi ingobhu jaki pela, ananamaje."

29 Pakamula pe ingobhu jaka Yesu na mwahi ukakotwike, na palapala akaliweni hyegha jaki jilamike.

43 Pa chilanda jabhu kukabhi na mbomba jumu joakang’ahakiki na chitamu cha kupita mwahi kwa hyaka komi na ibheli, papamu na kutumi hindu yaki yokapi kwa akasing’anga, nambu nga jumu joaweziki kundamiha. 44 Mbomba hoju akanjengali Yesu cha kunyuma na kukamu nkungilu wa ingobhu jaki. Palapala chitamu chaki cha kupita mwahi chakalamike. 45 Yesu akalalukile, "Bho, nde nane joangamwile?"

Bhandu bhokapi bhakakaniki, Petulu akapwaghike, "Bambo, lipogha la bhandu likuyongalwiti na kukuhinya."

46 Nambu Yesu akapwaghike, "Kubhi mundu joangamwile, ndandi niliweni makili ghamokite." 47 Mbomba jola paamanyiti kubha ngaawezi kulihiya, akahikiki koni abhaghaja kwa choghohi na kulileke palongi jaka Yesu. Panihapa akundandi Yesu palongi ja bhandu bhokapi bhabhakabhi panipala ndandi ja kunkamu Yesu na ntundu moawezi kulamishwa palapala. 48 Yesu akumpwaghi mwali jola, "Kamwali, uhobhalelu waku ukulamihe. Ujenda kwa lukwale."

Mwali joapotile na mbomba mtamwa

18 Yesu paakabhi alonge ghanihagha, chiongozi jumu wa Bhayahude akahikike, akunchikamili na kupwagha, "Kamwali wangu apotile esajeno, nambu pepakoku uhikaye ubheka chiwoku chaku panani jaki, najombi apataje kubha mwomi." 19 Yesu akajemiki, na kunjengalela, na bhabhulwa bhaki na bhombi bhakunjengalile.

23 Yesu paakahikiki kunyumba jaka chiongozi jola, na paakabhaweni bhayemba filimbi na lipogha la bhandu bhakalapula njobhela, 24 akabhapwaghile, "Mbokanyaje pambane! Kamwali joni ngacheapotile, nambu atehi pe kughonela." Na bhombi bhakamuhekite. 25 Nambu bhandu pabhapitiki kunja, Yesu akachiheghali chitanda chaka mwali jola, akankamwili chiwoku chaka mwali jola, najombi akajemiki.

22 Panihapa akahikiki mundu jumu joalowakika Yailo, joakabhi nkolongwa wa nyumba ja kuhimangani Bhayahude. Paakumbweni Yesu, akaheghali na kuchikama pamagholu ghake, 23 akumpembali namaa akapwaghaje, "Kamwali wangu nchoku nde mtamwa pambipi kupotela. Chondi kambokaje, ukumbekila mabhoku ghaku nahuli apata kulama."

24 Bhela, Yesu akabhokiki papamu nako. Bhandu bhamaheli bhakunhinyiki kila upambala.

38 Ebhahika kunyumba jaka Yailo, Yesu akajowini njobhela na bhandu bhakalelaje na kuombuleza kwa sauti ngolongwa. 39 Pajingala mkati, akabhapwaghi, "Bho, maghambu kiki njobhela na ilelo? Kamwali ngacheapotile, nambu atehi kughone pela."

40 Nambu bhombi bhakunhekiki namaa. Akabhapihiki bhokapi kunja, akabhatohi tati waki na mabhu waki na bhabhulwa bhaki bhatatu, bhakajingi kuchumba koakabhi kamwali jola. 41 Bhela akunkamwi chiwoku na kumpwaghi, "Talita komi," ndandi jaki, "Kamwali, nukupwaghi ujumukaje!"

42 Palapala mwali jola akajemiki na kutumbu kujenda. Kamwali hoju akabhi na hyaka komi na ibheli. Panihapa bhandu bhakakangichi nakanopi.

31 Yesu akajendali kupwagha, "Bho, ananabhalenganisha bhandu bha kibheleku chenjenu na kike? Bho, bhandu abhabha bhalengana na kike? 32 Bhalengana na bhana bhabhatemi palighulio. Lipogha limu lakabhapwaghila lipogha lengi, ‘Tunhoni filimbe, nambu ngachenkinike! Tujembili nyembu ya maombulezu, nambu ngachendelike!’ 33 Kwa ndandi Yohana Mbatizaji akahikiki, akakongiki kula chilebhi na kunywa divai, nanamu mkapwaghiki, ‘Abhi na majobhi!’ 34 Mwana waka Mundu akahikike, na akulikaji na kunywa, nanamu mkapwaghiki, ‘Mundingalya mundu ajoju! Ndou na ndobhela, nkochi wa bhajopa kode na bhana mahoku!’ 35 Nambu mbulau jaka Chapanga jimanyakini kubha jamboni kwa bhandu bhokapi bhabhajijetakela."

Yesu mu nyumba jaka Simoni Mfalisayo

36 Mfalisayo jumu akankokiki Yesu kula chilebhi cha pakamihi kunyumba jaki. Na Yesu akapiti kunyumba jaka Mfalisayo jola akatamiki na kula chilebhi. 37 Mu muchi ghola kukabhi na mbomba jumu joakabhi na mahoku. Paakajowini kubha Yesu akulika chilebhi mu nyumba jaka Mfalisayo hoju, akaletiki libotolu lelalenganakiki kwa liganga la alabhasta na mkati jaki kukabhi na mahuta gha kunungi wichu.

41 Panihapa akahikiki mundu jumu joalowakika Yailo, joakabhi nkolongwa wa nyumba ja kuhimangani Bhayahude, akahikiki na kulihabhu pambipi ja magholu ghaka Yesu, akundobha ajenda kunyumba jaki, 42 ndandi mwali waki wa kanjika, joakabhi na hyaka komi na ibheli, akabhi pambipi kupotela.

Yesu paajendikaje, lipogha la bhandu lakunhinyiki ipambala yokapi.

49 Yesu paakabhi ajendale kupwagha, mbolu akahikiki kuhuma kunyumba jaka Yairo. Na kumpwaghi Yairo, "Mwali waku apotile. Ngawijendale kung’aha Mbola."

50 Nambu Yesu paakajowini malobhi ghanihagha, akumpwaghi Yairo, "Ngawijoghopa, uhobhalya pela, na mwali waku analamiswaje."

51 Yesu paakahikiki kunyumba jaka Yairo, ngacheanjetakali mundu jokapi kujingi naku munyumba, nambu Petulu na Yohana na Yakobo na mabhu na atati bhaka mwali joapotili jola. 52 Bhandu bhokapi bhakabhi bhundelela na kuombuleza kwa ndandi ja kupotela kwaka mwana. Nambu Yesu akabhapwaghile, "Ngamwilela, maghambu mwana ngacheapotile, nambu aghochili lughonu pela!"

53 Bhokapi bhakundongimi Yesu, maghambu bhakamanyiki kubha mwali apotile. 54 Nambu Yesu akamkamwi chibhoku na kundoha, "Kamwali, jumukaje!" 55 Mwali joakapotili jola womi waki ukankelabhukile, na palapala akajemiki. Na Yesu akabhalaghalakili bhumpekya mwali chilebhi. 56 Bhabheleka bhaki bhakakangichi namaa, nambu Yesu akabhalaghalaki ngabhumpwaghi mundu ghaghahengakike.

Kupotela kwaka Lazalo

1 Bhela mundu jumu joakalowakiki Lazalo akabhi mtamwa. Jombi akabhi atama ku Besania, mwenehi wa chijiji cheatamika Malia na ndombu waki Masa. 2 Jonihoju akabhi nde Malia jola joakampakiki Bambo mahuta gha kunungila wichu, na kughahungula magholu ghaki kwa majunju ghaki. Lazalo mbeli waka Malia akabhi mtamwa. 3 Bhela bhalombu bhaki bhabheli bhala bhakatumiki ubholu kwaka Yesu, na kumpwaghila, "Bambo, nkochi waku joumpala jola atenda kulwala."

4 Yesu paakajowini ghanihagha, akapwaghike, "Chitamu achechi nga cha kupotela, nambu kwa ndandi ja ulumbalilu waka Chapanga, nahuli Mwana waka Chapanga alumbalikaje mu chitamu chenihechi."

5 Bhela Yesu akumpaliki Masa, Malia, na Lazalo. 6 Yesu paakajowini kubha Lazalo nde mtamwa, akajendali kutama pandu panipala kwa machobha ghabheli nakanopi. 7 Bhela Yesu akabhapwaghi bhabhulwa bhaki, "Tujendaje kabhete ku Yudea!"

8 Bhabhulwa bhaki bhakumpwaghile, "Mbola, kwichu kwichu pela Bhayahude bhakapaliki kukulapula kwa maganga, bho, nanau upala kujenda kabheti konihoko?"

9 Yesu akabhayangike, "Bho, Masaa gha muhi nga komi na ghabhele? Mundu anaajenda muhi ngachealikobhandola, maghambu aubhona unang’anu wa ndema ghone. 10 Nambu anaajendiki ikilu alikobhandola, maghambu unang’anu ngacheubhi mkati jake." 11 Yesu paakajomwi kupwagha malobhi ghanihagha, akabhapwaghile, "Nkochi witu Lazalo aghonile, nambu nepani ananyenda kunjumuwa."

12 Bhabhulwa bhaki bhakumpwaghile, "Bambo, anangati aghoni lughonu pela, anaalamaje."

13 Yesu akabhi alongalela mambu gha kupotela kwaka Lazalo, nambu bhombi bhaholakya apwagha kubha Lazalo aghoni lughonu pela. 14 Bela Yesu akabhapwaghi hotuhotu, "Lazalo apotile.

Yesu aulakalila mbelu ukolongwa

23 Yesu akajingi mu ngalawa, na bhabhulwa bhaki bhakunjengalile. 24 Kukabhi na mbelu ukolongwa munhwanga mola, na majegha ghakatumbwi kutwelakela ngalawa jela na lakatumbwi kujibhila. Nambu Yesu akabhi aghochi lughonu. 25 Bhabhulwa bhaki bhakunjendili na kunjumuha, bhakapwaghaje, "Bambo, tukengalyaje! Tuyonangeka!"

26 Yesu akabhayangiki, "Mwenga mabhandu mwenbi na uhobhalelu uchoku, bho, mbona njoghopa?" Akajumwiki, akaulakali mpongu na majegha, palapala mpongu na majegha ghakatelwiki chinunu.

27 Bhabhulwa bhaki bhakakangichi, na bhakapwaghike, "Bho, jonihoju mundu wa ntundu bhole? Hata mpongu na majegha yuntii!"

15 Pakwahikiki pakamihi, bhabhulwa bhaki bhakunjendili na kumpwaghila, "Pandu pambane nde pachingwenje, na lichobha lijomwike. Watabhuka bhandu bhabhokaje nahuli bhakahemala chilebhi muijiji."

16 Yesu akabhayangiki, "Njeta ndandi ja bhombi kubhoka. Mwapekya mwehapa chilebhi."

17 Nambu bhombi bhakamuyangiki, "Pambane tubhi na mabumunda nhwanu, na homba ibheli pena."

18 Yesu akabhapwaghile, "Ndeta pambane." 19 Akabhalaghalakile bhandu bhala bhatama pahi pa manyonyole. Akaghatoliki mabumunda nhwanu ghala na homba ibheli yela, akalingali kunani kumahunde, na akaipengalile. Akanukwili mabumunda ghala na kubhapekeha bhabhulwa bhaki, na bhabhulwa bhaki bhakabhaghabhi bhandu. 20 Bhandu bhokapi bhakalile na kutupila. Na bhabhulwa bhaki bhakabhongini hipandi ya mabumunda yeyahighalile, na bhakatwelaki itonga komi na ibheli. 21 Bhombi bhabhakalile bhakabhi akanalomi ngati elufu nhwanu, panga kubhalanga akambomba na bhana.

25 Pachibhombu, Yesu akabhajendili bhabhulwa bhaki koni akabya ajenda panani ja machi.

Yesu abhapekeha chilebhi bhandu bhangi elufu ncheche

32 Yesu akabhalohiki bhabhulwa bhaki na kubhapwaghila, "Nabhonela chiha bhandu abhabha, maghambu bhabhi na nepane kwa machobha ghatatu, na sajenu ngachebhabhi na chilebhi. Ngachembala nabhatabhuka koni bhakabya na injala ngabhihika kung’anduka mwindela."

33 Bhabhulwa bhaki bhakumpwaghile, "Pambane tubhi pachingwenji, bho, anatupata kwaku chilebhi cha kubhajaghanila bhandu bhokapi abhabha?"

34 Yesu akabhalalukile, "Bho, mbi na mabumunda ghalenga?"

Na bhombi bhakamuyangiki, "Tubhi na mabumunda saba, na tuhomba tuchokope."

35 Yesu akabhapwaghi bhandu bhatama pahi. 36 Panihapa akatoliki mabumunda saba ghala na homba yela, akanchengwi Chapanga, na akahekiki, na kubhapekeha bhabhulwa bhaki, na bhabhulwa bhaki bhakabhapeki bhandu. 37 Bhokapi bhakakuliki na kutupila. Panihapa bhabhulwa bhakabhongini hipandi yeyakahighalile, bhakatwelakela hitonga saba. 38 Bhandu bhabhakakuliki chilebhi chela bhakabhi akanalomi elufu ncheche, panga kubhabhalanga akambomba na bhana.

Kulepa kode ja Nyumba jaka Chapanga

24 Yesu na bhabhulwa bhaki pabhakahikiki ku Kapelenaumu, bhajopa kode bha Nyumba jaka Chapanga bhakanjendi Petulu na kundalukila, "Bho, mbola winu le alepa kode ja Nyumba jaka Chapanga?"

25 Petulu akabhayangiki, "Ena, alepa."

Petulu paakajingi mu nyumba, mangane ja kupwagha lilobhi, Yesu akandalukile, "Simoni, wehapa ubhona bhole? Bhakolongwa bha pundema bhabhongana ushulu au kode kuhuma kwa akanane? Bho, kuhuma kwa bhana bhabhu au kwa bhaghene?"

26 Petulu akamuyangiki, "Kuhuma kwa bhandu bhaghene."

Yesu akampwaghile, "Bhela, bhana inchi jabhu bhalekakiwi. 27 Nambu nahuli ngatubhang’aha, ujendaje kunhwanga ukajembalakya ndowana, ukatolaje homba ja kutumbula kutangila, hoghula mundomu waki, na mkati ja ndomu hoghu, anaujihimanya mbija ja kujaghanila ja kode. Jitolaje ukabhapekya jangu nepanu na jaku wehapa."

Yesu aupeke masolu nkongu wa mtini

18 Yesu paakabhi akelebhuka kuhuma ku muchi ghonihoghu lukela pachibombu, jakumbiniki injala. 19 Akauweni nkongu ghumu wa mtini punkeghi ja indela, akaujendile nambu akauketanili ngacheubhi na lipambiku lokapi, nambu mahamba pela. Bhela, akaupwaghile, "Ngawipambika kabheti mapambiku mileli!" Palapala nkongu ghola ukajomike.

20 Bhabhulwa pabhuweni bhakakangichi namaa, bhakapwaghaje, "Bho, maghambu kiki nkongu wa mtini aghoghu ujomiki pe mala punkamo?"

21 Yesu akabhayangiki, "Numpwaghi chakaka, ngati anambi na uhobhalelu panga kubha na choghohi, muweza kuhenga nga la nkongu wa mtini aghoghu pela, nambu hata ngati anamuchipwaghi chitombi achechi, ‘Tupukaje, ukalilekala mubahali,’ analitendika bhenibhela. 22 Ngati anamuhobhalela, chokapi chemwilobhaje kwa malobhu, anampataje."

37 Bhela, chanangunga chakatumbwi kubuluma, na mbelu ukatumbwi kujilapu ngalawa jela, na ngalawa jakatumbwi kutwele machi. 38 Yesu akabhi kunyuma ja ngalawa, aghoni panani ja pilo. Bhela bhabhulwa bhaki bhakunjumwi na kumpwaghila, "Mbola, ngacheukubhina mtima kubha tepani tupotela!"

39 Akajumwiki na kukenjuki mpongu ghola, na majegha gha munhwanga ghala, "Tumbalaje!" Palapala mpongu ukatondiki, na kupola nakanopi. 40 Bhela Yesu akabhapwaghi bhabhulwa bhaki, "Bho, maghambu kiki njoghopa? Bho, mwakona ngachembi na uhobhalelu?"

41 Na bhombi bhakajowipi namaa, koni bhakalalukanya, "Bho, ajoju henu nane? Mbaka mpongu na majegha yuntii!"

35 Pakamihi pakwahikaje, bhabhulwa bhakunjendi Yesu, na kumpwaghila, "Pandu pani pachingwenje, na sajeno kupilile. 36 Mbanga ubhatabhukaje bhandu habha bhajenda ku mighonda jabhu na kwijiji yabhu ya pambipe, bhakahemala chilebhi."

37 Nambu Yesu akabhapwaghi, "Mwapekya mabhanganya chilebhi."

Na bhombi bhakundalukile, "Bho, tubhaleha kike? Bho tujenda lelu tukahemala mabumunda kwa ipandi mia ibheli ya madini gha feza, na kubhapekeha bhakulaje?"

38 Yesu akabhalalukile, "Bho, mbi naghu mabumunda ghalenga? Njendanya mkalingaje."

Pabhalingiki, bhakumpwaghile, "Ghabhi mabumunda nhwanu, na homba ibheli."

39 Bhela Yesu akabhalaghalaki bhabhulwa bhaki bhabhatamika bhandu mu mapogha mapogha pa manyonyoli mabhei. 40 Na bhombi bhakatemi mapogha gha bhandu mia jimu na pangi hamsini. 41 Bhela Yesu akatoliki mabumunda nhwanu na homba ibheli yela, akalingali kunani kumahunde, akunchengwi Chapanga, na kuheketa mabumunda, akabhapeki bhabhulwa bhaki bhaghabhila bhandu. Na homba yela bhakabhaghabhi bhandu bhokapi. 42 Bhandu bhokapi bhakakuliki na kutupila. 43 Bhakatondwi mahighalilu gha mabumunda na homba, na kutwelakela itonga komi na ibheli. 44 Na bhombi bhabhakuliki mabumunda ghala bhakabhi ngati akanalomi elufu nhwano.

48 Yesu akabhaweni bhabhulwa bhaki bhang’ahika kuhugha ingaye, maghambu mpongu ukabhi wahibhalakilka. Pakwahiki pachibombu, Yesu akabhajendi bhabhulwa bhaki, koni akajendaje panani ja machi, akapala ngati kubhapeta. 49 Nambu pabhumbweni ajenda panani ja machi, bhaambukya lihoka, bhakajamalile. 50 Kwa ndandi bhokapi pabhumbweni bhakajowipi namaa.

Palapala Yesu akalongi nabhu, "Mlipekya mtima, ngamwijoghopa, nde nepani!" 51 Na jombi akakweliki mu ngalawa mobhakabhile, na mpongu ukakotwiki. Panihapa bhakakangichi namaa mumitima jabhu,

Yesu abhapeke chilebhe bhandu elufu ncheche

1 Chikahi hechi, lipogha likolongwa la bhandu bhakalibhongini kabheti, na ngachebhabhi na chilebhe. Yesu akabhalohiki kabheti bhabhulwa bhaki, na kubhapwaghila, 2 "Nabhabhone chiha bhandu abhabha ndandi bhabhi na nepani kwa machobha ghatatu, wala ngachebhabhi na chilebhe. 3 Ananalekiki bhajenda kunyumba koni bhabhi na injala anabhang’anduka mwindela, ndandi bhangi bhahumiki kutale."

4 Bhabhulwa bhaki bhakundaluki, "Pandu pani pachingwenje, bho, anaghapatikana kwaku mabumunda gha kubhajaghanila bhandu abhabha bhokape?"

5 Yesu akabhalalukile, "Bho, mbinaghu mabumunda ghalenga?"

Bhakayangiki, "Tubhi na mabumunda saba."

6 Bhela akabhalaghalaki bhandu bhatama pahi. Akatohi mabumunda saba ghala, na kunchengu Chapanga, na kujiheketa, na kubhapeke bhabhulwa bhaki bhaghabhila bhandu, na bhombi bhakabhaghabhile. 7 Bhakabhi kabheti na tuhomba tuchokope. Yesu akaipengalili, na kubhalaghalaki bhabhulwa bhaki bhabhaghabhila bhandu bhelabhela. 8 Bhandu bhakakuliki, na kutupila. Bhakabhongini mahighalilu na kutwelakela hitonga saba. 9 Na bhandu bhabhakuliki bhakabhi ngati elufu ncheche. Bhela Yesu akabhatawiki,

Yesu aupeke masolu nkongu wa mtini

12 Chilabhu jaki, pabhakabhi bhakelabhuka kuhuma ku Besania, Yesu akabhi na injala. 13 Bhela akauweni cha kutali nkongu wa mtini ukabya na mahamba ghamahele. Akauheghali nahuli kulinga ngati aweza kughabhona mapambiku. Nambu paakauheghalili, ngacheaghaweni mapambiku nambu mahamba matopo, ndandi ngachechabhi chikahi cha kupambika mapambiku. 14 Yesu akaupwaghi nkongu wa mtini ghola, "Kutumbu lalenu mbaka mileli nga mundu joanakulaje mapambiku ghaku kabheti!"

Na bhabhulwa bhaki bhakajowini malobhi ghanihagha.

Mabholu gha nkongu wa mtini ghoujomike

20 Chilabhu jaki palukela, pabhapetika mwindela, bhakauweni nkongu wa mtini ghola ujomiki kaghajo wokapi kutumbu kumikegha mbaka kunani. 21 Petulu akakombwiki chechatendakiki na akumpwaghi Yesu, "Mbola, lingalyaje! Nkongu wa mtini ghoupeki masolu ghola ujomike!"

22 Yesu akabhapwaghile, "Munhobhalya Chapanga. 23 Numpwaghi chakaka, mundu anaachipwaghi chitombi chenje, ‘Jighukaje na ukalilekala mubahali,’ panga kubhona choghohi muntima waki, nambu anahobhale malobhi ghokapi ghalonge anaghahengakikaje, chakaka analihengakika kwake. 24 Bhela numpwaghila, pansalila na kulobha chindu, muhobhalya kubha njopalile, nanamu anampataje. 25 Panjema na kundobha Chapanga, mundekakya kila mundu joanhoki chokapi, nahuli Atati winu joabhi kunani kumahunde andekakya na mwenga mahoku ghinu.

Yesu abhaloha bhabhulwa bha kutumbula

1 Lichobha limu Yesu akajemiki pamaheku ja Nhwanga wa Genesaleti, na panihapa bhandu bhamaheli bhakatwelile na kutumbu kukangana, koni bhakajowanya Malobhi ghaka Chapanga. 2 Akaiweni ngalawa ibheli mumaheku ja nhwanga, yeyalekakiki na bhalohi habha bhakabhi bhajigholo mikwabhu jabho. 3 Yesu akajingi mu ngalawa jimu jejikabhi jaka Simoni, bhela akandobhiki Simoni akolula ngalawa jela mumachi, patali pachokopi kuhuma pamaheku ja nhwanga. Bhela akatami monimola koni akabya abhabhola lipogha la bhandu.

4 Pajomwi kubhabhola, akampwaghi Simoni, "Uhugha ngalawa mbaka kulochi kokunyoliki na ukapendakya nkwabhu waku nahuli ulobha homba."

5 Simoni akamuyangike, "Bambo, tutyalini kulobha homba ikilu jokapi panga kupata chindu, nambu kwa kubha upwaghiki wehapa, anambendakya nkwabho." 6 Pabhakapendaki nkwabhu wabhu, bhakalobhiki homba yamahele nakanope mbaka nkwabhu wabhu utumbuka kukachuka. 7 Bhela bhakabhalohiki bhajabu bhabhakabhi mu ngalawa najengi bhahika kubhajangatila. Bhakahikiki, bhakatwelaki homba ngalawa yokapi ibheli mbaka ipalika kujibhila. 8 Simoni Petulu paaweni chela chechipitalile, akanchikimili Yesu na kupwagha, "Bambo, ubhoka palongi jangu, maghambu nepani nde mundu mwana mahoku!"

9 Simoni papamu na bhajaki bhakakangichi kwa homba yamahele yebhalobhike. 10 Bhelabhela Yakobo na Yohana bhana bhaka Zebedayo, bhabhakabhi bhakochi bhaka Simoni na bhombi bhakakangiche. Yesu akumpwaghi Simoni, "Ngawijoghopa kutumbu sajenu na kujendalela anaubya undohi wa bhandu."

11 Bhakahughiki ngalawa yela mbaka kumaheku, bhakahilekiki hindu yokapi na kunjengale Yesu.

Yesu atumbalisha mbelu

22 Lichobha limu Yesu akajingi mu ngalawa papamu na bhabhulwa bhaki, na akabhapwaghile, "Tumboka tulombuka mbaka kwihi ja nhwanga." Panihapa bhakatumbwi mwanja. 23 Pabhakabhi bhalomboka kwa ngalawa, Yesu akaghochi lughono. Palapala mbelu ukolongwa ukatumbwi kupogha mu nhwanga, na machi ghakatumbwi kutwelela mu ngalawa, bhokapi bhakabhi pambipi kujibhila. 24 Bhabhulwa bhakunjendi Yesu na kunjumuwa, bhakapwaghaje, "Bambo, Bambo! Tupotela!"

Yesu akajumwiki na kuulakalila mpongu na majegha makolongwa, na kukatondiki na kubha wichu. 25 Panihapa Yesu akabhalaluki bhabhulwa bhaki, "Bho, uhobhalelu winu ubhi kwako?"

Nambu bhombi bhakakangichi, na kujoghopa koni bhakapwaghanya, "Bho, hajo mundu bhole? Aulakali mpongu na majegha nayombi yuntii!"

Yesu atumbalisha mbelu

22 Lichobha limu Yesu akajingi mu ngalawa papamu na bhabhulwa bhaki, na akabhapwaghile, "Tumboka tulombuka mbaka kwihi ja nhwanga." Panihapa bhakatumbwi mwanja. 23 Pabhakabhi bhalomboka kwa ngalawa, Yesu akaghochi lughono. Palapala mbelu ukolongwa ukatumbwi kupogha mu nhwanga, na machi ghakatumbwi kutwelela mu ngalawa, bhokapi bhakabhi pambipi kujibhila. 24 Bhabhulwa bhakunjendi Yesu na kunjumuwa, bhakapwaghaje, "Bambo, Bambo! Tupotela!"

Yesu akajumwiki na kuulakalila mpongu na majegha makolongwa, na kukatondiki na kubha wichu. 25 Panihapa Yesu akabhalaluki bhabhulwa bhaki, "Bho, uhobhalelu winu ubhi kwako?"

Nambu bhombi bhakakangichi, na kujoghopa koni bhakapwaghanya, "Bho, hajo mundu bhole? Aulakali mpongu na majegha nayombi yuntii!"