Milagres de Jesus

Os Evangelhos registram dezenas de milagres realizados por Jesus — curas, ressurreições, domínio sobre a natureza e libertações. Cada milagre revelava sua divindade e compaixão.

Curas de cegos e surdos

Jesus devolveu a visão aos cegos e a audição aos surdos, manifestando seu poder sobre toda enfermidade e deficiência.

Yesus 'o si-la ngowa’a nga muḏiḏi manga la’o hafu

27 Yesus 'o tagi sisoi’i tala ngi’i gena-ge re 'a dowanga 'ai ḏo-ḏagi. Toma ngo’omo ma golona, ngowa’a hafu nga muḏiḏi 'aḏi tutu’u ra Unanga 'ai ḏuḏunu. Ananga 'aḏi poa’a, "Jou, 'Olana Daud 'ai ju’uda, no sijumu 'Ani 'akala re sinyingara ma la-la ra ngomi!"

28 Wakutu Yesus 'o osama toma wala, ngowa’a hafu nga muḏiḏi gena-ge 'aḏi sapolo ra Unanga. Yesus 'O sano ra ananga, " 'Oru ngini ni ngaku mangale Ngoi nga’unu to si-la ngini?"

Ananga 'aḏi sangoro, "Jou, ngomi ngaku gena-ge!"

29 Ḏua Yesus 'a cigi ananga manga la’o re 'O kanau, "Sababu ninga ngo-ngaku, 'oru ga’a ngini ni mau, enanga 'i dadi." 30 Toma 'orasa gena-ge ḏua, ananga raḏi oḏi’i. Unanga 'o sipo-poma ananga, "Awa ni siajele hali nena-ne ra guna ḇato." 31 Mada’a ananga 'aḏi tagi re ya sihabari mangale Yesus toma daeraha sitabi donga.

Mateus 9:27-31

Yesus 'o si-la ngowa’a hafu nga muḏiḏi

29 Wakutu Yesus re 'Ai me-mete’e ananga 'aḏi tagi sisoi’i tala limau Yerikho, ngowa’a kawasa 'aḏi mete’e Unanga. 30 'Age rema ngowa’a hafu nga muḏiḏi 'aḏi tegoro toma ngo’omo ma 'uḏu. Wakutu ananga 'aḏi 'isene Yesus 'o tola’a ino toma ngo’omo gena-ge, ananga 'aḏi poa’a, "Ma Jou, 'Olana Daud 'ai ju’uda, Na sijumu 'Ani 'akala re sinyingara ma la-la ra ngomi!"

31 Ngowa’a kawasa toma ngi’i gena-ge ananga ya’u ḇangata re 'aḏi soma’a ngowa’a hafu nga muḏiḏi gena-ge masiogoro. Mada’a ananga ganapu ya siduga manga iḏingi, "Ma Jou, 'Olana Daud 'ai ju’uda, Na sijumu 'Ani 'akala re sinyingara ma la-la ra ngomi!"

32 Ḏua, Yesus 'o matogumu re ya’u 'aro’o ananga sapolo ra Unanga. Unanga ya’u sano i’a, "Ngini ni mau 'oru Ngoi ta si’a’a ra ngini?"

33 Ananga ya sangoro, "Ma Jou, ngomi mau mi oḏi’i!"

34 Dadi Tai 'akala re sinyingara 'i baolo dadalara ra ananga re 'A cigi manga la’o. Toma 'orasa gena-ge ḏua, ananga raḏi oḏi’i kara 'aḏi mete’e Unanga.

Mateus 20:29-34

Yesus 'o si-la ngowa’a hafu matengo toma limau Betsaida

22 Ananga 'aḏi ngadolo toma limau Betsaida. 'Age rema ngowa’a nga muḏuo i’a 'aḏi gasa ino ngowa’a hafu matengo ra Yesus re 'aḏi golo’o 'a siteru 'ai giama, la ngowa’a gena-ge 'o la. 23 Ḏua Yesus 'a gu’u 'ai giama 'u tuda sisupu toma limau ma ḏuḏunu. Gena ḏua, 'A obi’i ngowa’a hafu gena-ge 'ai la’o kaci ḏiḏi re 'A siteru 'Ai giama ra unanga 'ai la’o, kara 'O sano, "Na oḏi’i nyengara ḏua, bolo nyangu?"

24 Ngowa’a gena-ge 'o oḏi’i i’a toma biono re 'o kanau, "Ya, ngoi to oḏi’i ngowa’a 'aḏi tagi-tagi, mada’a sa’olo 'o ate."

25 Yesus dadunu 'a siteru 'Ai giama toma ngowa’a hafu gena-ge 'ai la’o. Ḏua ngowa’a gena-ge 'ai la’o ri la, re oḏi’i ri tarangi. 26 Yesus 'o sipo-poma unanga, "Maḏibo tani wala, mada’a no mete’e ḏuḏunu re no siajele awa ra guna ḇato Ngoi to si-la ngana!"

Marcos 8:22-26

Yesus 'o si-la matengo 'o popongolo re 'o mou

31 Gena ḏua, Yesus 'o sisoi’i tala daeraha ma’u co-cori limau Tirus re 'o tagi sisa toma talaga Galilea. Unanga 'o mete’e limau Sidon re 'a sitola’a daeraha, ma lomanga Limau Nyagi Moi. 32 Toma ngi’i gena-ge, ananga 'aḏi gasa ino ngowa’a matengo 'o popongolo re 'o mou ra Yesus. Ananga 'aḏi madigaro’o ra Unanga, "Yesus, na siteru 'Ani giama toma ngowa’a gena-ge, la unanga 'o la." 33 Yesus 'o gasa ngowa’a popongolo re 'o mou nange-ge re 'aḏi masai’i i’a toma ngowa’a repe. Yesus 'a singosama 'ai rarag̱a tai ngau’u kaci ḏiḏi ma dara, kara 'A obi’i 'ai rarag̱a re 'A sipiasa ngowa’a gena-ge 'ai yai’i. 34 Gena ḏua, Yesus 'o talaḏi ie diwanga re 'a iḏala 'ai sangagara re 'o kanau i’a toma ngowa’a gena-ge, "Efata," ma ngale: "Welanga ḏua!"

35 Ngowa’a gena-ge 'ai popongolo 'i iranga re 'ai yai’i 'i wale singadolo 'o kanau mai ri nyengara. 36,37 Togumu i’a, Yesus 'o sipo-poma ananga ya sihabari awa ra guna ḇato. Kalaha Yesus 'a sipo-poma so’o gena, ananga ganapu ya sihabari!

Ḏua ngowa’a mo-moini ya 'isene 'aḏi heranga masala. Ananga 'aḏi ma’u kanau, "Unanga 'o 'a’a mo-moini gena-ge lai rousu. Unanga 'o si-la ngowa’a popongolo mai nyengara 'aḏi 'isene re ngowa’a mou mai nyengara 'aḏi kanau!"

Marcos 7:31-37

Bartimeus 'ai la’o hafu, Yesus 'u si-la

46 Yesus re 'Ai me-mete’e re ngowa’a repe 'aḏi ngadolo toma limau Yeriko. Wakutu ananga mo-moini 'aḏi sa’i ya sisoi’i tala limau gena-ge, 'aḏi oḏi’i ngowa’a ma la’o hafu matengo 'ai lomanga 'a Bartimeus ('a Timeus 'ai ngowa’a). Unanga 'o tegoro toma ngo’omo ma 'uḏu re 'o golo-golo’o. 47 Unanga 'o 'isene Yesus ngowa’a Nazaret 'o mete’e ino ḏua Bartimeus 'o 'aro’o siduga-duga, "Yesus, 'Olana Daud 'ai ju’uda, Na sijumu 'Ani 'akala re sinyingara ma la-la ra ngoi!"

48 Ngowa’a repe 'aḏi ḇangata unanga, "No masiogoro!" Mada’a unanga 'o 'aro’o ganapu siduga-duga, "Jou, 'Olana Daud 'ai ju’uda, Na sijumu 'Ani 'akala re sinyingara ma la-la ra ngoi!"

49 Ḏua Yesus 'o matogumu re 'o kanau, " 'Aro’o unanga ino."

Dadi ananga 'aḏi kanau i’a toma ngowa’a hafu gena-ge, "Na site’e tala ni 'akala re sinyingara, no made’oso ie, Yesus 'o 'aro’o."

50 Ngowa’a hafu gena-ge 'a upa’a 'ai juba re 'o jau-jau 'o made’oso kara 'o tagi i’a ra Yesus.

51 Ḏua Yesus 'o sano, "Ngana no mau 'oru ra ngoi?"

Ngowa’a hafu gena-ge 'a sangoro, "Ya Guru, ngoi to mau to oḏi’i."

52 Yesus 'o kanau, "No tagi ḇato. Sababu no ngaku ngoi, ngana reno la."

Toma 'orasa gena-ge ḏua, ngowa’a hafu gena-ge 'o oḏi’i re 'o mete’e Yesus.

Marcos 10:46-52

Yesus 'o si-la ngowa’a hafu matengo toma limau Yerikho

35 Wakutu Yesus toma ḏo-ḏagi ma dara sa’i ro ngadolo toma limau Yerikho, 'age rema ngowa’a hafu matengo 'o tegoro golo-golo’o toma ngo’omo ma 'uḏu. 36 Wakutu unanga 'o 'isene ngowa’a repe manga nyiwere, unanga 'o sano, "Rema 'oru?"

37 Ananga 'aḏi sangoro, "Yesus ngowa’a Nazaret 'o tola’a ino."

38 Dadi ngowa’a hafu gena-ge 'o 'aro’o siduga-duga, "Yesus, 'Olana Daud 'ai ju’uda! No sijumu 'Ani 'akala re sinyingara ma la-la ra ngoi!"

39 Ngowa-ngowa’a ga’a toma biono ananga 'aḏi ḇangata unanga re soma’a unanga masiogoro. Mada’a unanga ganapu 'o 'aro’o siduga-duga, "Jou, 'Olana Daud 'ai ju’uda, Na sijumu 'Ani 'akala re sinyingara ma la-la ra ngoi!"

40 Yesus 'o matogumu tala re 'o soma’a ngowa’a 'aḏi gasa ino ngowa’a hafu gena-ge ra Unanga. Wakutu ngowa’a hafu gena-ge ro ngadolo, Yesus 'o sano, 41 " 'Ani mau 'oru Ngoi ta si’a’a?"

Ngowa’a hafu gena-ge 'a sangoro, "Jou, ngoi to mau to oḏi’i" 42 Ḏua Yesus 'o kanau, "Na’o so’o gena, no oḏi’i! Sababu 'ani ngo-ngaku ra Ngoi, ngana no la."

43 Toma 'orasa gena ḏua, unanga nyengara 'o oḏi’i kara 'o mete’e Yesus re 'ai madanga ma dara kama tola’a ua 'o puji re silamo’o Ma Jou’ongu Madutu! Wakutu ngowa’a repe ya oḏi’i so’o gena, ananga mo-moini 'aḏi puji re silamo’o Ma Jou’ongu Madutu ḏi’i.

Lucas 18:35-43

Didina’o heranga ma soi rarama: Yesus 'o si-la ngowa’a hafu

1 Wakutu Yesus 'o tagi i’a, Unanga 'o oḏi’i ngowa’a hafu matengo masinge-ngeta’a da’u tala. 2 Unanga 'ai me-mete’e 'aḏi sano ra Unanga, "Rabi, i’a sa’olo ngowa’a nena-ne 'o hafu singe-ngeta’a da’u tala moju? Unanga 'ai ḏosa bolo 'ai ḇaḇa re ngina manga ḏosa?"

3 Yesus 'a sangoro, "Unanga 'o hafu ma sababu unanga masiretene 'ai ḏosa bolo 'ai ḇaḇa re ngina manga ḏosa ua. Mada’a gena-ge 'i dadi, la ngowa’a ya oḏi’i re waro mangale Ma Jou’ongu Madutu 'ai kuasa 'i waiti ra unanga. 4 Wakutu rema wangere moju, ngene balasu wa si’a’a Unanga 'ai munara ga’a Ro 'utusu Ngoi. Sababu 'orasa lobi’i 'i ngadolo ḏua, matengo i’a mai ua nga’unu munara. 5 Wakutu Ngoi to 'ahu moju toma dungia nena-ne, Ngoi nena-ne dungia ma tarangi."

6 Wakutu Yesus 'o kanau so’o gena togumu i’a, Unanga 'o obi’i toma tana’a re 'ai obi’i 'a sicapuru reo tana’a, kara 'a siḇiasa toma ngowa hafu 'ai la’o. 7 Re Unanga 'o kanau i’a toma ngowa’a hafu gena-ge, "No tagi re no maloca’a toma ḇanyo Siloam" (Siloam ma ngale: Sanga 'utusu). Dadi unanga 'o tagi 'o maloca’a. Wakutu unanga 'o maḏibo ino, unanga nyengara 'o oḏi’i.

João 9:1-7

Curas de paralíticos e enfermos

Paralíticos caminharam, leprosos ficaram limpos e todo tipo de doença foi curada pelo toque e pela palavra de Jesus.

2 Toma 'orasa gena-ge, ngowa’a si-siḏi eno’o matengo 'o sapolo re 'o maḏipolono ra Yesus 'ai biono re 'o kanau, "Jou na’o No nyengara, No si-la ngoi."

3 Yesus 'a sitoa’a i’a 'Ai giama re 'a siteru toma ngowa’a gena-ge re 'O kanau, "Ngoi to nyengara, ngana no la." Toma 'orasa gena-ge ḏua, unanga 'ai si-siḏi ri iranga. 4 Ḏua Yesus 'o kanau, " 'Elingi! Awa sijarita mangale gena-ge ra guna ḇato. Mada’a no tagi re no masijumu 'ani lese toma 'imam, la siwaro tala mangale ngana reno la. Pasala i’a no pula’a 'ani jou-jou ga’a mete’e Musa 'ai hukumu sa’olo bukiti rimoi toma ngowa-ngowa’a ḏi’i mangale ngana reno la."

Mateus 8:2-4

2 Toma gamu gena-ge ngowa’a nga muḏuo i’a 'aḏi gasa ino ngowa’a ḇolo matengo ga’a 'u sigare toma 'usungana. Wakutu Yesus 'o oḏi’i ananga manga ngo-ngaku lai te’e, Unanga 'o kanau i’a toma ngowa’a ḇolo gena-ge, " 'Ari ngowa’a, awa 'ani 'akala re sinyingara 'i rapo’o, 'ani ḏosa-ḏosa 'i singi-ngiranga ḏua."

3 'Age rema guru-guru 'agama nga muḏuo i’a ga’a 'aḏi 'isene Yesus 'ai demo-demo gena-ge re 'aḏi makanau tamanga 'akala re sinyingara ma dara, "Ngowa’a nena-ne 'o je-jengere Ma Jou’ongu Madutu!"

4 Yesus 'a waro ananga manga fikirana, dadi 'O kanau, "I’a sa’olo ni mafikiri 'ori i’a ma jira taninga 'akala re sinyingara ma dara? 5 Le’a lebe gapanga si’a’a: Ngoi nyengara to kanau, ‘ 'Ani ḏosa ta singi-ngiranga ḏua’ bolo, nyengara to kanau, ‘Momi’i ie, re no tagi’? 6 Mada’a nange-ne Ngoi ta sibukiti ra ngini mangale Ngoi, Manusia ma Ngowa’a Nau’u masiretene rari kuasa nga’unu ta singi-ngiranga ngowa-ngowa’a manga ḏosa toma dungia nena-ne." Gena ḏua, Yesus 'o kanau i’a toma ngowa’a ḇolo gena-ge, "Momi’i ie, na tede 'ani 'usungana re no maḏibo!"

7 Ḏua ngowa’a ḇolo gena-ge 'o te’oso re 'o maḏibo tai wala.

Mateus 9:2-7

10 Toma wala puji gena-ge ma dara 'age rema ngowa’a matengo 'ai giama kaci moi 'i sengene. 'Age ḏi’i rema ngowa’a nga muḏuo i’a 'aḏi disa-disa Yesus 'ai sala. Dadi ananga 'aḏi sano ra Yesus, "Nyengara bolo ua, si-la ngowa’a siḏi toma Sabata ma wangere?"

11 Yesus 'a sangoro, "Na’o 'age rema ngowa’a matengo ra ngini ninga sigolona unanga rai doba rimoi re toma Sabata ma wangere, doba gena-ge 'i eta’a toma tana’a ma ḇuongo; sanga ua doba ma dutu 'a sieanga 'ai doba toma tana’a ma ḇuongo gena-ge! Tantu ḏua, unanga 'a iḏala sisupu doba gena-ge. 12 Manusia lebe la-lamo’o i’a reo doba! Dadi na’o so’o gena-ge, ngene nyengara wo riono ngowa’a toma Sabata ma wangere."

13 Gena ḏua, Yesus 'o kanau i’a toma ngowa’a 'ai giama kaci moi 'i sengene gena-ge, "Na toa’a ino 'ani giama." Dadi, ngowa’a gena-ge 'a toa’a i’a 'ai giama. Toma 'orasa gena-ge ḏua, 'ai giama ga’a sengene ri la, ma tero sa’olo 'ai giama ma kaci moi ga’a 'i sengene ua.

Mateus 12:10-13

30 Ananga 'aḏi osama toma wala re 'aḏi sanga i’a Simon 'ai dedono we-were’a mo lu-lulu sababu mo gagama. Ananga jau-jau 'aḏi siajele ra Yesus. 31 Unanga 'o tagi ra munanga 'ami ngi’i re 'O gu’u 'ami giama re mi simomi’i, ḏua 'ami gagama ri iranga. Gena ḏua, munanga mo pula’a oromo ananga.

Marcos 1:30,31

Yesus 'o si-la ngowa’a matengo 'o si-siḏi eno’o

40 Ngowa’a matengo si-siḏi eno’o 'o sapolo re 'o maḏipolono re 'o madigaro’o ra Yesus, "Na’o No nyengara, No si-la ngoi."

41 Tai 'akala re sinyingara 'i baolo dadalara toma ngowa’a gena-ge. Dadi Unanga 'a sitoa’a i’a 'Ai giama re 'A siteru toma ngowa’a gena-ge re 'O kanau, "Ngoi to nyengara, ngana no la!" 42 Toma 'orasa gena-ge ḏua 'ai si-siḏi 'i iranga re 'o la.

Marcos 1:40-42

3 Wakutu Yesus 'o ka-kanau moju, 'age rema ngowa’a nga ḏuata 'aḏi tede ino ngowa’a ḇolo matengo ra Yesus. 4 Mada’a ngowa’a 'aḏi repe woḏi dadi 'aḏi sebanga i’a yoḏu’u. Ḏua ananga 'aḏi pere ya tiwa’a wala ma 'atu pasi-pasi tala ra Yesus 'ai re’u ie. Gena ḏua, ananga 'aḏi siguci ngowa’a ḇolo gena-ge simete’e 'ai usungana soi moi. 5 Wakutu Yesus 'a oḏi’i ngowa’a nga ḏuata gena-ge manga ga’a sababu manga ngo-ngaku lai te’e, Unanga 'o kanau i’a toma ngowa’a ḇolo gena-ge, " 'Ari ngowa’a, 'ani ḏosa-ḏosa 'i singi-ngiranga ḏua."

6 Guru-guru 'agama nga muḏuo i’a 'aḏi tego-tegoro toma ngi’i gena-ge 'aḏi masano tamanga 'akala re sinyingara ma dara, 7 "Ma ngi’i ua, unanga gena-ge singadolo 'o kanau so’o gena! Unanga 'o je-jengere Ma Jou’ongu Madutu. Unanga ma tero ua Ma Jou’ongu Madutu! 'A guna ua 'a nga’unu singi-ngiranga ngowa’a manga ḏosa, pa’i Ma Jou’ongu Madutu masiretene ḇato!"

8 Toma 'orasa gena-ge, Yesus 'a waro ananga manga 'akala re sinyingara ma dara. Ḏua Yesus 'o kanau, "I’a sa’olo ni mafikiri so’o gena taninga 'akala re sinyingara ma dara? 9 Le’a lebe gapanga si’a’a: Ngoi nyengara to kanau toma ngowa’a ḇolo nena-ne ‘ 'Ani ḏosa ta singi-ngiranga ḏua’ bolo nyengara to kanau, ‘Momi’i no tede 'ani usungana re no tagi’? 10 Mada’a nange-ne ngoi ta sibukiti ra ngini mangale Ngoi, Manusia ma Ngowa’a Nau’u masiretene rari kuasa nga’unu ta singi-ngiranga ngowa-ngowa’a manga ḏosa toma dungia nena-ne." Gena ḏua, Yesus 'o kanau i’a toma ngowa’a ḇolo gena-ge, 11 "Momi’i ie, na tede 'ani 'usungana re no maḏibo!"

12 Unanga 'o momi’i, jau-jau 'o 'oro 'ai usungana kara 'o supu toma ngowa’a repe manga biono. Ananga 'aḏi heranga masala re 'aḏi puji re silamo’o Ma Jou’ongu Madutu 'ai lomanga re 'aḏi kanau, "Ma di’ara ne, wa oḏi’i nyangu 'i dadi so’o nena-ne!"

Marcos 2:3-12

Yesus 'o si-la ngowa’a matengo toma Sabata ma wangere

1 Wakutu Yesus 'o maḏibo ino moju toma wala puji, 'O sanga i’a matengo 'ai giama kaci moi 'i sengene. 2 'Age ḏi’i rema ngowa-ngowa’a Farisi sababu 'aḏi mau 'aḏi disa waro Yesus 'ai sala, la 'u kalaki toma Mahkamah 'Agama. Dadi ananga 'aḏi tailako Unanga tau-taunu; awa ua mara Unanga 'o si-la ngowa’a siḏi gena-ge toma Sabata ma wangere. 3 Yesus 'o 'aro’o ngowa’a 'ai giama kaci moi sengene gena-ge, "Ino, no made-de’oso 'ane toma biono." 4 Ḏua Unanga 'o sano ra ananga mo-moini toma ngi’i gena-ge, "Mete’e 'agama ma 'atoranga, ngene balasu wo 'a’a 'oru toma Sabata ma wangere? Wo 'a’a 'ori i’a ma la-la, bolo 'ori i’a ma jira! Wo sisalamata ngowa’a, bolo wo sisengene!"

Mada’a ananga 'aḏi masiogoro ḇato. 5 Yesus 'o magelelo kuwiḏa re kuḇali, biono re ḏuḏunu re 'O porata re 'Ai 'akala re sinyingara 'i kangela masala sababu ananga manga 'akala re sinyingara lai te’e. Ḏua Unanga 'o kanau i’a toma ngowa’a gena-ge, "Na toa’a ino 'ani giama." Ngowa’a gena-ge 'a toa’a i’a 'ai giama re ro la.

Marcos 3:1-5

Yesus 'o si-la ngowa’a matengo si-siḏi eno’o

12 Toma wangere rimoi, Yesus 'o ngadolo toma limau rimoi. 'Age rema ngowa’a matengo si-siḏi eno’o tai lese rimoi simoini. Wakutu unanga 'o oḏi’i Yesus unanga 'o maḏipolono re maruku ra Yesus re 'o golo’o mode-mode’e, "Jou, na’o No nyengara, No si-la ngoi!"

13 Yesus 'a siteru 'Ai giama re 'A siteru ra unanga gena-ge re 'O kanau, "Ngoi to nyengara, no la!" Toma 'orasa gena-ge ḏua, 'ai si-siḏi eno’o ri iranga.

Lucas 5:12,13

18 Toma 'orasa gena-ge, ngowa’a nga muḏuo i’a 'aḏi gasa ino ngowa’a ḇolo matengo sigae toma 'usungana. Ananga 'aḏi makutale 'u singosama ngowa’a siḏi gena-ge toma wala ma dara, la 'u sigare ra Yesus 'ai biono. 19 Mada’a sababu ngowa’a 'aḏi masituḏu-tuḏu i’a, ananga 'aḏi sanga ngo’omo ua di’a 'u singosama ngowa’a ḇolo gena-ge. Sababu gena-ge, ananga 'u sibere unanga da’u toma wala ma re’u. Gena ḏua, ananga ya tiwa’a wala ma 'atu, kara 'u siala sirimoi rai 'usungana pasi-pasi tala ra Yesus 'ai biono toma ngowa’a repe manga sigolona. 20 Wakutu Yesus 'a oḏi’i ananga manga ngo-ngaku lai te’e, Unanga 'O kanau i’a toma ngowa’a ḇolo gena-ge, "Wolo, 'ani ḏosa 'i singi-ngiranga ḏua."

21 Guru-guru 'agama re ngowa-ngowa’a Farisi mulaingi 'aḏi masano tamanga 'akala re sinyingara, "Unanga ne 'a guna, singadolo 'o nau’u masala 'o je-jengere Ma Jou’ongu Madutu! Pa’i Ma Jou’ongu Madutu masiretene nga’unu 'o singi-ngiranga ngowa’a manga ḏosa!"

22 Yesus 'a waro ananga manga so-sano tamanga 'akala re sinyingara, dadi Unanga 'o kanau, "I’a sa’olo taninga 'akala re sinyingara ma dara 'i masano so’o gena? 23 Le’a lebe gapanga si’a’a: Ngoi nyengara to kanau, ‘ 'Ani ḏosa ta singi-ngiranga ḏua’ bolo nyengara to kanau, ‘Momi’i re no tagi’?! 24 Mada’a nange-ne Ngoi ta sibukiti ra ngini mangale Ngoi, Manusia ma Ngowa’a Nau’u, masiretene rari kuasa nga’unu ta singi-ngiranga ngowa-ngowa’a manga ḏosa toma dungia nena-ne." Gena ḏua, Yesus 'o kanau toma ngowa’a ḇolo gena-ge, "Momi’i ie, na tede 'ani 'usungana, re no maḏibo!"

25 Ngowa’a ḇolo gena-ge 'o te’oso ra ananga mo-moini manga biono. Ḏua 'a tede 'ai 'usungana, re 'o maḏibo 'o puji re silamo’o Ma Jou’ongu Madutu.

Lucas 5:18-25

Yesus 'o si-la ngowa’a siḏi toma Sabata ma wangere

6 Toma Sabata ma wangere ma lelegu, Yesus 'o tagi doto’o toma wala puji. Toma ngi’i gena-ge 'age rema ngowa’a matengo 'ai giama kaci moi 'i sengene. 7 Guru 'agama re ngowa’a Farisi nga muḏuo i’a, 'aḏi disa Yesus 'ai sala, la 'aḏi kalaki Unanga. Ananga 'aḏi tailako Unanga tau-taunu, awa-awa Unanga 'o si-la ngowa’a siḏi toma Sabata ma wangere. 8 Mada’a 'a Yesus 'a waro ananga manga 'akala re sinyingara ma dara. Dadi Unanga 'o kanau toma ngowa’a ga’a 'ai giama kaci moi 'i sengene gena-ge, "Te’oso re ino no made-de’oso 'ane toma biono!" Dadi ngowa’a gena-ge 'o tagi 'o made-de’oso toma biono. 9 Ḏua Unanga 'o sano ra ananga mo-moini toma ngi’i gena-ge, "Mete’e 'agama ma hukumu, ngene balasu wo 'a’a 'oru toma Sabata ma wangere: wo 'a’a 'ori i’a ma la-la bolo 'ori i’a ma jira! Wo sisalamata ngowa’a, bolo wo sisengene!" 10 Yesus 'o tatamo ananga sigoloḏi. Ḏua 'o kanau toma ngowa’a siḏi gena-ge, "Na toa’a ino 'ani giama!" Ngowa’a siḏi gena-ge 'a toa’a i’a 'ai giama, ḏua 'ai giama ri la.

Lucas 6:6-10

Yesus 'o si-la Roma manga sordado ma sae’e 'ai budaka

1 Yesus 'o siajele hali-hali gena-ge toma ngowa’a repe togumu i’a, kara Unanga 'o tagi toma limau Kapernaum. 2 I’a da’a, 'age Roma manga sordado ma sae’e, unanga 'ai budaka matengo ga’a 'o dadalara 'o siḏi sa’i 'o sengene. 3 Wakutu sordado ma sae’e gena-ge 'a 'isene mangale Yesus ro sapolo toma limau Kapernaum, unanga 'o soma’a Yahudi manga sae’e 'aḏi tagi ra Unanga di’a 'aḏi golo’o Unanga 'o sapolo re si-la 'ai budaka gena-ge. 4 Wakutu ananga 'aḏi ngadolo ra Yesus, ananga 'aḏi golo’o mode-mode’e, la Unanga 'o riono sordado ma sae’e gena-ge. Ananga 'aḏi kanau i’a ra Yesus, "Roma manga sordado ma sae’e nena-ne, ngowa’a la-la, dadi no riono unanga, 5 sababu unanga 'o dadalara ngene nanga bangsa re unanga 'o simomi’i ḏua wala puji di’a ngomi."

6 Ḏua Yesus 'o tagi ma’u mete’e ra ananga. Wakutu Yesus reo co-cori i’a toma sordado ma sae’e 'ai wala, sordado ma sae’e gena-ge 'o soma’a 'ai ḏagilomu-ḏagilomu 'aḏi dola’a 'a Yesus re 'aḏi kanau, "Jou, awa no masikangela no sapolo tari wala sababu ngoi to patasa ua to dawongo Jou tari wala. 7 Sababu gena-ge, ngoi masiretene to patasa ua talaḏi Jou. Dadi pa’i No siajele demo bale moi ḇato re 'ari budaka ro la. 8 Sababu ngoi ḏi’i mai balasu to 'isene 'ari sae’e 'ai parenta, re 'ari aḏutala sordado-sordado ananga ḏi’i balasu 'aḏi mete’e 'ari parenta. Na’o ngoi to soma’a 'ari aḏutala matengo, ‘Tagi!’ unanga 'o tagi, re na’o ngoi to 'aro’o aḏutala ma lelegu, ‘Ino 'ane!’ unanga 'o sapolo ino. Na’o ngoi to soma’a 'ari budaka ‘No 'a’a ne!’ unanga ḏi’i 'o 'a’a."

9 Yesus 'o heranga wakutu 'o 'isene so’o gena togumu i’a. Unanga 'o magelelo re kanau i’a toma ngowa’a repe ga’a 'aḏi mete-mete’e Unanga, "Ngoi to siajele ra ngini nena-ne: Toma ngowa’a Israel manga sigolona, Ngoi to sanga matengo i’a mai nyangu, ga’a 'ai ngo-ngaku lai te’e sa’olo ngowa’a Yahudi ua nena-ne 'ai ngo-ngaku!"

10 Ananga ga’a sordado ma sae’e 'o soma’a 'o dola’a Yesus gena-ge 'aḏi maḏibo toma sordado ma sae’e 'ai wala, sanga i’a budaka ga’a 'o siḏi gena-ge ro la.

Lucas 7:1-10

11 Tamanga sigolona, 'age rema we-were’a matengo ga’a mo siḏi ma di’ara musungu nyagi moi re tu’angere ḏua, sababu roh ma jira mi dungosama. We-were’a nena-ne mo pukutu, dadi mo te’oso boloto yoḏu’u. 12 Wakutu Yesus 'o oḏi’i munanga, unanga 'o kanau i’a, "Meme, 'ani si-siḏi ri cua." 13 Re Yesus 'a siteru 'Ai giama toma we-were’a gena-ge. Toma 'orasa gena-ge ḏua, munanga nga’unu mo te’oso boloto. Ḏua munanga mo puji re silamo’o Ma Jou’ongu Madutu.

Lucas 13:11-13

Yesus 'o si-la ngowa’a siḏi matengo toma Sabata ma wangere

1 Toma 'orasa rimoi Sabata ma wangere, Yesus 'o tagi oromo toma ngowa’a Farisi matengo 'ai wala. Unanga gena-ge 'o sayanga ma jingi’i. Toma ngi’i gena-ge, guru-guru 'agama re ngowa-ngowa’a Farisi 'aḏi tailako Unanga mode-mode’e. 2 'Age rema ngowa’a matengo 'o si-siḏi bere-bere, 'ai rou re 'ai giama 'i robo-roboso. Unanga gena-ge 'o sapolo ra Yesus. 3 Ḏua Yesus 'o sano toma guru-guru 'agama re ngowa-ngowa’a Farisi, "Mete’e nanga 'agama ma hukumu, yoḏu’u bolo nyengara ngene wo si-la ngowa’a siḏi toma Sabata ma wangere?"

4 Guru-guru 'agama re ngowa-ngowa’a Farisi 'aḏi masiogoro. Ḏua Yesus 'a siteru 'Ai giama toma ngowa’a siḏi gena-ge, ḏua ro la. Togumu i’a Yesus 'o soma’a ngowa’a gena-ge 'o tagi.

Lucas 14:1-4

Yesus 'o si-la ngowa’a si-siḏi eno’o nga nyagi moi

11 Wakutu Yesus 'o tagi toma limau Yerusalem 'o tola’a i’a daeraha Samaria re daeraha Galilea ma bati. 12 Wakutu Unanga 'o osama toma gamu rimoi, 'age rema ngowa’a si-siḏi eno’o nga nyagi moi 'aḏi made-de’oso toma giḏanga mau ma’u sanga ra Yesus. 13 Ananga 'aḏi madigaro’o siduga-duga, "Yesus, Tuanga, no sijumu 'Ani 'akala re sinyingara ma la-la ra ngomi!"

14 Yesus 'o oḏi’i ananga so’o gena, ḏua 'o kanau, "Ni tagi toma 'imam-'imam, golo’o ananga ya oḏi’i ninga lese." Dadi ananga 'aḏi tagi re tamanga ḏo-ḏagi ma dara, ananga manga si-siḏi ri iranga.

15 'Age matengo toma ngowa’a si-siḏi eno’o gena-ge nga nyagi moi manga sigolona, wakutu unanga 'o mabasono tala 'ai si-siḏi ri iranga, unanga 'o maḏibo rai roanga re monere 'o puji re silamo’o Ma Jou’ongu Madutu rai iḏingi 'a siduga-duga. 16 Unanga 'o mapagara 'ai biono tala ra Yesus 'ai rou, re 'o pula’a murasa ma la. Unanga gena-ge ngowa’a Samaria. 17 Ḏua Yesus 'o kanau, "Ngoi ta’u si-la ngowa’a nga nyagi moi, nga siworo ananga le’a? 18 I’a sa’olo pa’i unanga matengo ḇato 'o maḏibo di’a 'o pula’a 'ai murasa ma la ra Ma Jou’ongu Madutu! Sidogo ḏi’i unanga nena-ne, ngowa’a Yahudi ua!" 19 Ḏua Yesus 'o kanau toma ngowa’a gena-ge, "Te’oso re no tagi, sababu ngana no ngaku Ngoi, ngana reno la."

Lucas 17:11-19

Didina’o heranga ma soi ro’ange: Yesus 'o si-la ngowa’a matengo toma Sabata ma wangere

1 Palisi’i i’a Yesus 'o tagi toma limau Yerusalem di’a 'o mete’e ngowa’a Yahudi manga wangere lamo’o. 2 Toma limau Yerusalem co-cori, "Ngalana Doba" 'age rema ma’ori’i ma ngi’i ga’a toma demo 'Ibrani si’aro’o Betesda, rema gandaria romotoa. 3 Toma gandaria-gandaria gena-ge, 'age rema ngowa’a siḏi manga repe: ngowa’a hafu, ngowa’a cug̱a, re ngowa’a ḇolo. Ananga mo-moini 'aḏi lu-lulu re 'aḏi totoma na’o ḇanyo gena-ge 'i lupe. 4 Sababu soi rai o’o i’a mala’ekata matengo 'o sapolo toma ngi’i gena-ge re ya silupe ma ḇanyo. Re ngowa’a siḏi matengo ga’a 'uci siḏa toma ḇanyo gena-ge wakutu ḇanyo lupe-lupe moju, unanga 'o dadi la. 5 Toma ngi’i gena-ge rema na-nau’u matengo ga’a ro siḏi ma di’ara musungu nyagi ro’ange re tu’angere ḏua. 6 Yesus 'o oḏi’i na-nau’u gena-ge pa’i 'o lu-lulu re ra disa waro unanga ro siḏi ma di’ara ḏua. Yesus 'o sano ra unanga gena-ge, "Ngana mau no la?"

7 Unanga 'a sangoro, "Jou, 'age 'a guna ua di’a singosama ngoi toma ḇanyo, na’o ma ḇanyo enanga 'i lupe. Wakutu ngoi to jau i’a toma ḇanyo, ngowa’a lelegu lebe ngadolo siḏa."

8 Dadi Yesus 'o kanau ra unanga, "Momi’i ie, na lolo 'ani jungutu re no tagi." 9 Toma 'orasa gena-ge ḏua, unanga ro la, re 'a lolo 'ai jungutu re 'o tagi. Gena-ge sidaene i’a toma Sabata ma wangere.

João 5:1-9

Didina’o heranga ma soi ḏiḏi: Yesus 'o si-la pagawe kadato 'ai ngowa’a nau’u

46 Gena ḏua, Yesus dadunu 'o maḏibo toma limau Kana, daeraha Galilea, ngi’i ga’a Unanga ro si’a’a ḇanyo 'i dadi 'anggur. 'Age toma limau Kapernaum pagawe kadato matengo 'ai ngowa’a nau’u siḏi lai siḏi. 47 Wakutu unanga gena-ge 'o 'isene Yesus ro sapolo toma daeraha Galilea da’a Yudea ino, unanga 'o tagi ra Yesus re 'o maḏigaro’o ra Unanga, la Unanga 'o tagi toma limau Kapernaum di’a si-la 'ai ngowa’a nau’u ga’a sa’i 'o sengene.

48 Yesus 'o kanau i’a toma pagawe kadato gena-ge, "Na’o ngini ni oḏi’i nyangu didina’o heranga re 'ori i’a hera-heranga, ngini ni ngaku ua!"

49 Pagawe kadato gena-ge 'o kanau ra Yesus, "Tuanga, capati no tagi, 'ari ngowa’a nau’u sa’i 'o sengene."

50 Yesus 'o kanau ra unanga, "Tagi ḇato 'ani ngowa’a nau’u ro la." Unanga gena-ge 'o ngaku mode-mode’e Yesus 'ai demo-demo, dadi 'o tagi maḏibo.

51 Toma ḏo-ḏagi ma dara moju, pagawe kadato gena-ge 'ai falalomu-falalomu 'aḏi sapolo ma’u sanga ra unanga re 'aḏi siajele ra unanga mangale 'ai ngowa’a nau’u ga’a 'o siḏi ro la.

52 Ḏua unanga 'o sano tai falalomu-falalomu gena-ge, ca’olo muḏuo 'ari ngowa’a nau’u ro la. Ananga ya sangoro, " 'Au nyigo wangere 'olona ḏa ca’olo rimoi, 'ai gagama ri iranga." 53 Ḏua unanga, ma ḇaḇa 'a si’elingi ie, 'au nyigo toma 'orasa ḏa ca’olo rimoi, Yesus 'o kanau ra unanga, " 'Ani ngowa’a ro la." Dadi mulaingi 'orasa gena-ge re si’a, unanga re 'ai ngitu re ngale, ananga mo-moini 'aḏi ngaku Yesus.

54 Gena-ge didina’o heranga ma soi ḏiḏi ga’a Yesus 'a si’a’a toma daeraha Galilea wakutu Unanga 'o maḏibo da’a daeraha Yudea ino.

João 4:46-54

A mulher com fluxo de sangue

Uma mulher que sofria há doze anos tocou a orla do manto de Jesus e foi curada instantaneamente pela sua fé.

20,21 Toma ngo’omo ma golona we-were’a matengo mo siḏi, 'ami ngaunu pa’ala ma di’ara ri musungu nyagi moi re romoḏiḏi ḏua sa’olo mo maoḏi’i, munanga mo sapolo re mo maco-cori’i i’a ra Yesus, kara ma cigi Yesus 'ai juba ma dere da’a ḏuḏunu ino. Tami 'ulungu ma dara, "Na’o ta cigi 'Ai juba ḇato, ngoi to la."

22 Toma 'orasa gena-ge Yesus 'o magelelo re 'o oḏi’i we-were’a gena-ge. Ḏua Yesus 'o kanau, " 'Ari ngowa’a na site’e tala 'ani 'akala re sinyingara, sababu ngana 'ani ngo-ngaku ra Ngoi, ngana no la." Toma 'orasa gena-ge ḏua, we-were’a gena-ge mo la.

Mateus 9:20-22

25 Toma ngowa’a repe manga sigolona, 'age rema we-were’a matengo mo siḏi mi ngaunu pa’ala, 'i ma’u dogo ḏi’i maoḏi’i 'ami siḏi, ma di’ara musungu nyagi moi re romoḏiḏi ḏua. 26 'Ami 'ori i’a rana mai mawu’unu rema moini ja’a mi sou’u ma bo-bangu, mada’a mo la ua; siḏibo ḏi’i 'ami si-siḏi ganapu dogo! 27,28 We-were’a gena-ge ma 'isene ḏua mangale 'a Yesus. Dadi munanga mo mafikiri i’a, "Na’o ta cigi 'Ai juba ḇato, ngoi to la." Sababu gena-ge, munanga mo masebanga i’a ra Yesus 'ai ḏuḏunu toma ngowa’a repe manga sigolona.

29 Munanga macigi 'a Yesus 'ai juba, re toma 'orasa gena-ge ḏua, 'ami ngaunu pa’ala riwara. Munanga mo mabasono tala re mo la.

Marcos 5:25-29

43 Toma ngowa’a repe manga sigolona, 'age rema we-were’a matengo mo siḏi 'ami ngaunu 'i pa’ala ma di’ara musungu nyagi moi re romoḏiḏi. Re 'ami 'ori i’a rana mai mawu’unu rema moini di’a 'ami sou’u ma bo-bangu toma dotere. Mada’a matengo i’a mai ua nga’unu si-la munanga. 44 We-were’a gena-ge mo masebanga i’a ra Yesus 'ai ḏuḏunu, kara ma cigi 'a Yesus 'ai juba ma dere. Toma 'orasa gena-ge ḏua 'ami ngaunu 'i pa’ala riwara. 45 Yesus 'o sano, " 'A guna 'o cigi Ngoi?" Ananga mo-moini 'aḏi masoloto. Ḏua Petrus 'o kanau, "Tuanga, ngowa’a manga repe masala 'aḏi sigoloḏi, re ma’u tutuḏu."

46 Yesus 'o kanau, "Mada’a 'age rema ngowa’a matengo 'o cigi ngoi. Ngoi ta waro, sababu Ngoi 'ari de-de’e 'i supu." 47 We-were’a gena-ge mo ma’insafu mangale mi ga’a nange-ge ngowa’a ya waro. Dadi munanga mo sapolo rami terewete, re mo maḏipolono ra Yesus. Ḏua munanga mo masijarita toma mandan, i’a sa’olo munanga mo cigi 'a Yesus 'ai juba re 'orasa gena-ge ḏua 'ami si-siḏi ri la. 48 Yesus 'o kanau ra munanga, " 'Ari ngowa’a, sababu ngana no ngaku Ngoi, ngana reno la, no tagi rani dame."

Lucas 8:43-48

Ressurreições

Jesus ressuscitou mortos — a filha de Jairo, o filho da viúva de Naim e Lázaro. Ele é Senhor sobre a morte.

Wala puji ma sae’e 'ai ngowa’a were’a re we-were’a ga’a macigi Yesus 'ai juba

18 Wakutu Yesus 'o ka-kanau moju ra Yohanes 'ai me-mete’e, wala puji ma sae’e 'o sapolo ra Yesus. Unanga 'o maḏipolono ra Yesus 'ai biono re 'o kanau, " 'Ari ngowa’a were’a aro mo sengene i’a, na’o nyengara gari’a No sapolo re Nimi cigi, la munanga dadunu mo 'ahu."

19 Yesus 'o te’oso re 'o tagi mamete’e reo wala puji ma sae’e gena-ge re 'Ai me-mete’e mamete’e ḏi’i.

Mateus 9:18,19

23 Gena ḏua, Yesus 'o ngadolo toma wala puji ma sae’e 'ai wala. I’a da’a, Unanga 'o oḏi’i ngowa-ngowa’a ga’a ḇisa serulingi di’a palihara mayeti re ngowa’a repe ya rerese ma gaḏi. 24 Unanga 'o kanau ra ananga, "Ngini ni supu mo-moini. Ngowa 'olo nena-ne mo sengene ua munanga pa’i mo otu ḇato." Ananga mo-moini 'aḏi nye-nyelo’o Unanga.

25 Dadi ananga mo-moini 'aḏi matai supu. Ḏua, Yesus 'o osama toma ngowa 'olo gena-ge 'ami kamara kara 'a gu’u 'ami giama. Toma 'orasa gena-ge ḏua, ngowa 'olo were’a gena-ge dadunu mo 'ahu moju re mo momi’i.

Mateus 9:23-25

22 Matengo ḏi’i 'o sapolo, 'ai lomanga Yairus, unanga gena-ge 'o dadi wala puji ma sae’e toma limau gena-ge. Wakutu unanga 'o oḏi’i Yesus, unanga 'o mapagara 'ai biono ra Yesus 'ai rou 23 re 'o madigaro’o mode-mode’e, "Jou, ngoi 'ari ngowa 'olo were’a, ga’a ta dadalara, mo siḏi lai siḏi, 'ami 'umuru musungu nyagi moi re romoḏiḏi. Nga’unu gari’a no sapolo re no siteru 'ani giama ra munanga, la mo la re mo sengene awa."

24 Ḏua Yesus 'o tagi mamete’e ra Yairus. Ngowa’a repe 'aḏi malomu singadolo 'aḏi tu-tuḏu Unanga.

Marcos 5:22-24

38 Wakutu ananga 'aḏi ngadolo ra unanga 'ai wala, Yesus 'o 'isene ngowa’a 'aḏi manyiwere re ya rerese ma gaḏi. 39 Ḏua Yesus 'o osama re 'O kanau i’a ra ananga, "I’a sa’olo ni manyiwere re ni 'aḏi? Ngowa 'olo gena-ge mo sengene ua; munanga mo otu ḇato!"

40 Ananga 'U nye-nyelo’o Unanga 'ai demo-demo. Ḏua, Unanga 'o soma’a ananga mo-moini 'aḏi supu. Gena ḏua, Unanga 'o gasa ma ngina re ma ḇaḇa re 'ai me-mete’e nga ḏuange, ananga 'aḏi osama toma ngowa 'olo were’a 'ami kamara ma dara. 41 Yesus 'a gu’u 'ami giama re 'o kanau i’a ra munanga, "Talita kum" ma ngale: "Ngowa 'olo were’a, no momi’i."

42 Mosolese gena-ge jau-jau mo momi’i mo 'uci re mo tagi. Ananga ya oḏi’i munanga dadunu mo 'ahu moju, 'aḏi heranga masala.

Marcos 5:38-42

31 Ḏua Yesus dadunu 'o kanau moju, "Reo 'oru ngoi ta site-tero ngowa-ngowa’a toma 'orasa nena-ne? Ananga nena-ne ma tero sa’olo 'oru? 32 Ananga nena-ne sa’olo ngowa 'olo 'aḏi maḏegoro toma pasara toropo moi-toropo moi re 'aḏi ma’u sangoro i’a re ino ma’u ngali-ngali,

‘ Ngomi ḇisa serulingi ḏua mada’a ngini ni roje ua,

ngomi mi nyanyi-nyanyi duka re balisa mada’a ngini 'aḏi ua.’

33 Ngoi 'ari maksudu: Wakutu Yohanes tukanga baptis 'o sapolo, unanga 'o puasa re oḏu’u ka’e 'anggur, re ngini nu dawongo ua re ni kanau, ‘Unanga 'o roh ma jira 'u dungosama.’ 34 Ngoi, Manusia ma Ngowa’a Nau’u reto sapolo re To oromo re ka’e, mada’a ngini ḏi’i ni dawongo Ngoi ua re ni kanau, ‘ Oḏi’i unanga gena-ge 'O da-danata, 'O 'etolo, re Ma’u ḏagilomu reo ngowa-ngowa’a golo-golo’o balastengi re ngowa-ngowa’a baraḏosa.’ 35 Kalaha so’o gena, Ma Jou’ongu Madutu 'ai 'akala ma soro’unu 'i waiti banari ra Ma Jou’ongu Madutu 'ai ngowa-ngowa’a ga’a raḏi dawongo Ngoi."

We-were’a matengo mo silamo’o Yesus ra Simon 'ai wala

36 Ngowa’a Farisi matengo 'ai lomanga Simon, unanga 'o saele Yesus di’a oromo ra unanga 'ai wala. Yesus 'o tagi ra Simon 'ai wala re 'o oromo ma’u mete’e ra unanga. 37 Toma limau gena-ge, 'age rema we-were’a matengo, munanga remo 'ahu toma ḏosa ma dara. Wakutu munanga mo 'isene Yesus 'o oromo toma ngowa’a Farisi gena-ge 'ai wala, munanga mo sapolo rami botol rimoi ma dara rema bou-bounu.

Lucas 7:31-37

41 Ḏua sapolo ḏi’i matengo 'ai lomanga 'a Yairus. Unanga gena-ge 'o dadi wala puji ma sae’e. Unanga 'o maḏipolono ra Yesus re 'o maḏigaro’o na’o nyengara gari’a Yesus no sapolo ra ngoi 'ari wala. 42 Sababu 'ari ngowa’a were’a pa’i munanga matengo 'ami 'umuru musungu nyagi moi re romoḏiḏi sa’i mo sengene. Wakutu Yesus 'o tagi ra Yairus 'ai wala, ngowa’a repe masala 'u gowolo Unanga toma biono re ḏuḏunu, kuwiḏa re kuḇali singadolo ananga ma’u tu-tuḏu.

Lucas 8:41,42

49 Wakutu Yesus 'o ka-kanau moju, 'a Yairus 'ai so-soma’a matengo 'o sapolo da’a ra Yairus 'ai wala ino. Unanga 'o kanau ra Yairus, "Tuanga 'ani ngowa’a were’a remo sengene, no sikangela Guru rawara."

50 Yesus 'a 'isene i’a so’o gena, kara Unanga 'o kanau ra Yairus, "Mojongo awa, ngaku ḇato ḏuanga i’a 'ani ngowa’a mo la."

51 Wakutu ananga 'aḏi ngadolo ra Yairus 'ai wala, Yesus 'o simaha ua ananga matengo i’a 'aḏi osama mamete’e ra Unanga, ḏuga-ḏuga Petrus, Yohanes, Yakobus, re ngowa’a ga’a mo siḏi 'ami ḇaḇa rami ngina. 52 Ngowa’a mo-moini ya rerese ma gaḏi, sababu ngowa 'olo were’a gena-ge remo sengene. Mada’a Yesus 'o kanau, "Ni 'aḏi awa, munanga mo sengene ua, mada’a munanga pa’i mo otu ḇato!" (Yesus 'o waro ḏua ngowa 'olo were’a gena-ge remo sengene.)

53 Ananga 'aḏi nye-nyelo’o 'a Yesus, sababu ananga 'aḏi waro ngowa 'olo were’a gena-ge remo sengene. 54 Togumu i’a, Yesus 'a gu’u ngowa 'olo were’a gena-ge 'ami giama re 'o kanau, "Ngowa 'olo, no momi’i." 55 'Ami nyawa ri ḏibo re mo momi’i. Togumu i’a Yesus 'o soma’a ananga 'aḏi pula’a munanga mo oromo. 56 Ngowa 'olo were’a 'ami ḇaḇa re 'ami ngina 'aḏi heranga masala. Mada’a Yesus 'o simaha ua ananga 'aḏi sihabari 'oru 'i dadi gena-ge ra guna ḇato.

Lucas 8:49-56

Lazarus 'o sengene

1 'Age rema ngowa’a matengo 'ai lomanga Lazarus ga’a 'o tegoro toma gamu Betania ma wala ḏu moi re 'ai biḏanga nga muḏiḏi, ngo Maria re ngo Marta. 2 (Ngo Maria gena-ge matengo ga’a mo siba-ba’ala 'ami bou-bounu ra Ma Jou 'ai rou re masipii’i rami utu.) Toma 'orasa gena-ge Lazarus 'o eta’a toma si-siḏi. 3 Dadi ngo Maria re ngo Marta, ananga 'aḏi soma’a ngowa’a matengo 'o tagi re 'o sihabari ra Yesus, "Ma Jou, 'Ani ḏagilomu ga’a no dadalara, unanga 'o siḏi."

4 Wakutu Yesus 'a 'isene habari gena-ge, Unanga 'o kanau, "Si-siḏi gena-ge 'i sigasa toma sengene ua. Gena-ge ri dadi, la ngowa’a 'aḏi oḏi’i Ma Jou’ongu Madutu 'ai kuasa re 'aḏi silamo’o masala ḏi’i Unanga gena-ge 'Ai Ngowa’a Nau’u."

5 Yesus 'O dadalara ngo Marta re ngo Maria re manga iḏanga 'a Lazarus. 6 Sababu gena-ge, wakutu Unanga 'a 'isene habari mangale 'a Lazarus 'o siḏi, Unanga 'o matahana Tai ngi’i wange ḏiḏi moju. 7 Wange ḏiḏi pasala i’a, Yesus 'o kanau Tai me-mete’e, "Ino ngene wo maḏibo toma daeraha Yudea."

8 Ananga ya sangoro, "Mada’a Rabi, 'au ngau i’a ngowa-ngowa’a Yahudi da’a mau 'aḏi poini Jou reo maḏi singadolo no sengene, simara nange-ne Jou no mau maḏibo i’a da’a moju?!"

9 Ḏua Yesus 'o sangoro ra ananga reo 'ade-'ade so’o ne: "Wange moi ma dara 'age jam nyagi moi re romoḏiḏi wakutu 'i tarangi. Ngowa’a ga’a 'aḏi tagi wakutu wa-wangere kama pele’e ua, sababu 'aḏi oḏi’i wangere ma la’o ma tarangi. 10 Mada’a ngowa’a ga’a 'aḏi tagi wakutu lobi’i, ananga 'aḏi pele’e sababu tarangi 'i cua."

11 Togumu i’a Yesus 'o kanau so’o gena-ge, Unanga dadunu 'o kanau moju, "Ngene nanga ḏagilomu 'a Lazarus, unanga 'o otu. Mada’a maha Ngoi to tagi i’a Tu simomi’i."

12 Yesus 'ai me-mete’e ananga 'aḏi kanau, "Ma Jou na’o Lazarus 'o otu, unanga ḏuanga i’a 'o la."

13 Yesus 'ai maksudu 'a Lazarus ro sengene. Mada’a ananga 'aḏi ta’ajiri Unanga 'ai maksudu mangale Lazarus 'o otu biasa.

14 Sababu gena-ge, Yesus 'a sitarangi 'ai maksudu ra ananga, re 'o kanau, "Lazarus ro sengene.

João 11:1-14

Domínio sobre a natureza

Jesus acalmou a tempestade, andou sobre as águas e multiplicou pães. A natureza obedece à voz do seu Criador.

Yesus 'a sitogumu rato

23 Yesus 'o mabalene toma oti Rai me-mete’e, kara 'aḏi sidete. 24 Kage-kage rato 'i sapolo, talaga gena-ge ma momoku 'i baolo, singadolo oti ga’a ananga ya balene 'o momoku ya wa’ala i’a re ino, mada’a Yesus 'o otu ḇato. 25 Ḏua 'Ai me-mete’e 'U tamanga Unanga re 'aḏi tuduba, "Jou! Riono! Ti’ara ua wo jala!"

26 Yesus 'o kanau, "I’a sa’olo ni mojongo? Ngini ninga ngo-ngaku te’e ua ra Ngoi!" Gena ḏua, Yesus 'o te’oso re 'a ḇangata rato re talaga gena-ge. Re talaga 'i ogoro madutu sa’olo wag̱ele tau’u.

27 Yesus 'ai me-mete’e 'aḏi matai heranga madutu re 'aḏi kanau, "Ngowa’a 'oru Unanga nena-ne?! Singadolo rato re momoku mai ya mete’e 'Ai parenta!"

Mateus 8:23-27

15 Ma 'orasa wangere so’o ne’o ḏua, Yesus 'ai me-mete’e 'aḏi sapolo ra Unanga re 'aḏi kanau, "Sa’i ri lobi’i re ngi’i ne 'i tiwongo i’a. Jobilaha Jou no soma’a ngowa’a repe nena-ne 'aḏi maḏibo, la 'aḏi tibo manga ngo-ngoromo toma gamu ga’a co-cori ngi’i nena-ne."

16 Yesus 'o sangoro, "Ngini nena-ne balasu pula’a ngo-ngoromo ra ananga. Awa simaha ananga 'aḏi maḏibo remanga sawini."

17 Yesus 'ai me-mete’e 'aḏi kanau, "Ngomi minga dodahe pa’i roti ngai romotoa re nyao’o ngai ḏiḏi!"

18 Yesus 'o kanau, "Gasa gena-ge ino!" 19 Gena ḏua, Yesus 'o soma’a ngowa’a repe gena-ge 'aḏi tegoro toma rurubu ma re’u. Re Unanga 'o 'oro roti ngai romotoa re ma nyao’o ngai ḏiḏi 'O talaḏi ie da’u diwanga re 'O sibere ie murasa ma la ra Ma Jou’ongu Madutu. Togumu gena, Unanga 'A poti-poti roti re 'A sipula’a Tai me-mete’e, kara ananga ya sibalangu toma ngowa’a repe gena-ge. 20 Ananga mo-moini 'aḏi oromo singadolo 'aḏi wunusu. Togumu i’a, Yesus 'ai me-mete’e ya lomu ngo-ngoromo ma jingianga re ya sanga pipigu nyagi moi re romoḏiḏi roma-romanga. 21 Toma 'orasa gena-ge, ngowa’a repe ga’a 'aḏi oromo na-nau’u ḇato ḏa nga cala romotoa, gena-ge siroimi ua we-were’a re ngowa 'olo.

Mateus 14:15-21

25 Wakutu cori wangere i’a, Yesus 'o sapolo ra ananga tagi mete’e ḇanyo ma re’u.

Mateus 14:25

Yesus pula’a oromo ngowa’a nga cala rata

32 Gena ḏua, Yesus 'o 'aro’o 'Ai me-mete’e kara 'O kanau ra ananga, "Tari 'akala re sinyingara 'i baolo dadalara toma ngowa’a kawasa nena-ne. Sababu ma di’ara wangere ro’ange ḏua ananga raḏi mamete’e ra Ngoi dadi nange-ne ananga manga ngo-ngoromo 'i moini ḏua. Ngoi to oḏu’u ananga 'aḏi maḏibo remanga sawini, sababu na’o so’o gena-ge awa-awa 'aḏi beberete toma ngo’omo ma golona."

33 Ḏua, 'Ai me-mete’e 'aḏi sangoro ra Unanga, "Ngi’i nena-ne 'i tiwongo i’a. Wo sanga le’a ngo-ngoromo di’a ngowa’a manga repe nena-ne?"

34 Yesus 'o sano, " 'Age roti ngai muḏuo i’a ra ngini?"

Ananga ya sangoro, "Ngai tumudingi re pa’i nyao’o 'alusu ngai muḏuo i’a ḇato." 35 Ḏua, Unanga gena-ge 'o soma’a ananga ngowa’a kawasa 'aḏi tegoro toma tana’a. 36 Gena ḏua, Yesus 'a 'oro roti ngai tumudingi re ma nyao’o gena-ge re 'O sibere ie murasa ma la ra Ma Jou’ongu Madutu. Ḏua Unanga 'a poti-poti roti re nyao’o gena-ge re 'O sipula’a Tai me-mete’e di’a ya sibalangu toma ngowa’a kawasa. 37 Ananga mo-moini 'aḏi oromo singadolo 'aḏi wunusu. Togumu i’a, Yesus 'ai me-mete’e ya lomu ma jingianga ya sanga pipigu tumudingi roma-romanga. 38 Ngowa’a repe ga’a 'aḏi oromo toma 'orasa gena-ge, ananga gena-ge na-nau’u ḇato nga cala rata. We-were’a re ngowa 'olo siroimi ua.

Mateus 15:32-38

Ma Jou’ongu Madutu 'ai Wala ma balastengi

24 Wakutu Yesus re 'Ai me-mete’e, ananga 'aḏi ngadolo toma limau Kapernaum, ngowa’a ga’a lomu balastengi di’a Ma Jou’ongu Madutu 'ai Wala, ananga 'aḏi sapolo re sano ra Petrus, " 'Ani guru 'o fangu bolo ua balastengi di’a Ma Jou’ongu Madutu 'ai Wala?"

25 Petrus 'a sangoro i’a, "Unanga 'a fangu!"

Wakutu Petrus 'o ḏibo ino 'o osama toma wala ma dara, Yesus 'o sano ra unanga siḏa, "Simon, mete’e 'ani wo-waro: 'a guna fangu balastengi re bea toma 'olana-'olana dungia nena-ne, manga rayata bolo ngowa’a sa-sapolo ino?"

26 Petrus 'a sangoro, "Ngowa’a sa-sapolo ino."

Yesus 'o kanau, "Na’o so’o gena, rayata paralu ua fangu balastengi. 27 Mada’a awa ngene wa’u caḏabi ngowa-ngowa’a ga’a lomu balastengi gena-ge. Dadi, ngana si’a toma talaga di’a no ga-gawolo nyao’o. Re ngana no 'oro nyao’o ga’a na tuono ma mulaingi re ngana no sanga pipisi-pipisi toma nyao’o ma madanga. Pipisi-pipisi gena-ge 'i site-tero ngene nga muḏiḏi nanga balastengi di’a Ma Jou’ongu Madutu 'ai Wala. Ḏua ngana no pula’a pipisi-pipisi gena-ge toma ngowa’a ga’a lomu balastengi di’a Ma Jou’ongu Madutu 'ai Wala."

Mateus 17:24-27

Yesus 'a sisasi ate 'ara

18 Ma ḇiḇini ino da-daini i’a moju, wakutu Yesus 'o maḏibo toma limau Yerusalem, toma ngo’omo ma golona, Unanga 'o basono sawini. 19 Dadi wakutu Unanga 'o oḏi’i ate 'ara ḏu moi toma ngo’omo ma 'uḏu, Unanga 'o tagi sebanga i’a toma ate gena-ge. Mada’a kalaha ate gena-ge rema ma so’a, Unanga 'a oḏi’i ma sowo’o rimoi i’a mai ua! Ḏua Yesus 'a kanau i’a toma ate gena-ge, "Mulaingi toma 'orasa nena-ne re si’a, ngana kama sowo’o riwara!" Ate gena-ge jau-jau ri wa’alo.

20 Wakutu Yesus 'ai me-mete’e ya oḏi’i 'oru 'i dadi gena-ge, ananga 'aḏi heranga masala. Ananga 'aḏi sano, "I’a sa’olo ate ara gena-ge ri wa’alo caiti?"

21 Yesus 'a sangoro, "Ni ngaku mode-mode’e 'Ari demo-demo nena-ne: Na’o ngini ni ngaku mode-mode’e re na sitaka-taka ua, ngini nga’unu na si’a’a ma tero sa’olo Ngoi ta si’a’a toma ate 'ara nena-ne. Re pa’i gena-ge ḇato ua, ngini nyengara ni kanau kie nena-ne, ‘No malage re no eta’a toma ngoloto.’ Re enanga gena-ge ḏuanga i’a 'i dadi. 22 Na’o ngini ni ngaku mode-mode’e, 'oru ḇato ngini golo’o taninga nyiata ma dara, ngini ḏuanga i’a na dawongo."

Mateus 21:18-22

37 Wakutu 'aḏi sidete, rato 'i sapolo. Momoku 'i pere singadolo 'o oti sa’i ri romanga reo ḇanyo. 38 Yesus 'o otu toma oti ma lasere, 'ai sae’e 'a siwangini re 'o nora. 'Ai me-mete’e 'U tamanga Unanga. Ananga 'aḏi tuduba, "Guru, i’a sa’olo ngana na siwaro i’a ua na’o ngene ne sa’i re wo jala?"

39 Unanga 'o momi’i, ḏua 'a sikanga rato re talaga, "Togumu, masiogoro!" Rato 'i taraha re 'o talaga 'i dadi ogo-ogoro i’a. 40 Gena ḏua, Unanga 'o ḇangata 'Ai me-mete’e, "I’a sa’olo ni mojongo! I’a sa’olo ni ngaku ua!"

41 Ananga 'aḏi matai mojongo masala re 'aḏi ma’u kanau matengo re matengo, "Unanga nena-ne 'o dadi 'oru! Singadolo rato re 'o momoku mai ya mete’e Unanga 'ai parenta!"

Marcos 4:37-41

35 Ma wangere so’o ne’o, 'ai me-mete’e 'aḏi kanau i’a ra Unanga, "Sa’i ri lobi’i re ngi’i ne 'i tiwongo i’a. 36 Jobilaha Jou no soma’a ngowa’a repe 'aḏi tagi toma gamu-gamu bolo toma do’usu-do’usu ma sebanga, la 'aḏi tibo manga ngo-ngoromo."

37 Mada’a Yesus 'o sangoro, "Ngini ni pula’a oromo ananga."

'Ai me-mete’e dadunu 'aḏi kanau, "Wah, ngowa’a manga repe nena-ne. Na’o ngomi pula’a roti ra ananga, balasu tibo roti ma ijana pipisi salaka latu ḏiḏi!"

38 Ḏua Yesus 'o sano, "Ninga roti ngai muḏuo? Tagi ni disa si." Ananga tagi ya disa toma ngowa’a repe manga sigolona kara 'aḏi ḏibo 'aḏi kanau, "Ngomi mi sanga roti ngai romotoa re nyao’o ngai ḏiḏi."

39 Ḏua Yesus 'o soma’a ngowa’a repe 'aḏi tegoro toropo moi-toropo moi toma rurubu ma re’u. 40 Ngowa’a repe gena-ge 'aḏi tegoro re 'aḏi masifato toropo moi-toropo moi; 'age toropo moi nga latu moi, 'age ḏi’i nga nyagi romotoa. 41 Ḏua Yesus 'o 'oro roti re nyao’o nange-ge re Unanga 'o talaḏi ie da’u diwanga re 'O sibere ie murasa ma la ra Ma Jou’ongu Madutu. Togumu i’a, Unanga 'A poti-poti ma roti re 'A pula’a i’a Tai me-mete’e, ḏua ananga ya sibalangu di’a ngowa’a repe. So’o gena ḏi’i, Unanga 'a sibalangu nyao’o gena-ge toma ngowa’a mo-moini. 42 Ananga mo-moini 'aḏi oromo singadolo 'aḏi wunusu. 43 Togumu i’a, Yesus 'ai me-mete’e ya lomu ngo-ngoromo ma jingianga re ya sanga pipigu nyagi moi re romoḏiḏi roma-romanga. 44 'O na-nau’u ḇato ḏa nga cala romotoa.

Marcos 6:35-44

48 Unanga 'o oḏi’i ananga 'aḏi 'amono kangela masala sababu 'aḏi tomo karawiana. Sababu gena-ge, cori wangere i’a Yesus 'o tagi mete’e toma ḇanyo ma re’u re 'o masebanga i’a ra ananga manga oti. 49,50 Wakutu ananga 'aḏi oḏi’i Unanga 'o tagi toma ḇanyo ma re’u, ananga 'aḏi ta’ajiri 'O ca’ata, 'i matuhu sa’olo ngowa’a, singadolo mo-moini 'aḏi mojongo re 'aḏi sawana.

Mada’a Yesus jau-jau 'o kanau ra ananga, "Masiogoro! Ngoi ne Yesus. Dadi mojongo awa!"

51 Ḏua Unanga 'o mabalene tamanga oti re karawiana gena-ge ri taraha. Yesus 'ai me-mete’e 'aḏi matai heranga woḏi, singadolo ya waro manga gogare riwara;

Marcos 6:48-51

Yesus 'o pula’a oromo ngowa’a nga cala rata

1,2 Toma 'orasa gena-ge, 'age rema ngowa’a repe masala 'aḏi malomu. Ananga gena-ge, manga dofoma 'i moini ḏua. Ḏua Yesus 'o 'aro’o 'Ai me-mete’e re 'O kanau i’a ra ananga, "Tari 'akala re sinyingara 'i baolo dadalara toma ngowa’a repe, sababu wangere ro’ange ḏua ananga 'aḏi mete-mete’e Ngoi, dadi manga dofoma 'i moini ḏua. 3 Na’o Ngoi to soma’a ananga 'aḏi maḏibo remanga sawini, toma ngo’omo ma golona 'aḏi beberete, sababu ngowa’a mamuni’a tegoro toma giḏanga."

4 Yesus 'ai me-mete’e 'aḏi sangoro, "Sanga ngo-ngoromo le’a ḇato, nga’unu sipula’a oromo toma ngowa’a repe nena-ne? Sababu ngi’i nena-ne 'i tiwongo ino?"

5 Yesus 'o sano, " 'Age roti ngai muḏuo i’a ra ngini?"

Ananga ya sangoro, "Ngai tumudingi."

6 Ḏua Yesus 'o soma’a ngowa’a repe 'aḏi tegoro toma tana’a. Gena ḏua, Unanga 'a 'oro roti ngai tumudingi gena-ge re 'O sibere ie murasa ma la ra Ma Jou’ongu Madutu. Ḏua Unanga 'a poti-poti roti gena-ge, kara 'O sipula’a Tai me-mete’e di’a ya sibalangu toma ngowa’a repe. Re 'Ai me-mete’e ya siḏagi mo-moini gena-ge. 7 Ananga remanga nyao’o ngai muḏuo i’a mada’a i’a 'alusu. Yesus 'o sibere ie murasa ma la ra Ma Jou’ongu Madutu ḏi’i, kara 'O soma’a 'Ai me-mete’e ya sibalangu nyao’o gena-ge ra ananga mo-moini. 8,9 Ngowa’a repe 'aḏi oromo singadolo 'aḏi wunusu. Ananga ḏa nga cala rata. Togumu i’a, 'Ai me-mete’e ya lomu ma jingianga, pipigu tumudingi roma-romanga. Ḏua Yesus 'o soma’a ngowa’a repe gena-ge 'aḏi maḏibo,

Marcos 8:1-9

Yesus 'a sisasi ate 'ara

12 Ma ḇiḇini ino da-daini i’a moju, wakutu ananga 'aḏi tagi re 'aḏi supu toma limau Betania, Yesus basono 'o sawini. 13 Toma giḏanga, Unanga 'o oḏi’i ate 'ara ḏu moi ma so’a lai ruana. Dadi, Unanga 'o tagi i’a toma ate gena-ge mau 'a oḏi’i rema sowo’o bolo ua. Mada’a, Unanga 'o ngadolo toma ate gena-ge, 'o oḏi’i ma sowo’o rimoi i’a mai ua, pa’i ma so’a ḇato, sababu wakutu gena-ge enanga ma 'orasa sowo’o nyangu. 14 Ḏua, Yesus 'o kanau i’a toma ate gena-ge, "Mulaingi nange-ne re si’a, matengo i’a mai ua 'a oromo riwara ate nena-ne ma sowo’o!"

'Ai me-mete’e ya 'isene Yesus 'o kanau gena-ge.

Marcos 11:12-14

Do-doto’o mangale ate 'ara

20 Ma ḇiḇini ino da-daini i’a, wakutu ananga 'aḏi tola’a i’a toma ate 'ara gena-ge, ananga ya oḏi’i ate gena-ge ri sengene; da’u ma tubu singadolo dau ma cimi. 21 Ḏua Petrus 'a si’elingi 'au nyigo Yesus 'a sisasi ate 'ara gena-ge re 'o kanau i’a ra Yesus, "Rabi, Na oḏi’i ate 'ara ga’a Na sisasi, enanga gena-ge ri sengene!"

22 Yesus 'a sangoro, "Ni ngaku ḇato ra Ma Jou’ongu Madutu. 23 Ni ngaku mode-mode’e 'Ari demo-demo nena-ne: Ngowa’a mo-moini ga’a 'aḏi ngaku mode-mode’e Ma Jou’ongu Madutu re sitaka-taka ua 'oro ḇato 'aḏi kanau; enanga gena-ge 'i dadi. 'A guna ḇato 'o kanau, ‘Kie nga’unu 'i lage re 'i eta’a toma ngoloto!’ Togumu i’a, mode-mode’e enanga 'i lage re 'i eta’a toma ngoloto! 24 Sababu gena-ge, Ngoi to siajele ra ngini nena-ne: 'Oru ḇato 'o manyiata re 'o ngaku mode-mode’e Ma Jou’ongu Madutu 'o pula’a ḏua, enanga gena-ge 'i dadi ra unanga. 25 Re na’o ngini ni manyiata, mada’a ninga 'akala re sinyingara 'i sanangi ua ra matengo i’a, siḏa-siḏa na si’apongo ngowa’a matengo gena-ge, la ninga Ḇaḇa da’u toma soroga 'A singi-ngiranga ḏi’i ninga ḏosa-ḏosa. [

Marcos 11:20-25

Yesus 'o cumutu 'Ai me-mete’e ma mulaingi

1 Toma 'orasa rimoi, Yesus 'o te’oso doto’o ngowa-ngowa’a toma talaga Genesaret ma 'uḏu. Ngowa’a repe 'aḏi gowolo Unanga di’a 'aḏi 'isene Habari Roanga ra Ma Jou’ongu Madutu ino. 2 Toma talaga ma 'uḏu, Yesus 'o oḏi’i oti romoḏiḏi, ngowa’a ngau-ngau raḏi 'uci toma oti gena-ge re 'aḏi woi’i manga j̱ala ma jeremoto. 3 Ḏua Yesus 'o mabalene toma oti rimoi, Simon 'ai oti, re 'o soma’a 'a Simon 'a itomo gasa kiḏanga o’o. Gena ḏua, Yesus 'o tegoro toma oti ma dara re 'O doto’o ngowa’a repe.

4 Yesus 'o doto’o togumu i’a 'O kanau ra Simon, "Siamono toma ngido re ni upa’a j̱ala di’a ni disa nyao’o."

5 Simon 'o kanau, "Jou, utu moi siwangere ngomi kama togumu ua mi upa’a j̱ala kuwiḏa re kuḇali, mada’a mi sanga 'oru rimoi i’a mai ua! Mada’a sababu Jou no soma’a, ngoi ta mete’e re ta si’a’a." 6 Ananga ya si’a’a ma tero sa’olo Yesus 'o soma’a. Ḏua ananga 'aḏi sanga nyao’o ma repe masala singadolo manga j̱ala sa’i 'i 'acingi. 7 Sababu gena-ge, ananga 'aḏi 'aro’o manga ḏagilomu, la ma’u riono gola’a j̱ala sibalene toma oti romoḏiḏi ma dara. Oti romoḏiḏi gena-ge ma nyao’o 'i roma-romanga singadolo ma oti gena-ge sa’i jala. 8 Wakutu Simon 'a oḏi’i so’o gena, unanga 'o mapagara 'ai biono tala ra Yesus re 'o kanau, "Ma Jou, sisoi’i tala ḇato ngoi; sababu ngoi ngowa’a baraḏosa!"

9 Simon 'o kanau so’o gena-ge sababu unanga re manga ḏagilomu toma oti ma lelegu, ananga matai heranga sanga nyao’o lai repe. 10 So’o gena ḏi’i 'a Yakobus, re 'a Yohanes, ananga gena-ge Zebedeus 'ai ngowa’a ga’a ma oti rimoi ra Simon. Yesus 'o kanau ra Simon, "Mojongo awa! Mulaingi nange-ne Ngoi to doto’o ngana di’a no disa ngowa’a, la 'aḏi mete’e Ngoi ma tero sa’olo nange-ge ngana no j̱ala nyao’o."

11 Simon re 'ai ḏagilomu mo-moini, ananga ya iḏala manga oti toma talaga ma 'uḏu. Gena ḏua, ananga 'aḏi tagi ya sisoi’i tala 'ori i’a mo-moini kara 'aḏi mete’e Yesus.

Lucas 5:1-11

Yesus 'o sitogumu rato

22 Toma wangere rimoi, Yesus re 'Ai me-mete’e 'aḏi palene oti. Unanga 'o kanau i’a ra ananga, "Ino, ngene wo si’a da’a talaga kaci moi." Ḏua ananga 'aḏi sidete. 23 Wakutu ananga 'aḏi sidete Yesus 'o otu. Kage-kage rato 'i sapolo, momoku 'i baolo 'o oti ḇanyo ya dungosama singadolo sa’i jala re ananga toma bahala ma dara. 24 Yesus 'ai me-mete’e 'U tamanga Unanga, ananga 'aḏi tuduba, "Tuanga, Tuanga, ngene sanga bahala re ti’ara ua wo jala!" Dadi Yesus 'o momi’i, kara 'a ḇangata rato re momoku. Gena ḏua, rato re momoku 'i togumu re talaga gena-ge ri ogo-ogoro i’a. 25 Ḏua Unanga 'o kanau ra ananga, "I’a sa’olo ni ngaku Ngoi ua?"

Ananga 'aḏi heranga re 'aḏi matai mojongo re 'aḏi ma’u kanau matengo re matengo, "Unanga nena-ne 'o dadi 'oru! Singadolo rato re momoku ya mete’e Unanga 'ai parenta!"

Lucas 8:22-25

Yesus 'o sitogumu rato

Ananga 'aḏi heranga re 'aḏi matai mojongo re 'aḏi ma’u kanau matengo re matengo, "Unanga nena-ne 'o dadi 'oru! Singadolo rato re momoku ya mete’e Unanga 'ai parenta!"

Yesus 'o si-la ngowa’a matengo roh ma jira 'u dungosama

26 Yesus rai me-mete’e 'aḏi sidete turusu singadolo toma daeraha Gerasa, talaga Galilea ma kaci moi.

Lucas 8:22-26

12 Wakutu wangere sa’i ri soḏu, Yesus 'ai me-mete’e 'aḏi sapolo ra Unanga, re 'aḏi kanau, "Jobilaha Jou no soma’a ngowa-ngowa’a nena-ne 'aḏi tagi, la ananga nga’unu 'aḏi disa manga ngo-ngoromo re 'aḏi masiḏingoto toma gamu-gamu re daeraha-daeraha co-cori sababu ngi’i nena-ne 'i tiwongo."

13 Yesus 'a sangoro, "Ngini balasu pula’a oromo ananga."

'Ai me-mete’e 'aḏi kanau, "Ngomi minga roti pa’i ngai romotoa re minga nyao’o pa’i ngai ḏiḏi. Dadi ngomi balasu mi tagi tibo ngo-ngoromo di’a ngowa’a manga repe nena-ne!" 14 ('Age na-nau’u ḇato ḏa nga cala romotoa).

Yesus 'o kanau i’a Tai me-mete’e, "Soma’a ngowa’a repe nena-ne 'aḏi tegoro toropo moi-toropo moi, toropo moi ḏa nga nyagi romotoa."

15 Yesus 'ai me-mete’e ya si’a’a ma tero sa’olo 'a Yesus 'o soma’a ra ananga. 16 Gena ḏua, Yesus 'a 'oro roti ngai romotoa nange-ge re nyao’o ngai ḏiḏi, kara 'O talaḏi ie da’u diwanga re 'O sibere ie murasa ma la ra Ma Jou’ongu Madutu. Ḏua Unanga 'a poti-poti ma roti re 'A sibalangu nyao’o gena-ge, re 'A pula’a i’a Tai me-mete’e, la ananga ya sibalangu toma ngowa’a repe. 17 Ananga mo-moini 'aḏi oromo singadolo 'aḏi wunusu. Togumu i’a, Yesus 'ai me-mete’e ya lomu ngo-ngoromo ma jingianga ya sanga pipigu nyagi moi re romoḏiḏi.

Lucas 9:12-17

Didina’o heranga ma mulaingi: Laya molo’ara toma limau Kana

1 Toma wangere ma soi ro’ange toma limau Kana daeraha Galilea, 'age rema laya molo’ara. Toma laya gena-ge, Yesus 'ai ngina 'age ḏi’i. 2 Yesus re 'Ai me-mete’e ananga sanga saele ḏi’i toma laya madutu. 3 Wakutu toma laya gena-ge manga dodahe 'anggur ri moini, Yesus 'ai ngina mo kanau ra Yesus, "Ananga manga 'anggur ri moini."

4 Yesus 'a sangoro, "Meme, i’a sa’olo no siajele ra Ngoi?! Ma 'orasa enanga 'i ngadolo nyangu di’a Ngoi ta siajele toma ngowa-ngowa’a mangale Ngoi nena-ne 'a guna."

5 Mada’a Yesus 'ai ngina mo kanau i’a toma falalomu-falalomu, " 'A’a ḇato 'oru ga’a Unanga 'o kanau ra ngini."

6 Toma ngi’i gena-ge 'age tampayanga maḏi rarama, ga’a rimoi re rimoi nyengara sigonyo’o ḇanyo ḏa litere latu moi. Ḇanyo gena-ge ya sidodahe di’a ya sisoso’o manga giama re rou, mete’e Yahudi manga 'atoranga, la Ma Jou’ongu Madutu ya’u dawongo ananga. 7 Yesus 'o kanau toma falalomu-falalomu gena-ge, "Tampayanga-tampayanga na sigare ḇanyo." Ḏua ananga ya sigare ḇanyo singadolo roma-romanga. 8 Ḏua Yesus 'o kanau ra ananga, "Nange-ne ni falo ḇanyo toma tampayanga ceka’a ua re ni gasa i’a toma laya ma sae’e." Ḏua ananga ya si’a’a mete’e ma tero sa’olo Yesus 'o kanau.

9 Laya ma sae’e 'a tai’i ḇanyo gena-ge ga’a ri dadi 'anggur. Unanga masiretene 'a waro ua 'anggur gena-ge le’a ino, pa’i falalomu-falalomu masiretene ga’a ya falo ḇanyo gena-ge, ya waro. Ḏua laya ma sae’e 'o masebanga i’a toma geri molo’ara na-nau’u, 10 kara 'o kanau i’a ra unanga, "Biasa ḏua na’o laya so’o nena-ne, ngowa’a 'aḏi siḏagi siḏa 'anggur lai sa’i. Maha ngowa’a raḏi 'etolo, kara siḏagi 'anggur ma kuranga sa’i. Mada’a ngana no gogono 'anggur lai sa’i singadolo 'orasa nange-ne!"

11 Gena-ge Yesus 'ai didina’o heranga ma mulaingi re 'O 'a’a toma limau Kana, daeraha Galilea. Tai didina’o heranga gena-ge Unanga 'a sijumu 'Ai kuasa, dadi Unanga 'ai me-mete’e ananga 'aḏi ngaku Unanga.

João 2:1-11

6 (Yesus 'a waro 'oru ga’a Unanga 'o 'a’a, mada’a Unanga kanau so’o gena di’a 'O tai’i 'a Filipus 'ai ngo-ngaku.)

7 Filipus 'o sangoro, "Kalaha matengo re matengo sanga roti pa’i ceka’a ua, roti ma ijana pipisi salaka latu ḏiḏi mai ngadolo ua, di’a ngowa’a manga repe nena-ne."

8 Yesus 'ai me-mete’e ma lelegu, 'a Andreas (unanga re 'a Simon Petrus gia nongoḏu) unanga 'o kanau, 9 " 'Ane ngowa 'olo na-nau’u matengo unanga rai roti ngai romotoa re 'ai nyao’o ngai ḏiḏi. Mada’a, tantu ḏua enanga gena-ge 'i ngadolo ua di’a ngowa’a repe nena-ne!"

10 Yesus 'o kanau, "Ngini ni soma’a ananga mo-moini 'aḏi tegoro tala." Sababu tana’a gena-ge rurubu mitanga, dadi ananga mo-moini nyengara 'aḏi tegoro tala. Ngowa-ngowa’a gena-ge na-nau’u ḇato ḏa nga cala romotoa. 11 Gena ḏua, Yesus 'a 'oro roti gena-ge re 'O sibere ie murasa ma la ra Ma Jou’ongu Madutu, kara 'A sibalangu roti gena-ge toma ngowa’a repe. So’o gena ḏi’i nyao’o gena-ge. Dadi ngowa’a repe 'aḏi oromo singadolo 'aḏi matai wunusu mo-moini. 12 Wakutu ananga mo-moini raḏi oromo singadolo 'aḏi wunusu Yesus 'o kanau Tai me-mete’e, "Ni lomu roti ma jingianga, la awa singadolo budiga." 13 Wakutu ananga ya lomu ma jingianga togumu ḏua, ma jingianga gena-ge 'i roma-romanga pipigu nyagi moi re romoḏiḏi.

João 6:6-13

19 Wakutu ananga 'aḏi amono ma giḏanga ḏa kilo romotoa bolo kilo rarama, ananga 'aḏi oḏi’i Yesus 'o sapolo 'o tagi toma ḇanyo ma re’u 'a meta-meta ino manga oti. Ananga 'aḏi matai mojongo masala. 20 Mada’a Unanga 'o kanau ra ananga, "Ngoi nena-ne, mojongo awa." 21 Ḏua remanga 'akala re sinyingara sa-sanangi ananga 'aḏi dawongo Yesus tamanga oti ma dara. Toma 'orasa gena-ge ḏua, kage-kage ananga raḏi ngadolo toma talaga ma 'uḏu, ngi’i ga’a ananga mau 'aḏi ngadolo.

João 6:19-21

Yesus 'o masijumu Tai me-mete’e nga tumudingi

1 Togumu i’a, Yesus 'o masijumu soi moi moju Tai me-mete’e toma talaga Tiberias. 2 Toma 'orasa gena-ge, Simon Petrus, Tomas (ga’a si’aro’o Ngowa’a Sa-salanga), Natanael toma limau Kana ino daeraha Galilea, 'a Zebedeus 'ai ngowa’a nau’u nga muḏiḏi re Yesus 'ai me-mete’e ma lelegu nga muḏiḏi, ananga mo-moini gena-ge 'aḏi malomu. 3 Simon Petrus 'o kanau ra Yesus 'ai me-mete’e ma lelegu, "Ngoi to tagi disa nyao’o."

Ananga gena-ge ya sangoro, "Ngomi mi mete’e ḏi’i." Dadi ananga mo-moini 'aḏi mabalene toma oti re 'aḏi disa nyao’o. Mada’a utu moi siwangere ananga kama sanga 'oru rimoi mai ua. 4 Da-daini i’a ma wangere sa’i ri pilata, ananga 'aḏi oḏi’i ngowa’a matengo 'o made-de’oso toma talaga ma 'uḏu, mada’a ananga 'aḏi waro ua, gena-ge Yesus.

5 Yesus 'o sano i’a ra ananga, " 'Ari ḏagilomu, ngini ni kate bolo moa?"

Ananga ya sangoro, "Moa!"

6 Yesus 'o kanau ra ananga, "Na upa’a ninga j̱ala taninga oti ma kuwiḏa i’a, la ni sanga nyao’o." Dadi ananga ya upa’a manga j̱ala mete’e sa’olo Yesus 'o siajele ra ananga. Ḏua ananga ya nga’unu ua ya taba’a j̱ala gena-ge, sababu nyao’o repe woḏi.

7 Ḏua Yesus 'ai me-mete’e matengo ga’a Unanga 'o dadalara, 'o kanau ra Petrus, "Unanga gena-ge Ma Jou!" Wakutu Simon Petrus 'a 'isene, "Unanga gena-ge Ma Jou," unanga jau-jau 'o pake 'ai juba 'a sipiri’u tai golona (sababu 'au nange unanga 'a woi’i 'ai baju) kara 'o masipoini toma ḇanyo. 8 Yesus 'ai me-mete’e ma lelegu ananga 'aḏi amono sisa talaga ma 'uḏu 'aḏi siduu’u 'a Petrus re ya taba’a manga j̱ala 'i romanga reo nyao’o. Ananga 'aḏi kiḏanga ua toma talaga ma 'uḏu ma giḏanga ḏa metere latu moi. 9 Wakutu ananga 'aḏi 'uci tamanga oti ino, ananga 'aḏi oḏi’i 'age rema nyao’o 'osumu toma u’u ga’a 'i si’a’a reo konu’u, re 'o roti ḏi’i.

10 Yesus 'o kanau ra ananga, "Ino ni gasa nyao’o ngai muḏuo i’a ga’a aro na sanga."

11 Dadi Simon Petrus dadunu 'o mabalene toma oti, kara 'a taba’a manga j̱ala. Re j̱ala gena-ge 'i romanga reo nyao’o ma pa-pako: ma ngai latu moi re nyagi romotoa re ngai ro’ange. Kalaha so’o gena-ge, manga j̱ala 'i 'acingi ua.

João 21:1-11

Libertações

Jesus expulsou demônios com autoridade. Os espíritos impuros não resistiam à sua palavra e saíam imediatamente.

Yesus 'o si-la Roma ma sordado ma sae’e matengo 'ai falalomu

5 Wakutu Yesus 'o osama toma limau Kapernaum, Roma ma sordado ma sae’e matengo 'o sapolo ra Yesus 'o golo’o, la Yesus 'o riono unanga. 6 Unanga 'o kanau, "Jou, 'ari falalomu 'o siḏi toma wala, unanga 'o lu-lulu tai jingi’i re 'a cokutu 'ai lese mai nga’unu ua, sababu 'o basono tala lai si-siḏi madutu."

7 Yesus 'o kanau, "Ngoi to sapolo to si-la unanga."

8 Roma ma sordado ma sae’e gena-ge 'o sangoro i’a ra Yesus, "Jou, so’o gena-ge awa! Sababu ngoi to patasa ua to dawongo Jou tari wala. Jou, pa’i No siajele demo bale moi ḇato re 'ari falalomu ro la. 9 Sababu ngoi ḏi’i mai balasu to 'isene 'ari sae’e 'ai parenta. Re 'ari aḏutala sordado-sordado ananga ḏi’i balasu 'aḏi mete’e 'ari parenta. Na’o ngoi to soma’a 'ari aḏutala matengo, ‘Tagi!’ unanga 'o tagi, re na’o to 'aro’o 'ari aḏutala ma lelegu ‘Ino 'ane!’ unanga 'o sapolo ino. Na’o ngoi to soma’a 'ari budaka ‘No 'a’a ne!’ unanga ḏi’i 'o 'a’a."

10 Wakutu Yesus 'a 'isene Roma ma sordado ma sae’e 'o kanau so’o gena-ge togumu i’a, Unanga 'o heranga masala. Dadi Unanga 'o kanau i’a toma ngowa’a repe ga’a 'aḏi mete’e Unanga, "Ni ngaku mode-mode’e 'Ari demo-demo nena-ne: Toma ngowa’a Israel manga sigolona, Ngoi to sanga matengo i’a mai nyangu, ga’a 'ai ngo-ngaku ma de’e so’o nena-ne. 11 Mode’e! Ngowa’a Yahudi ua manga repe ḏuanga i’a 'aḏi sapolo da’a wangere ma la’o ino re toma wangere ma soḏu isa di’a oromo mamete’e rea Abraham, Ishak re Yakub toma Soroga ma Pareta. 12 Momongolo ua ngowa’a Yahudi manga repe ga’a Ma Jou’ongu Madutu ro cumutu di’a dadi 'Ai 'umata, ananga gena-ge ḏuanga i’a 'aḏi sanga upa’a toma ngi’i hafu-hafu toma ḏuḏunu. Toma ngi’i gena-ge ananga ḏuanga i’a ya rerese ma gaḏi re ya doiti ma sangisara."

13 Ḏua Yesus 'o kanau i’a toma Roma ma sordado ma sae’e gena-ge, "No maḏibo, 'oru ga’a ngana na ngaku, gena-ge ḏua 'i dadi."

Re toma 'orasa gena-ge ḏua 'ai falalomu ro la.

Mateus 8:5-13

Yesus 'o si-la ngowa’a nga muḏiḏi ga’a roh ma jira ya’u dungosama

28 Wakutu Yesus 'o ngadolo da’a talaga kaci moi toma daeraha Gadara, ngowa’a nga muḏiḏi ga’a roh ma jira ya’u dungosama 'aḏi supu da’a toma kubu ma 'aḏu’u ino re 'aḏi sapolo ra Yesus. Ananga nga muḏiḏi gena-ge 'aḏi pona lai cira madutu singadolo manga ngi’i gena-ge, matengo i’a mai ua nga’unu tola’a i’a. 29 Ananga 'aḏi maboa-boa’a, "Ma Jou’ongu Madutu 'ai Ngowa’a Nau’u, 'Ani maksudu 'oru ra ngomi? Kalaha ma 'orasa ngadolo nyangu, Ngana no mau sisikisa ngomi?"

30 Kiḏanga ua toma ngi’i gena-ge 'age rema soto ma repe 'i disa ngo-ngoromo. 31 Roh-roh ma jira gena-ge 'i golo’o ra Yesus, "Na’o no soma’a ngomi mi supu, soma’a mi osama toma soto-soto gena-ge."

32 Yesus 'o kanau, "Supu!" Dadi roh-roh ma jira gena-ge 'i supu toma ngowa’a nga muḏiḏi, re 'i osama toma soto-soto. Ḏua, ma soto enanga 'i masiwale toma bawata ma 'uḏu singadolo masieta’a toma talaga, ḏua ri jala.

33 Soto ma sowohi ananga matai lalara sapolo toma limau re ya sijarita 'oru ga’a 'i dadi gena-ge, re ya sijarita ḏi’i mangale 'oru ga’a 'i dadi toma ngowa’a nga muḏiḏi ga’a roh ma jira ya’u dungosama. 34 Dadi ngowa-ngowa’a mo-moini toma limau gena-ge 'aḏi sapolo ma’u sanga ra Yesus. Wakutu ananga 'aḏi oḏi’i Yesus, ananga 'aḏi golo’o mode-mode’e, la Yesus jau-jau sisoi’i tala ananga manga daeraha gena-ge.

Mateus 8:28-34

Yesus 'o si-la ngowa’a mou matengo

32 Wakutu ananga nga muḏiḏi gena-ge ga’a aro raḏi la 'aḏi tagi, 'age rema ngowa’a 'aḏi gasa ino ra Yesus ngowa’a mou matengo ga’a roh ma jira 'u dungosama. 33 Yesus 'a dusu’u roh ma jira gena-ge. Re toma 'orasa gena-ge ḏua, ngowa’a mou nga’unu ro kanau. Ngowa’a repe 'aḏi matai heranga re 'aḏi kanau, "Soi moi nyangu, ngomi oḏi’i ga’a hera-heranga ma duhu so’o nena-ne toma Israel!"

Mateus 9:32,33

Ngowa’a Farisi 'aḏi ta’ajiri Yesus 'ai kuasa ra Beelzebul ino

22 Gena ḏua, ananga 'aḏi gasa ino ra Yesus, ngowa’a matengo 'o hafu re 'o mou sababu 'o roh ma jira 'u dungosama. Yesus 'o si-la unanga gena-ge singadolo unanga 'o oḏi’i re 'o kanau ri nyengara.

Mateus 12:22

We-were’a Yahudi ua matengo 'ami ngo-ngaku

21 Gena ḏua, Yesus 'a sisoi’i tala ngi’i gena-ge, re 'O tagi toma daeraha co-cori limau Tirus re limau Sidon. 22 We-were’a Kanaan matengo toma daeraha gena-ge mo sapolo ra Yesus re mo poa-poa’a, "Ma Jou, 'Olana Daud 'ai ju’uda, No sijumu 'Ani 'akala re sinyingara ma la-la ra ngoi! 'Ari ngowa’a were’a roh ma jira mi dungosama, dadi munanga mo sangisara masala."

23 Yesus kama kanau bale moi i’a mai ua toma we-were’a gena-ge. Dadi 'Ai me-mete’e 'aḏi sapolo ra Unanga re 'aḏi kanau, "Jou, soma’a we-were’a gena-ge mo tagi, munanga mo 'a’a nyiwere ra ngene nanga ḏuḏunu."

24 Yesus 'a sangoro toma we-were’a gena-ge, "Ngoi pa’i sanga 'utusu toma ngowa-ngowa’a Israel ḇato ga’a ma tero sa’olo doba ga’a 'i iranga ngo’omo."

25 We-were’a gena-ge sapolo mo maḏipolono ra Yesus 'ai biono re mo kanau, "Ma Jou no riono ngoi!"

26 Yesus 'a sangoro, "Enanga 'i rousu ua wo 'oro ngowa 'olo manga ngo-ngoromo, kara wa pula’a di’a nunu’u."

27 We-were’a gena-ge mo kanau, "Tero mode’e Ma Jou, mada’a nunu’u mai 'i sanga oromo ngo-ngoromo ma so-sorono ga’a 'i eta’a tala ra madutu 'ai meja ma 'aḏu."

28 Ḏua Yesus 'o kanau i’a ra munanga, "Meme 'ani ngo-ngaku lai lamo’o. Sababu gena-ge, 'oru ga’a ngana ni mau, enanga 'i dadi." Toma 'orasa gena-ge ḏua, 'ami ngowa’a were’a remo la.

Mateus 15:21-28

Yesus 'o si-la ngowa 'olo matengo roh ma jira 'u dungosama

14 Wakutu Yesus re 'Ai me-mete’e nga ḏu’ange ananga 'aḏi maḏibo i’a toma ngowa’a kawasa gena-ge, na-nau’u matengo 'o sapolo re 'o maḏipolono ra Yesus 'ai biono. 15 Unanga 'o kanau, "Jou, no sijumu 'Ani 'akala re sinyingara ma la-la tari ngowa’a na-nau’u. Unanga 'o sarasone re 'o basono sangisara lai siḏi. Dadi soi rai o’o i’a unanga 'o eta’a toma u’u re toma ḇanyo. 16 Ngoi reto gasa unanga Tani me-mete’e, mada’a unanga ananga 'u si-la yoḏu’u."

17 Yesus 'a sangoro, "Ngini mode-mode’e ngowa-ngowa’a ga’a ni ngaku Ngoi ua re ni iranga ninga ngo’omo! Singadolo ma di’ara ngau moju, Ngoi balasu to tegoro marimoi ra ngini?! Singadolo ma di’ara ngau moju, Ngoi to sidodai 'Ari 'akala ḇanyo ra ngini?! Gasa ino ngowa 'olo gena-ge!" 18 Gena ḏua, Yesus 'a soma’a roh ma jira, ga’a 'i osama toma ngowa 'olo gena-ge, 'i supu. Dadi roh ma jira gena-ge 'i supu. Toma 'orasa gena-ge ḏua, ngowa 'olo gena-ge ro la.

Mateus 17:14-18

23 Toma 'orasa gena-ge, 'age rema ngowa’a matengo 'o roh ma jira 'u dungosama 'o osama toma wala puji ma dara, re 'o mapataha re 'o kanau. 24 "Ngana no 'a’a 'oru ra ngomi? He, Yesus ngowa’a Nazaret, Ngana no sapolo mau sijira ngomi? Ngoi ta waro Ngana gena-ge 'a guna: Ngana Ngowa’a 'Ofi-'Ofi da’u ra Ma Jou’ongu Madutu tala."

25 Yesus 'o sikanga, "Masiogoro! No supu toma ngowa’a gena-ge!"

26 Gena ḏua, roh ma jira 'u elala siduga-duga singadolo 'ai iḏingi ma jira mai supu, kara enanga 'i mawoi’i toma ngowa’a gena-ge.

Marcos 1:23-26

Yesus 'o si-la ngowa’a matengo roh ma jira 'u dungosama

1 Pasala i’a, Yesus re 'Ai me-mete’e 'aḏi ngadolo da’a kaci moi toma talaga Galilea, toma daeraha Gerasa. 2 Ananga aro 'uci toma oti ino, na-nau’u matengo 'o supu toma kubu ma aḏu’u ino, 'u jau i’a Yesus. 3 Ngowa’a gena-ge 'o roh ma jira 'u dungosama, re 'o tegoro toma kubu ma daeraha; 'u piri’u bolo 'u rate unanga mai yoḏu’u. 4 Ma jelele ḏua, Unanga 'o sanga lara mada’a ma rate tai giama 'a tola-tola’a re ma besi tai rou 'a rapo-rapo’o. Unanga 'o te’e madutu, matengo ua nga’unu 'u tahana. 5 Lobi’i re wangere, unanga 'o maroka-roka toma kubu ma daeraha re toma sau-sau, 'o maboa-boa’a re 'a sinya-nyaboto 'ai lese re 'o maḏi.

6 Toma giḏanga moju unanga 'o oḏi’i Yesus, 'o lalara 'o jau i’a 'o mapagara 'ai biono tala ra Unanga 'ai rou. 7,8 Wakutu, Yesus 'o kanau i’a toma ngowa’a gena-ge, "Roh ma jira, no supu toma ngowa’a nena-ne," roh ma jira 'i kanau ma iḏingi ya siduga-duga, "Rini 'oru ngoi, Yesus, Ma Jou’ongu Madutu toma Gau’u 'Ai Ngowa’a Nau’u? Ngoi to madigaro’o ra Ma Jou’ongu Madutu 'ai lomanga, awa no sijira ngoi."

9 Ḏua Yesus 'o sano unanga, " 'Ani lomanga 'a guna?" Roh ma jira 'i sangoro, "Ngoi 'ari lomanga ‘Repe’ sababu ngomi roh ma jira lami repe." 10 Unanga 'o madigaro’o tau-taunu ra Yesus, la Unanga 'o sisupu awa roh-roh ma jira toma daeraha gena-ge.

11 Co-cori toma ngi’i gena-ge, 'o soto ma repe, ḏa cala ḏiḏi i’a, 'i disa ma ngo-ngoromo toma sau ma gagoro. 12 Roh ma jira gena-ge 'i madigaro’o ra Yesus, "Soma’a ngomi mi mangosama toma soto gena-ge." 13 Re Unanga 'o nyengara. Dadi roh-roh ma jira gena-ge 'i supu toma ngowa’a nange-ge, re 'i mangosama toma soto. Soto mo-moini 'i wiḏi i’a toma bawata ma 'uḏu re 'i maḏupaka toma talaga ma dara singadolo ri jala.

14 Soto ma sowohi-sowohi gena-ge 'aḏi lalara re sihabari toma limau re toma gamu ma sebanga. Ḏua ngowa’a 'aḏi matai supu 'aḏi oḏi’i 'oru re 'i dadi pasala ḏua.

Marcos 5:1-14

11,12 Mada’a ngini ni sidoto’o so’o ne: 'A guna ḇato nyengara 'o kanau tai ḇaḇa bolo ngina ‘Ngoi to riono ngini yoḏu’u sababu ngoi to pula’a mo-moini ma tero sa’olo jou-jou ra Ma Jou’ongu Madutu.’ Dadi ngini ni dola’aku unanga 'o riono 'ai ḇaḇa re ngina. 13 Sababu ngini ni doto’o so’o nena-ne, ni singi-ngiranga Ma Jou’ongu Madutu 'ai parenta. 'Age Ma Jou’ongu Madutu 'ai parenta ma repe moju, ngini na singi-ngiranga ma tero sa’olo nena-ne ḏi’i."

'Oru ga’a si’a’a ngowa-ngowa’a 'aḏi dadi najis ra Ma Jou’ongu Madutu 'ai momina

14 Ḏua Yesus 'o 'aro’o ngowa’a repe gena-ge soi moi moju re 'O kanau ra ananga, "Ni 'isene la-la, la ni sahe!" 15 'Oru ḇato ga’a 'i osama toma lese, enanga gena-ge 'i si’a’a ua ngowa’a matengo 'o dadi najis ra Ma Jou’ongu Madutu 'ai momina. Siḏibo ḏi’i, 'oru ga’a 'i supu toma lese, enanga gena-ge 'i si’a’a ngowa’a matengo 'o dadi najis ra Ma Jou’ongu Madutu 'ai momina. [

Marcos 7:11-15

Were’a Yunani matengo 'ami ngo-ngaku lai te’e

24 Gena ḏua, Yesus 'a sisoi’i tala ngi’i gena-ge re 'o tagi so’o toma daeraha co-cori limau Tirus. Unanga osama toma wala ḏu moi re 'O oḏu’u ngowa’a ya waro Unanga 'age toma ngi’i gena-ge. Mada’a ngowa’a ya waro ḇato. 25,26 Ngowa 'olo were’a matengo 'o roh ma jira mi dungosama. Munanga 'ami ngina ngowa’a Yunani mo sibuoro toma daeraha Fenisia toma Siria. Ngina gena-ge mo 'isene mangale Yesus, munanga jau-jau mo sapolo re mo mapagara 'ami biono tala ra Yesus 'ai rou. Munanga mo madigaro’o Unanga 'o dusu’u roh ma jira tami ngowa 'olo were’a gena-ge.

27 Yesus 'o kanau ra munanga, "Ngowa 'olo-ngowa 'olo balasu oromo siḏa. Rousu ua, na’o wo 'oro ngowa 'olo manga roti, kara wa pula’a toma nunu’u."

28 We-were’a gena-ge mo kanau, "Tero mode’e Jou, mada’a 'o nunu’u enanga toma meja ma 'aḏu mai oromo, na’o ngowa 'olo manga so-sorono 'i eta’a tala!"

29 Ḏua Yesus 'o kanau ra munanga, "Sababu 'ani sa-sangoro so’o gena, roh ma jira 'i supu ḏua tani ngowa’a were’a. Dadi no maḏibo ḇato."

30 Ngina gena-ge mo maḏibo toma wala. Munanga mo sanga i’a 'ami ngowa 'olo were’a gena-ge re mo otu toma dederu re mode-mode’e roh ma jira 'i supu ḏua ra munanga.

Marcos 7:24-30

17 Toma ngowa’a repe manga sigolona, 'age rema ngowa’a matengo 'o masiajele, "Guru, ngoi to gasa 'ari ngowa’a ra Guru. Unanga 'o mou sababu 'o roh ma jira 'u dungosama. 18 Wakutu unanga 'ai si-siḏi 'i sapolo 'a sibau-bau’u 'ai lese toma tana’a, 'ai sopu’u 'i pa’ala, 'ai ngiḏi 'i kirioto, ḏua 'ai lese cokutu 'i yoḏu’u. Ngoi to golo’o Tani me-mete’e ya dusu’u roh ma jira gena-ge, mada’a ananga nga’unu ua ya dusu’u."

19 Ḏua Yesus 'o kanau i’a ra ananga, "Ngini mode-mode’e ngowa-ngowa’a ga’a ni ngaku Ngoi ua! Singadolo ma di’ara ngau moju, Ngoi balasu to tegoro marimoi ra ngini?! Singadolo ma di’ara ngau moju, Ngoi to sidodai 'Ari 'akala ḇanyo ra ngini?! Gasa ino ngowa 'olo gena-ge!" 20 Gena ḏua, ananga 'aḏi gasa i’a ngowa 'olo gena-ge ra Yesus.

Wakutu roh ma jira 'i waro Unanga gena-ge 'a Yesus, enanga 'i 'a’a ngowa 'olo gena-ge 'ai lese 'i ḏaba-ḏaba’a singadolo 'o ruba lulu ie toma tana’a re 'ai sopu’u 'i pa’ala.

21 Ḏua Yesus 'o sano toma ngowa 'olo gena-ge 'ai ḇaḇa, "Ma di’ara sa’olo ḏua, enanga 'i 'a’a so’o nena-ne?"

Ma ḇaḇa 'a sangoro, "Wakutu unanga 'o ce-ceka’a i’a moju! 22 Ma jelele ḏua, roh ma jira gena-ge mau 'u sisengene unanga: soi rai o’o i’a 'o ruba toma u’u ma dara, soi rai o’o i’a 'o ruba toma ḇanyo ma dara. Na’o Jou no nga’unu No si’a’a 'ori i’a ḇato, No sijumu dadalara ra ngomi re No riono ngomi!"

23 Yesus 'o sangoro, "I’a sa’olo no aje, ‘Na’o Jou no nga’unu?’ Mo-moini nyengara 'i dadi ra guna ḇato na’o ni ngaku Ngoi!"

24 Kage-kage, ma ḇaḇa 'o kanau 'a siduga-duga, "Jou, ngoi to ngaku mada’a 'ari ngo-ngaku 'i te’e ua! Riono ngoi, la 'ari ngo-ngaku lebe te’e."

25 Wakutu Yesus 'o oḏi’i ngowa’a manga repe 'aḏi sapolo ḏi’i, Unanga 'o sikanga roh ma jira gena-ge, "Roh popongolo re roh mou, masupu toma ngowa 'olo nena-ne re osama rawara ra unanga!"

26 Roh ma jira gena-ge 'i poa’a re 'i 'a’a ngowa 'olo gena-ge 'ai lese 'i ḏaba-ḏaba’a lai siḏi kara 'i masupu. Ngowa 'olo gena-ge 'ai lese ma tero sa’olo maiyeti singadolo ngowa’a mo-moini 'aḏi kanau, "Unanga ro sengene!" 27 Mada’a Yesus 'u riono re 'a gu’u 'ai giama kara 'u simomi’i ngowa 'olo gena-ge, ḏua unanga ro momi’i.

Marcos 9:17-27

Yesus 'o si-la ngowa’a siḏi manga repe

38 Yesus 'a sisoi’i tala wala puji gena-ge re 'O tagi ra Simon 'ai wala. Toma wala gena-ge 'age Simon 'ai dedono we-were’a mo gagama lai siḏi. Dadi ngowa-ngowa’a 'aḏi golo’o Yesus si-la munanga. 39 Yesus 'o tagi sebanga i’a ra munanga 'ami jingi’i re 'a soma’a 'ami si-siḏi gagama 'i mawoi’i. Dadi gagama gena-ge ri iranga re munanga mo la, kara mo momi’i re mo de-de’oso ananga.

Lucas 4:38,39

27-29 'Age rema ngowa’a matengo ga’a roh ma jira 'u dungosama da’a toma limau ino. Ma di’ara ḏua unanga gena-ge kai pakeanga ua re 'o tegoro ua tai wala mada’a unanga pa’i 'o tegoro toma kubu ma aḏu’u. Ma jelele ḏua roh ma jira 'u dungosama. Re kalaha ngowa’a 'aḏi jaga-jaga unanga re 'ai rou re 'ai giama ya rate, nga’unu 'a tola’a sababu roh ma jira 'u ḏegoro kara gasa unanga toma ngi’i ga-garura. Wakutu Yesus waro 'o 'uci toma oti, ngowa’a gena-ge 'o jau i’a Unanga. Wakutu 'o oḏi’i 'a Yesus, unanga 'o poa’a kara 'o mapagara 'ai biono tala ra Unanga. Yesus 'o parenta roh ma jira 'i supu toma ngowa’a gena-ge, kara ngowa’a gena-ge 'o kanau, "Yesus, Ma Jou’ongu Madutu toma Gau’u 'ai Ngowa’a Nau’u! Rini 'a’a 'oru ngoi? Ngoi to maḏigaro’o, awa no sijira ngoi!"

30 Yesus 'o sano toma ngowa’a nena-ne, " 'Ani lomanga 'a guna?"

"'Ari lomanga 'a Legion." Unanga gena-ge 'a sangoro so’o gena sababu ra unanga 'ai lese roh ma jira ma repe 'u dungosama. 31 Roh-roh ma jira 'i maḏigaro’o ra Yesus awa dusu’u enanga sieta’a toma maut ma ngabanga.

32 Co-cori toma ngi’i gena, 'age rema soto duo-duono rimoi 'i disa oromo toma sau ma gagoro. Roh-roh ma jira gena-ge 'i maḏigaro’o ra Yesus nga’unu gari’a Unanga 'o pula’a watasa, la enanga 'i osama toma soto-soto gena-ge. Ḏua Yesus 'o nyengara. 33 Dadi roh-roh ma jira gena-ge 'i supu toma ngowa’a gena-ge, kara 'i mangosama toma soto. Soto mo-moini 'i masija’olo wiḏi toma bawata ma 'uḏu re 'i maḏupaka toma talaga ma dara singadolo ri jala mo-moini.

34 Wakutu sowohi-sowohi soto ya oḏi’i 'oru ri dadi pasala ḏua, ananga 'aḏi lalara sihabari toma limau re toma gamu ma sebanga. 35 Ḏua ngowa’a 'aḏi matai supu 'aḏi oḏi’i 'oru ri dadi pasala ḏua. Ananga gena-ge 'aḏi sapolo ra Yesus re 'aḏi sanga i’a ngowa’a ga’a roh ma jira 'u dungosama, ri masupu ra unanga re 'o madi-dirini co-cori ra Yesus 'ai rou. Unanga ro mapake pakeanga, re 'ai fikirana ri ḏibo la-la, singadolo ananga matai mojongo.

Lucas 8:27-35

27 Ni ngaku mode-mode’e 'Ari demo-demo nena-ne: Taninga sigolona 'age rema ngowa’a 'aḏi 'ahu-'ahu moju re 'aḏi oḏi’i Ma Jou’ongu Madutu mulaingi 'o parenta sa’olo 'Olana."

'U simulia Yesus

28 Yesus 'o doto’o gena-ge palisi’i i’a ḏa migu rimoi, Unanga 'o gasa 'a Petrus, 'a Yohanes re 'a Yakobus sie toma kie rimoi ma tubu di’a manyiata. 29 Yesus 'o manyiata si’olona i’a, 'Ai biono ri ngali, re 'Ai pakeanga 'i dadi buḏo jama-jamanga. 30,31 Kage-kage ngowa’a nga muḏiḏi, matengo 'a Musa re matengo ḏi’i 'a Elia, ananga gena-ge 'aḏi masijumu remanga cahaya da’u soroga tala. Ananga 'aḏi ma’u kanau ra Yesus mangale 'Ai se-sengene ga’a ma 'orasa ti’ara riwara 'i ngadolo toma limau Yerusalem.

Lucas 9:27-31

32 Toma 'orasa gena-ge Petrus re 'ai ḏagilomu ananga 'aḏi otu, mada’a kage-kage raḏi wangolo, re 'aḏi oḏi’i i’a Yesus rai cahaya 'o made-de’oso sebanga ra Elia re 'a Musa. 33 Wakutu 'a Elia re 'a Musa 'aḏi tagi sa’i sisoi’i tala 'a Yesus, Petrus 'o kanau i’a ra Yesus, "Tuanga, mode-mode’e sanangi masala ngi’i nena-ne. Na’o nyengara gari’a ngomi side’oso suyu’u ḏu ro’ange: ḏu moi di’a Jou, ḏu moi di’a Musa re ḏu moi ḏi’i di’a Elia." (Petrus 'o kanau so’o gena, mada’a unanga masiretene 'a sahe ua 'oru ga’a unanga 'o kanau.)

Lucas 9:32,33

38 Toma ngowa’a repe manga sigolona, 'age rema na-nau’u matengo 'o mapataha, "Guru, riono 'ari ngowa’a, 'ari ngowa’a duga-duga pa’i unanga matengo! 39 Soi rai o’o i’a roh ma jira 'i ḏegoro unanga singadolo 'o poa’a, re 'ai lese 'i rofu-rofu, singadolo 'ai sopu’u 'i pa’ala. Roh ma jira gena-ge 'i masupu ua re 'i mau sijira unanga. 40 Ngoi to maḏigaro’o ḏua Tani me-mete’e ya dusu’u roh ma jira, mada’a ananga nga’unu ua ya dusu’u."

41 Yesus 'o sangoro, "Ngini mode-mode’e ngowa-ngowa’a ga’a ni ngaku Ngoi ua, re ni iranga ninga ngo’omo! Singadolo ma di’ara ngau moju, Ngoi balasu to tegoro marimoi ra ngini?! Singadolo ma di’ara ngau moju, Ngoi to sidodai 'Ari 'akala ḇanyo ra ngini?! Gasa ino 'ani ngowa 'olo gena-ge!"

42 Wakutu ngowa 'olo gena-ge 'o tagi jau ino ra Yesus, roh ma jira 'i sibau’u unanga singadolo 'ai lese rimoi 'i rofu-rofu. Mada’a Yesus 'a soma’a roh ma jira gena-ge 'i supu ra unanga re unanga 'o la. Togumu i’a, Yesus 'o siḏibo ngowa 'olo gena-ge tai ḇaḇa. 43 Ngowa’a repe matai heranga ya oḏi’i kuasa ra Ma Jou’ongu Madutu tala.

Yesus 'o masiajele mangale 'Ai se-sengene ma soi ḏiḏi

Wakutu ngowa’a repe 'aḏi hera-heranga moju ya oḏi’i 'oru ga’a 'i dadi ḏua, Yesus 'o kanau Tai me-mete’e,

Lucas 9:38-43

Ngowa’a 'aḏi ta’ajiri Yesus 'ai kuasa ra Beelzebul ino

14 Toma wange rimoi, Yesus 'o dusu’u roh ma jira toma ngowa’a mou matengo. Wakutu roh ma jira 'i supu ngowa’a mou gena-ge 'o kanau 'i nyengara. Ḏua ngowa’a repe 'aḏi matai heranga

Lucas 11:14

50 Ḏua 'Ai me-mete’e matengo 'a tuono 'ai samaranga re 'a cafa 'a 'imam 'agung 'ai budaka 'ai ngau’u ma kuwiḏa singadolo 'i tola’a.

51 Mada’a Yesus 'o kanau, "Gena ḏua!" Togumu i’a, Yesus 'a cigi budaka gena-ge 'ai ngau’u ri la.

Lucas 22:50,51

24 Yohanes 'ai me-mete’e 'aḏi tagi palisi’i i’a, Yesus 'o kanau toma ngowa’a repe mangale 'a Yohanes ma betongo so’o ne: "Ngini ni tagi toma daeraha baulaco di’a ni oḏi’i 'oru? Sanga ua, ngini ni tagi oḏi’i matengo ga’a 'o sitaka-taka mangale 'ai habari ma tero sa’olo rurubu ma so’a ngai moi ga’a karawiana ya wusu! 25 Dadi ngini ni tagi di’a ni oḏi’i 'oru? Ngowa’a matengo ga’a mapake rousu? Sanga ua! Sababu ngowa’a ga’a mapake rousu re manga 'ahu pai-pai’i 'aḏi tegoro toma kadato. 26 Dadi ngini ni tagi di’a ni oḏi’i 'oru? Nabi? Tero mode’e! Sidogo ḏi’i, unanga gena-ge lebe la-lamo’o i’a reo nabi ma siḏa-siḏa i’a! 27 Sababu toma Boku 'Ofi-'Ofi 'age rema bu-bula’a nena-ne 'i silefo mangale 'a Yohanes ga’a Ma Jou’ongu Madutu 'o kanau so’o ne:

‘Nena-ne Ngoi 'ari so-soma’a. Ngoi ḏuanga i’a to 'utusu unanga siḏa kara Ngana,

la unanga ḏuanga i’a 'a sidodahe ngo’omo di’a Ngana.’ "

28 Yesus 'o dadunu kanau, "Ngoi to siajele ra ngini nena-ne: Toma dungia nena-ne matengo i’a mai ua ga’a sibuoro lebe la-lamo’o i’a rea Yohanes tukanga baptis. Mada’a mulaingi nange-ne, ngowa’a ma pake ua ga’a 'o osama nyo-nyoimi ra Ma Jou’ongu Madutu 'ai Pareta, unanga gena-ge 'o dadi ngowa’a lebe la-lamo’o i’a rea Yohanes."

29 Rayata mo-moini (sidogo ngowa’a golo-golo’o balastengi) ga’a 'a Yohanes ya’u baptis, ananga gena-ge 'aḏi dawongo Yesus 'ai demo-demo mangale Yohanes 'i banari. 30 Mada’a ngowa’a Farisi re guru-guru 'agama 'aḏi oḏu’u 'a Yohanes ya’u baptis sababu ananga gena-ge 'aḏi dawongo ua Ma Jou’ongu Madutu 'ai 'akala ma mau di’a ananga.

Lucas 7:24-30