Milagres de Jesus

Yeso ka womza arǝ kaa orakare

27 Yeso kaya baya ara me naname, na arǝ aleere tare kai aa ne rare ajǝng na, "Kena ka Daoda kona egonegone ero!"

28 Nangka ka lyǝ akwilǝ yende na arǝ me deya kai, na Yeso me bekaa ne na, "Ee kabare ka Ashili obena maa erang womza ying na?"

Na ne kabare kai na, "Eeye, Ateokora."

29 Naka a eke o ara kai aa yizi ane, aaka bekaa na, "Azaa o kabare ka Ashili aying, aa womza ying." 30 Na a yizi ane pǝrnu. Aa Yeso windi ne teto maleu na, "Tana e bele ondo orooka na ne."

31 Pate ka nyimi, na ne suri, aane baale orooka kai aa kuruwǝ aa makeke ma me.

Arǝ leere ne cǝ o gonta

29 Nangka Yeso kaa atoma kai neya baya a nyimia Yariko na aromo ba cak ne tare kai. 30 Arǝ a leere neya cikǝ a be dǝki be orona. Nangka ne kone na Yeso yaa kala, nane ara lengmelo nane bekaana, "Ateokora, kona egonegone oro, Kena ka Daoda!"

31 Na aromo ne zurki baa ne kane kome. Kangza nane wale ara lengmelo ne maleo, aane beya na, "Ateokora, kona egonegone oro, Kena ka Daoda!"

32 Na Yeso itǝ aa ka bekaa nee na, "Eya eya yeme ang ye ying?"

33 Nane beka kai na, "Ateokora, teya yeme a te cǝ o gonta!"

34 Ba nyimi okona egonegone one, na Yeso ka moke ayizi ane, na ongmere liizi nane cǝ o gonta, aane tare kai.

Urǝ oka wa ezeze lebose wa cǝ o gonta ra

35 A were aka Yeso ka amara ka apeng a Yariko, a urǝ yende waya cikǝ ba e daki be orona a wa eze lebose. 36 Nangka wa kone aromo aneya kala, na wa pirkǝ epa emea eya ale. 37 Na beka wai na, "Yeso karomo ka apeng Nazarat kaya ya kala." 38 Nawa rare ka lengmelo a jǝng na, "Yeso kena ka abuudu a Daoda* kona egonegone eng."

39 Aromo amea neya izi nane zurki wai na wa kome, na wa wale o ara lengmelo ba jǝng kanza, a wa beya na, "Kena ka buudu a Daoda, kona egonegone eng."

40 Na Yeso itǝ aka ote na a de ka oromo ome ara kai. Nangka wa deya ma’amo na Yeso pirkǝ wai na, 41 "Eya oya yeme ang ezo?"

Na urǝ ome kabare na, "Ateokora, eyang yeme ang cǝ o gonta ara."

42 Na Yeso beke a wai na, "Cǝ o gonta ara, o kabare ka Ashili au wa wongzau."

43 Ka o beka o Yeso nyimi, a wa ong cǝ o gonta ara a saseya, na wa tare kai, a wa sabe Ashili. Nangka aromo ne laka nyimi, na pate one ne sabe Ashili.

2 Na ogangca yende deya a kai nawa tunggunu aa begeshe be kai awa bena, "Ateokora, oya ka obare o womzang ong kang itǝ a sangsang." 3 Na Yeso nayi o ara kai naka meke wai aka bekaana, "Ma kabare ma womzau, itǝ a sangsang." A saseya nawa woma ka leganca le ma. 4 Na Yeso beka a wai, "Kona, tana o bekea ondo epa eka ee manau ne, ale ka o wore ukpwei o ondo magame ma Ashili, oo kang nya epa eka a yo esa nangka Ashili a bele Mosa. Ya nyimi ka o wore aromo bekaana ba woma.

2 Na ca kai ondo ka lepung le wai le gbwi aa waya tete a kapengge. Nangka Yeso ka laka okabare kaa Ashili ane, naka bekaa ondooka lepung lewai le gbwǝ na, "Kena kang, zanta, a pisǝ madinǝ mau."

3 Na ana o baala ngmǝ aaka Ashili nya Mosa ne bekaa a tukpwei tone na, "Karomo kaana ka tambo Ashili!"

4 Aa Yeso ka orosa madoola mane, naka pirkǝ na, "Eyaaka eya eza madoola maburu a nyong aying nanna? 5 Eya kala o dera o poba, o beka na, "O bena a pisǝ madinǝ mau na, ‘Koona era ka oyeng na? 6 Eyang yeme e rose obena Kena ka o Oromo kaye ka obare o pisǝ madinǝ a lerambo.’ Naka bekaa ondooka lepung le wai le gbwǝ na, "Era ka o jeke kapengge kau o ale akwilǝ." 7 Na oromo me ere, nawa ale akwilǝ.

10 Aa mana oromo yende a rame ooka o ara wai wa waka. Nane pirkǝ Yeso na, "Obaala Mosa wa wore obena wa gwara a womza a lengme le o teseke le maYahuda na?" Ne pirkǝ kai nyimia adorana ne cǝ kai ka o tambo. 11 Naka bekaa nee na, "Mana a nyimi oying waaya ka omande openg, na wa taru a leo a lengme lo teseke le maYahuda, wato meke wai kawa sǝǝrǝ ne na? 12 Oromo kala omande epeng edang maleu. Azaa nyimi ata aa nara ogole o rere aa lengme teseke maYahuda ne." 13 Naka bekaa oromo me na, "Niyi o ara o!" Nawa niyi ora me, aa wa kuri a zak na o leere me.

Yeso ka womza ondo leganca

12 Ngmende Yeso kaye apeng yende, na oromo yende de a leganca le lya legoone le wai. Nangka wa laka Yeso, na wa girwǝnǝ ka tulung a deze, a wa kang tunggunǝ maiyinu ma wai ating kai. A wa bose kai na, "Ateokora, ba kabare ba era o kpizi leganca leng."

13 Na Yeso niyi o ara kai, naka meke wai. Aka bekaana, "Ma kabare ya sangsang." Na leganca pere wai a saseya.

18 Aza nyimi andaleme yende ne de ane ana oromo omea lepung le wai le gbwǝ aza kapengge, aneya nyamalanǝ kane lyǝǝrǝ wai a nyimi odo kane de ka wai ara Yeso. 19 Nangka neta ne cǝ orona oya epa eka neya yeme me ne aza o gongnga aromo. Azaa nyimi nane zale o ogǝnggǝng odo, nane puki ogǝnggǝng me ane jipǝrǝ wai pate ka o penge omea waya tete azame. Nane eke wai a tera aromo a begeshe be Yeso.

20 Nangka Yeso ka laka nangka ne kabare ka kai, naka bekaa oromo me na, "Beja beng, ma kwizau madinǝ mau."

21 Na maParisa ka ana o baala ngmǝ ka Ashili nya Mosa ne bore o beya angmǝ a tokpwe tone na, "Mana waana ka wa ya beya a ngmǝ a buru aza Ashili? Mana wa era a wa pisi madinǝ bangka Ashili belle ne?"

22 Yeso ka rose madoola ma nyong mane na ka pirkǝ na, "Eyaka eya eza madoola mana a nyongnga ying? 23 Eya kala o dera o poba o beka: O bena a kwizǝ madinǝ mau na, o jeke kapengge kau o yengai? 24 Eyang yeme e rose o bena, mi Kena ka Oromo ang ye ka legoone a lerambo le Ashili leena o kwizǝ madinǝ." Aka ringgarnu naka beka ondooka lepung le wai le gbwǝ na, "Ma beka bo na era, jeka kapengge kau o ale akwilǝ." 25 Nawa ong era a itǝ a saseya a pate aromo neya za o gonta, na wa gbwindari kapengge kame a waya tetene, a wa ale akwilǝ a wa ya saba Ashili.

6 A lengme le yende lo teeseke le maYahuda, na Yeso lyǝ o dandaro gwarzanang maYahuda, aka baale ne, a mana oromo yende rame oka o ara wai o re wa waka. 7 A maParisa ka ana o baala ngmǝ aka Ashili a nya Mosa ne kare yizi kane laka na Yeso kayo womza oromo me a lengme lo teeshekea na, adorana ne cǝ epa o meke kai. 8 A mana Yeso rose madoola mane, naka beka oromo omea o ara wai wa waka na, "Era ka o deya ko itǝ ara kaana." Na oromo me wa ere na wa itǝ arame.

9 Na Yeso bekaa ne na, "Eyang pirkǝ o ying, eya gbara aye a lengme lo teeseke, a eze epa ererea na, a eze epa e buruai? A boze oromo na naa, a baya wai a wa gbwiai?"

10 Naka gonte ne apat aka beka oromo mea na, "Niyi o ara o." Na wa niyi o ara me awa woma zak.

O kabare ka Ashili ondo o gong o tesa geza a moole o Roma

1 Malo oka Yeso ka beke epaname a pate aromo ya konaza, aka ere naka ale apeng a Kaparnahum. 2 A nyimi apengme, ondoogong ona tesa geza a moole a Roma *waye ka ondo a nyimi azara wai oka waya kono na waya gbwǝ, ondo tesa geza a moole ome yeme ozara me ba bote. 3 A ondoogong ana o tesa geza omea wa tukǝ o kona oroka ba zaa Yeso, na wa tong anateandasau maYahuda*, kane bose kai adorana aka de kaka boze ozara wai tana wa gbwi ne. 4 Ko dukǝ one ba Yeso, nane bose kai ba cak, ane bekaana, "Oromo ona wa gwara o kankama wai. 5 Wa yeme aromo aro, kanza a wa sowa ro o dandaro gwarzanang maYahuda."

6 Na Yeso ale kaa ne. Nangka ne amara ka akwilǝ me, na ondo tesa geza a moole me tong ajaa wai ba Yeso kane bekaa kai na, "Ateokora, tano gare okpwe ne, anta bare o deya akwilǝ ang ne. 7 Epa eka e ote na ma tonga ba bo naname, mi anta bare ang deya bo ne, ba sokoo beka ngmǝ, ozara ong yo woma. 8 Mi ang ya taara te ondo, kanza ka ana o tesa geza a moole cak ba taara tong, ma bekaa ondo one na wa ale, a wa ale, ma beka ondo na deya a wa de, ma beka ozara na wa ye epana, a wa ye."

9 Nangka Yeso ka kone nyimi, na oroka me taru kai a lenyong, naka wangarno ba ana o tare kai, naka bekaa ne na, "Anta ma cǝ ondo a nyimi Isrela kawa kabare ka Ashili ka lenyong leyende na oromo na ne." 10 Na aromo amea atong ne kuri ba akwilǝ me, ane mana ozara me a wa woma.

11 A kandaye ka yende ka gǝdǝ kaya araame ka o bere o buru wa tabe kai o shenai betuuru ka o riiru. A wa pota kai naka yeng a guulǝ. 12 Nangka Yeso ka laka kai, naka rare kai na ka deya izi aka bekaa kai na, "Kandaye, eyang arau ka o kono o." 13 Naka eke o ara o kai azaa kandaye kame, ba saseya naka naakarnǝ aka saba Ashili.

O boza ebeene a koonang lengme waya kala o rera

1 A lengme lo teseke ka o bosa Ashili o maYahuda le yende, a Yeso ka ale a lya epaolya akwilǝ a ondo o gong o maParisa, na aromo kare kai yizi a dongdong. 2 Ating kai, ondo wa zene ka tobona ka taara te wai te bizizi. 3 Na Yeso pirkǝ maParisa ka ana o baala angmǝ aka Ashili a nya Mosa na, "Angmǝ aka Ashili a nya Mosa a kabare o womza aromo a lengme lo teseke ka o bosa Ashili na, nyimia taza ne?" 4 Nane kome a set. A Yeso eke ondo o kono me taara, aka womza wai, aka bekaa wai na wa ale.

Yeso ka womza agangca betuuru

11 A Yeso ka ya orona o ale apeng a Urushalima, naka kale a bekazo be makeke ma Samariya ka ma Galili. 12 Nangka kaya lyǝ a kapeng ka yende, a aromo betuuru ka neye ka leganca, ane itǝ a macangcang ka kai, 13 ane rare kai ka lengmelo a jǝng na, "Yeso ondo ogong, kona egonegone ero."

14 Naka laka ne aka bekaana, "Ale na ka e wore tokpwe to ying ara na magame ma Ashili." Nangka ne ale, na pisi ne leganca le ne.

15 Ondo a nyimi one nangka wa laka a wa woma, na wa kuri, a wa saba Ashili ka lengmelo a jǝng. 16 Na wa girwǝ ating tobona te Yeso, a wa kone o leba kai, a wai oromo o makeke ma Samariya waye.

17 Na Yeso pirkǝ na, "Aromo betuurua a womza sang? O dangare o torai ome ya baba? 18 Ondo one tawa kuri kawa sabe Ashili ne soona o geng ona na?" 19 Naka beka a wai na, "Era ka o ale, o kabare ka Ashili au wa wongzau."*

20 Ondaaye yende wa zene arame aa wa ye shenai betuuru ka she leere aa waya kono o ooso manyau, nawa deya a sauwo a dimǝ Yeso nawa eke o ara a bengmǝ be odibi kai. 21 Aa wa bekaa lenyong lewai na, "Maa eke o ara odibi kai belle, eyang woma."

22 Nangka Yeso ka ringgǝnu naka laka wai, naka bekaana, "Ondaaye, zanta, o kabare kaa Ashili au, wa womzau." A saseya na ondaaye me woma.

43 Ondaye yende wa zene arame, a wa rabo ka o kono o ooso ma nyau shenai betuuru ka she leere, a wa wonga pate epa taara te wai, na wata cǝ ondo o womza wai ne. 44 Pate ka aromo a cake kane zene, naka deya sauwo ba dimǝ Yeso a ka meke bengmǝ bo dibi kai, na o ngmere liizi, na ma nyau mame baya o ooso.

45 Na Yeso bekaana, "Manamea wa mekeng bengmǝ bo dibi?"

Na komana arakaname ta kabare ne. A Biturusu kang bekaana, "Ondoogong, ka aromo a cake na ane ringgari a kuruwǝ komana wa meko."

46 Na Yeso bekaana, "Mi ma kona ondo a wa mekeng, makang kone legoone a le surǝ mi."

47 Nangka ondaye me wa laka o bena wa era awata baasa ne, na wa wore okpwe wai ko kerkeze a wa girwǝ a begeshe be Yeso, a komana ya gonta me. A wa beke epa eka e ote na wa meke kai ka nangka wa woma a nyimi o ngmere liizi. 48 Na Yeso bekaa wai na, "Ogala, o kabare ka legoone le Ashili a wa wongzau. Ale ba nyimi o kono leba."

Kagala ka Yariyus kaa ondaaye ooka manyau ya ooso a wai

18 Yeso kaya za obeya nyimi naname, na ondoono o dandaro o gwarzanang maYahuda, wa de aa wa tunggunu ating kai aa wa bekaa na, "Nanname na kagala kang surǝ aa gbwǝ, deya ka o eke taara to azaa kai, ka yo era." 19 Na Yeso ere legwa kaa ana otare kai, nane ale ka oromo me.

23 Nangka Yeso ka de akwilǝ ondoono dandaro gwarzanang maYahuda, naka mana aromo acak aa neya ulbǝ esherowa ka seleera she ma’ade. 24 Naka bekaana, "Erana arakaana! Ogala me taa wa gbwǝ ne waya malauwa belle." Nane zoze, aa ne zeele kai.

25 Nangka asǝǝrǝ aromo me o yanga, naka lyǝ aa nyimi aa ka meke o ara ogala me, aaka ara kai.

31 Na Yeso lya izi ko beya na, "Aromo tomore teena ne tore eya? 32 Neye na bana yanaa a cikǝ ara ejamane ane rare tokpwe to ne, ane beya na,

" ‘Te ulbi ying a uraru

na e nyano yowa leera,

te beya ying leera le ma’ade

na e nyano ruuzi.’

33 Yohana ondo eza o batisma wa de, wata wa lyeeze epaolya ne, wata wa sooze manyi mo inabi ne, ne beya na, ‘Waye ko bere o buru.’ 34 Kanza kena ka oromo ka de, aka ya lyeeza aka sooze, ne bekaana, ‘Laka na kando ko lyelyeza ko sosoza, kaja kana o eesa emate makeke, ka ana madinǝ.’ 35 Pate ka nyimi andaaka ne kabare ka o ama Ashili, ne wore o bekaana o ama me wai ka maganggang."

Yeso ka kwizǝ madinǝ ma ondaye yende

36 OParisa yende rare Yeso kane lye mete akwilǝ wai, naka ale a ka cikǝ aka lya epaolya me. 37 A nyimi apeng ame ondaye yende wa zene kawa cikǝ nyimi madinǝ ma wai. Nangka wa kone na Yeso ka deya a lya epaolya akwilǝ oParisa, na wa de ka manau mo waze o lebo ma emate e cak aka kagbwi.

41 Na oromo yende ka beya wai na Jariyus ondoono dandaro o gwarzanang maYahuda. Wa de na wa girwǝ a begeshe be Yeso, a wa bose kai na ka ale akwilǝ wai. 42 Aza o bena kagala ka wai, ka kaya ka yende kame, ka dukǝ shenai be tuuru ka se leere ko ngmenga, kayo orona o gbwǝ.

Na Yeso kabare aka meke orona o ale, aromo ya za o tura kai a kazo gongnga one.

49 A Yeso ta ka pate ongmǝ kai ne, otoma deya wa surea akwilǝ Jariyus ondoono o dandaro gwarzanang maYahuda, na wa bekaa kai na, "Kagala kau ka gbwǝ, tana o kang gara ondo baala ne."

50 Nangka Yeso ka kone nyimi, naka beke a Jariyus na, "Kana o kone boome ne, kabare ka Ashili kayo era."

51 Ko dukǝ akwilǝ Jariyus, naka ta kabare a ondo lyǝ ka kai ne, sena Biturusu, Yohana ka Yakubu, ate ka iini kagala kame. 52 Pate aromo ame ka neya akwilǝ me, nane poro ruuzi ka ekoko, aza kagala kame, na Yeso bekaana, "Tana e ruuzi ne, kagala kame ta ka gbwǝ ne, kaya malauwa belle."

53 Nane zoze kai a nyimi mazelakong, ka o rosa o bekaana ka samba o gbwǝ. 54 Na Yeso ka meke o ara kagala kame, aka ara lengmelo na, "Kagala era."

55 Na e beene kuri a kai, aka ere, na Yeso ote na nya kai epaolya ka ka lye. 56 Na anate a kai laka epa o kala legoone lene, a Yeso windi ne teto na kana ne bele ondo epa eka aye ne.

Yeso ka zurki obere ka lejǝng le manyi

23 Nangka Yeso lyǝ a nyimi o onggo o taara manyi, na ana o tare o Yeso ale legwa ka kai. 24 Na o bere ogong era a lepong leme, na sejǝng sheme ere ka legoone na manyi bore o lyǝzǝ a nyimi onggo me, aa Yeso ya malau. 25 Na atoma kai ale nane ara kai, aa ne bekaa kai na, "Ateokora, boza ro, manyi ya lya oro."

26 Na ka bekaa ne na, "Eyaka e kerke nyimi? O kabare kaa Ashili aying me baba? Naka ere, aaka zurki obere ka lejǝng le manyi mame. Na keeya itǝ a tiiyi.

27 Na epame tere aromo ukpwei, aa ne beke na, "Mana waana ka o bere ka lejǝng le manyi kone kai aane tare kai?"

15 Nangka ulyǝlu waye, na atoma kai de akai na ne bekaa na, "Ara na a aromo ta rene ne, a waana ulyǝlu waya. Baya aromo ana ane ale a topepeng kane gere tukpwei tone epaolya."

16 Na Yeso bekaa ne na, "Wata gwara aane ale ne, nyana ne eyapa ka ne lye."

17 Na ne kabare na, "Teta ka eyapa arakaname, soona maborode esu ka ekwala e leere."

Maborode esu ka ekwala leere

18 Na ka bekaa na, "Deyana ka e arakaana." 19 Aaka ote aromo me na ne cikǝ azaa mawake. Naka jeke, maborode esu ka ekwala leere, naka ara ukpwei aaza shili, aaka sabe Ashili, naka pose maborode mame aaka nyaza atoma kai, a atoma me kangza aa ne nyaza aromo. 20 A pate one ne lye na ne tiyǝ, na ne kurki o dangare me, nawa panza makende betuuru ka maleere. 21 Andaaka ne lye ne dukǝ andaleme magu esu bangka andaye ka ayana.

25 Aa ra aa dukǝ beru bo taaro be lelere, na Yeso yeng azaa manyi aaka dore ne.

Yeso ka lye kaa aromo magu ma naaze

32 Azaa nyimi na Yeso ka rare atoma o kai naka bekaa nee na, "Eyang kona egonegone aromo aana, tomore to taaro naana o ngmeengme teye legwa kaane aa neta ne lya epa olya ne, kangza anta yeme o baya one aane ale ekomo ne adorana tana ne sau orona ne."

33 Na atoma kai ne kabare nane bekaa kai na, "A baba te era a te cǝ epaolya a nyimi lerambo leena kate nya aromo acake aana?"

34 Na Yeso pirkǝ nee na, "Ma borode ma wondaa eye kaa mai?"

Nane kabare na, "O sondaare kaa ekwala a baate."

35 Naka ote aromo aa cake name nane cikǝ ba deze, 36 Nangka ka jeke maborode o sondaare ka ekwala me, naka wore o kona oleba ba Ashili, aaka pose mai aaka nya atoma kai, na nee kangza ne arseze aromo amea ne kurkǝnǝng. 37 Pate one ne lye na komana one tii, na atoma kurki ma ngmeskarong maaka ma lyǝ nama panza makende ma moole sondaare. 38 O gongha aromo aaka ne lye epaolya me ne dukǝ andaleme magu ma naaze bangka andaye kaa ayana.

O ara emate makeke

24 Malooka Yeso kaa atoma kai ne dukǝ Kaparnahum, na ana o eesa e mate akwilǝ Ashili nane mana Biturusu, na ne pirkǝ wai na, "Ondo baala oying wata nyaza emate akwilǝ Ashili ne na?"

25 Nawa bekaa na, "Ka arseze. "Nangka wa kurǝ ba akwilǝ, na Yeso bora o beya angmǝ ka wai naka beka na, "Ba laka nannia Siman Biturusu azaa be pirǝ beena? Aana mana agomo lerambo leena ne eesa emate e makeke ne, ara ayana anea naa, ana ondoai?" 26 Na Biturusu kabare na, "Aana ondo," na Yeso bekaa na, "Obena ayana ane ta arsaza ne. 27 Pate ka nyimi, adorana tana aromo me ne mungi kaa ro ne, ale ba lepong ka o tare beruu be omeese ekwala, bekwala beeka baa bora a moke me o pǝri ongmǝ be oyo cǝ emate eeka eyo bare. O jeke mate me ka o are e mate makeke mau kaa a‘eng."

Yeso ka ye uti o ulǝ angmǝ

18 Nangka ara a sane a kaya kurǝ ba nyimia apeng, na ekomo moke kai. 19 Nangka ka laka uti o uli ba ting orona, naka ale ba uti me naka ta cǝ eyapa o uti me ne soona marane belle. Naka beka uti me na, "Otoo ya ayana kangza ne!" Na ongmere liizi na uti me wa waka.

20 Nangka atoma kai ne laka nyimi, na epame e tere ne ukpwei nane bore be pirǝ na, "Eyaka uti uli na wa waka ba saseya?"

21 Na Yeso ka kabare naka beka ne naa, "Eyang dongdong bele oying maganggang maame, eeya ka o eke lenyong ba Ashili, zora madoola ma yende, epaaka e mana uti uli ona, eya eto eza belle ne, eyo ama o beka ba oyara ona, era, ka o taru ba nyimi opong ogong, a wayo itǝ nyimi. 22 Eeya ka o eke lenyong ba Ashili, pate epaaka e bosa ba Ashili eyo cǝ e."

Yeso ka zake ana o tare kai o bora

1 Ngmende a Yeso ya itǝ a bengmǝ be lepung leeka a beya le na Janisarata. Na aroma aaka ne kurkǝnǝng a cake ne nonte kai adorana ne kone angmǝ Ashili. 2 Na Yeso laka ma’onggo ma o taara manyi maleere a bengmǝ be lepung, ka ana o meeshe ekwala ane japi aneya kwizǝ majara mane. 3 Na Yeso lyǝ o onggo yende o Biturusu, naka bekaa wai na wa turki o onggo me a nyimi manyi a baate. A nyimi mea ka cikǝ ne aka baale aromo me.

4 Nangka ka mare o baala, naka bekaa Biturusu na, "Waleke o turki o onggo me a ale ara a gerpo, e tare ojara me a manyi ka o meke ekwala."

5 Na Biturusu bekaana, "Ondoogong, te more a pate lelyaare a gera na teta meke eyapa ne. Nangka ba beka nyimi, eyang ya nangka ba beka."

6 Nangka neye nyimi, nane meke ekwala a cak, na majara mame bore o taso. 7 Ka o laka nyimi, nane wali andaane kane ya nyimi o onggo leere kane deya ne kankama ne. Nyimia ne de nane lope ekwala me a nyimi ojara nane panza ma’onggo ma leere mo taara manyi ka ekwala, nyimia na ma yemo lyǝ ba tau manyi.

8 Nangka Siman Biturusu wa laka nyimi a wa surǝ nyimi manyi, na wa tunggunǝ a tulung tewai ating Yeso, a wa bekaana, "Arnang ka mi Ateokora, mi ondo madinǝ wai." 9 Aza o bena wai ka andaaka neye legwa ne kala aro kerke ko laka e kwala e cake kane meke, 10 nyimia ana Yakubu ka Yohana ayana Zabadi ejaa Biturusu ne kanza ne kerke.

Na Yeso bekaa a Siman na, "Kana o kone boome ne, ba itǝ ondo o rara aromo kane deya mi o meese ekwala watoza ne." 11 Nangka ne windi ma’onggo ma o meese ekwala ene o wulu lepung, nane baya ekeeya ene ane tare kai.

Yeso ka zurki obere ka lejǝng le manyi

22 Nmengde a Yeso ka bekaa atoma kai na, "Deyana ka tare be daki bo sanini o lepong legong." Nane lyǝ ba nyimi ka onggo ko taara manyi mame ane bore teweno. 23 Aneya nyimi teweno naname, na malau beshe kai, o bero gong kang era a wa dore lepong leme, na epame kala ne nane laka na manyi ya besa one, ka manyi mame ma bore o lyǝzǝ a nyimi o onggo me.

24 Na atoma Yeso ale nane ara kai ane bekaana, "Ondoogong, Ondoogong, manyi yo lya ro."

Naka ere aka zurki obere ka lejǝng le manyi mame, na le itǝ tiiyi e keeya kome a set. 25 Aka bekaa ana o tare o kai na, "O itǝ o ying aza legoone le Ashili me ba?"

A nyimi boome ka o kerke nane pirkǝ tokpwe to ne na, "Mana waana? Ka wa ote o bere ka lejǝng le manyi na ne kone kai ane tare kai."

Yeso ka zurki obere ka lejǝng le manyi

22 Nmengde a Yeso ka bekaa atoma kai na, "Deyana ka tare be daki bo sanini o lepong legong." Nane lyǝ ba nyimi ka onggo ko taara manyi mame ane bore teweno. 23 Aneya nyimi teweno naname, na malau beshe kai, o bero gong kang era a wa dore lepong leme, na epame kala ne nane laka na manyi ya besa one, ka manyi mame ma bore o lyǝzǝ a nyimi o onggo me.

24 Na atoma Yeso ale nane ara kai ane bekaana, "Ondoogong, Ondoogong, manyi yo lya ro."

Naka ere aka zurki obere ka lejǝng le manyi mame, na le itǝ tiiyi e keeya kome a set. 25 Aka bekaa ana o tare o kai na, "O itǝ o ying aza legoone le Ashili me ba?"

A nyimi boome ka o kerke nane pirkǝ tokpwe to ne na, "Mana waana? Ka wa ote o bere ka lejǝng le manyi na ne kone kai ane tare kai."

Yeso ka womza oromo oka o bere o buru wa tabe wai

26 Yeso ka atoma kai neya yenga a nyimi o onggo o taara manyi a ale ba makeke ma Garasina, apeng amea ya o wulu lepong le makeke ma Galili.

12 O ongme ya amara a wa taru, na atoma betuuru ka leere name ne deya ara kai ane bekaana, "Baya aromo na ane ale a nyimi apeng ka topepeng to ma’amo ka ne gere epaolya ka ara omora. Obena ara ana a te rene aromo ta rene ne a ai ne."

13 Na Yeso bekaa ne na, "Nyana ne eyapa ka ne lye."

Na ne kabare na, "Pate epa eka teye ka e, eta kala maborode esu ka ekwala e leere ne. Na Ateokora oya yeme ate wiinia kate lye ka aromo na?" 14 Andaleme me belle ne dukǝ magu esu.

Na Yeso bekaa atoma kai na, "Bekaana aromo me na ne cikǝ e tuuru sussu."

15 Na atoma kai, ne tare o bekaa kai, na pate one cikǝ. 16 Na Yeso jeke maborode esu ka ekwala leere name, aka ara okpwe zaa shili, aka bose Ashili aka posea pate. Malo nyimi aka nya atoma kai ka ne areseze aromo me. 17 Pate one ne lye na ne ti, a atoma kai ne shende madangare mame, na ma pene makende betuuru ka ma leere.

O kabare kaa Ashili ondo ogong ana o tesa geza omoole a Roma

5 Nangka Yeso ka lyǝ a Kaparnahum, Na ondo o gong o tesa geza omole o Roma bose kai na, 6 "Ateokora, ozara ong ya tete akwilǝ, a lepung lewai lee gbwǝ aa waya kona o poba ajǝng."

7 Na Yeso bekaa wai na, "Eyang deya kang womza wai."

8 Ondo o gong o tesa geza omole name bekena, "Ateokora ang ta bare odeya akwilǝ ang ne, soona o sokoo bekaa angmǝ, ozara ong wayo woma. 9 Mi ang ya taara te ondo, kangza ka ana o tesa geza a moole ba taara tong, maa kang bekaa ondo na, "Ale, awa ale, ondo kangza ang bekaa na, "Deya," awa de, ang kang bekaa ozara ong na, "Ya epana," a wa ye. 10 Nangka Yeso ka kone nyimi, na epame tere kai ukpwei, aa ka beka ana o tarea kai na, "Ang dongdong bele ying epeng me, anta ma cǝ ondo a nyimi Isrela kawa o kabare kaa Ashili na oromo na ne. 11 Eyang belo ying, aromo a cake ne yo deesa a dizi ka aza ka ne cikǝ a ne lye epaolya legwa kaa Ibraheng, kaa Ishaku aa Yakubu a nyimi togomo te o zaa shili.✝ 12 Bangka nyimi, ayo gǝǝzǝ ayana togomo ogomo obere oburu a nyimi maring maa bitibiti. Ara aaka ne yo ruuzi ka o nonza tuuni.

13 Na Yeso bekaa ondo o gong o tesa geza o moole o Roma na, "Ale, ayo yau nangka o kabare ka Ashili au ze." Na o ngmere liizi na ozara me woma.

28 Nangka ne de owulu o makeke ma Garasina, na aromo leere ane suri a macau aaka obere o buru wa taba ne, ne wobe Yeso. Legoone lene le itǝ epa e boome maleu nangka aromo ta tareze orona me ne. 29 Na ne rurayi aa ne bekaa Yeso na, "Eya manyi mau kaaro, bo Kena ka Ashili? Ba deya ko ka gǝǝzǝ ro, a were ta aya ne na?"

30 Aa ma’amo kaa ne edembashe akwilǝ ne rene a cake a neya lya epaolya. 31 Na obere oburu name bose Yeso na, "Baa sǝǝrǝ ro o turki ro a nyimia edembashe akwilǝ me."

32 Naka bekaa ne na, "Ale na." Na ne suri aa ne lyǝ edembashe akwilǝ me. Na edembashe me ne ere ka tesong na ne tǝǝru a lepong leme na manyi lye ne apat.

33 Na ana o soola edembashe me ne ere ka tosong, aa ne ale apeng, aa ne baale pate epa eka e mane ne, kaa epa eka ee mane ana obere o buru me. 34 Na pate aromo apeng me ne suri na ne wobe Yeso. Nangka ne laka kai, na ne bose kai na ka baya makeke mane.

32 Nangka neya ale, na ca kai orakare yende ka obere oburu wa tabe wai. 33 Malo oka a sǝǝrǝ obere o buru me, na orakare me wa obeke angmǝ. Na epa me tere aromo cak tukpwei aane beyaa na, "Ata aa tuku laka ebelo epa eena a nyimi a Isrela ne."

Yeso kaa Ba’alzebul

22 Na ca Yeso orakare ka urǝ waze ka wa kang ya ka obere o buru, naka womza wai, nawa bore beya ngmǝ awa kang gonta ara.

O eke lenyong a Ashili ondaaye o makeke ma Kan’ana

21 Nangka Yeso ka baya arakaname, naka ale a makeke ma Taya ka Sidon. 22 Na ondaye yende ka makeke ma Kan’ana deya a Yeso ka oruuzi na, "Kona egonegone eng Ateokora, kena ka Daoda, bozang, kagala kang obere o buru ooka waya nyimi kai waya zo gara kai."

23 Na Yeso ta beka eyapa a wai ne. Aza nyimi na atoma kai ne deya a kai nane bosa kai na, "Tarangga wai kawa ale waya tare oro awa gare ro ka be koko."

24 Naka kabare na, "Mi aa tonghang azaa emande epeng e Isrela kane wilǝ belle."

25 Na ondaye ome wa deya nawa girwǝ ba ting kai aaka bose kai kangza na, "Ateokora kangkamang!" 26 Na Yeso kabare na, "Wata gwara a jeke epa olya ayana ka kare e ere ne."

27 Na ondaaye me bekaa na, "Nyimia Ateokora, pate kaa nyimi, e ere donge ma ngmeskarong maaka ma taaru ba deze araaka ateakwilǝ lyeeze epa olya ne."

Yeso ka lye ka aromo magu ma naaze

28 Na Yeso kabare naka bekaa ondaye me na, "Ondaye o eke lenyong leo ba Ashili wa gong, baya epa eeka oya gera me, e itǝ nyimi." Ka o bekaa nyimi na obere oburu me wa arnang ka kagala kame.

Yeso ka womza kena kamea obere o buru wa taba kai

14 Nangka ne dukǝ araaka aromo ne gwarnang ne, na oromo yende wa deya Yeso nawa girwǝ ba begeshe be kai awa bekaa na, 15 "Ateokora, kona egonegone kena kang, ka ya ka letaranggi, kangza leya gǝǝzǝ kai maleo. Le rabo aa peere okai a nyimi ola kaa nyimi manyi. 16 Nang ale ka kai a atoma au, nane ta ama o womza kai ne."

17 Na Yeso kabare naka bekaa na, "Ying aromo awereena, ana o dera o kabare ka Ashili, kangza ana ara aburu! Aa alea aa werea yemea eyang cikǝ ba nyimi oying? Aa alea aa werea yemea ang motana ka ying? Deyana ka kai arakana." 18 Na Yeso ka zurki obere oburu me, na obere oburu me wa arnang ka kena kame. Na o ngmere liizi na kena kame ka woma.

Yeso ka womza aromo a cake

38 Malo oka Yeso ka suri ba nyimi o dandaro gwarzanang maYahuda a lengme leng name naka ale ba akwilǝ a Siman. Naka mana ondawa Siman me aka waya kono ka o pimǝ, nane bose Yeso adorana ka womza kai. 39 Na Yeso me zungdǝ kai aka zurki o pimǝ me na o pimǝ me wa pere kai. Ko ya nyimi, naka ere ba saseya aka sele ne epaolya.

27 Yeso kaya za o japi aza o onggo manyi naname, naka gwarnang ka ondooka waye ka o bere o buru, a waya apengme. Ka o rabo ba cake oromo me wa ciisǝ ngmata, awata kang ciisǝ akwilǝ ne, a wa ciisǝ ba macau. 28 Nangka wa laka Yeso, na wa rurayi a wa rizi ating kai, a wa ara lengmelo na, "Eya manyi mang ka bo, Yeso kena ka Ogomo Ashili? Ma bosau kana ogǝzǝng ne." 29 A Yeso ka rabo ka o bekaa o bero buru ome na wa arnang ka oromo me. Obere me wa rabo ka o peere o wai ba deze, obena a rabo a tesa wai a taara ka tobona, a dato enda wai, wa mena a tasa sejǝng se me, o bero buru me wa aleze ka wai o wake.

30 Na Yeso pirkǝ wai na, "Mana me leze lo?"

Nawa kabare na, "Te gong," o bekaana, o bere o buru ome gong ba nyimia wai. 31 Nane boseze kai a gweregwere kana ka turki ne a le’o le o dera bekazo leemea apateze ana o bere o buru ba nyimi name ne. 32 Edembashe akwilǝ e cake neya gera epaolya arame ating oyara. Na mabere ma buru mame bose kai na ka turki ne kane lyǝ a nyimi one, naka kabare.

33 Nangka mabere ma buru mame ne suri ba nyimi oromo me, nane lyǝ ba nyimia edembashe me, nane ere ka tesong, ane lyǝzǝ a nyimi lepong leme na manyi lye ne apat.

34 Nangka ana o soola edembashe me ne laka nyimi, nane song aa ne ale apeng, aa ne baale epa eka e mane ne apengme ka makeke ma ma’amo, 35 kanza na aromo me suri nane laka epa eka eya ale. Nangka ne de a Yeso, nane mana oromo oka o bere o buru wa surǝ a wai, a cikǝ a ting tobona te Yeso, a wa amba madibi a wa ya rosa epa eka eya ale, nane kone boome.

27 Kanza eyang bele o ying, ana ondo ara kaana, neto gbwǝ ne seeka ne laka togomo te Ashili."

Atoma Yeso ne rose na kai Kena ka Ashili kai

28 Malo tomore o riiru ko bekaa angmǝ ana, na Yeso jeke ana Biturusu, ka Yohana, a Yakubu nane zale oyara ka kai, ka ne bose Ashili. 29 Nangka kaya za o bosaza Ashili na mainu ma kai sara, a madibi ma kai o wonze a yizi. 30 A saseya na ana o beya angmǝ ka mawo ma Ashili a leere ana Mosa ka Ileya suri a neya beya angmǝ ka Yeso. 31 Na ne suri ka madibi maapeng na ma Yeso, a neya beya angmǝ ka kai aza o gbwǝ kai apeng Urushalima omea wayo panza o beka Ashili.