Misericórdia

18 Wapi Nzambi yina kele mutindu nge?

Yandi yina ke katulaka yimbi,

ke lemvokilaka masumu ya bantu ya yandi yina bikanaka ya moyo.

Nkele ya yandi ke zingilaka ve bantangu nyonso,

samu ti yandi ke zolaka na kulakisa beto luzolo ya yandi ya kukwikama.

Lusambulu samu na kuzwa mulemvo

1 Mukunga ya Davidi, mukunga yina ba twadisaka na mfumu ya miyimbidi. 2 Ntinu Davidi vukisaka mfulu na Bateseba.

Mumbikudi Natane kwendaka tala Davidi mpe Davidi tubaka:

6 Yave, bambuka moyo na kyadi mpe kukwikama ya nge,

yina ke zingilaka bantangu nyonso.

7 Kubambuka ve moyo na masumu ya buntwenya ya munu,

kubambuka ve moyo na kondwa kutumama ya munu!

Kasi bambukila munu moyo mutindu kele kukwikama ya nge,

samu na bumbote ya nge, Yave!

Lusambulu na kati ya mpasi ya kulutila

1 Mukunga ya kuyuluka.

Na kati ya mpasi ya kulutila, mu ke na kubokila nge, Yave!

2 Yave, kuwa ndinga ya munu!

Teka makutu na kuwa,

kubondila yina mu ke na kubondila nge!

11 Mu ke bumbaka ve na ntima ya munu, mambu ya kudedama yina nge me sala na munu.

Mu ke samunaka butsyelika mpe mpulusu ya nge.

Na kati ya mukangu ya nene ya bantu, mu ke bikaka ve na kuzonzila bumbote mpe kukwikama ya nge.

6 Ya tsyelika, buyenge mpe bumbote ke vwanda na munu

bilumbu nyonso ya luzingu ya munu.

Mu ke vutuka dyaka na Yinzo ya Yave

bilumbu nyonso ya luzingu ya munu.

13 Mutindu tata ke fwilaka bana ya yandi kyadi,

Yave ke fwilaka kyadi bantu yina ke zitisaka yandi.

15 Kasi beto lenda kufwanikisa ve bunene ya disumu ya Adami na bunene ya dikabu yina Nzambi ke pesaka ya mpamba. Ya tsyelika, samu na disumu ya muntu mosi, lutangu ya nene ya bantu kufwaka. Kasi bumbote ya Nzambi me lutila nene, mpe dikabu yina yandi pesaka ya mpamba na bantu mingi na lusalusu ya muntu mosi, Yesu-Klisto, me lutila mfunu.

Bandongo ya mambu ya kudedama

15 Yinki dyaka? Mutindu Misiku ke na kuyala dyaka beto ve, kasi bumbote ya Nzambi, ya zola kutuba ti beto fwana kusala masumu? Mpila yina ve!

4 Kasi Nzambi kele ya kufuluka na kyadi yina yandi ke talaka bantu, samu na luzolo ya nene yina yandi zolaka beto, 5 ntangu beto vwandaka ya kufwa samu na masumu ya beto. Yandi pesaka dyaka beto luzingu na Klisto. Ni na bumbote ya yandi beno kuzwaka mpulusu.

9 Kasi yandi zabisaka munu: «Bumbote ya munu me lunga na nge. Lulendo ya munu ke talanaka ya kulutila na kati ya nge ntangu nge ke vwandaka ve na ngolo.» Na yina, mu ke lutila na kusala mayama ntangu mu ke vwandaka na ngolo ve, samu ti lulendo ya Klisto vwanda na munu.

13 Muntu yina ke bumba yimbi ya yandi ke bonga ve, kasi muntu yina ke ndima yimbi ya yandi mpe ke bika na kusadila yawu, yandi ke kuzwa mulemvo.

7 Bika ti muntu ya yimbi kubika mavanga ya yandi,

muntu yina ke salaka yimbi kubika mabanza ya yandi ya yimbi!

Yandi kuvutuka na Yave yina ke fwila yandi kyadi,

yandi kuvutuka na Nzambi ya beto,

yina ke lembaka ve na kulemvokila.

Ntangu ya mpulusu

18 Na yina, Yave ke na kuvingila beno samu na kutala beno kyadi,

ni yawu yina yandi ke telama samu na kutala beno kyadi.

Ya tsyelika, Yave kele Nzambi ya kudedama,

kyese na bayina nyonso ke tulaka kivuvu na yandi!

13 Beno kwenda kulongoka yinki zola kutuba mambu yayi ya Dibuku ya Nzambi: "Mu zola ti beno talaka bantu kyadi, kasi ve kupesaka minkayulu ya bibulu✝." Ya tsyelika, mu me kwiza ve samu na kubokila bantu ya kudedama, kasi misumuki.»

Kingana ya kisadi yina mangaka na kulemvokila mpangi

21 Na yina, Pyele kwendaka pene-pene ya Yesu, mpe yufulaka: «Mfumu! Bambala yikwa mu fwana kulemvokila mpangi ya munu kana yandi ke na kusala munu yimbi? Bambala nsambwadi?»

22 Yesu vutulaka: «Ve! Mu ke na kutuba ve ti nge fwana kulemvokila yandi bambala nsambwadi. Kasi nge fwana kulemvokila yandi bambala makumi nsambwadi, mpe kusala yawu bambala nsambwadi.

14 «Ya tsyelika, kana beno ke lemvokilaka bampangi ya beno yimbi yina bawu ke salaka beno, Tata ya beno yina kele na mazulu ke lemvokila beno mpe.

31 Na kyadi ya nge ya nene,

nge yekulaka ve bawu samu ti,

bawu manisa na kufwa.

Nge bikaka bawu ve samu ti,

nge kele Nzambi ya lemvo, Nzambi ya kyadi.»

5 Ya kele mbote ti muntu kuvwanda na kyadi ya bampangi, yandi kudefisa na bampangi

mpe yandi yidika mambu na mutindu ya kufwanakana.

17 Bika ti bumbote ya Yave, Nzambi ya beto kuvwanda na beto!

Kindisa kisalu ya maboko ya beto!

Ya tsyelika kindisa kisalu ya maboko ya beto!

16 Na yina, beto kwenda na kivuvu nyonso pene-pene ya kiti ya kintinu ya Nzambi kisika kele bumbote ya yandi. Kuna yandi ke tala beto kyadi, mpe beto ke kuzwa bumbote ya yandi, samu ti yandi sadisa beto na ntangu ya kufwanana.

Luzingu ya malu-malu na Klisto

1 Bampangi! Mutindu Nzambi ke talaka bantu kyadi, mu ke na kukindisa beno na kupesa yandi banzutu ya beno mutindu munkayulu ya moyo, ya longo, mpe yina ke yangidikaka yandi. Ni mutindu yina me fwanana na kusadila ya tsyelika Nzambi.

16 Ya tsyelika, Nzambi zolaka mingi bantu. Ni yawu yina, yandi fidisaka Mwana ya yandi kaka mosi, samu ti konso muntu yina ke kwikila yandi kufwa ve, kasi kuzwa luzingu ya seko.

29 Na bumbote ya yandi, Nzambi pesaka beno luve ya kusadila Klisto, kaka ve na kukwikila yandi, kasi mpe na kutala mpasi samu na yandi.

Ezekyase bokilaka bantu nyonso ya Isayeli samu na mukembo ya Paki

1 Ezekyase fidisaka bantumwa na Isayeli nyonso mpe na Yuda. Yandi sonikaka mikanda na bantu ya Efalayime mpe na bantu ya Manase samu ti yandi kwiza na Yinzo ya Yave, na Yelusalemi, na kukembila mukembo ya Paki na nkumbu ya Yave, Nzambi ya Isayeli. 2 Ntinu, bamfumu mpe mukangu nyonso ya Yelusalemi, vwandaka na mabanza mosi na kukembila mukembo ya Paki na ngonda ya zole. 3 Bawu lendaka ve na kukembila mukembo ya Paki na ntangu ya yawu, samu ti ba byekaka ve banganga-Nzambi na lutangu ya mingi mpe samu ti bantu vukanaka ve na Yelusalemi. 4 Dibanza yina pesaka kilengi na ntinu mpe na mukangu nyonso. 5 Ba sadilaka yawu mpe ba pesaka nsangu na Isayeli nyonso kubanda na Beele-Seba tii na Dane, samu ti ba kwiza na Yelusalemi na kukembila mukembo ya Paki na Nkumbu ya Yave, Nzambi ya Isayeli samu ti bantu mingi kembilaka yawu ve mutindu ba sonikaka. 6 Bantumwa bakaka mikanda yina ntinu na bamfumu sonikaka. Bawu kwendaka na yawu na bambanza nyonso ya Isayeli mpe na Yuda. Bawu salaka mutindu ntinu pesaka lutumu, yandi tubaka: «Beno bantu nyonso ya Isayeli, beno vutuka na Yave, Nzambi ya Abalayami, ya Isaaki mpe ya Yakobi samu ti yandi vutuka na beno, beno yina vuukaka na maboko ya ntinu ya Asili. 7 Beno vwanda ve mutindu bankooko ya beno to bampangi ya beno yina salaka mambu ya busafu na ntadisi ya Yave, Nzambi ya bankooko ya bawu, ni yawu yina Nzambi yekulaka bawu na bambeni mutindu beno ke na kutala yawu. 8 Ntangu yayi, beno manga ve na kutumama na Yave mutindu salaka bankooko ya beno. Kasi beno vutuka na Yinzo ya yandi ya longo yina yandi byekaka samu na bantangu nyonso. Beno sadila Yave, Nzambi ya beno. Ni kuna, nkele ya ngolo ya Yave ke manisa na beno. 9 Kana beno vutuka na Yave, bantu yina nataka bampangi ya beno mpe bana ya beno na bunkole, ke sadila bawu mambu ya mbote mpe bawu ke vutuka na yinsi yayi. Beno fwana zaba ti Yave, Nzambi ya beno, lenda bika beno ve kana beno me vutuka na yandi, samu ti yandi kele mbote mpe ke talaka kyadi ya bantu.»

10 Bantumwa lutaka na konso mbanza na yinsi ya Efalayime, ya Manase tii na Zabulone, bantu vwandaka seka mpe kunyafuna bawu. 11 Kasi bantu ya nkaka ya bifumba ya Asele, ya Manase, ya Zabulone ndimaka yimbi ya bawu mpe kwendaka na Yelusalemi. 12 Na mbanza ya Yuda mpe lulendo ya Nzambi salaka ti bantu nyonso ya mbanza kuvwanda ntima mosi, samu na kusadila musiku ya ntinu mpe ya bamfumu mutindu vwandilaka mambu ya Yave.

Ezekyase salaka mukembo ya Paki

13 Bantu mingi vukanaka na Yelusalemi na ngonda ya zole ya mvula samu na kukembila mukembo ya mampa yina kele ve na levule. Ya vwandaka lukutakanu mosi ya nene. 14 Bawu mwangisaka biyokolo nyonso ya minkayulu yina vwandaka na mbanza Yelusalemi mpe biyokolo nyonso ya maaka ya nsunga ya mbote. Ba losaka yawu na muzumba ya Sedelone. 15 Na kilumbu ya kumi na yiya ya ngonda ya zole, bawu kufwaka bana ya mameme na mukembo ya Paki. Banganga-Nzambi na ba-Levi na nsoni yina, bawu kukivedisaka. Bawu pesaka minkayulu ya kuyoka na Yinzo ya Yave. 16 Muntu-muntu vwandaka na kisika ya yandi ya kisalu mutindu kele Musiku ya Moyize, muntu ya Nzambi. Ba-Levi vwandaka pesa menga ya bibulu na banganga-Nzambi mpe bawu vwandaka mwanga yawu na zulu ya kiyokolo ya minkayulu. 17 Bantu mingi na kati ya mukangu vwandaka ve ya kuvedila. Na yina, ba-Levi zengaka balaka ya bana ya mameme na mukembo ya Paki, samu na bantu nyonso yina vwandaka ya kuvedila ve, samu na kutula bantu yina na lweka samu na Yave. 18 Bantu mingi ya bifumba ya Efalayime, ya Manase, ya Isakale mpe ya Zabulone kukivedisaka ve. Bawu kudyaka na mukembo ya Paki. Na kusala mutindu yina, bawu zitisaka ve mambu yina ba sonikaka, kasi Ezekyase sambilaka samu na bawu mutindu yayi: «Bika ti Yave yina kele Nzambi ya mbote, yandi kukatula masumu 19 ya bantu nyonso yina ke na kusosa Yave Nzambi ya bankooko ya bawu na ntima mosi, ata ti bawu kele ve bantu ya longo to ya kuvedila!» 20 Yave kuwaka lusambulu ya Ezekyase, yandi pesaka dyaka bawu ve kitumbu.

21 Ni yawu yina, bana ya Isayeli yina vwandaka na Yelusalemi, kembilaka na kilengi nyonso, bilumbu nsambwadi ya mukembo ya mampa yina kele ve na levule. Konso kilumbu, ba-Levi na banganga-Nzambi vwandaka zitisa Yave, na lulendo nyonso na bisikulu ya bawu. 22 Ezekyase kindisaka ba-Levi nyonso yina vwandaka sadila Yave na ntima ya mbote. Na bilumbu nsambwadi, bawu vwandaka pesa minkayulu ya madya yina ba kubikaka na mukembo, na minkayulu ya kiwisa mpe ba vwandaka yimbila mikunga samu na kuzitisa Yave, Nzambi ya bankooko ya bawu. 23 Ni yawu yina, mukangu nyonso kuzwaka mabanza ya kubwela bilumbu nsambwadi ya nkaka samu na mukembo. Bawu salaka bilumbu nsambwadi ya kyese na kyese. 24 Bantu talaka kilengi samu ti Ezekyase, ntinu ya Yuda, pesaka na bantu nyonso funda mosi (1 000) ya bangombe, mafunda nsambwadi (7 000) ya mameme na bankombo. Bamfumu mpe pesaka funda mosi (1 000) ya bangombe ya mbakala, na mafunda kumi (10 000) ya mameme na bankombo. Banganga-Nzambi mingi kukivedisaka. 25 Mukangu nyonso ya bantu ya Yuda, banganga-Nzambi, ba-Levi, bantu nyonso yina katukaka na Isayeli mpe bayina vwandaka zinga na Yuda, bawu nyonso talaka kilengi. 26 Kilengi vwandaka ya mingi na Yelusalemi. Kubanda na ntangu ya Salomoni, mwana ya Davidi, ntinu ya Isayeli, dyambu ya mutindu yayi salamaka ntete ve na Yelusalemi. 27 Banganga-Nzambi yina vwandaka ba-Levi, bawu telamaka na kusakumuna bantu. Bandinga ya bawu vwandaka wakana mpe lusambulu ya bawu kumaka tii na dizulu, na Yinzo ya longo ya Yave.

Kento ya kindumba ya yintu ngolo

1 Kana muntu katula kento ya yandi na makwela

mpe kana kento yango kukatuka na makwela

samu na kwenda kwela bakala ya nkaka,

muntu yina lenda baka dyaka kento yango mutindu kento ya yandi?

Ve! Samu ti yinsi lenda sumuka.

Kasi nge Isayeli, nge me sala kindumba na babakala mingi.

Wapi mutindu nge zola kuvutuka dyaka na munu?

Ni Yave me tuba yawu.

2 Zungisa meso na myongo mpe tala:

na wapi mongo nge salaka ve kindumba?

Nge vwandaka vwanda pene-pene ya banzila na kuvingilaka babakala

mutindu mu-Alabe ke vingilaka bantu yina ke zyeta na yinsi ya kuyuma.

Nge me sumuna yinsi na kindumba ya nge

mpe na mambu ya nge ya yimbi.

3 Ni yawu yina, mu yiminaka nge

bamvula.

Bamvula ya ndolo nokaka ve.

Kasi nge tatamanaka kaka na kindumba ya nge.

Nge mangaka na kutala nsoni.

4 Kasi ntangu yayi wapi kisika beto me kuma?

Ni nge ke na kulooka na munu na kutuba: «Tata ya munu,

ndiku ya munu ya buntwenya!

5 Yandi ke kangila munu ntima ya mankululu?

Nkele ya yandi na munu ke manisa ve?»

Ni mutindu yina nge ke na kuzonza,

kasi nge ke na kubika ve na kusala yimbi

mpe nge ke na kulenda na kusala yawu!

Mbokolo samu na kuviluka

6 Na ntangu yina Yosiya vwandaka ntinu, Yave tubaka na munu: «Nge me tala mambu yina salaka Isayeli, kento ya kondwa kukwikama? Yandi vwandaka kwenda na zulu ya konso mongo ya kuzangama, na yisi ya konso yinti ya makasa ya maza samu na kusala kindumba. 7 Ntangu Isayeli salaka mambu nyonso yina, mu yindulaka mutindu yayi: "Isayeli ke vutuka na sika ya munu". Kasi yandi vutukaka ve. Yuda, kibusi ya yandi, yina me kondwa kukwikama talaka yawu. 8 Mu katulaka Isayeli, kiyala, na makwela, samu na mavanga ya yandi nyonso ya kindumba. Mu pesaka yandi mukanda ya kufwa makwela. Kasi mu me tala ti Yuda, kibusi ya yandi, yina me kondwa kukwikama talaka ata boma. Yandi mpe kwendaka sala kindumba mutindu mosi. 9 Isayeli salaka kinsuza na banzambi ya matadi mpe ya bayinti. Na kindumba ya yandi ya ngolo-ngolo yina, Isayeli sumunaka yinsi. 10 Kasi ata nyonso yina, Yuda, kibusi ya yandi yina me kondwa kukwikama, vutukaka ve na munu na ntima ya yandi nyonso. Kuvutuka ya yandi yina yandi vutukaka na sika ya munu vwandaka kaka ya luvunu. Ni Yave me tuba yawu.»

11 Yave tubaka dyaka na munu: «Isayeli, kiyala yina me lutila ya kudedama na Yuda yina me kondwa kukwikama», 12 kwenda samuna mambu yayi na node:

«Nge Isayeli kiyala, vutuka!

Ni Yave ke na kutuba yawu.

Mu ke dasukila dyaka beno ve,

samu ti mu ke ya kukwikama.

Ni Yave me tuba yawu.

Mu ke bumbaka ve nkele ya munu bantangu nyonso.

13 Ndima kaka yimbi ya nge.

Ndima ti ni na Yave Nzambi ya nge, nge mangaka na kutumama.

Nge kukipesaka na banzambi ya nzenza,

na yisi ya konso yinti ya makasa ya maza.

Beno mangaka na kuwa munu.

Ni Yave me tuba yawu.»

Lukutakanu ya bantu kuna na Yelusalemi

14 «Beno vutuka, beno bana ya yintu-ngolo. Ni Yave ke na kutuba yawu. Samu ti ni munu kele Mfumu ya beno! Mu ke baka beno, mosi na mbanza yayi, zole na dikanda yayi, mu ke vutula beno na Siyone. 15 Mu ke pesa beno mivungi yina mu zola munu mosi. Bawu ke twadisa beno na mayela nyonso mpe na mutindu ya kufwanakana.»

16 Yave ke na kutuba: «Na ntangu yina, beno ke butana mpe beno ke kuma mingi na yinsi. Ni Yave ke na kutuba yawu. Ba ke zonzila dyaka ve mambu ya Sanduku ya Ngwisani ya Yave. Ata muntu ke banza na yawu, ata muntu ke bambukila yawu moyo. Ba ke sosa dyaka yawu ve. Ba ke yidika dyaka ya nkaka ve. 17 Na ntangu yina, ba ke bokila Yelusalemi "Kiti ya kintinu ya Yave". Makanda nyonso ya bantu ke kwenda yonzama, na Nkumbu ya Yave, kuna na Yelusalemi. Bawu ke landa dyaka ve banzila ya buzengi yina bantima ya bawu ya yimbi vwandaka nata bawu. 18 Na ntangu yango, bantu ya Yuda ke vukana na bantu ya Isayeli. Bawu ke katuka kintwadi kuna na yinsi ya node samu na kukwiza na yinsi yina mu pesaka mutindu mvwilu na bankooko ya beno.»

Kuvutuka ya Isayeli na sika ya Yave

Yave

19 «Munu mu vwandaka yindula mutindu yayi:

"Aa! Mu vwandaka kwandi na nsatu ya kubakila nge mutindu mwana ya munu!"

Mu vwandaka kwandi na nsatu ya kupesa nge yinsi ya kyese ya kulutila,

mvwilu yina me lutila kitoko na yinza nyonso!

Mu vwandaka banza ti nge ke bokila munu "Tata ya munu",

mpe nge zolaka manga dyaka munu ve.

20 Kasi beno me vwanda ve ya kukwikama na munu, beno bantu ya Isayeli,

mutindu kento yina kele ve ya kukwikama na bakala ya yandi.

Ni Yave me tuba yawu.»

21 «Makelele ke na kuwakana na myongo

Ya kele ni bantu ya Isayeli

ke na kudila mpe ke na kuyawula

samu ti bawu me landa nzila ya yimbi.

Bawu me zimbana Yave, Nzambi ya bawu.

22 Beno vutuka na sika munu,

beno bana ya yintu-ngolo,

mu ke belusa kondwa kukwikama ya beno!»

Bantu ya Isayeli

«Beto bawu yayi,

beto me kwiza ya beto na sika ya nge,

samu ti ni nge Yave Nzambi ya beto.

23 Ee! Nyonso yina ke katukaka na myongo,

yawu ke kaka ya luvunu.

Kaka makelele ya mpamba ba ke salaka kuna na myongo.

Ya tsyelika, ni na sika ya nge Yave, Nzambi ya beto,

kele mpulusu ya Isayeli.

24 Katuka bumwana ya beto,

balusambulu ya nsoni ya Baale

bebisaka yina bankooko ya beto tekilaka na kuzwa,

ya vwanda mameme, bankombo, bangombe ya bawu,

ya vwanda bana ya bawu ya babakala

to bana ya bawu ya bakento.

25 Nsoni me kuma kwandi mutindu mfulu ya beto.

Beto ke na kufukila kaka ni nsoni ya beto.

Samu ti beto me sala yimbi

na ntadisi ya Yave Nzambi ya beto,

beto na bankooko ya beto,

katuka bumwana ya beto tii bubu yayi.

Beto me tumama ve na ndinga ya Yave, Nzambi ya beto.»