Milagres de Jesus

Jisasde ege gomo güre namabereaga

35 Jisas Jeriko fib ere iroto taidüdi, fere güre ege gomo erekobo maga gam gotogüdi ferefinabur kegeamure toto totongeaga, baba kegeweaga. 36 Ferefinabur gin ere oguren baba edüdi, fere menüm totongeaga, "Baba amdagegin?" 37 Bangar wawen, "Jisas Nasaretüb ogureaga." 38 ✝Bana baba ege gomo menüm yogeaga, "Jisas, na Devitüb matanab, na ye kororabie." 39 Fere agfürüdi oguren babawarde, nunurudi menüm wawen, "Na sube gütüwe." Bangeagako, nu bikuwadaid igyogüdi, erenana magaudi mengeaga, "Na Devitüb matanab, na ye kororabie." 40 Bangar Jisas ogura biboudi, fere baba nuge gam igaiudi ogurebüregüdi wangeaga. Ege gomo baba iroto ogurafotuwarbere, Jisasde menüm totoweaga, 41 "Ye na gam am bangebüre güdi gün?" Bangar wageaga, "Erekokai, ye agügebüregün." 42 ✝Bangar Jisasde waweaga, "Ege nab kim namaweregeaga. Kob kainana nagübüde gar nag namaun." 43 Bangar pirikanana ege nub pitoiar agügeaga. Bangar Jisas daiudi kümünadi, Keriabüb yanim siradgabereaga. Bangar ferefinabur gürenakuti baba kegeudi, nin tugu Keriabüb yanim siradgaberen.

Jisasde fere güre lepra subo tugu namabereaga

12 Gürena sese Jisas fib ere güre gam büreaga, baba fib ere gam fere güre tugu büreaga, mube nub gam lepra subo edi ginginuaboudi büreaga. Nu Jisas kegeudi oksosob orudi nurmaga kübüdim gam difürüdi, Jisas menüm waweaga, "Eregeam, na mednarba na ye idaiab Keriabüb ege gam nama taidüi." 13 Bangar Jisasde baba fere gam kube difürüdi menüm waweaga, "Ye mediaga babaure, na idanür Keriabüb ege gam, na namaweregün." Bangar lepra subo pirikanana fere baba ebgadar namaweaga.

18 Bangar fere gürekoi fere güre kemeidi oguren. Fere babab dagar toi gürenakuti kumar kur güre gam kinbüreaga. Bangar kemeidi fatagoime kümüna Jisas iroto diferebüregen, 19 bangeagako, ferefinabur epürafanam büredigegar fib gütügeaga, bangar subo fere kemeidi iruwegi erekobo, kene. Bangar bere fata Jisas büreaga baba fata tor gam komen. Bangüdi fata tor güresari gogafotudi, kur fere kineaga baba, muride warüdi diferedi dab dab kanüdi, ferefinabur kodigo, Jisasüb nurmaga iroto diferedi büreaga. 20 ✝Jisas kegengeaga baba kürüna kob kainanagen, bangar wageaga, "Mai, ye nab menmen gürenakuti kenegafotun." 21 ✝Kabiab sibam ferewar tugu Farisiwar tugu dora baba edüdi menüm dorafokowen, "Fere meme nu wongar Keriabüb kur debürewadi dora baba dorageaga? Fere gürede menmen unaigafotuweregarge. Baba Keriab nugenakuanab fünai." 22 Jisas ninib ututun sibamgafotüdi, maig nin gam dora menüm toweaga, "Amure ninib kob gam ututun babanüm büreaga? 23 Am dora ye doragegi diruge? Ye menüm doragegi diruge, ‘Ye nab menmen toi gürenakuti unaigafotun,’ o ye menüm doragegi diruge, ‘Na siradibe urige’? 24 ✝Bangeagako, yeb utun baba nini menüm sibamgane, Fereb Nono nu, meme kübüdim gam sogi tugu, bangar nu menmen toi unaigafotugeregeaga." Bana Jisas fere dagar gürenakuti kumeaga baba gam agügüdi menüm waweaga, "Ye wanün, na siradibe kur nagüb dibe, fata nagüb gam kümüne." 25 Bangar ferefinaburüngab ege gam, fere baba pirikanana siradüdi, kur nuge kineaga baba deaga. Bangüdi Keriabüb yanim siradgabürübina fata nugeab gam kümüneaga.

Dü Kaberegi gam Jisasde, fere kube kogi namabereaga

6 Dü Kaberegi güre gam Jisas kunube fata gam iruwaboudi ferefinabur dora dünügeaga. Baba gam fere güre büreaga, nub kube namayaub kumudi fananamgeaga. 7 ✝Kabiab sibam ferewar tugu Farisiwar keab Jisas idadau taugen, amure, Dü Kaberegi gam fere subo tutug baba idadangebeagade, kenedag baba sibamgebüregen. Jisas dora gam diferebüre, erekobo fitawebüregen. 8 ✝Bangeagako, Jisas ninib ututun sibamgeaga. Babaure fere kube kogi baba menüm waweaga, "Na siradibe ferengab ege gam meag biboue." Bangar baba fere siradüdi biboyeaga. 9 Bangar Jisasde menüm wangeaga, "Ye totongebüregün. Dü Kaberegi gam kabia nama gegide, ede kabia kogi gegide? Fere sagüngüdar nama bürebende, ede kogifürüngegide?" 10 Bangar Jisas fere gürenakuti gam agügübina kümünadi fere baba menüm waweaga, "Kube nagüb sururgabere." Fere baba bangeaga babade, kube nugeab maig namaweaga.

Jisasde maraipapangab taugegib sarua mogoi namabereaga

1 Jisas ferefinabur gam dora pitaifotudi, kümüna Kaperneam fib ere gam taideaga. 2 Maraipapangab taugegi güre büreaga, nu sarua mogoi güre tugu. Nu nugeab sarua mogoi baba idadau kob duwafaigeagako, mügar baba sarua mogoi nu subo tugu, bangar kumebürenanageaga. 3 Maraipapangab taugegi, Jisas büreagagegi dora edeaga, bangar nu Judawarüngab taba fere simai sugurungar kümüna totowedi ogura nugeab sarua mogoib subo namaberebüregüdi sugurungeaga. 4 Bana nini kümüna Jisas gam taidüdi, marbinab gamde kororab dora menüm wawen, "Baba taugegi nu fere nama, na nu saguwegi nama. 5 Nu sige Juda simai kob sigafaigeaga. Nugede sinib kunube fata idaweaga."

6 Bana Jisas nini keab kümüneaga. Nu kümüna fata gam iroto taidarbere, baba maraipapangab taugegi babade, büreabmana sugurungar Jisas gam menüm dora düdi kümünen, "Erekokai, na ogurebüre utungegena. Ye fere namagar na ogura yeb fata gam iruweregabge. 7 Babaure ye menüm utungun, ye fere namagegar, igede ogura na kegeneregün. Babaure na dora gürena doragab, yeb sarua mogoi maig namaweregeaga. 8 Ye banüm doragün, baba amure, ige tugu ige fere yanim tugubüde tauiar nu minigo bürün. Bana ige tugu ige maraipapawar tugu ige minigo bürfaigen. Bana ye güre waudi, ‘na kümünegürba’, nu kümünafaigeaga. Bana ige güre waudi, ‘na oguregürba’, nu ogurafaigeaga. Bana igeab sarua mogoi waudi, ‘na fünai baba gegürba’, nu güfaigeaga."

9 Jisas dora baba edüdi, fere babab doraure tergeaga. Bangüdi piruaboudi ferefinabur ginere nuge daiwen baba wangeaga, "Ye wangün, fere memeb kob kainana sibe, Israel fere güre kegeurge." 10 Bana baba fere simai maraipapangab taugegide sugurungar kümünen baba, nini maigüdi fata gam oguren baba, sarua mogoi namaweaga baba kegewen.

11 Baba gam, finege güre büreaga, etob kogi güre nu gam büreaga. Bangar baba etob kogide subo duwar, kümdan 18 büreaga. Babaure, finege babab gom dagar kuarigeaga, bangar idadau bibowegi dirugweaga. 12 Jisasde finege baba kegeudi, yagwar oguradi, menüm waweaga, "Finege, ye nab subo namabürün." 13 ✝Bangüdi finege baba kekia kube diferar, finege baba pirikanana idadau biboweaga, bangar Keriabüb yanim siradgabereaga.

Jisasde fere güre mube adagaberegi namabereaga

1 ✝Israelüngab Dü Kaberegi güre gam, Jisas kümüna Farisiwarüngab taba fere güreb fata gam daba neaga. Bangar idadau taugen. 2 Bangar fere güre mube nub adagabereaga baba, nu Jisas iroto büreaga. 3 ✝Jisas fere baba kegeabürüdi, kabiab sibam ferewarie Farisiwar keab menüm totongeaga, "Dü kaberegi gam subo ferewar ida idangübüde kenedag?" 4 Bangeagako, nini sube gütudi dora maig towedige. Bangar fere baba igaiudi, namabürüdi uruwar kümüneaga.

Jisasde fere fogo tugu lepra subo tutug namabürügeaga

11 ✝Jisas erekobo daiudi Jerusalem kümüneaga. Bangüdi Samaria distrikie Galili distrik kodigode urigüdi kümüneaga. 12 ✝Fib güre gam taidar, fere fogo tugu lepra subo tutugu ogura erekobo gam kaiwen. Nini kütübana bibowen, 13 ✝bangüdi erenana menüm yogen, "Jisas, eregeam, na sinure kororabge." 14 ✝Jisasde kegengüdi, menüm wangeaga, "Nini kümüna mube ninagüngab Keriabüb kobegegi ferewar abatarüngane." Bana kümünedi mube nugengab urun taideaga. 15 Nin kodigo fere güre kegeweaga baba, nugeab mube maig namaweaga baba kegeudi maigeaga. Nu igyogüdi, Keriabüb yanim siradgabereaga. 16 Nu kümüna Jisas gam taidüdi, Jisasüb kebe iroto oksosob orudi, nurmaga kübüdim gam difürüdi, esegeaga. Fere baba, nu Samaria distriküb ferefinaburüngab gin gamnab. 17 Jisas fere baba kegeudi wageaga, "Yeba, fere fogo tugu urun taiden gün. Bangeagako, fere dam tugu baba arag büren? 18 Maigüdi, ogura Keriabüb yanim siradgaberegi kenedag, io? Fere meme gin güre gamnab nu nugenakuanade?" 19 ✝Bana Jisasde fere baba menüm waweaga, "Na siradibe kümüne. Kob kainana nagübüde, nag maig namabereaga."

43 Finege güre büreaga, nu kagi sinoyegi bata bürfaigeaga, nu mene gürena bede fogo aküre büreaga.* Bangeagako kau fere gürede kagi subo nub namaberegi towarge. 44 ✝Baba finege Jisasüb nige iroto oguradi, Jisasüb karün kuab babab maga kebe gam, gemuna tumaureaga. Banüm bangar, pirikana kagi nugeab paudi, kenegeaga. 45 Bangar Jisasde menüm totogeaga, "Wonide ye gam kube difereaga?" Bangar gürenakuti wagen, "Ye kene. Ye kenegen." Bangar Pitade wageaga, "Eregeam, ferefinabur epürage ginbata biboudi koiwataunen, bangüdi nag gam gütgütwanagen." 46 ✝Bangeagako Jisasde wageaga, "Gürede ye gam kube difereaga. Sogi gürekoi uriaidi kümünar wagün." 47 Finege baba mügar sibamgeaga, iwageregarge. Bangarbere kutudi, Jisas gam iroto oguradi, kübüdim gam nurmaga difürüdi oksosob oreaga. Bangüdi ferefinabur gürenakutingab ege gam wageaga, "Kagi subo yeb pirikanana kenegeaga. Amure, ye Jisasüb karün tumaurun babade." 48 ✝Bangar Jisasde menüm waweaga, "Finege, na yeure kob kainanagün, bangarbere na maig namaun. Arie, kob nab dab fanam büreregeaga."

31 ✝Bana Jisas namana menüm wageaga, "Ye mügar meme sese gamnab ferefinaburure komina dora doragebüreba, ye komina dora aranüm doragüi? Nini am fere sibe? 32 Nini mogoi farafara sibe guruwegi fib gagam gotogaboudi bürüdi, mogoi farafara gürewarure menüm yogegi sibe, ‘Sin ninag meruwebüregüdi keag fuwenanko, ninag meruwarge, sin kororab mun orenanko, ninag meregi uruwenan.’" 33 ✝Bana Jisas namana menüm wageaga, "Jon yag fidegi nu ogureaga ba, nu bret tugu wain mum tugu nifaigarge. Bangar ninagüde wagenan, ‘Etob kogi nu gam büreaga.’ 34 ✝Mügar Fereb Nono ogureaga meme, nu daba tugu yag tugu neaga, bangar ninagüde wagfaigenan, ‘Kegewenan, baba fere nu daba tugu wain mum tugu gugub nuaigeaga. Nu kegeam degi ferewar tugu menmen gügab fere gürekoi tugub büreanüg.’ 35 Nini banüm wagfaigenan, bangeagako ferefinabur Keriabüb sibam deginwaib baba simaide, sige menüm abatarsigen Keriabüb sibam namafanam."

Finege gürede Jisasüb kebe mara agugur fiduweaga

36 ✝Farisi gürede Jisas ogura nuge küre daba nebüregüdi yaguweaga. Judangab kabia nini kurebdir kinboudi daba nuaigen. Babaure Jisas baba Farisib fata gam daba nebüre kurebdir kinboweaga. 37 ✝Finege güre kabia kogkogi güfaigeaga baba, nu baba fib ere gam büreaga. Nu Jisas Farisi babab fata gam daba neagagegi dora edüdi, wel kiag güre kuri nama tugu baba düdi ogureaga. Baba wel keag, kegenam gamde idawenwaib.

41,42 ✝Bangar fere güre taideaga, nub yanim Jairas. Nu kunube fatab taba fere güre. Nu momugo gürenakuana fanam tugu, momugo baba nu mene gürena bede fogo aküre banüm. Momugo baba kumebürenanageaga. Bangar Jairas nugeab momugo babaure kob kürüna koigeaga. Babaure nu Jisasüb kebe iroto oksosob orudi, Jisas igaiudi Jairas nugeab fata gam kümünebüregüdi, totoudi bikuweaga.

Bana Jisas kümünar, ferefinabur ginbata nu keab kümünadi nu gam gütgütwanagen.

49 Jisas doraga bürarbere, kunube fatab taba fere güreb fata gamnab fere güre oguradi, taba fere baba menüm waweaga, "Nab momugo kumeaga. Sibam sarigegi fere kub namana duwegena." 50 Jisas baba edüdi, taba fere gam dora menüm toweaga, "Na kimigegena. Na kob gürena kainanagab, momugo nagüb maig siraderegeaga." 51 Bana Jisas taba fereb fata gam kümüneaga, bangüdi ferefinabur eungar nuge keab fata gam iruwedige. Nu Pita igaiweaga, Jonie, Jems küre tugu, momugo babab emeana, nin gürena nuge keab iruwen. 52 ✝Bangar ferefinabur fata gam bürfotuwen baba, momugo babaure kororabüngar mür büren. Bangeagako, Jisasde menüm wangeaga, "Meragana. Kumarge. Eina kinbüreaga." 53 Bangar kuipariwen, amure, nini sibamgen, momugo manage kumeaga. 54 ✝Bangeagako Jisasde momugob kube debetaudi menüm yogeaga, "Momugo, na sirade." 55 Bangar momugo babab etob maig nuge gam ogurar pirikanana siradeaga. Bangar Jisasde momugo baba daba gürekoi duwebüregüdi wangeaga. 56 ✝Bangar momugob emeana tergen. Bangeagako, Jisasde nuge küre sogsogi menüm wangeaga, "Ninaküre daba meme taideaga babaure fere güre wawagana."

Jisasde wagar Pita wade namana deaga

1 ✝Gürena sese Jisas yag nigu Genesaretüb* udi gam biboudi büreaga, bangar ferefinabur epüra Keriabüb dora edebüre nu gam girsa girsa ogura koiwataudi biboudi büren. 2 Bangar Jisas oude aküre yag nigub udi gam büreaga baba kegeweaga, oude toi baba, wade dügab ferengab. Bangeagako, baba fere toi oude ebgadüdi wade dügab far toi gasa büren. 3 Bana Jisas oude güre gam ebedeaga, oude baba Saimonüb. Bangüdi Saimon wawar oude gam ebedüdi oude sororowar yag nigu gam kümünaureregeaga. Bangar Jisas oude gam gotogüdi ferefinabur sabüngeaga.

4 Bangafotudi, kuri Saimon menüm waweaga, "Oude orab yag kodigo kümünadi wade debüre wadeb far toi fobotgar kano." 5 ✝Bangar Saimonde menüm wageaga, "Eregeam, sin utumnonou bikide gugub dügar subaitausigeagako, wade güre düdarge. Bangeagako, nab sube daiudi wade dügab far toi fotutgeregenan." 6 ✝Nini bangen babade, wade toi epüra kiregedi wadeb far toi kitkatwebüregen. 7 Bangarbere epeianügmana oude güre gam büren baba, buburengedi oguradi sagüngebüre. Bangar nini ogura wade düdi, oude aküre gobaberen. Bangar oude aküre baba gobudi, yag minigo kanebüregen. 8-10 ✝Bangar Saimon Pita wade toi kiregen baba kegeudi tergeaga. Saimonüb epeiabmana, Jemsie Jonküre tugu büren. Nugeküre Sebedib mogoi toi, nugeküre tugu tergen. Bangar epeiabmana tugu tergen. Saimon Pita baba kegeudi, Jisasüb kebe iroto oksosob orudi wageaga, "Erekokai, na ye uriaidi kümüne. Ye menmen fere." Bangeagako, Jisasde Saimon menüm waweaga, "Kimigegena. Mügar na wade dünko kuriba, na ferefinabur kürengüdi ige gam ogureregün." 11 ✝Bana oude orudi kümüna merai taidüdi, nugengab daba daba gürenakuti ebgagaiwafotudi, Jisas daiwen.

Jisasde doragar kübür sogi saweaga

22 Dü güre gam Jisas nugeab daidaiwegi toi keab oude güre gam ebeden. Bangüdi menüm wangeaga, "Yag nigu bairasari kümünegi." Bangar kümünen. 23 ✝Oude gururwarbere, Jisas nu kineaga. Bangarbere yag nigu gam kübür sogi taideaga, bangar oude gam yag gobebüregeaga, bangar kenegebürenanagen. 24 ✝Bangar kümüna Jisas imoudi wagen, "Eregeam, eregeam, sige kenegebüregenan bana." Bangar siradüdi kübür baba tugu yag nigu baba tugu nunurungeaga. Bangar kübür tugu yag nigu tugu saweaga, bangar yag maig binawarge. 25 Bangar Jisasde menüm totongeaga, "Aranüm? Kob kainanagegi ninib arag büreaga?" Bangar daidaigegi simai Jisasde fünai gugub geaga baba kegeudi, kimgüdi ututun toitoiwen. Bangar nuge nuge menüm wagen, "Am ferenana menüm? Nu kübür tugu yag tugu kakongar nugeküre dora nub eden."

Jisasde doragar kübür sogi saweaga

22 Dü güre gam Jisas nugeab daidaiwegi toi keab oude güre gam ebeden. Bangüdi menüm wangeaga, "Yag nigu bairasari kümünegi." Bangar kümünen. 23 ✝Oude gururwarbere, Jisas nu kineaga. Bangarbere yag nigu gam kübür sogi taideaga, bangar oude gam yag gobebüregeaga, bangar kenegebürenanagen. 24 ✝Bangar kümüna Jisas imoudi wagen, "Eregeam, eregeam, sige kenegebüregenan bana." Bangar siradüdi kübür baba tugu yag nigu baba tugu nunurungeaga. Bangar kübür tugu yag nigu tugu saweaga, bangar yag maig binawarge. 25 Bangar Jisasde menüm totongeaga, "Aranüm? Kob kainanagegi ninib arag büreaga?" Bangar daidaigegi simai Jisasde fünai gugub geaga baba kegeudi, kimgüdi ututun toitoiwen. Bangar nuge nuge menüm wagen, "Am ferenana menüm? Nu kübür tugu yag tugu kakongar nugeküre dora nub eden."

Jisasde fere güre gam etob kogi düfotuweaga

26 Bana Jisas nugeab daidaiwegi toi keab Gerasawarüngab yau kümüna taiden. Fib baba Galili yag nigu baira büreaga.

12 ✝Ututumira nugeab dora turewegi toi, nuge gam oguradi menüm wawen, "Na ferefinabur sugurungab fib itut adab adab kümüneregen. Bangüdi daba tugu, kinegi fib tugu fitaweregen. Meme gam bürenan baba, fere kene." 13 Bangeagako, Jisasde daidaiwegi simai menüm wangeaga, "Ninagüde daba dünügane." Bangar wagen, "Sin daba yamaige. Bret taba tugu, wade aküre fanam gürena büreaga. Na sin kümüna meme ferefinabur gürenakutingab daba murugeregenangüdi gündag?" 14 Fere 5,000 banümdag büren.

Bangar Jisas nugeab daidaiwegi toi menüm wangeaga, "Wanügar 50-50 gurudi gotogeregen." 15 Daidaiwegi simai banüm bangedi, ferefinabur gürenakuti gotogen. 16 Bana bangar Jisas bret taba tugu wade aküre baba tugu düdi, kekia fib nama gam agügüdi Keriabure esegeaga. Bangüdi bret tugu wade tugu pusudi daidaiwegi toi dünügeaga, bangar kabataudi ferefinabur dünügen. 17 Bangar nedi fugongar daba makita makita bürdaiweaga baba, daidaiwegi simaide tobgüdi far gürena bede fogo aküre gobaberen.

Jisasde Saimon Pita fiab ana namabereaga

38 Jisas kunube fata baba ebgadüdi, Saimonüb fata gam iruwaboweaga. Saimon fiab ana nu subo tugu gar, mube nub füg füg büreaga. Bangar Jisas wawedi saguwebüre. 39 Bana Jisas kümüna iroto biboudi, subo finege baba gam, subode ebgafotuwebüregüdi, sogsogi dorageaga. Bangar finege baba subo kenegar, pirikanana siradüdi daba saigüdi dünügeaga.

27 Bana Jisas oude ebgadüdi kümüna taideaga. Baba fib ere gamnab fere güre nuge gam taideaga. Etob kogi gürekoi fere baba gam büren. Egimena ude dagfaigarge. Nu fata güre gam bürfaigarge. Nu ferefib gagam bürfaigeaga. 28,29 Ferewar fere baba taugafaigen baba, muri sogi saka kube kebe sawaigafaigen. Bangeagako, nu muri sogi baba gürenakuti katafotugafaigeaga. Bangar etob kogi babade gufaigar, gururudi fere kene gam bag kümünafaigeaga. Bangar etob kogi fere baba ebgafotuwebüre güdi Jisas doragafotuweaga. Bangar fere baba Jisas kegeudi, magaudi Jisasüb kebe iroto fürügeaga. Bangüdi erenana yogüdi mengeaga, "Jisas, na Keriab Kekia Asaub Nono, na ye gam am bangebüregün? Aio, na ye kogi fürüiegena."

30 Bangar Jisasde menüm totoweaga, "Nab yanim won?" Bangar wageaga, "Yeb yanim Maraipapa," amure, etob kogi epürage nu gam iruwen babaure, banüm wageaga. 31 ✝Bangar baba etob kogi toide Jisas gam yogüdi wagen, "Na sin kudesigab ub ginim kene baba gam kanübugona."

32 ✝Dawai gin ere iroto gir fanam gam, daba nübüren. Bangar etob kogi toi Jisas sogsogi menüm totowen, "Na eusigab sin baba dawai toi gam iruweregenan." Bana Jisasde eungar kümünen. 33 Bangar baba etob kogi toi fere baba ebgadüdi kümüna dawai toi gam iruwen. Bangar baba dawai gin, erenana gururudi fib kogi güre gam kanen. Bangüdi yag nigu gam fürügüdi yag nüdi kugumgen.

34 Dawai taugegiwar baba daba taideaga baba kegeudi gusaraudi, dora düdi fib ere gam tugu, eib eib tugu kümünen. 35 Bangar ferefinabur ogura amdag dabanana taideaga baba kegewebüregen. Bana Jisas gam ogura taiden baba, etob kogi fere baba uriawen baba kegewen. Nu ude dageaga. Ututun nugeab namawar Jisasüb kebe iroto gotogüdi büreaga. Bangar ferefinabur kegeudi kimigen.

27 Ye kainana wangün, fere gürekoi meag bibowen baba, ara kumediberenana Keriabüb Koroba baba kegeweregen."

Jisasüb mube pirudi adab taideaga

28 ✝Jisas dora baba baba dorageaga baba, dü düm sob banüm kenegarbere, Pita, Jems, Jon, babawar igaingüdi gir gam komen, amure, sibdibwebüregeaga. 29 Sibdibwa bürarbere, nurmaga nugeab adab taideaga. Bangar karün nugeab maurasau taideaga, bangüdi meramgeaga. 30 Bangar fere aküre nuge keab doraga büren baba, Mosesie Elaijaküre. 31 ✝Nugeküre Keriabüb meram tugu taidüdi, Jisasde Jerusalem bag daba daba güfotudie, kübüdim baba ebgadüdi kümüneregeaga babaure doragen.

32 ✝Pitab mube tugu, daidaigegi aküre babab mube tugu siroi siroingar kinen. Bangar kuri maig siraden baba, Jisasüb mube gam meram kegewen, baba tugu fere aküre Jisas keab bibowen baba tugu kegengen. 33 Bana fere aküre Jisas keab bibowen baba, Jisas ebgadüdi kümünebüregedibere, Pitade Jisas menüm waweaga, "Eregeam, sige meag bürenan baba nama. Sin kim yana fata küi fereregenan. Güre nagüb güre Mosesüb, güre Elaijab." Pita dora baba dorageagako, nuge dora aranüm dorageaga baba, babab iginim sibamgarge.

38 Bangar baba ferefinabur kodigo, fere gürede menüm yogeaga, "Sibam sarigegi, na yeb nono kegewebüregüdi igena totonadaiun. Ye nono gürenakuana baba gürena. 39 Etob kogi güre nu gam manag manag iruwafaigar nono baba kerübgurofaigeaga. Bangar etob kogi babade güfaigar, nono baba kutuafaigüdi kiregirewar sube gam simuk sapa sapafaigeaga. Baba etob kogide mube nub kogifuruafaigüdi, pirika nono baba ebgadügafaigarge. 40 Bangar nagüb daidaigegiwar etob kogi baba düfotuwebüre igena wangaurugunko, towedige."

41 Bangar Jisasde dora menüm toweaga, "Ferefinabur nini kob kainanagarge baba, ututun ninib tugu kabia ninib tugu namage. Ye aganbede nini keabnana bürüdi kub ninib kemeieregün? Nono nab igaiudi ogure." 42 Bana nono baba Jisas iroto ogurarbere, etob kogi babade buraifotuwar fürügüdi kiregireweaga. Bangeagako, Jisasde etob kogi baba nunurweaga, bangüdi nono baba namabürüdi maig eme duweaga. 43 Bangar ferefinabur gürenakuti, Keriabüb sogi ere baba kegeudi tergen.

Jisasde maig wageaga nuge kumeregeaga

Ferefinabur Jisasde daba daba geaga babaurenana ututun toitoiwen, bangar Jisasde nugeab daidaiwegi simai menüm wangeaga,

Jisas Belsebul tugu fünaiweagagüdi wagen

14 Jisasde etob kogi güre fere güre gam bürüdi, fere babab sube gütüwataweaga baba etob kogi dufotuweaga. Etob kogi uriawarbere, baba sube güt baba dorageaga. Bangar ferefinabur kegeudi tergen.

50 Bangar nin kodigo gürede, keime asau düdi kobegegi taba ferewarüngab sarua mogoi oreaga, bangar keime asaude baba sarua mogoib kagub kube namayau katafotuwar musuweaga. 51 Bangeagako, Jisasde kegeudi wageaga, "Kabia baba mügar ebgade." Bangüdi fere babab kagub gam kube difererar kagub maig namaweaga.

24 ✝Fere aküre Jonüb dora düdi ogurenwaib baba, nugeküre kümünafotuwen, bana Jisasde ferefinabur Jonure menüm wangeaga, "Nini fib fere kene gam kümünenan baba, daba güre kegewebüre kümünenan. Nini kübürde kauta güre isoweaga baba kegewebüre kümünarge. 25 Nini am daba kegewebüre kümünenan? Nini kümüna fere güre karün toi nama nama eneaga baba kegewebüre kümünenande, io? Ferewar karün nama nama enüdi, mube gamnab daba daba nama nama tugu, babanüm ferewar erekokayaungab fata gam bürfaigen. 26 ✝Ba nini am daba kegewebüre kümünenan? Nini kiari fere güre kegewebüre kümünenande? Io, nuge dogo. Bana ye nini wangün, baba kiari fere Jon nu, kiari fere gürekoi gürenakuti emegerüngeaga. 27 ✝Baba fereure dogo Keriabüb budide menüm wageaga, ‘Ede. Ye fere güre igeab dora pitoiebüre sugurweregün, bangar nu kese agfürüdi kümüneregeaga. Bangüdi nagüb erekobo ekotagabereregeaga.’ 28 Ye menüm wangün, Jon fere gürenakuti meme kübüdim gam büren baba, emegerüngeaga. Bangeagako fere nu Keriabüb Koroba gam kürüna fanamere büreaga baba, nu Jon emegerweaga."

29 ✝Ferefinaburie kegeam degi ferewar keab Jonüb kube gam yag fidenwaib babaure, dora baba edfotudi wagen, "Keriabüb kabia baba gürenakuti nama fanam." 30 Bangeagako, Farisiwarie kabiab sibam ferewar keab, nini Jon kube gam yag fidedige. Babaure, Keriabüde erekobo nama abatarüngeaga baba, nige duen.