Milagres de Jesus
Os Evangelhos registram dezenas de milagres realizados por Jesus — curas, ressurreições, domínio sobre a natureza e libertações. Cada milagre revelava sua divindade e compaixão.
Curas de cegos e surdos
Jesus devolveu a visão aos cegos e a audição aos surdos, manifestando seu poder sobre toda enfermidade e deficiência.
Yesusé nfafié kyat séluw ta rébyafé nesté
Rewóré ta néi, Yesusé nfané nóté. Pocé télél be reni kyat séluwé nesté rébyafé, rfajalé I bóngo rgélayé, "Moke, Kolano Daudé ni ntu re gbu ta Awé, mmasié am facuci pa!"
Po waktu ta Yesusé ncung némin po um isó ni, télél be kyat séluw ta rébyafé nesté rwómo I nóté. Pocé bóngo Yesusé nutné si, "Mewé fdélé ta Ya bisa kfafié mewé?"
Bóngo si rcónglo, "Iya Moke, amé kdélé."
Tabóngo Yesusé nétané mtóri né ga néceg faje, "Mewé re fdélé Ya, se nte re ndadi i ro ta féyówé né." Po waktu ta néi óro, si dórén luwé né re bisa rémnawé. Tabóngo Yesusé nécegé si faje, "Ndél pa bo fafétén po kyat pai le, fanfawa sogado mewé re bisa fémnawé né." Mayta po waktu ta rcópén tóma umé njé ni né, tabóngo raféténé keé néli re lima po férimé kyat ta si po bótén ta pocé né.
Yesusé nfafié kyat séluw ta rébyafé nesté
Waktu ta Yesusé I re ni motemote nesté rcópén lima kota Yerikho se rfané né, reni kyat félé ta rdéréré si. Se pocé fajé, reni kyat séluwé né rébyafé se réntolén si po yéfén lapo lo né. Rlongé ta Yesusé nwetco pocé né, tabóngo rgélayé, "Moke, kolano Daudé ni ntu re gbu ta Awé, mésié amé nte!"
Pocé kyat ta félé né rlongé si rgélayé né, rcawané se réceg faje, "É, ffaténgténgén mewé, ma fpe gégliné na!"
Mayta si ga ta délé rbóng ta rgélayé, "Moke, kolano Daudé ni ntu re gbu ta Awé, mésié amé nte!"
Pocé tabóngo Yesusé nwoslé, se nkakém si lima bóngo nutné si, "Fkakém Ya né bo féror sói?"
Kyat ta rébyafé nesté rcónglo, "Moke, amé kéroré bo bisa kémnawé."
Yesusé nlongé ta réceg fajé né tadélé nmésié si, se nétané mtóri né tabóngo ta néi óro, re bisa rémnawé. Rewóré ta néi, bóngo si ma rfané se rdéréré Yesusé nóté.
Yesusé nfafié kyat isó ta nébyaf po Betsaida
Waktu ta Yesusé I re ni motemote nesté re rwóm po Betsaida né, reni kyat séfis néli rut món isó ta nébyafé njé po Yesusé ni, bóngo réroré bo Yesusé nétewlé fao né néya po kyaté njé ni bo némnawé nmulé. Tabóngo Yesusé nétané kyat ta nébyafé njé fao né, se ntuda i néli po pnuw lapo lo né, bo rélówé kyat ta félé né. Néli bóngo Yesusé nitfo kyat ta nébyafé njé ni mtó né, ga nétewlé fao né po kyaté njé ni. Rewóré ta néi ga Yesusé nutné i, "Re bisa mémnawé?"
Pocé kyaté njé néngóto nétó po ta négbono lo né, ga néceg faje, "Ya re kémnawé kyaté né rénfané, mayta kémnaw si né dolo ay si le."
Pocé, Yesusé nétewlé fao né nmulé po kyaté njé ni mtó lo né, bóngo kyaté njé némnawé re fié. Rewóré ta néi, Yesusé nécegé kyaté njé faje, "Wóré méléy po nim umé lo, bo ma mpólén aw lima pnuwé njé le na."
Yesusé nfafié kyat isó ta npongo re nmémewé njé
Rewóré ta néi, Yesusé I re ni motemote nesté rfatoléné keé bótén Tirusé, rdé po kota Sidoné. Ga rfan po talaga Galilea, po bótén Dekapolis, ta ni ngale né Kota Yófésó. Pocé reni kyat isó, npongo re nmémewé. Se kyaté né rut i po Yesus ni, bóngo réroré bo Yesusé nétewlé fao né po kyaté njé ni bo nfié.
Mayta pocé reni kyat félé, se Yesusé ntuda kyat ta npongo re nmémewé njé néli cuci, bo rkumél si. Néli ga Yesusé nfasungé ni kakolo né po kyaté njé ni tétango abén luwé né ni, rewóré ta néi ga nitéf po kakolo lo se nétingko néli po kyaté njé ni pépléo lo né. Rewóré ta néi, Yesusé nékngól néya langété lo, natlé ni nafasé, bóngo nécegé kyaté njé faje, "Efata," ta ni ngale né, ‘Ftasólé óro.’ Ta néi óro, kyaté njé re nlongé fié, bóngo re bisa nméiténé óro.
Rewóré ta néi, Yesusé nécegé kyat ta pocé né, "Ma féfétén néli re lima na." Mayta masike Yesusé nané si fajé ma, si ta délé rbóng ta réféténé keé néli re lima po kyat pai le. Se kyaté-kyat ta rlongé né rtélélé, bóngo réceg faje, "Tabeu, férimé ta Yesusé npe né fié né ga! Kyat ta rpongo ma re bisa rlongé, ta rmémewé ma re bisa rméiténé!"
Yesusé nfafié kyat ta nébyafé njé
Yesusé I re ni motemote nesté rwóm néli po kota Yerikho. Waktu ta rfané se re rcópén po kota njé ni né, reni kyat félé ta rfané rfadéréré rdé si nóté. Se po yéfén lapo né rémnawé kyat isó njé nébyafé, néntoléné se néror pipis po yéfén lapo lo né. Kyaté njé ngósno Bartimeusé, ni moke njé ngósno Timeusé. Pocé nlongé ta Yesus Kyat Nazareté njé nwetco né, tabóngo n’gélay faje, "Yesusé, kolano Daudé ni ntu re gbu ta Awé, mmesié ya pa!"
Pocé kyat ta félé né rlongé i n’gélay fajé né, bóngo rcawané se réceg faje, "Mfaténténgén awé!"
Mayta i ta délé nbóng ta n’gélayé, "Yesusé, kolano Daudé ni ntu re gbu ta Awé, mmésié ya pa!"
Tabóngo Yesusé noslé, se néceg faje, "Fkakém i lima!"
Pocé, kyaté né rkakém i se récegé i, "Mfakwaté wlemé njé, bo mosél óro, Yesusé nkakém awé se."
Pocé kyaté njé nlongé ta néi, tabóngo nbablé nasólé keé ni juba njé, se nosélé ga nfan néli po Yesus ni. Néli, bóngo Yesusé nutné i, "Mkakém Ya né bo méror sói?"
Bóngo kyaté njé ncónglo I faje, "Guru, ya kéroré bo bisa kémnawé."
Bóngo Yesusé nécegé i faje, "Awé re mdélé Ya, se mtamé né re bisa mémnawé. Se wóré méléyé ro!" Waktu ta néi óro, kyat ta nébyafé njé re bisa némnawé se nfané nfadéréré re Yesusé.
Yesusé nfafié kyat isó nébyafé
Po waktu ta Yesusé rebo nwóm po kota Yerikho né, pocé reni kyat isó nébyafé se nanéntolén i be po yéfén lapo bo néroro kyaté-kyaté né pipisé. Pocé nlongé kyat félé ta rwetco né tabóngo nutné, "Reni sói né?"
Pocé reni ta rfébingo i, "Yesus, kyat Nazareté njé nwetcó."
Pocé tabóngo n’gélayé, "Yesus, kolano Daudé ni ntu re gbu Awé, mésié ya nte!"
Pocé kyat ta rfadéréré re Yesusé se re rtubé né rcawan i, bóngo rané i bo nfaténténgén i. Mayta tadélé nbóng ta nfakwat i, "Moke, kolano Daudé ni ntu re gbu Awé, mésié ya nte!"
Tabóngo Yesusé noslé lesu, se nané kyat ta pocé né rut ta nébyafé njé po I ni. Pocé re nwómo I, tabóngo nutné i, "Awé nte, bo mané Ya kpe aw fanfawa?"
Tabóngo kyat ta nébyafé njé ncónglo, "Moke, ya kéroré bo bisa kémnawé!"
Pocé ga nécegé i faje, "Mfié awé ro! Re bisa mémnawé, sababta re mdélé Ya."
Po waktu ta néi óro, kyat ta nébyafé njé re bisa némnawé, bóngo ndéréré Yesus re ntail Jou Lahatala. Se férimé kyat félé ta rémnawé né, si ma rtail re rfapélóy Jou Lahatala ngósno nóté.
Curas de paralíticos e enfermos
Paralíticos caminharam, leprosos ficaram limpos e todo tipo de doença foi curada pelo toque e pela palavra de Jesus.
Po waktu ta néi, reni kyat isó njé npado se nwómo Yesusé. Pocé, ntiki buku nóp Yesus usno lo né bóngo ncuba I, se néceg faje, "Moke, iga wlemé, Awé bisa mfafié ya."
Pocé tabóngo Yesusé nétané kyat ta npado njé ni fao né se nécegé i faje, "Ya wlegé bo mfié. Se nte mfié awé ro!" Tabóngo po waktu ta néi óro, kyat ta npado njé nfié i.
Rewóré ta néi, Yesusé nécegé i faje, "Mfatélolmo é, ndél pa bo méfétén po kyat pai le, ta Ya re kfafié awé nte. Mayta mfan néli po imamé njé ni, bo némnaw ta awé re mfié né, bóngo mpo nim sadaka haiwan faisó bo imamé njé ntapén i tadolo tatubé lima se nabi Musa nané mewé fpe né. Mpe fajé bo kyaté-kyaté né rémnaw re runé ta fatuw-fatuwé awé re mfié."
Néga télél be reni kyat séfis néli rfawlewté kyat isó néli po Yesus ni. Kyaté njé nkafé, se nénbóy i po ni musala papo lo. Pocé Yesusé némnawé kyaté nesté rwóm po I ni né, I re nuné ta rdélé I né. Tabóngo nécegé kyat ta nkafé njé faje, "Téno, wlemé njé ma némya le na. Sababta nte óro, nam sélsólé né re kfayangésé keé."
Pocé fajé ma reni guru agama séfis néli ta runé fié Musa ni kitab abén limé nesté. Rlongé ta Yesusé néceg fajé né, tabóngo ranuta po wlori wlólo, "Ce, ga kyat ta njé npe ni diri dolo Jou Lahatala I né."
Mayta Yesusé re nuné keé wlori wlólo né, se nécegé si faje, "Fpe sói se fanuta be ta lé né? Po waktu ta Ya kécegé kyat ta nkafé nje faje, ‘Anam sélsólé né Ya re kféyangésé keé,’ mewé fdélé pa, ta nó sélsólé né re kféyangésé keé né. Mayta iga Ya kécegé, ‘Mpangéné bo mfané ro’, pocé mewé bisa funé ta Ya renik kawasa, sababta fémnaw po ta re nfané lo né. Se nte Ya bo kfafié keé i bo funé, ta po dunia wlólo nte, Kyaté Ntu ta Ya I yama soroga wlólo njé ma, renik kawasa ta bo kféyangésé keé kyaté-kyaté róri sélsólé né."
Tabóngo Yesusé nécegé kyat ta nkafé njé faje, "Faftén ta awé, mpangén óro. Malilé keé nim musala njé, bo méléy po nim umé lo!"
Tabóngo kyat ta nkafé njé npangéné, se néléy i po ni umé lo.
Pocé fajé reni kyat isó fao féspalé né nmóté. Bóngo reni kyat Yahudi ta rdéréré dodoto Farisi né séfis néli, bo réyówé Yesusé nó sélsólé, se rutné I, "Iga bo tfafié kyat po ngénngan Sabaté né, Jou Lahatala ncawan it pari tisé?"
Bóngo Yesusé ncónglo si, "Pa na fajé, Ya ma bo kutné mew su. Iga po ngénngan Sabaté ga nimi domba faisó némnap i po lopé wlólo, nase ftebé nópé bo fgali i pari tisé? Nase fgali i to? Néga bo kyaté! Kyat re haiwané né, kyaté né lebe mulori pélóyé! Se masike po ngénngan Sabaté, mayta iga tgali kyat ta rduk lawangé, Jou Lahatala nase ncawan it pa."
Pocé tabóngo Yesusé nécegé kyat ta fao nmóté njé faje, "Mfaméloléné faom ta nmóté né lima!" Kyaté njé nfamélolén fao né, tabóngo fié i, ta dolo faspalé né nóté.
Si rwóm po umé lo, tabóngo kyaté né rfabingo Yesus ta Simoné ni kmo mépiné njé nlélété se nénbóy i le. Pocé Yesusé ncung néminé, nétané pégelé njé ni fao né se nfapangén i néya. Tabóngo waktu ta né óro, pégelé njé re nfié i se nléléyan si.
Yesusé nfafié kyat isó ta npado
Nuéncó, kyat isó npado nwóm po Yesus ni, bóngo ntikibuku se ncuba I, ga néceg faje, "Guru, bo wlemé né, mfafié ya su pa? Sababta ya kuné Awé renim kawasa ta bisa mfafié ya."
Yesusé nlongé ta néceg fajé né, nmésia i. Pocé tabóngo nétewlé fao né néya po kyaté njé ni ga nécegé i, "Ya wlegé, se nte re mfié óro." Tabóngo po waktu ta néi óro kyat ta npado njé nfié i.
Fajé-fajé kyat si dórén fóté rwómé, rlewté kyat isó nkafé, bo rut i po Yesus ni. Mayta, bo rcungé i némin Yesus ni ma ndadi i pa, moté ndimé se. Se rpaké kyaté njé néya po um pépo lo né, rédoké umé njé cuci, ga ta ga rtebo kyat ta nkafé njé re ni musala njé nuéncó le nóp po Yesus ni. Pocé Yesusé némnaw si né, nuné ta fatuwé si rdélé I. Bóngo Yesusé nécegé kyat ta nkafé njé faje, "Téno, nete anam sélsólé né Ya re kfayangésé keé."
Pocé fajé ma reni guru agamané. Se ta Yesusé néceg fajé né, si rénuta po wlori wlólo, "Ndél pa bo I néceg ta dolo faje. Sababta reni isó pa ta nfayangésé kyaté né róri sélsólé, maduga Jou Lahatala le! Ga npe ni diri dolo Jou Lahatala né! Necé I nfalélé be Jou Lahatala ngósno."
Mayta Yesusé re nuné keé wlori wlólo né, se nécegé si faje, "Fpe sói se ga mewé fénuta Ya kfalélé Jou Lahatala ngósno né? Ya kfafié i pari kfayangésé keé nó sélsólé né pari, farimé ndé lima Jou Lahatala ni. Maduga, bo kfayangés i nó sélsólé né, fémnaw pa se fdélé pa. Mayta bo kfafié i né, fémnawé se fdélé. Se nte, Ya bo kfafié keé i bo funé, ta po dunia wlólo nte, Kyaté Ntu ta I yama Jou Lahatala ni njé, reni kawasa ta bo nfayangésé keé kyaté-kyaté róri sélsólé né." Tabóngo Yesusé nécegé kyat ta nkafé njé faje, "Ya kécego awé, mpangéné, mélilé keé nim musala njé, bo méléy po nim umé lo."
Pocé kyaté njé npangén néya, nélilé ni musala njé bóngo nfan i. Kyat ta si pocé rémnaw ta néi né, rtélélé ndimé, se réceg faje, "Tabeu, nuéncó pafule bo témnaw ta dolo faje né." Tabóngo rfapélóy Jou Lahatala ngósno né.
Yesusé nfafié kyat po ngénngan Sabaté
Rewóré ta néi, Yesusé ncungé nóté po agama Yahudi né riri um sambayangé lo. Pocé reni kyat isó ta ni fao faspalé né nmóte. Pocé ma reni kyat Yahudi ta rdéréré dodoto Farisi né. Si rfaléngóté Yesusé, bo sogado nfafié kyaté njé po ngénngan Sabaté, bo rfasólé keé I, sababta po ngénngan ta néi si bisa rpe yabé pa. Pocé bóngo Yesusé nécego kyat ta ni fao faspalé nmóte njé faje, "Aw lima, mosél po kyat ta félé né usnori lo nte."
Pocé bóngo Yesusé nutné kyat ta si pocé né, "Bo kutné mew su. Iga bo tdéréré aturan ta po Musa ni kitab abén lima lo né, sói ta ité bo tpe po ngénngan Sabaté? Bo tpe ta fié pari tpe ta lé? Bo tfafié kyat pari bo tpuné kyaté?" Si rlongé ta néi, rfaténténgén si le.
Pocé Yesusé néngóto si né ncawané, bóngo wlo njé nkangelangé, sababta wlori né métué. Bóngo Yesusé nécegé kyat ta fao nmóté njé faje, "Mayété faomé né lima." Bóngo kyaté njé nayété fao né néli, ta nfié i.
Yesus nfafié kyat isó njé npado
Nuéncó, Yesusé I po kota isó, se nfapdipén re kyat isó njé npado. Se ni badané né, bakbako be yóbété. Pocé némnaw Yesusé, tabóngo nétigé se ncuba I bóngo néceg faje, "Moke, iga wlemé, ya kéroré bo mfafié keé nik pado nte. Sababta ya kuné, maduga Awé le, ta nase méfené bo mféfié ya né."
Tabóngo Yesusé nétané kyat ta npado njé se nécegé i faje, "Ya wlegé bo mfié, se nte awé re mfié." Tabóngo po waktu ta néi óro, kyat ta npado njé re nfié i.
Pocé, télél be reni kyat séfis néli rwómé né rut kyat isó njé nlugu, se nyénéf i be po musala papo lo. Se réyówé yéféné né bo rcungé i némin po umé wlólo, bo rfabóy i po Yesus usno lo. Mayta kyaté né félé se rduk yéfén pa. Tabóngo rpak si néya po um papo lo, ga rédoké yótéfé né, se rtebo i nóp reni musala nuéncó le, po kyat ta félé né riri fapélun, po Yesus usno lo. Pocé, Yesusé némnaw kyat ta nlugu njé ni dél ta rgali i né I re nuné, si tadélé rdélé I. Tabóngo nécegé kyat ta nlugu njé faje, "Faftén ta awé, nam sélsólé né re kfayangésé keé."
Kyat Yahudi né riri guru agama ta runé Musa ni kitab abén limé, re riri kyaté-kyat ta rdéréré dodoto Farisi né. Rlongé ta Yesusé néceg fajé né, tabóngo réceg po wlori wlólo, "Kyat ta njéi pai, se npe ni diri dolo Jou Lahatala né? Sababta reni kyat isó pa, ta néfené nféyangésé kyaté-kyaté né róri sélsólé, maduga Jou Lahatala le ta néfené nféyangésé."
Mayta Yesusé re nuné keé wlori wlólo né, se nécegé si fajé "Fpe sói se fdélé pa? Po waktu ta Ya kécegé kyat ta nlugu nje faje, ‘Moke nam sélsólé né re kfayangésé keé,’ mewé fdélé pa, ta nó sélsólé né re kféyangésé keé né. Mayta iga Ya kécegé, ‘Mpangéné bo mfané ro’, pocé mewé bisa funé ta Ya renik kawasa né sababta fémnaw po ta re nfané lo né. Se nte, Ya bo kfafié keé i bo funé, ta po dunia wlólo nte, Kyaté Ntu ta Ya yama Jou Lahatala ni, renik kawasa ta bo kfayangésé keé kyaté-kyaté róri sélsólé né."
Tabóngo Yesusé nécegé kyat ta nlugu njé faje, "Kécego awé, mpangéné, malile keé nim musala njé, bo méléy po nim umé lo!"
Ta néi óro, kyat ta nlugu njé nosél po kyat ta félé né usnori lo, tabóngo nélóngé ni musala njé se néléy po ni umé lo. Po yéféné lo lesu né, ta délé ntail be Jou Lahatala ngósno le.
Yesusé nfafié kyat po ngénngan Sabaté
Nuéncó, mgo po ngénngan Sabat ta nésé nóté, pocé Yesusé ncung némin po Um Sambayangé lo se nfasodoto kyaté-kyat ta si pocé né. Ta pocé né, reni kyat isó njé fao wónéyé né nmóté. Pocé ma reni guru-guru agama, re kyaté-kyat Yahudi ta rdéréré dodoto Farisi nesté, bo réyówé Yesusé nó sélsólé bo rfasólé keé I. Se tadélé rtélém I, bo nfafié kyat po ngénngan Sabat pari tisé. Mayta Yesusé re nuné keé wlori wlólo né, se nécegé kyat ta fao nmóté njé faje, "Mpangéné, bo mosél pote po riri fapéluné nte."
Pocé tabóngo kyat ta fao nmóté njé npangéné se nosélé. Se Yesusé nécegé kyat ta pocé né, "Ya bo kutné mewé, iga tdéréré ité rir agama Yahudi ni aturané, npo fié bo tpe sói po ngénngan Sabaté né? Tpe ta fié pari, tpe ta lé? Tfasalamaté kyat pari, bo tfasusa kyaté?"
Pocé tabóngo néngóto néli re lima po férimé kyat ta pocé né, se nécegé kyat ta fao nmóté njé faje, "Mayété faomé né lima!" Tabóngo kyaté njé ma néyété fao né néli po Yesus ni, tabóngo nfié i.
Yesusé nfafié tentara Roma né riri kapala njé ni yomya yabé ta npisé njé
Yesusé nméitén po kyat ta félé né rewóré ndimé, tabóngo nfan I po kota Kapernaumé. Po kota Kapernaumé né, reni tentara Roma kompi esó riri kapala njé reni yomya yabé isó njé ta délé nmésié i. Néte yomya yabé nje npisé météwé se rebo nmóté. Se tentara Roma né riri kapala njé nlongé ta Yesusé nwóm po kota Kapernaumé né, tabóngo nané kyat Yahudi né riri kyat tut séfis néli rfané rkakém I bo nfafié ni yomya yabé ta npisé météwé njé. Se re rwóm po Yesus ni, tabóngo rfawómo tentara né riri kapala njé ni faftóté né. Se récegé I faje, "Moke, tentara né riri kapala ta njé mgali i le. Sababta kyat ta njéi, nmésié ité rir bangsa Yahudi né. Se I ta nje ro ta nané kyate, nfawoslé rir um Sambayang isó." Tabóngo Yesusé ndéréré si néli.
Se rebo rwóm po tentara né riri kapala njé ni umé lo, mayta tentara né riri kapala njé nané ni délé séfis néli rfané rwetcé Yesusé bo réceg faje, "Moke, ma mfakangelang Awé bo mwóm po nik umé lo su na, pantas pa. Sababta kémtaté bo kagbono Awé né. Se masike Aw pote bo méceg méitén faesó le ma, nik yomya yabé ta npisé njé nase nfié i. Sababta ya kuné, Awé bisa mparenta kyaté bo rfié, tadolo amé tentara né ma bisa kparenta kyaté. Ya ma renik kyat ta rkawasa ya nóté, bóngo ya renik yomya-yomya ta rlongé ya nóté. Iga ya kparenta nik yomya-yomya né, ‘Ffané!’ Si ma nase rfané. Iga kané nik yomya-yomya ta iglé né, ‘Fwómé!’ Si ma nase rwómé. Re iga kané nik yomya yabé ta iglé né, ‘Fpe ta nte!’ Si ma nase rpe sói ta ya kparenta si né."
Yesusé nlongé tentara né riri kapala njé ni faftóté ta rfawómo I né, télél I. Tabóngo néngóto néli re lima po kyat félé ta rdéréré I né, se nécegé si faje, "Flongé fafié ta Ya bo kécego mewé nte. Nuéncó pafule bo kduké kyat faisó po bangsa Israel ta fatuw-fatuwé ndélé Jou ta dolo kyat Roma nje né!" Po ngénngan ta néi óro kyaté-kyat ta tentara né riri kapala njé nané si nesté rpolén si néli po tentara né riri kapala njé ni umé lo né, pocé ga rémnawé ni yomya ta npisé météwé njé re nfié i.
Pocé reni mépin isó njé, setané nkawasa keé i se npisé sogado npuké ni mnuo taun nuén yófésó re pawalé. Pocé Yesusé némnaw i se nkakém i bóngo nécegé i faje, "Neke, re mfié se mpe gélesó pana." Néceg fajé rewóré, tabóngo nétewlé fao né néya po mépiné njé ni, se nosélé né re bisa nmalolé né, tabóngo mépiné njé nfatarima kase po Jou Lahatala ni.
Yesusé nfafié kyat po ngénngan Sabaté nóté
Nuéncó, mgo po ngénngan Sabaté, ngénngan ta néi kyat Yahudi né bisa rpe yabé pa, pocé tabóngo Yesusé nfané se némnóm po kyat Farisi né riri kapala isó ni umé lo. Kyat Farisi nesté tadélé rétané riri aturan agama né kuaté. Pocé bo réyówé Yesusé nó sélsólé né se tadélé rtarukira be I. Néga télél be reni kyat isó njé, npisé sogado sóo re fao né ma nbosé ndimé. Nwómo Yesusé, tabóngo Yesusé nutné kyat Yahudi né riri guru-guru agama ta runé Musa ni kitab abén limé né, re kyat Yahudi ta rdéréré dodoto Farisi nesté faje, "Iga bo tdéréré ité rir aturan agama, bisa pari tisé, bo tfafié kyat ta rpisé po ngénngan Sabaté né?" Mayta férimé né rfaténténgén si ndimé. Tabóngo Yesusé nétané kyat ta npisé njé ni fao né, se nfafié keé i. Rewóré ta néi, Yesusé nané kyat ta re nfié njé nfan i óro.
Yesusé nfafié kyat yófésó ta rpado nesté
Po waktu ta Yesusé nfan po kota Yerusalemé né, ndé I po bótén Samaria re Galilea ni fapéluné. Se ncung po pnuw isó ni né, reni kyat ta rpado yófésó rwómé bo rfapdipéné rdé I. Se rosélé né dolo ralówé I cuci. Bóngo rgélayé se réceg I faje, "Guru, mésié amé nte!"
Pocé Yesusé némnaw si, tabóngo nécegé si faje, "Ffan po imam-imamé né bo ffaftulo mew néli po si ni." Tabóngo rfané, tagare rwóm po yéfén fapéluno lesu, re rfié si.
Pocé ta isó i njé némnaw ta re nfié né, tabóngo npóléné nmulé se ntail Jou Lahatala né, tadélé nfakwat i. Tabóngo néli ga ncuba po Yesus sóo lo, re néceg tarimakase ta félé. I ta njéi, kyat Samaria i.
Tabóngo Yesusé nécegé i faje, "Péséw ta Ya kfafié mewé né mew dórén yófésó. Se sapopété nesté si pua? Pe sói se rpólén si lima bo rtail Jou Lahatala pa, se maduga isó ta njei le ta npólén i nmulé? Ga tagare, kyat ta njé i ma ité rir kyat i pa, maduga kyat wamwómi le, agama Yahudi i pa nóté!" Tabóngo Yesusé nécegé kyat Samaria ta re nfié njé faje, "Mosélé, bo mfan aw óro, re mfié sababta mdélé Ya."
A mulher com fluxo de sangue
Uma mulher que sofria há doze anos tocou a orla do manto de Jesus e foi curada instantaneamente pela sua fé.
Pocé rénfané se po yéféné lo lesu, télél be reni mépin isó njé re taun nuén yófésó re nuénluwé né tadélé nkangelangé sababta nuén taptipéné ni léló nfané, se nférakni i néli po Yesus too lo se nétit Yesusé ni juba wómo né. I npe fajé né, sababta nénuta, "Masike kétit be ni juba njé facuci le, ya nase kfié."
Po waktu ta néi, Yesusé négiwé I némin tó lo se némnaw mépiné njé, bóngo nécegé i faje, "Neke ta awé, mfakwaté wlemé njé! Sababta awé mdélé Ya se re mfié." Po waktu ta néi óro, mépiné njé nfié i.
Pocé fajé ma reni mépin isó, ta ni léló nfané né ni mnuo re taun nuén yófésó re nuén luwé. Re mnuwé nfaurém po sousou né sogado ni pipisé né re tiso, mayta nfié pa le, ni léló né ntébén pa. Se nkahi i pana.
Mépin ta njéi nlongé ta Yesusé nénfafié kyaté né. Se masike kyat félé, mayta nfawsówé si bo nétit Yesusé ni juba njé. Sababta nénuta, "Masike kétit be ni juba njé facuci ma, ya nase kfié." Waktu ta nétit Yesusé ni juba njé né, télél be ni léló né ntébéné, bóngo nuné ta i re nfié.
Pocé po kyat ta félé né, reni mépin isó njé re taun nuén yófésó re nuén luwé ta délé nkangelangé, sababta nuén taptipéné ni léló nfané. Se re nfaurém po sou-sou sogado nó haréta né ma re nwagé keé ndimé, mayta nfié pa. Se ntaptubo Yesusé, tabóngo nfarakné i néli se nétit Yesusé ni juba wómo né, tabóngo po waktu ta néi óro, ni léló né ntébéné se re nfié i.
Pocé tabóngo Yesusé nutné kyaté-kyat ta pocé né, "Pai ta nétit Ya njé?"
Mayta isó pa ta ncóngélé. Se Petrusé nécegé I faje, "Guru, kyaté nte félé ta rfasésiséné rdé Awé né!"
Tabóngo Yesusé nécegé si fajé, "Mayta reni kyat isó nétit Ya, sababta kbósémé né reni kawasa ta ncópén po Ya ni."
Pocé tabóngo mépiné njé nanuta po wlo wlólo, "Yesusé re nuné ya, se bisa képiné pa na." Tabóngo mépiné njé nwéwewé se nfan néli po Yesus ni, ga ncuba I po kyat ta félé né usnori lo, tabóngo néféténé, pe sói sogado nétit Yesusé ni juba njé né. Bóngo nécegé nóté, po waktu ta nétit Yesusé ni juba njé, tabóngo nfié i.
Tabóngo Yesusé nécegé mépiné njé faje, "Neke, nte awé re mfié, sababta mdélé Ya. Se méléyé ro re wlem ta nténgéné."
Ressurreições
Jesus ressuscitou mortos — a filha de Jairo, o filho da viúva de Naim e Lázaro. Ele é Senhor sobre a morte.
Yairusé ni ntu ta re nmóté njé Yesusé nfapangén i nmulé, re nfafié mépin isó ta ni léló nfané njé
Waktu ta Yesusé nméiténé lesu re Yohanes ta nénbaptisé kyaté njé ni motemote nesté, néga télél be reni légaé isó nwómé, ngósno Yairusé. Légaé ta njéi, ndadi kyat tut pocé po agama Yahudi né riri um sambayangé lo né. Néli bóngo ncuba Yesusé se néceg faje, "Alli, Guru ta Awé, ntig mépiné njé tagare nmóté. Se kéror po Aw ni mpe néli po nik umé lo su? Bo métewlé faomé né néya po i ni, bo npangéné nmulé."
Yesusé nlongé ta néi, tabóngo nosélé se I re ni motemote nesté rdéréré Yairusé néli po ni umé lo.
Rewóré ta néi, Yesusé nfané nfalów sogado nwóm po légaé Yairusé ni umé lo. Pocé ncung néminé ga némnawé reni kyaté-kyat ta rénufé riri sulingé, reni ta rtangésé se tadélé gégliné. Mayta Yesusé nécegé kyat ta pocé né, "Fsópéné ndimé, sababta yomya mépiné njé nmót pa, maduga nyénéfé le." Rlongé ta Yesusé néceg fajé né, si ga rémlifo keé I, sababta runé yomya njé re nmóté.
Se ta kyaté-kyaté né rcópéné ndimé, tabóngo Yesusé ncung némin po yomya njé ni kamaré lo. Pocé nétané yomya njé ni fao né, tabóngo npangén i nmulé.
Pocé fajé po pnuw ta njéi né, reni kyat isó ngósno Yairusé nwóm pocé nóté. Kyat ta njéi ndadi kyat tut po agama Yahudi né riri um sambayangé lo. Pocé némnaw Yesusé tabóngo nfan néli ntikibuku se ncuba I. Kyaté njé néror ta fatuw-fatuw po Yesus ni, se néceg faje, "Moke, mdé ya néli po nik umé lo su. Bo mgali ntig mépiné njé, re npisé météwé se. Ya kéroré bo métewlé faomé né néya po i ni bo nfié i ro."
Pocé, bóngo Yesusé ndéréré Yairus néli po ni umé lo. Kyat ta félé né ma rdéréré Yesusé nóté, sogado ga rfasésisén re Yesus po yéféné lo.
Se ta re rwóm po Yairusé ni umé lo né, Yesusé némnawé kyat ta rtangésé né tadélé rgégliné. Bóngo Yesusé ncung néminé se nutné kyaté-kyat ta pocé né, "Fpe sói se fgégliné re ftangésé? Yomya njé nmót pa, maduga nyénéfé le." Mayta kyaté né rémlifo keé Yesusé, sababta si runé ta yomya njé re nmóté.
Pocé Yesusé nané kyat ta si pocé né rcópéné ndimé. Rewóré ta néi, Yesusé nut yomya njé ni moke re neke, re ni motemote ta I re si nesté se rcung némin po yomya njé ni kamaré lo. Bóngo Yesusé nétané yomya njé ni fao né, se néceg faje, "Talita kum," ta ni ngale né, ‘Yomya mépin ta awé! Mpangén óro!’
Waktu ta néi óro, yomya njé npangén néya, se nfan i néli re lima. Pocé, férimé kyat ta rémnawé né télél si ndimé. (Yomya njé ni umuré né re taun nuén yófésó re nuén luwé).
Yesusé nécegé nóté, "Ya bo kfatailo kyaté-kyat ta isémé nte tadolo sói é? Kyat ta dolo sói si é? Ya kfatailo si né ta dolo yomya ta étné be ngénngan né rtolén si po pasaré lo né, se rémongé re rpe riri rameangé. Bóngo rgagélayé bo rkakémé riri délé né se réceg faje,
‘Amé re kuf sulingé nte bo fsawélé, mayta mewé fsawél pa.
Amé knyanyi dolo reni métmóté, mayta ftangés pa.’
Mewé nte ta dolo yomya-yomya ta néi, sababta Yohanes ta nanénbaptisé kyaté njé nwómé né, flongé i pa. Yohanesé njé nó roti re niném anggur pa, mayta mewé fécegé cogo roh léo ntolno i. Nte, Kyaté Ntu ta kwóm yama soroga wlólo nte, Ya kpuasa pa, se kó re kinémé le, mayta mewé fécegé cogo Ya kbabloko re kmaféinémé, bóngo kfaljilé kdé keé re kyaté-kyat ta rarénfalutno pajaké nesté, re kyat iglé ta re róri sélsól félé né. Mayta masike mewé ftarima Ya re Yohanes pa, pote se néli ga nase fémnawé kyaté-kyat ta rdéréré nik dodoto né, pocé nase riri hidupé né fié re métegélé ndimé."
Mépin ta nó sélsól félé njé, nduplo Yesus re yégét ta pépu mnó
Reni kyat Yahudi isó njé ndéréré dodoto Farisi, ngósno Simoné. Simoné njé nkakém Yesusé bo rémnóm po ni umé lo, tabóngo Yesusé nfan néli po Simoné ni umé lo, se rtoléné bo rémnómé. Po pnuw ta njé, reni mépin isó njé kyat férimé runé ta mépin léo i. Nlongé ta Yesusé némnóm po Simoné ni umé lo né, tabóngo nfan néli nut yégét ta papu mnó tadélé mulo pélóyé né po botolé wlólo.
Po waktu ta néi, reni kyat isó ngósno Yairusé, nkawasa po kyat Yahudi né riri um sambayangé isó ni. Nwómé ncuba Yesusé, se néroré bo Yesusé nfan po ni umé lo. Sababta ni ntu maduga isó ta njé le, mépin i, ni umuré né taun yófésó re péluwé, ga npisé se rebo nmóté.
Tabóngo Yesusé nfan po ni umé lo. Ta Yesusé I po yéféné lo lesu né, ni kyaté né ta délé félé, rfasésiséné bo rfarakné si néli po Yesus ni.
Pocé Yesusé nméiténé lesu, télél be reni kyat isó nwóm lima Yairusé ni umé lo. Se nécegé Yairus faje, "Moke, ntimé njé re nmóté. Se ma mfakangelang légaé Guru njé le na."
Se Yesusé nlongé ta kyaté néceg fajé né, tabóngo nécegé Yairus faje, "Moke, ma mémtat na, mdélé le sababta ntimé njé nase npangéné nmulé."
Pocé ta Yesusé re nwóm po Yairusé ni umé lo né, wlo pa bo kyaté-kyaté né rcung némin po kamaré lo, I maduga npo fié be Petrusé, Yohanesé, Yakobusé, re yomya njé ni déluté nesté le. Se férimé kyat ta pocé né, rtangso yomya ta nmóté njé né ta délé rgagélayé. Mayta Yesusé nécegé si faje, "Ma ftangés na. Yomya nje nmót pa, maduga nyénéfé le."
Rlongé ta Yesusé néceg fajé né, si ga rémlifo keé I, sababta si runé yomya njé re nmóté.
Rewóré ta néi, Yesusé nétané yomya njé ni fao né se nécegé i faje, "Yomya ta awé, mpangéné óro!" Ta néi óro, yomya njé npangéné nmulé se nosél i. Rewóré ta néi, Yesusé nané si réfay yomya njé. Se ni déluté nesté rémnaw fajé né, tadélé rherané. Mayta Yesusé nécegé si faje, "Sói ta re fémnawé nte, ndél pa bo fafétén néli re lima."
Domínio sobre a natureza
Jesus acalmou a tempestade, andou sobre as águas e multiplicou pães. A natureza obedece à voz do seu Criador.
Yesusé nfatébén moré re mawruwé
Rewóré ta néi, Yesusé rcapél I po yelé lo, pocé bóngo ni motemote nesté ma rdéréré I se rcobél si. Po waktu ta si po talaga lo né, télél be rato njé ntebé se mawruwé njé nawét sogado wóe ncung po riri yelé njé ni. Mayta po waktu ta néi, Yesusé nyénéf I. Se ni motemote nesté réi I, bóngo récegé I faje, "Alli, Jou! Mgali amé. Ité nte bo tmóté ya!"
Pocé tabóngo nécegé si faje, "Ee, fpe sói se fémtaté? Mewé nte fdélé Jou né maduga cuci le." Bóngo nosél néya se nécegé moré re mawruwé né re gli ta pélóyé, "Ftébén óro!" Bóngo po waktu ta néi óro, moré re mawruwé né ntebéné, se talaga njé ma tadélé nmaklóngéné.
Pocé ni motemote nesté rémnawé né rherané, bóngo rfalécego, "Nfatébén moré re méwruwé né tabóngo rtébéné, rdéréré ni parenta né se. Kyat ta njé pai, sogado moré re méwruw ma rtébéné?"
Ta ngénngané njé bo ncep nópé né, Yesusé ni motemote nesté rfano I néli se récegé I faje, "Guru, géwgów ta ntei nélówé pnuwé, se ta fié né mécego kyat ta félé né bo rfan po pnuw re pnuwé bo rgoné róri mnómé."
Mayta Yesusé nécegé si faje, "Matiné, ma fané si rfan na. Sababta mare mewé ro ta bo fdo si mnómé."
Ni motemote nesté ga rcónglo I, "Alli, ga mam yéléné nte maduga roti pélim re in séluwé."
Pocé bóngo Yesusé nécegé si faje, "Pana fajé, fut lima óro."
Rut néli, bóngo Yesusé nané kyat ta félé né réyówé góori bo rtoléné nóp po gamuné papo lo né. Pocé bóngo nyó roti pélim re in séluwé né, ga néngóto néya langété lo se néceg tarima kase po Jou Lahatala ni. Rewóré, ga nfalkelsé roti né se npo ni motemote nesté bo rfanténo kyat ta félé né. Pocé bóngo férimé si rémnóm sogado rmesé. Rémnómé rewóré, Yesusé ni motemote nesté rfajólo mnómé gléo né, ni féléo lalógéy yófésó re paluwé. Kyat ta rémnómé né nihalé calén limé, necé tagare móné, rfaétno mépin re yomya né pafule.
Ta re bo malówé né, Yesusé nfano si néli né nénfan I po ya wolét papo lo.
Yesusé nfamnóm kyat calén fót re glé
Pocé, tabóngo Yesusé nkakémé ni motemote nesté se nécegé si faje, "Ya kmésié kyat ta félé nte. Re ngané telé ro si re Ya pote né, se re róri mnóm pana. Ya wlegé néfeno pa, bo kané si réléy re snori ta mémowélé né. Kdodato be po yéféné lo ga résmaputé."
Tabóngo ni motemote nesté récegé I faje, "Moke, géwgów ta ntei nélówé pnuwé, ga bo tduké róré mnóm fawa lima bo téfao kyat ta féléo i nte?"
Bóngo Yesusé nutné si, "Nómi roti ta futé né péfisé?"
Si rcónglo I, "Péfité, re iné mya séfis néli."
Pocé tabóngo Yesusé nané kyat ta félé né réyówé góori bo rtoléné. Se re rtolén nópé, bóngo néyó roti péfit re in séfis néli nesté, se néceg tarima kase po Jou Lahatala ni. Rewóré ta néi, nfalkelsé roti re nfamkimsé iné né, bóngo npo ni motemote nesté se rfanténo kyat ta félé né. Bóngo férimé si rémnóm sogado rmesé ndimé. Rémnómé rewóré, ga ni motemote nesté rfajólo mnómé gléo né, ni féléo férimé téglas péfité né rbékbaké ndimé. Kyat ta rémnóm po waktu ta néi, ni kyat tut móné le férimé calén fóté. Necé rétén mépin re yomya né pafule.
Yesusé nfasodoto si bo rpólés Um Sambayang ta npélóyé njé ni pajaké
Waktu Yesusé I re ni motemote nesté rwóm po kota Kapernaumé né, kyaté-kyat ta ranfalutno Um Sambayang ta npélóyé njé ni pajak né, rfano Petrus néli se rutné i, "Nim guru njé nénpólés Um Sambayang ta npélóyé njé ni pajak pari tisé?"
Bóngo Petrusé nécegé si faje, "Iya, nénpólésé."
Waktu ta Petrusé ncung némin po umé lo né, tabóngo Yesusé nutné i ntubé, "Simoné, bo kutné awé nte. Iga awé, pai ta mare npólés pajak po kolano-kolano ta rkawasa po dunia nje ni wlólo nte? Si nturi óro pari kyat nésé?"
Petrusé ncónglo, "Mare kyat nésé."
Tabóngo Yesusé nécegé i faje, "Fatuwé né. Se iga si nturi óro masike ma rpólésé le na. Fajé nóté re ité, ité nte Jou Lahatala ni ntu ité, se masike ma tpólés pajak po Jou Lahatala ni Um Sambayangé njé le na. Mayta wóré! Ma sogado kyat ta nesté rcawan it na. Se nte kané awé mfan néli po talaga njé ni bo mfatéé rór iné. Iga mót in ta faywóbno njé, mépil sumo né. Pocé nase mduk pipis ta nase nbungé iga mpólés it dórén luwé rir pajak po Um Sambayang ta npélóyé njé ni né."
Yesusé ncawan ay ara isó ta népyon pa njé
Ni tamémóné né, Yesusé I re ni motemote nesté rpólén si nmulé po kota Yerusalemé. Po waktu ta rénfan néli né, Yesusé nbósémé ntélóté. Né ga némnawé reni ay ara isó po yéfén lapo lo né. Tabóngo nfan néli bo néyówé ni pyono né, mayta nduk fapusó le ma tisé, maduga ni wlu bóto. Se pocé bóngo nécegé ayé njé faje, "Awé nase mépyon pana sogado fajé néli le!" Po waktu ta néi óro, ayé njé némlayé se nmót i.
Pocé Yesusé ni motemote nesté rémnawé né rfawgiwé bébokori, bóngo rutné Yesusé, "Tabeu! Pe sói se ga ayé njé télél be nmót i?"
Tabóngo Yesusé nécegé si faje, "Flongé fafié é ta Ya kécego mewé nte. Iga fdélé Jou ta fatuw-fatuwé, taga wlomi né ma nfatutén pa, mewé nase bisa fpe ta dolo Ya kpe po ayé njé ni né, mayta necé le pa. Mewé ma nase féfené fécegé métété njé faje, ‘Terélóngé awé bo mlué aw nélaw po wolété lo né!’ Necé nase ndadi i. Re, iga fdélé ta fatuw-fatuwé, sói le ta féror po Jou ni né, nase ndadi i ndimé."
Ta rénap nélawé né, rduké róri moré re méwruwé se nfabébépsé si. Wóé né ma ncung néya yelé wlólo sogado bo rémdiré. Waktu ta néi, Yesusé nyénéf I po fafamilé lo. Béboko njé npóglé i nóp liléné lo. Ni motemote nesté rémtaté bóngo récegé I faje, "Guru, mpangéné. Mémnawé, ité nte nase bo tmóté!"
Pocé Yesusé npangéné se nosél néya, tabóngo nécegé moré re méwruwé né faje, "Ftébén óro!" Tabóngo moré njé ntébéné, se talaga njé ma nméklóngéné.
Pocé Yesusé nécegé ni motemote nesté faje, "Fpe sói se fémtaté? Ga fdélé Ya pa né?"
Pocé bóngo rémtaté, se rfatutén isó re isó, "Bee, ga pai njé, sogado moré re méwruwé né ma rdéréré se ntébéné né?"
Ta re mérimé né, Yesusé ni motemote nesté rwóm po I ni, bóngo récegé I faje, "Guru, géwgów ta ntei nélówé pnuwé, ga taga rebo dorémé. Se ta fié né mané kyat ta félé nte rfané ro, bo rgoné róri mnóm po pnuwé-pnuw ta rakén pote né."
Mayta Yesusé nécegé si faje, "Mare mewé ta fdo si mnómé né!"
Si rcónglo I, "Alli, kyat ta féléo i nte ga! Mare tpe yabé né reni sni bo re tduk pipis fafélé, ga tagare téfené tgoné róri mnómé!"
Pocé Yesusé nutné si nóté, "Nómi roti ta futé né péfisé? Coba féflengén su!"
Réflengéné rewóré, bóngo récegé Yesus faje, "Reni roti pélimé, re in séluwé."
Bóngo Yesusé nané kyaté né rfajólo si néli-néli bo rtolén po gémuné ta fié lo né. Se rtoléné né rpe géwgów esó ni kyaté né reni ta witéncó, reni ta yófé limé. Rewóré ta néi, Yesusé nyó roti pélim re in séluwé né, bóngo nékngól néya langété lo, ga néceg tarima kasi po Jou Lahatala ni. Rewóré, ga nfakpekté roti né, se npo ni motemote nesté bo rfanténo kyat ta félé né. Fajé nóté re in séluwé né. Nyó ga npo ni motemote nesté, bo rfanténo kyaté né nóté. Se férimé kyat ta pocé né rémnóm sogado rmesé. Rémnómé rewóré, Yesusé ni motemote nesté rfajólo in re roti ni gléo né, ni féléo lélógéi yófésó re paluwé né békbaké ndimé. Ngénngan ta néi, kyat ta rémnómé né calén limé, necé rétén be móné né.
Se némnaw ta rtomo róri moré njé sogado rapé ma réfen pana, sababta moré njé tadélé nbabubé. Bóngo ta re rakno mélówé né, Yesusé nfano si néli né ndé I po wóé pépo lo. I ni maksuté né bo néliw si néli. Mayta waktu ta rémnaw I nfan po wóé pépo lo né, si récogo ma haiwan wólét I, se rgagélayé sababta rémtaté. Pocé Yesusé nécegé si faje, "Ffaténténgéné mewé, ma fémtat na. Neje Ya óro!"
Pocé Yesusé ncapél néya po riri yelé wlólo né, tabóngo moré njé ma ntébéné. Se ni motemote nesté rémnaw ta néi, tabóngo tadélé rdéngó.
Yesusé nfamnóm kyat calén fóté
Waktu ta néi, reni kyat félé nóté ta rfajólo si po Yesus ni né. Sababta re róri mnóm pana, se Yesusé nkakémé ni motemote nesté bóngo nécegé si faje, "Ya kmésié kyat ta félé nte, sababta re ngané telé wlólo nte Ya re si pote. Se nete re róri mnóm pa na. Iga Ya kané si réléyé ga rtélóté, nase résmaput si po yéféné lo, sababta iglé nte rwóm lima géwgów ta lówé."
Yesusé ni motemote nesté rlongé ta néceg fajé né, tabóngo récegé I faje, "Guru, géwgów ta ntei nélówé pnuwé, se nase bo tfamnóm si fanfawa?"
Bóngo Yesusé nutné si, "Nómi roti ta pocé né reni péfisé?"
Si rcónglo "Reni péfité."
Pocé ga Yesusé nané kyat ta félé né rtoléné. Rewóré ta néi, ga Yesusé nyó roti péfité né, se néceg tarima kase po Jou Lahatala ni rewóré, ga nfakpekté se npo ni motemote nesté bo rfanténo kyat ta félé né. Po si ni ma, reni iné myaku séfis néli nóté. Bóngo Yesusé nyó iné né se néceg tarima kase po Jou Lahatala ni, rewóré ta néi ga nané ni motemote nesté bo rfanténo kyat ta félé né nóté. Pocé ga rémnóm sogado rmesé ndimé. Rewóré ta néi, ga Yesusé ni motemote nesté rfajólo mnómé ni gléo né, ni féléo lalógéy péfité né békbaké ndimé. Kyaté-kyat ta rémnóm waktu ta néi, féléori né nihalé calén fóté. Rémnómé rewóré, ga Yesusé nané si réléyé ndimé.
Yesusé ncawan ay ara isó ta népyon pa njé
Ni tómémóné né, Yesusé I re ni motemote nesté rfatoléné keé pnuw Betania. Se rfané rwóm po yéfén fapéluno né, Yesusé nbósémé ntélóté. Se lów i lesu né Yesusé némnaw ay ara isó njé ni wlu né ta délé rubu-rubu fié. Tabóngo npe néli bo némnawé, reni pyono pari tisé. Mayta nwóm néli se némnawé né re pyono fapusó le ma tisé, maduga ni wlu bóto. Sababta nwómo i ni waktu pafule ta bo népyoné. Tabóngo Yesusé nécegé ay ara njé faje, "Awé nase mépyon pana, se ngénngan pésénte oró, reni kyat isó pa ta nase bo ró pyonomé né!" Pocé ni motemote nesté ma rlongé ta Yesusé nécegé né.
Iga bo tmaiténé tdé Jou Lahatala, mare fatuw-fatuw ta tdélé I
Ni tómémóné né, Yesusé I re ni motemote né rfané nóté. Ta rfan se rwóm po yéfén fapéluno né, rémnaw ay ara ta i pepé njé re némang sogado po ni wówo lo. Pocé Petrusé nfatélolmo i, bóngo nécegé Yesus faje, "Alli Guru, méngóto! Ay ara ta i pepé njé ta mécegé bo népyon pana njé, re némang i ndimé!"
Pocé Yesusé ncónglo si, "Mewé mare fatuw-fatuw ta fdélé Jou Lahatala. Flongé fafié ta bo kécego mewé nte: kyat pai le ta nané métét ta njé li terélóngé i bo ndirké i nélaw po wolété lo, necé nase ndadi i, iga fatuw-fatuwé ndélé Jou re wlo njé ma nfatutén pa né. Tamulo ffatélolmo mew fafié, iga bo fméiténé fdé Jou, sói le ta bo féroré né mare fdélé I ta fatuw-fatuwé I nase npo mewé sói ta mewé bo féroré né. Mayta iga fosélé bo fméiténé fdé Jou ga ffaisno wlo né po kyat ta ncól po mew ni njé lesu, mare fféyfio fdé i su, bo nimi Moke ta I po soroga lo ma nfayangésé keé menómi sélsólé né nóté." [
Yesusé nkakémé ni motemote ta bo rdéréré I né
Nuéncó, Yesusé nosél po talaga Genesaret lapo. Pocé reni kyat félé ta rfasésiséné, bo rlongé Jou Lahatala ni dodoto. Tabóngo Yesusé némnaw po talaga lapo lo né, reni yel abén luwé. Yelé né ni kyaté né re rtebé, se rfabéyeléné riri lóbéné né. Tabóngo Yesusé ncapél I po yel esó ni. Yel ta néi, Simoné ni yelé. Se nané Simoné nérué yelé né nélaw facuci. Tabóngo Yesusé ntolén I po yelé lo, ga nfasodoto kyat félé ta si po talaga lapo lo né.
Pocé Yesusé nfasodoto rewóré ndimé, tabóngo nécegé Simon faje, "Simoné map nélaw po mlóméné lo né, bo mpawélé nim lóbéné njé pocé bo mduk iné."
Tabóngo Simoné ncónglo I, "Guru, dorém esó wlólo né, amé re kpawél lóbéné njé sogado bo klé, mayta kémgo in faisó le ma tisé. Mayta nte Awé ta mané, se ya nase kpawél i nmulé lóbéné nje."
Se rdéréré ta Yesusé nané si né rewóré, tabóngo rémgo iné né ta délé félé. Sogado lóbéné njé ma bo némgawésé. Pocé tabóngo rgawé riri dél ta si po yel nésé nesté bo lima rgali si. Se riri délé né rwóm lima rgali si réfray in po yel abén luwé né, sogado re bo mdiré. Po waktu ta Simoné némnaw Yesusé ni kawasa né, tabóngo nétig nóp Yesus usno lo, se néceg faje, "Jou, mfatoléné keé ya ro! Sababta ya nte kyat ta re nak sélsól félé."
Sogado Simoné néceg fajé né, sababta ni délé nesté rféwgiwé bébokori, rémnaw in ta rémgo né ta délé félé se. Fajé nóté re Simoné ni délé nesté, Yakobusé i re Yohanesé, Zebedeusé ni ntu si. Tabóngo Yesusé nécegé Simon faje, "Simoné, ma mémtat na! Sababta anim yabé né maduga méyówé be iné le, mayta po oras ta ntei óro, awé nase méyówé kyaté bo rdéréré Ya."
Rewóré ta néi, tabóngo Simoné i re ni délé nesté róglé keé riri yelé né po talaga lapo, bóngo rfatoléné keé férimé ta pocé né, se rdéréré Yesusé.
Yesusé nfatébén rato njé
Nuéncó, Yesusé I re ni motemote nesté rcapél si po yel ta pélóy esó ni. Pocé tabóngo nécegé ni motemote nesté faje, "Lima bo tpe néli po talaga féspalé." Tabóngo rpe néli. Se ta rcobélé lesu né, Yesusé nyénéf I. Néga télél be moré rato njé ntebé se méwruwé nje nawét sogado riri yelé né ma re békbako re wóe sogado re bo rémdiré.
Se ni motemote nesté rfapangén I, bóngo réceg faje, "Guru, ité nte nase bo tmóté!"
Pocé npangéné se nfatébén moré re méwruwé né. Tabóngo moré re méwruwé néma ntébéné, se talaga njé tadélé nmaklóngéné.
Tabóngo nécegé ni motemote nesté faje, "Fpe sói se fdélé Ya pa?"
Pocé rémtat re rherané, se rfalécego faje, "Moré re méwruwé né rtébéné, rdéréré ni parenta né se! Kyat ta njé pai é, sogado moré re méwruwé ma rtébéné né?"
Yesusé nfatébén rato njé
Nuéncó, Yesusé I re ni motemote nesté rcapél si po yel ta pélóy esó ni. Pocé tabóngo nécegé ni motemote nesté faje, "Lima bo tpe néli po talaga féspalé." Tabóngo rpe néli. Se ta rcobélé lesu né, Yesusé nyénéf I. Néga télél be moré rato njé ntebé se méwruwé nje nawét sogado riri yelé né ma re békbako re wóe sogado re bo rémdiré.
Se ni motemote nesté rfapangén I, bóngo réceg faje, "Guru, ité nte nase bo tmóté!"
Pocé npangéné se nfatébén moré re méwruwé né. Tabóngo moré re méwruwé néma ntébéné, se talaga njé tadélé nmaklóngéné.
Tabóngo nécegé ni motemote nesté faje, "Fpe sói se fdélé Ya pa?"
Pocé rémtat re rherané, se rfalécego faje, "Moré re méwruwé né rtébéné, rdéréré ni parenta né se! Kyat ta njé pai é, sogado moré re méwruwé ma rtébéné né?"
Yesusé nfaungé setan ta ncung po kyat isó ni po bótén Gerasa
Yesusé I re ni motemote nesté rcobél sogado po talaga Galilea ni féspalé, po kyat Gerasa né riri bóténé lo.
Pocé rebo dérorérémé, tabóngo Yesusé ni motemote yófésó re séluwé nesté rfano I se récegé I faje, "Guru, géwgów ta nte i béklingéné re nélówé pnuwé. Se ta fié né mané kyat ta félé nte rfan po pnuw re pnuwé bo réyówé mnóm re géwgów ta bo ryénéfé."
Mayta Yesusé nécegé ni motemote nesté faje, "Mare mewé ta bo fdo si mnómé né!"
Tabóngo ni motemote nesté récegé I faje, "Guru, ta po am ni nte maduga roti palim, re in séluwé. Pari, mare amé bo kfané kgoné mnómé nóté bo kéfay kyat ta féléo i nte?"
Yesusé ni motemote nesté réceg fajé né, sababta kyat ta pocé né, ni féléo nihalé calén limé, necé rétén maduga móné. Tabóngo Yesusé nécegé ni motemote nesté faje, "Fané kyat ta félé né bo rtoléné rpe géwgów faabén fis néli, rfajól po géwgów faesó né, ni kyat fa si dórén yófélim pa?"
Tabóngo Yesusé ni motemote nesté rdéréré sói ta I nané si né. Se rané kyat ta si pocé né, bo férimé rtoléné. Se re rtoléné ndimé, tabóngo Yesusé néyó roti pélim re in séluwé né, se nagbon néya langété bóngo néceg tarima kase po Jou Lahatala ni. Rewóré ta néi, tabóngo népekét roti né se npo ni motemote nesté, bo rfanténé kyat félé ta pocé né. Pocé ga ró sogado rmesé. Rewóré ta néi, ni motemote nesté rfajólo in re roti ni gléo né, ni féléo lalógéy yófésó re péluwé.
Libertações
Jesus expulsou demônios com autoridade. Os espíritos impuros não resistiam à sua palavra e saíam imediatamente.
Tentara né riri kapala njé ndélé Jou Yesus fié
Po waktu ta Yesusé nwóm po pnuw Kapernaumé né, pocé tentara Roma né kompi esó riri kapala njé nwóm po Yesus ni. Se néror po I ni se néceg faje, "Moke, po nik umé lo né nik yomya yabé isó npisé, sogado ni badané né re nmóté se bisa nfaméyawén i pa na, se tadélé nkangelangé."
Bóngo Yesusé nécegé i faje, "Iya, pana fajé Ya bo kfan néli po nim umé lo bo kfafié i."
Mayta tentara né riri kapala njé nécegé I faje, "Alli, Moke ta Awé, ma mwóm po nik umé lo le na, sababta ya nte pantas pa bo ktarima Awé né. Mayta masike méceg be méitén faesó pote ma nase nfié i nik yomya yabé ta npisé njé. Sababta ya kuné, Awé re nim kawasa ta bisa mfafié kyaté, se mécegé le nase nfié i, necé tadolo amé ma kécegé le mam tentara nesté rdéréré ndimé. Sababta ya renik kapala ta nané ya, bóngo renik yomya ta nlongé ya nóté. Se iga kparenta i, ‘Mfané!’, nase nfané. Iga kparenta ta iglé né, ‘Fwómé!’, nase rwómé. Re iga kparenta ta iglé nóté, ‘Fpe nte!’ Si nase rpe nóté sói ta ya kparenta si né."
Pocé Yesusé nlongé ta néceg fajé né, tadélé mgo wlo, se nécegé kyat ta rdéréré I né faje, "Flongé fafié ta Ya kécego mewé nte. Po farimé kyat Israelé né kduké kyat isó pafule ta ndélé Jou Lahatala fié ta dolo kyat ta i lima bangsa Roma nje né! Se fatélolmo mew fafié, nase reni kyat félé ta kyat Yahudi si pa po géwgów pua le po dunia nje ni wlólo nte, lima ngancóo sogado po ngancepo né, bo rdadi Jou Lahatala ni kyat si, se bo rtoléné rémnóm re Abrahamé, Ishaké re Yakob po géwgów ta Jou Lahatala nkawasa dolo Kolano po ni kyaté-kyat ta rdélé I né. Mayta masike bangsa Yahudi ta Jou Lahatala re npili si ntubé bo rdadi I ni kyaté-kyat si né, reni kyat félé pa ta si ntéli né. Se Jou Lahatala nase nwóté keé si po dérorémé wlólo. Pocé, nase réntangés re tadélé rkangelangé."
Rewóré ta néi, Yesusé nécegé tentara né riri kapala njé faje, "Wóré, nte méléyé ro moke! Sababta awé re mdélé masike Ya kméitén be pote ma, nim yomya yabé njé nase nfié. Se nte re nfié i, sababta awé re mdélé Ya." Po waktu ta néi óro, tentara né riri kapala njé ni yomya yabé ta npisé njé re nfié i.
Yesusé nfafié kyat séluw ta setané ntolno si nesté po bótén Gadara
Pocé Yesusé I re ni motemote nesté re rwóm po talaga njé ni féspalé, po kyat Gadara né riri bóténé lo. Pocé reni món séluwé né, setané ntolno si. Se kyaté né rémtaté keé si, se randé pocé pa. Pocé télél be si dórén luwé né rcópén lima kubur lóyé lo né, bo rfan po Yesus ni. Bóngo setan ta rtolno si nesté rméiténé né rfakuat si, se réceg faje, "Ado, Jou Lahatala ni ntu ta Awé, mwóm lima nte bo mpe am fawa? Dunia njé nkiamat pafule, ga bo mfasusa keé amé ro né?"
Po li fajé, reni bowé né tadélé rfélé raréyówé róri mnómé. Pocé setané nesté réror po Yesus ni, "Iga bo mfaungé amé, ta fié mané amé ksung po bowé nesté ni."
Bóngo Yesusé nécegé si faje, "Iya, ffan néli óro!" Tabóngo rcópéné se rfan néli ga rcung si po bowé nesté ni. Télél be bowé né nfasérero i néli po tériré lapo lo né, se férimé ryóg si nóp po talaga wlólo né bóngo rmót si pocé.
Pocé kyat ta réjaga bowé né rémnaw ta néi, tabóngo rcéreré se rwóm po kota lo ga réféténé keé férimé ta rémnawé né. Bóngo réféténé nóté kyat séluw ta setané ntolno si se re rfié nesté. Se kyaté-kyat ta rtolén po kota njé ni né, rlongé ta réféténé né, bóngo rémtaté se rcópéné ga rfan po Yesus ni. Po waktu ta re rfapdipén re Yesusé né, réroré bo Yesusé nfatoléné keé riri bóténé njé ro.
Yesusé nfafié kyat isó ta setané ntolno i se nmémewé njé
Waktu kyat ta rébyafé se re rémnawé nesté rcópéné né, télél be reni kyat isó nóté setané ntolno i sogado nmémewé se rut i po Yesus ni. Bóngo Yesusé nfaungé setan ta ntolén po kyat ta nmamewé njé ni, se po waktu ta néi óro, kyaté njé re bisa nméiténé nmulé. Pocé bóngo kyaté-kyat ta rfajól pocé né, tadélé rherané se rfalécego faje, "Beé, ta mnuo re lóo po bótén Israelé nte témnaw pafule ta dolo kyaté njé npe né!"
Kyat iglé réceg Yesusé, cogo setané ni kolano njé ntolno I
Rewóré ta néi, reni kyat séfis néli ruté kyat isó nóté po Yesus ni. Kyaté njé setané ntolno i sogado nébyaf re nmémewé. Pocé Yesusé nfaungé setan ta ntolno kyaté njé né, se kyaté njé re bisa nméiténé re bisa némnawé.
Yesusé n’gali mépin Kanaan ta ndélé Jou fié njé
Rewóré ta néi, Yesusé I re ni motemote nesté rfatoléné keé géwgów ta néi, se rfan néli po bótén ta nérakén kota Tirus re Sidoné né. Pocé reni mépin isó njé kyat Kanaan i, i lima bótén ta néi, se kyat Yahudi i pa. Nwóm po Yesus ni se nécegé né nfakwat i, "Moke, kolano Daudé ni ntu re gbu ta Awé, mmasié ya nte! Ntig mépiné njé setané ntolno se ta délé nkangelangé!"
Mayta Yesusé ncónglo i pa. Bóngo re ni motemote nesté rfano I néli se récegé I faje, "Guru, mané mépiné njé bo néléy su, bo ma ngagélay po tooré lo le na."
Mayta Yesusé nécegé si faje, "Jou Lahatala nané Ya kwómé nte, bo kgali be ité rir kyat Israel ta kfatailo si dolo domba ta rcól yéféné se rdélo riri yéfén nésé né."
Mayta masike Yesusé néceg fajé ma, mépiné njé i néli le, ncuba nóp Yesus sóo lo né, bóngo néceg faje, "Moke, mgali ya su pa!"
Pocé bóngo Yesusé nécegé i faje, "Awé nte kyat Israel aw pa, se iga bo kgali awé, necé dolo lé. Ya kfatailo dolo yomya né róri roti ta re rfasadia né se kafao keé yawé né róri."
Mépiné njé ga ncónglo Yesus faje, "Molén Awé Moke, mayta yaw ta si po meja pópo né ma ró róri riri wlóné njé nó mnómé gléo ta mnap nóp po róri meja pópo lo né."
Pocé, Yesusé nlongé ta mépiné njé néceg fajé né, tabóngo nécegé i faje, "Neke, awé fatuw-fatuw ta mdélé Ya, se sói ta méroré né ndadi i ro." Po waktu ta néi óro, mépiné njé ni ntu njé nfié i.
Yesusé nfaungé setan ta ntolno yomya món isó njé
Waktu ta Yesusé I re ni motemote sételé nesté re rpólén si nmulé po kyat ta félé né, pocé reni kyat isó nfarakné i néli po Yesus ni se ncuba nóp po usno lo né, bóngo néceg faje, "Moke ta Awé, mgali ntigé njé su! Némgo mati-mati ayamé se ta délé nkangelangé. Iga re mgo i né, nuén téptipéné némnap i némin po luténé lo, bo tisé némnap i nóp wóé lo. Ya re kut i po nim motemote nesté ni, mayta réfené rfafié i pa."
Pocé Yesusé nlongé ta néceg fajé né, tabóngo nécegé kyaté-kyat ta pocé né, "Mewé kyat ta isémé nte, re fdélo yéfén ta sólé se re fdélé Jou pana! Ya re mewé tfadéréré ta mnuo i nte ga, nase ngané fisé nóté ga bo fdélé Ya? Wóré fut yomya njé lima!"
Waktu rut yomya njé néli po Yesusé ni, bóngo Yesusé nfaungé keé setan ta ntolno yomya njé né se ncópén i, tabóngo yomya njé nfié i.
Pocé fajé reni kyat isó ta setan ntolno i. I némnaw Yesusé, bóngo n’gélay faje, "Ee, Yesusé, kyat Nazaret ta Awé. Amé kféyal Awé. Awé ta mwóm yama Jou Lahatala ni. Mwómé nte bo mpe am fanfawa? Bo mfamót am ó?"
Bóngo Yesusé nécegé si faje, "Eh! Ffaténténgéné mewé. Fsópén pocé po kyat ta njé ni!"
Pocé bóngo setané nesté rfakéyowén kyaté njé, rgélayé gliri né ma sésnaré ndimé, bóngo setané né ma rcópén pocé né.
Yesusé nfafié kyat isó ta setané ntolno i njé
6 Yesusé I re ni motemote nesté rdimé po talaga Galilea ni féspalé, po kyat Gerasa né riri bóténé lo. Pocé reni kyat isó njé setané ntolno i. Se ta Yesusé ntebé néya bóténé lo né, kyaté njé ncópén lima kubur legé lo né, bo nfapdipén re Yesusé. Kyat ta njéi, dorém re ngénngané góo be po kubur legé lo. I tadélé nkuaté, se kyat ta pocé né masike rpitén i re rante ma réfen i pa. Sababta re nuén fis néli óro rpitno fao re sóo né re rante, mayta ta po fao lo né nfawetésé keé, ta po sóo lo né ga nfapekété keé. Se reni kyat isó pa ta bisa néfené négbi i. Dorém re ngénngané n’gélay po kubur legé lo, re po métété lo se n’gagélayé bóngo ntoké ni badané né re lóy sogado nyóbété ndimé.
Se waktu ta némnaw Yesus lów i lesu né, tabóngo ncéreré néli se nlik nóp Yesus usno lo né, ga ncuba I. Tabóngo Yesusé nécegé i faje, "Ee setan ta awé! Msópén pocé kyaté njé ni!"
Bóngo kyaté njé n’gélayé, "Adu! Yesusé, Jou Lahatala tadélé némógé njé ni Ntu ta Awé! Bo mpe ya fawa nte? Dolo Jou, ma mfakangelang ya na!"
Pocé Yesusé nutné setan ta ncung po kyaté njé né, "Awé ngósnom pai?"
Tabóngo i ncónglo, "Ya ngósnog Legion, sababta amé nte reni caléné." Pocé setan-setan ta rcung po kyaté njé ni né réror po Yesus ni, bo ma nfaungé si po bótén ta njéi na.
Pocé fajé reni bów met esó né, tadélé rfélé, réyówé róri mnóm po métété mdi lo né. Se setan ta rcung po kyaté njé né, réceg faje, "Ta fié né mané amé ksung po bowé nesté ni."
Pocé Yesusé npo si fié. Se setané né rcópén po kyaté njé ni, ga rcung si po bowé nesté ni. Tabóngo bowé nesté rcéreré si néli se rwóm po métét wómo lo né, ta ryóg si nóp talaga wlólo né se rmót si ndimé. Bowé né, féléori né nihalé calén luwé.
Pocé kyat ta réjaga bowé né télél si, bóngo rcéreré se rfabémbingé néli re lima po kota re pnuwé-pnuw ta pocé né. Se kyaté né rlongé ta néi, tabóngo rwóm néli bo rémnaw sói ta re ndadi i né.
Mayta mewé ga ffasodoto kyaté, sói ta kyaté né bo rdo riri moke re neke né, mewé fécegé matiné, ta fié né fpeé keé nimi sadaka po Jou Lahatala ni. Iga fpe fajé, necé ffasodoto ité bo ma tgali rir déluté nesté na. Necé mewé re fpalté keé Jou Lahatala ni dodoto né, se fiwno keé re ité rir gele re gae riri aturan ta mnap po ntur re gburé né. Fajé nóté, reni félé lesu ta fénpe né, sogado Jou ni dodoto né ma fdéréré pana!"
Méitén ta lé ta nfalélé it po Jou Lahatala ni né
Rewóré ta néi, Yesusé nkakémé kyat ta félé né nmulé, bóngo nécegé si faje, "Flongé fafié ta Ya kécegé nte, bo fsae. Sói ta tfasung po sumoré lo né, necé nfalélé it po Jou Lahatala ni pa. Mayta ta tcópné tdélé po sumoré lo né, necé ta nfalélé it po Jou Lahatala ni né. [
Yesusé n’gali mépin isó ta kyat Yahudi i pa njé
Yesusé nfatoléné keé géwgów ta néi, ga nfan I po bótén ta nérakén kota Tirusé né. Se ncung I némin po um isó ni, sababta wlo pa bo kyaté runé I pocé né. Mayta masike népiné I ma, kyaté né runé keé I le. Pocé reni mépin isó, ni ntu mépiné njé setané ncung i. Se mépiné njé nlongé ta Yesusé nwómé né, tabóngo nfan néli po Yesus ni se ntikibuku nópé ga ncuba I. Mépin ta njéi kyat Siro-Fenisia i, kyat Yahudi i pa. Mayta mépiné njé tadélé néroré po Yesusé ni, néceg faje, "Moke, mmésié ya bo mfaungé keé setan ta ncung po ntigé njé ni su."
Mayta Yesusé nécegé mépiné njé faje, "Ya mare gali kyaté-kyat Yahudi né su, sababta iga gali awé ntubé, necé lé, kfatailo dolo yomya né róri mnóm ta re rfasadia, se ryó ga rdo keé yawé né róri."
Mépiné njé ncónglo I, "Fatuwé Moke, ta mécegé né. Mayta yaw ta po meja pópo né ma ró yomya né róri mnómé gléo ta mnap nópé né."
Pocé Yesusé nlongé ta mépiné njé néceg fajé né, bóngo nécegé i, "Fatuwé ta mécegé né. Se méléyé ro! Setan ta ncung po ntimé njé ni né, re ncópéné."
Mépiné njé néléy po ni umé lo né, némnawé ni ntu njé nénbóy po róngété lo, sababta setané njé re ncópéné se re nfié i.
Po kyat ta félé né, reni kyat isó njé néceg faje, "Guru, péséwé ya kuté ntig móné njé po Aw ni, sababta setané ncung i se nmémew i. Se étné be setané njé ncung i né, nébépsé keé i nóp bétbété lo, sogado ni békbuké ma ncópéné ndé po sumo lo, ngango né ma nfakakikté i se ni badané né bisa nméyawén pa. Péséwé ya re kané nim motemote nesté rféungé setané njé, mayta réfen pa."
Bóngo Yesusé nécegé si faje, "Mangmongé mew pa né ga, kyat ta isémé nte, ga fdélé pa né! Bo mnuo fawa ta mare Ya re mewé tfadéréré né? Ya re mewé ffadéréré né re mnuwé ga fdélé Ya pa né? Wóré fut yomya njé lima!"
Tabóngo rut yomya njé néli po Yesus ni. Pocé setané njé némnaw Yesusé, tabóngo nfakéyowén yomya njé se terébépsé i nóp bétbété lo né, ga térfalilés i sogado békbuké ncópén po sumo lo.
Pocé Yesusé nutné yomya njé ni moke, "Re mnuo fawa ta setané ncung i sogado nfanfaje né?"
Yomya njé ni moke ncónglo I, "Ta némyaku lesu né re mgo i. Ga tagare setané njé ma, iga ncung i, nuén téptipéné sogado nwóté keé i néli luténé wlólo, pari po wóé wlólo bo nfamóté keé i. Se iga méfené, mmésié amé bo mfafié keé i ro."
Mayta Yesusé nécegé i faje, "Ma mécegé, ‘Iga méfen’ na! Ya kéféné kfafié i! Iga mdélé Ya, férimé né bisa ndadi i!"
Tabóngo yomya njé ni moke n’gélayé, "Jou, ya kdélé, maduga pélóy pa. Se mgali ya, bo ya ma kdélé ta fatuw-fatuwé."
Yesusé némnawé kyat félé ta rwómé se rfajólo si po I ni né, bóngo nparenta setan ta ncung po yomya njé né, "Ee, setan ta mpe sogado kyaté né rmémew re rpongo. Msópén po yomya njé ni bo ma msung i le na."
Bóngo setané njé ncópéné né n’gélayé se nfakayowén yomya njé. Waktu ta setané njé ncópéné né, yomya njé nméyawén pana, tadolo kyat ta rmóté né. Se kyat félé ta si pocé né réceg faje, "Tabeu, re nmóté!" Mayta Yesusé nétané yomya njé ni fao né, se nfépangén i bóngo yomya njé npangéné se nosélé.
Yesus nfafié Simoné ni kmo mépin re kyat iglé nóté
Po waktu ta Yesusé I re ni motemote nesté rcópén tóma Um Sambayangé lo né, tabóngo rfan po Simoné ni umé lo. Néli faje, Simoné ni kmo mépiné njé nlélété, se kyat ta si pocé né réroré bo Yesusé nfafié i. Tabóngo Yesusé nosél po pégelé njé ni lapo lo, se ta néi óro, pégelé njé re nfié i tabóngo npangéné ga nléléyan si.
Se Yesusé ntebé po yelé lo se nélew bóténé lo, pocé reni món isó njé setan félé rcung i. Món ta njé, nwóm lima kota ta nérakén pocé né. Re mnuwé nanénkabaya i pa, bóngo ntolén po umé lo pa se ntolén i be po kuburé lo. Pocé némnaw Yesusé, bóngo nméiténé né nfakwat i se ncuba po Yesus usno lo, bóngo néceg faje, "Alli Yesusé, Jou Lahatala ta nkawasa njé ni ntu Aw ó! Bo mpe ya fanfawa nte? Ya kéroré bo ma mfakangelang ya na." Kyaté njé nécegé fajé né, sababta Yesusé re nparenta setan-setan ta rcungi né rcópéné. Sababta dolo wlori ncuka rtolno be kyat ta njéi, sogado kyat ta si po kota wlólo né rpitén keé sóo re fao né re rante bo ma nfan na. Mayta nfawetésé keé rante né se setané né ruté keé i po géwgów ta sésé bóto i bóngo nélówé pnuwé njé.
Tabóngo Yesusé nutné setan ta ncung po kyaté njé ni né, "Awé nte ngósnom pai?"
Tabóngo setané njé ncónglo, "Amé ngósnomam Legioné," ta ni ngale né, ‘reni caléné,’ sababta ta délé rfélé ta rcung po kyaté njé ni né.
Se setané né réroré bo Yesusé ma npe si po géwgów ta setané né góori lo na, sababta pocé nase rkangelangé.
Po géwgów ta néi, reni bowé né ta délé rfélé. Réyówé róri mnóm po métét lapo lo né. Se setané né rané Yesusé nfamól si bo rcung si po bowé nesté ni. Pocé Yesusé ndéréré ta rané I né, tabóngo setané né rcópén si po kyaté njé ni, se rcung si po bowé nesté ni. Tabóngo rcéreré si néli re lima po maltepé lapo lo né, tabóngo férimé ryóg si nóp po talaga njé ni wlólo se rmót si ndimé.
Se kyaté-kyat ta réjaga bowé né rémnaw sói ta re ndadi i né, tabóngo rówés si ndimé. Se réféténé keé néli re lima po kota re po pnuwé pnuw ta nérakén pocé né. Rewóré ta néi, kyaté-kyat ta pocé né rwómé bo rémnaw sói ta re ndadi i né. Se rfan sogado rwóm po Yesus ni, néli fajé rémnawé kyat ta setané né rcung i njé re nfié i se re nkabaya i, bóngo ntolén i po Yesusé sóo lapo, pocé rémnaw i né tadélé rémtaté.
Se flongé fafié ta bo kécego mewé nte. Kyat iglé ta si pote po mew ni nte, nase rdotélé lesu bo rémnaw Jou Lahatala nkawasa tadolo Kolano po ni kyaté-kyaté né."
Yesusé I re nabi Musa re nabi Elia po métét papo lo néga Yesusé nménano I ndimé
Yesusé nfasodoto rewóré, ni mnuwo ngané walé, nkakém Petrusé, Yohanesé, re Yakobusé, régafét si po métét isó ni bo nméiténé ndé Jou Lahatala. Se ta Yesusé nméiténé ndé Jou Lahatala né, rémnaw usno né re nésé I, bóngo ni kabaya njé ma némfusé ga gégléwé ndimé. Néga télél be reni kyat séluwé rméiténé rdé I. Si dórén luwé né, nabi Musa, i re nabi Elia. Si dórén luwé ma rménano si ndimé. Si ma réfétén ta Yesusé nase nmót po Yerusalemé, ndéréré ta Jou Lahatala re nécegé né.
Ta si dórén telé rméiténé né, Petrusé i re ni dél séluwé nesté ryénéfé se runé gélesó pa. Se tésib si lima né, rémnaw Yesusé I re nabi séluw ta rosél po lapo lo né, rmanano si ndimé.
Waktu ta nabi Musa i re nabi Elia bo rfatoléné keé Yesus óro né, Petrusé nécegé Yesus faje, "Guru, amé tadélé kséngé, it pote né. Se ta fié né, kpe umé myaku faay telé. Bo isó Anim i, isó nabi Musa ni i, isó nabi Elia ni i." Mayta Petrusé nméiténé né, nuné wlo pa.
Néga, télél be reni kyat isó nméitén po Yesus ni né nfakwat i, se néceg faje, "Guru, mgali ntigé njé su pa! Sen i, ntig be isó ta njéi óro. Ga setané ncung i se nuén téptipéné setané njé nfarwae keé i se n’gélayé né sogado ngango nting re ni bakbuké ma ncópén po sumo lo. Sababta setané nje ta délé nfakangelangé keé i, bóngo dolo wlo pa bo nfatolén i né. Ya re kané nim motemote nesté rfaungé setan ta nfarwae yomya njé né, mayta réfen pa."
Tabóngo Yesusé nécegé si faje, "Mangmongé mew pa néga, kyat ta isémé nte. Ya re mewé né re mnuwé, mayta fdélé pa le Ya nik kawasa né. Se nase ngané fisé nóté ga bo fdélé? Wóré fut i lima, yomya njé!"
Pocé ta yomya njé nfan néli po Yesus ni né, setané njé nébépsé keé i nóp bétbété lo, se nwéwewé sogado ni bakbuké ma ncópén po sumo lo. Mayta Yesusé nparenta setané njé bo ncópén po yomya njé ni, tabóngo yomya njé nfié i. Rewóré ta néi, Yesusé npo yomya njé néli po ni moke njé ni. Se férimé kyat ta pocé né rtélélé, sababta rémnaw Jou Lahatala ni kawasa né, ta délé pélóyé.
Re nuén luwé Yesusé nfébingé ta I bo nmóté né
Po waktu kyaté né rémnaw Yesusé npe mujizaté se rherané lesu né, Yesusé nécegé ni motemote nesté faje,
Kyaté né récegé cogo Yesusé nfaungé setané né npaké Beelzebulé ni kawasa
Nuéncó, reni kyat isó njé nmémewé. Se Yesusé nfaungé sétan ta ncung po i ni njé. Bóngo ta setané nje re ncópéné né, kyaté nje re nmémewé pana. Bóngo kyat ta si pocé né rherané.
Tabóngo ni motemote isó ntipélé keé imam ta npélóyé njé ni kyat yabé isó ni tatango féspal wónéyé né se mwetés i.
Mayta I nécegé si faje, "Ftébné óro!" Tabóngo nétané kyaté njé ni tatango né, se nfié i.
Ta Yohanesé ni motemote séluwé nesté re rfan si né, Yesusé néfétén Yohanesé ni yabé ta npe né po kyat félé ta si pocé né, se nécegé si faje, "Nuéncó ta Yohanesé nfasodoto kyaté-kyat po géwgów ta sésé bóto i bóngo nélówé pnuwé njé, fan po i ni bo fpe sói? Bo fémnaw kyat ta pésénte néceg nésé, móné néceg nésé njé, tadolo gémuné ta moré nufé se nméyawén néli re lima njé? Nase tisé, sababta Yohanesé njé ta dolo njé pa. Pari fpe sói se fan néli? Mewé ffan néli né bo fémnawé kyat ta riri kabaya fié né? Nase tiso. Sababta kyat ta ni kabaya fié re ta ni hidup fié njé góo po kolano né riri um ta pélóyé lo. Se ffan néli po i ni né bo fpe sói? Mewé ffan néli bo fémnaw Yohanesé sababta i nabi ta nanénfawómo Jou Lahatala ni faftóté njé? Fatuwé ro! Mayta ffatélolmo mewé fafié, Yohanesé njé lebe npélóy po nabi-nabi ta iglé né. Sababta po tatubé lima lesu, po Jou ni Buké wlólo né, nabi Yesaya re nécegé, Jou Yesusé nwóm pafule, Yohanesé ta bo nwómé ntubé. Ta Yesaya nlefo né ni glio faje,
‘Ffaméilongé fafié! Ya nase kané nik nénan isó ntubé po Awé ni.
Kyat ta njé, ta bo nfamówé nim yéféné,
bo nfaléléyé kyaté né wlori bo rdéréré Awé.’ "
Yesusé nécegé nóté, "Ffatélolmo mew fafié é, sababta po férimé kyat ta rtub po dunia nje ni wlólo né, reni isó pa ta lebe npélóy po Yohanes ni. Mayta nte, kyat pai le, masike gélesó ni ngale i pa, mayta iga kyaté njé npo fié Jou Lahatala nkawasa dolo kolano po ni hidupé wlólo, kyat ta njé i ta nase lebe npélóy po Yohanes ni."
Férimé kyaté rlongé ta Yesus nécegé fajé né, masike kyaté-kyaté ta rarénfalutno pajaké nesté ma rlongé. Si farimé récegé ta Jou Lahatala npe né fatuwé ndimé, sababta si ma Yohanesé re nbaptisé keé si nóté. Mayta kyat Yahudi ta rdéréré dodoto Farisi, re guru-guru agama nesté, wlori pa bo Yohanesé nbaptis si né, necé ni ngale né wlori pa bo rdéréré Jou Lahatala ni rencana po riri hidupé wlólo né.