Milagres de Jesus
Os Evangelhos registram dezenas de milagres realizados por Jesus — curas, ressurreições, domínio sobre a natureza e libertações. Cada milagre revelava sua divindade e compaixão.
Curas de cegos e surdos
Jesus devolveu a visão aos cegos e a audição aos surdos, manifestando seu poder sobre toda enfermidade e deficiência.
A Yeshu Bhanakwalamyanga Ashinangalole Bhabhili
A Yeshu bhakajabhuleje penepo, ashinangalole bhabhili gubhaakagwilenje bhalijobhelanga, bhalinkutinji, "Mmaulongo gwa a Daudi, ntubhonele shiya."
A Yeshu bhakaisheje kumui, ashinangalole bhabhili bhala gubhaajendelenje, bhalabho gubhabhushiyenje, "Bhuli, nnikulupalilanga kuti ngunaakombola kunnamiyanga?" Nabhalabhonji gubhaajangwilenje, "Elo Mmakulungwa," Penepo a Yeshu gubhakwashiye meyo gabhonji, bhalinkuti, "Ibhe malinga shinshite kulupalilanga." Meyo gabhonji gakubhalakukaga. Numbe a Yeshu gubhaakalipilenje, "Nnannugulilanje mundu jojowe genega."
Ikabheje gubhajabhwilenje, nishumya ngani ja a Yeshu nshilambo showe.
A Yeshu Bhanakwalamyanga Ashinangalole Bhabhili
A Yeshu na bhaajiganywa bhabho bhalishokangana ku Yeliko, lugwinjili lwa bhandu gulwaakagwile. Bhai, bhashinkupagwanga ashinangalole bhabhili bhatemingenenje nnyenje mpanda, bhakapilikananjeje kuti a Yeshu bhapinga pita gwene mpandago, gubhautienje lilobhe, "Mmakulungwa, Bhaulongo gwa a Daudi, nntubhonele shiya!"
Lugwinjili lwa bhandu lula bhakwaakalipilangaga kupinga bhapumulanje. Ikabheje bhanganyabho gubhapundilenje kweya lilobhe, "Mmakulungwa, Bhaulongo gwa a Daudi, nntubhonele shiya!" A Yeshu gubhajimi, gubhaashemilenje nikwabhuyanga, "Nkupinganga nintendelanje nndi?"
Gubhaajangwilenje, "Mmakulungwa, tunajuga tulole." Bhai, a Yeshu gubhaabhonelenje shiya, gubhaakwashiyenje meyo gabhonji, na shangupe gubhalolilenje, nigubhaakagwilenje.
A Yeshu Bhanakunamya Nangalole ku Bhetishaida
A Yeshu na bhaajiganywa bhabho gubhaikengenenje ku Bhetishaida, gubhaapeleshelenje mundu jumo nangalole, nikwashondelesheya a Yeshu bhankwaye nkupinga alame. A Yeshu gubhankamwile nkono, gubhapite najo kunyenje shijiji. Gubhanng’unile mata mmeyo, gubhankwashiye na makono, gubhammushiye, "Bhuli, ulikushibhona shindu shoshowe?"
Nangalole jula gwalolile, nigwashite, "Ngunakwabhonanga bhandu bhabhagwinji mbuti mikongo jilikwenda." Kungai a Yeshu gubhankwashiye kabhili na makono kumeyo, na jwalakwe gwabhalakwile meyo nigwalamile, gwaibhweni indu yowe ukoto. A Yeshu gubhannugulile ajende kunngwakwe nikung’amulisha, "Unabhuje kushijiji!"
A Yeshu Bhanakunnamya Mundu Aliji Bhubhu na Nangapilikane
Kungai a Yeshu gubhajabhwile penepo gubhapite mmbali ja ku Tilo kupitila ku Shidoni, gubhaishe ku litanda lya Galilaya kupitila ku Dekapoli. Bhai, gubhaapeleshelenje mundu bhubhu na akaapilikana, gubhaajujilenje bhammishile makono. A Yeshu gubhanshoshiye pa bhandu nikwenda najo kunyenje, gubhannjinjiye ngowe yabho mmakutu gakwe na gubhaunile mata nikunkwaya pa lulimi lwakwe. Kungai a Yeshu gubhalolile kunani kunnungu, gubhatulwiye mbumu, gubhannugulile, "Epata," Malombolelo gakwe "Uguka." Shangupe makutu gakwe gakuugukaga na lulimi lula guluugwishe, gwabhelekete ukoto.
A Yeshu gubhaamulishe bhanannugulilanje mundu yeila. Ikabheje pubhapundaga kwaalimbiyanga, nipubhapundangaga kushumiya ngani. Bhandu bhashinkulapanga kwa kaje, gubhashitenje, "Bhanatenda indu yowe ukoto, bhanakwaatendanga ashinangapilikane, kupilikana kabhili na ashibhubhu kubheleketa."
A Yeshu Bhanakwaalamya a Bhatilimayo Nangalole
Bhai, gubhaikengenenje ku Yeliko, nabhalabho a Yeshu na bhaajiganywa bhabho pubhashokanganaga shene shilambosho na lugwinjili lwa bhandu, a Bhatimayo anangalole bhaajuga, bhanabhabho a Timayo, bhashinkutama nnyenje mpanda. Bhakapilikaneje kuti a Yeshu Bhanashaleti bhanapita penepo, gubhatandwibhe kuutiya lilobhe bhalinkuti, "A Yeshu, Mwana jwa a Daudi, mmonele shiya!" Bhandu bhabhagwinji gubhaakalipilenje, nkupinga bhapumule, ikabheje gubhapundile kuutiya lilobhe "Mwana jwa a Daudi monela shiya!"
A Yeshu gubhajimi gubhashite, "Mwaashemanje" Bhai, gubhaashemilenje anangalole bhala, gubhaalugulilenje "Mwilume ntima! Nnjinushe bhanakunshema." Nabhalabho gubhajaile nkogo gula, gubhaumbile, gubhaajendele a Yeshu.
A Yeshu gubhaabhushiye, "Nkupinga nintendele nndi?" Anangalole bhala gubhaajangwile, "Mmajiganya ngunapinga nole."
A Yeshu gubhaalugulile, "Nnjabhule, ngulupai jenu jinnammiye. Shangupe gubhatandwibhe kulola kabhili, gubhaakagwile a Yeshu mumpanda."
A Yeshu Bhanakunnamya Nangalole
A Yeshu bhakabhandishileje ku Yeliko, mundu jumo nangalole nkujuga ashinkupagwa nnyenje mpanda alijuga. Akapilikaneje lugwinjili lwa bhandu lulipita gwabhushiye, "Shipali nndi?"
Gubhammalanjilenje, "A Yeshu Bhanashaleti bhanapita." Jwalakwe gwakweshiye lilobhe alinkuti, "A Yeshu, bhanabhabho a Daudi, mmonele shiya!"
Bhandunji bhalongolelenje bhala gubhankalipilenje nkupinga apumule, ikabheje jwalakwe gwapundile kweya lilobhe, "A Yeshu bhanabhabho a Daudi mmonele shiya!"
A Yeshu gubhajimi, gubhatumile bhannjiyenabhonji pubhaliji pala. Nangalole jula akabhandishileje, a Yeshu gubhammushiye, "Upinga nikutendele nndi?" Gwashite, "Mmakulungwa, ngunapinga nole." A Yeshu gubhannugulile, "Bhai lola! Ngulupai jako jikulamiye."
Na shangupe nangalole jula gwakombwele kulola, gwabhakagwile a Yeshu alipita kwaakuya a Nnungu. Bhandunji bhowe bhakagabhonanjeje genego gubhainiyenje a Nnungu.
A Yeshu Bhanakunnamya Nangalole jwa Shibhelekwa
A Yeshu bhali nkupita gubhammweni mundu jumo, nangalole jwa shibhelekwa. Bhai, bhaajiganywa bhabho gubhaabhushiyenje, "Mmaajiganya! Gani atendile yambi, jwene munduju eu bhankwetenje mpaka abhelekwe nangalole?"
A Yeshu gubhajangwile, "Lyeneli lyangakoposhela kwa ligongo lya yambi yakwe, wala yambi ya bhankwetenje, ikabhe ashibhelekwa na unangalole nkupinga mashili ga a Nnungu gabhoneshe. Pabha kukanabhe pilila, tunapinjikwa kutenda maengo ga bhandumile bhala, kupililaga mundu akakombola kutenda liengo. Mobha guni pashilambolyo, nne shilangaya sha shilambolyo."
Bhakabheleketeje genego, gubhaunile mata pai, gubhaeleye litope na mata gala, gubhampashile mmeyo nangalole jula, gubhannugulile, "Jenda ukanabhe kulitanda lya Shiloamu." Malombolelo ga Shiloamu, "Atumilwe." Bhai, nangalole jula gwapite kunabha, kungai gwabhujile alilola.
Curas de paralíticos e enfermos
Paralíticos caminharam, leprosos ficaram limpos e todo tipo de doença foi curada pelo toque e pela palavra de Jesus.
Bhai, gwaishe mundu jumo akwete mangundula nitindibhala alinkuti, "Mmakulungwa, mpingaga nnakombola kunamiya!" A Yeshu gubhagolweye nkono, gubhankwashiye bhalinkuti, "Ngunapinga! Ulame." Shangupe gwalamile mangundula gakwe. Kungai a Yeshu gubhannugulile, "Upilikane, unannugulile mundu jojowe, ikabhe ujende ukailanguye ku bhaabhishila, ukapeleshe mbepei malinga shiyalugwilwe na a Musha kwaakong’ondelanga kuti nnamile."
Kweneko bhandu gubhaapeleshelenje mundu jumo apolweshe, agonile pa shinanda. A Yeshu bhakajibhoneje ngulupai jabhonji, gubhammalanjile mundu apolweshe jula, "Ambwiga! Mwiilume ntima, yambi yenu nneshelelwe." Bhaajiganya bha Shalia bhananji gubhaganishiyenje mmitima jabhonji kuti, "Bhene bhandubha bhanakwaakupulu a Nnungu!"
A Yeshu gubhaimanyi ng’aniyo yabhonji, gubhashite, "Pakuti nnaganishiyanga ya nyata mmitima jenunji? Shei shipepeshe, kubheleketa, ‘Uleshelelwe yambi yako,’ eu kubheleketa, ‘Jinuka ujende?’ Ikabheje, mmumanyanje kuti Mwana juka Mundu ashikola ukulungwa pa shilambolyo gwa kwaaleshelelanga bhandu yambi yabhonji." Penepo gubhammalanjile mundu apolweshe jula, "Jinuka utole shinanda shako ujende kunngwako."
Bhai mundu apolweshe jula gwajimi, gwapite kunngwakwe.
Ashinkupagwa mundu akwete nkono upolweshe. Bhai, bhandu gubhaabhushiyenje a Yeshu, "Bhuli, ilipinjikwa kunamiya mundu Lyubha lya Pumulila?" Bhashinkwaabhuyanga nkupinga bhapatanje shiumilo sha kwaashitakia.
Ikabheje a Yeshu gubhaabhalanjilenje, "Tujile mundu munkumbi gwenunji, ngondolo jwakwe atumbushilaga nniimbo, bhuli, akanshoya mwenemo pabha Lyubha lya Pumulila? Na mundu ni jwa mana kupunda ngondolo! Bhai, shalia jetu jinakutupinga kutenda ya mmbone Lyubha lya Pumulila."
Kungai gubhannugulile mundu jula, "Goloya nkono gwako." Gwaugolweye, ukulamaga nibha malinga guna gula.
Bhai, akwebhabho a Shimoni bhakongwe pubhaaliji bhalwele, bhagonile pa shinanda. A Yeshu bhakaisheje shangupe gubhaabhalanjilenjen. A Yeshu gubhaajendele bhakongwe bhala gubhaakamwile nkono, nikwaajinula. Na shilwele shila shikwaashokaga, gubhatandwibhe kwaatumishilanga.
A Yeshu Bhanakunnamya Mundu jwa Mangundula
Mundu jumo nnwele mangundula gwabhajendele a Yeshu akwaatindibhalilaga alinkuti, "Mpingaga, nnikombola kunamya!" A Yeshu gubhammonele shiya, gubhagolweye nkono gwabho, gubhankwashiye bhalinkuti, "Ngunapinga, ulame!" Shangupe mangundula gala gakunshokaga mundu jula, gwalamile.
penepo gubhaikengene bhandunji nsheshe bhannjigelenje mundu jwa poloka ibhalo. Ikabheje, kwa ligongo lya shuluka bhandu, bhangakombolanga kumpeleka mundu jula tome na a Yeshu. Bhai, gubhabhomolenje shipagala sha nyumba shitwela shibhajimi a Yeshu. Bhakabhomolanjeje lilanga, gubhantuluyenje mundu jula ali agonile pa likai. A Yeshu bhakajibhoneje ngulupai jabhonji, gubhammalanjile mundu jwa poloka jula, "Mwanangu uleshelelwe yambi yako."
Na bhaajiganya bhananji bha Shalia bhapalinji penepo, gubhaganishiyenje mmitima jabhonji, "Bhaabheleketa bhuli abha? Bhanakwaakupulu a Nnungu! Jwakwapi mundu akombola kuleshelela yambi ikabhe a Nnungu jikape." Shangupe a Yeshu gubhaimanyi ng’aniyo yabhonji, nigubhaalugulilenje, "Pakuti nkuganishiyanga nneyo mmitima jenunji? Shei shipepeshe kummalanjila mundu apolweshe, ‘Uleshelelwe yambi yako,’ eu kummalanjila, ‘Jinuka! Tola likai lyako ujende?’ Bhai, pungupinga mmumanyanje kuti, Mwana juka Mundu, anakombola leshelela bhandu yambi pa shilambolyo." Penepo gubhammalanjile mundu jwa poloka jula, "Ngunakuubhalanjila jima, tola likai lyako ujende kunngwako!"
Akuno bhandu bhalikunnolesheyanga, shangupe mundu jula gwajimi, gwatolile likai lyakwe nigwaijabhulile. Bhandu bhowe gubhakanganigwenje nikwaakuya a Nnungu bhalinkutinji, "Ngu, tukanabhe kushibhona shindu malinga sheneshi."
A Yeshu Bhanakunnamya Mundu jwa Poloka Nkono
A Yeshu gubhajinjile kabhili nshinagogi, na nkati mula ashinkupagwa mundu jumo apolweshe nkono. Bhandu bhananji bhalinginji mwenemo, gubhaalolesheyenje a Yeshu ibhaga shibhannamye Lyubha lya Pumulila nkupinga bhapatanje shiumilo sha kwaalugula. A Yeshu gubhannugulile apolweshe nkono jula, "Jiya ujime pakati pakati pano." Kungai, a Yeshu gubhaabhushiyenje bhandunji bhala, "Bhuli, inapinjikwa Lyubha lya Pumulila kutenda ya mmbone eu kutenda yangali ya mmbone, kunnamya mundu eu kummulaga?" Ikabheje bhangajangulanga.
Penepo a Yeshu gubhaalolilenje bhowe bhali bhatumbele, akuno bhaliinjika, kwa ligongo lya mitima jabhonji jangapinga kulupalila. Kungai gubhammalanjile mundu jula, "Goloya nkono gwako!" Jwalakwe gwagolweye nkono gwakwe, na shangupe guulamile.
A Yeshu Bhanakwaalamya Bhamangundula
A Yeshu pubhaliji, kushilambo shimo, jwannume jumo jwa mangundula shiilu showe, gwabhabhweni. Bhai akwiigwiyaga namanguku alikwaajuga a Yeshu alinkuti, "Mmakulungwa, mpingaga, shinndakaye."
A Yeshu gubhagolweye nkono gubhankwashiye akuno bhalibheleketa, "Ngunipinga, utakate!" Shangupe mangundula gala gakunshokaga.
Kashokope gubhaikengene bhandunji bhannjigelenje mmashila mundu jwa poloka, gubhalinjilenje kunnjinjiya nkati bhampelekanje kwa a Yeshu. 5:18 Ikabheje kwa ligongo lya gwinji gwa bhandu, bhangakombolanga kujinjiya nkati. Bhai gubhakwelilenje kushipagala, gubhapenwilenje nigubhantulwiyenje mundu jwa poloka jula na mashila, mpaka pakati pakati ja bhandunji mmujo ja a Yeshu. A Yeshu bhakajibhoneje ngulupai jabhonji, gubhannugulile mundu jula, "Ambwiga nneshelelwe yambi yenu."
Mapalishayo na bhaajandika bha shalia gubhatandwibhenje kwiibhuyanga, "Bhenebha ni agani bhakwaakupulu a Nnungubha? Jwakwapi mundu akombola kuleshelela yambi ikabhe a Nnungu jikape!" Ikabheje a Yeshu gubhaimanyi ng’aniyo yabhonji, gubhaabhushiyenje, "Kwa nndi nnakwiibhuyanga genega mmitima jenunji? Shei shipepeshe, kubheleketa, ‘Uleshelelwe yambi,’ eu ‘Jima ujende?’ Bhai pungupinga mmumanyanje kuti Mwana juka Mundu ashipegwa mashili ga leshelela bhandu yambi yabhonji pa shilambolyo." Penepo gubhammalanjile mundu jwa poloka jula, "Jima tola likai lyako guijendele kumui."
Shangupe, mundu jwa poloka jula gwajimi pa meyo gabhonji, gwatolile likai lyakwe, gwapite kumui akuno alikwaakuya a Nnungu.
Mundu jwa Poloka Nkono
Lyubha lina lya Pumulila, a Yeshu gubhajinjile nshinagogi gubhajigenye. Nkati mula ashinkupagwa mundu jumo nkono gwakwe gwa nnilo gwashinkupoloka. Bhaajiganya bha shalia na Mapalishayo bhatendaga loleyanga shiumilo sha kwaashitakiya a Yeshu, kwa nneyo gwaatemingene nkulolela ibhaga shibhannamye mundu Lyubha lya Pumulila. Ikabheje a Yeshu gubhaimanyi ng’aniyo yabhonji, gubhammalanjile jwa poloka nkono jula, "Jinuka, ujime mmujo ja bhandu bhowe." Mundu jula gwapite jima mmujo. Kungai a Yeshu gubhaalugulilenje, "Ngunakummuyanga, shalia jibhalanga bhuli ga Lyubha lya Pumulila, jinakutuleka tutende ya mmbone eu tutende yangali ya mmbone, kutapula gumi guka mundu eu kubhulaga mundu?" Gubhaalolinje bhandu bhowe bhatemingene pepala, gubhammalanjile mundu jula, "Goloya nkono gwako." Nigwagolweye, na nkono gwakwe guulamile.
A Yeshu Bhanakunnamya Ntumishi jwa Bhakulungwa bha Manjola
Bhakabheleketeje gubhapinjile bhandu bhapilikananje gala, a Yeshu gubhapite kushilambo sha ku Kapalanaumu. Kweneko bhashinkupagwa bhakulungwa bhamo bha manjola ga Bhaloma, bhenebho bhashinkukola ntumwa jwabho jubhampinjile kaje. Jwene ntumwajo atendaga lwala tome kuwa. Bhakulungwa bha manjola bhala bhakapilikaneje nnganya ja a Yeshu, gubhaatumilenje bhanangulungwa bha Bhayaudi bhajendangane bhakaajuganje a Yeshu bhakannamye ntumwa jwabho. Bhakaikanganeje kwa a Yeshu gubhaashondelesheyenje kaje, bhalinkutinji, "Bhenebha inapwaa kwaatendela nneyo, pabha bhanakwapinganga bhandu bhetu, na bhashikutushenjela shinagogi jila."
Bhai a Yeshu gubhalongene nabhonji, bhandunji bhala. Bhali tome na ika ku likaja lya bhakulungwa bha manjola ga Bhaloma bhala, bhakulungwa bha manjola bhala gubhaatumilenje asha ambwiga ajabhonji kubhaalugulilanje a Yeshu kuti, "Mmakulungwa nnapunde kwiiabhuya, pabha nne nangali malango ga kumposhela mmwe nnyumba jangu. Na shiumilo niibhone nangali shanga sha kwiya kunngwenu mmwe. Ikabheje mmelekete lilobhepe na ntumwa jwangu shaalame. Pabha nkali nne puni pai ja ukulungwa, pai jangu bhapalinji ashimanjola. Na nimmalanjiga linjola jumo, ‘Jenda’ alikwenda, nimmalanjilaga juna, ‘Jiya’ anakwiya, na nimmalanjilaga ntumwa jwangu, ‘Tenda ashi,’ najwalakwe alitenda."
A Yeshu bhakapilikaneje genego bhashinkuimonga kaje, gubhatendebhwishe nikululola lugwinjili lwa bhandu bhaakagulangaga bhala, gubhashite, "Nganabhe kummona mundu akwete ngulupai jikulungwa nnei nkali kubhandu bha Ishilaeli."
Bhandunji bhala bhakaikanganeje kumui, gubhanng’imenenje ntumwa jula alamile.
Penepo bhashinkupagwa bhakongwe bhamo bhaaliji na shigongo kwa yaka kumi na nane, pabha ashinkwaatama lioka jwangali jwa mmbone. Nngongo gwabho gwashinkupinda, bhakakombolaga kujinuka nkali kashoko. A Yeshu bhakaabhoneje gubhaashemile, gubhaabhalanjile, "A mama nnamile shilwele shenu." Gubhaabhishile makono bhakongwe bhala, shangupe nngongo gwabho guugolweshe, gubhainiye a Nnungu.
A Yeshu Bhanakunnamya Nnwele Shitaka
Lyubha limo lya Pumulila a Yeshu bhashinkwenda kulya shalya kumui kwa akalongolele bhamo bha Mapalishayo, bhandunji bhapalinji penepo gubhaalolesheyenje kwa kaje. Mmujo jabho a Yeshu ashinkupagwa mundu nnwele shitaka. A Yeshu gubhaabhushiyenje bhaajiganya bha shalia na Mapalishayo, "Ilipinjikwa eu ikapinjikwa kunnamya mundu Lyubha lya Pumulila?"
Ikabheje bhanganya bhala gubhatemingene ilili. A Yeshu gubhankamwile nnwele jula gubhannamiye, gubhanneshile aijabhulile.
A Yeshu Bhanakwalamyanga Bhamangundula Kumi
A Yeshu bhali mumpanda kwenda ku Yelushalemu bhashinkupita mumpika gwa ku Shamalia na ku Galilaya. Bhalijinjila nshilambo shimo, bhandunji kumi bhamangundula bhashinkwajiilanga a Yeshu, gubhajimingene kwa taliya. Gubhautiyenje lilobhe bhalinkutinji, "Mmakulungwa a Yeshu, ntubhonele shiya!"
A Yeshu bhakaabhonanjeje gubhaabhalanjilenje, "Nnjendangane nkailangulanje kubhaabhishila." Bhai, akuno bhalikwendangana, gubhalamilenje. Jumo jula akabhoneje kuti alamile, gwabhujile alikwaakuya a Nnungu kwa lilobhe lya utiya. Gwatindibhele pa makongono ga a Yeshu nkutenda eja. Jwenejo paaliji Nshamalia. Ikabheje a Yeshu gubhabhushiye, "Bhuli, nngabha bhandu kumi bhalamiywenje? Tisha bhala bhalinginji kwei? Bhakwapinji bhandu bhananji bhabhujilengene kukwaakuya a Nnungu, ikabhe nnjenipeju?" Kungai gubhammalanjile mundu jula, "Jinuka gwiijendele, ngulupai jako jikulamiye."
A Yeshu Bhanakunnamya Mundu jwa Poloka pa Litanda
Gakapiteje genego shashinkupagwa shikukuu sha Bhayaudi, na bhalabho a Yeshu gubhapite ku Yelushalemu. Kwene ku Yelushalemu, tome na nnango gushemwa, Nnango gwa Ngondolo, lyashinkupagwa litanda lya mashi liishemwa Bhetishata kwa Shiebhulania, na lyashinkukola mmbuto nng’ano. Nnyenje mmatimbwimo bhashinkupagwanga bhalwelenji bhabhagwinji bhatemingenenje, ashinangalole na ashinangwabha na bhapolokanga ibhalo, bhalinginji nkulindilila mashi gakologanywe. Pabha malaika jwa kunnungu atendaga tuluka nitimbulikanya mashi. Nnwele jojowe shalongolele tumbushila mmashi mula, shalame shilwele shoshowe shakwete. Bhai, penepo ashinkupagwa nnwele jumo alwalile yaka makumi gatatu na yaka nane. Numbe a Yeshu bhakammoneje jwenejo ali agonile penepo, gubhang’amwile kuti jwenejo patemi penepo mobha gamagwinji, gubhammushiye, "Bhuli ulipinga kulama?"
Na jwalakwe gwajangwile, "Mmakulungwa, nne nangali mundu jwandumbushiya mmashimu pugatimbulikanywa. Kila pungulinga tumbushila, mundu juna anakoposhela nimbitila." A Yeshu gubhammalanjile, "Jinuka utole likai lyako ujende." Shangupe mundu jula gwalamile, gwatolile likai lyakwe, gwajabhwile. Lyeneli pulyatendeshe Lyubha lya Pumulila.
A Yeshu gubhaishe kabhili kushilambo sha ku Kana kunkowa gwa ku Galilaya, kubhatendile mashi kubha divai. Ku Kapalanaumu bhashinkupagwa bhakulungwa bhamo bha manjola bhakwete mwana nwele ku Kapelenaumu. Bhai, bhakulungwa bha manjola bhala bhakapilikaneje a Yeshu bhashiika ku Galilaya kukoposhela ku Yudea, gubhaajendele nikwaajuga bhajende ku Kapalanaumu bhakannamye mwana gwabho aliji nnwele jwa nnumbangu. A Yeshu gubhaalugulile, "Nkaibhonanje ilangulo na ilapo nkakulupalilanga!"
Bhakulungwa bha manjola bhala a gubhaalugulile a Yeshu, "Mmakulungwa, shonde twende mwanangu akanabhewa."
A Yeshu gubhaalugulile, "Njende, mwana gwenu alamile." Bhandu bhala gubhakulupalile malobhe ga a Yeshu, gubhajabhwile. Bhali mumpanda gwa kwenda kungwabho, gubhaimikene na bhatumishi bhabho, gubhaalugulilenje, "Mmakulungwa, mwanagwenu alamile".
Na bhalabho gubhabhushiyenje, "Malanga gani mwana palamile" Gubhaalugulilenje, "Liyo shaa shaba ja mui, shilwele pushinneshile." Ainamundu bhala gubhakumbushile kuti pugaliji malanga gogo pego pubhalugulilwe na a Yeshu kuti, "Mwana gwenu alamile." Penepo bhenebho na ashaalongo ajabho bhowe gubhaakulupalilenje.
Sheneshi pushaliji shilangulo sha bhili shibhatendile a Yeshu bhalibhuja ku Yudea kwenda ku Galilaya.
A mulher com fluxo de sangue
Uma mulher que sofria há doze anos tocou a orla do manto de Jesus e foi curada instantaneamente pela sua fé.
Bhakongwe bhamo bhalwalaga shilwele sha nsholosholo yaka likumi limo na ibhili, gubhaakagwile a Yeshu shilinyuma, gubhakwashiye libhiniko lya nngubho jabho. Bhashinkutenda nneyo pabha bhashinkwiibhalanjila bhayene, "Ngwayape nngubho jabho shiname."
Bhai, a Yeshu gubhatendebhwishe nigubhaabhweni, gubhaabhalanjile, "Mwanangu, unakole lipamba! Ngulupai jako jikulamiye." Bhakongwe bhala gubhalamile shilwele shabho shila malanga gala.
Bhashinkupagwa na bhakongwe bhamo bhatendaga lwala nsholosholo yaka likumi limo na ibhili. Bhene bhakongwebho bhashinkulajilila kwenda mubhamitela bhabhagwinji. Na bhashinkujonanga indu yabho yaigwinji nkuilwaya na bhanalame, ikabhe nipunda kulwaliya. Bhakapilikaneje ngani ja a Yeshu, gubhapite, nipekenya lugwinjili lwa bhandu lula kunyuma ja a Yeshu, gubhapite kwaya nngubho jabho. Bhashinkutenda nneyo, pabha bhashinkwiibheleketela bhayene kuti, "Ngwayape nngubho jabho, shiname."
Shangupe nsholosholo gula ukupumulaga, gubhaibhweni nshiilu shabho kuti bhalamile shilwele shabho shila.
Bhai nnikundi lya bhandu mula bhashinkupagwa bhakongwe bhamo bhalwalaga nsholosholo yaka likumi limo na ibhili, bhashinkumaliya indu yabho yowe ku bhamitela, ikabheje jwakwapi akombwele kwaalamya.
Bhakongwe bhala gubhaakagwile a Yeshu pa nnyuma, gubhaakwashiye libhiniko lya nngubho jabho. Popo pepo gubhalamile shilwele shila.
A Yeshu gubhabhushiye, "Gani angwashiye?" Bhowe gwaajangulenje kuti jwakwapi ankwashiye. Na a Petili gubhashite, "Mmaajiganya, lugwinjili lwa bhandu lushikunngumbalila nikuntimbilila ndendende!"
Ikabheje a Yeshu gubhashite, "Apali mundu angwashiye, pabha njikwiipilikana mashili galinjoka." Bhakongwe bhala bhakabhoneje kuti ikakomboleka kwiiya, gubhailangwiye bhalitetemela kwa jogopa, gubhaatindibhalile a Yeshu. Penepo gubhatalashiye pa bhandu bhowe shiumilo sha kwaakwaya a Yeshu na shibhashite lamywa gwanakamope. A Yeshu gubhaabhalanjile. "Mwanangu ngulupai jako jikulamiye. Ujende kwa ulele."
Ressurreições
Jesus ressuscitou mortos — a filha de Jairo, o filho da viúva de Naim e Lázaro. Ele é Senhor sobre a morte.
A Yeshu Bhanakunyuya Mwali na Lamya Bhakongwe Bhamo
A Yeshu bhalinkubheleketa genego, a kalongolele bha Shiyaudi gubhaishe, nitindibhala bhalinkuti, "Mwali jwangu ashiwa nnainope, shonde ngunakunnjuga tulongane nkammishile nkono gwenu shalame." A Yeshu gubhajabhwile nikwaakagula pamo na bhaajiganywa bhabho.
A Yeshu bhakaisheje ku nyumba ja bhakulungwa bhala gubhaabhweninji bhaagombanga imbeta na bhandunji bhabhagwinji bhalinginji nshililo, gubhaabhalanjilenje, "Nshokangane! Mwaliju jwanngawa, ikabheje ashigonape." Nigubhaeshilenje kwa kaje. Bhai, bhandunji bhala bhakashokangananjeje, a Yeshu gubhajinjile nkati, gubhankamwile nkono, mwali jula gwajimi nnyene.
Penepo gubhaishe bhakulungwa bhamo bha shinagogi bhashemwaga a Yailo. Bhakaabhoneje a Yeshu gubhaigwishiye pa makongono gabho, gubhaashondelesheye bhalinkuti, "Mwali jwangu jwannung’una nnwele tome nawa. Shonde twende nkammishile makono genugo nkupinga alame." Bhai, a Yeshu gubhalongene nabho. Na bhandunji bhabhagwinji gubhaakagwilenje, akuno bhalinokolananga nkwaabhandishila.
Gubhaikengenenje kunngwabho bhakulungwa bha shinagogi bhala, na a Yeshu gubhapilikene njobhela na ililo na gubhaaimenenje bhandu bhabhagwinji bhalikwigutanjilanga. Gubhajinjile nnyumba, gubhaalugulilenje, "Pakubha nnajobhelanga na guta? Mwali jwangawa, ashigonape."
Ikabheje bhalabhonji gubhaeshilenje. Bhai, gubhaakopoyenje bhowe palanga, gubhaatolile ainagwe na akwabhe mwali jula na bhaajiganywa bhabho bhatatu bhala, gubhajinjilenje kukati kwagonile mwali. Kungai gubhankamwile nkono, gubhammalanjile, "Talita kumi" Malombolelo gakwe, "Mwali ngunakuubhalanjila ujinushe!"
Shangupe mwali gwajimi, gwatandwibhe kujima jima. Paliji jwa yaka likumi limo na ibhili. Penepo bhandu gubhakanganigwenje kwa kaje.
A Yeshu nigubhaabhushiyenje, "Bhai bhandu bha lwene lubhelekolu naalandanyanje na nndi? Paakulandananga na shindu shashi? Bhashilandananga na bhana bhatemingene pa lubhala lwa ushiya indu, bhalishemananga ashayenenji.
Twashinkunngombelenga imbeta, ikabheje mwangainanga!
Twashinkunnjimbilanga nyimbo ya ililo ikabheje mmanganya mwangagutanga!
Pabha a Yowana bhashinkwiya, bhatendaga tabha na bhakang’waga divai, mmanganya gunshitenje. ‘Bhakwete lioka!’ Najwalakwe Mwana juka Mundu ashiika, analya na kung’wa, mmanganya gunshitenje. ‘Munnolanje, jwa doka na kolelwaju, mmbwiga nnjabhonji bhakamula koli na bhakwetenje yambi!’ Nkali nneyo, lunda lwa a Nnungu lumanyishe kuti lwa mmbone na lwa aki kubhandu bhowe bhakundilenje."
A Yeshu Kumui kwa a Shimoni Bhapalishayo
Bhapalishayo bhamo bhashinkwaashemela shalya a Yeshu kunngwabho. Nigubhajinjile nnyumba ja a bhapalishayo bhala gubhatemi kulya shalya. Bhai, pene pa shilambo pala, bhashinkupagwa bhakongwe bhamo bhakwete yambi. Bhakapilikaneje kuti a Yeshu mubhali nnyumba ja a Palishayo bhala, gubhatolile shupa sha mauta ga nunjila shieleywe kwa liganga lya alabhashita.
Penepo gubhaishe bhandu bhamo bhashemwaga a Yailo bhakulungwa bha shinagogi, gubhaatindibhalile a Yeshu, gubhaajujile bhajende kunngwabho, pabha nabhiti jwabho jwa yaka likumi limo na ibhili, numbe jwa jikape, paliji nnwele tome nawa.
A Yeshu bhali nkwenda, bhandunji bhatendaga nokolananga nkwaabhandishila.
A Yeshu bhakanabhe maliya kubheleketa a Yailo gubhapeleshelwe ntenga kukopoka kungwabho, "Mwali jwenu awile, igala gabhuli kupunda kwaabhuya bhaajiganya?" A Yeshu bhakapilikaneje genego, gubhaabhalanjile a Yailo, "Mmwe nnajogope nkulupalilepe, shalame."
Bhakaisheje kumui bhangapinga kujinjila naka mundu juna ikabhe na a Petili na a Yowana na a Yakobho pamo na bhankwetenje mwana jula. Bhandu bhowe pubhalinginji nkunngutila ililo. A Yeshu gubhaabhalanjilenje, "Mpumulanje kuguta, pabha mwana jwangawa ashigonape!"
Bhalabhonji gubhaeshilenje, pabha bhamumanyinji kuti mwana awile. Ikabheje a Yeshu gubhankamwile nkono, nikunshema, "Mwanangu jumuka!" Gumi gwakwe ukummujilaga, shangupe gwajumwishe. A Yeshu gubhaalugulilenje bhampanganje shalya. Bhankwetenje gubhakanganigwenje kwa kaje, ikabheje a Yeshu gubhaamulishenje bhanannugulilanje mundu jojowe gene gatendeshe gala.
Kuwa kwa a Lashalo
Bhai bhandu bhamo bhashemwaga a Lashalo bhatendaga lwala, kubhatamaga ku Bhetania, shilambo shibhatamanganaga a Malia na a Malata, ashaalumbu bhabho. A Malia ni bhene bhaapashile mauta Bhakulungwa nikwaunguta na umbo yabho, alumbu bhabho ni a Lashalo bhaaliji bhalwele. Bhai, ashalumbu bhabho gubhaapeleshelenje ntenga a Yeshu bhalinkutinji, "Mmakulungwa, ambwiga ajenu bhalwele!"
A Yeshu bhakapilikaneje nneyo, gubhashite, "Shene shilweleshi nngabha sha bhulaga, ikabhe kwa ligongo lya kwaakuya a Nnungu, nkupinga Mwana jwa a Nnungu akuywe kwa shenesho."
A Yeshu bhashinkwaapinganga a Malata na akulu bhabho na alumbu bhabhonji a Lashalo. Bhai a Yeshu bhakapilikaneje ntenga gwa kuti a Lashalo bhalwele, gubhapundile tama pala mobha gana gabhili. Kungai gubhaalugulilenje bhaajiganywa bhabho, "Twendangananje kabhili ku Yudea!"
Bhaajiganywa gubhaalugulilenje, "Mmaajiganya! Mobha gashokope gapitile Bhayaudi bhapingaga kunkomanga maganga, igala nkupinga kwenda koko kabhili?" A Yeshu gubhajangwile, "Bhuli malanga ga mui nngabha pugali mashaa kumi na gabhili? Bhai, mundu aowaga mui akakubhala, pabha alikushibhona shilangaya sha shilambolyoshi. Ikabheje mundu aowaga nnubhindu anakubhala pabha shakwa shilangaya." A Yeshu bhakamaliyeje bheleketa gene malobhego, gubhaalugulilenje, "Ambwiga ajetu a Lashalo bhashigona, ikabheje nne shingaajumuye."
Bhai, bhaajiganywa bhabho gubhaalugulilenje, "Mmakulungwa, ibhaga bhashigona, shibhalame." Bhanganyanjibho pubhaganishiyangaga kuti bhanataya ga gona lugono, mbena ibhatayaga kuwa kwa a Lashalo.
Bhai, a Yeshu gubhaabhalanjilenje gwangali nng’iyo, "A Lashalo bhashiwa,
Domínio sobre a natureza
Jesus acalmou a tempestade, andou sobre as águas e multiplicou pães. A natureza obedece à voz do seu Criador.
A Yeshu Bhanaamulisha Mabhimbili Gatondobhe
A Yeshu gubhakwelile muntumbwi, pamo na bhaajiganywa bhabho, gubhapitengenenje. Kashokope, mbungo jikulungwa jikupugaga nnitanda mula, mpaka mabhimbili ga mashi gugajinjile muntumbwi mula. Ikabheje a Yeshu bhashinkugona lugono. Bhaajiganywa bhabho gubhapite kwaajumuya bhalinkutinji, "Mmakulungwa, ntutapule, tunatitimila!" A Yeshu gubhaalugulilenje, "Mmanganya nkwetenje ngulupai jishoko, pakuti nnajogopanga?" Bhai gubhajimi, gubhajikalipile mbungo na mabhimbili gala, guitendile jii kwa kaje. Bhandu bhala gubhalapilenje bhalinkutinji, "Bhenebha bhandu bhashi? Nkali mbungo na mabhimbili inakwaakunda!"
Ligulo, bhaajiganywa bhabho gubhaajendelenje gubhaalugulilenje, "Putuli pano pa anga na ligulo liishe. Bhai, mwaalajilanje bhandunji bhajendangane kushijiji bhakaiumilanje shalya." A Yeshu gubhaalugulilenje, "Ikapinjikwa bhajendangane, mmanganyanji mwaapanganje shalya." Na bhalabhonji gubhaalugulilenje, "Jitukwete mikate nng’anope na yamaki ibhili."
A Yeshu gubhaalugulilenje, "Mmbanganje yowe akuno." Gubhaamulishe bhandu bhatamangane mmanyai. Kungai a Yeshu gubhatolile mikate nng’ano jila na yamaki ibhili ila, gubhalolile kunnungu, gubhaatendele eja a Nnungu. Kungai gubhagebhenye mikate jila, gubhaapelenje bhaajiganywa bhabho, na bhalabhonji gubhaapelenje bhandunji. Bhandu bhowe gubhalilenje, nijukuta. Kungai bhaajiganywa gubhakundikenyenje malepei gala, gubhagumbeyenje ikapu yaishoko likumi limo na ibhili. Bhandu bhalilenje bhala pubhalinginji bhanabhalume elupu nng’ano, gwangali kwabhalanganishiyanga bhanabhakongwe na bhana.
Shilo, tome na kumashelo, a Yeshu gubhaajendelenje bhaajiganywa bhalikwenda panani mashi.
A Yeshu Bhanakwaaliyanga Shalya Bhandu Elupu Nsheshe
Bhai, a Yeshu gubhaashemilenje bhaajiganywa bhabho, gubhashite, "Ngunakwaabhonelanga shiya bhandunjibha, pabha bhashitamangana na nne mobha gatatu, nnaino bhangalinginji shalya. Ngapinga kwaalekanga bhajabhulangane gwangali kulya shalya, bhanaondokanga mumpanda."
Bhaajiganywa bhabho gubhaalugulilenje, "Putulipano paanga, shitupate kwei shalya sha jukuta bhandu bhabhagwinji nnei?"
A Yeshu gubhaabhushiyenje, "Mikate jilingwa jinkwetenje?" Gubhaajangwilenje, "Shabha na yamaki ishokope."
Bhai, a Yeshu gubhaamulishenje bhandu bhatamangane pai. Gubhatolile mikate shabha jila na yamaki ila, gubhatendile eja kwa a Nnungu, gubhagebhenye, gubhaapelenje bhaajiganywa bhabho, na bhalabhonji gubhaagabhanishiyenje bhandunji. Bhowe gubhalilenje nijukuta. Kungai gubhakundikenyenje malepei, gubhagumbeyenje ikapu shabha yaikulungwa. Bhalilenjebho pubhalinginji bhanabhalume elupu nsheshe, gwangali kubhalanganishiya bhanabhakongwe na bhana.
Kulipa Koli ja Liekalu
A Yeshu na bhaajiganywa bhabho bhakaikanganeje ku Kapalanaumu, bhakamula koli ja liekalu bhala gubhaajendelenje a Petili, gubhaabhushiyenje, "Bhuli, bhaajiganya bhenunji bhalilipa koli ja Liekalu?"
A Petili gubhajangwile, "Elo, bhalilipa." Bhai a Petili bhakajinjileje nnyumba, bhakanabhe bheleketa lilobhe, a Yeshu gubhaabhushiye, "A Shimoni, mmwe nkubhona bhuli? Ashimpalume bha shilambolyo bhanalonganga koli kwa ashigani? Kwa ashaayene shilambo eu ku bhajeninji?"
A Petili gubhajangwile, "Kopoka ku bhajeninji." A Yeshu gubhaalugulile, "Bhai monaga nneyo, bhashilambo bhakaalipanga koli. Ikabheje tunaatumbayanje, nnjende kulitanda nkatambishe ndowana, shamaki shatandubhe tanjilajo muntole, munng’unukule kang’wa, nkatimo shimwiimane mmbiya ya koli. Ntole nkaapanganje pangunne na mmayene."
Nkongo Ukaogoya
Lyambape a Yeshu bhalibhuja kwenda ku Yelushalemu, gubhakwete shibhanga. Gubhagubhweni nkongo gumo gwa tini nnyenje mpanda, gubhaujendele, ikabheje bhangashibhona shindu ikabhe maambape. Bhai, gubhaulugulile nkongo gula, "Unaogoye kabhili iepo pitipiti!" Shangupe nkongo gwa tini gula ukunyalaga.
Bhaajiganywa bhakaubhonanjeje bhashinkulapanga, gubhashitenje, "Kwa nndi agu nkongogu ushinyala shangupe?" A Yeshu gubhaajangwilenje, "Kweli ngunakummalanjilanga, monaga nkolangaga ngulupai gwangali lipamba, shinkombolanje tenda nngabha ga ntinipe, ikabheje nkali kushilugulila ashi shitumbishi, ‘Tutumbuka ukatumbushile mmashi,’ shiitendeshe. Na nkolangaga ngulupai, shoshowe shishinnjuganje kwa a Nnungu, shimpegwanje."
Bhai, mbungo jikulungwa gujitandwibhe kupuga, mabhimbili gakukomaga muntumbwi mula, mpaka ntumbwi ukutandubhaga kugumbala mashi. A Yeshu mubhaliji nnyuma ntumbwi bhagonile bhaijegamile pa nto. Bhai, bhaajiganywa gubhaajumwiyenje bhalinkutinji, "Mmajiganya, bhuli, nkaimuka kuti tupingawa?"
Bhai, gubhajumwishe, gubhajikalipile mbungo jila nikugaamulisha mabhimbili ga mashi, bhalinkuti, "Nyenye! Mpumule!" Penepo mbungo jila gujipumwile, nibha ilili kaje. Kungai a Yeshu gubhaalugulilenje bhaajiganywa bhabho, "Pakuti nnajogopanga? Launo mwangalinginji ngulupai?"
Gubhajogopenje kwa kaje, gubhabhuyenenje, "Bhenebha agani, nkali mbungo na mabhimbili ganakwaapilikana?"
Ikaishileje tome na ligulo, bhaajiganywa bhabho gubhaajendelenje a Yeshu gubhaalugulilenje, "Nnaino kupilile, na putuli pano pa anga. Mbaya mwaalugulilanje bhandu bhajendangane muilambo na mmigunda ja tome, bhakaiumilanje shalya."
A Yeshu gubhaalugulilenje, "Mwaapanganje shalya mmanganya." Nabhalabhonji gubhaabhushiyenje, "Bhuli, tujende tukaume mikate ja mmbiya ya mishaala ja shaka shimo jika mundu?" A Yeshu gubhaabhushiyenje "Nkwetenje mikate jilingwa? Nkalolanjeti." Bhakalolanjeje, gubhaalugulilenje, "Jipali mikate ng’ano na yamaki ibhili."
A Yeshu gubhaamulishenje bhaajiganywa bhabho bhaatamikanje bhandu pai mmanyai gamabhii, mmakundi makundi. Bhandu gubhatemingenenje mmakundi makundi ga bhandu makumi kumi na makundi ga bhandu makumi nng’ano. Kungai a Yeshu gubhatolile mikate nng’ano na yamaki ibhili ila, gubhalolile kunnungu, gubhatendile eja kwa a Nnungu, gubhagebhenye mikate jila na gubhaapelenje bhaajiganywa bhabho nkupinga bhaagabhanishianje bhandu. Na yamaki gubhatendile nneila peila. Bhandu bhowe gubhalilenje nijukuta. Gubhalokotenje malepeyo ga ipande ya mikate na yamaki, nigumbayanga ikapu likumi limo na ibhili. Bhandu bhalilenje mikate jila pubhalinginji bhanabhalume elupu ng’ano, gwangali bhalanganishiya bhanabhakongwe na bhana.
Bhai, gubhaabhweninji bhaajiganywa bhalilajililanga na ngoi ya nokolela ntumbwi, kunokola mashi, pabha mbungo jashinkupuga shilinyuma. Kumashelo a Yeshu gubhaajendelenje bhalikwenda pantundu mashi bhalipinga kwaapitangana. Ikabheje bhakaabhonanjeje bhalikwenda pantundu mashi, gubhaganishiyenje pana shiwili shabho, gubhajobhelenje.
Pabha bhowe bhakaabhonanjeje a Yeshu bhashinkujogopanga. A Yeshu gubhabhelekete nabhonji, "Mwilumanje, ni nne. Nnajogopanje." Kungai gubhakwelile muntumbwi mubhalinginji mula na mbungo jikutondobhaga. Nabhalabhonji gubhalapilenje kwa kaje.
A Yeshu Bhanakwaliyanga Shalya Bhandu Elupu Nsheshe
Gene mobhago, lugwinjili lwa bhandu gulugumbele kabhili. Pabha bhakakwetenjeje shalya, a Yeshu gubhaashemilenje bhaajiganywa bhabho, gubhaalugulilenje, "Ngunakwaabhonelanga shiya bhandunjibha pabha bhashitamangana na nne mobha gatatu na bhangalinji shalya. Naalugulilangaga bhajabhulangane kunngwabhonji bhalinginji na shibhanga, shibhaondokanje mumpanda, pabha bhananji kubhakopokenje kwatalika."
Bhaajiganywa bhabho gubhaabhushiyenje a Yeshu, "Putuli pano p akonde, tupate kwei mikate ja jukuta bhandu bhowebha?" A Yeshu gubhaabhushiyenje, "Nkwetenje mikate jilingwa?" Gubhaajangwilenje, "Shabha."
Bhai, gubhaamulishenje bhandu bhatamangane pai. Gubhatolile mikate shabha jila gubhatendile eja kwa a Nnungu, gubhajigebhenye, gubhaapelenje bhaajiganywa bhabho bhaapanganje bhandu, na bhalabhonji gubhaapelenje. Bhashinkukolanga na yamaki ishokope. A Yeshu gubhatendile eja kwa a Nnungu, gubhaalugulilenje bhaapanganje bhandu. Bhandu gubhalilenje na jukuta. Gubhakundikenyenje malepei gubhagumbeyenje ikapu shabha. Bhandu bhalilenje bhala pubhalinginji mbuti elupu nsheshe. A Yeshu gubhaalajilenje bhandu, nikwaalekanga bhajendangane kumui.
A Yeshu Bhanakuulosha Ntini
Malabhi gakwe bhalinkushokangana ku Bhetania, a Yeshu gushaapoteshe shibhanga. Bhai, gubhagubhweni nkongo ntini kwa taliya uli na maamba. Gubhagujendele nkuganishiya pana shibhakaiimane iepo. Bhakaisheje gubhagaimene maambape, pabha nngabha miongwe ja ogoya iepo. A Yeshu gubhaulugulile ntini gula, "Tandubhila lelo na mobha gowe, mundu akalya iepo yako." Na bhaajiganywa bhabho gubhapilikenenje malobhe gubhabhelekete.
Majiganyo ga Ntini Ujumwile
Pa lyamba lyakwe bhalipitangana, gubhagubhweninji nkongo ntini gula gujumwile gowe kuumila kumbubhu. A Petili gubhakumbushile, gubhaalugulile a Yeshu, "Mmajiganya, nnole! Ntini gumuuloshile gula, gujumwile!"
A Yeshu gubhaalugulile, "Nnapinjikwanga mwakulupalilanje a Nnungu. Kweli ngunakunnugulilanga, mundu ashilugulilaga ashi shitumbishi, ‘Tutumbuka ukaileshele mmashi,’ akuno akakola lipamba muntima gwakwe, ikabhe alikulupalila kuti yowe yabheleketayo inatendeka, shatendelwe shene shindusho. Kwa nneyo ngunakunnugulilanga, punkujuganga shindu kwa a Nnungu, nkulupalilanje kuti mpegwilwenje na shimpegwanje. Punkujuganga Nnungu, munneshelelanje jojowe annebhilenje, nkupinga Ainabhenunji bhali kunnungu, bhanneshelelanje yambi yenunji."
A Yeshu Bhanashema Bhaajiganywa bha Ndandubho
Lyubha limo a Yeshu bhashinkujima nnyenje litanda lya Geneshaleti na bhandu bhabhagwinji bhalibhaatimbililenje bhalinokolananga nkwabhandishila, kupinga pilikanishiya lilobhe lya a Nnungu. Gubhajibhweni mitumbwi jibhili nnyenje litanda. Ashaayene bhatanda yamaki bhashinkutulukanga kualaya mau gabhonji. A Yeshu bhakajinjileje mumashua gumo gwaaliji gwa a Shimoni, gubhaalugulile a Shimoni bhaunokolesheye mmashi ga taliya kashoko na mumpelo litanda. Gubhatemi, gubhajigenye lugwinjili lwa bhandu bhali mmashua.
Bhakamaliyeje kujiganya, gubhaalugulile a Shimoni, "Mpeleshe ntumbwi pa shilindili, nkatejelanje mau genunji ntandanje yamaki."
A Shimoni gubhaajangwile, "Mmakulungwa, tushisheya shilo showeshi nkutanda yamaki ikabheje shakwa shitupatile, ikabheje pabha nkubhalanga mmwe, shindejele mau gano." Bhakatejelanjeje mau gabhonji, gubhapatilenje yamaki yaigwinji, nkali mau gugatandwibhe kukutuka. Gubhaashemilenje ashaajabhonji bhalinginji mmitumbwi jina gubhaikengenenje kukwajangutanga, gubhagumbeyenje yamaki mitumbwi jinaabhili, gujitandwibhe kutitimila mmashi.
A Shimoni Petili bhakabhoneje nneila, gubhaatindibhalile a Yeshu, gubhashite, "Mwiijabhulile apano Mmakulungwa, pabha nne nankulebha!"
A Shimoni na ashaajabhonji gubhakanganigwenje gaapata yamaki yaigwinji nneila. Nneila peila a Yakobho na a Yowana bhana bha a Shebhedayo bhalinginji bhatanda yamaki ajabhonji a Shimoni gubhakanganigwenje. A Yeshu gubhaalugulile a Shimoni, "Nnajogope, kutandubhila nnaino nkatanda yamaki, ikabheje liengo lyenu shilibhe lya tanda bhandu."
Bhai bhakajikwakwatanjeje mitumbwi jila mpaka palanga ja litanda, gubhaleshilenje yowe gubhaakagulenje a Yeshu.
A Yeshu Bhanatondobhya Mbungo na Mabhimbili
Lyubha limo a Yeshu na Bhaajiganywa bhabho bhashinkukwelanga mmashua, gubhaabhalanjilenje, "Tujomboshe litanda tuishe kung’ambu." Bhai, mwanja niguutandwibhe. Bhalinginji mmashua, a Yeshu gubhagonile lugono. Mbungo na mabhimbili gamakulumakulu gugatabhile, mashi nigugatandwibhe kupakushila mmashua, nigubhajogopenje kaje, nibha atali.
Bhaajiganywa bhala gubhapite kukwaajumuyanga a Yeshu, bhalinkutinji, "Mmakulungwa, Mmakulungwa, tunawa!" A Yeshu nigubhajumwishe, nigubhajikalipile mbungo na mabhimbili gala, niguitondwebhe, kwa jii. Penepo nigubhaabhushiyenje, "Jili kwei ngulupai jenunji?" Gubhakanganigwenje na jogopa, akuno bhalibhuyananga, "Igala bhenebha bhandu bhashi, nkali mbungo na mabhimbili bhanakwiamulisha nikwaapilikana?"
A Yeshu Bhanatondobhya Mbungo na Mabhimbili
Lyubha limo a Yeshu na Bhaajiganywa bhabho bhashinkukwelanga mmashua, gubhaabhalanjilenje, "Tujomboshe litanda tuishe kung’ambu." Bhai, mwanja niguutandwibhe. Bhalinginji mmashua, a Yeshu gubhagonile lugono. Mbungo na mabhimbili gamakulumakulu gugatabhile, mashi nigugatandwibhe kupakushila mmashua, nigubhajogopenje kaje, nibha atali.
Bhaajiganywa bhala gubhapite kukwaajumuyanga a Yeshu, bhalinkutinji, "Mmakulungwa, Mmakulungwa, tunawa!" A Yeshu nigubhajumwishe, nigubhajikalipile mbungo na mabhimbili gala, niguitondwebhe, kwa jii. Penepo nigubhaabhushiyenje, "Jili kwei ngulupai jenunji?" Gubhakanganigwenje na jogopa, akuno bhalibhuyananga, "Igala bhenebha bhandu bhashi, nkali mbungo na mabhimbili bhanakwiamulisha nikwaapilikana?"
A Yeshu Bhanakunnamya Mundu Aakwete Maoka Kugelashi
Gubhaikengenenje kushilambo sha Bhagelashi, shilolana na ku Galilaya kung’ambu ja litanda.
Lyubha lilititimila, likumi limo na bhabhili bhala gubhapite kwaalugulilanga, "Mwaalajilanje bhandunji bhajendangane mwilambo na mmigunda ja tome, bhakaloleyanje shalya na mwagona, pabha putuli pano pakonde."
Ikabheje a Yeshu gubhaabhalanjilenje, "Mmanganya mwaapanganje shalya." Gubhajangulenje, "Twangali shalya, ikabhe mikate nng’ano na yamaki ibhilipe. Igala tukaume shalya sha bhandu bhowebha!" Pabha pepala, pubhalinginji bhanabhalume kuishila elupu nng’ano. Bhai, a Yeshu gubhaabhalanjilenje bhaajiganywa bhabho, "Mwaatamikanje makundi ga bhandu makumi nng’ano nng’ano."
Bhaajiganywa gwaatendilenje malinga shibhabhalanjilwenje, gubhaatamikenje bhowe. Kungai a Yeshu gubhatolile mikate nng’ano na yamaki ibhili ila, gwaalolile kunani kunnungu, gubhatendile eja kwa a Nnungu ga mikate na yamaki ila, gubhagebhenye na gubhaapelenje bhaajiganywa bhabho bhaapanganje bhandunji. Gubhalilenje bhandu bhowe, mpaka kujukuta, gubhalokotenyenje ipande ya malepei, nigumbaya ikapu likumi limo na ibhili.
A Yeshu ku Ndowa ja ku Kana
Pantondo gwakwe jashinkupagwa ndowa kunjini ku Kana, shilambo sha Galilaya na anyinabhabho a Yeshu bhaapali, a Yeshu na bhaajiganywa bhabho nabhalabhonji bhashinkushemwanga ku ndowajo. Divai ja ndowa jikamaleje, anyinabhabho a Yeshu gubhaabhalanjile, "Bhangalinginji divai!"
A Yeshu gubhaajangwile, "Mama, uwe shetu nndi? Malanga gangu gakanabheika."
Anyinabhabho gubhaabhalanjilenje bhatumishi, "Lyolyowe lishibhannugulilanje, ntendanje."
Penepo gashinkupagwa matende shita ga maganga, litende limo lya gumbala lulo pabhili eu patatu. Gashinkubhikwa penepo kwa nkubho gwa Bhayaudi gwa tawasha. A Yeshu gubhaalugulilenje, "Nngumbayanje mashi mmatendemo." Nabhalabhonji gubhagumbeyenje tetete. Kungai gubhaalugulilenje bhatumishi, "Nnaino ntekanje nkaapanganje bhakulungwa bha kalamu."
Bhakulungwa bha kalamu bhakapayeje divai jaliji mashi jila, bhangakumanya kujakoposhele, ikabheje bhatumishi bhateshilenje mashi bhamumanyinji. Bhakulungwa bha kalamu bhala gubhanshemile nkulomba, gubhannugulile, "Bhandu bhowe bhanatandubhanga kutekanya divai ja mmbone, bhapapilangaga kwa kaje nitekanyaga jangali jammbone. Ikabheje mmwe nshigoya divai jammbone mpaka nnaino!"
Sheneshi shilangulo sha ndandubho shibhatendile a Yeshu ku Kana ja Galilaya, gubhalangwiye ukonjelo gwapuya gwabho, bhaajiganywa bhabho gubhaakulupalilenje.
Bhashinkubheleketa genego nkwaalinga a Pilipi, pabha bhayene bhashimanyi shishibhatende.
A Pilipi gubhaajangwile, "Nkali mikate ja mmbiya yaigwinji, nngajenela kwa bhandunjibha nkali kila mundu apate shipande shishokope!"
Jumo munkumbi gwa bhaajiganywa bhabho ashemwaga a Ndeleya, mpwabho a Shimoni guna pubhashemwaga a Petili, akwaalugulilaga, "Apano apali mwana jumo akwete mikate nng’ano ja mbungalai na yamaki ibhili, ikabheje yenei shiipwae nndi na lugwinjili lwa bhandunjilu?"
A Yeshu gubhashite, "Mwaatendanje bhandunji bhatamangane pai." Pashinkupagwa manyai gamagwinji penepo. Bhai, bhandu gubhatemingenenje. Bhanabhalume jika pubhalinginji elupu nng’ano. A Yeshu gubhatolile mikate jila, gubhatendile eja kwa a Nnungu, gujigebhenywe ku bhandunji bhatemingenenje bhala, nneyo peyo gubhatendile kwa yamaki ila, kila mundu gwapatile mwapinjile. Bhandu bhakajukutanjeje, a Yeshu gubhaalugulilenje bhaajiganywa bhabho, "Nkundikanyanje makombo galepeshe gala ganaobhe." Bhai, gubhakundikenyenje ipande ya mikate ibhalepelenje bhandu bhalyangangaga bhala, gubhagumbeyenje ikapu likumi limo na ibhili.
Bhaajiganywa bhala bhali bhapitengenenje kwaataliya mbuti maili gatatu eu nsheshe, gubhaabhweninji a Yeshu bhali bhabhandishile mashua bhaliowa pantundu mashi, gubhajogwepenje kwa kaje. A Yeshu gubhaalugulilenje, "Nnajogopanje, ni nne!" Bhai gubhakundilenje kwaajigala mmashua mula, kashokope gubhaikengenenje kung’ambu kubhajendanganaga kula.
A Yeshu Bhanabhoneka ku Bhaajiganywa Shabha
Gakapiteje genego, a Yeshu gubhaakoposhelenje kabhili bhaajiganywa bhabho kunyenje litanda lya Tibheliya, puyaliji nnei. A Shimoni Petili na a Tomashi bhashemwaga Bhammba na a Natanaeli bha ku Kana ja Galilaya na bhana bhabhili bha a Shebhedayo na bhaajiganywa bhabho bhananji bhabhili, bhowe pubhalinginji pamo. A Shimoni Petili gubhaalugulilenje ajabhonji, "Ngunakwenda kutanda yamaki." Nabhalabhonji gubhaajangwilenje, "Na uwe shitunkagule." Bhai, gubhajabhwilenje, gubhakwelilenje muntumbwi, ikabheje shene shilosho bhangapatanga shindu. Lyambape, a Yeshu gubhajimi nnyenje litanda, ikabheje bhaajiganywa bhangaamanyanga kuti bhenabho a Yeshu. Bhai, a Yeshu gubhaabhushiyenje, "Ashibhanangu, mpatilenje shamaki jojowe?" Gubhaajangwilenje, "Nng’oo."
A Yeshu gubhaalugulilenje, "Ntejelanje lyau lyenunji nkono nnilo gwa ntumbwi gwenunji shimpatanje yamaki." Bhai gubhatejelenje lyau lyabhonji, ikabheje gubhalepelenje kuuta kabhili kwa ligongo lya shuluka yamaki.
Bhai nkujiganywa apingwaga na a Yeshu jula, gwabhabhalanjile a Petili, "Bhenebha Bhakulungwa!" A Shimoni Petili bhakapilikaneje kuti Bhakulungwa, gubhaitabhile nngubho jabho pabha bhakaweteje ukoto, gubhaitumbushiye mmashi. Ikabheje bhaajiganywa bhananji bhala gubhabhujilengene kunyenje litanda na ntumbwi gula, akuno bhaliutanga lyau ligumbele yamaki, pabha yaliji tome kulitaka, pubhalinginji malinga meta makumi kumi kukoposhela kunyenje litanda. Bhai bhakaikanjeje kulitaka, gubhagubhweninji moto gwa makala na pantundu jakwe ilijokwa yamaki na nkate. A Yeshu gubhaalugulilenje, "Njianayonji yamaki ishoko intandilenje."
Bhai, a Shimoni Petili gubhakwelile muntumbwi mula, gubhautile lyau lila mpaka kulitaka, ligumbele yamaki yaikulungwa makumi kumi na nng’ano na itatu. Nkali yashulwishe nneyoyo, lyau lila lyangapapuka.
Libertações
Jesus expulsou demônios com autoridade. Os espíritos impuros não resistiam à sua palavra e saíam imediatamente.
A Yeshu Bhanakunamya Ntumishi jwa Bhakulungwa bha Manjola
A Yeshu bhalijinjila ku Kapalanaumu, nkulungwa jwa manjola jumo gwabhajendele, gwabhashondelesheye alinkuti, "Mmakulungwa, ntumishi jwangu kumui, ashigona nnwele kaje."
A Yeshu gubhaalugulile, "Shinyie ninnamiye."
Bhakulungwa bha manjola bhala gubhaajangwile bhalinkuti, "Mmakulungwa, nne nngabha najwa mmbone kwa jinjila mmwe nnyumba jangu, ikabheje mmelekete lilobhepe naka ntumishi jwangu shalame. Pabha nkali nne nili pai ja ukulungwa uka mundu juna, njikola ashimanjola bhalinginji pai jangu. Ninnugulilaga jumo, ‘Jabhula!’ Anajabhula, naka juna, ‘Jia!’ Alikwiiya, naka ntumwa jwangu, ‘Tenda ashi!’ Anaatenda."
A Yeshu bhakapilikaneje genego, gubhakanganigwe, gubhaalugulilenje bhaakulupalilangaga bhala, "Kweli ngunakummalanjilanga, nganabhe kummona mundu pa shilambo sha Ishilaeli akwete ngulupai jikulungwa malinga jeneji. Bhai, ngunakummalanjilanga kuti bhandu bhabhagwinji bhapinga kwiyangana kopoka kulikoposhela lyubha na kulititimila, nabhalabhonji bhapinga tamangana pa kalamu na a Bhulaimu na a Ishaka na a Yakobho Muupalume gwa Kunnungu. Ikabheje bhapinjikwangaga kubha Muupalume shibhabhinjilwanje ku lubhindu lwa palanga, kushibhagutanje na tauna meno."
Kungai a Yeshu gubhaalugulile bhakulungwa bha manjola bhala, "Mmuje kumui, ibhe malinga shinshite kulupalila." Naka ntumishi jwabho gwalamile malanga gala.
A Yeshu Bhanakwaashoyanga Maoka Bhandu Bhabhili
A Yeshu bhakaisheje kung’ambu ku shilambo sha Bhagadala, gubhaimenenje bhandunji bhabhili bhakwetenje maoka bhalikoposhelanga kumakabhuli. Bhashinkujogoyanga na jwakwa mundu akombolaga kupita gwene mpandago. Gubhatandwibhenje jobhela bhalinkutinji, "Nkutuloleya nndi mmwe Bhanabhabho a Nnungu? Bhuli, nshikwiya kutupoteka gakanabhe ika malanga gakwe?"
Bhai, tome na penepo lyashinkupagwa likundi lya ngulubhe ilishungwa. Bhai, ashimaoka bhala gubhaashondelesheyenje a Yeshu bhalinkutinji, "Ibhaga ntushoyaga, ntuleshe tukaajinjilanje ashingulubhe bhala." A Yeshu gubhalugulilenje, "Ayaga, nnjendangane." Gubhaashoshileyenje bhandunji bhala, gubhapite kwaajinjilanga ashingulubhe. Likundi lyowe lya ngulubhe gulieleleshele nnitanda, guiwile yowe.
Ikabheje bhashunga bha ngulubhe ila gubhabhutukenje, gubhapitengene kunnjini. Kweneko gubhatalashiyenje ga ngulubhe ila na ga bhandunji bhakwetenje maoka bhala. Kwa nneyo bhandunji bhowe pa shilambo pala gubhaajendelenje a Yeshu, bhakaabhonanjeje gubhaashondolesheyenje bhajabhule pa shilambo shabhonji.
A Yeshu Bhanakunshoya Lioka Mundu Aliji Bhubhu
Na bhandunji pujabhulangaga, mundu jumo bhubhu akwete lioka, gwapelekwe kwa a Yeshu. Shangupe akashoyweje lioka, mundu jula gwatandwibhe bheleketa. Bhandunji gubhalapilenje bhalinkutinji, "Yene indui tukanabhe kuibhona pa Ishilaeli!"
A Yeshu Naka Bheelishebhuli
Penepo bhandu gubhaapeleshelenje a Yeshu mundu jumo nangalole aliji bhubhu ligongo ashinkukola maoka. A Yeshu gubhanshoshiye lioka jula, gwakombwele kubheleketa na lola.
Ngulupai ja Bhakongwe Bhamo
A Yeshu gubhajabhwile pepala gubhapite tama mmbali ja ku Tilo na ku Shidoni. Bhai, bhakongwe bhamo Bhakanaani bha shene shilambosho gubhaaishile, gubhautiye lilobhe bhalinkuti, "Mmakulungwa, Bhaulongo gwa a Daudi, mmonele shiya! Mwali jwangu analaga kaje lioka." Ikabheje a Yeshu bhangaajangula. Bhai, bhaajiganywa bhabho gubhaajendelenje, nikwaabhalanjila, "Mwaalugulile bhajabhule, pabha bhanakutukagula bhalijobhela."
A Yeshu gubhajangwile, "Nangatumwa ikabhe kubhandu bha ku Ishilaeli bhalinginji malinga ngondolo iobhile."
Penepo bhakongwe bhala gubhaatindibhalile, bhalinkuti, "Mmakulungwa, nnjiye kunnyangutile."
A Yeshu gubhaajangwile, "Nngabha mmbone tola shalya sha bhana nikwiijaila mbwa."
Bhakongwe bhala gubhashite, "Kweli, Mmakulungwa, ikabheje nkali mbwa inalya malepeyo gagwa pa mesha ya ashinangologwe."
Penepo a Yeshu gubhajangwile, "Mama, ngulupai jenu jikulungwa, bhai, ntendelwe malinga shinkupinga." Lioka jula akunshokaga mwali jula, nigwalamile malanga gala.
A Yeshu Bhanakunshoya Lioka Nshanda
Bhakaikangananjeje ku bhandu bhagumbelenje bhala, bhandu bhamo gubhaajendele a Yeshu, nikwaatindibhalila, gubhashite, "Mmakulungwa, mummonele shiya mwanangu ashikola shialala, numbe analaga kaje, papagwinji anagwila pa moto eu mmashi. Nashinkumpeleka kubhaajiganywa bhenu ikabheje bhangakombolanga kunshoya."
A Yeshu gubhajangwile, "Alu lubheleko lwangali ngulupai na lwa puganika! Shindame na mmanganya mpaka shakani? Shinikakatimile na mmanganya mpaka shakani? Munnjiyenajonji akuno mwanajo," Bhai, a Yeshu gubhankalipile liokajo, nigwanshoshile mwana jula, gwalamile malanga gala.
Malanga gogo gwakoposhele mundu jumo aliji nshinagogi mula, akwete lioka lyangali lya mmbone, nigwakweshiye lilobhe alinkuti, "Nkutupinga nndi mmwe a Yeshu Bhanashaleti? Bhuli nshikwiya kutumaliya? Nne nimmanyi mmwe agani, mmwe Mundu jwa ukonjelo jwa Nnungu!"
A Yeshu gubhankalipile lioka jula bhalinkuti. "Pumula! Gunshoshe munduju." Bhai, lioka jwangali jwa mmbone jula gwanngwishiye mundu jula shialala, gwagutile kwa utiya, kungai nigwanshoshile.
A Yeshu Bhanakunshoya Mundu Maoka Gangali ga Mmbone
Bhai, gubhaikengene ku ng’ambu litanda lya Galilaya, ku shilambo sha Bhagelashi. A Yeshu bhakatuleshejepe muntumbwi, shangupe gubhaimikene naka mundu jumo jwa shikilwa maoka gangali gammbone, alikopoka ku makabhuli. Jwene mundujo kwatamaga ku makabhuli na jwakwapi mundu akombolaga kuntabha kabhili kwa mindondolo nkali ja itale, pabha papagwinji bhalinjilenje kuntabha pingu na mindondolo ja itale ikabheje, atendaga kutula mindondolo ja itale jila na kuitemanya pinguyo, na wala jwakwapi mundu ankombolaga. Mui na shilo kwatamaga ku makabhuli na mwiitumbi, alijobhela akuno alipita kwiilengula mmaganga.
Na akaabhoneje a Yeshu kwaataliya, gwabhabhutushile, gwapite kwaatindibhalila. Kwa lilobhe lya utiya nigwashite, "Nkumbinga nndi mmwe a Yeshu bhanabhabho a Nnungu bha kunani kaje? Shonde shonde, kwa lina lya a Nnungu nnamboteshe!" Ashinkubheleketa nneyo pabha a Yeshu bhammalanjile kuti, "Ugwe lioka gwangali gwa mmbone, gunshoshe munduju."
Bhai, a Yeshu gubhammushiye, "Bhandu bhakuushemanga gani?" Gwajangwile, "Lina lyangu ‘Likundi’ pabha putuli tubhabhagwinji." Lioka jwangali jwa mmbone jula, gwabhashondelesheye a Yeshu bhanaabhinganganje nshilambo mula.
Pa tome jakwe lyashinkupagwa likundi lya ngulubhe ilipitalya nshitumbi. Bhai, ashimaoka bhala gubhaashondelesheyenje a Yeshu bhalinkutinji, "Ntupeleshe ku ngulubhe kula tukaajinjilanje." A Yeshu gubhaaleshilenje, nigubhapite kwaajinjilanga ashingulubhe bhala. Na likundi lyowe lya ngulubhe lya ishila elupu ibhili, guieleleshele nnikote shibhutuka mpaka guitumbushile nnitanda.
Bhashunga bha ngulubhe ila gubhabhutukenje, gubhapite shumyanga jene nganijo kunnjini na mmigunda. Bhandunji gubhapitengene kulola itendeshe.
Ikabheje mmanganya nnajiganyanga, ‘Monaga mundu akwete shindu sha kwaapa ainagwe eu akwabhe, abheleketaga kuti, njikwapa a Nnungu, bhai, akapinjikwa kabhili kwaapa ainagwe eu akwabhe.’ Nneyo shinkuti kulinyegayanga lilobhe lya a Nnungu ligongo lya miungu jenunji. Nnatendanga indu yaigwinji malinga yeneyo."
Indu Ikuntenda Mundu Anyate
A Yeshu gubhabhelekete kabhili na lugwinjili lula bhalinkuti, "Mmbilikananje mmowe na mmumanyanje. Shakwa shalya, shalya mundu shikuntenda anyate, ikabhe ikunkopoka nkati ni ikuntenda anyate.
Ngulupai ja Bhakongwe Bhamo bha Shigiliki
A Yeshu gubhajabhwile pepala, gubhapite mmbali ya ku Tilo na ku Shidoni. Kweneko gubhajinjile nnyumba jimo, pubhapingaga inamanyishe na bhandu ikabheje bhangakombola kwiiya. Penepo bhakongwe bhamo bhashinkukola mwali akwete maoka, gubhapilikene ngani ja a Yeshu. Bhai, gubhaishe nikwiigwiya pa makongono ga a Yeshu. Bhene bhakongwebho pubhaaliji Bhagiliki bha ku Poinike shilambo sha Shilia. Bhai, gubhaajujile a Yeshu bhanshoye mwali jwabho lioka jula. A Yeshu gubhaalugulile, "Mwaalekanje bhana bhajukutanjeti, nngabha mwammbone kutola shalya sha bhana nikwiipa mbwa."
Ikabheje bhakongwe bhala gubhajangwile, "Kweli Mmakulungwa, ikabheje nkali mbwa ili pai mesha inalya malepeyo ga bhana." A Yeshu gubhaalugulile, "Kwa ligongo lya lilobhe limmeleketelyo, nnjende, lioka linshoshile mwali jwenu!" Bhai, gubhapite kunngwabho, gubhanng’imene mwali jwabho agonile pa shinanda na lioka jula anshoshile.
Mundu jumo munkumbi mula gwabhajangwile, "Mmajiganya, njikwiyanajo mwanangu kwenu mmwe, ashikola lioka likuntenda anabhelekete. Papagwinji ashikilwaga anakunngwiya pai na kopoka shiulo nkang’wa, alitauna meno na ng’ang’anala shiilu showe. Njinkwaajuganga bhaajiganywa bhenu bhanshoyanje ikabheje bhangakombolanga."
A Yeshu gubhaalugulilenje, "Mmanganya lubheleko lwangali ngulupai! Shindame na mmanganya mpaka shakani? Shinikakatimile mpaka shakani? Munnjiyenajonji akuno." Gubhampelekenje. Shangupe lioka jula akaabhoneje a Yeshu, gwanngwishiye nikunng’ungumiya, aligalabhuka na kopoka shiulo nkang’wa.
A Yeshu gubhaabhushiye ainamundu, "Genega pugampatile kutandubhila shakani?" Nabhalabho gubhajangwile, "Tandubhila ali mwana. Papagwinji lioka linakunngwishiya pamoto na mmashi, nkupinga limmulaje. Bhai, ibhaga nnakombola, ntubhonele shiya na ntujangutile!"
A Yeshu gubhaalugulile, "Kwa nndi nkuti, nkombolaga? Gowe ganaakomboleka kuka mundu akulupalila." Penepo ainamundu bhala gubhagutile bhalinkuti, "Ngulikulupalila! Nnyangutile kwa ungakulupalila gwangu."
A Yeshu bhakalubhoneje lugwinjili lwa bhandu lulikwaajiila shibhutuka, gubhankalipile lioka jula bhalinkuti, "Lioka ukuntenda mwanaju anabhelekete na anapilikane, ngunakuamulisha gunshoshe nshandaju na unannjinjile kabhili!"
Lioka jula gwagutile, gwanng’ungumiye kwa kaje, kungai gwanshoshile. Nshanda jula paliji mbuti ashiwa, na bhananji gubhashitenje kuti, "Awile!" Ikabheje a Yeshu gubhankamwile nkono, gubhannjinwile na jwalakwe gwajimi.
A Yeshu Bhanakwalamyanga Bhandu Bhabhagwinji
A Yeshu gubhakopweshe Nshinagogi, gubhapite kunngwabho a Shimoni. Bhakongwe bhamo akwebhabho a Shimoni bhatendaga sheluka kwa kaje, gubhaajujilenje bhaalamye. A Yeshu gubhajinjile nikwaakotimila bhalwele bhala, nikushikalipila shilwele shila, gushaashoshile. Shangupe bhakongwe bhala gubhajinwishe, gubhatandwibhe kwaatumishilanga.
A Yeshu pubhaulukaga kumbwani, mundu jumo nshilambo jwa shene shilambo shila, akwete maoka, gwabhaishile. Kwa mobha gamagwinji jwene mundujo akawalaga nngubho wala akatamaga nnyumba, ikabhe ndamo jakwe pujaaliji mmashembo ga shishila bhandu. Akaabhoneje a Yeshu, gwajobhele gwaigwishiye pai mmujo jabho akuno alibheleketa kwa utiya, "Mmwe a Yeshu bhanabhabho a Nnungu bhakulu, mmwe nndi na nne? Shonde, ngunajuga nnamboteshe!" Ashinkubheleketa nneyo pabha a Yeshu bhammalanjile lioka jula kuti anshoshe mundu jula. Jwene lioka jwangali jwa mmbone jula akakabhaga kunkamula mundu jula, nkali bhandu bhanng’ugalilanje nnyumba nikuntabha mindondolo ja itale na pingu mmakono na mmakongono, akakabhaga kukutulanya yoweyo, na lioka jula atendaga kumminganjila kuanga.
Bhai a Yeshu gubhammushiye, "Lina lyako gani?" Gwajangwile, "Lina lyangu, ‘Manjola’ " Pabha gashinkunjinjila maoka gamagwinji. Ashimaoka bhala gubhaashondelesheyenje a Yeshu bhanaabhinganjilanje ku Jeanamu.
Penepo lyashinkupagwa likundi lya ngulubhe lilipitalya nshitumbi. Bhai ashimaoka bhala gubhaashondelesheyenje a Yeshu bhaaleshelelanje bhakaajinjilanje ashingulubhe bhala. Na bhalabho a Yeshu gubhaaleshelelenje. Kwa nneyo ashimaoka bhala bhakunshokanganaga mundu jula, gubhaajinjilenje ashingulubhe, gubhaelelenje nnikote shibhutuka, nititimila nnitanda.
Bhalinda bha ngulubhe bhakagabhonanjeje gowe gakoposhele gala, gubhabhutukenje pita shumya nshilambo mula na mmigunda. Bhandunji gubhaikengenenje kulola gakoposhele. Gubhaajendelenje a Yeshu, gubhammweninji mundu ashoshilwe na maoka jula, atemi pa makongono ga a Yeshu, awete nngubho, ali na lunda lwakwe lwa mmbone, gubhajogopenje.
Ngunakummalanjilanga kweli, pano pepano bhapalinji bhananji bhakawanganga mpaka bhaubhonanje Upalume gwa a Nnungu."
A Yeshu Bhanapindikuka Lubhombo
Gakaishileje mobha nane, bhakabheleketeje genego a Yeshu gubhaatolilenje a Petili, a Yowana na a Yakobho, gubhalongenenabhonji kushitumbi kukwaajuga a Nnungu. Pubhaaliji nkwaajuga a Nnungu, nigubhapindikwishe kumeyo, nngubho yabho niwejela akuno ilimelemeta kwa kaje. Shangupe bhandunji bhabhili a Musha na a Eliya gubhabhonekenje bhalikunguluka nabhonji. Bhashinkubhonekanga bhalinginji na Ukonjelo, gubhakungulukenje ga nnganya ja bhulagwa kwabho shijipinga malila ku Yelushalemu.
A Petili na ashaajabhonji bhashinkugonanga lugono lwa tapatapa, ikabheje bhakajumukanjeje, gubhashibhweninji shilangaya sha Ukonjelo Gwapuya gwa a Yeshu na bhandunji bhabhili bhali bhajimi nabhonji. Bhai a Musha na a Eliya bhalijabhulangana kwaaleka a Yeshu, a Petili gubhaalugulile a Yeshu, "Mmakulungwa, shiipwae uwe tubhe apano! Bhai tushenje mishati jitatu, gumo gwenu, gumo gwa a Musha na gumo gwa a Eliya." Ikabheje a Petili bhakaimanyaga ibhabheleketaga.
Penepo mundu jumo nnikundi mula, gwakweshiye lilobhe alinkuti, "Mmaajiganya, shonde munjangutile mwanangu jwa jikaju! Anashikilwa lioka, nikuntenda ajobhele na kunngwiya shialala, akuno shiulo shilikunkopoka nkang’wa. Alipunda kumpoteka kwa kaje na wala akakunneka shangu. Naajujilenje bhaajiganywa bhenu bhanshoyanje, ikabheje bhangakombolanga."
A Yeshu gubhashite, "Mmanganya lubheleko lwangali ngulupai na lwa puganika! Shiniipililile kutama na mmanganya mpaka shakani?" Kungai gubhaabhalanjile bhandu bhala, "Munnjienajo mwana jwenujo apano."
Mwana jula alikwiya kwa a Yeshu, lioka akunngwiyaga shialala. Ikabheje a Yeshu gubhankalipile lioka jula anshoshe, mwana jula gwalamiywe, gubhankamwiye kwa ainagwe. Bhandu bhowe gubhakanganigwenje, kwa ukulungwa gwa mashili ga a Nnungu.
A Yeshu Bhanalondola Kabhili ga Shiwo Shabho
Bhandunji bhala bhalinginji nkukanganigwa kwa yowe ibhaaitendile a ila, a Yeshu gubhaalugulilenje bhaajiganywa bhabho,
A Yeshu Naka Bheelishebhuli
Lyubha limo a Yeshu bhatendaga kunshoya lioka antendaga mundu jumo abhe bhubhu. Bhai lioka jula akanshosheje, mundu jula gwakombwele kubheleketa, lugwinjili lwa bhandu lukukanganigwaga.
Na jumo gwaleshele upanga mukantumishi jwa bhakulungwa bha bhaabhishila, gwankatile likutu lya kunnilo.
Penepo a Yeshu gubhashite, "Bhai nnekanje!" Gubhalikwashiye likutu lila, gubhannamiye.
Bhaajiganywa bha a Yowana bhakajabhulanganeje penepo, a Yeshu gubhatandwibhe kwaalugulilanga bhandu bhagumbelenje bhala nnganya ja a Yowana. "Pumwapitengenenje mukonde kukushibhona nndi? Mwaganishiyanga kukulibhona litete litikinywa na mbungo? Ikabhe nneyo, kumwapitengenenje kulola nndi? Kumwapitengenenje kukunnola mundu awalile nngubho ya bhei jikulungwa? Bhaawalanga nngubho ya bhei jikulungwa nitama ndamo ya poka mwaakutamangana mmajumba ga shipalume! Bhai, mmalanjilanje, mwapitengenenje kulola nndi? Mwapitengenenje kunnola nkulondola? Elo, numbe ngunakummalanjilanga, kupunda nkulondola. Bhenebha ni a Yowana bhalugwilwe Mmajandiko ga Ukonjelo.
‘Ngunakuntuma muntenga jwangu,
Anng’alashiye mpanda gwenu.’ "
"Ngunakummalanjilanga, munkumbi gwa bhabhelekwenje jwakwapi ali jwankulungwa kwaapunda a Yowana Bhabhatisha. Ikabheje, jwene ali jwa nshoko kaje mu Upalume gwa a Nnungu, ni ali jwa nkulungwa kupunda bhenebho."
Bhandu bhowe bhapilikenenje genego na nkali bhaakamula koli nigubhakundilenje kuti a Nnungu ni bha aki na bhanguja pabha bhashinkubhatishwanga na a Yowana. Ikabheje mapalishayo na bhaajiganya bha shalia, bhashinkukananga yatumbililwe na a Nnungu, kwa nneyo nigibhakanilenje kubhatishwa na a Yowana.