18 Nagara ubbaa atto yaagey, attida ba asaa naaquwa taybonnay ne mela Xoossi oonee? Maarotethi nena ufaysiya gisho ne hanquwan merinaw gam7a eraka.

1 Abeeti Xoossaw, ne merinaa siiquwada tana maara;

ne qadheta daruwa mela ta nagaraa qucha.

2 Ta iitatethaafe tana meecca;

ta nagaraape tana geeshsha.

6 Abeeti Godaw, benipe de7iya

ne qadhiyanne ne keehatetha hassaya.

7 Ta na7atetha nagaraanne iitaba hassayopa;

abeeti Godaw, ne keehatethaanne lo77otetha hassaya.

1 Godaw, taani meto ciimmon de7ashe,

neeko waassayis.

2 Godaw, ta waasuwa si7a;

ta woosa ne haythay hayzo.

11 Godaw, ne maarotethaa taape haassofa;

ne siiqoynne ne tumatethay,

tana ubba wode naago.

6 Ne keehatethaynne ne maarotethay

ta de7o laytha ubban tana kaallana;

taani Godaa keethan merinaw daana.

13 Aawi ba naytas qadheteysada,

Goday baw yayyeysatas qadhetees.

15 Shin Xoossaa aadho keehatethay Addaame nagaraa mela gidenna. Issi asa nagara baggara daro asay hayqis. Shin Yesuus Kiristoosa baggara Xoossaa aadho keehatethay asa ubbaas daridi imetis.

15 Yaatin, nu woyganee? Higgefe garsan gidonashin, Xoossaa aadho keehatetha garsan de7iya gisho nagara oothaneyee? Akay!

4 Shin Xoossaa gita maarotethaafenne nuus de7iya gita siiquwape dendidaysan, 5 hari attoshin nuuni nu qohuwan hayqidi de7ishin Kiristoosa baggara nuus de7o immis. Hinteka attiday Xoossaa aadho keehatethaana.

9 Shin Goday, "Ta wolqay ne daaburan qonciya gisho ta aadho keehatethay new gidana" yaagis. Kiristoosa wolqay tanan qoncana mela ta daaburan ufaytashe ceeqetayis.

13 Ba nagaraa genthiya asi aacenna;

shin paaxeynne nagara aggey maarota ekana.

7 Iita asi ba ogiyape simmo;

nagaranchoy ba qofaa aggo.

Godaako simmo, ika iya maarana;

I nu Xoossaako simmo, iyaw atto gaana.

18 Shin Goday hintew keehanaw naagees; Goday xillo pirdiya Xoossi gidiya gisho hintew qadhetanaw dendana. Iya ammanetidi naagiya ubbay anjetidaysata.

13 Shin hinte bidi, ‘Taani hinte yarshuwa gidonashin hinte harata maarana mela koyayis’ geetetidi xaafetidaysi ay guusseko erite. Ayis giiko, taani nagaranchota xeeganaw yasipe attishin, xillota xeeganaw yabiike" yaagis.✝

21 He wode Phexroosi Yesuusako yidi, "Godaw, ta ishay tana qohiko aapun toho taani atto gaanaw bessii? Laapun toho gakanaaseyee?" gidi oychis.✝

22 Yesuusi zaaridi, "Gidenna, laapun tammu toho laapunape attishin, laapun toho gidenna.✝

14 "Hinte hintena qohidaysata atto giiko, salon de7iya hinte Aaway hinte qohuwaka atto gaana.✝

31 Shin neeni keehanne maariya Xoossi gidiya gisho, ne gita maarotethan enta aggabaaka; burxora dhaysabaka.

5 Keehatethan coo tal7iya uraas,

ba oosuwa suuretethan oothiya uraas

keehabay yaana.

17 Godaa nu Xoossaa keehatethay nu bolla gido;

nu kushe ooso ubba nuus ayfisa;

Ee, nu kushe ooso ubbaa ayfisa.

16 Hiza, maarotethaa ekanawunne maade koshshiya wode aadho keehatetha demmanaw aadho keehatethay de7iyasuwa Xoossaa araatako yayyonna shiiqoos.

1 Hiza, ta ishato, hinte, hinte asatethaa Xoossaa ufaysiya, de7onne geeshsha yarsho oothidi, immana mela taani hintena Xoossaa maarotethan woossayis. Xoossaa hinte goyinnanaw bessiya tuma ogey hessa.

16 Xoossaa Na7aa ammaniya ubbay merinaa de7uwa laattanaape attishin, dhayonna mela Xoossay ha alamiya daro dosida gisho ba issi Na7aa immis.

29 Kiristoosas oothiya qaaday hintew imetiday, hinte iya ammanana mela xalaala gidonashin hinte iya gisho meto ekana melasa.

1 Hizqiyaasi Godaa Isra7eele Xoossaa Paasika Ba7aale bonchanaw Yerusalaamen de7iya Xoossa keetha Isra7eele asaynne Yihuda asay yaana mela kiittis. Qassi, Efreema asaasinne Minaase asaas dabdaabe xaafis. 2 Kawoy, halaqatinne Yerusalaamen shiiqida asa ubbay Paasika Ba7aale nam7antho ageenan bonchanaw qofa qachidosona. 3 Gidiya kahineti bantana geeshshiboonna gishonne daro asay Yerusalaamen shiiqiboona gisho asay Paasika iya woden bonchanaw danda7ibookona. 4 He qofay kawanne shiiqida asaa ufaysis. 5 Hessa gisho, Godaa Isra7eele Xoossaa Paasika Yerusalaamen bonchanaw Barsaabepe doomidi Daane gakanaw de7iya Isra7eele asa ubbay yaana mela awaajanaw qofa qachidosona. Ha Paasika Baaliya kase higgiyan xaafetidaysada daro asi bonchibeenna.

6 Kawoy kiitan, kiitetidaysati, kawanne shuumata dabdaabiya ekidi Isra7eelenne Yihuda ubbaa bidosona.

Dabdaabey haysada yaagees; "Isra7eele asaw, Asoore kawa kushepe attida hinteko simmana mela hinteka Godaako, Abrahaame, Yisaaqanne Isra7eele Xoossaako simmite! 7 Hinte kase be7idaysada enta bores aathidi immana gakanaw banta Godaas, banta aawata Xoossaas ammanetibona hinte aawatadanne hinte ishatada hanopite. 8 Hinte Godaas kiitetite; kase hinte aawatada si7ishe ixas goopite! Hintenatethaa Xoossas immite. Goday merinaw geeshshida Xoossa keethaa yiite. Godaa hanqoy hintefe simmana mela Godaa hinte Xoossaa goyinnite. 9 Hinte Godaako simmiko hinte ishatinne hinte nayti bantana di77idaysata sinthan maarota demmidi ha biitta simmana. Goday hinte Xoossay qadheteysanne maareysa gidiya gisho hinte iyako simmiko ba som7uwa hintefe qosenna" yaagis.

10 Kiitetidaysati Efreemanne Minaase biitta kanthidi Zabloona biitta gakanaw katamaape katamaa bidosona. Shin he katamatan de7iya asay enta kadhidi enta bolla miicidosona. 11 Gidoshin, Aseerape, Minaasepenne Zabloona guutha asati bantana kawushidi Yerusalaame yidosona. 12 Kawoynne kawa shuumati Godaa qaala maaran kiittidaysa polanaw issi wozanan gidana mela Xoossa kushey Yihuda bolla de7ees.

13 Nam7antho ageenan Uytha Ba7aale bonchanaw daro asi Yerusalaamen shiiqis. 14 Enti dendidi, Yerusalaamen de7iya yarsho bessata laallidi, ixaane cuyisiya miishe ubbaa diggidi, Qediroona Zangaaran yeggidosona. 15 Nam7antho ageenan, tammanne oyddantho gallasan Paasika dorsaa shukidosona. Bantana geeshshiboonna kahinetinne Leeweti yeellatidi, bantana geeshshidosona; xuussa yarsho Xoossa keethi ehidosona. 16 Xoossa asi gidida Muse wogaada Xoossa keetha giddon banta bessan bessan eqidosona; kahineti Leeweta kushepe ekida suuthaa dharcidosona.

17 Asaa giddofe daroti bantana geeshshiboonna gishonne dorsata shukonna mela digetida gisho Leeweti entaw Paasika dorsata shukidosona. 18 Efreemape, Minaasepe, Yisakoorapenne Zabloona kochaafe daro asay higgey kiitteysada bantana geeshshiboonnaba gidikoka Paasika Ba7aale gibira midosona. Gidoshin, Kawoy Hizqiyaas, "Abeeti keeha Godaw, 19 higgey kiitteysada haysati bantana geeshshonnaba gidikoka enti nena Godaa, banta aawata Xoossaa koyanaw banta wozanaa giigisida gisho ne entaw atto yaaga" yaagidi woossis. 20 Goday Hizqiyaasa woosa si7idi entaw atto gis.

21 Yerusalaamen shiiqida Isra7eele asay laapun gaalasi kumethi Uytha Baaliya gita ufaysan bonchidosona. Leewetinne kahineti yetha miishen yexishe gallas gallas Godaa galatoosona. 22 Hizqiyaasi Godaa goyinno wogaa kaaleson eretida Leeweta minthethis.

Asa ubbay issifetetha yarsho yarshishe, Godaa banta aawata Xoossaa galatishe, mishenne uyishe ba7aale laapun gallas bonchidosona. 23 Shiiqoy hara laapun gallas gujidi ba7aale bonchanaw zore qachidi laapun gallas ufaytidi bonchidosona. 24 Yihuda kawoy Hizqiyaasi yarsho yarshanaw issi mukulu kormata, laapun mukulu dorsatanne deeshata asaas immis; qassi halaqati issi mukulu kormatanne tammu mukulu dorsata asaas immidosona; daro kahineti bantana geeshshidosona. 25 Yihuda asay, kahineti, Leeweti, Isra7eelepe yida asay, ba7aale bonchanaw yida bete asaynne Yihuda biittan de7ida asa ubbay ufaytidosona. 26 Dawita na7aa, Isra7eele kawa Solomone wodiyape doomin hachi gakanaw Yerusalaamen hessa mela ba7aaley bonchetidi eronna gisho Yerusalaamen asay daro ufaytidosona. 27 Kahinetinne Leeweti dendidi, Goday asaa anjana mela woossin Xoossay salon, ba de7iya geeshsha bessan enta woosa si7is.

1 "Issi asi ba machiw yeddin, iya bada hara azina geliko, he addey iyo zaarii? Zaariko he biittay tuna gidennee? Shin ne laymatanaw koyada daro laggethotara de7adasa; ha77i neeni taako simmanee? yaagees Goday 2 Dhoqu gada aykoy bayna dereta xeella. Laymatanaw ne zin7aboona bessi de7ii? Arabe asi mela biittan utteysada, neeni laggethota naagada oge doonan uttadasa. Ne laymatethaninne ne iitatethan biitta tunisadasa. 3 Hessa gisho, torche iray teqetis; sila irayka bukonna ixis. Hessi haninka, new laymatetha medhoy de7ees; ne yeellatonna ixadasa. 4 Ha77i neeni, ‘Ta aawaw, ta na7atetha laggiyaw ne tana siiqasa. 5 Ne ubba wode yilotay? Ne hanqoy merinaw aggennee?’ yaagasa. Shin ne oothanaw danda7iya iita ubbaa oothaasa" yaagees Goday.

6 Kawa Iyosyaasa wode Goday taako haysada yaagis: "Ammanoy bayna Isra7eeley oothidaba ne be7adii? Iya dere bollanne daashsha mitha ubbaa garsi bada yan laymatasu. 7 Iya haysa ubbaa oothinka taako simmande gada qopas, shin simmabuuku. I michiya, ammanetona Yihudika hessa be7asu. 8 Ammanoy bayna Isra7eele daro wode laymatida gisho pirima immada iyo yeddas. Hessi haninka Isra7eele michiya, ammanetona Yihudi, yayyonnaysa ta be7as; iyaka keyada laymatasu. 9 Laymatethay iw laafaba gidiya gisho, mitharanne shuchara laymatada biitta tunisasu. 10 He ubban I michiya, ammanetona Yihudi simmidaba daanawusupe attishin, kumetha wozanape taako simmabuuku" yaagees Goday.

11 "Ammanetona Yihudape ammanoy bayna Isra7eeley xillo. 12 Bada pudeha baggan de7iya asaas haysada yaagada awaaja: ‘Ammanoy bayna Isra7eele, simma! Taani maaroti kumida Godaa gidiya gisho nena iita ayfen xeellike. Merinaw hanqetike’. 13 Gidoshin, ‘Taani Godaa, ta Xoossaa bolla makallas. Allaga xoossatara daashsha mitha garsan laymatas. Ne qaala kiitetabike’ gada ne qohuwa ammana" yaagees Goday.

14 "Hinteno, ammanetona asaw, ta hintew azina gidiya gisho simmite. Taani issi katamape issinno, issi yarape nam7a doora ekada Xiyoone ehana. 15 Ta wozanaada hintena heemmiya henthanchota hintew immana. Enti hintena eratethaninne akeekan heemmana" yaagees Goday.

16 "He gallasatan hinte he biittan dariya wode asay, ‘Godaa caaqo Taabotiya’ gidi odetokona. I entaw qofetenna; hassayetenna; baynaysi entaw eretenna; harika oosetenna. 17 He wode enti Yerusalaame, ‘Godaa Araata’ gidi xeegana. Kawotetha ubbaafe asay Godaa sunthaa bonchanaw Yerusalaame shiiqana. Hessafe guye, enti banta wozanaa iitatethaa kaallokona. 18 He wode Yihuda asaynne Isra7eele asay gahetidi pudeha bagga biittafe ta hinte aawata laatisida biitta issife yaana" yaagees Goday.

19 "Ta hintena na7atho ekada, biitta ubbaafe lo77iyanne aradda biitta hintew immanaw koyas. ‘Ta aawaw’ gidi xeegananne tana kaallana gada qopas. 20 Shin Isra7eele asaw, hinte ba azinaas ammanetona machida taw ammanetibeketa" yaagees Goday.

21 Enti banta ogiya geellayida gishonne banta Xoossaa aggida gisho manqo zumatape Isra7eele asaa waasoynne yeehoy si7etees. 22 "Hinteno, ammanoy bayna asaw, taako simmite. Hinte ammanetana mela ta hintena pathana" yaagees Goday.

Hinte, "Neeni, nu Godaa Xoossaa gidiya gisho neeko simmana. 23 Dereta bollanne zumata bolla eeqa goyinnoy tuma cimo. Tuma Isra7eele atotethay Godaa, nu Xoossaa. 24 Nu na7atethafe doomin, nu aawati daaburidi demmida, enta dorsaanne mehiya, enta maccanne adde nayta yeellayiya eeqati midi dhaysidosona. 25 Na7atethafe hachi gakanaw, nunne nu aawati Godaa nu Xoossaa bolla nagara oothida. Godaa nu Xoossaa qaala kiitetibooko. Hessa gisho, nuuni yeellan gufannanaw qassi kawushatethi afilada nuna kammo" yaagosona.