22 Is mbǝkǝci a Batsaida, i mbalǝn en mbǝlli' dwawon, is bǝlti bi tǝttǝnti. 23 In ngapi dwanisi toh, it mbǝti malgǝn gatli. Ibbezze'makǝn a dwaɗǝn, izzǝ'toh, i Yesu ultisu, "Kǝn ɗǝ ye' ulunya?" 24 I dwani ya lulya, i'usu, "Ami yen mbalǝn; kǝnǝ pǝti asi duti" 25 I Yesu zǝ'toh tǝn dwaɗǝni ɗaɗanu. I dwanisi ɓul dwaɗǝn wasi, in ndoki, i'yen lu kizoki. 26 I Yesu ultisu, "Paltya libi, bǝ tege' yakǝn gatluwai."

31 I Yesu za' lukǝ Taya, i' bǝli Sidon tǝn shitu i' bǝli Dikapolis illǝ dlilka ki Galili. 32 Is mbǝlli' mulnǝ bǝɗa kub kǝmwai u mul ɗǝɗɗǝtibi, is ngemti tǝszitto. 33 I Yesu Kanti ispal malgǝni' ki hwu' mbalǝn, i Yesu shim mil toh age' kǝm ki mulisi, ibbeza makkǝn, ittǝn lǝgawasi. 34 Illa'ga lya immbǝ mbadli, i'ultisu, "Ippata!" (Iki, "ɓuli!") 35 I kǝmwas ɓuli, i lǝgawas laki, i'gob shilǝn. 36 I Yesu dlimisi bǝs dlimi mulǝnwai. Sine se mbǝtl dlǝmtitǝnki siɗa. 37 Is kumgagashinti, is usu, "Tapǝl mus lǝɓa mbuni! Mulnǝ bǝ ɗa kubkǝmwai u ma ta kumi i, mul ɗǝɗɗǝti bima taman shilǝn I."

46 Is mbǝkǝci a Yaliko. Ti pe'ti ɗǝ Yaliko ngu, nǝti ne'mikkushtiwasi, nǝ bal dwobgakǝ diɓǝl mbalǝn, i dwa won mul ngeplu shinwasi Baltimawus, yakǝnki Timawus, tiki dǝmi a bishitu. 47 Nǝkkumi Yesu mul Nazalat kǝn u, i'go' tlǝl yali ati usu, "Yesu yakǝnki Dauda, kum gontini!" 48 I diɓǝl mbalǝn matiti, tǝn bǝshilǝnnuwai. Amma i'gob mbǝtl tlǝl yaltinki, ti usu, "yakǝnki Dauda kum gontini!" 49 I Yesu dlili i'usu, "Takitibi teh." Is taki dwanisi bi teɗi is ultisu, "Albishiliwagi! Leteɗi, ti mbekkibi." 50 Illa' ul idlatti taka, ittlǝtyama' Yesu. 51 I Yesu ultisu, "Yaki lyamti ta pǝliki?" Idwani ultisu, "mullashti, tambi yellu!" 52 I Yesu ultisu, "Zǝgawagi, la'ti mbalwa' a ndokǝlki." Alǝbi i'ellu, ibbǝl Yesu kal izzǝga.

30 Kom ki Bitlus ki muɗi atli ti gonti, nǝ te ki Yesu, is piti. 31 I' lǝ mati, i' gopi' toh i' tliltilya, i' ndoki, i' hilya ma i' pǝlisi kyautǝn.

40 Mul go' ki dakǝlti i'mbǝ ma Yesu, i' ngusiti i'ngemti, a ti ussu, "Inka ndǝgu, kin ma'paltǝn mul lǝshi ɗa'ti. 41 I ci' gontuwasi gop Yesu, i' ta toh wasi i' tǝnti, i' ultisu, a ndǝgi, a ndokǝlki, dǝmi mul lǝshi ɗati!" 42 Alǝbi alǝbi i dakǝltisi zati, i' dǝm mul lǝshi ɗati.

3 Mbalǝn upsi is mbǝ, is kam Mulǝn tyai ki tle ki mi'gatli. 4 Saman tǝla'ti ma Yesu wai tǝngaki diɓǝtl ki mbalǝn, is mbulǝn gabini tu' malu u nǝ Yesu ɗa u nǝs mbul gabini u, is shim muli suɗi, nǝ lu muttuwasi.

5 Nǝ Yesu en lati mbatluwasǝn u i' ulmul ki tle ki mi'gatlisu, "Yakuyini a paci bazǝn lǝɓa wagi." 6 Mbalǝn mi' lashti zhil ki Musa siki dǝmi a lǝbi, a si shilǝn a mbadli, 7 A si ussu, "Ya lakiɗa mulu ɗǝ shilǝn nǝgu? Pǝli' Lya bezǝn lǝɓa ti ɗa! Wokǝn ma' wokǝli yakǝn mbalǝn* bezǝn lǝɓa wasi ǝnbǝ Lya kǝn nǝmmwai u?" 8 Alǝbi alǝbi i Yesu man ulnǝ si dlǝmti a mbadlu, i Yesu ulsisu, "Yakǝn laki ɗa ki unndi shilǝn u a mbadlwakǝn? 9 Gukǝn ngǝtli nǝ mbǝlǝ, ti ulmul ki tle usu, ‘A wokǝli bezǝn lǝɓa wagi’ nǝ ta usu, ‘Hilya kam lumuttwagi ki zǝgaya?’ 10 Ami lyamti ki manini Yakǝn mbalǝn* ti nǝ ndǝtl ki wokǝl bezǝn lǝɓa a dǝplaɓa." I' ul mul ki tle ki mi'gatli su 11 "A ulkisu, hilya kam lumuttuwagi ki zǝga libi." 12 I Alǝbi alǝbi tǝ hilya, i' kam lumuttuwa si, i' peki a kum mbalǝn ɗǝ yetti, a si kup gagashinti, a si natl Lya asi ussu, "Ma en ulǝn nǝgu gason wai."

1 I Yesu te ge' lu dopga ki Yahudawa, mulǝn ɗa alǝbi mul toh kitle ki mi'gadli. 2 Tǝn gaki sǝmbi shitu ki gopti Yesu ɗa. I mbalǝn yen zid dwaɗǝn, tǝn ndokǝl mulisi cin shutwa? 3 I Yesu ulmul toh ki tle yisu, "Pete' ki akina." 4 I Yesu ulsisu, "Ambuni tǝ pǝl ze' lǝɓa ko bezǝn lǝɓa cin shuta? Ti pekǝl mul mǝshti, ko ti tlota?" Is dǝm shot. 5 Nǝ' yasi nǝ mbadli ki lewi u, ati du mbadli nǝ ɗashti ki mbadlwasǝn, i' ul mulisisu, "Ta' toh wa'teɗi." Ittakit tye, i toh was pal lǝbi.

25 Iki kǝli won ngu ta pǝl hwon kutl nǝ lobpi a hwula ɗǝ binetti, 26 Kǝli u ta tle bal bǝna a toh ki mil bǝlt igǝn diɓǝli, ta gǝl kum ulnǝ ni' ɗa u, i ngo nǝnǝgu tambi ndotuwai, kina kina gonti ɗa. 27 Nǝ kumi ɗǝ dlǝm Yesu u, i' molti te' kalki Yesu age dopga nisi, i' tǝn bi lulugǝl ki Yesu. 28 Tǝn ti usu a mbatl tluwasi, "Lulugǝl ma atǝni u, an ndoti." 29 Alǝbi bina' ki hwulawasi dlǝli, i' kumi a dliwasi ta ndoki gontuwasi.

22 Iki mulǝn ngu age bas mul kina ki lu dopga ki Yahudawa, mul shin Yayilus. Nǝ en Yesu u in nda akina wasi, 23 I' bǝlti bi balbali, i' ultisu, "Yakuyini yakǝnkǝli ti abiki mǝshti. Ami bǝtlki bi ngaɗi ki zittoh tǝngaki tin ndoɗa." 24 Iki is zǝga neti. Bal dopga ki mbalǝn ɗǝ bǝlti kali, asi gyepti.

38 Nǝs mbǝci libi ki Yayilus mul kina ki lu dopga ki Yahudawa u, is kumi wotilu, nǝ kulu, nǝ latiyali yenti ɗawai ba kumti ɗawai. 39 Nǝ te' gibi u, i' Yesu ulsisu, "Yalaki ɗa ki wotilu nǝ kulu ɗa nǝgu? Yakǝni kimǝci tiɗawai, nde yemmbukǝn tiɗa." 40 Iki is pǝli gyetlti ki mbǝlti. Kalki ki Yesu a pekǝl mbalǝn nǝsi kumwasǝn tuwa dlayi, iki i' kan bwasi ki yakǝnkǝliyi nǝ dyawasi nǝ mil kushtiwasi guni netu, is te' gelu u nǝ yakǝn kǝliyi ɗa u. 41 I' Yesu goppi toh, i' ultisu, "Talita kumi", iki, "Yakǝnkǝli, ami utlkisu, hilya." 42 Alǝbi alǝbi yakǝnkǝliyi hilya i' go' lǝti. Tǝngaki timul hwon kutl nǝ lop kǝni. Gu lakisi ulki gagashinti iye

37 I bal lya ki mali mul yetǝl dlitoɗi, i bǝski mali go' tliti lya ɗǝ lyap jakǝ' kuɗǝlǝ nisi. 38 Yesu ɓo ati tu kal age kundǝlǝn ki mali atǝn lumutti, ati nde enbuɗi. Iki mil kushtiwasi is dlilti ɗǝ enɓuɗi, is ultisu, "Mul lashti, mun mǝshti kin ɗa entiwaya?" 39 I' hilya ɗǝ enɓuɗi, i' mati etǝlli, i ultisu "dǝm shot!" Iki i yetǝlli muɗi, i kumlu dǝm shot. 40 I' ulsisu, "Tǝn gaki yakǝn lakiɗa ikumǝn ɓanti nǝgu? Hal nǝgun lati mbatl kǝn nuna?" 41 Iskum ɓanti iye, is ulyelsǝnisu, "Wo kǝngu? Yetǝl nǝ mali ki dlika si bǝtl shilǝn wasi!"

35 Nǝ cin ɓal nja tǝnda u i mil kushti wasi mbǝ ma'ti, is ultisu, "Lǝbisi ngu mbalǝn ɗawai, i ngu cin ɓal nja ti ndayi. 36 Za' mbalǝn nisi sǝ' zǝga tiya ge' gatlu nǝ nja aki u, sǝ' uli gawasǝn ulki ɗamiɗa." 37 I' ulsisu, "Kiniɓo bǝlǝnsi ulki ɗamiɗa" Is ul Yesu usu, "Ulki ɗamiwasǝn nǝ pǝtl bwasti dlom ki upki lii hwon nǝm kikyautǝn ki yakǝn mbalǝn, tǝn ullisi ulki ɗami ɗangwa?" 38 I Yesu ngemsi, "Ulki ɗami nǝmi nikini? Su' yanini." Nǝs yani toɗu, is ultisu, "Lǝpa nantam kǝni, nǝ kes lob." 39 I Yesu ul mil kushti wasi usu sǝ' bwas mbalǝn tiya as dǝm atli tiya tǝn di'me. 40 I mbalǝn dǝm atli swai nami kutl kutl lǝbǝ kutl, nami kutl kutl lǝbǝ nantam. 41 I Yesu kan lǝpa nantami nǝ kes gudǝl lopisi, it taki lya, i' gode Lya, i' caccal lǝpa i, ib bǝl mil kushti wasi sǝ' buwasi mbalǝn, is buwasisi kes lopi ɗaɗanu. 42 Muswasǝn is ɗami i kǝmsi. 43 I mil kushti wasi yem dǝs kutl nǝ lop ki lǝpa gunǝ sa u nǝ kesi. 44 Diɓǝl ki mwani yi nǝ ɗami u sa tǝla zangu nantam.

48 Nǝ' en dǝl kudǝlǝn ɗǝ hwottisi u, tǝn gaki ndǝl ki yetǝl, adlom gasi i'go lǝ te'tǝnsi, a ti lǝ'tǝn mali. Ippǝli kǝnǝ tǝ' ɗakǝsh si, 49 Nǝs yen ti ɗǝ lǝ' tǝn malu, is yeni kǝnǝ nul kǝni, is la' yali. 50 Tǝn gaki kapuwasǝn i ɓa'gobsi nǝs yentu. I Yesu ɓulisi bi alǝbi, i' ulsisu, "Bǝ ɓanniwai amini." 51 Iki it tege' kudǝlǝn ne'si, i yetǝli muɗi. I gagashi' gob mil kushti wasi,

1 Age cinisi i hwu' mbalǝn domga ɗaɗanu. Ulki ɗami nisi ɗawai, i Yesu imbe milkushti wasbi, i' ulsisu, 2 "Ami kub go'kǝ' hwu mbalǝnyi, gaki asǝti mutti maki ngu asi ne'kǝni, ulki ɗami nisiɗawai. 3 In a zasi sa zǝga libi nǝ kuzǝn u, sǝkǝn ma'mbǝkǝshti libiwai, i ngu nami pe'ni lolu." 4 I mil kushti wasi ndǝgiti is ultisu, "A ukǝn tǝ mbalǝn mbi ulki ɗami u nǝtǝ kǝm mbalǝn age'dǝlgǝn u?" 5 I Yesu ngemsi, "Lǝpa nǝmi nikini?" Is usu, "Ninngi." 6 I' ul diɓǝl mbalǝnsu sǝ'dǝm atli. Nǝ'kan lǝpa ninngiyi, i' gode Lya ɗa, iccacali, i'go' bǝtl milkushti wasi sǝ' bwasi mbalǝn, is pǝli nugu. 7 Kwesen nisiɗa ten ngulen. Nǝ' gode Lya u, ippi milkushti wasi sǝ'bwasi mbalǝn. 8 I mbalǝn ɗami i kǝmsi, i milkushti wasi yemi is njikǝn dǝs ninngi nǝgunǝ sa u. 9 Mbalǝnisi sa pǝl zangu upsi. Kal ki pallisibi,

12 Cilkǝlu nǝ za'ti betanya wasǝn, a Yesu ɗǝ kum kuzǝn. 13 Nǝ' en pǝkkǝ kah tel lolu u mul dwa lede, Nǝllǝ' ya ni u tambi mil tǝnkiwai. Nǝm mbǝci ma'tu, tambi ulǝn tǝnkiwai amma dwakatl, gaki luɓal kǝpǝtl mil ki kah u wai. 14 I ul kah nisisu, "Bǝmulǝn ɗam mil lwanǝwai hal patwagi!" Amilkushtiwas ɗǝ kubti.

20 Nǝkyau si ɓeuti, is ye'kah nǝsi akokkǝnyi hal nǝ tlilgisi, 21 Bitlus dambǝlti i' ul Yesu su, "Mullashti, nǝya! Kah u nǝ' pǝlibbi u. Akokkǝn i!"

22 I Yesu ndǝgi. I' ulsisu, "Lakǝn mbadli tǝn Lya" 23 "Bali a mipi'kini, in mulnǝ a ndǝ nǝ Lya u, tǝn ma' utl calgatl usu, ‘Ndus ɗǝki nda swa ge' dlǝlka u’ abǝ ta bwas mba dlwa swai u nǝn pǝlitti ulisi. 24 Gaki nǝgu a mi pikkini ulnǝ ka gyemin ge' shilǝn nǝ Lya u, i' ndǝ nǝ nali u, kǝm mbitini. 25 Kogassi u kǝn kidlǝlni ɗǝ gyep Lya u, in ka ngapǝn mullǝn mbatlu, a tusintaka, Gaki bwaswakǝn ki lya ma tǝn tusi'kin bezǝn lǝɓawakǝn taka.

23 Mulǝn ɗa, mul du mi'gatli a ge'lu dopga wasǝn, i' la yali, 24 I' usu, "Yalamineki Yesu yakǝn nazalet? Ki mbǝni ki hwotimi bezǝn lǝɓa ya? A manini ki wokǝni, ki yakǝn ki Lya mul zo'mbadl kǝni!" 25 I Yesu mati mi'gatli ki geti, i' usu, "Dǝm shot! Pe' ɗǝ ge mulu!" 26 I ki i bezǝn mi'gatli i' u mulisi. I' la yali, i' petaka geti.

1 A Yesu ne mil kushtiwasi is ɓǝci bidlilka age atl ki Galasinawa. 2 Nǝ pe'tuwasi ɗige kundǝlǝn ki mali, iki mul du mi'gatlon kǝngu te' gelu gum mbalǝn i mbǝ ma Yesu. 3 Ti ɓo lugum mbalǝn kǝn ki lǝ dǝm tuwasi. Mul ma'kǝndǝtti ɗawai, ko nǝ ulkǝndǝ mbalǝn kidom. 4 Tǝn a tle kǝndǝti toh nǝ asǝn nǝ ulkǝndǝ mbalǝn ki dom, ati ɓaɓatlti, a cacal dom ki tǝn asǝni. Mul ma'pǝliti ulǝn ɗawai. 5 Gasi nǝ dloncin a gelu gum mbalǝn ti dǝmti, nǝ tǝn zǝga, ati latiyali, ati gǝlǝshti dli wasi nǝ zǝnga. 6 Nǝ en Yesu te' lolu u, i' em kitǝl tya mati i' gus akinawasi. 7 I' layali i' usu, "Yesu yakǝn ki Lya mul nalti, ya lakǝnmiki? A maki nǝ Lya yi, bǝ hwoti besǝn lǝɓa wai." 8 Tǝ ndan akinawasi nǝgu u tǝn gaki Yesu ultisu, "Za mulu, Ki du mi'gatli!" 9 I Yesu gyemti, "Ya kǝn ki shinwagi?" I' ultisu, "Shin i kǝnki, hututu, iki mi dimbǝli." 10 Iki i' go' gyep Yesu bǝ'katsi ɗǝ kiwai 11 Amalǝbisi lu byatl dǝs kiban ɗa suttǝn mis calgadli. 12 Mi'gatli gyemti is usu, "In kandǝgu katmi swa ge dǝs kiban yi, tǝn te gesi." 13 I Yesu ndǝgisi. Iki yi du mi'gatli peki, is te ge dǝs kiban nisi. Dǝbǝtl ki dǝs kiban nisi sǝn pǝtl zangu lop, is hilya nǝ kitǝl, suttǝn mis calgadli is ndage mali ki dlilka is gǝli. 14 Aki kǝn mil byatl dǝs kiban ni tlǝ nǝ kitǝl, is su dlǝm shilǝnni age bas gatli nǝ mil gatli. I mbalǝn ɓǝ si' en ulnǝ nda u.

11 Ngo nǝnǝgu kini ki usu, in mulnǝ azi ulǝn tǝngaki ti' ɗǝl bwasi nǝ dyawasi adǝm Kolban i', (iki, abǝl Lya i) 12 nǝgu katl, kǝkǝn za'titi tǝ'pǝli bwasi ko dyawasi kyautǝn ki ulǝnwai. 13 Nǝgu lakiɗa ki ɗa katshilǝn ki Lya baliwai gaki bǝtl zhil ki mi' kina. Ki njikǝ' pǝtl undigi." 14 Ɗaɗanu i Yesu taki diɓǝl mbalǝn bi, i' ulsisu, "Kumǝnnǝni muswakǝn, a'manangu. 15 Ulnǝ ɗǝ su' ge' yakǝn mbalǝn tu'dla u i ɗǝ bezǝtiwai, ulnǝ ɗǝ pe'tito' ge'tu ɗǝ bezǝti."

24 I Yesu za'lǝbi illǝ Taya nǝ Sidon. It tege' libiwon, ta lyami tǝmulǝn maniwai ngo' nǝnǝgu a hwunwai. 25 Kǝliwon, gunǝ du mi'gatli gob yakuwasi, nǝkumi Yesu ɗa ki u, illǝ in ndakina ɗakka. 26 Kǝliyisi yakǝn Helinawa ni, atlki zǝtti iki Solopinikiya ni. In ngem Yesu tǝp pekkǝli yakuwasi du mi'gatl taka. 27 I Yesu ultisu, "Hwe tǝkǝm mil pa, gaki a'mbuni akan ulki ɗami ki milwai tǝbǝl kaɗiwai." 28 I kǝliyi ndǝgiti i'ultisu, "Mul nalti, ey nǝguɗa, ngo'nǝnǝgu kaɗi nǝnɗǝ ɗab bi ki mil." 29 I Yesu ultisu, "Gaki shilǝnwa'gu, paltya, du mi'gatli aza' yakuwagi yakǝnkǝli." 30 Nǝ' paltya libi u ille'mbi yakuwasi kǝmuɗi tǝn lumutti, du mi'gatli apeki.

17 I gudǝl nǝm ge'mbalǝni ndǝgiti, i'ultisu, "Mul lashti, i ngu, a mbǝlli' yakuyini, gunǝ mi'gatli ki nge' shilǝn nidɗa. 18 Nǝta totǝntu, sai nǝ tala'ti atli, a biwas ɗǝpǝ't pukǝtkǝt, a ti ashti shinwasi, ati pǝ'sanganga. Adlimi milkushti wagiyi sǝppe'kǝlti, sa maniwai." 19 I Yesu ndǝgisi i'ulsisu, "Kini mbalǝn ki nǝgun u nǝbǝ kiɗa la'ti mbadlwai u! Anǝmi taman dǝp ne'kini? Anǝmi taman ngashtibi nǝkini? Mbǝlli nǝn yakǝni." 20 Is mbǝlli' yakǝni. Nǝ mi'gatli yen Yesu u, alǝbi alǝbi i mi'gatli bat yakǝni, i dliwas gon nyepti, in nda atli i'go' bǝdǝlti, a biwas ɗǝ pǝt pukǝtkǝt. 21 Yesu ngem mul zǝ'yakǝni, "Kǝnǝ anǝmi uli mbitu?" I bwasisi usu, "Adɗi na' yakǝn. 22 Ta tle la'titi ge' utu ko mali, gaki tǝ'tlotiɗa. Ngo nǝnǝgu kǝn ma'pǝl ulǝn u, kum gontinǝn a ɗǝlmi."

23 " ‘In kǝn manti u?’ " I Yesu ultisu, "Mus lǝɓa mul pǝ'kǝni ma'mul la'ti mbadlǝ." 24 Alǝbi alǝbi i bwas ki yakǝni usu "A la' mbadlǝ. Kati lǝshi la'ti mbadlǝ taka!" 25 Nǝ Yesu yen hwu mbalǝn ɗǝ kitǝl teɗu, im mati du mi'gatli i'ultisu, "Ki, mi'gatlu mul nge' kup kǝm nǝ shilǝn u, a piki bwaski kiti, bǝ tege'ti nǝwai." 26 Kalki la'ti yalki mi'gatli, illi'ti nǝ ndǝlti, dlǝwas ɗǝ nepti, ibbwasti nǝti. I yakǝni palkǝni hwum mbalǝn, i ge' mbalǝn kilǝbi diɓǝli nami usu, "Tamǝcci" 27 I Yesu gobto wasi it tlǝlti lya, i' hilya gal.