18 Ngubani onguNkulunkulu njengawe,

oxolela izono athethelele iziphambeko

zensalela zelifa lakhe na?

Kawuthukutheli kokuphela

kodwa uthokoza ngokutshengisa isihawu.

1 Ake ungihawukele, awu Nkulunkulu,

ngenxa yothando lwakho olungaphuthiyo;

ngenxa yesihawu sakho esikhulu

yesula iziphambeko zami.

2 Hlanza wonke amanyala ami

ungihlambulule esonweni sami.

6 Khumbula, Oh Thixo, isihawu Sakho esikhulu kanye lothando,

ngoba konke kuvela ekadeni.

7 Ungakhumbuli izono zobutsha bami

lezindlela zokuhlamuka kwami;

ngikhumbula ngokufanele uthando Lwakho,

ngoba ulungile, Oh Thixo.

1 Ngingaphansi ekujuleni ngiyakhala kuwe, Thixo;

2 Thixo, zwana ilizwi lami.

Indlebe zakho kazilalele ukukhala kwami

ngicela umusa.

11 Ungasigodli isihawu sakho kimi, Oh Thixo;

sengathi uthando lwakho leqiniso lakho kungahlala kungivikela.

6 Impela okuhle lothando kuzangilandela

zonke insuku zokuphila kwami,

njalo ngizahlala endlini kaThixo

kuze kube nininini.

13 Ngendlela ubaba elozwelo ebantwaneni bakhe,

kanjalo uThixo ulozwelo kulabo abamesabayo;

15 Kodwa isipho kasifani lesiphambeko. Ngoba nxa abanengi bafa ngesiphambeko salowomuntu oyedwa, umusa kaNkulunkulu kanye lesipho eseza ngomusa walowomuntu oyedwa, uJesu Khristu, kwaphuphuma kakhulu okungakanani kwabanengi!

15 Pho-ke, sizakwenza isono ngoba kasikho ngaphansi komthetho, kodwa ngaphansi komusa na? Akunjalo!

4 Kodwa ngenxa yothando lwakhe olukhulu kithi, uNkulunkulu olesihawu esikhulu, 5 wasenza saba ngabaphilayo loKhristu lanxa sasifile eziphambekweni, ngomusa selisindisiwe.

9 Kodwa yathi kimi, "Umusa wami ukwanele ngoba amandla ami apheleliswa ebuthakathakeni." Ngakho ngizazincoma kakhulu-ke ngokuthokoza ngobuthakathaka bami, ukuze amandla kaKhristu ahlale phezu kwami.

13 Lowo ofihla iziphambeko zakhe kayikuphumelela,

kodwa lowo ozivumayo azitshiye ufumana umusa.

7 Omubi kayekele indlela yakhe

loxhwalileyo alahle imicabango yakhe.

Kaphendukele kuThixo, uzakuba lesihawu kuye,

lakuNkulunkulu wethu ngoba uzamthethelela ngesihle.

18 Kodwa uThixo ulangatha ukuba lomusa kini;

uyavuka ukuba alitshengise isihawu.

Ngoba uThixo unguNkulunkulu wokulunga.

Babusisiwe bonke abamlindeleyo!

13 Kodwa hambani liyefunda ukuthi kutshoni lokhu ukuthi, ‘Ngoba ngifuna isihawu hatshi umhlatshelo.’* Ngoba kangilandanga ukubiza abalungileyo, kodwa izoni."

21 UPhethro weza kuJesu wabuza wathi, "Nkosi, umfowethu loba udadewethu ngizamthethelela kangaki nxa elokhu engona na? Kuze kube kasikhombisa na?"

22 UJesu waphendula wathi, "Ngithi hatshi kasikhombisa kodwa okwezikhathi ezingamatshumi ayisikhombisa lesikhombisa.

14 Ngoba nxa libathethelela abayabe belonile, uYihlo osezulwini laye uzalithethelela.

31 Kodwa ngomusa wakho omkhulu kawubaqedanga njalo kawubadelanga, ngoba unguNkulunkulu olomusa, olozwelo.

5 Ubuhle buzakwehlela kuye ophanayo loweboleka ekhululekile,

oqhuba zonke izinto zakhe ngemfanelo.

17 Sengathi umusa weNkosi uNkulunkulu wethu ungehlela kithi;

uqinise umsebenzi wezandla zethu

yebo, qinisa umsebenzi wezandla zethu.

16 Kasisondeleni esihlalweni sobukhosi somusa ngesibindi ukuze samukele isihawu njalo sithole umusa wokusisiza ezikhathini zokuswela kwethu.

1 Ngakho-ke, ngiyalincenga bazalwane, ngenxa yomusa kaNkulunkulu, ukuba linikele imizimba yenu njengemihlatshelo ephilayo, engcwele lemthokozisayo uNkulunkulu, okuyikukhonza kwenu ngomoya.

16 UNkulunkulu walithanda ilizwe kangaka waze wanikela iNdodana yakhe eyiyo yodwa ukuze kuthi loba ngubani okholwa kuyo angabhubhi, kodwa abe lokuphila okungapheliyo.

29 Ngoba kunikelwe kini ngenxa kaKhristu kungasikukholwa kuye kuphela, kodwa lokumhluphekela,

1 UHezekhiya wanxusa bonke abako-Israyeli labakoJuda, wanxusa labako-Efrayimi labakoManase ngezincwadi eJerusalema, ukuthi bazokudla iPhasika ethempelini likaThixo, uNkulunkulu ka-Israyeli. 2 Inkosi lezikhulu zayo lebandla lonke eJerusalema bavumelana ukwenza ukugcina iPhasika ngenyanga yesibili. 3 Babengenelisanga ukwenza umkhosi ngesikhathi sawo ngoba abaphristi babebalutshwana ababezingcwelisile njalo labantu babengabuthananga eJerusalema. 4 Icebo leli lakhanya lilihle enkosini lasebandleni lonke. 5 Baquma ukuthi kukhutshwe ilizwi kulolonke elako-Israyeli kusukela eBherishebha kusiya koDani, kunxuswa abantu ukuthi beze eJerusalema emkhosini wePhasika likaThixo, uNkulunkulu ka-Israyeli. Umkhosi lo wawungakaze wenziwe ngabanengi kusiya ngomthetho owalotshwa phansi.

6 Ngokulaya kwenkosi, izithunywa zangena kulolonke elako-Israyeli lelakoJuda ziphethe izincwadi ezazivela enkosini lasezikhulwini zayo, ezazilotshwe ukuthi:

"Bantu bako-Israyeli, buyelani kuThixo, uNkulunkulu ka-Abhrahama lo-Isaka lo-Israyeli, ukuze abuyele kulabo benu abaseleyo abaphunyuke ezandleni zamakhosi ase-Asiriya. 7 Lingabi njengaboyihlo lezihlobo zenu ababengathembekanga kuThixo, uNkulunkulu wabokhokho babo, waze wabenza baba yisibonelo sokwesabekayo njengoba libona. 8 Lingabi ntamolukhuni njengaboyihlo; zehliseni kuThixo. Wozani endlini yokukhonza aseyingcwelisile kuze kube nininini. Mkhonzeni uThixo uNkulunkulu wenu, ukuze ulaka lwakhe olwesabekayo lusuke kini. 9 Nxa libuyela kuThixo, abafowenu labantwabenu bazathola umusa kulabo ababathumbayo, babuye kulelilizwe, ngoba uThixo uNkulunkulu wenu ulomusa lesihawu. Kayikulifulathela nxa libuyela kuye."

10 Ngakho izithunywa zaphuma zangena kuyo yonke imizi lemizana ko-Efrayimi lakoManase, zayafika lakhonale koZebhuluni, kodwa abantu bazihleka ulunya njalo baziklolodela. 11 Lanxa kunjalo, abanye abantu bako-Asheri labakoManase labakoZebhuluni bazithoba baya eJerusalema. 12 Njalo lakoJuda isandla sikaNkulunkulu sasisebantwini ukubapha ukubambana engqondweni ukuze benze lokho inkosi lezikhulu zayo eyayithe abakwenze, njengokutsho kwelizwi likaThixo.

13 Kwabuthana abantu abalixuku elikhulu eJerusalema bethakazelela uMkhosi weSinkwa esingelaMvubelo ngenyanga yesibili. 14 Basusa ama-alithare eJerusalema bakhucula ama-alithare empepha bawathwala bayawaphosela eSigodini saseKhidironi.

15 Babulala amazinyane ezimvu awePhasika ngosuku lwetshumi lane lwenyanga yesibili. Abaphristi labaLevi bayangeka bazihlambulula baletha iminikelo yokutshiswa ethempelini likaThixo. 16 Basebebuyela ezikhundleni zabo zenjayelo njengokumisiweyo emthethweni kaMosi umuntu kaNkulunkulu. Abaphristi bachela igazi ababeliqhutshelwa ngabaLevi. 17 Njengoba babebanengi ababengazihlambululanga exukwini, abaLevi bahlaba amanye amazinyane ezimvu awePhasika besenzela labo ababengahlanjululwanga ngokomkhuba njalo bengelakho ukuzahlukanisela izimvu zabo phambi kukaThixo. 18 Lanxa abantu abanengi ababevela ko-Efrayimi, koManase, ko-Isakhari lakoZebhuluni babengakazihlambululi, kodwa badla iPhasika, okwakungekho emthethweni olotshiweyo. Kodwa uHezekhiya wabakhulekela wathi: "Kungathi uThixo, olungileyo, angathethelela bonke 19 abamdingayo uNkulunkulu uThixo, uNkulunkulu wabokhokho babo loba bengahlambulukanga ngokomthetho wendawo engcwele." 20 Lakanye uThixo wawuzwa umkhuleko kaHezekhiya wasilisa abantu.

21 Ama-Israyeli ayeseJerusalema athakazelela uMkhosi weSinkwa esingelaMvubelo okwensuku eziyisikhombisa ngokujabula okukhulu, abaLevi labaphristi behlabelela kuThixo insuku zonke, bephathiswa ngamachacho okudumisa uThixo.

22 UHezekhiya wabakhuthaza bonke abaLevi abatshengisela ukuzinikela emsebenzini kaThixo. Ngalezonsuku eziyisikhombisa badla leyongxenye eyayiyisabelo sabo njalo banikela umnikelo wobudlelwano bamdumisa uThixo, uNkulunkulu waboyise.

23 Ibandla lonke laselivumelana ukuthakazelela umkhosi lo okwezinye insuku eziyisikhombisa; ngakho umkhosi bawuqhuba okwezinye insuku eziyisikhombisa bejabula. 24 UHezekhiya inkosi yakoJuda walethela ibandla inkunzi eziyinkulungwane lezimvu ezizinkulungwane eziyisikhombisa lembuzi zingezebandla, kwathi izikhulu lazo zaletha inkunzi eziyinkulungwane lezimvu lembuzi ezizinkulungwane ezilitshumi. Abaphristi abanengi kakhulu bazihlambulula. 25 Ibandla lonke lakoJuda lajabula, ndawonye labaphristi labaLevi labo bonke ababebuthene bevela ko-Israyeli, ndawonye labezizweni ababevela ko-Israyeli lababehlala koJuda. 26 Kwaba lokujabula okukhulu eJerusalema, ngoba kusukela ensukwini zikaSolomoni indodana kaDavida inkosi yako-Israyeli kwakungazange kube lomkhosi onjalo eJerusalema. 27 Abaphristi labaLevi bema babusisa abantu, uNkulunkulu wabezwa, ngoba imikhuleko yabo yafika ezulwini, endaweni yakhe engcwele ahlala kiyo.

1 "Indoda ingehlukana lomkayo

ayitshiye endele kwenye indoda,

kufanele imbuyise futhi na?

Kambe ilizwe lingeke langcoliswa kakhulukazi na?

Kodwa wena usuphile njengesifebe esilezithandwa ezinengi,

kambe khathesi ungabuyela kimi na?"

kutsho uThixo.

2 "Khangela emiqolweni elugwadule ubone.

Kungaphi lapho ongazange udlwangululwe khona?

Emigwaqweni wahlala ulindele izithandwa,

wahlala njengomhambuma enkangala.

Ulingcolisile ilizwe ngobufebe bakho

langobubi bakho.

3 Ngalokho imikhizo imisiwe,

lezulu lentwasa kalinanga.

Ikanti wena uziphethe okwesifebe,

awulanhloni.

4 Kawungibizanga khathesi nje wathi,

‘Baba, mngane wami kusukela ebutsheni bami,

5 uzahlala uzondile kokuphela na?

Ulaka lwakho luzaqhubeka kokuphela na?’

Le yindlela okhuluma ngayo,

kodwa wenza konke okubi ongakwenza."

6 Ekubuseni kwenkosi uJosiya, uThixo wathi kimi, "Ukubonile yini okwenziwe ngu-Israyeli ongathembekanga? Usekhwele phezu kwamaqaqa wonke aphakemeyo langaphansi kwezihlahla zonke eziluhlaza wafebela khona. 7 Ngacabanga ukuthi emva kokuba esenze konke lokhu uzaphinda eze kimi, kodwa kabuyanga, lodadewabo ongathembekanga uJuda wakubona lokho. 8 U-Israyeli ongathembekanga ngamnika incwadi yakhe yesehlukaniso ngamxotsha ngenxa yobufebe bakhe bonke. Kodwa ngabona ukuthi udadewabo ongathembekanga, uJuda, kesabanga, laye wasuka wayafeba. 9 Ngenxa yokuthi ububi buka-Israyeli babungatsho lutho kuye, wangcolisa ilizwe wakhonza amatshe lezihlahla. 10 Kukho konke lokhu, udadewabo ongathembekanga uJuda kabuyelanga kimi ngenhliziyo yakhe yonke, kodwa ngokuzenzisa nje kuphela," kutsho uThixo.

11 UThixo wathi kimi, "U-Israyeli ongathembekanga ungcono kuloJuda ongelaqiniso. 12 Hamba, uyememezela ilizwi leli ngasenyakatho:

‘Phenduka Israyeli ongathembekanga,’ kutsho uThixo,

‘Kangisayikukuhwaqela futhi,

ngoba ngilesihawu,’ kutsho uThixo.

‘Kangiyikuthukuthela kokuphela.

13 Vuma icala lakho nje kuphela,

wahlamukela uThixo uNkulunkulu wakho,

uzihlakazelele kubonkulunkulu bezizweni

ngaphansi kwezihlahla zonke eziluhlaza,

njalo kawaze wangilalela,’ "

kutsho uThixo.

14 "Phendukani, bantu abangathembekanga," kutsho uThixo, "ngoba ngingumyeni wenu. Ngizalikhetha, oyedwa edolobheni lababili emulini ngililethe eZiyoni. 15 Lapho-ke ngizalinika abelusi abathandwa yimi, abazalikhokhela ngokwazi langokuqedisisa. 16 Ngalezonsuku, ubunengi benu sebande kakhulu elizweni," kutsho uThixo, "abantu kabasayikuthi, ‘Ibhokisi lesivumelwano sikaThixo.’ Kaliyikufika emicabangweni yabo kumbe likhunjulwe; kaliyikudingakala, njalo akuyikwenziwa elinye futhi. 17 Ngalesosikhathi iJerusalema bazalibiza ngokuthi yisiHlalo Sobukhosi sikaThixo, njalo izizwe zonke zizabuthana eJerusalema ukuba zihloniphe ibizo likaThixo. Kabasayikulandela inkani yezinhliziyo zabo ezimbi. 18 Ngalezonsuku indlu kaJuda izahlangana leka-Israyeli, njalo ndawonye, zivela elizweni elisenyakatho, zizakuza elizweni engalinika okhokho benu ukuba libe yilifa labo.

19 Mina ngokwami ngathi,

‘Kade ngingathaba kakhulu

ukuliphatha njengamadodana,

ngilinike ilizwe elifunekayo,

ilifa elihle kakhulu ezizweni zonke.’

Bengicabanga ukuthi lizangibiza ngokuthi ‘Baba’

njalo lingaphambuki ekungilandeleni.

20 Kodwa njengowesifazane ongathembekanga kumkakhe,

ubungathembekanga kimi wena ndlu ka-Israyeli,"

kutsho uThixo.

21 Ilizwi liyezwakala emiqolweni elugwadule,

ukukhala lokuncenga kwabantu bako-Israyeli,

ngoba izindlela zabo bazonile

bakhohlwa loThixo uNkulunkulu wabo.

22 "Phendukani, bantu abangathembekanga,

ngizalelapha ukungathembeki kwenu."

"Yebo, sizakuza kuwe,

ngoba unguThixo uNkulunkulu wethu.

23 Impela umsindo wokukhonza izithombe emaqaqeni

lasezintabeni uyinkohliso,

ngempela kuThixo uNkulunkulu wethu

kulensindiso ka-Israyeli.

24 Kusukela ebutsheni bethu onkulunkulu abalihlazo

badlile izithelo zamandla abobaba,

imihlambi yezimvu zabo leyezinkomo zabo,

amadodana abo lamadodakazi abo.

25 Kasilaleni phansi silenhloni,

siphathwe lihlazo lethu.

Ngoba sonile kuThixo uNkulunkulu wethu,

thina sonke kanye labokhokho bethu;

kusukela ebutsheni bethu kuze kube lamhla,

kasimlalelanga uThixo uNkulunkulu wethu."