Milagres de Jesus

Yesu lasengulunga bantu babili bashipilwa

27 Mpwalikufumako, bantu bashipilwa babili balamukonkela nekutatika kubilikisheti, "Amwe Yesu mwanendi Dafeti, tunyumfwilekoni nkumbo!" 28 Yesu mpwalengila mung’anda bashipilwa babili basa balesa kulyendiye. nendi walabepusheti, "Sena mwashometi ngandimusengula?" Naboyo balakumbuleti, "Ee twashoma Nkambo."

29 Yesu walabekata mumenso, ne kwambeti, "Cinshike kwelana ne lushomo lwenu." 30 Popelapo menso abo alacaluka, balacikonsha kubona. Nomba Yesu walabambilisheti kabataya bambileko muntu naba umo sobwe. 31 Nomba kufumapo balo balatatika kumwaya mpuwo kumuntu uliyense mucibela ico.

Yesu lasengulunga bantu babili bashipilwa

29 Yesu ne beshikwiya bakendi mpobalikufuma mu munshi wa Yeliko, bantu bangi balikumukonkela. 30 Bantu babili bashipilwa balikuba bekala mumbali mwa nshila balanyumfweti Yesu lapitinga munshila, balatatika kubilikisha, "Nkambo omwanendi Dafeti, kamutunyumfwilako nkumbo." 31 Basa bantu balayanda kubamweneka mwakubacancilila, nsombi balo empobalapitilisha kolobesha, "Nkambo omwanendi Dafeti, kamutunyumfwilako nkumbo." 32 Yesu walemana, walabakuwa, ne kubepusheti, "Inga mulayandanga ndimwinshile cani?" 33 Balo balakumbuleti, "Nkambo tulayandanga tutatike kubona." 34 Yesu walabanyumfwila luse, walabekata pamenso, popelapo balatatika kubona, naboyo balamukonkela.

Yesu lasengulunga muntu washipilwa ku Betisaida

22 Yesu ne beshikwiya bakendi balashika ku Betisaida, uku bantu balamuletela muntu washipilwa, balamupapatila kwambeti amwikatekowa muntuyo. 23 Popelapo Yesu walamwikata muntu washipilwa pacikasa nekuya nendi kunsa kwa munshi walamusankila mata mumenso ne kubika makasa palyendiye, ne kumwipusheti "Sena pali ncolabonongaponga?"

24 Muntu washipilwa usa walakapula ne kukumbuleti, "Ee ndabononga bantu balendendenga." Nomba balabonekengeti, "bitondo." 25 Kayi Yesu walabika makasa pamenso a muntu usa, neco walakapula nekutatika kubona. Walaba cena ne kuboneshesha cena bintu byonse. 26 Yesu walamwambileti koya kucomwenu, ne kumwambilisheti, "Kotabwela mumunshiwu."

Yesu lasengulunga muntu utanyumfu kayi utamba

31 Lino mpwalikubwela kufuma mubibela bya Tulo, walapita pakati pa Sidoni ne kushika kulwenje lwa Galileya ne kupita mu Cimpansha caminshi likumi. 32 Kopeloko bantu balamuletela muntu washinka matwi, kayi wakamama, balamusengeti abike cikasa cakendi palyendiye. 33 Nomba Yesu walamanta muntuyo pakati pa likoto lya bantu nekuya nendi palubasu. Kopeloko walengisha minwe yakendi mu matwi a muntuyo kayi walasanka mata ne kwikata lulemi lwakendi. 34 Popelapo walalanga kwilu walashinshimuka ne kwambeti, "Ephphata," Uku ekwambeti, "Caluka."

35 Popelako matwi akendi alacaluka, lulemi lwakendi lwalikuba lwasungika lwalasunguluka, walatatika kwamba cena cena. 36 Yesu walabakonkomesheti, "Kamutambilako uliyense," Nomba balo empobalikuya kwamba kulikonse. 37 Cakubinga balikukankamana ne kwambeti, "Bintu byonse labinshi cena nditu, bashinka matwi balanyumfunga, ne bacibulu balambanga."

Yesu lasengulunga Batimeyo washipilwa

46 Yesu ne beshikwiya bakendi balashika ku Yeliko. Nomba Yesu ne beshikwiya ne likoto linene mpobalikupula mu Yeliko, balacana muntu washipilwa walikukute cinga cakusengasenga kali wekala mumbali mwanshila, muntuyu walikuba Batimeyo mwanendi Timeyo. 47 Mpwalanyumfwa kwambeti Yesu wa ku Nasaleti elapitinga, walatatika kubilikisha, "Yesu mwanendi Dafeti! Kamunyumfwilako nkumbo!"

48 Nabambi bantu balamucanchilila kwambeti amwene, nomba nendi empwalapitilisha kubilikisha, "Mwanendi Dafeti kamunyumfwilako nkumbo."

49 Yesu walemana ne kwambila beshikwiya bakendi eti, "Mukuweni ese kuno." Neco balamukuwa ne kumwambileti, "Yumisha moyo! Nyamuka! Yesu lakukunga."

50 Neco muntu washipilwa uyu walafulula mwinjila ne kuwala panshi nekulukila mwilu ne kwisa kuli Yesu.

51 Yesu walamwipusheti, "Ulayandanga ndikwinshile cani?" Washipilwa uyo wakumbuleti, "Bashikwiyisha ndayandangeti ntatike kubona."

52 "Koya lushomo lwakobe lulapeshepeti ube cena," Popelapo walatatika kubona cena, ne kukonkela Yesu pabulwendo.

Yesu lasenguluga muntu mpofu

35 Yesu mpwalashika pepi ne Yeliko walacana mpofu kali wekala mumbali mwa nshila, kasengelela. 36 Lino mpofu uyo mpwalanyumfwa bantu bangi kabapita munshileyo, walepusheti, "Nicani cilenshikinga?" 37 Bantu balamwambileti, "Ni Yesu wa ku Nasaleti lapitinga." 38 Lino walolobesheti, "Yesu mwana wa Dafeti konyumfwilako inkumbo!" 39 Lino bantu balikuba kutangu balamukalilila nekumwambileti mwena. Nsombi nendi walapitilisha kolobesheti, "Mwanendi Dafeti, konyumfwilako inkumbo!" 40 Neye Yesu walemana ne kwambila bantu eti bamulete kuli endiye. Mpwalashika pepi Yesu walamwipusheti, 41 nicani ncolandangeti nkwinshile? Neye walamukumbuleti, "Mwami, ndayandanga kwambeti ntatike kubona kayi." 42 Lino Yesu walamwambileti, "Tatika kubona, pakwinga ulanshomo, lushomo lwakobe lulakushiliki." 43 Pacindi copeleco walatatika kubona. Lino walakonkela Yesu nkaya kulumbaisha Lesa. Bantu bonse mpobalabona calenshika naboyo balalalumbaisha Lesa.

Yesu lashilikinga washipilwa

1 Lino Yesu mpwalikwenda walabona muntu walasemwa kaliwashipilwa. 2 Beshikwiya bakendi balamwipusheti, "mwiyi, niyani walalubisha kwambeti muntuyu asemwe kaliwashipilwa? Sena nimwine nambi, nibashali bakendi?" 3 Yesu walambeti, "Nteko kwambeti walasemwa kaliwashipilwa cebo ca bwipishi bwakendi, nambi bwipishi bwabashali bakendi sobwe.Nsombi kwambeti Lesa apewe bulemu kupitila mumuntuyu 4 Nkakucili munshi twela kusebensa ncito njebalantumina Bata. Mashiku alesanga muntu wela kusebensa 5 Kandicili panshi pano, njame ndapanga mumuni bantu bonse."

6 Mpwalambeco, Yesu walasankila mata panshi, walakandila tumankatya nekumunanika mumenso muntu washipilwa 7 Lino walamwambileti, "Koya usambe pakalishiba kaSiloyamu. Lina lyakwambeti Siloyamu lilapandululungeti mutumwa. Neco muntuyo walaya akusamba, walatatika kulanga mpwalikubwelela."

2 Lino muntu walikukute bulwashi bwa mankuntu, walesakusuntama ne kwambeti, "Nkambo, nakamuyanda ngamunswepesha" 3 Yesu walatandabula cikasa cakendi ne kumukumya, ne kwambeti, "Ee, ndayandanga, ‘Swepa!’ Popelapo walabacena." 4 Kufumapo Yesu walamwambileti, "Nyumfwa, kotambilako nabambi sobwe, obe koya uliboneshe kuli shimilumbo, utwale mulumbo usa ngwalamba Mose, kwambeti bantu baboneti ulaba cena."

2 Kopeloko bantu nabambi balamuletela mulema watontola myendo kabali bamoneka pampasa. pakubona lushomo lwabo, Yesu walambila mulema uyo "Yumisha moyo omwanobe! bwipishi bwakobe bulalekelelwa." 3 Mpwalenseco beshikwiyisha milawo ya Mose nabambi, balatatika kumufwiya mumyoyo yabo ne kwambeti, "Uyu muntu lanyanshanga Lesa!" 4 Nomba Yesu pakwishiba miyeyo yabo walambeti, "Mukute kuyeyela cani bintu byaipa mumyoyo yenu? 5 Capubako nicipeyo kwambeti, ‘Bwipishi bwakobe bulalekelelwa’ Nambi kwambeti, ‘nyamuka wende.’ 6 Nomba ndayandanga kwambeti mwinshibeti, Mwana Muntu ukute ngofu shakulekelela bwipishi pacishi capanshi pano." Neco walambila mulema watontola myenda uyu, "Nyamuka manta mpasa yakobe, koya kwenu." 7 Popelapo muntu usa walanyamuka ne kuya kumunshi kwabo.

10 Umo mwalikuba muntu watontola cikasa, bantu nabambi balikuyanda pakumucaninapo mulandu wakumubepeshela Yesu, balamwipusheti, "Sena Milawo yasuminisha kusengula muntu pabusuba bwa Sabata?" 11 Nendi Yesu walabakumbuleti, "Niyani palinjamwe ukute kambelele kamowa, welela kubula kukatampula kawila mucisengu pa busuba bwa Sabata? 12 Nomba muntu ntewapita mbelele! Na nico ekwambeti Milawo yasuminisha kwinsa byaina pabusuba bwa Sabata." 13 Neco walamwambila usa muntu, "Tandabula cikasa cakobe!" Nendi walatandabula, popelapo cikasa cakendi calaba cena mbuli cinendi.

30 Kumakwendi Shimoni batukashi balikuba bona kabanyumfwa mubili kulungula,Yesu mpwalashika mwakufwambana balamwinshibisha. 31 Yesu walaya mpobalikuba bona walabekata kucikasa ne kubapundusha. Popelapo bulwashi bwalapwa, balatatika kubabambila cakulya.

Yesu lasengulunga shimankuntu

40 Shimankuntu walesa kuli Yesu ne kumusuntamina ne kumusengeti, "Nakamuyanda, inga munswepesha."

41 Yesu walepilwa moyo neco, walatandabula cikasa cakendi ne kumwikata ne kumwambileti, "Ee ndayandishishinga, swepesha." 42 Pacindi copeleco, mankuntu alashimangana, walaswepa.

3 Kwalashika bantu bana balikuba batatula muntu mulema ne kumuleta kuli Yesu. 4 Nomba baliya kushika nendi pepi ne Yesu, pakwinga kwalikuba bantu bangi. Neco balashimbulula pelu paciluli kwelana ne mpalikuba Yesu. mpobalashimbulula balamwingisha mulwashi usa kali wona pa mpasa. 5 Nomba Yesu mpwalabona lushomo lwabo walambila muntu mulema usa eti, "O mwaname, bwipishi bwakobe bulalekelelwa."

6 Lino beshikwiyisha milawo nabambi balikubapo balatatika kuyeyaula mu myoyo yabo eti, 7 "Nicani cilamwambinshinga cisa muntuyu? Lanyanshanga Lesa! Niyani welela kulekelela bwipishi? Sena nte Lesa enka?"

8 Pacindi copeleco Yesu walenshiba mu moyo mwakendi kwambeti encobalayeyenga, neco walabepusheti, "Inga mulayeyelenga cani bintu ibi mu myoyo yenu? 9 Sena capubako cipeyo, kwambila muntu mulema eti, ‘Bwipishi bwakobe bulalekelelwa’ Nambi kwambeti, ‘Nyamuka manta mpasa yakobe wende.’ 10 Neco, nindimuleshe kwambeti, Mwana Muntu nkute ngofu shakulekelela bwipishi pacishi capanshi." Neco walambila muntu mulema usa, 11 "Ndakwambalinga, nyamuka! Manta, mpasa yakobe koya kwenu!"

12 Popelapo walapunduka ne kumanta mpasa yakendi, ne kutatika kulyendela enka pa menso pa cinyabwingi. Ici calankakamanisha bonse, neco, balamushikaisha Lesa ne kwambeti, "Bilicisa nkatunatubibonapo sobwe!"

Muntu wakokonyana cikasa

1 Pacindi nacimbi Yesu walengila mung’anda yakupaililamo, mopelomo mwalikuba muntu wakokonyana cikasa. 2 Bantu bambi balikubamo balasha menso pali Yesu kwambeti babone mpani ingaumusengula usa muntu pa busuba bwa Sabata, kwambeti bamucaninepo mulandu wa kumubepeshela. 3 Nomba Yesu walamwambila muntu wakokonyana cikasa eti, "Nyamuka, kwesa wimanine pantangu." 4 Lino Yesu walabepusheti, "Inga nicipeyo casuminishiwa ne mulawo kwinsa pabusuba bwa Sabata? Kwinsa caina nambi caipa? Kupulusha buyumi bwa muntu nambi kononga?"

Nomba nabo balamwena tonto. 5 Nomba Yesu walalanga uku ne uku mwabukalu, ne kwetelwa mumoyo pa cebo cakuyuma myoyo kwabo. Neco walamwambila muntuyo eti, "Tandabula cikasa cakobe." Nendi walatandabula cikasa, neco calaba cena.

Yesu lasengulunga shimankuntu

12 Yesu mpwalikuba mumunshi naumbi walakumana ne muntu wali kukolwa bulwashi bwa mankuntu mubili wonse. Mpwalabona Yesu mulwashi uyu walasuntama kuntangu nekumusengeti, "Mwami ndicishi kwambeti mukute ngofu shakusengula nsenguleni." 13 Yesu walatandabula likasa lyakendi, walamwikata ne kwambeti, "Ee ndayandanga, koba cena!" Popelapo mankuntu alapwa.

18 Kufumapo bantu nabambi balaleta mutuloba walikuba watontola mubili nkabali bamunyamuna pa mpasa. Balelesha kwambeti bamwingishe mu ng’andeti bamoneke pantangu pa Yesu. 19 Naboyo balikuyanda kumwingishila pacishinga, lino pakwinga bantu balafula balalilwa kwambeti bamutwale mukati. Neco balatanta nendi pa ciluli ca ng’anda ne kupasula mulyango, balamwingisha ne kumulelesha pampasa yakendi pakati pabantu ne kumushikisha pantangu pa Yesu. 20 Yesu mpwalabona kushoma kwakendi, "Walambeti, bwipishi bwakobe bulalekelelwa."

21 Lino beshikwiyisha Milawo kayi ne Bafalisi balatatika kwipushaneti, "Nomba uyu niyani lanyashanga Lesa? Niyani welela kulekelela bwipishi sena nte Lesa enka?" 22 Lino Yesu walenshiba ncobalikuyeya mumyoyo yabo neku bepusheti, "Nomba mulayeyelenga cani bintu bya mushoboyo mu myoyo yenu? 23 Nicipeyo capuba kwambila muntu eti, ‘Bwipishi bwakobe bulalekelelwa,’ Nambi kwambeti, ‘Nyamuka, wende’ 24 Lino ndayandanga kumwambileti mwinshibe kwambeti mwana muntu ukute ngofu shakulekelela bwipishi pacishi ca panshi." Kufumapo walambila usa watontola mubileti, "Ndakwambilinga, nyamuka, manta mpasa yakobe wenga kucomwenu." 25 Popelapo walapunduka bonse kabalanga nemenso abo, walamanta mpasa mpwalikuba wona nekutatika kuya nkalumbaisha Lesa.

Yesu lasengulunga wanyana cikasa

6 Nabumbi busuba pa Sabata, Yesu walengila mung’anda yakupaililamo kuya kwiyisha. Mung’anda umo mwalikuba mutuloba watontola likasa lyalulyo. 7 Beshikwiyisha bamilawo ne Bafalisi bali kabalangishisha eti babone, na Yesu ngaumusengula mutuloba usa pabusuba bwa Sabata kwambeti bamucaninepo mulandu. 8 Nendi walenshiba ncobalikuyeya. Lino walambila mutuloba usa walikuba watontola likaseti, "kwesa kuno wimane kuntangu." Neye walanyamuka nekuya kwimana kuntangu. 9 Lino "Ndamwipushunga, nomba milawo ikute kutusuminisha kwinsa cani pabusuba bwa Sabata? Kwinsa caina ku muntu nambi kumwinshila caipa? Kupulusha buyumi bwa muntu nambi kubononga?" 10 Apwishe kwambeco walalangishisha bantu bonse balikuba mu Ng’anda yakupaililamo, nendi walambila mutuloba useti, "Tandabula likasa lyakobe." Neye walatandabula, lino lyalaba cena.

Yesu lasengulunga musha wa mushilikali mukulene

1 Yesu mpwalapwisha kwambila bantu maswi awa, walaya ku Kapelenawo. 2 Kwalikuba mutangunishi naumbi walikuba mukulene wa bashilikali bakwana mwanda walikuba ne musha ngwali kusuna. Musha uyo wali kakolwa cakwambeti walikuba pepi ne kufwa 3 Lino mpwalanyufwa lulumbi lwa Yesu, walatuma bamakulene nabambi ba Bayuda kuya akumusengeti amushilike musebenshi wa mukulene wa bashilikali. 4 Abo balatumwa balashika kuli Yesu, balamusenga camakasa abili kwambeti, "Kamubonani uyu muntu mwelela kumunyafwa, 5 pakwinga usuni mushobo wetu kayi walatwibakila ng’anda yakupaililamo." 6 Lino Yesu walaya nabo. Mpwalashika pepi ne ng’anda, mukulene wa bashilikali walatuma banendi kuli Yesu kuya kumwambileti, "Mwami, mutalishupa, pakwinga ame nkandelela kwambeti amwe mwingile mung’anda yakame. 7 Weco ndiya kulibikapo kuba walulama kwisa kuli njamwe. Nomba mwambowa maswi musha wakame nabe cena. 8 Pakwinga nenjame nkute kukonkela milawo yabamakulene pancinto kayi nkute bashilikali mbonkute kutangunina. Na ndamwambili mushilikali eti, koya, neye ukute kuya. Na ndamwambili mushilikali eti, Kwesa, neye ukute kwisa, Na ndamwambili musha wakame eti, insa ici, neye ukute kwinsa."

9 Yesu mpwalanyumfweco, walakankamana. Lino walalanga kubantu bangi abo balikumukonkela ne kwambeti, "Cakubinga ndiya kubonapo lushomo lwamushoboyu pakati paba Isilaeli sobwe!"

10 Balatumwa basa balabwelela kung’anda, nekuya akucana musha uyo laba cena.

11 Mung’anda umo mwalikuba mutukashi walikuba ne mishimu yaipa walapenga kwa byaka likumi ne bisanu ne bitatu. Walikwenda kali wakotama, nkalikucikosha kololoka nambi pang’ana. 12 Lino Yesu mpwalabona mutukashi uyo walamwambileti, "Mutukashi, ulasungululwa kubulwashi bwakobe." 13 Lino Yesu walabika makasa akendi pali endiye, popelapo walololoka nekutatika kulumbaisha Lesa.

Yesu lashilikinga mutuloba mulwashi

1 Nabumbi busuba bwa Sabata Yesu walakwiwa kuya kulya kung’anda ya mukulene wa Bafalisi. Popelapo Bafalisi bali kabamulangishisha. 2 Lino pantangu pakendi Yesu palikuba muntu walikuba washimba mubili. 3 Lino Yesu walepusha Bafalisi ne beshikwiyisha Milawo eti, "Sena Milawo ikute kusuminisha kushilika muntu pa busuba bwa Sabata nambi ne?"

4 Nsombi balo balamwenowa. Lino Yesu walamanta muntu uyo, wamushilika nekumwambileti koya.

Yesu lashilikinga beshi mankuntu bali likumi

11 Yesu mpwalikuya ku Yelusalemu, walapita panyinsa ya Samaliya ne Galileya. 12 Mpwalashika mumunshi naumbi, beshimankuntu bali likumi balamukumanya ne kwimana pataliko. 13 Lino balobelesheti, "Amwe Yesu, Nkambo kamutunyumfwilako nkumbo!" 14 Yesu mpwalababona walabambileti, "Kamuyani ku beshimilumbo baye bamuboneti mulaba cena." Lino mpobalikuya kwenda munshila, balaba cena.

15 Lino umo pakati pabo mpwalaboneti laba cena, walabwelela kuli Yesu nkaya akulumbaisha Lesa ne liswi lyapelu. 16 Lino mpwalashika kuli Yesu walafukama kuntangu kwakendi ne kumulumba. Shimankuntu uyu walikuba mu Samaliya. 17 Lino Yesu walambeti, "Sena bashilikwa nkabanga likumi? Nomba bambi basanu ne bana balikupe? 18 Nomba nicani kulesowa muswamashi enka kwisa kulumbaisha Lesa? 19 Kufumapo, Yesu walambila shimankuntu uyo, pakwinga wanshoma nyamuka koya, Lushomo lwakobe lulakushiliki."

Lasengulunga mutuloba mulwashi ku betsaida.

1 Panyuma pakendi kwalikuba kusekelela kwa Bayuda, ku Yelusalemu neye Yesu walayako 2 Lino kopeloko pepi necishinga cambelele, kwalikuba kalishiba ka menshi kalikukwiweti Betsaida mumbali mwalishiba ili mwalikuba mwebakwa tumanda tubili. 3 Mu tumandomo mwalikona bantu bangi balwashi, balema ne bashipilwa kayi ne bakokonyana mibili 4 (Pakwinga mungelo walikufandaula menshi, neco mulwashi walikwingila bwangu mumenshi walikushilikwa.) 5 Nomba pa bantu balwashi abo palikuba umbi walakolwa kwa byaka 38. 6 Yesu mpwalamubona nkali wona, waleshiba kwambeti walakolwa kwa cindi citali. Lino walamwipusheti, "Sena ulayandanga kushilikwa?" 7 Mulwashi uyo walambeti, "Nkambo ndiyawa muntu welakuntwala mumenshi na alafundaulwa, ndambeti njingile nkutekucana naumbi lampitili kendi." 8 Yesu walamwambileti, "Punduka, manta mpasa yakobe, yamba kwenda." 9 Popelapo muntu uyo walashilikwa, walamanta mpasa yakendi nekuyamba kwenda.

Busuba ubo bwalikuba bwa Sabata.

46 Kufumapo Yesu walaya kumunshi wa kana ku Galileya, kusa nkwalasandula menshi kuba waini. Kopeloko kwalikuba mukulene wamfulumende ku Kapelenaumu walikukute mwana mulwashi. 47 Mpalanyumfweti Yesu lashiki kuGalileya kufuma kuYudeya, walesa kulyendiye nekumusengeti enga nendi ku Kapelenaumu, kwambeti enga ashilike mwanendi walikuba pepi kufwa. 48 Yesu walamwambileti, "wabula kubona bingashilo ne bikankamanisho, nkamushomo sobwe." 49 Mukulene wa mfulumende walambeti, "Nkambo, katuyani pamo mwaname nkatanafwa." 50 Yesu walamwambileti, "Koya mwanobe lasenguku kendi." Muntuyo walashoma maswi a Yesu nekuya kucomwabo. 51 Mpwalikuya walakumana ne basebenshi bakendi, nabo balamwambileti, "Mwanenu laba cena." 52 Walabepusha cindi ncalaba cena mwanoyo, nabo balambeti, "Watatika kunyumfwa cena lilo munshi muma 1 koloko." 53 Lino baishi mwana balanuketi ecindi Yesu mpwalabambileti, "Mwanobe lasenguku." Neco bonse bamung’anda yakendi balamushoma.

54 Ici calikuba cingashilo cacibili ncalensa ku Kana, wa kuGalileya mpwalafuma ku Yudeya.

20 Lino palikuba mutukashi walikukolwa bulwashi bwa mukunko kwa byaka likumi ne bibili, walesa cakunyuma kwa Yesu, ne kwisa kwikata kucelele kwa munganjo wa Yesu, 21 mumoyo mwakendi walikayeyeti, "Na njikatekowa munganjo wakendi ni nsengulwe." 22 Yesu popelapo walacebuka ne kumubona mutukashi uyo, Yesu walambeti, "Yumisha moyo mwaname, lushomo lwakobe lulakupulushu." Pacindi copeleco mutukashi usa walasengulwa.

25 Lino palikuba mutukashi walikukolwa bulwashi bwa mukunko kwa byaka likumi ne bibili. 26 Walapenga kwine, nikukabeti walaya ku bang’anga bangi. ne kononga mali akendi onse nsombi bulwashi bwa mukunko empo bwalikuya pantangu. 27 Mutukashi uyu mpwalanyumfwa bintu bingi mbyalikwinsa Yesu. Walakengila mulikoto lya bantu ne kwisa kwikata mwinjila wakunsa, cakunyuma kwa Yesu. 28 Pakwinga munkombe mwakendi wali kuyeyeti, "ndekatako mwinjila wakendi wakunsa ninsengulwe."

29 Pa cindi copeleco, bulwashi bwa mukunko bwalapwa, walanyumfwa mubili wakendi kwambeti lashilikwa kubulwashi bwamupenshanga.

43 Palikuba mutukashi naumbi walikukolwa bulwashi bwa mukunko kwa byaka likumi ne bibili. Walapwisha buboni bwakendi bonse mubang’anga, nsombi kuliya muntu nambi umo walakonsha kumusengula. 44 Mutukashi uyo walesa kunyuma kwa Yesu pabantu bangi balikuba bamushinguluka nekwikata kucelele kwamunganjo wakendi, popelapo bulwashi bwamukunko bwalapwa. 45 Neco Yesu walepusheti, "Niyani lanjikata ku munganjo?" Bonse bantu balakana eti paliyawa. Petulo walambeti, "Kufula bantu balamukumyunga kayi bantu balamushankanyanga." 46 Lino Yesu walambeti, "Nkwali muntu naumbi lanjikata kumunganjo, pakwinga ndanyumfu ngofu shimbi shilafumumo mulinjame." 47 Lino mutukashi usa mpwalaboneti nkela kusolamapo walalitwala kuli Yesu nkatutuma walawa kuntangu kwakendi Yesu. Ne kwamba byonse pamenso a bantu kabanyumfwa mbuli ncalamwikata kumunganjo ne kuba cena pacindi copeleco. 48 Yesu walamwambileti, "Mwaname, pakwinga washoma njame, koya mulumuno."

Yesu lasengulunga mwanendi Yailo ne mutukashi naumbi

18 Yesu kacamba, kwalesa mukulene wa Bayuda walesa kumusuntamina ne kwambeti, "Mwaname mutukashi ulipepi kufwa, ndapapata kamwisani mubike makasa enu palyendiye, kwambeti abe muyumi." 19 Popelapo Yesu ne beshikwiya bakendi balanyamuka ne kuya nendi.

23 Yesu mpwalashika ku ng’anda kwa mukulene wa Bayuda usa, walacana bantu kabalilisha mikonkobesho nebisekele, nabambi kabalyuma pacali kulila mibila. 24 Lino nendi Yesu walabambileti, "Kamupulani mwense, kashimbi uyu uliya kufwa sobwe, nsombi wonowatulo." Popelapo bangi balatatika kumuseka. 25 Nomba bonse mpobalapulamo mu ng’anda,Yesu walaya kucimpetela nkwalikuba ne kuyakwikata kashimbi uyu pacikasa, popelapo walapunduka.

22 Popelapo umo wabatangunishi ba ng’anda ya kupaililamo lina lyakendi Yailo, walashika, mpwalamubona walamusuntamina, 23 ne kumupapatila mankanda angi, kwambeti, "Mwaname mutukashi lakolwa camakasa abili ndapapata katuyani mwenga mubike makasa enu palyendiye kwambeti bulwashi bumumbuluke abe cena."

24 Neco balanyamuka ne kuya pamo. Nomba likoto lya bantu lyalikumukonkela ne kumushankanya.

38 Neco balakashika ku ng’anda ya mutangunishi wa ng’anda yakupaililamo, walabona kupilingana kwa bantu balikulila ne kulyuma pa nkombe. 39 Nomba mpwalengila mukati walambeti, "Inga mulalilingeconi cisa? Mwana uyu uliya kufwa sobwe, nsombi wonatulo."

40 Mpwalamba maswi awa, balatatika kumuseka. Nomba mpwalabapulishamo bonse, walamanta baishi ne banyina bamwana pamo ne beshikwiya batatu mbwalikuba nabo, ne kwingila uko kwalikuba mwana uyo. 41 Neco walekata cikasa ca mwana mutukashi uyo ne kwambeti, "Talita koumi!" Maswi aya alapandululungeti, "Omulindu obe, ndambanga ne njobe punduka!"

42 Pa cindi copeleco mwana uyu walapunduka ne kutatika kwenda, walikuba wa byaka likumi ne bibili. Nomba bantu balakankamana kwine.

31 Yesu walapitilisha kwambeti, "Anu bantu ba cino cindi ngandi bakoshanisha ne cani? Anu balyeti cani?" 32 Balyeti batwanike bekala pabusena bwakulishilapo kabolobeshanyeti,

"Twalamulilishila ngoma,

amwe muliya kushana!

‘Twalamwimbila inyimbo sha malila

amwe muliya kulila!’

33 "Pakwinga Yohane mubatishi walesa nkalikanisha kulya kayi nkali kunwapo waini, nomba amwe mwalambeti, ‘Ukute mushimu waipa.’ 34 Lino Mwana Muntu mpwalesa walatatika kulya ne kunwa, amwe mwalambeti, kamubonani ni weshikulyowa nekukolwa, kayi banendi ni beshimisonko kayi ne babwipishi. 35 Nsombi mano a Lesa akute kubonekela kuba ancine ncine kuli bonse bakute kwatambula."

Yesu uli pang’anda ya Shimoni Mufalisi

36 Mufalisi naumbi walakuwa Yesu eti ayenga akulya nendiye. Lino Yesu walaya akwingila mung’anda nekwikala pakulyela. 37 Mu munshi uwu mwalikuba mutukashi wabwikalo bwaipa. Mpwalanyumfweti Yesu lalinga mung’anda ya Mufalisi uyo, walamanta kankuli kesula mafuta anunkila cena.

41 Lino kwalesa muntu wali kukwiweti Yailo uyo wali kutangunina ng’anda yakupaililamo walesa kusuntama kuntangu kwa Yesu ne kumusengeti ayenga kung’anda yakendi. 42 pakwinga mwanendi mutukashi wa myaka likumi ne ibili mwana umowa, ngwalikukute wali kakolwa cakwambeti ngofwa.

Yesu mpwalikuya, bantu bangi balamushankanya.

49 Yesu kacamba kwalesa muntu kufuma ku ng’anda ya mukulene wa ng’anda yakupaililamo ne kumwambila Yailo eti, "Mwanenu lafu kendi, mutapensha beshikwiyisha." 50 Yesu mpwalanyumfwa makani ayo walambila Yailo eti, "Utatina, koshoma, mwanobe nabe cena." 51 Yesu mpwalashika kung’anda ya Yailo liya kusuminisha muntu nambi umo eti engilemo, nsombi Petulo, Yohane, ne Jemusi kayi ne baishi nebanyina ba mwana. 52 Bantu bonse mung’anda bali kabalila mwana mutukashi walikuba wafwa. Necikabeco Yesu walabambileti, "Kamucilekani kulila pakwinga uyu mwana nkafwapo, wonowa tulo." 53 Popelapo bonse balamuwela, pakwinga bonse balikwi shibeti lafu kendi. 54 Lino Yesu walekata mwana uyo pacikasa nekwambeti, "Mwana obe punduka!" 55 Popelapo walaba muyumi, walanyamuka. Lino Yesu walabambileti bamupe cakulya mwana alye. 56 Baishi ne banyina ba mwana uyo balakankamana. Lino Yesu walabambileti kamutaya kwambila muntu uliyense pamakani aya alenshiki.

Lufu lwa Lazaro

1 muntu walikukwiweti Lazaro, walakolwa, walikwikala mumunshi waBetaniya, kucomwabo Maliya ne Malita. 2 Uyu Maliya endiye usa walananika mafuta anunkila kumyendo yaMwami nekumupukutisha mishishi yakendi. Lazaro walikuba mukwabo Maliya Lazalo ewalikukolwa. 3 Lino bamakwabo batukashi balatuma mulumbe kuli Yesu kumwambileti, "Mwami, munenu ngomusuni nimulwashi." 4 Yesu mpalanyumfwa walambeti, "Kukolwa uko nteshi kumushine Lazalo sobwe, nsombi cilenshiki kwambeti Lesa alemekwe, kayi kwambeti Mwanendi Lesa apewe bulemu."

5 Yesu walikusuna Malita nekanike wakendi, kayi neLazalo. 6 Nomba mpalanyumfwa shamalwashi, Yesu walekala masuba abili pamusena popelapo mpwalikuba. 7 Panyuma pakendi walambila beshikwiya bakendi, "katuyani kuYudeya." 8 Beshikwiya bakendi balambeti, "Mwiyi, lino apa bamakulene baBayuda nkabayanda kumupwaya mabwe, Inga nicani mulayandanga kubwelelako?" 9 Yesu walambeti, "Sena busuba ntebukute mifunshya yacindi likumi ne ibili? Muntu nalendenga mu mumuni nkela kulisuntula pakwinga ukute kubona mumuni wacishici. 10 Nsombi nalendenga mashiku empwela kulisuntula, pakwinga nkalendenga mu mumuni."

11 Mpwalambeco walabambileti, "Lazalo, munetu lono tulo, nsombi ndenga akumupundusha kutulo." 12 Beshikwiya bakendi balambeti, "Mwami, nawona tulo, nabe cena." 13 Balo balikuyeyeti walikwamba shatulowa, nsombi Yesu walikwambeti Lazalo wafwa. 14 Lino Yesu walabambila mwakutasoleketi, "Lazalo lafu,

Yesu lalekeshenga lukupwe

23 Yesu pamo ne beshikwiya bakendi balatanta bwato nekuya. 24 Mwacimfundumukila kwalesa lukupwe luyosha pa lwenje, mankape alatatika kwingila mu bwatomo, nomba Yesu walikali wonatulo. 25 Kacili wona, beshikwiya balayakumunyukumuna ne kwambeti, "Nkambo, tupulusheni, tulipepi kufwa!" 26 Yesu walabakumbuleti, "Mulatininga cani amwe mobantu mukute lushomo lung’ana?" Mpwalambeco walemana ne kulucancilila lukupwe ne mankape, popelapo pa lwenje palamwena tonto. 27 Beshikwiya basa balakankamana ne kwambeti, "Inga uyu ni muntu ulyeconi cakwinseti lukupwe ne mankape byonse bilamunyumfwilinga?"

15 Beshikwiya bakendi pacindi camansailo, Yesu balamwambileti, "Kuno nikucisuwa, ano nimansailo kamubambilani bantu aba benga kuminshi bengakula byakulya." 16 Nomba nendi Yesu walabambileti, "Nkabelela kuya kumbi, amwe nimubape cakulya." 17 Balo balambeti, "Tukutekowa shinkwa usanu, ne nswi shibili." 18 Yesu walambeti, "kamuletani kuno." 19 Mpobalamutwalila, Yesu walambila bantu baseti bekale panshi pa mila, Yesu walamanta shinkwa usanu ne nswi shibili, walalungumana kulanga kwilu, ne kulumba Lesa, panyuma pakendi walakomona komona shinkwa usa ne kupa beshikwiya bakendi, nabo balayabila bantu bonse.

20 Bantu bonse balalya ne kwikuta. Panyuma pakendi beshikwiya balayowela byalashala ne kwisusha mitanga likumi ne ibili. 21 Bantu bonse balikubapo balalya, balikuba batuloba myanda makumi asanu kutabelengela kumo batukashi ne bana.

25 Cindi cakumaca kakutubuluka Yesu walesa nkobalikuba kesakwenda pa menshi.

Yesu lalyeshenga bantu bapita myanda makumi ana

32 Yesu walakuwa beshikwiya bakendi nekubambileti, "Ame ndabanyumfwilinga luse bantu aba, pakwinga balekala ne njame kwa masuba atatu, kayi kwakubula cakulya. Nkansuni kubambileti, benga kwabo ne nsala kabatana balyapo, pakwinga ngabawisuka bayanga munshila." 33 Beshikwiya bakendi balamwipusheti, "Inga kucisuwa kuno ngatucicana kupeyo cakulya celela kukwana bantu bangi cisa?" 34 Nendi Yesu walabepusheti, "Inga mukuteko shinkwa ungaye?" Balo balamukumbuleti, "Usanu ne ubili, kayi ne tunswi twakubelengowa." 35 Yesu walabambila bantu basa kwambeti bekale panshi. 36 Panyuma pakendi walamanta shinkwa usanu ne ubili usa ne nswi, walalumba Lesa, ne kukomona komona shinkwa, walapa beshikwiya bakendi, nabo balayabila bantu. 37 Bantu bonse balalya, balekuta. Balayowela byalashalapo ne kwisusha mitanga isanu ne ibili. 38 Lino bantu bonse pamo balalya balikuba batuloba myanda makumi ana, kutabelengela kumo batukashi ne batwanike.

Yesu labengenga musonko wa Ng’anda ya Lesa

24 Yesu ne beshikwiya bakendi mpobalashika ku Kapelenawo, beshikusonkesha musonko wa Ng’anda ya Lesa, balamwipusha Petulo, "Sena Shikwiyisha wenu Yesu, nkakute kusonkako musonko waku Ng’anda ya Lesa?" 25 Nendi Petulo walambeti, "Ee, ukute kusonka." Lino Petulo mpwalengila mung’anda katanamba ciliconse. Yesu walamwipusheti, "Obe Shimoni ulayeyenga cani? Inga bami bapano pacishi bakute kutambula misonko kufuma kuli bani," Kubantu bamushobo wabo, nambi bensu? 26 Petulo walambeti, "Kubensu," Nendi Yesu walamwambileti, "Anu nanico bantu bamushobo wabo nkabelela kusonkako sobwe. 27 Nomba kwambeti, katutabapesha nsoni baku Ng’anda ya Lesa, koya kulwenje kuya kulobola. Luswi ndoti utangune kulobola ulucenamune mulomo, nucanemo lyali, Ulimante uye usonke, kayi ne njame uye unsonkeleko."

Yesu lashingananga citondo ca Mukuyu

18 Mpobwalaca mumene mene, Yesu mpwalikubwelela ku Yelusalemu walanyumfwa nsala. 19 Mpwalabona citondo ca mukuyu pepi ne nshila, walayapo, nomba walacana kacikutowa matewu. Popelapo walacambila citondo camukuyu, "citondobe, kufuma lelo nteti ukasemepo bisepo sobwe." Cindi copeleco citondo camukuyu cisa calayuma nta. 20 Beshikwiya mpobalaboneco balakankamana balamwipusha Yesu, "Inga citondo ca mukuyu ici cilafwambaneconi kuyuma?" 21 Yesu walakumbuleti, "Cakubinga ndamwambilishingeti na lushomo lwenu ntelo lwakutonshanya nimukacikonshenga kwinsa mbuli ncondenshili citondo ca mukuyu ici. Nteconkeco sobwe, nsombi na muwambila mulundu uwu, kwambeti, ‘Fuma apa, koya uliwale mu lwenje, mpaka nicikenshike.’ 22 Na mupaila ne lushomo ciliconse nceti mukasenge nimukapewe."

37 Pacindici kwalesa lukumpwe lunene lwa ngofu, neco mankape alatatika kuma ku bwato, palashala pang’ana kwambeti bwato bwibile. 38 Nsombi Yesu walikuba mu bwato kunyuma, kaliwona tulo kali watamina pa mutamino. Beshikwiya bakendi balamunyukumuna ne kumwambileti, "Bashikwiyisha, nkamulashingonga mano, kwambeti tulipepi kufwa?"

39 Walapashamuka ne kulucancilila lukupwe ne kulwambileti "Leka!" Kayi ne kwambila mankape, "Tontola!" Popelapo lukupwe lwalacileka, nawo mankape pa lwenje alamwena tonto. 40 Neco Yesu walabepusheti, "nicani ncemwabela ne buyowa bwa swaswalo? Sena mucili babula lushomo?"

41 Nsombi nabo balanyumfwa buyowa ne kutatika kwamba kuli umo ne munendi eti, Inga uyu "Niyani cakwinseti lukupwe ne mankape pa lwenje byonse bilamunyumfwilanga!"

35 Lino mpokwalatatika kushipuluka, beshikwiya bakendi balesa kumwambileti, "Kuno nikucisuwa, kayi naco cindi cilapu. 36 Kamubambilani bantu benga mu minshi ilipepi kwambeti benga balyulile byakulya." 37 Neye Yesu walabambileti, "Amwe njamweti mubape cakulya." Palico, balo balambeti, "Sena twenga kuyakula shinkwa wa mali ngelakufola muntu pa myenshi isanu ne itatu ne kutwala kubantu aba kwambeti balye?" 38 Nendi Yesu walabepusheti, "Inga mukuteko shinkwa ungaye? Kamuya mubone!" Mpobalaubona balamwambileti, "Muli shinkwa usanu, kayi ne nswi shibili." 39 Palico, Yesu walambila beshikwiya bakendi kwambeti, bekalike panshi bantu mu makoto-makoto pamila yamwemfu. 40 Neco balekala mumakoto milongo mwanda umo, ukute bantu makumi asanu pa mulongo. 41 Yesu walamanta shinkwa usanu ne nswi shibili ne kulanga kwilu ne kusenga Lesa, ne kukatika komona shinkwa ne inswi shibili nekupa beshikwiya bakendi, kwambeti nabo bayabile bantu. 42 Neco bonse balalya ne kwikuta, 43 Panyuma pakendi beshikwiya basa balayowela byalashalapo bya shinkwa ne nswi, balesusha mitanga likumi ne ibili, 44 Nomba, bonse abo balalya shinkwa uyo balikuba batuloba bali myanda makumi asanu.

48 Nomba Yesu mpwalababona kabakwasula bwato mwakupenga pakwinga balikulwana ne lukupwe lwa ngofu, camuma 3 koloko kumaca walabakonkela, kaya kwenda palwenje, nomba walayanda nsulo kubapitilila. 49 Nomba beshikwiya mpobalamubona kenda pa lwenje balayeyeti, "Ni cipuku ici nditu!" Neco kwalaba kubilikisha kwabuyowa. 50 Pakwinga bonse balamubona neco balatina kwine. Nomba pa cindi copeleco, walabambileti, "Yumishani moyo, njame. Kamutatina!" 51 Popelapo walatanta nabo mubwato ne lukupwe lwalacileka. Neco balakankamana mu myoyo yabo.

Yesu lalyeshenga bantu bali myanda makumi ana

1 Paliyawa kupita cindi citali sobwe, kayi bantu bangi balabungana kuli Yesu, nomba nkabalikukute cakulya,Yesu walakuwa beshikwiya bakendi ne kubambileti, 2 "Ndanyumfwilinga luse bantu aba, pakwinga balekala ne njame kwa masuba atatu, kwabula cakulya. 3 Na ndibambileti benga kwabo kabali ne nsala, nibawisukenga mu nshila, pakwinga nabambi bafuma kutali."

4 Beshikwiya bakendi balamwipusheti, "Nikupeyo muntu nkwelela kucana shinkwa wingi wakulyesha aba bantu bonse mucisuwa muno?" 5 Nendi Yesu walabepusheti, "Inga mukuteko shinkwa ungaye?" Nabo balakumbuleti, "Usanu ne ubili." 6 Lino walabambila bantu kwambeti bekale panshi. Neco walamanta shinkwa usanu ne ubili, walalumbaisha Lesa, walakomauna, nekupa beshikwiya bakendi kwambeti bayabile likoto lya bantu. Naboyo balensa copeleco. 7 Kayi balikukute tunswi twakubelengowa, walalumbaisha Lesa ne kubambileti nato batuyabe. 8 Neco bonse balalya ne kwikuta, cakwinseti balayowela bishikulaka panshi ne kwisusha mitanga inene inene isanu ne ibili. 9 Palikuba bantu bashika pepi myanda makumi ana, Yesu balabambileti benga kwabo.

Yesu lashingananga citondo ca mukuyu

12 Mpobwalaca mumene Yesu walanyumfwa nsala pakufuma ku Betani. 13 Kaciliko patali walabona citondo ca mukuyu cikute matewu, walaya pepi kwambeti abone mpani inga kacikute nkuyu, nsombi mpwalashika mwinshi walacaneti cikute matewu onka, pakwinga nkacalikuba cindi cakuba ne nkuyu. 14 Neco, Yesu walacambileti, "Paliya muntu eshakalyeko nkuyu ku citondo ici!" Beshikwiya bakendi balamunyumfwa kambeco.

Ciyo kufuma ku citondo camukuyu

20 Cindi ncobalikwenda mushila mpobwalaca mumenemene, balabona citondo ca mukuyu cisa calanshinganwa ne Yesu kacili cayuma conse mpaka kumiyanda. 21 Petulo walanuka calenshika, ne kumwambila Yesu, "Bashikwiyisha kamubonani citondo ca mukuyu ncomwashingana cilayumu".

22 Nendi Yesu walabakumbuleti, "Kamushomani muli Lesa. 23 Cakubinga ndamwambilinga na muntu uwambila mulundu eti fuma apo mpobele, koya uliwale mu lwenje, kwamba kwakubula kutonshanya, nomba kali washometi ncalambanga ni cikenshike nditu nikenshike. 24 Pacebo ici, ndambilishingeti, mwapailinga ne kusenga cintu, shomani kubeti mulacitambula kendi, cili conse ncomulasengenga nimukapewe." 25 "Mwatatikanga kupaila, lekelelani bonse bamwipishila kwambeti Lesa wakwilu nendi amulekeleleni bwipishi bonse."

Yesu lakunga beshikwiya bakutanguna

1 Busuba nabumbi Yesu walikuba wemana mumbali mwa lwenje lwa Genesaleti. Bantu bangi bali kabanyakana kwambeti banyumfwe Maswi a Lesa. 2 Lino Yesu walabona mato abili asungwa mumbali, beshikushina inswi balikuba balafumumo kabasuka tombe twabo. 3 Yesu walengila mubwato bumo ubo bwalikuba bwa Shimoni, neye walasengeti abunyakileko pa lwenje. Walekala mubwato nekutatika kwiyisha bantu.

4 Mpwalapwisha kwiyisha, walambila Shimoni eti, "Bunyakileni bwato pakati, kwambeti muwale tombe twenu mumenshi mwikate inswi." 5 Shimoni walakumbuleti, "Shikwiyisha, kufuma mashiku bulatucele tuliya kwikatapo inswi, pakwinga mulamba njamwe ningwale tombe." 6 Lino balawala tombe twabo, nekwikata inswi shingi, tombe twabo twalatatika kupasuka. 7 Lino balakuwa banabo balikuba mubwato bumbi kwambeti bese babanyafweko kusabula, naboyo balesa, nomba balesusha mato abili nkayanda kwibila. 8 Shimoni Petulo mpwalaboneco walasuntama pantangu pa Yesu nekwambeti, "Kamundekelela Mwami Pakwinga ndeshikwinsa byaipa." 9 Shimoni ne banendi balenseco pakwinga balakankamana pa kufula kwa inswi isho nshobalekata. 10 Neco Jemusi ne Yohane bana bendi Zebediya kayi nebanendi Shimoni, naboyo balakankamana. Lino Yesu walambila Shimoni eti, "Kotatina pakwinga kufuma lelo nube weshikwikata bantu." 11 Popelapo balatanta mato ayo kuya kutala kwa mulonga, balashiya byonse nekunkokela Yesu.

Yesu lalekeshenga lukupwe

22 Busuba nabumbi Yesu ne beshikwiya bakendi balengila mubwato, Yesu walambeti, "Katutampukilani kutala kwa lwenje kusa." Popelapo balanyamuka. 23 Lino bwato mpobwalikuya, Yesu walona. Kwalesa cilukupwe cinene pamenshi. Bwato bwalatatika kwisula ne menshi kabuyanda pepi nekwibila. 24 Kufumapo beshikwiya balaya kuli Yesu ne kumwambileti, "Mwami, Mwami, kamupundukani tulafu!"

Lino Yesu walapunduka walakalalila lukupwe ne mankape alamwena tonto 25 Lino Yesu walambila beshikwiya bakendi eti, "Nomba lushomo lwenu lulikupeyo?"

Nabo balatina nekupwilwa mano nkabepushanyeti, "Nomba uyu nimuntu uli econi lambilinga lukupwe nalo lulamunyumfwilinga?"

Yesu lalekeshenga lukupwe

22 Busuba nabumbi Yesu ne beshikwiya bakendi balengila mubwato, Yesu walambeti, "Katutampukilani kutala kwa lwenje kusa." Popelapo balanyamuka. 23 Lino bwato mpobwalikuya, Yesu walona. Kwalesa cilukupwe cinene pamenshi. Bwato bwalatatika kwisula ne menshi kabuyanda pepi nekwibila. 24 Kufumapo beshikwiya balaya kuli Yesu ne kumwambileti, "Mwami, Mwami, kamupundukani tulafu!"

Lino Yesu walapunduka walakalalila lukupwe ne mankape alamwena tonto 25 Lino Yesu walambila beshikwiya bakendi eti, "Nomba lushomo lwenu lulikupeyo?"

Nabo balatina nekupwilwa mano nkabepushanyeti, "Nomba uyu nimuntu uli econi lambilinga lukupwe nalo lulamunyumfwilinga?"

Yesu lasengulunga muntu wekatwa ne mushimu waipa

26 Balo balashika kucishi ca Gelasa calangana ne cishi ca Galileya.

12 Lisuba mpolyalikuba pepi kwibila, beshikwiya bakendi bali likumi ne babili balaya kuli Yesu ne kumwambileti, "Kamubambilani bantu benga muminshi ne misena ili pepi balangole byakulya ne kwakona pakwinga kuno nikucisuwa."

13 Nsombi Yesu walabambileti, "Amwe mubape byakulya." Beshikwiya bakumbuleti, "Tukute owa shinkwa usanu ne inswi shibili. Lino sena musuni kwambeti tuye tule byakulya byakwana bantu aba?" 14 Palikuba batuloba bonka bakwana 5,000.

Lino Yesu walabambila beshikwiya bakendi eti, "Kamwambilani bantu bekale mumakoto, likoto lya makumi ali asanu." 15 Beshikwiya balensa mbuli ncobalambilwa. 16 Yesu walanyamuna shinkwa usanu ne Iswi shibili uto, walalanga kwilu ne kulumba Lesa, walakomona nekupa beshikwiya eti bayabile bantu. 17 Bantu bonse balalya nekwikuta. Nomba beshikwiya balabwesa byonse byalashalako ku bantu nekwisusha bitundu likumi ne bibili.

Bwinga bwa ku Kana

1 Mpopalapita masuba abili, kwalaba bwinga ku Kana munshi walikuba mucimpansha ca Galileya. Nabo banyina Yesu balayako. 2 Yesu neye pamo ne beshikwiya bakendi balakwiwako kubwinga ubu. 3 Mpowalapwa waini ngobalikunwa bantu, banyina Yesu balamwambileti, "Ulabapwili waini." 4 Yesu walakumbuleti, "Ma kamutang’ambila ncendela kwinsa, Cindi cakame nkacitana cishika." 5 Necikabeco banyina balambila basebenshi bapabwingeti, "Mwinse ciliconse nceti amwambile."

6 Lino popelapo palikuba nongo sha mabwe shisanu ne imo, balashibikapo pacebo ca mwambo wa Bayuda wakuliswepesha. Munongo iliyonse mwalikwingila menshi akwana mingomo isanu nambi kupitililapo. 7 Lino Yesu walambila basa basebenshi, "Kamushani menshi munongo shonse shisule." Naboyo balesusha mpaka pamilomo. 8 Panyuma pakendi walabambileti, "Lino tekulani, mutwalile mukulene lendeleshenga bwinga." Naboyo balamutwalila. 9 Mukulene wa bwinga mpwalatelela menshi asa Yesu ngalasandula kuba waini, liya kwinshiba kwalafuma waini uyo. Nomba basebenshi basa balateka menshi balikwinshiba. Lino mukulene walikwendelesha bwinga walakuwa shibwinga, 10 ne kumwambileti, "Bantu bakute kutanguna kuyaba waini waina, nomba bantu bekuta, ukute kubapa waini waina pang’ana. Nomba amwe mwanga mwabika waina kushika cino cindi!"

11 Ici calikuba cishikunkamanisha cakutanguna Yesu ncalensa mumunshi wa Kana mucimpansha ca Galileya nkwalalesha bulemu bwakendi, neco beshikwiya bakendi balamushoma.

6 Walepushila nsulo kwambeti amweleshe Filipo, nsombi mwine walikwinshiba cakwinsa. 7 Filipo walakumbuleti, "Nambi mali akwana masauzande ali 200 nkelakukwana kula cakulya cakwambeti uliyense alyeko nambi pang’ana."

8 Weshikwiya wakendi umbi, lina lyakendi Ndileya, mukwabo Shimoni Petulo, walambila Yesu eti, 9 "Pali mutuloba pano, ukute shinkwa usanu ne tunswi tubili. Nomba sena ngatukwana bantu bonse aba?" 10 Yesu walambeti, "Bambileni bantu bekale panshi." Popelapo palikuba mila yamwemfu ingi, nabo bantu abo balekala panshi. Batuloba bonka balikubapo balikuba bakwana 5,000. 11 Lino walamanta shinkwa usa, mpwalalumba Lesa, walabayabila bantu abo balikuba bekala panshi. Walensa copeleco ne tunswi tusa, nekubayabila bantu abo mobalikuyandila. 12 Bantu bonse abo mpobalekuta, Yesu walambila Beshikwiya bakendi, "Yowelani byashalanga panshi kwambeti kabitatayanikowa." 13 Nomba balayowela byonse bya shinkwa usanu usa, ne kwisusha mitanga likumi ne ibili.