27 Yesu ahalawa hadya hantu, umo akajenda, mantuntu waidi wakonga kumtimila. Waguta, "Mwana ywa Daudi, chifile mbazi!"

28 Yesu eze abule kukaya, wadya mantuntu waidi wambasa, niyo awauza, "Mwavizumila kugamba nadaha kuwahonya?"

Wahitula, "Zumbe, nivyo!"

29 Niyo Yesu adonta ameso yawo na kugamba, "Navilaile, saviya mzumile!" 30 Niyo meso yawo yagubuka. Yesu awasigila kwa nguvu, "Msekwiilonga imbuli ino kwa yoyose!"

31 Mna wahalawa nakulonga mbuli za Yesu mwe isi idya yose.

29 Umo Yesu hamwenga na wanampina wakwe wakahalawa mo mzi wa Yeliko, fyo kulu dya wantu nadikatimila. 30 Wantu waidi matuntu nawekala mnkanda mweisila weva kugamba Yesu naakajinka, ivyo wakonga kuguta, "Mwana ywa Daudi! Chifile mbazi Zumbe!"

31 Idifyo dyawakwamila nakuwagamba wanyamale. Mna wagutisa, "Zumbe Mwana ywa Daudi! Chifile mbazi!"

32 Yesu achimala nakuwetanga. Awauza, "Mwaunga niwadamanyize mbwani?"

33 Wahitula, "Zumbe, chakunga uchitende chiwone!"

34 Yesu awafila mbazi na kudonta meso yawo, aho wadaha kuwona, niyo wamtimila.

22 Wabula mwe mzi ukwitangwa Betisaida. Uko wantu wamwigaila Yesu tuntu na kumwila amdonte. 23 Yesu amtoza umkono yudya tuntu na kumlavya mwe kaya. Eze amtwele mate mwa meso, amwikiya mikono mlanga na kumuza, "Wadaha kuwona chochose?"

24 Yudya mntu asinya kulanga na kugamba, "Heye, nawona wantu wakujenda, mna wekala enga miti."

25 Yesu niyo naho aika mikono yakwe mwa meso ya yudya tuntu, niyo agubula ameso yakwe akonga kuwona vyedi, niyo awona vintu vyose pwilili. 26 Yesu amgamba aite kaya, mna amlemeza, "Asekuya ko mzi udya."

31 Yesu ahalawa ho mzi wi haguhi na Tilo, na kujinkila Sidoni kwe diziwa dya Galilaya kujinkila isi ya Dekapoli, na kubula mwe si ya Mizi Mlongo. 32 Wantu wamwigaila Yesu mntu hekwiva na hekudaha kulonga vyedi, wamwila amwikiye mikono mlanga mntu uyo. 33 Elo Yesu niyo amusa he difyo dya wantu amwigala hankanda, ajela madole yakwe mwa magutwi ya yudya mntu, niyo atwa mate na kumdonta mo lulimi lwakwe. 34 Akaheza Yesu niyo asinya kwembingu, atoa nkwilu, na kumgamba yudya mntu, "Efata," Kugamba, "Vuguka!"

35 Ahadya uyo umntu akonga kwiva na ululimi lwakwe lwalegela na kukonga kulonga vyedi. 36 Yesu niyo awalemeza wantu wasekulonga dyodyose kwa mntu, mna ivyo akuwalemeza, nivyo wakujendeleza kulonga. 37 Wose wevile weheleswa. Wagamba, "Kadamanya chila chintu vyedi!" "Kawatenda hewekwiva weve na vimumu walonga!"

46 Niyo wabula Yeliko. Yesu na wanampina wakwe hamwenga na fyo dya wantu umo wakahalawa mo mzi, tuntu yumwenga akwitangwa Batimayo mwana Timayo nakekala hankanda he isila akalombeza. 47 Eze eve Yesu wa Nazaleti akujinka, niyo akonga kuguta, "Yesu! Ywa Daudi! Nifila mbazi."

48 Wantu walozize wamkwahila na kumgamba, "Nyamala, mna agutisa akagamba, mwa ywa Daudi, nifila mbazi!"

49 Yesu niyo achimala nakugamba, "Mwitangeni!"

Wamwitanga yudya mntu na kumgamba, "Kwenke moyo! Inuka akwitanga."

50 Adula mcheka wakwe, apilika na kumbasa Yesu.

51 Yesu amuza, "Waunga hutendele mbwani?"

Yudya ntuntu ahitula, "Mhinya, naunga nione naho."

52 Yesu amgamba, "Hita, uzumizi wako ukuhonya."

Ahadya akonga kuwona, niyo amtimila Yesu mweisila.

35 Hadya Yesu eze atende haguhi no mzi wa Yeliko, kwendaga na mntu yumwenga tuntu ekale hankanda he sila, akalombeza. 36 Eze eve fyo dya wantu wakajinka, auza, "Kuna mbwani?"

37 Wamgamba, "Yesu wa Nazaleti ajinkila hano."

38 Aguta, "Yesu! Mwana ywa Daudi! Nifila mbazi!"

39 Wantu walongole wamkwahila nakumgamba anyamale. Mna niyo agutisa, "Mwana ywa Daudi! Nifila mbazi!"

40 Elo Yesu niyo achimala nakuwalagiza wamwigale yudya tuntu kwakwe. Eze abule hajihi, Yesu amuza, 41 "Waunga hudamanyize mbwani?"

Ahitula, "Zumbe," "Naunga niwone naho."

42 Yesu amgamba, "Kwaivyo wana! Uzumizi wako ukuhonya."

43 Ahadya yudya tuntu niyo adaha kuwona, niyo amtimila Yesu, kuno akamhongeza Chohile. Fyo dize diwone ivyo, wose wamtunya Chohile.

1 Yesu umo akajinka, niyo amwona mntu yumwenga, tuntu ivyo elekwa. 2 Wanampina wamuza, "Mhinyi, ni yuhi adamanye masa, mntu yuno, hegu welesi wakwe vilekile elekwe tuntu?"

3 Yesu ahitula, "Mbuli ino hailaile kwa chausa cha masa yakwe uyo, hegu masa ya welesi wakwe. Mna elekagwa tuntu chani ndima za Chohile ziwoneke zikadamanya ndima mndani mwakwe. 4 Kuche nomsi chongigwa chijendeleze kudamanya ndima ya yudya anisigile. Kwaviya chilo cheza hadya mntu hadahe kudamanya ndima. 5 Chipindi nichei mwe isi, miye ni ulangazi we isi."

6 Eze alonge ayo, niyo atwa mate hasi, adamanya ntagata, amhaka yudya tuntu mwa meso. 7 Amgamba, "Hita ukahake mwe ndiwa ya Silowamu." Silowamu kugamba ni asigilwe. Aho uyo tuntu niyo aita, akuhaka, akaheza auya akawona.

2 Niyo eza mntu yumwenga mta matana amfikila madi amgamba, "Zumbe, ukaunga wadaha kunitenda nilenguswe."

3 Yesu achumiza umkono wakwe amdonta. Amgamba, "Naunga lenguswa!" Ahadya mtu uyo ahona matana yakwe. 4 Niyo Yesu amgamba, "Tegeleza! Usekumgambila mntu, mna hita ukelagise kwa mlavyantambiko, chani chila mntu akuwone kugamba kuhona, lavya lavyo diya alagize Musa."

2 Wantu wamwenga wamwigaila mntu aholomale, agonile mwe lusazi. Yesu eze awone uzumizi wakwe, amgamba yudya aholomale, "Mwanangu kwenke moyo, masa yako yalekeilwa."

3 Niyo wahinya Sigilizi wamwenga wawagamba, "Yuno mntu amhuluta Chohile!"

4 Yesu kuno akamanya viya wakufanyanya mwe myoyo yawo, awagamba, "Ni mbwani mkufanyanya mbuli zihiye sa zino? 5 Vihufu ni vihi, kugamba, ‘Masa yako yalekeilwa,’ hegu kugamba, ‘Chimala ujende’? 6 Ivyo naunga mnamanye kugamba Mwana ywa Mntu ana udahi mwe isi wa kulekeila masa." Elo amgamba yudya mntu aholomale, "Chimala, guha lusazi lwako wite kaya!"

7 Uyo mntu achimala nakwita kaya.

10 hendaga na mntu aholomale umkono. Nahana wantu wamwenga weyaho wakunga kumlaha Yesu kwa kudamanya vihiye, ivyo wamuza, "Mwe sigilizi yetu ni vyedi kumhonya mntu mwe Zuwa dya Kuhumula?"

11 Yesu ahitula, "Uneva yumwenga ywenyu ana ngoto ingile mwe bome Zuwa dya Kuhumula, hailavye mwe dibome? 12 Togolani! Mntu ni ywedi kujinka ngoto! Nuko kugamba Sigilizi haikuchunga suwe kumwambiza mntu yoyose mwe zuwa dya kuhumula." 13 Niyo amgamba yudya mntu, "Chumiza umkono wako."

Auchumiza, watenda mjima naho saudya umtuhu.

30 Mkwewe ywe chivyele ywa Simoni ne mo lusazi hakudaha. Ahadya Yesu eze abule, niyo wamgambila mbuli zakwe. 31 Yesu ambasa, amtoza mkono na kumwambiza kwinuka. Unyonje wamlekela, niyo akonga kuwasankanila.

40 Mntu yumwenga endaga na matana na keza kwa Yesu, na kumfikila madi akamlombeza amwambize. Amgamba, "Ukaunga, wadaha kunilengusa."

41 Yesu niyo amfila mbazi, achumiza imikono yakwe na kumdonta. Niyo amgamba, "Naunga," "Ulenguswe!" 42 Ahadya matana yamlawa yudya mntu, niyo alenguswa.

3 Wantu wamwenga niyo wamwigaila mntu aholomale enulwe mwe lusazi ni wantu wane. 4 Kwaviya wantu nawamema, hawadahile kubula hajihi na Yesu. Niyo waponkola kulanga kwedigulu dye nyumba kwa hadya achimaile Yesu, niyo wamseleza no ulusazi lwakwe. 5 Yesu eze akaule uzumizi wananawo, niyo amgamba yudya mnyonje, "Mwanangu, kusizwa masa yako."

6 Wahinya Sigilizi watuhu nawehadya wekala wafanyanya mwe myoyo yawo, 7 "Nimbwani yuno mntu kalonga vino? Amhuluta Chohile! Chohile ichedu nuyo akudaha kusa masa!"

8 Ahadya Yesu niyo amanya mo muye wakwe viya wakufanyanya mwe myoyo yawo. Niyo awagamba, "Nimbwani mkufanyanya ivyo? 9 Ivyedi ni vihi, kumgamba mta kuholomala, ‘Kusizwa masa yako’, hegu kumgamba, ‘Chimala, kwetwike ulusazi lwako wite’? 10 Elo naunga mmanye kugamba, Mwana ywa Mntu ana udahi wakulekela masa hano he isi." Ivyo amgambila yudya aholomale, 11 "Nakugambila, chimala, kwetwike ulusazi lwako wite kwe kaya yako!"

12 Ahadya mntu yudya niyo achimala, etwika ulusazi lwakwe, ahalawa wantu wose wakamsinya. Wose wehelwa na kumtunya Chohile, wakagamba, "Mbuli ino hachinati chiiwone!"

1 Yesu niyo engila naho mwe nyumba yo kuvikila. Umo namna mntu mta mkono uholomale. 2 Wantu watuhu nawakalonda mbuli chani wamgwile Yesu. Ivo nawakamsinya wakaule hegu namhonye mntu yudya mwe Zuwa dya Kuhumula. 3 Yesu amgamba yudya mta umkono uholomale, "Chimala hagati." 4 Niyo awauza, "Sigilizi zachunga chidamanye vihi mwe Zuwa dya Kuhumula, kudamanya mbuli yedi hegu ihile? Kuhonya ujima wa mntu hegu kuukoma?"

Mna wowo niyo wanyamala dwi! 5 Yesu ahituka kuno na kuno na kuwasinya kwa maya. Awafila mbazi kwo udala we myoyo yawo. Niyo amgamba yudya mta kuholomala, "Chumiza umkono wako." Naye adamanya ivyo, umkono wakwe wata mjima naho.

12 Yesu hadya endaga kwemzi umwenga mgati mwe mizi idya kwalailaga mntu endaga akuhuma matana. Eze amwone Yesu, edula hasi na kumlombeza, "Zumbe, ukaunga, wadaha kunilengusa!"

13 Yesu achumiza mkono wakwe na kumdonta. Niyo amgamba, "Lenguka!" Aho unyonje wamlawa mntu uyo.

18 Wantu wamwenga naweza wamwinula mntu mwe lusazi aholomale. Niyo wajeza kumwingiza kunyumba wamwike kulongozi kwa Yesu. 19 Mna kwachausa che difyo dya wantu, wadunduga kumwingiza mndani. Ivyo wamwinula no lusazi na kumjisiza kulanga kwe digulu, waponkola langa, na kumseleza no lusazi lwakwe mgati mwe difyo kulongozi kwa Yesu.Wantu wane wakujisa mntu kulanga kwe digulu 20 Yesu eze awone uzumizi wananawo, niyo amgamba, "Mbuyangu, kulekeilwa masa yako."

21 Wahinya Sigilizi hamwenga na Mafalisayo wakonga kulonga wenye, "Yuno ni mntu ywani akumhuluta Chohile? Chohile nuyo ichedu akudaha kulekeila masa!"

22 Yesu kabunkula zifanyanyi zawo na kuwagamba, "Ni mbwani mkufanyanya vino mwe myoyo yenyu? 23 Vihufu ni vihi kugamba, ‘Masa yako yalekeilwa,’ hegu kugamba, ‘Chimala ujende?’ 24 Mna naunga mmanye kugamba, Mwana ywa Mntu ana udahi wa kulekeila masa mwe isi yose." Akajika amgamba yudya mntu aholomale, "Nakugamba, chimala, guha ulusazi lwako wite kukaya!"

25 Ahadya mntu yudya achimala kulongozi kwawo wose, etwika ulusazi lwakwe endile akagonela, aita kaya, kuno akamtunya Chohile.

6 Mwe Zuwa tuhu dya Kuhumula Yesu aitaga kwe kuhinya mwe nyumba yo kuvikila. Mwe nyumba iyo mwendaga na mntu aholomale mkono wakwe wa kulume. 7 Wahinya Sigilizi wamwenga na Mafalisayo wamwenga nawakazungula chintu chikunga chimhose Yesu, elo wamsinyisa hegu namhonye mntu yudya mwe Zuwa dya Kuhumula. 8 Mna kwaviya Yesu nakamanya izifanyanyi zawo niyo amgamba yudya mntu mta mkono uholomale, "Souchimale hano." Yudya mntu enuka niyo achimala hadya. 9 Akaheza Yesu niyo awagamba, "Nawauzani, Sigilizi yetu yachunga chidamanye yedi hegu yehiye mwe Zuwa dya kuhumula? Kuhonya ujima wa mntu hegu kukoma?" 10 Niyo ahituka na kuwakaula wantu woseni wendile hadya, niyo amgamba yudya mntu, "Chumiza umkono wako." Naye niyo adamanya seivyo, mkono wakwe niyo wahona.

1 Yesu eze abinde kulonga yoseni yano kwa wantu, niyo aita Kapelinaumu. 2 Mkulu yumwenga ywa wankondo gana wa Chilumi nana mtumwa amungise, mtumwa uyo nani mnyonje gaja.Mkulu ywa wankondo gana wa Chilumi 3 Yudya mkulu eze eve mbuli za Yesu, niyo awasigila wadalahala wamwenga wa Chiyahudi waite wakamlombeze akamhonye umtumwa ywakwe. 4 Weze wambwile Yesu, niyo wamlombezesa, "Ichindedi mntu yuno aungigwa umwambize 5 kwaviya awaunga wantu wose, naho kachizengela nyumba yo kuvikila."

6 Akaheza Yesu niyo ajesanya nawo. Eze abule haguhi ne nyumba ya yudya mkulu ywa wankondo, niyo yudya mkulu awasigilaga wambuyaze kumgamba Yesu, "Zumbe, usekwehosa kwiza kuno, kwaviya miye sikuwagila kukuhokela mwe nyumbangu. 7 Naho miye nami sikuwagila kwiza kwako. Mna longa ulosi du, na mtumwa ywangu nahone. 8 Kwaviya miye mwenye nami ni mntu mta udahi, naho nina wankondo we hasi yangu. Ninamgamba yumwenga, ‘Hita!’ Naye aita, na ninamgamba mtuhu, ‘So!’ Naye eza, na ninamgamba mtumwa ywangu, ‘Damanya vino!’ Naye adamanya."

9 Yesu eze eve ivyo niyo ehelwa, niyo ahitukila idifyo dya wantu dikumtimila na kugamba, "Nawagambilani, sinati kuwona uzumizi sauno mwe isi yose ya Izulaeli!"

10 Wadya wantu wasigilwe wauya kukaya kwa yudya mkulu na kumbwila mtumwa ywakwe kahona.

11 Mvyele yumwenga endaga mnyonje, engilagwa ni mpepo zihiye kwa chipindi cha mihilimo mlongo na mnane, mgongo wakwe wendaga uhinda hakudaha kuchuluka. 12 Yesu eze amwone niyo amwitanga, "Mnala, kuhonywa unyonje wako!" 13 Amwikiya mikono yakwe, ahadya echulusa mwenye na kumtunya Chohile.

1 Zuwa dimwenga dya kuhumula Yesu nakaita kudya nkande mwe nyumba ya chilongozi yumwenga ywa Mafalisayo, wantu nawo nawakamsinya Yesu kwa hajihi. 2 Mntu yumwenga mta viga na mikono ivimbile kamwizila Yesu, 3 Yesu naye awauza wahinya Sigilizi na Mafalisayo, "Sigilizi yaunga kuhonya mwe Zuwa dya kuhumula hegu bule?"

4 Mna wowo niyo wanyamala. Yesu niyo amtoza uyo umnyonje na kumhonya, amleka aite zakwe.

11 Umo Yesu nemwe ntambo ya kwita Yelusalemu, nakajinka mwe mihaka ya Samaliya na Galilaya. 12 Umo akengila mwe kaya imwenga niyo adugana na wantu mlongo wata matana. Wachimala kwa luhale, 13 waguta wakagamba, "Yesu! Zumbe! Chifile mbazi!"

14 Yesu eze awawone niyo awagamba, "Hitani kwa walavyantambiko mkelagise chani wawakauleni."

Mwesila wakajenda niyo walenguswa. 15 Yumwenga ywawo eze awone kahonywa, niyo auya, kuno akamtunya Chohile kwa izwi kulu. 16 Niyo amfikila madi Yesu kuno akamtunya. Uyo mntu nani Mfambazi. 17 Aho Yesu agamba, "wantu walenguswe hawendile mlongo, awatuhu wekuhi? 18 Hawoneke mtuhu awiye kumtogola Chohile mna yuno mjeni uyodu?" 19 Akaheza Yesu amgamba yudya mntu, "Chimala wite zako, uzumizi wako ukuhonya."

1 Vikaheza Yesu niyo aita Yelusalemu kwe ngasu ya Chiyahudi. 2 Kudya Yelusalemu hajihi ne nchili yo mzi uwo ikwitangwa lwivi lwa ngoto, nakuna ndiwa ya mazi ikwitangwa kwa Chiebulaniya Betisaza, naina balaza shano zina mizeze. 3 Wanyonje walozize nawalambala mwe zibalaza, matuntu na viwete na waholomale nawakagoja mazi yatibulwe, 4 kwaviya mndima ywa kwembingu nakasela chila nkanana mndani mwe ndiwa atibule amazi. Mnyonje ywa nkongo kwingila mndani mwa mazi umo yatibulwe, nakahonywa unyonje wose nendile ananawo. 5 Nahana mntu mnyonje kwa mihilimo milongo mitatu na mnane. 6 Yesu eze amwone kagona nakumanya kugamba katenda mnyonje kwa mazuwa yalozize, niyo amuza, "Waunga uhone?"

7 Mnyonje ahitula, "Zumbe, sina mntu ywa kuningiza mwe ndiwa ya mazi umo yakatibulwa, chila hajeza kwingila, mntu mtuhu anilongwela."

8 Yesu amgamba, "Chimala, guha umcheka wako wite." 9 Aho mntu uyo niyo ahona, niyo aguha mcheka wakwe, akonga kujenda.

Mbuli iyo idamanyika mwe Zuwa dya kuhumula,

46 Yesu niyo auya mo mzi wa Kana uko Galilaya, uko ahitule mazi yakatenda divai. Kwendaga na mkulu yumwenga ywa selikali endaga na mwanawe mnyonje uko Kapelinaumu. 47 Eze eve kugamba Yesu kakulawa Yudeya kabula Galilaya, kamwitila na kumlombeza aite akamhonye mwanawe wa chilume endaga mnyonje wa kubanika. 48 Yesu amgamba, "Nyuwe hamnawone mpituko na vilagiso hamzumile."

49 Mkulu uyo ahitula, "Zumbe, chitanye mwanangu hanati abanike."

50 Yesu amgamba, "Jenda, mwanawo natende na ujima!"

Uyo mntu niyo azumila ulosi wa Yesu, niyo ahalawa. 51 Achei mwe sila wandima wakwe wadugana naye, wamgamba, "Mwanawo kahona!"

52 Awauza isa umwana ahonile, nawo wamhitula, "Gulo saa mfungate nomsi, unyonje umlekela." 53 Niyo akumbuka nendile nidya isa Yesu amgambile, "Mwanawo nahone." Ivyo yeye hamwenga na wantu mwe nyumba yakwe wose niyo wazumila.

54 Chino ni chilagiso cha kaidi adamanyaga Yesu eze auye kulaila Galilaya kubula Yudeya.

20 Mvyele nakahuma unyonje wa kulawa sakame kwa mihilimo mlongo na midi kamtimila Yesu hanyuma niyo adonta lepe dye suche ya Yesu. 21 Egamba mwenye, "Uneva du ninadonta isuche yakwe, na nihone."

22 Yesu ahitukila kunyuma niyo amwona yudya mvyele, amgamba, "Kwenke moyo, mwanangu ywa chiche! Uzumizi wako ukuhonya." Aho yudya mvyele atenda kahona.

25 Ahadya nahana mvyele yumwenga endile na unyonje wa kulawa sakame mihilimo mlongo na midi. 26 Mvyele yudya nakatumbwazika vidala kwa wagangana walozize. Kazisa hela zakwe zose, mna hawone vyedi kalumiswa chipindi chose. 27 Yudya mvyele eze eve mbuli za Yesu, niyo omboka mgati mwe difyo dya wantu. Amwitila Yesu kunyuma na kukufya isuche yakwe 28 akelongela mo moyo wakwe, "Ninakufya du isuche yakwe, nahona."

29 Eze akufye isuche ya Yesu, aho sakame niyo yaleka kumlawa, awona kugamba kahona unyonje wakwe.

43 Mgati mwawo nakuna mvyele akulawigwa sakame kwa mihilimo mlongo na midi, alavyaga vyoseni ananavyo kwa wagangana, mna hahana hata yumwenga adahile kumhonya. 44 Mvyele uyo kalaila mwe difyo hanyuma ha Yesu nakukufya lepe dye suche yakwe, aho sakame niyo ileka kumlawa. 45 Yesu auza, "Sikufywa ni yani?"

Chila yumwenga kalemela, niyo Petulo agamba, "Zumbe, wantu woseni wakuzunguluka nakukufintafinta."

46 Mna Yesu agamba, "Kuna mntu yumwenga anikufize, sibunkula kwaviya nguvu zinilawa." 47 Yudya mvyele kawona kugamba kabunkulwa, Elo eza akazingiza nakwedula hasi he viga vya Yesu. Mwa meso ya chila mntu, akamgambila ivyo vilekile akamkufya na vilekile kahonywa aho. 48 Yesu niyo amgamba, "Mwanangu, uzumizi wako ukuhonya. Jenda na utondowazi."

18 Umo Yesu akalonga vino, mkulu yumwenga wa Chiyahudi ambasa, amfikila madi na kugamba, "Mwanangu wa chiche kabanika. Mna so ujeleke mikono yako mwakwe, natende mjima."

19 Ivyo Yesu afosa nakumtimila, wanampina wakwe nawo waita hamwenga naye.

23 Niyo Yesu aita kukaya kwa yudya mkulu. Eze awone wantu wakachema nchemo za ndilo kuno fyo dya wantu wakatula lwasu, 24 agamba, "Chila yumwenga afose! Yuno mwana chiche habanike, kata kugona du!" Niyo wose wamseka. 25 Mna wantu weze wafose, Yesu niyo engila mwe chumba nachina umwana uyo, amtoza mkono, umwana naye achimala.

22 Alaila mntu yumwenga akwitangwa Yailo, yumwe mwe wakulu we nyumba yo kuvikila Chohile. Eze amwone Yesu, amfikila madi, 23 amlombezesa akamgamba, "Mwanangu ywa chiche ehaguhi na kubanika. Nakulombeza chite, ukamjelekele mikono ahone atende mjima."

24 Yesu aitanya na Yailo. Fyo dya wantu niyo dyamtimila Yesu na kumfintafinta.

38 Weze wabule kwa yudya mkulu ywe nyumba yo kuvikila, Yesu awona wantu hewekwivana, naho eva wakwila na kulomboleza. 39 Yesu engila mnyumba, awagamba, "Nimbwani hamkwivana naho mwaila? Umwana habanike, kata kugona du!"

40 Mnalo wamseka, niyo awalavya wose kuse, awaguha tati ya mntu na mami yakwe na wadya wanampina watatu. Wengila kwe chumba wamwikiye yudya umwana. 41 Amtoza mkono amgamba, "Talita koumi!" Nukokugamba, "Mndele, nakugamba inuka!"

42 Ahadya mndele yudya niyo achimala na kukonga kujenda. Mndele yudya nana mihilimo mlongo na midi. Ize ilaile ivyo, chila yumwenga niyo ehelwa vidala.

31 Yesu niyo ajendeleza kulonga, "Vino wantu wa dyelo nadaha kuwaliganya na mbwani? Waligana na mbwani? 32 Waligana na wana wekale he gwilo. Bunga dimwenga dyagutila kwa tuhu, ‘Chawachemelaga wila wa nyinka, mna hamwavinaga! Chachemaga wila wa ndilo, mna hamwiile!’ 33 Yohana Mta kubatiza nakeza hekudya naho hakunywa divai, mwagambaga, ‘Ana mpepo!’ 34 Mwana Mntu ezaga, naakadya na kunywa, niyo mwagamba, ‘Mkauleni yuno mntu! Aungisa kudya, naho ni mkozi, mbuya ywa wachisanya kodi na wata masa!’ 35 Mna ubala wa Chohile uwoneka wedi naho wachindedi kwa wadya woseni wakuuzumila."

36 Mntu yumwenga Mfalisayo amgoneke Yesu mwe nkande ya chisingi. Niyo Yesu aita kwe kaya ya Mfalisayo uyo, ekala na kudya. 37 Mwo umzi udya, nakuna mvyele mta masa. Keva kugamba Yesu naakadya mwe kaya ya Mfalisayo uyo, ivyo aguha kasupa kamemile mavuta ya kupwepweleka vitana.

41 Akaheza niyo eza mntu yumwenga akwitangwa Yailo, nani mntu mkulu mwe nyumba yo kuvikila. Kedula hasi mwe viga vya Yesu na kumlombeza aite kwakwe, 42 kwaviya mwanawe ywa chiche ywe ichedu mta mihilimo mlongo na midi, na akabanika.

Umo Yesu akaita uko, fyo dya wantu na dikamfinta.

49 Umo Yesu achei akulonga mbili izo, msigilwa yumwenga eza kulaila kwa yudya mkulu akwitagwa Yailo we nyumba yo kuvikila. Amgamba Yailo, "Mwanawo kabanika," "usekumjela kivuzovuzo mhinya naho."

50 Mna Yesu eze eve ivyo, amgamba Yailo, "Usekogoha, zumila du, nahone."

51 Yesu eze abule kwe nyumba ya Yailo, haungile engile kunyumba na mntu mna Petulo, Yohana, na Yakobo, na tati ya mtu na mami ywa mwana. 52 Wantu wose nendile wakaila nakulomboleza kwa chausa cho mwana. Yesu agamba, "Usekwila, mwana habanike katakutongomala du!"

53 Wose niyo wamseka, kwaviya nawamanya kugamba kabanika. 54 Mna Yesu niyo amtoza umkono na kumwitanga kwa izwi, "Chimala, mwanangu!" 55 Muye wakwe umuwiya, niyo achimala ahadya, Yesu niyo awaunga wamwinke chintu cha kudya. 56 Welesi wakwe weheleswa, mna Yesu kawalagisa wasekugambila mntu yeyose chilaile.

1 Mntu yumwenga akwitangwa Lazalo, mkaya wa Besaniya endaga mnyonje. Besaniya wendaga mzi ekale Maliyamu na lumbudye Matha. 2 Maliyamu nani lumbudye dya Lazalo. Naho nuyo amkulugute Zumbe mavuta ya kupwepweleka mwe viga na kumhangusa ne zifili zakwe. Nani mlukolo ywawo Lazalo endaga mnyonje. 3 Ivyo awo walumbuze dya Lazalo wasigila ulosi kwa Yesu kugamba, "Zumbe, mbuyaye ukumunga ni mnyonje."

4 Yesu eze eve ivyo, agamba, "Unyonje uwo suwo wa file, mna ulaila chani Chohile atogolwe, kalumwa chani kwa sila iyo Mwana Mntu atogolwe."

5 Yesu nakamunga Matha, lumbudye Maliyamu, hamwenga na Lazalo. 6 Eze eve imbuli kugamba Lazalo ni mnyonje, Yesu ajendeleza kwikala hantu aho endaga kwa mazuwa maidi yongezekele. 7 Akaheza awagamba wanampina wakwe, "Chiteni vituhu Yudeya!"

8 Wanampina wamgamba, "Mhinyi, chipindi chijihi du chijinkile Wayahudi nawaunga wakukome kwa mayuwe, weye nawe waunga wite uko vituhu?"

9 Yesu ahitula, "Togola, saa za msi sizo mlongo na mbili? Mntu akajenda nomsi hakudaha kukowadika, kwaviya awona ulangazi we isi ino. 10 Mna mntu akajenda nechilo nakowadike, kwaviya ulangazi haumuli mndani mwakwe." 11 Yesu eze abinde kulonga milosi iyo, awagamba, "Mbuyangu Lazalo kagona, mna miye nanite hamwinule."

12 Wanampina wakwe wamgamba, "Zumbe, uneva kagona, nahone."

13 Yesu nakalonga kugamba Lazalo kabanika, mna wanampina wakwe nawakagamba nakalonga mwe kugona ntongo. 14 Yesu niyo awagambila pwipwipwi, "Lazalo kabanika.

23 Yesu akwela mwe ngalawa, wanampina wakwe nawo waita naye. 24 Aho wimbi kulu dyatowa idiziwa, ngalawa neimwe nkondo ya kudidimila. Mna Yesu na kagona. 25 Wanampina wambasa wamwinula. Wamgamba, "Zumbe! Chikombole. Chafa!"

26 Yesu ahitula, "Ni mbwani mkogohesa? Chindedi uzumizi wenyu nimdodo!" Niyo enuka na kukwahila inkung’unto namawimbi vinyamale, niyo kwatenda kwa ziziwalisa.

27 Chila yumwenga kehelwa. Wagamba, "Yuno ni mntu ywani? Hata nkungunto na mawimbi vyamwiva!"

15 Chisingi chize chingile, wanampina wakwe wambasa, wagamba, "Hano ni holuwala, na saa nayo ijinkisa. Laga idifyo waite kwe zikaya zawo, wakegwile nkande zawo."

16 Yesu ahitula, "Wasekwita, wenkeni nyuwe nkande."

17 Wamhitula, "China migate mishano na samaki mbili."

18 Yesu agamba, "Nigailani hano." 19 Adyunga idifyo dikale mwa mani, aguha idya imigate mishano na ziya izisamaki izimbili. Asinya kulanga kwembingu, ajimbika, aibesula idya migate, awenka wanampina, wanampina wawenka awantu. 20 Chila yumwenga kadya niyo eguta. Niyo walogota vibesu vya migate vigwele hasi, wamemeza ntangulu mlongo na mbili. 21 Wadya wadile na ni wagosi wakubula magana milongo mishano, ukaleka wavyele na wana.

25 Mgati mwe saa chenda na saa mlongo na midi chilochilo Yesu awabasa wanampina akajenda mlanga mwa mazi.

32 Yesu niyo awetanga wanampina wakwe, nakuwagamba, "Nawafila mbazi wantu wano, kwaviya watenda na miye kwa mazuwa matatu naho haluse hawana cha kudya. Sikuvyunga waite siwalisize, sima wanagwe mteho mwe sila."

33 Wanampina wamuza, "Nachilavye kuhi nkande ikuchinta kulisa idifyo dino mo uluwala luno?"

34 Yesu auza, "Mna migate mingahi?"

Wahitula, "Mfungate na samaki njeche."

35 Ivyo Yesu adyunga idifyo wekale hasi. 36 Niyo aguha idya migate mfungate na ziya zisamaki, amhongeza Chohile, abesula, niyo awenka wanampina, wanampina nawo wawenka awantu. 37 Woseni wadya niyo weguta. Niyo wanampina walogota vibesulo vya migate vigwele hasi wamemeza ngahu mfungate. 38 Wantu wadile wabula magana mlongo milongo mine ya wagosi, ukaleka wavyele na wana.

24 Umo Yesu na wanampina wakwe weze wabule Kapelinaumu, wachisanya kodi ya nyumba nkulu ya Chohile wambasa Petulo nakumuza, "Togola! Mhinyi ywenyu alavya kodi ya Nyumba ya Chohile?"

25 Petulo ahitula, "Chindedi, alavya."

Petulo eze engile kwe nyumba, Yesu akonga kulonga, agamba, "Wagaze, Simoni? Ni yuhi akuliha makanto hegu kodi kwa maseuta we isi ino? Wakaya we isi hegu wajeni?"

26 Petulo ahitula, "Wajeni."

Yesu ahitula, ni vyedi, "Nikugamba wakaya hawakuliha kodi. 27 Mna sivyo vyedi kuwaihiza wantu wano. Elo hitani kwe diziwa mkadule ndwano mwa mazi. Samaki ya nkongo no gwize, ugubule mlomo wakwe, na ubwile tundu dya hela dikuchinta kulihila kodi yetu suwe waidi."

18 Umo Yesu emwesila akauya komzi nomtondo nakalumwa nisala. 19 Awona mtini umwenga mnkanda mwe isila, niyo aubasa mna kaubwila hewina tunda dyodyose, na mani ayodu. Ivyo augamba, "Haweleke naho matunda mazuwa yose!" Aho udya umtini unyala.

20 Wanampina weze wawone niyo wehelwa, wauza, "Umtini uno usunguza kunyala vivihi?"

21 Yesu ahitula, "Nawagambilani chindedi, uneva mnazumila hemwina nkama, namdahe kudamanya vino nidamanye mo mtini uno. Naho sivyo vino du, mna namdahe hata kulonga ko lugulu luno, ‘Ng’oka ukedule mwe bahali,’ naho navitende ivyo. 22 Uneva mwazumila, namhokele chochose mkulombeza mo kumlombeza Chohile."

37 Kulaila nkung’unto, mawimbi ya mazi yajubwanisa ingalawa, nayo yakonga kumema mazi.Ngalawa ikujubwaniswa ni nkung’unto 38 Yesu na ekunyuma kwe ngalawa, kagona mtwi wakwe wigama mwe mto. Wanampina wakwe wamwinula na kumgamba, "Mhinya, vino hukuwona chasila?" 39 Yesu niyo achimala, akwahila idya inkung’unto na kuyagamba mawimbi, "Tongomalani dwi!" Elo inkung’unto niyo yanyamala, niyo kwaziziwala.

40 Yesu awauza wanampina wakwe, "Nimbwani mkogoha? Hamnati kutenda na uzumizi?"

41 Mna wengila woga utendese, walosana wenye, "Yuno ni mntu ywani? Hata mpeho na mawimbi vyamwiva!"

35 Umo dikahunga, wadya wanampina wambasa na kumgamba, "Hano chili chi he nyika, zuwa nadyo dyaswa. 36 Walage wantu waite mwe zinkonde ne zikaya zimjihi wakagule chochose cha kudya."

37 Yesu awahitula, "Wenkeni nyuwe nkande wadye."

Wamuza, "Wonga chikagule migate ya hela zilozize zikulihwa mndima kwa miezi mnane hela miezi mnane hegu hela ya dinali magana maidi, chiwenke wadye?"

38 Yesu awauza, "Mna migate mingahi? Hitani mkakaule." Weze wamanye, wamgamba, "Kuna migate mishano na samaki mbili."

39 Yesu niyo awagamba wanampina wakwe wawagambile wantu wekale mabungabunga mwa mani maisi. 40 Wantu niyo wekala hasi mwe mabungabunga hano maganagana, hano mwe milongo mishanoshano. 41 Niyo Yesu aguha idya migate mishano na ziya samaki mbili, asinya kulanga kwembingu na kumjimbika Chohile. Aibesula idya migate na kuwenka wanampina wakwe wawenke wantu. Awapangila wantu wose na wadya wasamaki waidi. 42 Chila yumwe kadya na kwiguta. 43 Wanampina walogota mabesu ye migate na samaki yasigale ntangulu mlongo na mbili. 44 Wagosi awodu wadile nendile ni magana milongo mishano.

48 Awawona wadya wanampina wakwe wakavumba mwe ngalawa, kwa viya nawakahigana na nkung’unto. Mavukuvuku, awalaila kuno akajenda mlanga mwa mazi. Nakaunga awajinke, 49 mna weze wamwone ajenda mlanga mwa mazi, waguta, wakafanyanya ni chizuli. 50 Wose niyo wengila woga weze wamwone.

Ahadya Yesu alonga nawo, awagamba, "Msekogoha! Ni miye! Kwenkeni moyo!" 51 Aho eingila mwe ingalawa umo naweli, na inkung’unto niyo yaleka. Wanampina wose wehelwa vitendese

1 Mwa mazuwa ayo fyo tuhu dya wantu dyechisanya vituhu. Weze wantu watende hawana nkande, Yesu awetanga wanampina wakwe, awagamba, 2 "Nawafila mbazi wano wantu kwa viya wekala na miye mazuwa matatu, naho vino haluse hawana nkande. 3 Uneva ninawalaga wauye kaya hewedile, nawagwe mteho mwe sila, kwaviya watuhu walawa hale."

4 Wanampina wakwe wamuza, "Hano he nyika mntu akudaha kuchinka nkande ya kuchinta kulisa wantu woseni wano?"

5 Yesu awauza, "Mna migate mingahi?"

Wamhitula, "Mfungate,"

6 Awagamba wantu wekale hasi. Aguha idya migate mfungate, amjimbika Chohile, niyo aibesula besula, na kuwenka wadya wanampina wakwe wawapangile wantu, niyo watenda ivyo. 7 Naho nawana samaki njeche. Yesu azijimbika na kuwagamba wanampina wawapangile seiviya. 8 Wose wadya niyo weguta. Vikaheza wanampina walogota vibesulo vigwele, wamemeza ntangulu mfungate. 9 Wantu wadile wendaga magana milongo mine. Akaheza awalaga,

12 Zuwa ditimile umo wakauya kulawa Besaniya, Yesu nakalumwa ni sala. 13 Kwa hale awona mti ukwitangwa mtini utimile mani, aubasa hegu napate tini. Mna eze abule haguhi, abwila mani ayodu kwaviya nasicho chipindi chakwe cha kweleka. 14 Yesu augamba umtini uwo, "Kukongela vino dyelo kubula mazuwa yose hahana nadye tini kulaila kwako naho!." Wanampina wakwe niyo wamwiva viya alongile.

20 Zuwa ditimile nomtondo, umo wakajenda mweisila, wawona udya mtini uligitwe ni Yesu unyala woseni kukongela kwa amaizi. 21 Petulo akumbuka chilaile na kumgamba Yesu, "Mhinyi, kaula umtini udya uligite unyala!"

22 Yesu awahitula, "Mzumileni Chohile. 23 Nawagambilani chindedi, mntu yoyose analugamba lugulu luno, ‘Hita ukedule mwe bahali,’ naye hena nkama mo moyo wakwe, mna zumilani kugamba chiya alongile nachilaile, navitendeke kwakwe. 24 Kwa chausa icho nawagambilani, mkavika na kulombeza chintu chochose, zumilani kugamba mchihokela, nanywi namwinkigwe chiya mkunga. 25 Nanywi mkalombeza, hegu kuna mntu awatendeleni wihi, musizeni wihi wakwe, chani Tati yenyu wa kwembingu naye awausizeni wihi wenyu.

1 Zuwa dimwenga Yesu achimalaga hankanda hedi ziwa dya Genesaleti. Wantu walozize nawammemela na kufintana kwita kwakwe kwetegeleza ulosi wa Chohile. 2 Awona ngalawa mbili zijeile nanga mpwani, walowa wazasa nawakasunta izinyavu zawo. 3 Yesu engila mwe ngalawa imwenga yendaga ya Simoni niyo amgamba aigale hale hadodo na mpwani. Akajika ekala mwe ingalawa iyo na kuhinya fyo dya wantu.

4 Eze abinde ukuhinya, amgamba Simoni, "Igale halehale ingalawa kwa mazi amatali, niyo weye hamwenga na mbuyazo mziseleze izinyavu zenyu mlowe samaki."

5 Simoni amhitula, "Zumbe," "chilowa chilo chijima mna hachipatile chochose. Mna hegu weye walonga seivyo, naniziseleze izinyavu." 6 Weze waseleze izinyavu niyo walowa samaki zilozise naho izinyavu niyo zakonga kukantika. 7 Ivyo wawatagusa weyawe wadya nawe mwe ingalawa intuhu weza wawambize. Weza na kumemeza samaki mwe zingalawa zoseni mbili na zimeme niyo zakonga kudidimila. 8 Simoni Petulo eze awone ayo yalaile, amfikila madi Yesu na kumgamba, Zumbe! "Halawe hangu, miye ni mta masa!"

9 Simoni na wose wendile wehamwenga naye niyo weheleswa kwa chausa che zisamaki walowile. 10 Seiviya weyawe dya Simoni, Yakobo na Yohana, wana Zebedayo nawo wehelewa. Yesu amgamba Simoni, "Usekogoha, kukongela vino haluse nautende mlowa wantu."

11 Elo walavya izingalawa zawo mwa mazi na kuzibuza mpwani. Waleka chila chintu na kumtimila Yesu.

22 Zuwa dimwenga Yesu nakakwela mwe ngalawa hamwenga na wanampina wakwe. Niyo awagamba, "Chiteni ntendele ntuhu ye idiziwa." Ivyo wakonga kwita. 23 Umo wendile mwe ngalawa wakaita, Yesu niyo agona ntongo. Aho nkung’unto nkulu yavumila mwe diziwa, niyo ingalawa yakonga kumema mazi, woseni nawe mwe chilozo chikulu. 24 Elo wanampina wakwe niyo wamwinula wakamgamba, "Zumbe, Zumbe! Chafa!"

Yesu eze enuke, niyo akwahila idya inkung’unto na amawimbi ya mazi, niyo vya nyamala. 25 Niyo awagamba wanampina wakwe, "Uzumizi wenyu nuhi?"

Mna wehelwa na kogoha kuno wakagambilana, "Yuno ni mntu ywani? Alonga na nkung’unto namawimbi navyo vyamwiva!"

22 Zuwa dimwenga Yesu nakakwela mwe ngalawa hamwenga na wanampina wakwe. Niyo awagamba, "Chiteni ntendele ntuhu ye idiziwa." Ivyo wakonga kwita. 23 Umo wendile mwe ngalawa wakaita, Yesu niyo agona ntongo. Aho nkung’unto nkulu yavumila mwe diziwa, niyo ingalawa yakonga kumema mazi, woseni nawe mwe chilozo chikulu. 24 Elo wanampina wakwe niyo wamwinula wakamgamba, "Zumbe, Zumbe! Chafa!"

Yesu eze enuke, niyo akwahila idya inkung’unto na amawimbi ya mazi, niyo vya nyamala. 25 Niyo awagamba wanampina wakwe, "Uzumizi wenyu nuhi?"

Mna wehelwa na kogoha kuno wakagambilana, "Yuno ni mntu ywani? Alonga na nkung’unto namawimbi navyo vyamwiva!"

26 Yesu hamwenga na wanampina wakwe wajendeleza ne ntambo. Niyo wabula kwe isi ya Gelasi imwe ntendele ntuhu ye diziwa dya Galilaya.

12 Umo zuwa dikakonga kuswa, wadya wanampina wakwe mlongo na waidi wambasa nakugamba, "Lagana na wano wantu chani waite, kwe imizi na kwezinkonde zimjihi wakalonde nkande na hantu ha kugona kwa viya hano chili hechedu."

13 Mna awagamba "Wenkeni nyuwe wenye chintu cha kudya."

Wahitula, "Chinanayo ni migate mishano na wasamaki waidi. Waunga chikagule nkande ya fyo jima?" 14 Nahana wantu wakubula magana milongo mishano

Yesu awagamba wanampina wakwe, "Wagambeni wantu wekale mwe mabunga ya wantu milongo mishano shano."

15 Wanampina weze wabinde kudamanya niyo wantu wekale hasi, 16 Yesu niyo aiguha idya imigate mishano na wadya wasamaki waidi, asinya kulanga, amjimbika Chohile, aibesula, awenka wanampina wawasangile wantu. 17 Woseni wadya niyo weguta, wanampina walogota ntangulu mlongo na mbili za viya visigazwe.

1 Zuwa dya katatu nakuna nyinka mo mzi wa Kana uko Galilaya. Mamiyakwe Yesu endaga aho, 2 Yesu hamwenga na wanampina wakwe nawo wagonekagwa mwe inyinka iyo. 3 Divai eze isile, nine Yesu amgamba, "Divai iwasila!"

4 Yesu ahitula, "Mnala, usekunigambila dya kudamanya, chipindi changu hachinati."

5 Aho mamiyakwe awagambila wandima, "Damanyani dyodyose nawagambileni."

6 Aho na hana mabiga mtandatu yadamanywe kwa mayuwe, chila dimwe nadikaguha madebe mashano vino, mazwela yakutimilwa ni Wayahudi mwe kwelengusa. 7 Yesu awagamba wandima, "Memezani mazi amabiga yano." Wayamemeza, 8 niyo awagamba, "Tekani mazi mmwigaile mkulu ywe ngasu". Wamwigaila mazi, 9 mkulu ywe ngasu eze ayalume yahitukila kutenda divai. Havimanyaga mazi yano uko yalaile, kwaviya wandima watekile amazi nawavimanya, ivyo niyo amwitanga umwali, 10 amgamba, "Chila mntu alavya divai yedi nkongo, hadya wagonekwe wakatenda wanywelesa, alavya idya isokele. Mna weye kuika idivai iyedi kubula vino haluse!"