1 Umbonele libatsi, Ghwe Imulungu,

kwaapfila ghweghwe kwamluso,

ughaleghuse ghamatotso ghangu,

kwaapfila ghweghwe kuna batsi kulu.

2 Unyopfughe ghendo na ukwiha kwangu kwose,

na unitende nyele kwa tsinzambi tsangu.

6 Ukumbuke libatsi lyako,

na uluso wako, ghwe IMNDEWA,

kwaapfila apfo pfabaho kulawa ghumwande.

7 Uleke kukumbuka tsinzambi tsanitendile haning'ali na msongolo,

wala ghamatotso ghangu,

ila unikumbuke kwaapfila ghweghwe kwa mluso,

na kwaapfila ghweghwe IMNDEWA kunogha.

1 Kulawa hasi ihaghendese,

nene nokulilila ghweghwe, ghwe MNDEWA.

2 Ghwe IMNDEWA, tegheletsa litsi lyangu,

uwambe ghamaghutwi ghako ghahulikitse,

ghahukitse chililo changu ichighela libatsi.

11 Ghwe MNDEWA, ughendeleleghe ukumbonela libatsi lyako,

kwaapfila uluso wako na ukulongesa kwako kutsonikinga.

6 Ona ghendo, uluso wako na libatsi lyako pfitsonikoleletsa,

mna ghamatsuwa ghose gha ugima wangu,

na nene nitsokala mna ing'anda ya IMNDEWA kwa matsuwa ghose.

13 Ka apfila aba pfayowonela libatsi iwanaghe,

pfipfo IMNDEWA pfayowonela libatsi iwanu wake,

15 Lekeni ghweko lye Imulungu ng'alighala bae na totso lya Adamu. Mana hata ka iwanu wengi tsawafa kwa totso lya imunu yumwe, Imulungu katsakongetsa uluso wake na ghweko ilikwenela kwa iwanu wengi, kulawa kwa imunu yumwe, iyo Yesu Kiristu.

15 Lelo tulonge choni? Angu tutende ghehile kwaapfila ng'atulongotsighwa na ghamalaghitso bae, ila twolongotsighwa na uluso? Si pfipfo bae!

4 Lekeni Imulungu kana libatsi ng'ani. Tsakatunoghela kwa unoghelo mkulu, 5 hata ka tsatukala ka tufa mnzambi, katutenda tuwe waghima hamwe na Kiristu. Kwa uluso we Imulungu mwemwe mkombolighwa.

9 Lekeni yeye kanongela, "uluso wangu wakwenela, kwaapfila ingupfu yangu yokuwa ng'ulu ghendo hala haulihela ngupfu." Apfo nitseghoda kwa kudeng'elela pfanihungukighwe ngupfu ili ngupfu ya Kiristu ikale mchanya mwangu.

13 Imunu iyopfisa tsinzambi tsake ng'atsomota baye, lekeni ayula iyotsiungama na kutsileka, ayo katsobokela libatsi.

13 Lekeni mghende mkelangulitse mana yake imbuli aino, ‘Nobama libatsi, wala si inambiko baye.’ Kwaapfila sitsile kuwakema iwanu wana ihaki baye, ila wana tsinzambi."

21 Kuya Petiri kamghendela, kamghutsa, "Ghwemtwatsa, apfi ndughu yangu yanitendele matotso mala ngapi, na nene nimleghusile? Hata mala saba?"

22 Yesu kamwidika, "Sikulongela hata mala saba baye, ila hata saba mala sabini,

14 "Kwa apfila, mng'awaleghusila iwanu ghamatotso ghawo, na Aba wenu iyali kulanga pfipfila katsowaleghusilani mwemwe ghamatotso ghenu.

31 Lekeni kwa libatsi lyako ng'uwalekile baye wahupe wala wakomighwe,

kwaapfila ghwehwe kwa Imulungu wa libatsi na uluso.

5 Katsobweda imunu ayula iyowatsima iwanu kwa uluso,

iyotenda ipfinu pfake kwa ihaki,

17 Uluso wa IMNDEWA, Imlungu wetu uwe na twetwe,

na utsimitse ghoya tsisang'ano tsa ghamoko ghetu,

ona, tsisang'ano tsa ghamoko ghetu utsimitse ghoya.

16 Lelo tuchighendele chighoda che undewa che Imulungu yane uluso bila kupfuka, tubokele libatsi na uluso mne chipindi cho ukutwapfila.

1 Apfo ndughu tsangu, kwaapfila Imulungu kana libatsi sideke, nomlombani ghendo mlapfe ughima wenu ka nambiko iili ngima, muwe wahenzeluka na mtende aghala ighamnoghela yeye. Ako kuko ukumtamanila Imulungu kunoghile.

16 Kwaapfila Imulungu tsakaikunda isi yose mbaka kamlapfa Imwanaghe nyalimwe, ili chila munu iyomtoghola yaleke kwagha ila yawe na ugima wa ghamatsuwa ghose.

29 Mana mwing'ighwa nyafwasi ya kumsang'anila Kiristu si kwa kumtoghola kuliyeka bae, ila ne ukudununzika kwaajili yake.

1 Mfalume Hezekia tsakatuma wanu waghende Isiraeli yose na Yuda, kuya kawandikila baluwa wanu wa Manase na wa Efuremu, kawakema watse kuna ing'anda ya IMNDEWA ako Yerusalemu kudeng'elela ichihungo cha Pasaka kwa IMNDEWA, Imulungu wa Isiraeli. 2 Mfalume na iwakulu na iwanu wose wa ghumji ghwa Yerusalemu tsawalamla kudeng'elela chihungo cha Pasaka mna ghumwetsi wa kabili. 3 Ng'awadahile baye kudeng'elela mna ghumwetsi ghwake ka pfawang'ali wotendagha kwaapfila iwatambika iwetendile wela tsawachidogho na iwanu tsang'ana wetingane baye ako Yerusalemu. 4 Apfo chinu achino tsachimnoghelesa mfalume na mtingano ghwose ghwa iwanu. 5 Apfo walamla kutowa lukemo mna isi yose ya Isiraeli, kulawa Beeri Sheba mbaka Dani, iwanu wobamighwa watse Yerusalemu kudeng'elela ichihungo cha Pasaka ya IMNDEWA, Imulungu wa Isiraeli. Ipasaka ikalile na wanu wengi ka awo tsang'ana ideng'elelighwe baye, ka apfila pfayandikighwe. 6 Kwa kulaghitsighwa na mfalume na iwakulu, iwanu iwatumighwe waghenda mna Isiraeli na Yuda yose aku waghala baluwa iyandikighwe apfino;

"Mwemwe wanu wa Isiraeli, imhonile kulawa mna ghamoko gha mfalume wa Ashuru, muye kwa IMNDEWA, Imulungu wa Abrahamu na Isaka na Isiraeli, naye katsakuya kuna mwemwe. 7 Mleke kuwa ka iwahenga wenu na ndughu tsenu, awala iwawile si wakutogholeka baye kwa IMNDEWA, Imulungu wa iwahenga wawo iyawahighile sideke ka pfamkona. 8 Lelo sambi mleke kuwa wasughu ka iwahenga wenu. Lekeni mwilapfe ghendo kwa IMNDEWA. Mtse kuna ing'anda yake iyaitendile ienzeluke matsuwa ghose, mumtumikile IMNDEWA, Imulungu wenu, nayo imaya yake ng'ulu itsakuka imlekeni. 9 Mng'amuyila IMNDEWA, iwanu awala iwawaghoghile ndughu tsenu na iwana wenu watsowonela libatsi na watsowalekelela woye mna isi aino. Kwaapfila IMNDEWA, Imulungu wenu kamluso na kana libatsi. Apfo mng'amuyila, yeye katsowabokela." 10 Apfo iwanu awo wanga kulawa mji ghumwe mbaka mji ghungi mna isi yose ya Efuraimu na Manase, kuya wapfika mbaka Zabuloni. Lekeni wanu wengi wawaseka na kuwabetsa. 11 Hata apfo wanu chidogho kulawa ghamakabila gha Asheri, Manase na Zabuloni watoghola kughenda Yerusalemu. 12 Ngupfu ya Imulungu ing'ali isang'ana mna isi ya Yuda ya kuweng'a ghumoyo ghumwe ghwa kutenda aghala mfalume na iwakulu wake ghawawalaghiste, ka apfila pfayalaghitse Imulungu.

13 Wanu wengi ng'ani wetingana ako Yerusalemu mna ghumwetsi ghwa kabili kudeng'elela chihungo cha ipfighate ipfilihela hamila. 14 Wabomola tsimatsabau ako Yerusalemu, tsimatsabahu tsa ukudusulila upfumba, kuya watsasa hana ulwanda lwa Kidironi. 15 Tsuwa lya kumi na nne lya ghumwetsi agho wachinja iwana wa ng'olo wa Pasaka. Watambika, na Walawi tsawona chinyala, kwa apfila tsang'awetendile wele baye, kuya wetenda wela na waghala nambiko tsa ukulakatsighwa mna ing'anda ya IMNDEWA. 16 Kuya watenda sang'ano tsawo mna ing'anda ya Imulungu ka pfawobamighwa na ghamalaghitso gha Musa munu wa Imulungu. Walawi tsawaweng'a iwatambika idamu ya nambiko, nawo iwatambika waimitsa mna imatsabahu. 17 Iwanu wengi iwetingane aho tsang'awelile baye, apfo Walawi wawachinjila wang'olo wa Pasaka iwanu awo, kuya wawalapfa wang'olo awo kwa IMNDEWA. 18 Iwanu wengi iwatsile kulawa Efraimu, Manase, Isakari na Zabuloni tsang'awelile baye, lekeni waja pfipfo ichihungo cha Pasaka, ing'apfibamighwa baye. Apfo Hezekia kawalombela, kalonga, "Imulungu yunoghile, mleghusile inzambi chila munu, 19 iyoghulapfa ghumoyo ghwake ghwose kukubama ghweghwe IMNDEWA, Imulungu wa iwahenga wake, hata ka ng'elile baye ka pfaghobama ghamalaghitso gha hanu haenzeluke." 20 IMNDEWA Imulungu katoghola chayalombile Hezekia, kawahonetsa iwanu. 21 Waisiraeli wose iwetingane Yerusalemu tsawadeng'elela ichihungo cha pfighate ipfilihela hamila kwa matsuwa saba, aku wodeng'elela sideke. Walawi na iwatambika wang'ali womwimbila Imulungu chila tsuwa kwa ngupfu tsawo tsose. 22 Mfalume Hezekia kawatoghola na kuwaghuma ghumoyo watambika kwaapfila tsawatenda kwa ukumanya ghoya sang'ano ya ukumtambikila IMNDEWA. Waja kwa matsuwa saba mna ichihungo acho, walapfa nambiko tsa ukukala tseghamba, na ukumtunya IMNDEWA, Imulungu wa iwahenga wawo.

23 Iwanu wose walamla kudeng'elela ichihungo acho kwa matsuwa saba ghangi, apfo waghendela kudeng'elela ichihungo acho kwa ghamatsuwa ghangi saba kwa ndeng'elo ng'ulu. 24 Mfalume Hezekia wa Yuda kaweng'a ghumtingano ghwa iwanu ng'ombe wamale elufu imwe, na mene na wang'olo elufu saba. Pipfipfila iwakulu walapfa ng'ombe wamale elufu imwe na ng'olo elufu kumi. Iwatambika wengi tsawetenda wenyegho wele. 25 Ghumtingano ghose ghwa iwanu wa Yuda ghudeng'elela ghendo, tsawadengelela hamwe na Watambika na Walawi, iwenyekaye wa Yerusalemu hamwe na iwagheni iwalawile kunze, iwang'ali wokala Yerusalemu, na iwanu wose iwakalile Yuda. 26 Kukala na ndeng'elelo ng'ulu ako Yerusalem, kwaapfila kulawa hayatawale Selemani mwana wa Daudi, mfalume wa Isiraeli chinu ka acho tsang'ana chilawile baye. 27 Kuya iwatambika na Walawi wawalombela iwanu tsibalaka kwa Imulungu, naye Imulungu kahulika, kwaapfila ghawalombile ghampfikila ako kulanga, hanu hake haenzeluke hayokala yeye.